బీజేపీ ఎంపీ

12:37 - October 12, 2018

న్యూఢిల్లీ: తెలుగుదేశం నాయకులు తప్పు చేయకపోతే ఐటీ దాడులకు ఎందుకు భయపడుతున్నారని  బీజేపీ ఎంపీ  జీవీఎల్ నరసింహారావు తెలుగుదేశం నాయకులను  ప్రశ్నించారు. తెలుగుదేశం పార్టీ ఎంపీ సీఎం రమేష్ కు చెందిన ఇళ్లపై ఈ ఉదయం నుంచి ఆదాయపన్ను శాఖ అధికారులు దాడులు చేస్తున్నారు. ఈ నేపధ్యంలో సీఎం రమేశ్ తనపై కేంద్రం కక్ష సాధింపు చర్యలు చేపట్టిందని ఆరోపించారు. సీఎం రమేష్ వ్యాఖ్యలపై జీవీఎల్ నరసింహారావు మాట్లాడుతూ .... ఒకరిపై కక్షతో సోదాలు జరగటంలేదని,దేశంలో అవినీతిని నిర్మూలించాలని, నల్లధనాన్నిఅరికట్టాలనే లక్ష్యంతో మోడీ ప్రభుత్వం చర్యలు తీసుకుంటోందని చెప్పారు. తెలుగుదేశం నాయకులు తప్పులు చేశారు కనుకే భయపడుతున్నారని జీవీఎల్ అన్నారు. దేశంలో నల్లధనాన్ని వెలికితీసేందుకు ఐటీ,ఈడీ వంటి ప్రభుత్వ సంస్ధలకు కేంద్ర ప్రభుత్వం స్వేఛ్చనిచ్చిందని, ఆయా సంస్ధలు వాటికందిన సమాచారం మేరకు సోదాలు జరుపుతాయని ఆయన చెప్పారు. తెలుగుదేశం పార్టీ నాయకులు తమపై వచ్చిన ఆరోపణలకు సమాధానం చెప్పలేక, రాజకీయ ముసుగులో అక్రమార్జనను కాపాడుకోవచ్చని అనుకుంటున్నారని జీవీఎల్ అన్నారు. 2017లో 3 లక్షల డొల్ల కంపెనీలను కేంద్రం మూసి వేయించిందని, రాహుల్ గాంధీ, సోనియా గాంధీలకు కూడా నల్లధనం విషయంలో నోటీసులు ఇచ్చామని, వారు కోర్టుకు వెళితే వారికి కోర్టులో ఎదురుదెబ్బ తగిలిందని నరసింహారావు చెప్పారు. ఆంధ్రప్రదేశ్ లో వేల కోట్ల రూపాయల కాంట్రాక్టులను నామినేషన్ పద్దతి ద్వారా ప్రభుత్వం సీఎం రమేష్ కంపెనీలకు ఇచ్చిందనే సమాచారం మేరకే సోదాలు నిర్వహిస్తున్నారని,ఆదాయపన్నుశాఖ వారు అడిగిన వాటికి సమాధానాలు ఇచ్చి సీఎం రమేష్ తన నిజాయితీని నిరూపించుకోవచ్చని జీవీఎల్ అన్నారు. 

12:06 - September 17, 2018

ఢిల్లీ : స్వామీజీ కాళ్లను కడగడం..నీళ్లు తలపై చల్లుకోవడం..పెళ్లీళ్లలో అల్లుడి కాలు కడగడం చూస్తూనే ఉంటాం..కానీ ఓ ఎంపీ కాళ్లు కడిగిన కార్యకర్త ఆ నీళ్లను తాగేశాడు...దీనికి సంబంధించిన వీడియో ఇప్పుడు వైరల్ అవుతోంది. వివరాల్లోకి వెళితే...బీజేపీ ఎంపీ నిశికంత్ దూబే ఓ కార్యక్రమంలో పాల్గొన్నారు. ఈ సందర్భంగా ఓ కార్యకర్త ప్రసంగించారు. ఎంపీ నిశికంత్ బ్రిడ్జీ నిర్మించడానికి సహాయం చేశారని..ఈ సందర్భంగా ఆయన కాళ్లను కడిగి నీళ్లు తాగుతానంటూ ప్రకటించారు. అన్నంత పని చేశాడు కూడా. మరి మీరు చూడాలంటే వీడియో క్లిక్ చేయండి. 

20:05 - April 16, 2018

ఉత్తరప్రదేశ్ : యూపీకి చెందిన బిజెపి ఎంపి, సాధువు సాక్షి మహారాజ్‌ మళ్లీ చిక్కుల్లో పడ్డారు. లక్నోలో ఓ బార్‌ అండ్‌ నైట్‌ క్లబ్‌ను ప్రారంభించడం వివాదస్పదమైంది. యూపీ బిజెపి రాష్ట్ర అధ్యక్షుడు మహేంద్రనాథ్‌ పాండే మేనల్లుడు అలీగంజ్‌లో ఏర్పాటు చేసిన నైట్‌క్లబ్‌కు ఉన్నావ్‌ ఎంపి సాక్షి మహారాజ్‌ను ఆహ్వానించారు. సాక్షి మహారాజ్ రిబ్బన్‌ కట్‌ చేసి నైట్‌ క్లబ్‌ను ప్రారంభించారు. అనంతరం నిర్వాహకులు బహూకరించిన గణేషుడి ప్రతిమతో వెనుదిరిగారు. ఈ ఫొటోలు సోషల్‌ మీడియాలో వైరల్ అయ్యాయి. ఓ సాధువై ఉండి బార్‌ను ప్రారంభించడమేంటని విమర్శలు వెల్లువెత్తడంతో సాక్షి మహారాజ్‌ స్పందించారు. అది బార్‌ అన్న విషయం తనకు తెలియదని, తప్పుడు సమాచారంతో తనని మోసం చేశారని చెప్పారు. తన గౌరవానికి భంగం కలిగించిన మహేంద్రనాథ్‌ పాండేపై పోలీసులకు ఫిర్యాదు చేసినట్లు ఎంపి వెల్లడించారు.  

 

16:38 - April 15, 2018

విజయవాడ : ప్రధాన మంత్రిని వ్యక్తిగతంగా నిందించినా, కేంద్రం రాష్ట్రాన్ని మోసం చేసిందని ఆరోపణలు చేసినా.... కేంద్రం నుండి ఏపీకి వచ్చే ప్రయోజనాలు ఆగిపోవన్నారు బీజేపీ రాష్ట్ర అధ్యక్షుడు కంభంపాటి హరిబాబు. ఈ మేరకు విజయవాడలో ఏపీకి కేంద్రం సాయం..హరిబాబు బహిరంగ లేఖ పుస్తకాన్ని ఆయన ఆవిష్కరించారు. ప్రత్యేక హోదా వల్ల కలిగే లాభం అర్థిక లోటు భర్తీ ద్వారా సమకూరుతుందన్నారు. ప్యాకేజీ కాదని హోదా కోరడానికి కారణమేంటో చంద్రబాబు ప్రజలకు వివరించాలన్నారు. 

 

21:03 - December 8, 2017

ముంబై : ప్రధాని నరేంద్ర మోదీకి మహారాష్ట్రకు చెందిన బీజేపీ ఎంపీ షాకిచ్చారు. గోండియా పార్లమెంట్ నియోజకవర్గానికి చెందిన నానా పటోల్ తన లోక్‌సభ సభ్యత్వానికి రాజీనామా చేశారు. ప్రధాని మోదీ నిర్ణయాల వల్లే తాను ఈ నిర్ణయం తీసుకున్నట్లు లోక్‌సభ స్పీకర్ సుమిత్రా మహాజన్‌కు పంపిన రాజీనామా  లేఖలో తెలిపారు. రైతుల సమస్యలను పరిష్కరించడంలో ప్రభుత్వం విఫలమైందన్నారు. నోట్ల రద్దు, జీఎస్టీ కూడా తన రాజీనామా నిర్ణయానికి కారణమని నానా పటోల్‌ పేర్కొన్నారు. నానా బీజేపీ పార్టీలో రెబల్‌గా మారారు. గతంలో పటోల్ కాంగ్రెస్ పార్టీలోనూ పనిచేశారు. 2014 లోక్‌సభ ఎన్నికలకు ముందు ఆయన బీజేపీలో చేరారు. ఎన్‌సీపీ నేత ప్రఫుల్ పటేల్‌ను నానా పటోల్ ఓడించారు.

Don't Miss

Subscribe to RSS - బీజేపీ ఎంపీ