భారతదేశం

15:31 - September 7, 2018

పాకిస్థాన్ : పాకిస్థాన్ సార్వత్రిక ఎన్నికల్లో విజయం సాధించి ప్రభుత్వాన్ని ఏర్పాటు చేసుకున్నారు ఇమ్రాన్ ఖాన్. పాకిస్తాన్ తెహ్రీక్-ఏ-ఇన్సాఫ్ పార్టీని స్థాపించి పాక్ లో అధికారంలోకి వచ్చారు. కాగా పాకిస్థాన్ లో అధ్యక్షుడు ఎవరైనా..ముఖ్యమంత్రి ఎవరైనా అధికారం మాత్రం సైన్యానిదే. సైన్యం కనుసన్నల్లోని అన్నీ జరుగుతుంటారు. ఈ నేపథ్యంలో ఇమ్రాన్ అధికారంలోకి వచ్చాక పాక్ విధి విధానాలు మారతాయనే అందరు ఊహించారు. కానీ సదా మామూలుగానే పాత పద్ధతిలోనే పాక్ కొనసాగుతోంది. ఈ నేపథ్యంలో దేశంలో కొత్త ప్రభుత్వం ఏర్పడినప్పటికీ ఆ దేశ సైన్యం తీరు మాత్రం మారలేదు. ఇండియాను రెచ్చగొట్టేలా పాక్ ఆర్మీ చీఫ్ జావెద్ బజ్వా వ్యాఖ్యలు చేశారు. సరిహద్దుల్లో తమ సైనికులను చంపితే... అంతకంత ప్రతీకారం తీర్చుకుంటామని వార్నింగ్ ఇచ్చారు. స్వాతంత్ర్యం కోసం పోరాడుతున్న కశ్మీర్ ప్రజలకు శాల్యూట్ చేస్తున్నానని చెప్పారు. పాకిస్థాన్ లో జరిగిన డిఫెన్స్ డే ఫంక్షన్ లో మాట్లాడుతూ, ఆయన ఈ వ్యాఖ్యలు చేశారు. కశ్మీర్ ప్రజలకు తాము మద్దతుగా ఉంటామని చెప్పారు. కశ్మీర్ సోదరులు, సోదరీమణులు చేస్తున్న త్యాగాలు చాలా గొప్పవని అన్నారు. 

21:27 - September 4, 2018

జమ్ము కశ్మీర్ : దేశ సరిహద్దుల్లో ప్రాణాలకు తెగించి పోరాడే జవానుల ధైర్యసాహసాలతో దేశ ప్రజలకు భరోసా నిచ్చే జవానుల త్యాగాల గురించి ఎంత చెప్పుకున్నా తక్కువే. ఆ జవాన్లకు దిశానిర్దేశం చేస్తు అనుక్షణం అప్రమత్తంగా వుండి..దేశ భద్రత బాధ్యతను కడు సమర్థవంతంగా నిర్వహించే ఆర్మీ అధికారుల సమయోచిత శక్తి యుక్తులతో భారత భద్రత ఆధారపడి వుంది. ఈ నేపథ్యంలో ఉన్నతస్థాయిలోవుండే ఆర్మీ అధికారులకు నైతికత కూడా అంతే ముఖ్యం. కానీ కొందరు అత్యంత ఉన్నత హోదాలో వున్నప్పటికీ..వారి సహజ నైజంతో తమ నైతికతను దిగజార్చుకుంటుంటారు. ఇది వారి అనైతకతకే కాదు దేశ భవిత్రకు, భద్రతకు కూడా ముప్పువాటిల్లే అవకాశం లేకపోలేదు. ఈ నేపథ్యంలో ఇటువంటి అధికారులకు సైనిక దళాధిపతి జనరల్ బిపిన్ రావత్ హెచ్చరికలు జారీ చేశారు.

సైన్యంలో అనైతిక కార్యకలాపాలకు పాల్పడేవారిపై కఠినచర్యలు తీసుకుంటామని ఆర్మీ చీఫ్ బిపిన్ రావత్ హెచ్చరించారు. మేజర్ లీటుల్ గొగోయ్ ఓ స్థానిక యువతిని శ్రీనగర్‌లోని ఓ హోటల్‌కు రప్పించుకున్న వ్యవహారంపై సైనిక న్యాయస్థానం లీటుల్ ను దోషిగా తేల్చింది. ఇది ప్రజల దృష్టిలో సైన్యం ప్రతిష్ఠను దిగజార్చే చర్యగా భావిస్తున్నారు.

నేరాన్ని బట్టి మేజర్ గొగోయ్‌పై చర్య తీసుకుంటామని జనరల్ రావత్ స్పష్టంచేశారు. అనైతిక చర్యలను, అవినీతిని ఏమాత్రం ఉపేక్షించబోమని స్పష్టం చేస్తున్నాను. సైనిక న్యాయస్థానం మేజర్ గొగోయ్‌ని దోషిగా తేల్చింది. ఆయనను కోర్ట్‌మార్షల్ చేయాలని సిఫారసు చేసింది. అమ్మాయిని హోటల్‌కు పిలిపించుకున్న సమయంలో మేజర్ గొగోయ్ తన డ్యూటీ ప్రదేశానికి దూరంగా ఉన్నారని కూడా సైనిక న్యాయస్థానం తేల్చింది. ఇది మరింత తీవ్రమైన క్రమశిక్షణ ఉల్లంఘన కిందకు వస్తుంది. కాగా గతంలో కూడా మేజర్ గొగోయ్ ఓ కశ్మీరీ యువకుని తన జీపు బానెట్‌కు కట్టేసి అల్లర్లు జరిగే ప్రాంతాల్లో తిరగడం తీవ్ర విమర్శలకు గురైన విషయం తెలిసిందే. రాళ్లురువ్వే వారిని అదుపు చేసేందుకు అలా తిప్పినట్టు ఆయన తర్వాత ప్రకటించినా ప్రజల్లో మాత్రం అది పలు విమర్శలకు దారి తీసింది. అప్పట్లో తీవ్రవాద వ్యతిరేక చర్యలు నిరంతరంగా చేపట్టినందుకు జనరల్ రావత్ ఆయనకు ఆర్మీచీఫ్ కమెండేషన్ కార్డు బహూకరించారు. ఏడాది తిరిగేలోపు మేజర్ గొగోయ్ అనైతిక ప్రవర్తన కారణంగా తలదించుకోవాల్సి వచ్చింది.

కాగా ఆర్మీలో ఎంతటి కఠినతరమైన నిబంధనలుంటాయో అంతటి బాధ్యత కూడా ఆయా అధికారులపై వుందనే విషయాన్ని వారు నిద్రలో కూడా మరిచిపోయే వీలులేదు. ఈ నిబంధనలు అతిక్రమించినా..నిర్లక్ష్యం వహించినా ఒక్కో సమయంలో, సందర్భంలో చాలా పెద్ద మూల్యం చెల్లించుకోవాల్సివస్తుంది. అసలే భారత్ పై పలు దేశాల కన్ను వున్న క్రమంలో దేశ భద్రతకు కడు ముప్పు ఏర్పడే అవకాశం లేకపోలేదు. ఆర్మీ పట్ల ప్రజల్లో నమ్మకాన్ని, గౌరవాన్ని అధికారులు గుర్తెరికి వ్యవహరించాల్సిన అవసరముంది. అలాగే భారత ఆర్మీ పట్ల ఇటువంటి సందర్భలతో మాయని మచ్చ పడే ప్రమాదముంది. ఏది ఏమైనా సహజసిద్ధంగా సాధారణ మనుషులకు వుండే బలహీనతలను అధిగమించి దేశం ఆర్మీపై పెట్టుకున్న నమ్మకాన్ని, ధైరాన్ని, గౌరవాన్ని కాపాడాల్సిన అధికారులు తమ బాధ్యత పట్ల నిత్యం అప్రమత్తంగా వుంటారని ఆశిద్దాం..

 

09:19 - August 17, 2018

ఢిల్లీ : వాజ్ పేయికి వాజ్ పేయి సాటి అని ఏపీ సీఎం చంద్రబాబు నాయుడు అభివర్ణించారు. శుక్రవారం ఆయన ఢిల్లీకి చేరుకుని వాజ్ పేయి పార్థివ దేహానికి ఆయన నివాళులర్పించారు. అనంతరం ఆయన మీడియాతో మాట్లాడారు. అన్ని రిఫామ్స్ కు ఆద్యుడని, టెలీకమ్యూనికేషన్, నేషనల్ హైవే, మైక్రో ఇరిగేషన్, ఇన్ ఫ్రా స్ట్రక్చర్ ఇతరత్రా వాటిని ముందుకు తీసుకొచ్చారన్నారు. ఆయన చనిపోవడం దేశానికి పెద్ద లోటు అని, ఆయన అందరికీ ఆదర్శమన్నారు. ఒక ప్రధానిగా, ఒక ప్రతిపక్ష నేతగా, ఒక పార్లమెంటేరీయన్ గా వ్యవహరించారని తెలిపారు. తాను చేపట్టిన హైటెక్ సిటీని వాజ్ పాయి ప్రారంభించారని గుర్తు చేసుకున్నారు. ఒక కలుపుగోలుతనం..దేశ భవిష్యత్ కోసం ఎన్నో నిర్ణయాలు తీసుకున్నారని తెలిపారు. నమ్ముకున్న సిద్ధాంతం ప్రకారం ఒక పద్ధతి ప్రకారం వెళ్లారన్నారు.

తాను ఢిల్లీకి వస్తుంటే నిధుల కోసమే వస్తున్నారని కొందరు అనుకొనే వారని పేర్కొన్నారు. మలేషియాలో కొన్ని రోడ్లు చూసి దేశంలో ఉన్న రోడ్ల విషయాన్ని వాజ్ పేయికి తెలియచేయడం జరిగిందని, చెన్నై - నెల్లూరు రోడ్ ను మలేషియా కంపెనీ వేసిందన్నారు. ఆయన ఉన్న సమయంలో గవర్నమెంట్ ని ఎలాంటి ఒడిదొడుకులు లేకుండా పాలన కొనసాగించారని తెలిపారు. 1998లో బలపరీక్ష సమయంలో ఒక్క ఓటుతో ప్రభుత్వం పడిపోయిందన్నారు. 

21:00 - July 24, 2018

సంఘర్షణాత్మక వైఖరితో పొరుగుదేశం అయిన పాకిస్థాన్. మంచో చెడో భారత్ తో బంధం పెనవేసుకున్న దాయాది దేశం. ఇరు దేశాల మధ్య మూడుసార్లు యుద్ధాలు చోటుచేసుకున్నా..దాడులు ముప్పిరిగొంటున్నా..కలిసి నడవక తప్పని నైబర్ దేశం పాకిస్థాన్. స్వాతంత్ర్యం వచ్చి ఏడు దశాబ్దాలు దాటినా..ప్రజాస్వామ్యం పరిమళించని బాధిత దేశం పాకిస్థాన్..అన్నింటా ఆధిపత్యం చెలాయించాలని చూస్తున్న ఆల్ పవర్ ఫుల్ ఆర్మీ ఒకపక్క... పట్టు నిరూపించుకోవాలని చూస్తున్న ప్రజాస్వామ్యం మరోపక్క. నేషనల్ అసెంబ్లీకి నేతలను ఎన్నుకునేందుకు సిద్ధపడుతోంది. ఉగ్రవాదం, మతోన్మాదం,తీవ్రవాదం ముట్టడించిన గడ్డపై మిణుకు మిణుకుమంటున్న సామాన్య ప్రజల ఆశలు చిగురిస్తాయా? పాక్ పార్లమెంటరీ ఎన్నికలపై ప్రపంచం యావత్తు దృష్టిపెట్టింది. సరిహద్దు దేశమైన భారత్ ఈ ఫలితం కీలకమే. పాక్ లో శాంతి, సౌభాతృత్వాలు వెల్లివిరియాలంటే ఇరుగు, పొరుగు మంచిగా వుండాలి. వ్యాపార వాణిజ్య, సాంసృతిక సంబంధాలు సజావుగా నెలకొన్నాలి. గతాన్ని మరిచి వర్తమానాన్ని అర్థం చేసుకుంటు భవితకు పునాదులు వేసుకోవాలి. జానదేశం జయగీతం పాడినప్పుడే అది సాధ్యం అవుతుంది. అందుకు అనువైన వాతావరణం కనిపిస్తుందా? పాక్ ఎన్నికల్లో ప్రజల తీర్పు భారత్ పై ఎటువంటి ప్రభావాన్ని చూపనుంది? అసలు పాక్ ఎన్నికలను జాతీయ, అంతర్జాతీయ కోణంలో ఎలా అర్థం చేసుకోవాలి? ప్రముఖ రాజకీయ విశ్లేషకులు, అంతర్జాతీయ అధ్యయశీలి కోటేశ్వరావు విశ్లేషణలో చూద్దాం..

16:14 - July 12, 2018

ఒడిశా : గిరిజనులు, ఆదివాసీలు అమాయకత్వంలోనే కాదు నిజాయితీలో కూడా వారికి వారే సాటిగా నిలుస్తారు. అలాగే వారు ఏ విషయంలోనైనా పట్టు పట్టారంటే దాన్ని సాధించేంత వరకూ విశ్రమించరు. వేషధారణలోను, సంప్రదాయాలను అనుసరించటంలోను, వాటిని నిలుపుకోవటంలోను అడవి బిడ్డలు ఏమాత్రం రాజీ పడరు. కానీ నేటి తరం వాటిని కొనసాగిస్తునే ఆధునికంగా కూడా విజయాలు సాధిస్తున్నారు. వారి సంస్కృతి సంప్రదాయాల విషయంలో వారికి వారే సాటిగా వుంటారు గిరిజనులు.

భారతదేశ తొలి ట్రైబల్‌ క్వీన్‌గా పల్లవి దరువా చరిత్ర ..
భారతదేశ తొలి ట్రైబల్‌ క్వీన్‌గా ఒడిశా రాష్ట్రంలోని కోరాపుట్‌ జిల్లాకు చెందిన పల్లవి దరువా చరిత్ర సృష్టించారు. ఆది రాణి కళింగ ట్రైబల్‌ క్వీన్‌ పోటీలో పాల్గొన్న వివిధ రాష్ట్రాలకు చెందిన 22 మందిని ఓడించి ఆమె కిరీటాన్ని సొంతం చేసుకున్నారు. గిరిజన వేషధారణ, ఆభరణాల ప్రదర్శన, అద్భుత ప్రతిభ, సంస్కృతిని ప్రదర్శించడంలో నైపుణ్యం, ఫొటోజెనిక్‌ ఫేస్‌, బెస్ట్‌ స్కిన్‌, బెస్ట్‌ పర్సనాలిటీ వంటి ఏడు విభిన్న విభాగాల్లో పల్లవి విజేతగా నిలిచారు.

మొదటి రన్నరప్‌ గా పంచమీ మజీ ..
ఈ పోటీలో టిట్లాఘడ్‌కు చెందిన పంచమీ మజీ మొదటి రన్నరప్‌గా నిలవగా.. మయూర్‌భంజ్‌కు చెందిన రష్మీరేఖా హన్స్‌దా రెండో రన్నరప్‌తో సరిపెట్టుకున్నారు. గిరిజన సంస్కృతి, సంప్రదాయాలు, కళలకు ప్రచారం కల్పించాలనే ఉద్దేశంతో కళింగ ఇన్‌స్టిట్యూట్‌ ఆఫ్‌ సోషల్‌ సైన్సెస్‌, ఒడిశా ఎస్సీ, ఎస్టీ డిపార్ట్‌మెంట్‌, టూరిజం శాఖ సంయుక్తంగా ఈ కార్యక్రమాన్ని నిర్వహించాయి. స్థానిక ఉత్కళ్‌ మండపంలో జరిగిన ఈ పోటీలో ‘పద్మశ్రీ’ తులసి ముండా నేతృత్వంలోని జ్యూరీ సభ్యులు విజేతలను నిర్ణయించారు.

గిరిజనులు మూఢనమ్మకాలు వీడాలి : పల్లవి దరువా
భారతదేశ తొలి ట్రైబల్‌ క్వీన్‌గా గెలుపొందటంపై పల్లవి దరువా ఆనందం వ్యక్తంచేసింది. ఈ అసందర్భంగా ఆమె మాట్లాడుతు..ఎంతోమంది గిరిజన బాలికలు, మహిళలకు బయటి ప్రపంచంలోకి రావడానికి, చదువుకోవడానికి అవకాశాలు దక్కడం లేదని వాపోయింది. 'ట్రైబల్‌ క్వీన్‌'గా కిరీటాన్ని సొంతం చేసుకోవడం చాలా ఆనందంగా ఉంది. గిరిజనులు మూఢనమ్మకాలు వదిలి.. బాహ్య ప్రపంచంలోకి అడుగుపెట్టాల్సిన అవసరం ఎంతో వుందని పల్లవి పిలుపునిచ్చింది.

గిరిజన మహిళలకంటూ సొంత గుర్తింపు కోసం ఈ కార్యక్రమం : ఖట్వా
విజేతలను ప్రకటించిన అనంతరం అవార్డు కమిటీ ప్రధాన కార్యదర్శి చిదాత్మిక ఖట్వా మాట్లాడుతూ...ఈ కార్యక్రమం ద్వారా గిరిజన సంస్కృతిని దేశ ప్రజల ముందుకు తీసుకొచ్చామన్నారు. ఇది కేవలం బాహ్య సౌందర్యానికి సంబంధించిన పోటీ కానే కాదు. కళలు, నృత్యరీతుల ద్వారానే కాకుండా గిరిజన మహిళలకంటూ ఒక సొంత గుర్తింపు తీసుకురావాలనే ఉద్దేశంతోనే ఈ పోటీ నిర్వహించామని చిదాత్మిక ఖట్వా తెలిపారు. సంప్రదాయ దుస్తులు ధరించి ర్యాంప్‌పై నడవడం, అందరి ముందు అభిప్రాయాలను వెల్లడించడం వంటివి వారిలో ఆత్మవిశ్వాసాన్ని పెంపొందిస్తాయంటూ’ వ్యాఖ్యానించారు.

22:15 - April 28, 2018

ఢిల్లీ : ప్రధానమంత్రి నరేంద్రమోది రెండు రోజుల చైనా అనధికార పర్యటన ముగిసింది. సరిహద్దులో ఉద్రిక్త పరిస్థితులు తగ్గించేందుకు ఇరుదేశాలు అంగీకరించాయి. భవిష్యత్తులోనూ చర్చలు కొనసాగించాలని నిర్ణయించాయి. ఇరుదేశాల మధ్య సంబంధాలు ఓ మైలురాయి లాంటిదని చైనా అభివర్ణించింది.

ముగిసిన ప్రధాని నరేంద్ర మోదీ చైనాలో రెండో రోజుల పర్యటన
ప్రధాని నరేంద్ర మోదీ చైనాలో రెండో రోజుల పర్యటన ముగిసింది. రెండోరోజు పర్యటనలో భాగంగా వుహాన్‌లోని ఈస్ట్ లేక్ వద్ద చైనా అధ్యక్షుడు జిన్‌పింగ్, ప్రధాని మోదీ నదీ తీరాన నడుచుకుంటూ కాసేపు మట్లాడుకున్నారు.ఆ తర్వతా ఇరువురు నేతల మధ్య చాయ్‌పే చర్చ కూడా జరిగింది.

నరేంద్రమోది, జిన్‌పింగ్‌లు డబుల్‌ డెక్కర్‌ పడవలో విహారం
అనంతరం నరేంద్రమోది, జిన్‌పింగ్‌లు డబుల్‌ డెక్కర్‌ పడవలో విహరించారు.దాదాపు గంటసేపు పడవలో ప్రయాణించిన ఇరువురు నేతలు పలు అంశాలపై చర్చించారు.

అనధికార శిఖరాగ్ర సదస్సులో మోదీ, జిన్ పింగ్
అనధికార శిఖరాగ్ర సదస్సులో భాగంగా వుహాన్‌లో చైనా అధ్యక్షుడు జీ జిన్‌పింగ్‌, ప్రధాని మోదిలు 24 గంటల్లో ఆరుసార్లు సమావేశమయ్యారు. వ్యూహాత్మక సైనిక సంబంధాలు, వాణిజ్యం, పర్యాటకం, ఉగ్రవాదం, అంతర్జాతీయ అంశాలపై చర్చలు జరిపారు. ఆప్ఘనిస్తాన్‌లో సంయుక్తంగా ఆర్ధిక ప్రాజెక్టు చేపట్టేందుకు భారత్-చైనా అంగీకారం తెలిపాయి. ఇది కార్యరూపం దాల్చితే.. అఫ్గానిస్థాన్‌లో భారత్‌, చైనాలు సంయుక్తంగా చేపడుతున్న తొలి ప్రాజెక్టు ఇదే అవుతుంది. ఈ నిర్ణయం తో పాకిస్తాన్‌కు గట్టి ఎదురుదెబ్బ తగిలినట్లేనని భావిస్తున్నారు. చైనా-పాక్‌లు కలిసి ప్రారంభించిన ఎకనమిక్‌ కారిడార్‌ను ఆఫ్గనిస్తాన్‌ వరకు పొడింగించనున్నట్లు చైనా ఇదివరకే తెలిపింది.

సంతకాలు లేని పర్యటన
అనధికార పర్యటన కావడంతో ఇరుదేశాల మధ్య ఎలాంటి ఒప్పందాలపై సంతకాలు జరగలేదు...ప్రకటనలు చేయలేదు. డోక్లాం వివాదం నేపథ్యంలో ఇరుదేశాల సరిహద్దులో శాంతియుత వాతావరణం నెలకొల్పాలని ఇరు దేశాలు అంగీకరించాయి. గత ఏడాది డోక్లాం వద్ద రెండు నెలల పాటు ఉద్రిక్త పరిస్థితులు నెలకొన్న విషయం తెలిసిందే.

మోది చైనా పర్యటన సఫలమైంది : విదేశాంగ శాఖ
మోది చైనా పర్యటన సఫలమైందని భారత విదేశాంగ శాఖ ప్రకటించింది. మోది, జిన్‌పింగ్‌ మధ్య జరిగిన చర్చలు ఇరుదేశాల మధ్య సంబంధాలు మరింత బలోపేతమయ్యాయని పేర్కొంది. సరిహద్దులో ఇరుదేశాలు శాంతినే కోరుకుంటున్నాయని...త్వరలోనే ఈ వివాదం పరిష్కారమవుతుందని విదేశాంగ కార్యదర్శి విజయ్‌ గోఖలే వెల్లడించారు. ఇరుదేశాల నేతల మధ్య సమావేశాలు భవిష్యత్తులోనూ కొనసాగుతాయని చెప్పారు.

చైనా, భారత్‌ల జనాభా 40 శాతం ఉంది : ప్రధాని మోది
ప్రపంచ జనాభాలో చైనా, భారత్‌ల జనాభా 40 శాతం ఉందని ప్రధాని మోది అన్నారు. ప్రపంచ దేశాల సమస్యలను పరిష్కరించేందుకు ఇరు దేశాలు కలిసి ప్రయత్నిస్తామని పేర్కొన్నారు. ఇరుదేశాల మధ్య సంబంధాలు ప్రపంచంలో స్థిరత్వం, శాంతికి దోహదం చేస్తాయని చైనా అధ్యక్షుడు జిన్‌పింగ్‌ అన్నారు.

15:23 - April 18, 2018

హైదరాబాద్ : ప్రధాని మోదీ పాలన దేశాన్ని వినాశనం వైపుగా తీసుకెళ్తోందని సీపీఐ జాతీయ ప్రధాన కార్యదర్శి సురవరం సుధాకర్‌రెడ్డి విమర్శించారు. మతోన్మాదంతో సర్వవ్యవస్థలను భ్రష్టుపట్టిస్తోందని మండిపడ్డారు. హైదరాబాద్‌లో జరుగుతున్న సీపీఎం జాతీయ మహాసభల ప్రారంభోత్సవానికి హాజరైన సురవరం... బీజేపీ సర్కారు విధానాలపై విరుచుకుపడ్డారు. మేధావులు, శాస్త్రవేత్తలు, రచయితలు, విద్యావేత్తలు, విద్యార్థులను లక్ష్యంగా చేసుకుని దాడులకు పాల్పడుతోందన్నారు. దళితులపై దాడులు పెరిగిపోయాయని ఆందోళన వ్యక్తం చేశారు. 

20:57 - February 23, 2018
06:49 - November 12, 2017

హైదరాబాద్ : కాలుష్యం.. కాలుష్యం..! ఇప్పుడు దేశమంతటా ఎక్కడ చూసినా ఇదే మాట. ముఖ్యంగా దేశ రాజధాని ఢిల్లీని కాలుష్యపు మేఘం కప్పేయడంతో.. జనం బయటకు రావడానికే భయపడే పరిస్థితి ఉంది. ఇది ఢిల్లీ ఒక్కదానికే పరిమితం కాలేదు. దేశంలోని చాలా ప్రధాన నగరాలూ.. ఇదే తరహా కాలుష్యపు కాసారాలుగా మారాయి. అయితే.. కాలుష్యానికి కడు దూరంగా నిలిచిన నగరాలూ లేకపోలేదు. వీటిల్లో కేరళ రాష్ట్ర రాజధాని తిరువనంతపురం అగ్రభాగాన ఉండడం విశేషం. దేశంలోనే అత్యల్ప పీపీఎం నమోదైన రాజధానిగా త్రివేండ్రం నిలిచింది.

భారత దేశాన్ని ఇపుడు వాయు కాలుష్యం పట్టి పీడిస్తోంది. ముఖ్యంగా దేశ రాజధాని ఢిల్లీ-ఎన్‌సిఆర్‌ పరిధిలో వాయు కాలుష్యం ప్రమాదకరస్థాయికి చేరింది. ఢిల్లీలో పొల్యుషన్‌ ఎమర్జెన్సీ ప్రకటించారంటేనే అర్థం చేసుకోవచ్చు. ఉత్తరాదిలో ఢిల్లీ-ఎన్‌సిఆర్‌ పరిధిలో అత్యధిక వాయు కాలుష్యం నమోదైంది. ఢిల్లీలో పొల్యుషన్‌ లెవల్ పిఎం 502 స్థాయికి చేరగా... ఘజియాబాద్‌లో రికార్డ్‌ స్థాయిలో 720 పిఎం నమోదైంది. వాయు కాలుష్యాన్ని నియంత్రించేందుకు ఢిల్లీ ప్రభుత్వం సోమవారం నుంచి సరి బేసి విధానాన్ని అమలు చేస్తోంది.

ఉత్తరాదితో పోల్చితే దక్షిణాది రాష్ట్రాల్లో వాతావరణ కాలుష్యం తక్కువగా ఉంది. ముఖ్యంగా కేరళ రాజధాని తిరువనంతపురంలో పొల్యుషన్‌లెస్‌ నగరంగా గుర్తింపు పొందింది. పొల్యుషన్‌ లెవల్‌ ఇక్కడ అతితక్కువగా 13 పిఎం మాత్రమే నమోదైంది. తెలుగు రాష్ట్రాల విషయానికి వస్తే.. హైదరాబాద్‌, విజయవాడ నగరాలు ఢిల్లీ స్థాయితో పోలిస్తే.. అసలు కాలుష్యం లేదనే చెప్పాలి. కాలుష్య నియంత్రణ మండలి లెక్కల ప్రకారం 50 పీఎంలలోపు కాలుష్యం ఉంటే.. వాతావరణం చాలా బాగా ఉన్నట్లు. ఈలెక్కన, 36 పీఎంలతో హైదరాబాద్‌, 39 పీఎంలతో విజయవాడ, 34 పీఎంలతో రాజమండ్రి, 28 పీఎంలతో విశాఖ.. కాలుష్య రహిత ప్రాంతాలుగా నిలుస్తున్నాయి. పొరుగున ఉన్న బెంగళూరులో కూడా 22 పిఎంల మేరకే కాలుష్యం ఉంది.

కేరళ ప్రభుత్వం పర్యావరణానికి ప్రాధాన్యతనివ్వడం... అడవుల సంరక్షణకు కట్టుదిట్టమైన చర్యలు తీసుకుంటుండడం, పర్యావరణం పట్ల ప్రజల్లో పూర్తిస్థాయి అవగాహనను కల్పించడం వల్లే తిరువనంతపురం అతి తక్కువ కాలుష్యం నమోదైన్నది నిపుణుల అంచనా. బెంగళూరులో కూడా పచ్చదనానికి పెద్దపీట వేయడంతో వాయు కాలుష్యం తక్కువ స్థాయిలో ఉంది. హైదరాబాద్‌ కన్నా విజయవాడలో కాలుష్యం 3 పిఎంలు ఎక్కువగా ఉండడం గమనార్హం.  

20:33 - October 20, 2017

ఇది ఆకలి భారతం కథ. స్వతంత్రం వచ్చిఆరు దశాబ్దాలవుతున్నా తీరని వ్యథ.. తినడానికి తిండిలేక నిత్యం నానా అగచాట్లు పడుతున్న కోట్లాది భారతీయుల గాథ.. దేశంలో కుబేరుల సంఖ్య ఏటా పెరుగుతోంది. కానీ, ఇదే భారత దేశంలో కోట్లాది మంది ఆకలిదప్పులతో అల్లాడుతున్నారంటే నమ్మగలరా? మరి ప్రభుత్వ పథకాలేమవుతున్నాయి? జిడిపి లెక్కలు, సెన్సెక్స్ సూచీల భ్రమల మధ్య కాలాన్ని వెళ్లదీసే ప్రభుత్వాలు హంగర్ ఇండియాగా మార్చేస్తున్నాయా? ఈ అంశంపై ప్రత్యేక కథనం..

పై పై మెరుగుల గురించి గొప్పలు చెప్పుకోవటం ప్రభుత్వాలకు సరదా.. కానీ, నిజాలు కళ్లెదుట నిలబడి ప్రశ్నిస్తున్నాయి. ఇదీ దేశ అసలు రూపం అని హెచ్చరిస్తున్నాయి.. కోట్లాదిమంది భారతీయులు ఆకలితో అల్లాడుతున్నారని తేల్చి చెప్తున్నాయి.. చిన్నారులు సరైన తిండి లేక ఎదుగుదల లోపాలు పెరుగుతున్నాయని చెప్తున్నాయి. భారతదేశం.. ఇక్కడ మిలియనీర్లు వెలిగిపోతున్నారు. సంతోషం.. కానీ, పక్కనే పేదరికం విలయ తాండవం చేస్తుందని తెలుసా? హంగర్ ఇండెక్స్ ల ఆకలి కేకల లెక్కలు వెక్కిరిస్తున్నాయని తెలుసా? లక్షలాది చిన్నారులు పాలకు గొంతెండి.., పిడికెడు అన్నం లేక కన్నుమూస్తున్నారని తెలుసా?

మనిషి ఎంత పనిచేసినా, ఏం సాధించినా ఐదే వేళ్లూ నోట్లోకి వెళ్లటానికే. జానెడు పొట్ట నిండటానికే. కానీ, ఇంతటి నాగరిక ప్రపంచంలోనూ ఆకలికి సరిపడా తిండి దొరకని వారున్నారు. పౌష్టికాహారం సంగతి తర్వాత ... కడుపు నింపుకునే మార్గం దొరకని వారే ఎందరో ఉన్నారు.. ధనవంతుల జాబితాలో నాలుగో స్థానం … ప్రపంచం బిలియనీర్ల జాబితాలో భారత్ నుంచి 90మంది పైగా, మల్టి మిలియనీర్ల జాబితాలో 15వేల మంది..ఓవరాల్ గా ఇండియా ధనవంతులతో వెలిగిపోతోంది. కానీ అదే సమయంలో సరైన తిండిలేనివాళ్లూ పెరుగుతున్నారు. ఎందుకు?

ఆహార భద్రతా చట్టం వచ్చింది కానీ, పరిస్థితిలో ఇప్పటివరకు పెద్ద మార్పు రాలేదనే చెప్పాలి.. మరో పక్క భూసేకరణ చట్టాలు రైతుల భూములను మింగేస్తున్నాయి. ఇలాంటి సందర్భంలో ఓ పక్క వ్యవసాయానికి దెబ్బ కొడుతూ మరో పక్క సంక్షేమ పథకాల వెన్ను విరుస్తూ ఉంటే పరిస్థితి ఎప్పటికి మారుతుంది? ప్రపంచంలో భారత్ అతివేగంగా అభివృద్ధి చెందుతున్న ఆర్థిక వ్యవస్థ అని చెప్పుకుంటున్నప్పటికీ దాని సంపద మాత్రం జనాభా అంతటికీ సరిగ్గా పంపిణీ జరగలేదు. ప్రపంచీకరణ నేపథ్యంలోనే పేదరికం పెరిగిందన్నది ఆర్థికవేత్తల అభిప్రాయం. ప్రభుత్వాలు అవలంబిస్తున్న పెట్టుబడిదారి విధానాల వల్ల ధనికులు బిలియనీర్లుగా అవతారం ఎత్తుతుంటే.. పేదలు నిరుపేదలుగా మా రిపోతున్నారు. పాలక పక్షాలు ఓట్ల కోసం సంక్షేమ పథకాలు, నోట్ల కోసం బహుళజాతి కంపెనీల అనుకూల విధానాలు అవలంబించినంత కాలం ఈ అంతరాల్లో ఎలాంటి మార్పుండదు. పూర్తి విశ్లేషణ కోసం వీడియో క్లిక్ చేయండి. 

Pages

Don't Miss

Subscribe to RSS - భారతదేశం