భయం

11:46 - October 11, 2018

హైదరాబాద్ : దేవుడు వున్నాడా? అనే ప్రశ్న వారి వారి నమ్మకాలను బట్టి వుంటుంది. దీని గురించి ఎవరికి ఎటువంటి అభ్యంతరాలు వుండవ్. కానీ దుష్టశక్తులనే విషయంలో మాత్రం దేవుడంటే నమ్మకం లేనివారు కూడా ఒక్కోసారి వీటి విషయంలో డైలమాలో పడిపోతుంటారు. అసలు దేవుడే లేనప్పుడు దెయ్యాలెలా వుంటాయి? అసలు దెయ్యాల వున్నాయా లేవా అనేది పక్కన పెడితే దెయ్యం కంటే భయ్యం మాచెడ్డదబ్బా..అందుకే చీకటిలోకి వెళ్లాలంటే చాలామంది భయపడుతుంటారు. దెయ్యాలు భయపెడుతున్నాయనీ..ఆత్మలు వేధిస్తున్నాయని కొందరు నమ్ముతుంటారు. కానీ ఆత్మలు వేధిస్తున్నాయని ఒక యువతి ఆత్మహత్య చేసుకున్న ఘటన హైదరాబాద్ లో ఈ ఘటన కలకలం రేపింది. ఆత్మలు, కొన్ని దుష్ట శక్తులు తనను  వేంటాడుతున్నాయంటూ ఓ మహిళ పూర్తిగా డిప్రెషన్ లోకి వెళ్లిపోయింది. ఆ డిప్రెషన్ లో భాగంగా భవనంపై నుంచి కిందకి దూకి ఆత్మహత్యకు పాల్పడిన ఘటన బంజారాహిల్స్ పోలీసు స్టేషన్ ఫరిధిలో చోటుచేసుకుంది. 
బంజారాహిల్స్ రోడ్ నం.10 లోని జహీరానగర్‌కు చెందిన అతియా షకీర్ అనే 42 మహిళ భర్త మహ్మద్ షకీర్‌తో కలిసి కెనెడాలో నివాసం ఉంటున్నది. వారికి ఐదుగురు పిల్లలు. కాగా... కొన్ని నెలలు గా తనను దుష్టశక్తులు, ఆత్మలు వెంటాడుతున్నాయంటూ అతియా షకీర్ తీవ్రమైన ఆందోళనకు గురవటంతో తనను హైదరాబాద్‌కు పంపించాలంటూ భర్తకు చెప్పడంతో మూడు రోజుల క్రితం కెనెడా నుంచి పంపించాడు. 
టోలీచౌకి సమీపంలోని పారామౌంట్ కాలనీలో నివాసం ఉంటున్న సోదరుడు జమీల్ ఉర్ రహ్మాన్ ఇంటికి వచ్చింది. రెండు రోజులుగా జహీరానగర్‌లోని సొంతింట్లో ఉంటున్న నేపథ్యంలో ఇంట్లో ఎవరూ లేని సమయంలో భవనంలోని ఐదో అంతస్తు పైకి ఎక్కిన అతియా కిందకు దూకి ఆత్మహత్యకు పాల్పడింది. సమాచారం అందుకున్న అతియా షకీర్ సోదరుడు జమీల్ ఉర్ రహ్మాన్ తదితరులు సంఘటనా స్థలానికి చేరుకుని పోలీసులకు ఫిర్యాదు చేశారు.  షకీర్ మానసిక పరిస్థితి తెలుసుకున్న డిప్రెషన్‌తో బాధపడుతుండడంతో ఆత్మహత్యకు పాల్పడి ఉండవచ్చని పోలీసులు పేర్కొన్నారు. ఈ మేరకు పోలీసులు కేసు నమోదు చేసుకుని దర్యాప్తు చేపట్టారు.

16:28 - July 16, 2018
12:42 - July 8, 2018

తూర్పుగోదావరి : ముందస్తు ఎన్నికలు రాజకీయ నాయకుల్లో గుబులు పుట్టిస్తున్నాయి. ఆరునెలల ముందే ఎన్నికలు వస్తాయన్న వార్తలు.. రాజకీయ వర్గాల్లో వేడి పుట్టిస్తోంది. అయితే సిట్టింగ్ ఎమ్మెల్యేల పరిస్థితేంటి ..? ఆశావహుల ఆశల సంగతేంటి..? దీంతో ముందస్తు ఎన్నికల ప్రచారంతో నాయకుల్లో ఆందోళన పెరుగుతోంది. తూర్పుగోదావరి జిల్లాలో ముక్కోణ పోరు ఖాయమనే వాదన వినిపిస్తోంది. తూర్పుగోదావరి రాజకీయాలు శరవేగంగా మారిపోతున్నాయి...పార్టీలు, నాయకులు ఏడాది తరువాత జరగబోయే ఎన్నికలకు ఇప్పటినుంచే అన్నీ సిద్ధం చేసుకుంటున్నారు. ముందస్తు ఎన్నికల కథనాలతో క్షేత్రస్థాయిలో సందడి కనిపిస్తోంది. దీంతో రాష్ట్రంలోనే అధిక నియోజకవర్గాలున్న తూర్పుగోదావరి జిల్లాలో నాయకులకు ముందస్తు ఎన్నికల వార్త పిడుగులామారింది.

తూర్పుగోదావరి జిల్లాలో అధికార, ప్రతిపక్ష పార్టీల నేతలు ఎన్నికలకు ఏడాది ముందు నుంచే హడావుడి చేస్తున్నారు. ఒక పక్క ప్రతిపక్ష నాయకుడి పర్యటన ఎన్నికల ప్రచారాన్ని తలపిస్తుంటే.. మరోవైపు అధికార పార్టీ అడపా తడపా కార్యక్రమాలు నిర్వహిస్తూ.. ఎన్నికల ప్రచారాన్ని బలపరుస్తోంది. జిల్లాలో కొన్నిరోజుల క్రితం సీఎం చంద్రబాబు ధర్మ పోరాట దీక్ష చేయడం ఎన్నికల వాతావరణాన్ని సృష్టించింది. అటు జనసేన సైతం జిల్లాలో పర్యటించాలనుకోవడం.. పొలిటికల్‌ హీట్‌ను పెంచుతోంది.

సీఎం చంద్రబాబు ఏకంగా రైతు, మహిళా, సంక్షేమ అంశాల వారీగా ఆరునెలల కాలంలో 75 బహిరంగ సభలకు సిద్దమవుతున్నారు. అందులో తూర్పుగోదావరి జిల్లాలో అధికంగా బహిరంగ సభలు పెట్టే అవకాశముందని ఇక్కడి నాయకులు చెబుతున్నారు. అయితే నిత్యం ఏదో ఒక రూపంలో ప్రజల్లోకి వెళ్లడమే టీడీపీ లక్ష్యమైతే... ప్రతిపక్ష పార్టీ నేతలు పాదయాత్ర చేస్తూనే.. పలు ప్రాంతాల్లో ప్రెస్ మీట్ లు పెట్టి ప్రజల్లోకి వెళ్లేందుకు అనేక కార్యక్రమాలు చేపడుతున్నారు.

జిల్లాలో ప్రస్తుతం ఫిరాయించిన ఎమ్మెల్యేలతో కలుపుకుని టీడీపీలో 16మంది ఉండగా... ఇద్దరు వైసీపీలో...ఒకరు బీజేపీలో ఉన్నారు. అధికార పార్టీ సర్వే చేస్తే... సిట్టింగ్‌లలో కొందరికి సీట్లు దక్కవనే ఊహాగానాలు వినిపిస్తున్నాయి. వైసీపీ నుంచి వచ్చిచేరిన రంపచోడవరం ఎమ్మెల్యేతో పాటు.. పి.గన్నవరం, అమలాపురం ఎమ్మెల్యేలకు టిక్కెట్లు అనుమానమేనని టీడీపీ నేతల్లో చర్చ సాగుతోంది. ఇక వైసీపీ నుంచి కూడా పలువురు కోఆర్డినేటర్లను చివరి నిమిషంలో పక్కన పెట్టే అవకాశం ఉందని..అలాగే పెద్దాపురం, పిఠాపురం, మండపేట నియోజకవర్గాల కోఆర్డినేటర్లకు కూడా టిక్కెట్లు దక్కే అవకాశం లేదని భావిస్తున్నారు.

తూర్పున మరోసారి ముక్కోణపు పోరు ఖాయమనే వాదన వినిపిస్తోంది. గతంలో ప్రజారాజ్యం అనుభవంతో ఈసారి జనసేన ప్రభావితం చేసే అవకాశం ఉన్నందున ఆపార్టీలోకి పలువురు నేతలు జంప్ కావడానికి సిద్ధపడుతున్నారు. ఈ జాబితాలో బీజేపీకి చెందిన ఎమ్మెల్యే ఆకుల సత్యన్నారాయణ పేరు కూడా వినిపిస్తోంది. టీడీపీ, వైసీపీ నుంచి మరికొందరి చేరిక ఖాయం అని చెప్పవచ్చు. అయితే ముందస్తు ఎన్నికలు వస్తే ఎవరికి టిక్కట్ దక్కుతుందోననే చర్చ వాడవాడలా వినిపిస్తోంది. మొత్తంగా ముందస్తు ఎన్నికల వాతావరణం ఏర్పడుతున్న తరుణంలో రాజకీయ వేడి మొదలవుతోంది. ఎవరి నియోజకవర్గాలను వారు సర్ధుకునే ప్రయత్నాల్లో ఉన్నారు. ఓటరు మహాశయులను మచ్చిక చేసుకునే పనిలో పడ్డారు నాయకులు. మరి ఈసారి తూర్పు గోదావరి జిల్లా ఓటరు ఎవరిని కరుణిస్తారో వేచి చూడాలి.

11:23 - June 4, 2018

కడప : ఓవైపు నిఫా వైరస్‌ భయంతో జనం ఆందోళన పడుతుంటే..  వారేమో ఏకంగా గబ్బిలాలతోనే సహజీవనం చేస్తున్నారు. కబోది పక్షులను దేవతలకు ప్రతిరూపంగా నమ్ముతున్నారు. గబ్బిలాల మలంతో చిన్న పిల్లలకు స్నానం  చేయించి... మెడలో గబ్బిలాల కళేబరాలు, ఎముకలు  వేస్తున్నారు. కడప జిల్లాలోని ఓ గ్రామంలో ఈ  వింత ఆచారం పాటిస్తున్నారు. 

గబ్బిలం పేరెత్తితేనే ఇపుడు ఇండియా జనం వణికిపోతున్నారు. గబ్బిలం నుంచి నిఫావైరస్‌ వ్యాపిస్తోందని ప్రచారం హోరెత్తుతోంది. అలాంటింది ఈ గ్రామంలో మాత్రం ఇలా గబ్బిలాలను దేవతా పక్షులుగా కొలుస్తున్నారు. అంతేకాదు.. గబ్బిలాలమలాన్ని  చిన్నపిల్లల ఒంటికి పూస్తే రోగాలు నయం అవుతాయని ఈ గ్రామస్తులు నమ్ముతున్నారు. 

కడప జిల్లాలోని రైల్వేకోడూరుకు 5 కిలోమీటర్ల దూరంలో ఉన్న మాధవరంపోడు గ్రామం. 35 ఏళ్ల క్రితం కక్షలతో, కొట్లాటలతో ఈ గ్రామంలో అట్టుడికేది. నిత్యం ఘర్షణలతో  ప్రశాంతత అనేది లేకుండా పోయింది. అలాంటి పరిస్థితుల్లో ఈ గ్రామానికి అనుకోని అతిథుల్లా వచ్చి చేరాయి ఈ గబ్బిలాలు. ఊరి చివర ఉన్న అమ్మదేవత చెట్టుపైకి గబ్బిలాలు వచ్చి చేరాయి. క్రమేణా ఊర్లోని చింత, కొబ్బరి, రావి, తదితర చెట్లపై కీ చేరి అక్కడే నివాసం ఏర్పురచుకున్నాయి.  ఏమయిందో ఏమోగాని గబ్బిలాలు గ్రామంలోకి వచ్చినప్పటి నుంచి ఊరిలో కక్షలు  తొలిగిపోయి శాంతి ఏర్పడిందని మధవరంపోడు గ్రామస్తులు అంటున్నారు. 

అనారోగ్యానికి గురైన పిల్లలను ఆదివారం రోజున ఈ చెట్టు వద్దకు తీసుకొచ్చి గబ్బిలాల మలంను ఒళ్లంతా పూసి అక్కడే స్నానాలు చేయించడం ఆనవాయితీగా పెట్టుకున్నారు. అంతేకాదు  బలహీనంగా ఉన్న చిన్నారులకు  ఇలా గబ్బిలాల కళేబరాలను , ఎముకలను   మెడలో తగిలిస్తున్నారు. అలా చేస్తే పిల్లల రోగాలు నయం అవుతున్నాయని మాధవరంపోడు, చుట్టుపక్కల గ్రామాల ప్రజలు కూడా నమ్ముతున్నారు.

నిపా వైరస్ కారణంగా కేరళలో 15 వరకు మృతి చేందడంతో గబ్బిలం అన్న పేరు వింటేనే ప్రజలు భయపడుతున్నారు. కానీ ఈ మాధవరంపోడు గ్రామస్తుల్లో మాత్రం నిపా వైరస్ గురించి ఆందోళన కనిపించడం లేదు. అయితే నిపుణులు మాత్రం నిపా వైరస్ వస్తే పరిస్థితి దారుణంగా ఉంటుందని హెచ్చరిస్తున్నారు. ఇక్కడి ప్రజలకు ప్రభుత్వం  నిఫావైరస్‌ వ్యాప్తిపై అవగహన కల్పించాల్సిన అవసరం ఎంతో ఉంది.   


 

12:23 - May 23, 2018

రంగారెడ్డి : తెలుగు రాష్ట్రాలను సోషల్ మీడియా పోస్టులు వణికిస్తున్నాయి. హంతక ముఠా సంచారంపై సోషల్ మీడియాలో విచ్చవిడిగా పోస్టులు దర్శనమిస్తున్నాయి. పలు పల్లెలు భయంతో రాత్రుళ్లు నిద్రకు దూరమౌతున్నాయి. సొంతంగా వంతుల వారీగా గ్రామీణులు పహారా కాస్తున్నారు. అపరిచితులపై అనుమానంతో దాడులకు గ్రామస్తులు తెగబడుతున్నారు. భయంతో చట్టాన్ని గ్రామీణులు చేతుల్లోకి తీసుకుంటున్నారు. అమాయకంగా దాడులు..హత్య కేసుల్లో ప్రజలు ఇరుక్కుంటున్నారు. దాడులకు దిగే వారిపై కఠిన చర్యలుంటాయని పోలీసులు హెచ్చరిస్తున్నారు.పోలీసు ప్రకటనలు ప్రజల భయాన్ని పారదోలడం లేదు. ఇబ్రహింపట్నంలోని కానాపూర్ లో పరిస్థితులు తెలుసుకొనేందుకు టెన్ టివి ప్రయత్నించింది. అక్కడి గ్రామస్తులు ఏమనుకుంటున్నారో తెలుసుకొనేందుకు వీడియో క్లిక్ చేయండి. 

16:03 - April 11, 2018

హైదరాబాద్ : తెలంగాణ జన సమితి అంటే కేసీఆర్‌కు భయం పట్టుకుందని.. అందుకే తమ సభకు ప్రభుత్వం అనుమతి నిరాకరిస్తోందని టీజేఎస్‌ అధ్యక్షుడు కోదండరామ్‌ అన్నారు. సభలకు అనుమతివ్వకుండా ప్రభుత్వం నిరంకుశ పోకడలు పోతోందని విమర్శించారు.  పొల్యూషన్‌ సాకు చూపుతూ సభను అనుమతి నిరాకరించడం ఎంతవరకు సబబు అని ప్రశ్నించారు. ఎల్‌బీ స్టేడియంలో ఓ సినిమా వేడుక నిర్వహించినప్పుడు పొల్యూషన్‌ ఏర్పడలేదా అని ప్రశ్నించారు. ప్రభుత్వం తమకు ఇష్టంలేనివారి పట్ల కక్షపూరితంగా వ్యవహరించడం సరికాదన్నారు. సభలు, మీటింగ్‌లు పెట్టుకోవడం రాజ్యాంగం కల్పించిన హక్కని... ఆ హక్కునే కేసీఆర్‌ కాళరాస్తున్నారని మండిపడ్డారు. 

 

10:57 - April 8, 2018

కామారెడ్డి : జిల్లాలో మూడు గోదాముల్లో భారీ అగ్నిప్రమాదం జరిగింది. భయంతో స్థానికులు పరుగులు తీశారు. సుమారు రూ.10 లక్షల మేర ఆస్తినష్టం సంభవించింది. 

17:33 - November 18, 2017

టిబెట్‌ : అరుణాచల్‌ప్రదేశ్‌ సమీపంలోని టిబెట్‌లో ఉదయం భూకంపం సంభవించింది.  భారత్‌-చైనా సరిహద్దులో భూప్రకంపనలు చోటుచేసుకున్నాయి. భూకంప తీవ్రత రిక్టర్‌స్కేల్‌పై 6.9గా నమోదైంది. ఉదయం ఆరున్నరకు భూ ప్రకంపనలు చోటుచేసుకున్నాయని చైనా భూకంప నెట్‌వర్క్‌ సెంటర్‌ తెలిపింది. ఆ తర్వాత మరో రెండు గంటలకు అదే ప్రాంతంలో 5 తీవ్రతతో కూడిన ప్రకంపనలు సంభవించినట్లు చెప్పింది. భూ ప్రకంపనలతో ప్రజలు భయంతో ఇళ్లల్లోంచి బయటకు పరుగులు తీశారు.

07:49 - October 16, 2017

హైదరాబాద్ : టీఆర్‌ఎస్‌, టీ జేఏసీల మధ్య పచ్చగడ్డి వేస్తే భగ్గుమనే పరిస్థితి ఉంది. ప్రభుత్వ విధానాల్లోని లోపాలను ఎత్తిచూపుతున్న టీ జాక్‌ చైర్మన్‌ కోదండరామ్‌పై గులాబీ పార్టీ నేతలు ఆగ్రహావేశాలు వ్యక్తం చేస్తున్నారు. తెలంగాణ ఉద్యమాన్ని క్షేత్ర స్థాయికి తీసుకెళ్లిన టీజాక్.. ఇప్పుడు ప్రభుత్వ వైఫల్యాలను అదే స్థాయిలో తీసుకెళ్లే ప్రయత్నం చేస్తోంది. టీఆర్ఎస్ ప్రభుత్వం పగ్గాలు చేదపట్టిన రెండేళ్ల వరకు సైలెంటాగానే ఉన్న టీజాక్ అండ్‌ టీమ్‌.... ఆ తర్వాత నుంచి తమ ప్రణాళికలను అమలు చేయడం మొదలు పెట్టింది. ఇటీవలే తమ కార్యక్రమాలకు మరింత పదును పెట్టడం ప్రారంభించింది. ప్రతిపక్షాల దీటుగా టీజాక్ కూడా ప్రభుత్వంపై విమర్శలు గుప్పిస్తోంది

కోదండరాంకు అడుగడుగునా ఆటంకాలు
టీ జేఏసీ చైర్మన్‌ కోదండరామ్‌ చేస్తున్న అమరలు స్ఫూర్తి యాత్ర మరోసారి వివాదాస్పదమవుతోంది. గతంలో మంత్రి కేటీఆర్ ప్రాతినిథ్యం వహిస్తున్న సిరిసిల్ల జిల్లాలె అమరలు స్ఫూర్తి యాత్రలో వివాదం చోటు చేసుకోగా... తాజాగా వరంగల్ జిల్లా యాత్రలో అంతకంటే ఎక్కువగానే దూమారం రేపుతోంది. వరంగల్ లో మంత్రి కేటీఆర్ పర్యటన రోజే టీజాక్ చైర్మన్ కోదండరామ్‌ కూడా అమరులు స్ఫూర్తి యాత్ర తలపెట్టడంతో పోలీసులు అడుగడుగునా ఆటంకాలు సృష్టించి బ్రేకులు వేశారు. పోలీసులు వ్యవహరించిన తీరు వివాదాస్పదం కావడంతో కేసీఆర్‌ ప్రభుత్వంపై టీజాక్ నేతలు మండి పడుతున్నారు. ప్రభుత్వం బలహీన పడుతోండటం వల్లే అరెస్టులతో అణచివేత ధోరణి అవలంభిస్తోందని ఆగ్రహం వ్యక్తం చేస్తున్నారు. టీఆర్‌ఎస్‌ పాలకులు తమ వైఫల్యాలను కప్పిపుచ్చుకునే పనిలో పడ్డారని కోదండరామ్‌ కన్నెర్ర చేశారు. ఈ పరిణామాలను బేరీజు వేసుకుంటున్న గులాబీ పార్టీ నేతలు టీజాక్ వ్యూహాలకు చెక్‌ పెట్టడంపై దృష్టి కేంద్రీకరించారు. 

21:54 - October 11, 2017

హైదరాబాద్ : వర్షాలు ప్రజలను భయపెడుతున్నాయి. వరుసగా కురుస్తున్న వర్షాలతో లోతట్టు ప్రాంతాలు జలమయమయ్యాయి. పలు ప్రాంతాల్లో ఇళ్లలోకి నీళ్లు చేరడంతో ప్రజలు ఆందోళన చెందుతున్నారు. రాయలసీమలోనూ వర్షాలు భారీగా కురవడంతో ఇళ్లలోకి నీళ్లు చేరాయి... పంటలు నీట మునిగాయి. ఇన్‌ ఫ్లో పెరగడంతో... శ్రీశైలం ప్రాజెక్ట్ నిండటంతో.. గురువారం ఉదయం నీటిని విడుదల చేయనున్నారు.  

కొన్ని రోజులుగా కురుస్తున్న వర్షాలతో భాగ్యనగరం బెంబేలెత్తుతుంది. నాలాలు, డ్రైనేజిలు పొంగిపొర్లతుండడంతో రోడ్లన్నీ చెరువులను తలపిస్తున్నాయి. కాలనీలన్నీ జలమయమవుతున్నాయి. ఉదయం కురిసిన భారీ వర్షానికి మళ్లీ నగరంలోని పలు ప్రాంతాల్లో ఇళ్లు, అపార్ట్‌మెంట్లలోకి నీళ్లు చేరాయి. రోడ్లపై భారీగా నిలవడంతో వాహనదారులు ఇబ్బందులు పడ్డారు. మరోవైపు ఇళ్ల నుంచి బయటకు రావాలంటే ప్రజలు ఇబ్బందులు పడుతున్నారు. 

మరోవైపు రామాంతపూర్‌ చెరువు పొంగిపొర్లడంతో 10 రోజులుగా కాలనీలు నీటమునిగాయి. దీంతో ప్రజలు అనేక ఇబ్బందులు పడుతున్నారు. ఇక అదేవిధంగా గత కొన్ని రోజులుగా తెలుగు రాష్ట్రాలను వర్షాలు ముంచెత్తుతున్నాయి. పశ్చిమగోదావరి జిల్లా పోలవరంలోని ఇసుక వాగు పొంగిపొర్లింది. గ్రామంలోకి ఒక్కసారిగా నీళ్లు రావడంతో.. పలు ఇళ్లలోని సామాగ్రితో పాటు.. పశువులు కొట్టుకుపోయాయి. ప్రజలంతా నిరాశ్రయులయ్యారు. ఇక కొత్తూరు కాజ్‌వై పై నుండి వరద నీరు ప్రవహిస్తుండడంతో 19 పోలవరం ఏజెన్సీ గ్రామాలకు రాకపోకలు నిలిచిపోయాయి. 

నాలుగు రోజులుగా కురుస్తున్న వర్షాలకు రాయలసీమలో భారీ వర్షాలు కురుస్తున్నాయి. గతంలో ఎన్నడూ లేని విధంగా వాగులు, వంకలు పొంగిపొర్లుతున్నాయి. దీంతో ప్రాజెక్టుల్లోకి భారీగా వరద నీరు చేరుతోంది. ఎన్నో ఏళ్లుగా నిండని ప్రాజెక్టులు ఈసారి జలకళను సంతరించుకుంటున్నాయి. 

అనంతపురం జిల్లాలో యోగి వేమన రిజర్వాయర్‌ నిండుకుండను తలపిస్తోంది. దీంతో అధికారులు ఎనిమిది గేట్లు ఎత్తి నీరు దిగువకు విడుదల చేశారు. పెదపప్పూరు మండలంలోని చాగల్లు-పెండెకల్లు రిజర్వాయర్‌కు భారీగా వరద నీరు రావడంతో గండి పడింది. దిగువ ప్రాంతాలకు నీళ్లు రావడంతో ప్రజలు భయాందోళనలకు గురయ్యారు. అప్రమత్తమైన అధికారులు ప్రజలను ఖాళీ చేయించారు. ఇక తాడిపత్రిలోని వర్ష ప్రభావిత ప్రాంతాల్లో కలెక్టర్‌ వీరపాండ్యన్‌ పర్యటించారు. కాలువలు, చెరువలకు పడిన గండ్లను పరిశీలించారు. నష్టపోయిన పంటలను పరిశీలించి.. తాత్కాలిక నివేదికలు పంపాలని అధికారులను ఆదేశించారు. 

కర్నూలు జిల్లాలోనూ భారీ వర్షాలు కురుస్తున్నాయి. పలు ప్రాంతాల్లో ఇళ్లలోకి నీళ్లు చేరాయి. మూడు రోజులుగా ఎడతెరిపిలేని వర్షంతో ప్రముఖ శైవక్షేత్రం యాగంటి ఆలయంలోకి వర్షపునీరు చేరింది. దీంతో భక్తుల రాకపోకలకు తీవ్ర అంతరాయం ఏర్పడింది. 

అనంతపురం జిల్లాలో స్వర్ణముఖీ నదీ జలాల విషయంలో.. మరోసారి ఆంధ్రా, కర్ణాటక రైతుల మధ్య వివాదం చెలరేగింది. కోతకు గురైన వంకకు ఏపీకి చెందిన రైతులు మరమ్మతులు చేసేందుకు వెళ్లగా కర్ణాటక రైతులు అడ్డుకున్నారు. దీంతో ఇరు రాష్ట్రాల రైతుల మధ్య వాగ్వాదం చోటు చేసుకుంది. 

గత 10 రోజులుగా కురుస్తున్న వర్షాలతో పంటలు నీట మునిగాయని రైతులు ఆవేదన వ్యక్తం చేస్తున్నారు. కడప జిల్లా పులివెందులలో అరటి, వేరుశనగ, పత్తి, ఉల్లి పంటలు పూర్తిగా నష్టపోయామని రైతులు ఆవేదన వ్యక్తం చేస్తున్నారు. తమను ప్రభుత్వమే ఆదుకోవాలని కోరతున్నారు. 

వరుస వర్షాలతో శ్రీశైలం ప్రాజెక్ట్‌ నిండుకుండను తలపిస్తోంది. ప్రాజెక్ట్‌ మొత్తం నీటి సామర్ధ్యం 885 అడుగులు కాగా... ప్రస్తుత నీటిమట్టం 884.40 అడుగులకు చేరింది. ప్రాజెక్ట్‌లోకి లక్షా 50 వేల ఇన్‌ఫ్లో కొనసాగుతుండగా... 88 వేల క్యూసెక్కుల నీటిని కిందకు వదులుతున్నారు. మొత్తానికి గత కొన్ని రోజులుగా కురుస్తున్న భారీ వర్షాలతో ప్రాజెక్టులు నిండుకుండను తలపిస్తుండగా... అకాల వర్షాలతో పంటలు నష్టపోయామని రైతులు వాపోతున్నారు. 

Pages

Don't Miss

Subscribe to RSS - భయం