భేటీ

12:37 - May 26, 2018

అమరావతి : 'మహానటి'టీమ్ అమరావతిలో సీఎం చంద్రబాబుని కలిసింది. ఈ సందర్భంబగా చంద్రబాబు మాట్లాడుతు..మహానటి సావిత్రిని కీర్తి సురేష్ మహానటిని కళ్లకు కట్టిందని నటి కీర్తి సురేష్ ను చంద్రబాబు ప్రశంసించారు. వయస్సులో చిన్నదైనా మహానటి వంటి సినిమాలో నటించింది అనేకంటే జీవించింది అనే సబబు అని అన్నారు. ఏదన్నా చేయాలనే పట్టుదల వుంటే సాధించి తీరతారని దానికి కీర్తీ సురేష్ నటనే తార్కాణమన్నారు. ఎన్నీఆర్,సావిత్రి వంటివారు పరిశ్రమలో రీప్లేస్ లేని వ్యక్తులన్నారు. అటువంటి పాత్రలను చేయటం ఒక సాహసమేననీ..ఆ సాహసం చేసి కీర్తి సురేష్ న్యాయం చేశారన్నారు. చిన్న పల్లెటూర్ లో పుట్టిన సావిత్రి మహానటి స్థాయికి చేరుకుని అనేక సమస్యలను ఎదుర్కొని ఆ స్థాయికి చేరుకోవటం ఆమె ఆత్మవిశ్వాసానికి, పట్టుదలకు తార్కారణమని చంద్రబాబు తెలిపారు. అలాగే ఆర్థికంగా అనేక ఇబ్బందులు, బాధలు పడుతున్నా ఆమె దానగుణాన్ని మాత్రం విస్మరించకుండా తన సహజమైన దాతృత్వాన్ని చాటిచెప్పారనీ..అది అందరికీ సాధ్యం కాదని..అలనాటి మహానటి, అద్భుతమైన నటి సావిత్రిని సీఎం చంద్రబాబు గుర్తుచేసుకున్నారు. 

22:01 - May 25, 2018

ఢిల్లీ : పర్యావరణ అంశాన్ని ఉమ్మడి జాబితాలో చేర్చాలని ఆంధ్రప్రదేశ్‌ ఆర్థిక మంత్రి యనమల రామకృష్ణుడు కేంద్రాన్ని డిమాండ్‌ చేశారు. అదే విధంగా పెట్రోలు ఉత్పత్తులను జిఎస్‌టీలో చేర్చకుండా..  కేంద్ర ప్రభుత్వమే సబ్సిడీ ఇచ్చి ప్రజలపై భారాన్ని తగ్గించాలని సూచించారు. 

ఢిల్లీలోని విజ్ఞాన్‌భవన్‌లో అంతర్రాష్ట్ర మండలి 13వ స్టాండింగ్‌ కమిటీ సమావేశమైంది.  కేంద్ర హోంమంత్రి రాజ్ నాథ్‌సింగ్ అధ్యక్షతన జరిగిన ఈ సమావేశంలో కేంద్ర రాష్ట్ర ప్రభుత్వాల ఉమ్మడి జాబితా అంశాలు, పూంఛ్‌ కమిషన్‌ సిఫారసులపై చర్చ జరిగింది. పర్యావరణం అంశాన్ని ఉమ్మడి జాబితాలో చేర్చాలని, ఆఫ్‌షోర్‌లోని 12 నాటికల్‌ మైళ్లలోపు సహజ వనరులపై.. రాష్ట్రాలకే రాయల్టీ చెల్లించాలని ఏపీ ఆర్థిక మంత్రి యనమల రామకృష్ణుడు డిమాండ్‌ చేశారు. 

ఆఫ్‌షోర్‌ నిక్షేపాల వెలికితీత అంశాన్ని అంతర్రాష్ట్ర మండలి సమావేశంలో చర్చిద్దామని హోంమంత్రి రాజ్‌నాథ్‌సింగ్‌ అన్నారు. పెట్రోల్‌ ఉత్పత్తులను జిఎస్‌టీ పరిధిలోకి తెస్తే రాష్ట్రాల ఆదాయం గణనీయంగా తగ్గుతుందని, కేంద్ర ప్రభుత్వమే సబ్సిడీ ఇస్తూ ప్రజలకు భారాన్ని తగ్గించాలని యనమల రామకృష్ణుడు సూచించారు. 

సమావేశపు అజెండాలో లేకున్నా.. యనమల రామకృష్ణుడు..  15వ ఆర్థిక సంఘం విధివిధానాల అంశాన్నీ లేవనెత్తారు. అయితే కేంద్ర ఆర్థిక మంత్రి మాత్రం డివల్యూషన్‌ 42 శాతం చేశాక.. అన్ని రాష్ట్రాలకూ నిధులు బాగా పెరిగాయని అభిప్రాయపడ్డారు. అయితే.. కేంద్ర ప్రాయోజిత పథకాల్లో కోతలు విధిస్తున్నారని యనమల అభ్యంతర పెట్టారు. డివల్యూషన్‌ను 42 నుంచి 37 శాతానికి తగ్గిస్తున్నారని వస్తున్న వార్తలనూ ఆయన ప్రస్తావించారు. 
    

07:51 - May 16, 2018

హైదరాబాద్ : తెలంగాణ ముఖ్యమంత్రి కేసీఆర్‌ ఇవాళ ఉద్యోగ సంఘాలతో భేటీ కానున్నారు. ప్రగతిభవన్‌లో ఉద్యోగ, ఉపాధ్యాయ, ఆర్టీసీ సంఘాలతో వారి సమస్యలపై చర్చించనున్నారు. డిమాండ్ల పట్ల ప్రభుత్వ వైఖరిని స్పష్టం చేయనున్నారు. మరోవైపు తమ డిమాండ్లపై కేసీఆర్‌ ఎలా స్పందిస్తారోనని ఉద్యోగులు ఉత్కంఠగా ఎదురు చూస్తున్నారు.
ఉద్యోగుల డిమాండ్లపై చర్చించనున్న కేసీఆర్‌ 
ఉద్యోగ, ఉపాధ్యాయ, ఆర్టీసీ సంఘాలతో ముఖ్యమంత్రి కేసీఆర్‌ ఇవాళ ప్రగతి భవన్‌లో సమావేశం కానున్నారు. ఉద్యోగుల డిమాండ్లపై చర్చించనున్నారు. నేరుగా ముఖ్యమంత్రే ఉద్యోగ, ఉపాధ్యాయ, ఆర్టీసీ సంఘాల నేతలతో చర్చలు జరుపుతారు. వారి సమస్యలు తెలుసుకుని ప్రభుత్వ వైఖరిని స్పష్టం చేస్తారు. ఉద్యోగుల సమస్యలపై కేసీఆర్‌ ఇప్పటికే కేబినెట్‌ సబ్‌కమిటీ ఏర్పాటు చేశారు. ఆ కమిటీ ఇప్పటికే ఉద్యోగులు, ఉపాధ్యాయులు, ఆర్టీసీ కార్మిక సంఘాలో చర్చలు జరిపింది. చర్చల సారాంశాన్ని నివేదిక రూపంలో కేసీఆర్‌కు అందజేసింది. 
ప్రభుత్వం ముందు ఉద్యోగుల 18 ప్రధాన డిమాండ్లు
1. పాత పెన్షన్‌ విధానాన్ని అమలు చేయడం
2. కొత్త పీఆర్సీని అమలు చేయడం
3. ఉద్యోగుల బదిలీలు చేపట్టడం
4. ఏకీకృత సర్వీస్‌ రూల్స్‌ అమలు చేయడం
5. రిటైర్మెంట్‌ వయసు 58 నుంచి 60 ఏళ్లకు పెంచడం
7. ఉద్యోగులకు శాఖల వారీగా ప్రమోషన్లు చేపట్టడం
8.ఏపీలోని తెలంగాణ ఉద్యోగులను రప్పించడం
9. కొత్త జిల్లాల్లో ఆర్డర్‌ టూ సర్వ్‌ పేరుతో పని చేస్తున్న వారిని పర్మినెంట్‌ చేసి, హెచ్ ఆర్ ఏ పెంచడం
10.కాంట్రాక్ట్‌ , ఔట్‌ సోర్సింగ్‌ కార్మికుల వేతనాలు  పెంచడం
తమ డిమాండ్లపై సీఎంతో చర్చించనున్న ఉద్యోగులు
ఉద్యోగులు ప్రధానంగా ప్రభుత్వం ముందు 18 ప్రధాన డిమాండ్లు పెడుతున్నారు.  అందులో మొదటిది సీపీఎస్‌ విధానం. పాత పెన్షన్‌ స్కీమ్‌నే అమలు చేయాలని ఉద్యోగులు కోరుతున్నారు.  ఇక రెండోది కొత్త పీఆర్సీ ఏర్పాటు చేయడం. మూడోది ఉద్యోగుల బదిలీలు. ఇక నాలుగోది ఏకీకృత సర్వీస్‌ రూల్స్‌ అంశం. వీటితోపాటు ఉద్యోగుల రిటైర్మెంట్‌ వయసు 58 ఏళ్ల నుంచి 60 ఏళ్లకు పెంచడం... ప్రమోషన్లు, ఏపీలోని తెలంగాణ ఉద్యోగులను తిరిగిరప్పించడంలాంటి డిమాండ్‌ ఉన్నాయి. అంతేకాదు.. కొత్త జిల్లాలో ఆర్డర్‌ టూ సర్వ్‌ పేరుతో పనిచేస్తున్న వారిని పర్మినెంట్‌ చేసి..వారి  హెచ్‌ఆర్‌ఏ పెంచడం, కాంట్రాక్ట్‌, ఔట్‌సోర్సింగ్‌ కార్మికుల వేతనాలు పెంచడం కూడా వీరి డిమాండ్లలో ప్రధానమైంది.  ప్రభుత్వం తొలగించిన కాంట్రాక్ట్‌, ఔట్‌సోర్సింగ్‌ ఉద్యోగులను తిరిగి తీసుకోవాలనే డిమాండ్‌ను కూడా ఉద్యోగ సంఘాలు లేవనెత్తుతున్నాయి. ఉపాధ్యాయులు, ఆర్టీసీ కార్మికులు కూడా తమ డిమాండ్లపై సీఎంతో చర్చించనున్నారు.
నివేదికపై అధికారులతో చర్చించిన సీఎం కేసీఆర్‌
మంత్రివర్గ ఉపసంఘం అందజేసిన నివేదికపై  సీఎం కేసీఆర్‌.. సీఎస్‌, ఆర్థికశాఖ ముఖ్య కార్యదర్శి, జీఏడీ, న్యాయశాఖ అధికారులతో చర్చించారు. ఏఏ సమస్యలను పరిష్కరించగలం, సర్కార్‌పైన ఎంత భారం పడుతుంది, న్యాయపరమైన చిక్కులు ఏమైనా ఉన్నాయా అనే అంశాలపై అధికారులతో  చర్చించారు. వచ్చే సాధారణ ఎన్నికలను దృష్టిలో ఉంచుకోని సీఎం సమస్యలపై ఓ నిర్ణయం తీసుకొనే అవకాశం ఉన్నట్లు సచివాలయ వర్గాలు చెపుతున్నాయి.  ఉద్యోగ, ఉపాధ్యాయ, ఆర్టీసీ కార్మికులతో చర్చలు జరిపిన తర్వాత సీఎం ప్రకటన చేసే అవకాశం ఉన్నట్లు తెలుస్తోంది. ఉద్యోగ సంఘాలో చర్చల్లో ప్రభుత్వం ఏం తేల్చుతుందన్న దానిపై ఉద్యోగుల్లో ఉత్కంఠ నెలకొంది. సీఎం ప్రకటన కోసం వారంతా ఆసక్తిగా ఎదురు చూస్తున్నారు.
 
 

 

08:58 - May 12, 2018

గుంటూరు : ఏపీకి ప్రత్యేక హోదా, విభజన హామీల అమలు విషయంలో కేంద్రంపై ఒత్తిడి మరింత పెంచేందుకు భవిష్యత్‌ కార్యాచరణ రూపొందించాలని ముఖ్యమంత్రి చంద్రబాబు టీడీపీ ఎంపీలను ఆదేశించారు. వైసీపీ ఎంపీల రాజీనామాలను లోక్‌సభ స్పీకర్‌ ఆమోదించి, ఉప ఎన్నికలు వస్తే పోటీకి సిద్ధంగా ఉండాలని అమరావతిలో జరిగిన టీడీపీ విస్తృత స్థాయి సమావేశంలో ఆశావహులను కోరారు. 
కేంద్రం ఏపీకి చేసిన అన్యాయాన్ని ప్రస్తావించిన చంద్రబాబు 
ముఖ్యమంత్రి చంద్రబాబు అధ్యక్షతన అమరావతిలో టీడీపీ విస్తృత స్థాయి సమావేశం జరిగింది. ఈ భేటీకి హాజరైన పార్టీ ఎంపీలు, ఎమ్మెల్యేలు, ఎమ్మెల్సీలు, ముఖ్య నాయకులకు భవిష్యత్‌ కార్యాచరణపై చంద్రబాబు దిశానిర్దేశం చేశారు. ఎంపీలు సమావేశమై భవిష్యత్‌ కార్యాచరణ రూపొందించుకోవాలని చంద్రబాబు ఆదేశించారు. ఇందుకోసం రాజకీయ కార్యాచరణ కమిటీని ఏర్పాటు చేయాలని నిర్ణయించారు. కేంద్ర ప్రభుత్వం ఏపీకి చేసిన అన్యాయాన్ని చంద్రబాబు ప్రధానంగా ప్రస్తావించారు. పదిహేనవ ఆర్థిక సంఘం నియమ నిబంధనలు రాష్ట్రానికి నష్టం జరిగేలా ఉన్నాయని చంద్రబాబు విమర్శించారు. 
ధర్మపోరాట సభలు నిర్వహించాలని నిర్ణయం
రాష్ట్రానికి కేంద్రం చేసిన అన్యాయాన్ని మరింత విస్తృతంగా ప్రజల్లోకి తీసుకెళ్లేందుకు వీలుగా ధర్మపోరాట సభలను నిర్వహించాలని టీడీపీ విస్తృత స్థాయి సమావేశంలో నిర్ణయించారు. ఎమ్మెల్యేలందరూ కార్యకర్తలను సమన్వయం చేసుకుంటూ..  మరింత విస్తృతంగా ప్రజల్లోకి వెళ్లాలని చంద్రబాబు ఆదేశించారు. మంత్రులు, ఎమ్మెల్యేల పనితీరుపై నిర్వహించిన సర్వే వివరాలను టీడీపీ విస్తృత స్థాయి సమావేశంలో చదివి వినిపించిన చంద్రబాబు.. ఎన్నికల ఏడాదిలో అందరూ జాగ్రత్తగా వ్యవహరించాలని ఆదేశించారు. 

 

15:51 - May 8, 2018

హైదరాబాద్ : ఉద్యోగ, ఉపాధ్యాయ సంఘాల సమస్యలను పరిష్కరించేందుకు ప్రభుత్వం సిద్ధమైంది. ఇందుకోసం కొన్ని రోజులుగా మంత్రి ఈటల నేతృత్వంలో ఏర్పడిన మంత్రుల కమిటీ ఉద్యోగ సంఘాలతో భేటీలు నిర్వహించారు. ఉద్యోగ సంఘాలతో చర్చించిన అంశాలను ఈనెల 11న నివేదిక రూపంలో సీఎం కేసీఆర్‌కు సమర్పించనున్నారు. దీంతో ఈనెల 14న ఉద్యోగ, ఉపాధ్యాయ సంఘాలతో కేసీఆర్‌ భేటీ కానున్నారు. ఈ సమావేశంలో ఉద్యోగ సంఘాలు చేస్తున్న 18 డిమాండ్లపై చర్చించి.. నిర్ణయం తీసుకునే అవకాశం ఉంది. 

07:48 - May 7, 2018

గుంటూరు : ఏపీ రాజధాని అమరావతిలో ఇవాళ ప్రతిపక్ష పాలిత రాష్ట్రాల ఆర్థిక మంత్రులు సమావేశం జరుగనుంది. రాష్ట్రాల ప్రయోజనాలను దెబ్బతీసేలా ఉన్న 15వ ఆర్థిక సంఘం నియమ నిబంధనలపై చర్చిస్తారు. లోటు బడ్జెట్‌ భర్తీకి నిధులు ఇవ్వరాదని, రుణమాఫీ వంటి పథకాలను చెక్‌ పెట్టాలని 15వ ఆర్థిక సంఘం టర్మ్స్‌ ఆఫ్‌ రిపరెన్స్‌లో ఉంది. అలాగే నిధుల కేటాయించేందుకు  1971 జనాభా లెక్కలను కాకుండా 2011 జనాభా లెక్కలను పరిగణలోకి తీసుకోవాలన్న నిబంధన విధించారు. 15 వ ఆర్థిక సంఘానికి కేంద్ర ప్రభుత్వం ఇలాంటి  నియమ, నిబంధనలు విధించడాన్ని విపక్షపాలిత రాష్ట్రాల ఆర్థిక మంత్రులు వ్యతిరేకిస్తున్నారు.
విపక్ష పాలిత రాష్ట్రాల ఆర్థిక మంత్రుల సదస్సు
ఇవాళ అమరావతిలో విపక్ష పాలిత రాష్ట్రాల ఆర్థిక మంత్రుల సదస్సు జరుగునుంది. సచివాలయంలో జరిగే ఈ సమావేశాన్ని ముఖ్యమంత్రి చంద్రబాబు ప్రారంభిస్తారు. గత నెలలో దక్షిణాది రాష్ట్రాల ఆర్థిక మంత్రి సమావేశం కేళర రాజధాని తిరువనంతపురంలో జరిగింది. దానికి కొనసాగింపుగా ఇప్పుడు అమరావతిలో నిర్వహిస్తున్నారు. 
15వ ఆర్థిక సంఘం నిబంధనలతో దక్షిణాదికి నష్టం 
దక్షిణాది రాష్ట్రాలతోపాటు ఒడిశా, పంజాబ్‌, ఢిల్లీ, బెంగాల్‌, సిక్కిం, మేఘాలయ, మిజోరం ఆర్థిక మంత్రులు హాజరుకానున్నారు. ఉదయం 10 గంటల నుంచి సాయంత్రం 5 గంటల వరకు ఈ భేటీ జరుగుతుంది. 15వ ఆర్థిక సంఘం విధివిధానాలు, నియమ నిబంధనలతో దక్షిణాది రాష్ట్రాలకు తీవ్ర నష్టం జరిగే అవకాశం ఉందన్న ఆందోళన వ్యక్తమవుతున్న నేపథ్యంలో నిర్వహిస్తున్న ఈ భేటీకి ప్రాధాన్యత సంతరించుకొంది.  కేంద్రం ఇచ్చిన విధివిధానాలకు అనుగుణంగా 15వ ఆర్థిక సంఘం సిఫారసు చేస్తే దక్షిణాది రాష్ట్రాలకు 87 వేల కోట్ల రూపాయల నష్టం జరుగుతుందని అంచనా వేస్తున్నారు. ఇప్పటి వరకు రాష్ట్రాల లోటు బడ్జెట్‌ను కేంద్రం భర్తీ చేస్తూ వస్తోంది. కానీ 15వ ఆర్థిక సంఘం టర్మ్స్‌ ఆఫ్‌ రిఫరెన్స్‌లో లోటు భర్తీకి చెక్‌ పెట్టాలన్ని నిబంధనను కేంద్రం విధించింది. దీనిపై తీవ్ర వ్యతిరేకత వ్యక్తమవుతోంది. అలాగే సంక్షేమ పథకాల్లో కోత విధించేలా 15వ ఆర్థిక సంఘం టర్మ్స్‌ ఆఫ్‌ రిఫరెన్స్‌తో ఉంది. దీనికి అనుగుణంగా ఆర్థిక సంఘం సిఫారసు చేసి, నివేదిక ఇస్తే.. భవిష్యత్‌లో సామాజిక  పెన్షన్లు, రుణమాఫీ వంటి పథకాలకు స్వస్తి పలకాల్సి వస్తుందన్న ఆందోళన వ్యక్తమవుతోంది. 
టర్మ్స్‌ ఆఫ్‌ రిఫరెన్స్‌లో 2011 జనాభా లెక్కల ప్రాతిపదిక 
ఇప్పటి వరకు కేంద్ర ప్రభుత్వం రాష్ట్రాలకు ఇస్తున్న నిధులకు 1971 జనాబా లెక్కలను పరిగణలోకి తీసుకొంటోంది. కానీ 15వ ఆర్థిక సంఘం టర్మ్స్‌ ఆఫ్‌ రిఫరెన్స్‌లో 2011 జనాభాల లెక్కలను పరిగణలోకి తీసుకోవాలని కేంద్రం నిబంధన పెట్టింది. ఈ నిబంధన దక్షిణాది రాష్ట్రాలకు నష్టం, ఉత్తరాదికి మేలు చేకూర్చే విధంగా ఉందన్న వాదనలు ఉన్నాయి. దక్షిణాది రాష్ట్రల్లో కుటుంబ నియంత్రణ అమలు చేయడంతో 1971-2011 మధ్య జనాభా పెరుగుదల గణనీయంగా తగ్గింది. ఇదే సమయంలో ఉత్తరాది రాష్ట్రాల్లో కుటుంబ నియంత్రణను అంతగా పట్టించుకోపోడంతో జనాభా పెరిగింది. 15వ ఆర్థిక సంఘం 2011 జనాభా లెక్కల ఆధారంగా రాష్ట్రాలకు నిధులు మంజూరు చేయాలని సిఫారసు చేస్తే ఉత్తరాదికి మేలు చేకూరుతుంది. దక్షిణాది రాష్ట్రాలకు నష్టం జరుగుతుంది. ఈ నిబంధనను దక్షిణాది రాష్ట్రాలు వ్యతిరేకిస్తున్నాయి. జనాభా నియంత్రించిన రాష్ట్రాలకు ప్రత్యేక ప్రోత్సహకాలు  ఇవ్వాల్సిన కేంద్రం... ఇందుకు విరుద్ధంగా వ్యవస్తోందన్న వాదాన్ని వినిపిస్తున్నాయి. రాష్ట్రాల నుంచి కేంద్రానికి వెళ్తున్న పన్నుల్లో అంతేమొత్తంలో తిరిగి ఇవ్వాలని గుజరాత్‌ ముఖ్యమంత్రి ఉన్నప్పుడు 14వ ఆర్థిక సంఘాన్ని కోరిన మోదీ... ఇప్పుడు ఇందుకు విరుద్ధంగా వ్యవహరించడాన్ని దక్షిణాది రాష్ట్రాలు తప్పు పడుతున్నాయి. 

 

08:02 - May 6, 2018

హైదరాబాద్ : కోమటిరెడ్డి వెంకటరెడ్డి, సంపత్‌ కుమార్‌ శాసనసభ్యత్వ రద్దు అంశాన్ని జాతీయ స్థాయికి తీసుకెళ్లాలని తెలంగాణ సీఎల్‌పీ నిర్ణయించింది. దీనిలో భాగంగా రాష్ట్రపతి రామ్‌నాథ్‌ కోవింద్‌, గవర్నర్‌ నరసింహన్‌కు వినతిపత్రాలు సమర్పించాలని ప్రతిపాదించారు. వీరి సభ్యత్వం పునరుద్ధరించే విషయంలో హైకోర్టు తీర్పును అమలు చేయాలని జానారెడ్డి అధ్యక్షతన జరిగిన సీఎల్‌పీ సమావేశం టీఆర్‌ఎస్‌ ప్రభుత్వాన్ని డిమాండ్‌ చేసింది. 
తెలంగాణ సీఎల్‌పీ భేటీ
జానారెడ్డి అధ్యక్షతన జరిగిన తెలంగాణ సీఎల్‌పీ భేటీలో పార్టీ సంస్థాగత వ్యవహారాలతోపాటు అకాల వర్షాలతో పంట నష్టపోయిన రైతుల సమస్యలపై చర్చించారు. ప్రధానంగా కోమటిరెడ్డి వెంకటరెడ్డి, సంపత్‌కుమార్‌ శాసనసభ్యత్వం పునరుద్ధరించాలంటూ హైకోర్టు ఇచ్చిన తీర్పును అమలు చేసిన టీఆర్‌ఎస్‌ ప్రభుత్వ వైఖరిపై సమీక్షించారు. ఈ వ్యవహారంపై అరగంటకు పైగా వాడీవేడి చర్చ జరిగింది.
రాష్ట్రపతి, గవర్నర్‌ లకు వినతిపత్రాలు అందజేయాలని తీర్మానం 
కోమటిరెడ్డి వెంకటరెడ్డి, సంపత్‌కుమార్‌ శాసనసభ్యత్వం పునరుద్ధరణపై హైకోర్టు తీర్పును గౌరవించకుండా నిర్లక్ష్యం చేస్తున్న టీఆర్‌ఎస్‌ ప్రభుత్వ వ్యవహారాన్ని జాతీయ స్థాయికి తీసుకెళ్లాలని సీఎల్‌పీ నిర్ణయించింది. రాష్ట్రపతి రామ్‌నాథ్‌ కోవింద్‌, గవర్నర్‌ నరసింహన్‌ను కలిసి దీనిపై వినతిపత్రాలు అందజేయాలని తీర్మానించారు. హైకోర్టు తీర్పును అమలు చేయకపోవడం కోర్టు ధిక్కారం కిందకు వస్తుందన్న అంశంపై చర్చించారు. కోమటిరెడ్డి వెంకటరెడ్డి, సంపత్‌కుమార్‌ శాసససభ్యత్వం పునరుద్ధరణపై హైకోర్టు సింగిల్‌ జడ్జి ఇచ్చిన తీర్పుపై అసెంబ్లీ స్పీకర్‌, కార్యదర్శి, ప్రభుత్వం అప్పీల్‌కు వెళ్లకుండా 12 మంది టీఆర్‌ఎస్‌ ఎమ్మెల్యేలతో పిటిషన్‌ వేయించడాన్ని సీఎల్‌పీ తప్పుపట్టింది.
సొంత పార్టీ నేతలు సహాయ నిరాకరణ చేస్తున్నారన్న సంపత్‌కుమార్‌.. 
అయితే శాసనసభ్యత్వం రద్దుపై న్యాయపోరాటం చేస్తుంటే.. సొంత పార్టీ నేతలు సహాయ నిరాకరణ చేస్తున్నారని సంపత్‌కుమార్‌.. కాంగ్రెస్ నేతల తీరుపై విరుచుకుపడినట్టు సమాచారం.  దీంతో జానారెడ్డి జోక్యం చేసుకుని, ఈ విషయాన్ని రాహుల్‌గాంధీ దృష్టికి తీసుకెళ్లామని సంపత్‌కు సర్దిచెప్పినట్టు సీఎల్‌పీ వర్గాల్లో వినిపిస్తోంది. 
రైతులకు పూర్తి పరిహారం చెల్లించాలి  
మరోవైపు అకాల వర్షాలతో రైతులకు జరిగిన నష్టాన్ని క్షేత్ర స్థాయి పర్యటనల్లో అంచనావేసి, అన్ని వివరాలను అధికారుల దృష్టికి తీసుకెళ్లాలని కాంగ్రెస్‌ శ్రేణులకు సీఎల్‌పీ విజ్ఞప్తి చేసింది. అన్నదాతలకు పరిహారం చెల్లించే విషయంలో టీఆర్‌ఎస్‌ ప్రభుత్వం మీనమేషాలు లెక్కిస్తోందని విమర్శించింది. పంట నష్టపోయిన రైతులకు పూర్తి పరిహారం చెల్లించాలని  సీఎల్‌పీ డిమాండ్‌ చేసింది.

 

16:30 - May 5, 2018

అమరావతి : పదిహేనవ ఆర్థిక సంఘం నిబంధనలు గురించి చర్చించేందుకు ఈనెల 7న విజయవాడలో రాష్ట్రాల ఆర్థిక మంత్రుల సమావేశం జరుగునుంది. ఈ భేటీకి ఏపీ, కేరళ, పుదచ్చేరి, పంజాబ్‌, ఢిల్లీ ఆర్థిక మంత్రులు హాజరుకానున్నారు. మరికొన్ని రాష్ట్రాల ఆర్థిక మంత్రులు హాజరవడానికి ఒప్పుకున్నా... కేంద్రం ఒత్తిడి కారణంగా రాలేని పరిస్థితి ఏర్పడిందని ఏపీ ప్రణాళిక మండలి ఉపాధ్యక్షుడు కుటుంబరావు ఆవేదన వ్యక్తం చేశారు. కేంద్రం ఈవిధంగా చేయడం సమాఖ్య స్ఫూర్తికి విరుద్ధమని విమర్శించారు. 15వ ఆర్థిక సంఘం నిబంధనలను వ్యతిరేకిస్తున్నట్టు కుటుంబరావు ప్రకటించారు. రాష్ట్రాల ఆర్థిక లోటును భర్తీ చేయకుండా చూసే విధంగా 15వ ఆర్థిక సంఘానికి నిబంధన విధించడాన్ని తప్పు పట్టారు. 

19:39 - May 4, 2018

హైదరాబాద్ : ఉద్యోగ సంఘాల నేతలతో తెలంగాణ కేబినెట్ సబ్ కమిటీ భేటీ అయింది. ఉద్యోగుల బదిలీలు, సీసీఎస్ రద్దు, కొత్త పీఆర్సీపై చర్చించింది. సెక్రటేరియట్‌లో మంత్రి ఈటెల రాజేందర్ నేతృత్వంలో ఉద్యోగ సంఘాల నేతలతో సబ్‌కమిటీ చర్చలు జరిపింది. సానుకూలంగా చర్చలు జరిగాయని.. మరోసారి టీచర్లతో ప్రత్యేకంగా భేటీ కానున్నట్లు ఈటల తెలిపారు. ఉద్యోగ సంఘాలతో జరిపిన చర్చల నివేదికను సీఎం కేసీఆర్‌కు అందజేస్తామన్నారు. ఆదివారం సీఎం సమక్షంలో మరోసారి ఉద్యోగ సంఘాలతో భేటీయ అయ్య అవకాశం ఉందన్నారు. సబ్‌ కమిటీకి నాలుగేళ్ల నుంచి తాము ఎదుర్కొంటున్న సమస్యలన్నీ వివరించామని ఉద్యోగ సంఘాల నేతలు తెలిపారు. మొత్తం 18 డిమాండ్లపై భేటీలో చర్చించామని... అన్నింటిపై ప్రభుత్వం సానుకూలంగా ఉందన్నారు. 

07:57 - May 4, 2018

హైదరాబాద్ : తెలంగాణాలో తెలుగు త‌మ్ముళ్లు రాజ‌కీయంగా మ‌రింత చురుగ్గా వ్యవ‌హ‌రించేందుకు టీడీపీ జాతీయ అధ్యక్షుడు చంద్రబాబు దిశా నిర్దేశం చేయ‌నున్నారు. ఎన్టీఆర్ ట్రస్టు భ‌వ‌న్‌లో  బాబు తెలంగాణాపార్టీ ముఖ్య నేత‌ల‌తో భేటీ కానున్నారు. ఈ భేటీ లో మ‌హానాడు నిర్వహ‌ణ‌, చేయాల్సిన తీర్మానాల గురించి చ‌ర్చించ‌బోతున్నారు. దాంతోపాటు వ‌చ్చే సార్వత్రిక ఎన్నిక‌ల్లో పొత్తుల అంశం పై కూడా చ‌ర్చించే అవ‌కాశాలు ఉన్నాయ‌ని పార్టీనేతలు చెబుతున్నారు. 
తెలంగాణా నేత‌ల‌కు బాబు దిశా నిర్దేశం 
టీటీడీపీ నేత‌ల‌తో ఆ పార్టీ జాతీయ అద్యక్షుడు చంద్రబాబు నాయుడు స‌మావేశం కాబోతున్నారు. పార్టీ వ్యవ‌స్థాప‌కుడు నంద‌మూరి తార‌క రామారావు జ‌యంతి సంద‌ర్భంగా నిర్వహించే మ‌హానాడు కార్యక్రమ నిర్వహ‌ణపై తెలంగాణా నేత‌ల‌కు బాబు దిశా నిర్దేశం చేయ‌బోతున్నారు. గ‌త సంవ‌త్సరం నిర్వహించిన మ‌హానాడుకు పెద్ద యెత్తున కార్యక‌ర్తలు త‌ర‌లిరాగా.. అంత‌కు మించి ఈ సారి మ‌హానాడును నిర్వహించాల‌ని పార్టీ ముఖ్య నేత‌లు పట్టుదలగా ఉన్నారు. సీనియ‌ర్ నేత‌లు పార్టీని వీడిపోయినా కార్యక్తలు చెక్కు చెదరలేదని టీడీపీ అధినాయకత్వం భావిస్తోంది. కార్యకర్తల్లో భ‌రోసా క‌ల్పించడానికి ఈసారి మహానాడును ఉపయోగించుకోవాలని పార్టీ అదిస్టానం వ్యూహాలు రూపొందిస్తోంది. ఈ నెల 24వ తేదీన హైద‌రాబాద్‌లో నిర్వహించే తెలంగాణా మ‌హానాడు కంటే ముందుగా 17 పార్లమెంట్ నియోజ‌క వ‌ర్గాల్లో మినీ మ‌హానాడులను నిర్వహించడానికి టీడీపీ నేతలు కార్యాచరణ సిద్ధం చేశారు. 
టీటీడీపీలో జ‌వ‌స‌త్వాలు నింపేందుకు చంద్రబాబు దృష్టి 
టీటీడీపీలో జ‌వ‌స‌త్వాలు నింపేందుకు చంద్రబాబు ఇప్పటి నుంచి దృష్టి సారించే అవ‌కాశం ఉన్నట్లు తెలుస్తోంది. మ‌హానాడు నిర్వహ‌ణ పేరుతో ఇవాళ నేతలతో భేటీ అవుతున్నా బాబు భ‌విష్యత్ రాజ‌కీయ వ్యూహాల‌పైనా ముఖ్యనేత‌ల‌తో  చ‌ర్చించ‌బోతున్నట్టు స‌మాచారం. క్షేత్ర స్థాయిలో క్యాడ‌ర్ ను కాపాడుకుంటూనే నాయ‌కుల్లో ఉత్సాహం నింపేందుకు చంద్రబాబు రెడీ అయ్యారని  తెలంగాణ టీడీపీ నేతలు అంటున్నారు. వ‌చ్చే సార్వత్రిక ఎన్నిక‌ల్లో పార్టీ ఎవ‌రితో క‌లిసి ముందుకు వెళ్తుందో ఈ భేటీలో సూచ‌న ప్రాయంగా తెలిపే అవ‌కాశాలు క‌నిపిస్తున్నాయి. సుమారు రెండు నెల‌ల త‌ర్వాత తెలంగాణా తెలుగుదేశం నేత‌ల‌తో చంద్రబాబు నిర్వహిస్తున్న ఈ స‌మావేశం ప్రాధాన్యత సంత‌రించుకొంది. పార్టీకి అంటి ముట్టన‌ట్లు  ఉంటున్న సీనియ‌ర్ నేత‌లపైనా స‌మావేశంలో నిర్ణయం తీసుకునే అవ‌కాశం ఉన్నట్లు తెలుస్తోంది. 

 

Pages

Don't Miss

Subscribe to RSS - భేటీ