భారత్‌

11:29 - September 19, 2018

న్యూఢిల్లీ: ప్రధాని నరేంద్ర మోదీ ఆధ్వర్యంలో జరిగిన రాఫెల్ డీల్‌లో అక్రమాలు జరిగాయంటూ కాంగ్రెస్ అధ్యక్షులు రాహుల్ గాంధీ ఆరోపణల మీద ఆరోపణలు చేస్తుంటే.. ఎన్డీఏ హయాంలో చోటుచేసుకున్న అగస్టా వెస్ట్‌లాండ్ చాపర్ డీల్ మళ్లీ తెరపైకి వచ్చింది.

అగస్టా వెస్ట్‌లాండ్ హెలీకాప్టర్‌ల లావాదేవీలో బ్రిటన్‌కు చెందిన ఏజంట్ క్రిస్టియన్ మైఖల్‌ను భారతదేశానికి అప్పగించేందుకు దుబాయ్ కోర్టు అంగీకరించింది. గతంలో మైఖల్‌ను అరబ్ ఎమిరేట్స్‌లో అదుపులోకి తీసుకోగా.. అతనిని భారత్‌కు అప్పగించే అంశంపై అక్కడి కోర్టులో వాదనలు జరుగుతున్నాయి. వీవీఐపీ హెలికాప్టర్‌ల కొనుగోలులో మైఖల్ ఆధ్వర్యంలో వేల కోట్ల రూపాయాలు లంచాల రూపంలో చేతులు మారాయని  అతని మీద అభియోగాలు నమోదు చేశారు.

అగస్టా వెస్ట్‌లాండ్ కేసు 2007లో తెరపైకి వచ్చింది. అప్పటి యూపీఏ ప్రభుత్వం 12 అత్యంత అధునాతన హెలికాప్టర్లను రాష్ట్రపతి, ప్రధానమంత్రి లాంటి వీవీఐపీల కోసం కొనుగోలు చేయాలని నిర్ణయించింది. ఆరోపణలు రావడంతో 2014లో ఈ ఒప్పందాన్ని రద్దుచేసింది. అగస్టా వెస్ట్‌లాండ్ కంపెనీకి అనుబంధంగా ఉన్న ఫిన్‌మెక్కానికా కంపెనీ భారత్‌లో లంచాలు చెల్లించిందని ఆరోపణలు వచ్చాయి. ఈ కేసుకు సంబంధించి ఎయిర్‌ఫోర్స్ అధికారి ఎస్పీ త్యాగిని 2016లో అరెస్టు చేశారు.  

ఈ కుంభకోణంలో లంచాల విషయం బయటపడగానే డీల్‌ను రద్దు చేశామని, సదరు కంపెనీని బ్లాక్‌లిస్టులో ఉంచడంతోపాటు భారత్‌లో ఉన్న కంపెనీ ఆస్తులను స్వాధీనం చేసుకున్నట్టు కాంగ్రెస్ నేతలు చెప్పుకొస్తున్నారు.

అయితే.. ఈ కేసులో మరో ట్విస్ట్ చోటుచేసుకుంది. భారత్‌లోని కొందరు ఈ కేసులో సోనియా గాంధీ పాత్ర ఉండేవిధంగా కేసును మలచాలని తనపై వత్తిడి తెచ్చినట్టు  మైఖల్‌కు చెందిన లాయర్ దుబాయ్ కోర్టులో పేర్కొనడం విశేషం. సీబీఐ అధికారులు ఈ ఆరోపణలను ఖండించారు.  

మైఖల్ భారత్‌కు వచ్చిన అనంతరం ఈ కేసును పూర్తి స్థాయిలో విచారణ చేయించే అవకాశం లేకపోలేదు. రాఫెల్ హెలికాప్టర్ల లావాదేవీలో పెద్దఎత్తున సొమ్ములు చేతు మారిందని.. ఇది ప్రధాని నేతృత్వంలోనే జరిగిందని రాహుల్ గాంధీ సహా కాంగ్రెస్ నేతలు ఎన్డీఏ ప్రభుత్వంపై విమర్శలు గుప్పిస్తున్న నేపథ్యంలో ఈ అగస్టా వెస్ట్‌లాండ్ కేసులో మైఖల్ భారత్‌కు రావడం బీజేపీకి కలిసివచ్చే అంశమే. కాంగ్రెస్ ఆరోపణలను తిప్పికొట్టేందుకు మైఖల్‌ను పావుగా వాడుకొనే అవకాశం లేకపోలేదు.

12:07 - August 28, 2018

ఢిల్లీ : పంజాబ్ నేషనల్‌ బ్యాంక్‌ స్కాంలో నిందితుడైన మెహుల్‌ ఛోక్సీని భారత్‌కు రప్పించేందుకు ఇంటర్‌పోల్‌ నోటీసు అవసరం లేదని సిబిఐ కేంద్ర విదేశాంగ శాఖకు తెలిపింది. తప్పించుకు తిరిగే నిందితుడికి మాత్రమే రెడ్‌ కార్నర్‌ నోటీసు అవసరముంటుందని.... మెహుల్‌ ఛోక్సీ ఆంటిగ్వాలో పౌరసత్వం తీసుకున్నందున రెడ్‌కార్నర్‌ అవసరం లేదని సిబిఐ అధికారులు తెలిపారు. తనకు రెడ్‌కార్నర్‌ నోటీసు ఇవ్వకూడదని, దీని వెనక రాజకీయ కోణం ఉందని ఛోక్సీ ఇంటర్‌పోల్‌ను అభ్యర్థించారు. భారత జైళ్లలో సదుపాయాలు బాగుండవని, మానవ హక్కులను ఉల్లంఘిస్తాయని ఆయన ఆరోపించారు. నిబంధనలకు అనుగుణంగానే భారత జైళ్లను నిర్వహిస్తున్నట్లు సిబిఐ స్పష్టం చేసింది. 

 

10:47 - August 28, 2018

ఢిల్లీ : జావెలిన్‌ త్రోలో భారత్‌ స్వర్ణం సాధించింది. యువ అథ్లెట్‌ నీరజ్‌ చోప్రా అద్భుతమైన ప్రదర్శనతో పసిడి పతకం అందుకున్నాడు. ఆట ఆరంభం నుంచే నీరజ్‌ అందరికన్నా ఆధిక్యంలో నిలిచాడు. తొలి ప్రయత్నంలో 83.46 మీటర్లు జావెలిన్‌ను విసిరి అగ్రస్థానంలో నిలిచాడు. ఇక నాలుగోసారి 83.25 మీటర్లు,.. ఐదోసారి 86.36 మీటర్లు విసిరాడు. అద్బుతమైన ప్రదర్శనతో నీరజ్‌ చోప్రా స్వర్ణం సాధించాడు. 

 

08:48 - August 27, 2018

ఢిల్లీ : ఆసియా క్రీడల్లో భారత్‌ మరో రెండు రజత పతకాలను కైవసం చేసుకుంది. పురుషుల, మహిళల రన్నింగ్‌ రేసులో ఈ పతకాలు దక్కాయి. పురుషుల 400 మీటర్ల పరుగు పందెంలో భారత స్ప్రింటర్‌ మహ్మద్‌ అనాస్‌ సత్తా చాటాడు. 45.69 సెకన్లలో లక్ష్యాన్ని చేరుకుని రజత పతకాన్ని సాధించాడు. మహిళల 400 మీటర్ల రన్నింగ్‌ రేసులో హిమదాస్‌ రజతం కైవసం చేసుకుంది. 50.79 సెకన్లలో లక్ష్యాన్ని చేరుకుని రజత పతకం సాధించింది. ఇక భారత స్టార్‌ షట్లర్లు సైనా నెహ్వాల్‌, పీవీ సింధులు భారత్‌కు మరో రెండు పతకాలను ఖాయం చేశారు. వీరిద్దరూ మహిళల సింగిల్స్‌ సెమీస్‌లోకి తొలిసారి అడుగుపెట్టి చరిత్ర సృష్టించారు. ఆసియా క్వార్టర్స్‌లో సింధు థాయ్‌లాండ్‌ క్రీడాకారిణి జిందాపోల్‌పై విజయం సాధించి పతకాన్ని ఖాయం చేసుకుంది. మరో క్వార్టర్స్‌లో నాలుగో సీడ్‌ క్రీడాకారిణి, థాయ్‌లాండ్‌కు చెందిన రట్చనాక్‌పై సైనా నెహ్వాల్‌ గెలిచి పతకాన్ని ఖాయం చేసింది. 

 

08:36 - August 22, 2018

ఢిల్లీ : భారత్‌; ఇంగ్లండ్‌ మూడో టెస్ట్‌ ఆసక్తికర ముగింపునకు చేరింది. నాలుగోరోజే భారత్‌ గెలిచేందుకు బాగా చేరువైనా... ఆదిల్‌ రషీద్‌ పట్టుదలగా ఆడటంతో మరో రోజు ఆట కొనసాగక తప్పలేదు. 521 పరుగుల లక్ష్యాన్ని ఛేదించే క్రమంలో మంగళవారం జరిగిన ఆటలో  ఇంగ్లాండ్‌ 9 వికెట్లు కోల్పోయి 311 పరుగులు చేసింది. మరో వికెట్‌ మిగిలి ఉంది. 210 రన్స్‌ చేయాల్సి ఉంది. 

 

22:01 - August 19, 2018

ఢిల్లీ : ఇండోనేషియా వేదికగా జరుగుతున్న ఆసియా క్రీడల్లో భారత్‌ తొలి స్వర్ణం కైవసం చేసుకుంది.  రెజ్లింగ్‌ 65 కేజీల పురుషుల విభాగంలో భజరంగ్‌ పునియా సత్తాచాటి భారత్‌కు పసిడి పతకం అందించాడు. జపాన్‌కు చెందిన డాచీ తకాటాపై 11-8 తేడాతో పునియా ఘన విజయం సాధించాడు. అంతకు ముందు సెమీస్‌లో మంగోలియాకు చెందిన బచులున్‌పై 10-0 తేడాతో అద్భుత విజయం సాధించాడు. పురుషుల రెజ్లింగ్‌లో పునియా ఒక్కడే రాణించగా పవన్‌ కుమార్‌, ఖత్రి మౌసమ్‌ నిరాశ పరిచారు. 
 

09:27 - July 15, 2018

ఢిల్లీ : మూడు వన్డేల సిరీస్‌లో భాగంగా లార్డ్స్‌ వేదికగా జరిగిన రెండో వన్డేలో భారత్‌ చిత్తుగా ఓడింది. ఇంగ్లాండ్‌ నిర్దేశించిన 323 పరుగుల విజయలక్ష్యాన్ని చేధించడంలో భారత క్రికెటర్లు ఘోరంగా విఫలం అయ్యారు.  మొదటి బ్యాటింగ్‌ చేసిన ఇంగ్లాండ్ జట్టు నిర్దేశిత 50 ఓవర్లలో 322 పరుగులు చేసింది.  323 పరుగుల విజయ లక్ష్యంతో బరిలోకి దిగిన భారత్‌కు ఆరంభంలోనే ఎదురుదెబ్బ తగిలింది.  ఓపెనర్లు రోహిత్‌శర్మ, శిఖర్‌ ధావన్‌ స్వల్ప స్కోరుకే పెవిలియన్‌ చేరారు.  విరాట్‌కోహ్లీ, రైనాల జోడి జట్టును ఆదుకునేందుకు ప్రయత్నాలు చేసినా సఫలం కాలేదు. భారత్‌ 50 ఓవర్లలో 10 వికెట్లు కోల్పోయి 236 పరుగులు మాత్రమే చేయగలిగింది. దీంతో ఇంగ్లాండ్‌ 86 పరుగుల తేడాతో విజయం సాధించి... సిరీస్‌ను 1-1తో సమయం చేసింది. ఇక మంగళవారం జరుగనున్న మూడో వన్డేలో సిరీస్‌ ఫలితం తేలనుంది.

 

14:11 - July 11, 2018

హైదరాబాద్ : ఎవరైనా..  వ్యాపారంలో ఒక ఏడాది నష్టం వస్తే భరిస్తారు.. రెండేళ్లు అయినా ఇదొక్కసారి చూద్దాంలే అనుకుంటారు. కానీ, వరుసగా మూడో ఏడూ నష్టాలే వస్తే.. తక్షణం ఆ వ్యాపారాన్ని మూసేస్తారు. కానీ, రైతుకు వ్యవసాయంలో.. ఒకటి కాదు.. రెండు కాదు.. ఏకంగా ఇరవై ఏళ్లుగా నష్టాలే.. నష్టాలు. కనీసం పెట్టుబడి కూడా దక్కని దయనీయ స్థితి.. దీనికి కారణం ఎవరు..? కచ్చితంగా పాలకులే. ద్రవ్యలోటును తగ్గించుకునే క్రమంలో చేస్తున్న విన్యాసాలే రైతులను అప్పుల ఊబిలోకి.. అక్కడి నుంచి వద్యశిలకు తోసేస్తున్నాయి. 
ఇరవై ఏళ్లుగా వరుస నష్టాలు...
ఇరవై ఏళ్లుగా వరుస నష్టాలు...సేద్యపు నష్టాల్లో భారత్‌కు ప్రపంచంలోనే అగ్రస్థానం... అవును.. భారత దేశంలో వ్యవసాయం ఓ జూదంగా మారిపోయింది. ప్రతిఏడాదీ కోటి ఆశలతో సేద్యం చేసే రైతులు.. గడచిన ఇరవై ఏళ్లలో ఒక్కసారీ లాభం గడించలేదు సరికదా.. పెట్టుబడి మొత్తాన్ని కూడా సంపాదించలేక పోయారు. ఇది ఎవరో వేసిన కాకి లెక్కలు కాదు. అంతర్జాతీయ సంస్థ.. ఆర్గనైజేషన్‌ ఆఫ్‌ ఎకనమిక్‌ కోఆపరేషన్‌ అండ్‌ డెవలప్‌మెంట్‌ ఓఈసీడీ... 36 దేశాల్లో విస్తృతంగా సర్వే చేసి వెల్లడించిన సత్యం. 
ఓఈసీడీ సంస్థ అత్యంత పకడ్బందీగా సర్వే 
ఓఈసీడీ సంస్థ అత్యంత పకడ్బందీగా ఈ సర్వేని నిర్వహించింది. వరుస నష్టాలకు కారణాలనూ అధ్యయనం చేసింది. ఈ క్రమంలో స్థూల రాబడులు, పాత సూచీలను ఎన్నింటినో పరిశీలించింది. 2000-2016 మధ్య కాలంలో సేద్యపు రాబడులు.. ఏటేటా ఆరు శాతం చొప్పున.. సగటున  14శాతానికి పడిపోయాయి. దీన్నిబట్టే.. భారత్‌లో సేద్యం ఏ దుస్థితిలో ఉందో.. రైతు బతుకులు ఎంత దుర్భరంగా ఉన్నాయో తేటతెల్లం అవుతోంది. మరి ఈ దుస్థితికి కారణం ఎవరు..? ఇంకెవరు.. ఘనత వహించిన పాలకులే..!
పాలకుల అస్తవ్యస్థ వాణిజ్య విధానాలు
భారత్‌లో పాలకుల అస్తవ్యస్థ వాణిజ్య విధానాలు రైతాంగాన్ని నష్టాల్లో తోసిందన్నది ఓఈసీడీ సర్వే తేల్చింది. ద్రవ్యలోటును పూడ్చుకునే వంకతో.. ఆహారం ధరలను అతి తక్కువగా కొనసాగించారన్నది సర్వేలో తేలింది. ఎగుమతులపై ఆంక్షలు విధించిన ప్రభుత్వాలు.. ప్రపంచ మార్కెట్‌లో వచ్చే పరిణామాలను ఏమాత్రం పట్టించుకోలేదు. ఫలితంగా భారత్‌ పంచదార, బియ్యం, జొన్న, గోధుమ, బాస్మతి బియ్యం వంటి ఉత్పత్తులను గణనీయంగా ఎగుమతి చేసి.. లాభాలు గడించే అవకాశాలను కోల్పోయింది. మరోవైపు.. పదే పదే ఇన్‌పుట్‌ సబ్సిడీలు ఇచ్చారే తప్ప.. సేద్యంలో పెట్టుబడులు,  ఉత్పత్తులకు కనీస మద్దతు ధర వంటి ప్రధాన అంశాలను పాలకులు విస్మరించారన్నది సర్వే తేల్చిన సత్యం. 
భూమి కలిగిన రైతులు 62 శాతం 
భారత్‌లో, 0.80 హెక్టార్లలోపు భూమి కలిగిన రైతులు 62 శాతం మంది ఉన్నారు. వీరు వ్యవసాయేతర వృత్తుల్లోకి మారకపోతే.. శాశ్వతంగా దిగువ పేదరికపు జీవులుగా బతకాల్సిన దుస్థితి నెలకొంటుందని నీతి ఆయోగ్‌ సైతం గుర్తించినట్లు.. సర్వే నిర్వహించిన ఓఈసీడీ సంస్థ వెల్లడించింది. భారత్‌లో 2011 నుంచి వ్యవసాయ ఉత్పాదనలు ఏటా 3.6 శాతం మేర పెరుగుతూ వస్తున్నాయి. జీడీపీ 1990 నుంచి 5 శాతం వరకూ పెరిగింది. ఫలితంగా దేశంలో పేదరికం సగానికి తగ్గినట్లుగా లెక్కలు చెబుతున్నాయి. 
వ్యవసాయ రంగాన్ని నిర్లక్ష్యం చేయడాన్ని తప్పుబట్టిన సర్వే  
వ్యవసాయ రంగాన్ని ప్రభుత్వాలు నిర్లక్ష్యం చేయడాన్ని సర్వే తప్పుబట్టింది. దేశీయ ద్రవ్యలోటును తక్కువగా చూపేందుకు ప్రత్యేకమైన వాణిజ్య ఆంక్షలు డిజైన్‌ చేశారు. ఇందులో భాగంగా.. ఎగుమతులపై తరచూ బ్యాన్‌ విధించడం.. కనీస మద్దతు ధరను అంతర్జాతీయ స్థాయితో పోలిస్తే అత్యంత తక్కువగానే నిర్ణయించడం లాంటి నిర్ణయాలు తీసుకున్నారు. ఇలా.. ఇరవై ఏళ్లుగా.. ఏలికలు తీసుకుంటున్న అస్తవ్యస్థ విధానాల కారణంగా.. భారత రైతు పెను సంక్షోభంలో కూరుకు పోయాడు. ఈ పరిస్థితిలో స్వామినాథన్‌ కమిషన్‌ నివేదికను యథాతథంగా అమలు చేసి... రైతును లాభాల బాట పట్టించాలి. తద్వారా.. ఇంతకాలం రైతుకు చేసిన అన్యాయాన్ని పాలకులు సరిదిద్దుకున్నట్లు అవుతుంది. మరి ఏలికలు ఆదిశగా అడుగులు వేస్తారా..?  చూడాలి. 

09:38 - April 9, 2018

ఢిల్లీ : ఆస్ట్రేలియాలో జరుగుతోన్న 21వ కామన్వెల్త్‌ గేమ్స్‌లో భారత్‌ సత్తా చాటుతోంది.ఆదివారం మూడు స్వర్ణాలను గెలుచుకుంది. సింగపూర్‌తో జరిగిన టేబుల్‌ టెన్నిస్‌లో భారత్‌ మహిళా జట్టు 3-1 తేడాతో విజయం సాధించి స్వర్ణపతకాన్ని సొంతం చేసుకుంది. తొలిసారిగా టేబుల్‌ టెన్నిస్‌ విభాగంలో మహిళల జట్టు విజయం సాధించి చరిత్ర సృష్టించింది. వెయిట్‌ లిఫ్టింగ్‌ 69 కేజీల విభాగంలో పూనమ్‌ యాదవ్‌ స్వర్ణ పతకం గెలవగా.. 10 మీటర్ల మహిళల ఎయిర్‌ పిస్టల్‌ విభాగంలో మనూ భాకర్‌ స్వర్ణం సాధించింది. ఇదే విభాగంలో హీనా సిద్ధు రజత పతకం గెలిచారు. దీంతో 7 స్వర్ణాలు, 2 రజతం, 3 కాంస్య పతకాలతో భారత్‌ పతకాల పట్టికలో నాలుగో స్థానానికి చేరుకుంది. భారత్‌ సాధించిన 6 స్వర్ణాల్లో ఐదు వెయిట్‌ లిఫ్టర్లవే కావడం విశేషం. ఇక సీడబ్ల్యూజీ బ్యాడ్మింటన్‌ మిక్సిడ్‌లో భారత్‌ తొలిసారిగా ఫైనల్స్‌కు చేరుకుంది. సోమవారం టేబుల్‌ టెన్నిస్‌ పురుషుల జట్టు మ్యాచ్‌ జరగనుంది.

 

13:53 - April 8, 2018

ఢిల్లీ : కామన్‌వెల్త్‌ గేమ్స్‌లో భారత్‌ దూసుకు పోతోంది. భారత్‌ ఖాతాలో మరో స్వర్ణం చేరింది. ఇప్పటికే వెయిట్‌ లిఫ్టింగ్‌లో 5స్వర్ణాలు సాధించగా.. ఇపుడు షూటింగ్‌లో పతకాల పంట పండుతోంది. 10 మీటర్ల ఎయిర్‌ రైఫిల్‌ విభాగంలో స్వర్ణం సాధించగా.. ఇదే విభాగంలో హీనా సిద్దూ రజిత పతకం సొంతం చేసుకుంది.   

 

Pages

Don't Miss

Subscribe to RSS - భారత్‌