మోడీ

10:42 - December 12, 2018

ఢిల్లీ : ఐదు రాష్ట్రాల ఎన్నికల అనంతరం కాంగ్రెస్ ఫుల్ జోష్ మీదున్నది. మూడు రాష్ట్రాల్లో కాంగ్రెస్ విజయ దరహాసం చేసింది. దీనితో ఆ పార్టీ నేతలు ఖుషీఖుషీగా ఉన్నారు. ఛత్తీస్ గఢ్, రాజస్థాన్‌లలో విస్పష్ట మెజార్టీ ఇవ్వగా మధ్యప్రదేశ్‌లో మాత్రం నరాలు తెగ ఉత్కంఠ కనపడింది. మిజోరాంలో మాత్రం ఎంఎన్ఎఫ్‌కు ప్రజలు పట్టం కట్టారు. 
రాఫెల్ స్కాం..ఆర్బీఐ...
ఇదే స్పీడును పార్లమెంట్ సమావేశాల్లోనూ కంటిన్యూ చేయాలని కాంగ్రెస్ పార్టీ భావిస్తోంది. సమస్యలను లేవనెత్తి కేంద్రాన్ని ఎలాగైనా ఇరికించాలని కాంగ్రెస్ యోచిస్తోంది. ఇటీవలే ప్రారంభమైన పార్లమెంట్ శీతాకాల సమావేశాలు జనవరి 8 వరకు కొనసాగనున్నాయి.  డిసెంబర్ 11వ తేదీన ఐదు రాష్ట్రాల ఎన్నికల ఫలితాలతో సమావేశాలు సరిగ్గా జరగలేదు. రాఫెల్ కుంభకోణం....స్వతంత్ర దర్యాప్తు సంస్థల్లో కేంద్రం జోక్యం చేసుకోవడం...వాటిపై కేంద్రాన్ని నిలదీయాలని కాంగ్రెస్ నేతలు యోచిస్తున్నారు. ఇప్పటికే రాజ్యసభ..లోక్ సభలలో ఆ పార్టీ నోటీసులు ఇచ్చింది. ఆర్బీఐలో నెలకొన్న సంక్షోభం...దేశానికి ముప్పు..జీఎస్టీ తదితర వాటిపై చర్చించాలని టీఎంసీ డిమాండ్ చేస్తోంది. రాఫెల్ కుంభకోణంపై జాయింట్ పార్లమెంటరీ కమిటీ వేయాలని..డిమాండ్ వస్తోంది. 
తెలుగు రాష్ట్రాల ఎంపీలు...
ఇక తెలుగు రాష్ట్రాల విషయానికి వస్తే విభజన చట్టం అమలు..ప్రత్యేక హోదా అమలు చేయాలంటూ వైసీపీ ఎంపీలు ఆందోళన చేపట్టారు. సమావేశాల్లో ఆందోళన చేయాలని టీడీపీ ఎంపీలు నిర్ణయించారు. మరి విపక్షాలు చేపట్టే ఆందోళనలు..ఇతర వాటిని కేంద్రం ఎలా ఎదుర్కొననుందో చూడాలి. 

19:14 - December 10, 2018

ఢిల్లీ: ఆర్బీఐ గవర్నర్ పదవికి ఉర్జిత్ పటేల్ రాజీనామా చేయడం చర్చనీయాంశంగా మారింది. ఏడాది ముందే ఆయన ఎందుకు దిగిపోయారు? సార్వత్రిక ఎన్నికలకు సమయం సమీపిస్తున్న తరుణంలో ఉర్జిత్ పటేల్ ఇలాంటి నిర్ణయం ఎందుకు తీసుకున్నారు? అసలేం జరిగింది? ఆర్బీఐకి కేంద్రానికి ఎక్కడ చెడింది? రాజీనామా చేయడానికి కారణాలు ఏంటి? ప్రస్తుతం ఈ ప్రశ్నలు హాట్ టాపిక్‌గా మారాయి.
కేంద్ర ప్రభుత్వానికి, ఆర్బీఐకు మధ్య కొంత కాలంగా కోల్డ్ వార్ నడుస్తున్న సంగతి తెలిసిందే. దేశ ఆర్థిక వ్యవస్థకు సంబంధించిన కీలక విధాన నిర్ణయాలపై కేంద్ర ప్రభుత్వంతో ఢీ అంటే ఢీ అనే రీతిలో పటేల్ తలపడుతున్నారు. విధాన నిర్ణయాల విషయంలో కేంద్రంతో తీవ్రంగా విబేధిస్తున్నారు. తాను చెప్పినట్టు వినకుండా ఉర్జిత్‌ స్వతంత్రంగా వ్యవహరిస్తుండటం.. కేంద్రాన్ని తీవ్ర అసంతృప్తికి గురిచేస్తోంది. ముఖ్యంగా రిజర్వ్ బ్యాంకులో ఉన్న నగదు నిల్వల్లో కొంత భాగాన్ని తమకు ఇవ్వాలంటూ కేంద్రం ఒత్తిడి చేస్తోంది. ఈ ప్రతిపాదనను ఉర్జిత్ పటేల్‌తో పాటు మరికొందరు బోర్డు సభ్యులు తీవ్రంగా వ్యతిరేకిస్తున్నారు. ఈ క్రమంలోనే ఆయన రాజీనామా చేసినట్టు తెలుస్తోంది. వ్యక్తిగత కారణాలతోనే ఆర్బీఐ గవర్నర్ పదవికి రాజీనామా చేశానని పటేల్ చెబుతున్నా.. అసలు కారణం మాత్రం కేంద్రంతో ఉన్న విభేదాలే.
2016లో ఆర్బీఐ గవర్నర్‌గా ఉర్జిత్ పటేల్ బాధ్యతలను స్వీకరించారు. 2019 సెప్టెంబర్ వరకు ఆయన పదవీకాలం ఉంది. పటేల్‌ హయాంలోనే పెద్దనోట్ల రద్దు వంటి తీవ్రమైన నిర్ణయాలను మోడీ ప్రభుత్వం తీసుకుంది. ఆర్థికంగా దేశం ఒకింత క్లిష్ట సమయంలో ఉన్నప్పుడు పటేల్ రాజీనామా చేయడం రాజకీయంగా దుమారం రేపే అవకాశముంది. పటేల్ రాజీనామా కేంద్ర ప్రభుత్వాన్ని ఇబ్బందుల్లోకి నెట్టే ఛాన్స్ ఉందని, శీతాకాల పార్లమెంటు సమావేశాల్లో ఈ అంశాన్ని విపక్షాలు అస్త్రంగా మలచుకోవచ్చని విశ్లేషకులు అభిప్రాయపడుతున్నారు.

17:33 - December 10, 2018

ఢిల్లీ: కేంద్ర ప్రభుత్వం, రిజర్వ్ బ్యాంక్ ఆఫ్ ఇండియా మధ్య యుద్ధం ముదిరింది. ఆర్బీఐ గవర్నర్‌ ఉర్జిత్ పటేల్ సంచలన నిర్ణయం తీసుకున్నారు. గవర్నర్ పదవికి ఆయన రాజీనామా చేసి షాక్ ఇచ్చారు. వ్యక్తిగత కారణాలతో తాను పదవికి రాజీనామా చేశానని పటేల్ చెప్పారు. ఆర్బీఐ గవర్నర్‌గా పని చేయడం గర్వంగా ఉందన్నారాయన. కొన్ని రోజులుగా కేంద్ర ప్రభుత్వంతో ఢీ అంటే ఢీ అంటున్న ఉర్జిత్ పటేల్ సడెన్‌గా రాజీనామా చేశారు. కొంతకాలంగా కేంద్రం, ఆర్బీఐ మధ్య వివాదం నడుస్తోంది. పలు అంశాల్లో కేంద్రం నిర్ణయాలతో ఉర్జిత్ పటేల్ తీవ్రంగా విభేదిస్తూ వస్తున్నారు. పెద్ద నోట్ల రద్దు, విజయ్ మాల్యా అంశం, బ్యాంకుల దివాళాకు సంబంధించి ఇరు వర్గాల మధ్య వివాదం నడుస్తోంది. రిజర్వ్ బ్యాంకు వద్ద ఉన్న నగదు నిల్వల్లో కొంత భాగం(దాదాపు 2లక్షల కోట్ల రూపాయలు) తమకు ఇవ్వాలని కేంద్ర ప్రభుత్వం ఒత్తిడి తీసుకొచ్చింది. అయితే ఈ ప్రతిపాదనను పటేల్‌తో పాటు కొందరు సీనియర్ ఆర్థికవేత్తలు వ్యతిరేకిస్తున్నారు. ఫండ్స్ ఇచ్చేది లేదని ఉర్జిత్ పటేల్ తేల్చి చెప్పారు. దీనిపై అనేకమార్లు ట్విట్టర్‌లో వివాదాస్పదమైన వ్యాఖ్యలు చేశారు. ఉర్జిత్ పటేల్ వ్యాఖ్యలను ప్రతిపక్షాలు సమర్థించాయి. కేంద్ర ప్రభుత్వం తీరుని ఆక్షేపించాయి.
నోట్ల రద్దు, జీఎస్టీలో కీలక పాత్ర:
కొన్ని నెలలుగా కేంద్రం-ఆర్బీఐ మధ్య కోల్డ్‌వార్ నడుస్తోంది. కేంద్ర ప్రభుత్వంతో ఉర్జిత్ పటేల్‌కు విభేదాలు ఉన్నాయి. నోట్ల రద్దు, జీఎస్టీ అమలులో ఉర్జిత పటేల్ కీలక పాత్ర పోషించారు. 2016 సెప్టెంబర్‌లో ఆర్బీఐ గవర్నర్‌గా ఉర్జిత్ పటేల్ బాధ్యతలు స్వీకరించారు. 2019 సెప్టెంబర్‌లో ఆయన పదవీకాలం ముగియనుంది. సార్వత్రిక ఎన్నికలకు సమయం సమీపిస్తున్న వేళ.. ఉర్జిత్ పటేల్ రాజీనామా చేయడం రాజకీయవర్గాల్లో చర్చనీయాంశంగా మారింది. ఇది బీజేపీకి ఇబ్బంది కలిగించే పరిణామం అని విశ్లేషకులు అంటున్నారు.

16:53 - December 3, 2018

తాండూర్:  5ఏళ్లక్రితం తెలంగాణ యువత నీళ్లు,నిధులు,నియామకాల కోసం, ఆత్మగౌరవం కోసం కొట్లాడి తెలంగాణాను తెచ్చుకున్నారు. ఉద్యమకారులు, ఆత్మబలిదానాలు చేసుకున్నారు, వారు కన్న కలలు నేడు కల్లలు అయ్యాయి అని ఏఐసీసీ అధ్యక్షుడు రాహుల్ గాంధి అన్నారు. వికారాబాద్ జిల్లా తాండూర్ లో జరిగిన కాంగ్రెస్ పార్టీ ఎన్నికల ప్రచార సభలోమాట్లాడుతూ .. కేసీఆర్ అధికారంలోకి వచ్చినప్పటి నుంచి ప్రాజెక్టులు రీడిజైనింగ్ పేరుతో ప్రాజెక్టులు వ్యయం పెంచారని ఆరోపించారు. 17 వేల కోట్ల రూపాయల మిగులు బడ్జెట్ ఉన్న రాష్ట్రాన్ని అప్పుల పాలు చేసి, కేసీఆర్  ప్రతి ఒక్కరి తలపై రెండున్నర లక్షల అప్పు మిగిల్చారని రాహుల్ గాంధీ ఆరోపించారు. ప్రజల నెత్తిన అప్పు మిగిల్చిన కేసీఆర్ కొడుకు ఆదాయం మాత్రం రూ.400 కోట్ల కుపైగా చేరిందని రాహుల్ తెలిపారు. కేసీఆర్ రాష్ట్రాన్ని బంగారు తెలంగాణ చేస్తా అన్నారు కానీ ఆయన కుటుంబం బంగారుకుటుంబగా ఏర్పడిందని ఆయన వ్యాఖ్యానించారు. 


కేసీఆర్ వస్తే రాష్ట్రం బాగుపడుతుంది, ప్రజల ఆశలు తీరతాయని కాంగ్రెస్ పార్టీ  ఆనాడు తెలంగాణా ఇచ్చిందని, కానీ ప్రజలకు కేసీఆర్ వల్ల ఒరిగిందేమి లేదని ఆయన అన్నారు. తెలంగాణ వచ్చాక నేను  విశ్రాంతి తీసుకుంటానని  కేసీఆర్ గతంలో అన్నారని కానీ ఆయన అలాంటిదేమీ చేయలేదని, రేపు ఎన్నికల్లో ఓడిపోతే రూ.300 కోట్ల రూపైయల విలువైన భవంతిలో ఆయన  విశ్రాంతి తీసుకుంటారని రాహుల్ ఎద్దేవా చేశారు. మేనిఫెస్టోలో పెట్టిన ఏ ఒక్క హామీని ఆయన నెరవేర్చలేదని రాహుల్ గాంధీ చెపుతూ, కేసీఆర్ ధనవంతులకు మేలుచేస్తున్నారు కానీ, పేదవారికి ఏమీ చెయ్యట్లేదని  అని చెప్పారు. కాంగ్రెస్  ప్రభుత్వం అధికారంలోకి రాగానే 2లక్షల లోపు  రైతు రుణాలను ఒక్కసారిగా రద్దు చేస్తామని హామీ ఇచ్చారు. రైతులకు గిట్టుబాటుధర కల్పిస్తామని, ఆదివాసీలకు అటవీ హక్కలపై  పూర్తి హక్కులు కల్పిస్తాంఅని రాహుల్ హామీ ఇచ్చారు. ఉద్యమ సమయంలో బలంగాఉన్న డ్వాక్రా సంఘాలను కేసీఆర్ నిర్లక్ష్యం చేశారని,కాంగ్రెస్  పార్టీ అధికారంలోకి  రాగానే మహిళా  పారిశ్రామికవేత్తలకు రూ.500 కో్ట్లతో  నిధిని ఏర్పాటు చేస్తుందని ఆయన  తెలిపారు. 5లక్షల రూపాయలవరకు వడ్డీలేని రుణం మహిళా సంఘాలకు ఇస్తాం అని కూడా రాహుల్ తెలిపారు.  బడ్జెట్ లో 20శాతం విద్యా, సాఫ్ట్ స్కిల్స్ కోసం కేటాయిస్తాంఅని రాహుల్ గాంధీ చెప్పారు.  నరేంద్ర మోడీ అధికారంలోకి వచ్చాక విదేశాల్లో ఉన్న నల్లధనం తెచ్చి ఒక్కోకరికి 15లక్షలు ఇస్తాననన్నారు కానీ ఎవరికీ పైసా ఇవ్వలేదని రాహుల్ అన్నారు. మోడీ  తెచ్చిన జీఎస్టీ వల్ల లక్షలాది మంజి మంది ఉద్యోగాలుపోయాయని. జీఎస్టీకి దేశంలో మద్దతు తెలిపిన తెలిపినవారిలో కేసీఆర్ ఒకడని ఆయన చెప్పారు. 

22:12 - November 30, 2018

హైదరాబాద్: కేసీఆర్ కేంద్ర కార్మిక శాఖ మంత్రిగా ఉన్న రోజల్లో ఈఎస్ఐ కార్పోరేషన్ లో అక్రమాలు చోటు చేసుకున్నాయని  టీపీసీసీ అధ్యక్షుడు ఉత్తమ్ కుమార్రెడ్డి ఆరోపించారు.  ఈకేసుకు సంబంధించి  కోర్టులో  కేసీఆర్ పేరు చెప్పినప్పటికీ, సీబీఐ చార్జి షీట్ లో ఏ1 గా ఉండాల్సిన కేసీఆర్ పేరు తొలగించారని ఆయన తెలిపారు. వైద్య పరీక్షల పేరుతో కేసీఆర్ ఢిల్లీ వెళ్లి తనపై ఉన్న సీబీఐ కేసును మాఫీ చేయించుకున్నారని ఉత్తమ్  చెప్పారు.  రాష్ట్రంలో కోచ్ ఫ్యాక్టరీ, బయ్యారం ఉక్కు పరిశ్రమకోసం మోడీపై  కేసీఆర్ ఎందుకు వత్తిడి తీసుకురాలేదని ఉత్తమ్ ప్రశ్నించారు. 

18:37 - November 29, 2018

వికారాబాద్: మహాకూటమి అధికారంలోకి వస్తే.. గిరిజనులు, ఆదివాసీలకు మరిన్ని హక్కులు రాసిస్తాం అని హామీ ఇచ్చారు కాంగ్రెస్ జాతీయ అధ్యక్షుడు రాహుల్ గాంధీ. తెలంగాణ ఎన్నికల ప్రచారంలో భాగంగా పరిగి బహిరంగ సభలో మాట్లాడారాయన. కొత్త చట్టాలు తీసుకొచ్చి అటవీ భూములపై హక్కులు ఇస్తామని హామీ ఇచ్చారు. చట్టసభల్లోనూ ప్రాధాన్యత ఎక్కువ ఉంటుందని భరోసా ఇచ్చారు రాహుల్. ఆదివాసీలు, గిరిజనులకు ఎంతో చేయాల్సి ఉన్నా.. వారి భూములనే ప్రభుత్వాలు లాక్కుంటున్నాయని.. ఇది దారుణం అని వ్యాఖ్యానించారాయన.
బీజేపీ - టీఆర్ఎస్ - MIM ఒక్కటే :
తెలంగాణలోనే కాదు.. దేశవ్యాప్తంగా బీజేపీ, టీఆర్ఎస్, ఎంఐఎం పార్టీలు ఒక్కటే అంటూ కొత్త అర్థం చెప్పారు రాహుల్. TRS కాదని.. TRSS అన్నారు. తెలంగాణ రాష్ట్రీయ స్వయం సేవక్ అంటూ చురకలు అంటించారు. ఎంఐఎం పార్టీ కూడా బీజేపీకి అనుకూలంగా పని చేస్తుందని.. బయటకు పోరాడుతున్నట్లు నటిస్తున్నారంటూ విరుచుకుపడ్డారాయన. నాలుగేళ్లలో అన్ని అంశాల్లోనూ ఈ రెండు పార్టీలు బీజేపీకి వెన్నుదన్నుగా ఉన్నాయని.. ఎన్నికల వేళ పోటీ పడటం విచిత్రంగా ఉందంటూ విమర్శలు చేశారు జాతీయ అధ్యక్షుడు. ఎలాంటి ఓటు బ్యాంక్ లేని మహారాష్ట్రలో ఎంఐఎం పోటీ చేస్తుంది అంటే.. బీజేపీకి అనుకూలంగా వ్యవహరించటమే కదా అని ప్రశ్నించారు రాహుల్. నోట్ల రద్దు, జీఎస్టీలకు కూడా టీఆర్ఎస్ పూర్తి మద్దతు పలికిన అంశాన్ని ప్రస్తావించారు.

17:48 - November 29, 2018

హైదరాబాద్: నగరంలో అభివృద్ధి కార్యక్రమాలకు నాంది పలికింది తానేనని ఏపీ ముఖ్యమంత్రి చంద్రబాబు నాయుడు అన్నారు. ప్రజాకూటమి తరుఫున మదీనాగూడలో రోడ్ షో లో  చంద్రబాబు ప్రసంగించారు. అన్ని రంగాల్లో హైదరాబాద్ అభివృద్ధికి కృషి చేశానని చంద్రబాబు చెప్పారు. కేసీఆర్ చెబుతున్నట్టుగా హైదరాబాద్ ను నేను కట్టలేదని చంద్రబాబు వివరణ ఇచ్చారు. నేను కట్టింది సైబరాబాద్ అని వెల్లడించారు.
అక్కడ మోడీ.. ఇక్కడ కేసీఆర్:
ఈ సందర్భంగా కేసీఆర్, మోడీలపై చంద్రబాబు మండిపడ్డారు. తెలంగాణ రాష్ట్రంలో కేసీఆర్, దేశంలో మోడీ ప్రజలను దగా చేశారని ధ్వజమెత్తారు. ప్రధాని మోడీ అన్ని రాజ్యాంగ వ్యవస్థలను నాశనం చేశారని చంద్రబాబు ఆరోపించారు. ఆదాయంలో ఉన్న తెలంగాణను కేసీఆర్ అప్పులపాలు చేశారని విమర్శించారు. దేశాన్ని కాపాడుకోవడానికి కాంగ్రెస్ తో చేతులు కలిపామని చంద్రబాబు తెలియజేశారు. కేసీఆర్ పాలనలో తెలంగాణలో అభివృద్ది కుంటుపడిందన్నారు.
రాత్రి 12గంటలకు లేచి ఊరంతా తిరిగా:
ఉమ్మడి రాష్ట్రానికి ముఖ్యమంత్రిగా ఉన్న సమయంలో తాను సింగపూర్ కి వెళ్లి రాత్రి 12గంటలకు లేచి ఊరంతా తిరిగానని, రోడ్లు ఎలా క్లీన్ చేస్తారో చూశానని, అదే వ్యవస్థను హైదరాబాద్ లో శ్రీకారం చుట్టానని చంద్రబాబు చెప్పుకొచ్చారు. నగరం క్లీన్ గా ఉండాలని ఆలోచన చేసిన ఏకైక ముఖ్యమంత్రి దేశంలో నేనొక్కడినే అని చంద్రబాబు పేర్కొన్నారు.
తెలంగాణ రాష్ట్రం అభివృద్ధి చెందాలన్నా, ప్రజల జీవితాలు బాగుపడాలన్నా కేసీఆర్ ను గద్దె దింపాలని, ప్రజాకూటమి అభ్యర్థులను గెలిపించాలని చంద్రబాబు కోరారు.

16:41 - November 29, 2018

నిజామాబాద్: తెలంగాణలో ప్రజాకూటమి అధికారంలోకి వస్తే ప్రజల కలలు సాకారం చేస్తామని కాంగ్రెస్ జాతీయ అధ్యక్షుడు రాహుల్ గాంధీ అన్నారు. గల్ఫ్ బాధితులను ఆదుకుంటామని, వారి కోసం రూ.500కోట్లతో ఫండ్ ఏర్పాటు చేస్తామని వాగ్దానం చేశారు. ఆర్మూర్ లో ప్రజాకూటమి ఎన్నికల ప్రచార సభలో రాహుల్ గాంధీ ప్రసంగించారు. కేసీఆర్ పై విమర్శల వర్షం కురిపించారు. పేదలకు డబుల్ బెడ్రూమ్ ఇళ్లు కట్టించని కేసీఆర్.. ఆయన కోసం రూ.300 కోట్లతో ఇల్లు కట్టించుకున్నారని విమర్శించారు.
టీఆర్ఎస్ కాదు తెలంగాణ ఆర్ఎస్ఎస్:
ప్రతి విషయంలో బీజేపీకి కేసీఆర్ మద్దతిచ్చారని రాహుల్ ఆరోపించారు. నోట్ల రద్దు, జీఎస్టీ నిర్ణయాలను కేసీఆర్ ప్రశంసించారని చెప్పారు ఇది టీఆర్ఎస్ కాదు తెలంగాణ ఆర్ఎస్ఎస్ అని విమర్శించారు. తెలంగాణను మోసం చేసిన మోడీని, కేసీఆర్ ని ఓడించాలని రాహుల్ పిలుపునిచ్చారు. టీఆర్ఎస్ నాయకులు ప్రాజెక్టుల రీ డిజైన్ పేరుతో నిధులు మింగేస్తున్నారని, తెలంగాణ సంపదను ప్రజలకు ఉపయోగించడం లేదని, కేసీఆర్ తన కుటుంబానికి వాడుకుంటున్నారని, నిరుద్యోగులకు ఉద్యోగాలు కల్పించడం లేదని రాహుల్ ఆరోపించారు.
హామీల వర్షం:
ప్రజాకూటమి అధికారంలోకి రాగానే రైతుల కోసం పసుపు బోర్డు ఏర్పాటు చేస్తామని, నిరుద్యోగులకు నెలకు రూ. 3వేల నిరుద్యోగ భృతి ఇస్తామని, అధికారంలోకి వచ్చిన తొలి ఏడాదిలోనే లక్ష ఉద్యోగాలు భర్తీ చేస్తామని, ఏకకాలంలో రైతులకు రూ.2లక్షల వరకు రుణమాఫీ చేస్తామని రాహుల్ హామీ ఇచ్చారు.

16:09 - November 29, 2018

వనపర్తి: బీజేపీ అధికారంలోకి వస్తే 2020 కల్లా తెలంగాణలో పేదలందరికి ఇల్లు కట్టిస్తామని కేంద్ర హోంశాఖ మంత్రి రాజ్ నాథ్ సింగ్ హామీ ఇచ్చారు. రైతులకు ఏకకాలంలో రూ.2లక్షల వరకు రుణమాఫీ చేస్తామని వాగ్దానం చేశారు. వనపర్తిలో బీజేపీ బహిరంగసభలో రాజ్ నాథ్ సింగ్ ప్రసంగించారు. ఈ సందర్భంగా బీజేపీ ప్రభుత్వం అమలు చేస్తున్న సంక్షేమ పథకాల గురించి ఆయన ప్రస్తావించారు. పేదలకు ఉచిత గ్యాస్ కనెక్షన్ లు ఇస్తున్నామని, ఆయుష్మాన్ భారత్ తో పేద ప్రజలను ఆదుకుంటున్నామని రాజ్ నాథ్ సింగ్ వివరించారు. పంటలకు కేంద్రం మద్దతు ధర కల్పిస్తోందన్నారు. తెలంగాణ ప్రభుత్వంపై ఆయన విమర్శలు గుప్పించారు. రాష్ట్రంలో సంక్షేమ పథకాలు పేదలకు చేరడం లేదని.. ఇళ్ల నిర్మాణానికి ఇచ్చిన నిధులను టీఆర్ఎస్ దారి మళ్లించిందని రాజ్ నాథ్ ఆరోపించారు. తెలంగాణకు అధిక నిధులు కేటాయించామన్నారు. రాష్ట్రంలో 4500 మంది రైతులు ఆత్మహత్యలు చేసుకున్నారని వాపోయారు. ఈ ఎన్నికల్లో బీజేపీకి ఒక్క అవకాశం ఇచ్చి చూడాలని, అభివృద్ధి అంటే ఏంటో చూపిస్తామని రాజ్ నాథ్ అన్నారు.

15:53 - November 29, 2018

ఆదిలాబాద్: వచ్చే ఎన్నికల్లో కేంద్రంలో నాన్ బీజేపీ నాన్ కాంగ్రెస్ ప్రభుత్వం ఏర్పాటు చేయిస్తానని.. రిజర్వేషన్లు సాధించి తీరుతాను అని టీఆర్ఎస్ అధినేత కేసీఆర్ అన్నారు. మొత్తం ఎంపీ సీట్లు మనమే గెలవాలన్నారు. గిరిజనులు, ముస్లింల రిజర్వేషన్లు ఎందుకు పెంచరు అని మోడీ ప్రభుత్వంపై కేసీఆర్ ఫైర్ అయ్యారు. రిజర్వేషన్లు మా హక్కు అని ఆయన స్పష్టం చేశారు. ఎన్నికల ప్రచారంలో భాగంగా ఆసిఫాబాద్ లో టీఆర్ఎస్ ఎన్నికల ప్రచార సభలో కేసీఆర్ ప్రసంగించారు. గిరిజనులు, ముస్లింల రిజర్వేషన్లు పెంచాలని అసెంబ్లీ తీర్మానం చేసి పంపినా.. రిజర్వేషన్లు ఇచ్చేది లేదని మోడీ అంటున్నారని, అలా అనడానికి మోడీ ఎవరు? అని కేసీఆర్ మండిపడ్డారు. ఇండియా ఏమైనా మోడీ జాగీరా? అని కేసీఆర్ ధ్వజమెత్తారు. దేశంలోని 19 రాష్ట్రాల్లో బీజేపీ ప్రభుత్వాలు ఉన్నాయని, ఏ ఒక్క రాష్ట్రంలో అయినా రైతులకు ఉచితంగా విద్యుత్ ఇస్తున్నారా? కేసీఆర్ నిలదీశారు. తెలంగాణలో ఉన్న సంక్షేమ పథకాలు బీజేపీ పాలిత రాష్ట్రాల్లో ఎందుకు లేవు? అని కేసీఆర్ అడిగారు. 
బాబుగారూ.. కులీకుతుబ్ షా ఎక్కడికి పోవాలి?
ఏపీ సీఎం చంద్రబాబుపైనా కేసీఆర్ మండిపడ్డారు. హైదరాబాద్ కట్టింది నేనే అని చంద్రబాబు చెప్పుకుంటున్నారని, హైదరాబాద్ కట్టింది బాబు అయితే.. మరి మన కులీకుతుబ్ షా ఎక్కడికి పోవాలని కేసీఆర్ ఎద్దేవా చేశారు. హైదరాబాద్ నగరాన్ని ప్రపంచపటంలో పెట్టానని చంద్రబాబు చెబుతారని, మరి కరెంటు ఎందుకు ఇవ్వలేకపోయారని కేసీఆర్ ప్రశ్నించారు. 
మీకు ఎలాంటి కన్ ఫ్యూజన్ లేదు:
ఈ ఎన్నికల్లో ప్రజల ముందు ఎలాంటి కన్ ఫ్యూజన్ లేదని.. 58ఏళ్లు పాలించిన కాంగ్రెస్, టీడీపీ వైపు.. నాలుగున్నరేళ్లలోనే అభివృద్ధి సాధించిన టీఆర్ఎస్ ఒక వైపు ఉన్నాయని.. ప్రజలు వివేకంతో ఓటు వేయాలని కేసీఆర్ సూచించారు. ఆసిఫాబాద్ టీఆర్ఎస్ అభివృద్ధి కోవా లక్ష్మిని భారీ మెజార్టీతో గెలిపించాలని కేసీఆర్ పిలుపునిచ్చారు. పోటీ రెండింటి మధ్యనే ఉందని కేసీఆర్ స్పష్టం చేశారు. మళ్లీ అధికారంలోకి వస్తే సంక్షేమ పథకాలను కొనసాగించడంతో పాటు మరిన్ని ప్రవేశపెడతామని కేసీఆర్ హామీ ఇచ్చారు. కోటి ఎకరాలకు సాగునీరు అందించడమే తన లక్ష్యం అని, తెలంగాణ అంతా పచ్చగా ఉండాలని, రైతుల అప్పులు తీరిపోవాలన్నదే తన ధ్యేయం అని కేసీఆర్ వెల్లడించారు.
తుమ్ నయ్ తుమారే బాప్ పీ నయ్ కర్ సక్తా:
తెలంగాణను ఆగమాగం చేసేందకు బీజేపీ ప్రయత్నిస్తోందని కేసీఆర్ మండిపడ్డారు. ప్రధాని మోడీ, అమిత్ షాలపై ఆయన ఆగ్రహం వ్యక్తం చేశారు. తుమ్ నహీ తుమారే బాప్ పీ తెలంగాణకో ఆగమాగం నయ్ కర్ సక్తా అంటూ ఘాటు వ్యాఖ్యలు చేశారు.

Pages

Don't Miss

Subscribe to RSS - మోడీ