మల్లన్న సాగర్

15:47 - November 22, 2017

మెదక్ : పార్లమెంట్ నియోజకవర్గంలో అభివృద్ధి కార్యక్రమాలు శరవేగంగా జరుగుతున్నాయని ఎంపీ కొత్త ప్రభాకర్ రెడ్డి పేర్కొన్నారు. మూడేళ్ల పదవీకాలంలో ఎలాంటి పనులు చేపట్టారనే విషయంపై టెన్ టివి ఆయనతో ముచ్చటించింది. రైల్వే సమస్య, నేషనల్ హైవే సమస్యలు ప్రధానంగా ఉండేవన్నారు. ప్రభుత్వం వచ్చిన అనంతరం, తాను ఎంపీ అయిన తరువాత పెండింగ్ లో ఉన్న రైల్వే లైన్లు, జాతీయ హదారులను త్వరలోనే పూర్తయ్యే విధంగా చర్యలు తీసుకున్నట్లు పేర్కొన్నారు. మల్లన్న సాగర్ రైతులను అన్ని విధాలుగా ఆదుకుంటామని, ప్రతిపక్షాలు కావాలనే రాద్ధాంతం చేస్తున్నాయని విమర్శించారు. పూర్తి వివరాలకు వీడియో క్లిక్ చేయండి. 

12:01 - October 22, 2017

సిద్దిపేట : మల్లన్నసాగర్ ప్రాజెక్టు నిర్మాణానికి వ్యతిరేకంగా 500 రోజులకుపైగా రీలే దీక్షలతో వేములఘాట్‌ వాసులు పోరాడుతున్నారు. ప్రభుత్వ నిర్ణయాన్ని సవాల్‌ చేస్తూ వేములఘాట్‌ గ్రామస్తులు హైకోర్టును ఆశ్రయించడంతో.. అధికారులు గ్రామసభ నిర్వహించారు. పూర్తి వివరాలకు వీడియో క్లిక్ చేయండి.

21:18 - October 21, 2017

సిద్ధిపేట : మావూరు మాగ్గావాలె.. మా బతుకుల మీద దెబ్బకొట్టొద్దు.. ఇదీ మల్లన్నసాగర్‌పై తొలిసారిగా నిర్వహించిన గ్రామసభలో నిర్వాసితులు అభిప్రాయం. గ్రామస్తుల అభిప్రాయాలు తీసుకోవాలన్న హైకోర్టు ఆదేశాలతో సిద్ధిపేట జిల్లా తొగుట మండలం వేములఘాట్‌లో గ్రామసభ జరిగింది. గ్రామసభలో పాల్గొన్న ప్రజలు తమ అభిప్రాయాలు వ్యక్తం చేశారు. ప్రజల అభిప్రాయాలన్నీ జిల్లా అధికారులు రికార్డు చేసుకున్నారు. ఈ వివరాలను కోర్టుకు అందించనున్నారు.

ఐదువందల రోజులకుపైగా నిరాహార దీక్షలు, నేషనల్ గ్రీన్‌ట్రిబ్యునల్‌ అనుమతి నిరాకరణ, న్యాయస్థానం అక్షింతలు.. ఈ పరిణామాలతో ఎట్టకేలకు తెలంగాణ ప్రభుత్వంలో కదలిక వచ్చింది. మల్లన్నసాగర్‌ నిర్వాసితులతో మాట్లాడి సమస్యను పరిష్కరించండన్న హైకోర్టు ఆదేశాలతో నిర్వాసిత గ్రామం వేములఘాట్‌లో ప్రభుత్వం గ్రామసభ నిర్వహించింది. ఆర్డీవో, భూ సేకరణ అధికారి నేతృత్వంలో ఈ గ్రామసభ జరిగింది.

ఒకటి కాదు రెండు కాదు 504 రోజుల దీక్షల ఫలితంగా ఎట్టకేలకు అధికారులు నిర్వాసితుల దగ్గరకు వచ్చారు. మల్లన్నసాగర్‌ నిర్వాసిత గ్రామం వేములఘాట్‌లో గ్రామసభ నిర్వహించారు. అయితే అంతా పోలీసులు, ప్రభుత్వ అధికారుల హడావిడే తప్ప.. పునరావాసం, పరిహారంపై క్లారిటీ ఇవ్వలేదని గ్రామస్తులు అంటున్నారు.

మొదటి నుంచి మల్లన్నసార్‌ నిర్వాసిత గ్రామాల్లో బలవంతపు భూసేకరణకే పూనుకున్న తెలంగాణ ప్రభుత్వం.. గ్రామస్తుల అభిప్రాయాలను పరిగణలోనికి తీసుకోలేదు. అధికారులు గ్రామంలోకి రావడం.. ఇచ్చినంత తీసుకుని.. కిక్కరుమనకుండా ఊరును ఖాళీ చేయాల్సిందే అని .. నానా హంగామా చేశారు. అంతేకాదు.. ముంపు గ్రామాలు ఎప్పటికైనా ఖాళీ చేసేవే అంటూ.. ప్రభుత్వ పథకాలు ఏవీ అమలు కాకుండా అధికారులు అడ్డకున్నారు. చివరికి గ్రామాలకు బస్సులు కూడా రాకుండా నిలిపేసి ఇబ్బందుల పాలు చేశారని కేసీఆర్‌ సర్కార్‌పై నిర్వాసితులు ఆగ్రహం వ్యక్తం చేశారు.

అధికారుల తీరుపై ముంపుగ్రామాల ప్రజలు హైకోర్టును ఆశ్రయించిన తర్వాతే ప్రభుత్వంలో కదలిక వచ్చిందని.. వేములఘాట్‌ వాసులు అంటున్నారు. ఉన్నట్టుండి పొమ్మంటే ఎక్కడికి పోవాలి.. మా బతుకుల మీద దెబ్బకొడుతున్నారని అధికారులను నిలదీశారు. మాకు చదువులు ఆగిపోతున్నాయని విద్యార్థులు అంటే.. ఉన్న ఎకరం భూమిని మీరు తీసుకుంటే... మా జీవనం ఎలా సాగుతుందని రైతు కుటుంబాలు ప్రశ్నించాయి.

మొత్తానికి గ్రామస్తుల ప్రశ్నలకు ఉక్కిరిబిక్కిరైన అధికారులు.. పునరావాసం, పరిహారంపై ఎలాంటి క్లారిటీ ఇవ్వకుండానే సభను ముగించారు. గ్రామస్తుల అభిప్రాయాలు రికార్డు చేసుకున్న అధికారులు.. సమాచారాన్ని హైకోర్టుకు అందించనున్నారు. ఎప్పటిలాగనే మాయమాటలు చెప్పారని వేములఘాట్‌ ప్రజలు అంటున్నారు. ఈనెల 25న న్యాయస్థానం ముందు విచారణ జరగనుండటంతో... తమకు కచ్చితంగా న్యాయం జరిగి తీరుతుందని మల్లన్నసాగర్‌ నిర్వాసితులు అంటున్నారు.  

17:30 - October 21, 2017

సిద్ధిపేట : తమకు పూర్తి న్యాయం జరిగేంత వరకు గ్రామాన్ని వదిలివెళ్లే ప్రసక్తే లేదని వేముల ఘాట్ ప్రజలు పేర్కొంటున్నారు. మల్లన్న సాగర్ రిజర్వాయర్ ముంపు గ్రామమైన వేముల ఘాట్ లో గ్రామ సభ జరిగింది. ఇల్లుకు ఇల్లు..పొలానికి పొలం..ఇవ్వాల్సిందేనని, అంతవరకు ఖాళీ చేసే ప్రసక్తే లేదంటున్నారు. డీపీఆర్ లేకుండా..అటవీ శాఖ అనుమతులు లేకుండా 500 రోజులకు పైగా దీక్షలు చేస్తున్న సంగతి తెలిసిందే. ఈ నేపథ్యంలో రాష్ట్ర ప్రభుత్వం ఇక్కడ గ్రామసభ ఏర్పాటు చేసింది. ఈ సభలో ప్రజలందరూ ముక్తకంఠంతో తమ డిమాండ్లను వినిపించే ప్రయత్నం చేశౄరు. ఇల్లుకు ఇల్లు..పొలానికి పొలం..ఇవ్వాలని డిమాండ్ చేశారు. ముంపు గ్రామమని పేర్కొంటూ ఏవీ ఇవ్వడం లేదని ఓ మహిళ వాపోయింది. పూర్తి వివరాలకు వీడియో క్లిక్ చేయండి. 

18:31 - October 20, 2017

సిద్ధిపేట : తెలంగాణలో భూసేకరణకు సంబంధించి.. తొలిసారిగా గ్రామసభ జరగబోతోంది. అదికూడా ముఖ్యమంత్రి సొంత ఇలాఖాలోనే ఈ గ్రామసభ జరగనుంది. హైకోర్టు మొట్టికాయలతో.. ప్రభుత్వం అనివార్యంగా ఈ సభను నిర్వహించనుంది. దీనికి వేములఘాట్‌ వేదిక కానుంది. ముఖ్యమంత్రి కేసీఆర్‌ సొంత జిల్లాలో.. భూసేకరణ కోసం తొలిసారిగా గ్రామసభ జరగబోతోంది. జీవో 123, 124 ల ద్వారా భూములు సేకరించాలనుకుంటున్న ప్రభుత్వం.. హైకోర్టు మొట్టికాయలతో గ్రామసభ నిర్వహణకు సిద్ధపడింది. గజ్వేల్‌ నియోజకవర్గం వేములఘాట్‌ వేదికగా శనివారం ఉదయం.. ఈ గ్రామసభ జరగబోతోంది.

తొగుట, ప్రజ్ఞాపూర్‌ ప్రాంతాల్లో రెండు లక్షల పదిహేను వేల ఎకరాలకు సాగునీరందించే ఉద్దేశంతో తలపెట్టిన మల్లన్నసాగర్‌ ప్రాజెక్టు కోసం.. ప్రభుత్వం భూములు సేకరిస్తోంది. ఈ క్రమంలో 2013 భూసేకరణ చట్టాన్ని తోసిరాజని, జీవో 123, 124 ల ద్వారా.. భూములు తీసుకోవాలని తలపెట్టింది. మల్లన్న సాగర్‌ ప్రాజెక్టును స్వాగతిస్తోన్న నిర్వాసితులు.. 2013 భూసేకరణ చట్టాన్ని తుంగలోతొక్కడాన్ని తప్పుబట్టారు. అందుకే గడచిన ఐదు వందల రోజులుగా.. దీక్షలు కొనసాగిస్తూనే ఉన్నారు.

ప్రభుత్వం 123, 124 జీవోల ద్వారా భూములు సేకరించడాన్ని తప్పుబడుతూ.. ఈ ప్రాంత రైతులు కోర్టును ఆశ్రయించారు. తమకు 2013 చట్టంలోని అంశాల ఆధారంగానే భూసేకరణ ప్రక్రియ సాగాలని విజ్ఞప్తి చేశారు. అటు కోర్టు కూడా.. ప్రజాభిప్రాయసేకరణ, ప్రాజెక్టు సమగ్ర నివేదిక -డిపిఆర్‌, పర్యావరణ సర్వేలు లేకుండా భూసేకరణ ఏంటంటూ కోర్టు కూడా ఆక్షేపణ తెలిపింది. ముందుగా గ్రామసభ నిర్వహించాలని ఆదేశించడంతో... ప్రభుత్వం తప్పనిసరి పరిస్థితుల్లో.. వేములఘాట్‌లో గ్రామసభకు సిద్ధపడింది.

తమ న్యాయ పోరాటం ఫలించి గ్రామసభ జరుగుతుండడం పట్ల.. స్థానిక రైతులు ఆనందం వ్యక్తం చేస్తున్నారు. అయితే.. నిర్బంధాలు లేకుండా స్వేచ్ఛాయుత వాతావరణంలో గ్రామసభను జరపాలని డిమాండ్‌ చేస్తున్నారు. మల్లన్నసాగర్‌ ప్రాజెక్టుకు భూసేకరణ విషయంలో అధికారుల ఓవరాక్షన్‌ కూడా విమర్శలకు దారితీసింది. ముఖ్యమంత్రి కేసీఆర్‌, మంత్రి హరీశ్‌ల మెప్పుకోసమే అధికారులు రైతుల పట్ల కర్కశంగా వ్యవహరిస్తున్నారన్న ఆరోపణలూ ఉన్నాయి.

మల్లన్నసాగర్‌ రిజర్వాయర్‌ నిర్మాణం అవసరమా అన్న ప్రశ్నా స్థానికంగా తలెత్తుతోంది. నీటి లభ్యత, పరిహారం చెల్లింపు అంశాలపై స్పష్టత లేకపోవడంపైనా విమర్శలున్నాయి. భూ నిర్వాసితుల రాష్ట్రవ్యాప్త ఉద్యమం ఒక ఎత్తయితే.. వేములఘాట్‌ రైతుల పోరు మరో ఎత్తన్న భావన వ్యక్తమవుతోంది. శనివారం రోజున వేములఘాట్‌లో జరిగే గ్రామసభపై రాష్ట్ర రైతాంగం యావత్తూ దృష్టి సారించింది. గ్రామసభకు.. ఇతర ప్రాంతాల రైతులూ తరలిరావచ్చనీ భావిస్తున్నారు. మొత్తానికి భూ సేకరణ విషయంలో ప్రభుత్వ దూకుడుకు.. వేములఘాట్‌ రైతు బ్రేకులు వేశాడు. శనివారం నాటి గ్రామసభలో.. తన నిరసనకు కొనసాగింపుగా.. ప్రభుత్వానికి గట్టి సమాధానాన్నే ఇక్కడి రైతులు ఇస్తారని భావిస్తున్నారు. మరి ప్రభుత్వం ఈ గ్రామసభను ఏమేర పారదర్శకంగా నిర్వహిస్తుందో వేచి చూడాలి.

17:33 - October 17, 2017

సంగారెడ్డి : మల్లన్నసాగర్‌ ముంపు గ్రామం వేముల ఘాట్‌లో ప్రాజెక్టుకు వ్యతిరేకంగా అక్కడి ప్రజలు చేపడుతున్న రిలే నిరాహారదీక్షలు నేటికి 500 రోజులకు చేరుకున్నాయి. ఈ సందర్భంగా జరిగిన సభలో సీపీఎం రాష్ట్ర కార్యదర్శి తమ్మినేని వీరభద్రం, ప్రొ. కోదండరాంలు పాల్గొన్నారు. ప్రజలకు అండగా ఉండి... చట్ట విరుద్ధంగా వ్యవహరిస్తున్న ప్రభుత్వానికి బుద్ధి చెబుతామని, మల్లన్నల సాగర్ ప్రాజెక్టులో నీళ్లు ఇస్తామంటే అడ్డుకుంటున్నారంటూ ప్రభుత్వం తప్పుడు ప్రచారం చేస్తోందని కోదండరాం విమర్శించారు. వాస్తవానికి నీళ్లు ఎవరూ వద్దనడం లేదని..సరియైన పద్ధతిలో నిర్మించాలని ప్రజలు కోరుకుంటున్నారని తెలిపారు. 

19:22 - February 2, 2017

హైదరాబాద్ : సచివాలయంలో ముఖ్యమంత్రి కేసీఆర్ అధ్యక్షతన జరిగిన రాష్ట్ర మంత్రివర్గ సమావేశంలో పలు కీలక నిర్ణయాలు తీసుకున్నారు. మూడు గంటల పాటు కొనసాగిన సమావేశంలో బడ్జెట్ రూపకల్పనతో పాటు పలు కీలక అంశాలపై చర్చించారు. ప్రధానంగా పలు ప్రాజెక్టుల రీడిజైనింగ్‌కు మంత్రివర్గం ఆమోదం తెలిపింది.

  • కాళేశ్వరం ప్రాజెక్ట్ కింద 7800 కోట్లతో గంధమల్ల, మల్లన్న సాగర్, కొండపాక, బస్వాపూర్ ప్రాజెక్టు లకు రివైజ్డ్ అనుమతులు.
  • దేవాదుల లిప్ట్‌ ఇరిగేషన్‌ సామర్థ్యాన్ని 38 టీఎంసీల నుంచి 60 టీఎంసీలకు పెంచడం. దేవాదుల కింద వరంగల్‌ జిల్లా స్టేషన్‌ఘన్‌పూర్‌ మండలం మల్కాపూర్‌లో 10 టిఎంసిలతో ఓ రిజర్వాయర్‌ నిర్మాణానికి ఆమోదం.
  • తుపాకులగూడెం వద్ద 2 వేల 121 కోట్లతో బ్యారేజీ నిర్మాణానికి ఆమోదం
  • 2487 లాంగ్వేజ్ పండిట్స్‌ను 1047 పిఈటిలను స్కూల్ అసిస్టెంట్స్‌గా అప్ గ్రేడ్.
  • 25 పిహెచ్‌సిలలో 60 ఖాళీ పోస్టుల భర్తికి గ్రీన్ సిగ్నల్.
  • మహబూబ్‌నగర మెడికల్ కళాశాలలో 260 పోస్టుల భర్తికి కేబినెట్‌ గ్రీన్ సిగ్నల్.
  • రామప్ప రిజర్వాయర్‌కు 1120 కోట్లు కేటాయింపు.
  • మిషన్ భగీరథలో 4800 పోస్టుల భర్తీకి కేబినెట్‌ గ్రీన్ సిగ్నల్.
  • సబ్ ప్లాన్ అంశం, బడ్జెట్ రూపకల్పన, కేంద్రం నుంచి రావాల్సిన నిధులు, నీతి అయోగ్ ప్రతిపాదనల పై ప్రధానంగా చర్చించారు.
19:38 - January 11, 2017

హైదరాబాద్ : తెలుగు రాష్ట్రాల పాలకులు.. ప్రాజెక్టుల పేరిట భూములను బలవంతంగా లాగేసుకుంటున్నాయి. మల్లన్నసాగర్‌ నుంచి నిమ్జ్‌వరకు, భోగాపురం నుంచి బందరు పోర్టు వరకు.. రైతుల పొట్టకొడుతూ వారి ఇళ్లూ, ఊళ్లూ ఖాళీ చేయిస్తున్నాయి. రోడ్డున పడ్డ రైతుల వేదన అరణ్య రోదనే అవుతోంది. ప్రత్యేక ఆర్థికమండళ్లు, ఇరిగేషన్‌ ప్రాజెక్టులు, అభివృద్ధి కార్యక్రమాలు.. ఇలా పేరేదైనా.. అన్నదాతలే నిర్వాసితులవుతున్నారు.

మల్లన్నసాగర్‌ ప్రాజెక్టు కోసం బలవంతపు భూసేకరణ

ప్రాజెక్టులకు భూసేకరణ విషయంలో తెలంగాణ ప్రభుత్వం తాను అనుకున్న పంథాలోనే ముందుకు సాగుతోంది. మల్లన్నసాగర్‌ కానీ, నిమ్జ్‌ కానీ ప్రాజెక్టు ఏదైనా రైతుల భూములను బలవంతంగా లాక్కుంటోంది. సిద్ధిపేట జిల్లాలో చేపట్టిన మల్లన్నసాగర్‌ ప్రాజెక్టుకు భూసేకరణ చేస్తున్న తీరుపై సాగునీటి నిపుణులు, ప్రతిపక్షాలు ఆక్షేపణ చెబుతున్నాయి. అయితే ప్రభుత్వం మాత్రం.. ఏదో ఓ రకంగా రైతుల భూములను లాక్కోవాలని చూస్తోంది. మల్లన్నసాగర్‌ ప్రాజెక్టు కోసం 14 గ్రామాలకు చెందిన 16వేల ఎకరాలను సమీకరించాలని నిర్ణయించింది. అయితే 2013 భూసేకరణ చట్టం ప్రకారం కాకుండా, జీవో ద్వారా భూములు లాక్కోవాలని చూసింది కేసీఆర్‌ సర్కారు. నిర్వాసితులు ఏకమై హైకోర్టు గడప తొక్కారు. కేసు విచారించిన న్యాయస్థానం.. 2013 భూసేకరణ చట్టం ప్రకారమే భూసేకరణ చేపట్టాలని తెలంగాణ సర్కార్‌కు మొట్టికాయలు వేసింది. దీంతో కాస్త వెనక్కి తగ్గినట్లే తగ్గి.. ఇప్పుడు తన ఆలోచనలకు చట్టరూపాన్నిచ్చే ప్రయత్నం చేస్తోంది కేసీఆర్‌ సర్కారు.

2013 చట్టాన్ని అమలు చేయాలంటున్న భూ నిర్వాసితులు....

భూసేకరణ చట్టానికి చేసిన సవరణలను ఉపసంహరించుకుని... 2013 చట్టాన్ని అమలు చేయాలని భూ నిర్వాసితులు కోరుతున్నారు. వేములఘాట్‌ వంటి గ్రామాల్లో భూసేకరణకు వ్యతిరేకంగా గత 220 రోజులుగా ఇంకా రైతుల దీక్షలు కొనసాగిస్తూనే ఉన్నారు. ఇక సంగారెడ్డి జిల్లాలో నేషనల్‌ ఇన్వెస్టిమెంట్‌ మాన్యూఫాక్చరింగ్‌ జోన్‌ పేరిట వేల ఎకరాల భూసేకరణ యధేచ్చగా సాగుతోంది. రైతుల భూములను ప్రభుత్వం బలవంతంగా తీసుకునేందుకు ప్రయత్నిస్తోంది. స్థానికులు ప్రభుత్వానికి వ్యతిరేకంగా ఆందోళనబాట పట్టారు. వారిని పోలీస్‌లతో బెదిరిస్తూ భూములను లాక్కునేందుకే ప్రభుత్వం డిసైడ్‌ అయ్యింది. ఇక్కడ మార్కెట్‌ రేటుకు.. ప్రభుత్వం ఇచ్చిన ధరకు మధ్య సుమారు పదహారు వందల కోట్ల రూపాయల మేర అంతరం ఉంది. అంటే ఆమేరకు రైతులు, స్థానికులు నష్టపోయారని భూనిర్వాసితుల సంఘాలు చెబుతున్నాయి.

ఏపీలోనూ బలవంతపు భూసేకరణ

అటు ఆంధ్రప్రదేశ్‌ రాష్ట్రంలోనూ ప్రభుత్వం రైతుల నుంచి బలవంతపు భూసేకరణకు పాల్పడుతోంది. విజయనగరం జిల్లా భోగాపురం ప్రాంతంలో విమానాశ్రయం కోసం 5వేల ఎకరాలను సేకరించాలని ప్రభుత్వం నిర్ణయించింది. విమానాశ్రయం పేరుతో పెద్దపెద్ద సంపన్నులకు తమ భూములు అప్పగించేందుకు ప్రభుత్వం పూనుకుంటోందని స్థానికులు ఆరోపిస్తున్నారు. ప్రభుత్వం నిర్వహించిన ప్రజాభిప్రాయ సేకరణను సైతం స్థానికులు అడ్డుకున్నారు. తమ భూములు ఎట్టి పరిస్థితుల్లో ఇచ్చేది లేదని తేల్చి చెబుతున్నారు. బందరు పోర్టుకు భూసేకరణ అంశమూ వివాదాస్పందంగానే ఉంది.

. ఇలా ప్రభుత్వాలు బలవంతపు భూసేకరణకు దిగుతుండడంతో రైతుల్లో ఆందోళన నెలకొంది.

12:19 - January 5, 2017

హైదరాబాద్ : 123 జీవోతో భూసేకరణపై హైకోర్టు తెలంగాణ ప్రభుత్వానికి మధ్యంతర ఉత్తర్వులు జారీ జారీ చేసింది. ఈ అంశంపై మల్లన్న సాగర్ ప్రాంత వాసులు హర్షం వ్యక్తం చేస్తున్నారు. కోర్టు తీర్పు పట్ల మల్లన్న ప్రాంత వాసి..ఉద్యమ కారుడు అయిన హయత్ మాట్లాడుతు..తమకు అండగా వున్న 10టీవీకి ధన్యవాదాలు తెలిపారు. తన సమస్యలను వెలుగులోకి తీసుకొచ్చి తమకు నిరంతరం అండగా వున్నవారందరికీ ఈ సందర్భంగా హయత్ ధన్యవాదాలు తెలిపారు. భూమి కోసం న్యాయబద్దంగా పోరాడిన తమకు న్యాయం జరిగిందనీ..ఈ విషయంలో ఇప్పటికైనా సీఎం తన వైఖరి మార్చుకోవాల్సిన అవుసరముందని హయత్ పేర్కొన్నారు. 

21:46 - November 3, 2016

హైదరాబాద్ : మల్లన్నసాగర్ రిజర్వాయర్ పనులకు ఈ నెలాఖరులోగా టెండర్లు పిలవాలని తెలంగాణ భారీ నీటిపారుదల శాఖ మంత్రి హరీశ్ రావు అధికారులకు ఆదేశించారు. ఈ నెల 10న మల్లన్నసాగర్ పై ప్రత్యేక సమావేశం నిర్వహించనున్నట్టు మంత్రి తెలిపారు. ఇక చారిత్రక కాళేశ్వరం ప్రాజెక్టును ఏడాదిలోపు పూర్తి చేసి ఆసియాలోనే సరికొత్త రికార్డు నమోదు చేసుకోవాలని సూచించారు.

జలసౌధలో నీటి ప్రాజెక్టులపై మంత్రి హరీష్‌రావు సమీక్షా సమావేశం
జల సౌధలో తెలంగాణ నీటి ప్రాజెక్టులపై భారీ నీటి పారుదల శాఖ మంత్రి హరీష్ రావు అధికారులతో సమీక్షించారు. ముఖ్యంగా కాళేశ్వరం ప్రాజెక్టు నుంచి 2017 డిసెంబర్ కల్లా గోదావరి జలాలు తెలంగాణ పొలాలకు తరలించవలసి ఉందన్నారు. ఇందుకోసం ఇరిగేషన్, రెవిన్యూ, అటవీ, విద్యుత్‌, గనులకు సంబంధించిన ప్రభుత్వ శాఖలు, కాంట్రాక్టు సంస్థలు సమన్వయంతో సమష్టిగా పనిచేసి గడువులోగా పనులు పూర్తిచేయాలని మంత్రి సూచించారు. భూసేకరణ పనులను మరింత వేగవంతం చేసి ప్రాజెక్టు పనులు శరవేగంగా జరిగేలా చూడాలని ఆయన కోరారు.

వారంలో అన్నారం పంపు హౌస్‌ పనులు ప్రారంభించాలని ఆదేశించిన మంత్రి
మేడిగడ్డ బ్యారేజీ పనుల టెండర్లు రెండు వారాల్లో ప్రారంభించాలని మంత్రి అధికారులకు ఆదేశించారు. అన్నారం, సందిళ్ళ బ్యారేజీల పనులు నవంబర్ 15న ప్రారంభించాలని ఆదేశించారు. ఈ మూడు బ్యారేజీలతో పాటు పంప్ హౌజ్ ల పనులను కూడా ఏక కాలంలో, సమీకృతంగా చేపట్టాలని హరీశ్ రావు సూచించారు. అయితే కన్నెపల్లి పండ్ హౌజ్ పనులు ప్రారంభించేందుకు, కార్యాచరణ ప్రణాళిక సిద్ధమైనట్టు ఇరిగేషన్ అధికారులు మంత్రికి తెలిపారు. మరో వారంలో అన్నారం పంపు హౌజ్‌ పనులు ప్రారంభించాలని ఆదేశించారు. సుందిళ్ళ పనులకు నవంబర్ 15 డెడ్ లైన్‌గా మంత్రి ఖరారు చేశారు. ప్రాజెక్టుల నిర్మాణం విషయంలో... అధికారులు మరింత కృషి చేయాల్సిన అవసరం ఉందని, అపుడే తెలంగాణలో ప్రాజెక్టుల కల సాకారమవుతుందని ఈ సందర్భంగా మంత్రి హరీష్‌రావు అన్నారు. 

Pages

Don't Miss

Subscribe to RSS - మల్లన్న సాగర్