యూజీసీ

16:04 - September 21, 2018

న్యూఢిల్లీ: అన్ని విశ్వవిద్యాలయాలు సెస్టెంబర్ 29 తేదీని సర్జికల్ దినోత్సవం రోజుగా పాటించాలని యూనివర్శిటీ గ్రాంట్స్ కమిషన్ (యూజీసీ) ఆదేశాలు జారీచేసింది. పాకిస్థాన్ భూభాగంలో భారత సైన్యం జరిపిన సర్జికల్ దాడులకు సంఘీభావంగా విశ్వవిద్యాలయాల్లో విద్యార్థులు ఆరోజు ప్రతిజ్ఞ నిర్వహించాలని కోరింది. ఈ మేరకు అన్ని విశ్వవిద్యాలయాలకు ఉత్తరాలను యూజీసీ పంపించింది.

యూజీసీ ఇచ్చిన ఆదేశాలపై జవహర్ లాల్ నెహ్రూ విశ్వవిద్యాలయం (జేఎన్‌యూ) అద్యాపకులు విమర్శించారు. ఇది విశ్వవిద్యాలయాల్లో యుధ్ధ టాంకులను మొహరింపచేయడమేనని.. దీని ద్వారా బీజేపీ నేతలు తమను తాము జాతీయవాదులుగా నిరూపించుకోవాలని చూస్తున్నారని దుయ్యబట్టారు.


రాజకీయ లబ్దికి బీజేపీ కుట్ర : కాంగ్రెస్

సర్జికల్ స్ట్రైక్ దినోత్సవాన్ని జరపాలని యూజీసీ ఆదేశించడం రాజకీయ దురుద్దేశమేనని కాంగ్రెస్ పార్టీ విమర్శించింది. దీని ద్వారా రాజకీయ లబ్దిపొందేందుకు బీజేపీ ప్రభుత్వం ప్రయత్నిస్తోందని సీనియర్ కాంగ్రెస్ నాయకుడు, ఎంపీ కపిల్ సిబాల్ విమర్శించారు. ఇటువంటి చర్యలవల్ల విశ్వవిద్యాలయాలు స్వతంత్రతను కోల్పోతాయని.. స్వాతంత్ర్యం వచ్చిన తర్వాత యూజీసీ ఈ తరహా సర్కులర్‌లను జారీచేయలేదని సిబాల్ పేర్కొన్నారు.

07:07 - July 9, 2018

యూనివర్సిటీ గ్రాంట్‌ కమిషన్‌ స్థానంలో భారత ఉన్నత విద్యా కమిషన్‌ తీసుకురావాలని కేంద్రం ఆలోచనను విద్యార్థి సంఘాలు, యూనివర్సిటీ ఫ్రొఫెసర్లు, విద్యారంగ నిపుణులు తీవ్రంగా వ్యతిరేకిస్తున్నారు. దీనివల్ల ప్రభుత్వ యూనివర్సిటీలకు ఇబ్బంది కలిగే ప్రమాదం ఉందని... విద్యావ్యవస్థకు ఉన్న స్వయం ప్రతిపత్తిని దెబ్బతీసేదిగా ఉందని వారు పేర్కొంటున్నారు. ఈ ఆలోచనను కేంద్రం వెంటనే వెనక్కి తీసుకోవాలని వారు డిమాండ్‌ చేస్తున్నారు. అలాగే కర్నాటక తరహాలో తెలంగాణ ప్రభుత్వం కూడా దీనికి వ్యతిరేకంగా తీర్మానం చేసి కేంద్రానికి పంపాలని వారు తెలంగాణ సర్కార్‌ను కోరుతున్నారు. టెన్ టివి జనపథంలో ప్రసారమయిన ఈ కార్యక్రమం కోసం వీడియో క్లిక్ చేయండి. 

08:18 - June 28, 2018

ఢిల్లీ : యూనివర్సిటీ గ్రాంట్స్‌ కమిషన్‌ స్ధానంలో మరో ఉన్నత విద్యా నియంత్రణ సంస్థకు కేంద్రం శ్రీకారం చుట్టింది. యూజీసీ స్ధానంలో భారత ఉన్నత విద్యా కమిషన్‌ ఏర్పాటు కానుంది. ఇందుకు మార్గం సుగమం చేస్తూ యూజీసీ చట్టం, 1956ను తొలగిస్తూ నూతన ముసాయిదాను కేంద్ర ప్రభుత్వం విడుదల చేసింది. నూతన ముసాయిదా చట్టంపై జులై 7లోగా విద్యాసంస్థలు, మేథావులు, నిపుణులు, తల్లితండ్రులు తమ విలువైన సూచనలు, సలహాలను పంపాలని కేంద్ర మానవ వనరుల అభివృద్ధి శాఖ కోరింది. విశ్వవిద్యాలయాలకు నిధులను సమకూర్చడంలో యూజీసి కీలక పాత్ర పోషిస్తున్న విషయం తెలిసిందే. ఇకపై ఈ బాధ్యతలను ఉన్నత విద్యా కమిషన్‌ తలకెత్తుకోనుంది. 

 

21:30 - November 14, 2017

ఢిల్లీ : దేశవ్యాప్తంగా 123 విద్యాసంస్థలు యూనివర్సిటీ ట్యాగ్‌లైన్‌ను కోల్పోయాయి. ఇందులో తెలుగు రాష్ట్రాల్లోని పలు ప్రైవేటు విద్యాసంస్థలు ఉన్నాయి. విశాఖకు చెందిన గీతం, గుంటూరుకు చెందిన కోనేరు లక్ష్మయ్య ఎడ్యుకేషన్‌ ఫౌండేషన్‌, తిరుపతికి చెందిన రాష్ట్రీయ సాంస్క్రీట్‌ విద్యాపీఠ్‌, అనంతపురంకు చెందిన శ్రీ సత్యసాయి ఇనిస్టిట్యూట్‌ ఆఫ్‌ హయ్యర్‌ లెర్నింగ్‌, గుంటూరుకు చెందిన విజ్ఞాన్‌ ఫౌండేషన్‌ ఫర్‌ సైన్స్‌ టెక్నాలజీ రీసెర్చ్‌, ఇండియన్‌ ఇనిస్టిట్యూట్‌ ఆఫ్‌ సైన్స్‌ బెంగళూరు. వెల్లూరు ఇనిస్టిట్యూట్‌ ఆఫ్‌ టెక్నాలజీ, ఎస్‌ఆర్‌ఎం ఇనిస్టిట్యూట్‌ ఆఫ్‌ సైన్స్‌ అండ్‌ టెక్నాలజీ ఉన్నాయి. ఈ విద్యాసంస్థలు కొత్త పేరు కోసం కేంద్ర మానవ వనరుల అభివృద్ధి శాఖకు మళ్లీ దరఖాస్తు చేసుకోవాలని యూజీసీ ఆదేశించింది. 

13:43 - September 15, 2017

మెదక్ : గుర్తింపు పొందిన విశ్వవిద్యాలయంలో మాత్రమే రూపొందించే జర్నల్స్‌ను ఓ మారుమూల ప్రాంతంలో ఉన్న ప్రభుత్వ కళాశాల రూపొందించింది. విశ్వవిద్యాలయాలకు మాత్రమే సాధ్యమయ్యే పనిని తామూ చేయగలమంటూ చేసి చూపింది. అంతేకాదు కార్పొరేట్‌ స్కూలు యాజమాన్యాల చేత ఔరా అనిపించింది. ఇంతకీ అది ఏకాలేజీ..? వాచ్‌ దిస్‌ ఇది జహీరాబాద్‌లోని ప్రభుత్వ డిగ్రీ కళాశాల. విశ్వవిద్యాలయాలకు తక్కువ కాదంటూ 2014 నుండి జర్నల్స్‌ను రూపొందించి ప్రచురిస్తోంది. ఈ ఏడాది జనవరి 10న కేంద్ర ప్రభుత్వం ఆర్డినెన్స్‌ను జారీ చేసింది. ఈ ఆర్డినెన్స్‌ ప్రకారం విశ్వవిద్యాలయాలు, ప్రభుత్వ పాఠశాలలోని అధ్యాపకులు పదోన్నతులు పొందడం కోసం, పీహెచ్ డీ పూర్తి చేయడానికి, యూజీసీ గుర్తింపు పొందిన జర్నల్స్‌ను కనీసం రెండు పరిశోధనా పత్రాలు సమర్పించాల్సి ఉంటుంది. ఇందుకోసమే డిగ్రీ కళాశాల అద్యాపక బృందం నాలుగేళ్ల క్రితం మంజీర జర్నల్స్‌ పేరుతో జర్నల్స్‌ను ప్రారంభించింది.

ఈ జర్నల్స్‌ ప్రతి ఆరు నెలలకు
కళాశాల ప్రారంభించిన ఈ జర్నల్స్‌ ప్రతి ఆరు నెలలకు ఒక సారి ప్రచురితం అవుతాయి. ఇందులో దేశ, విదేశాల్లోని మేధావుల, శాస్త్రవేత్తల, ఆచార్యుల, సామాజిక శాస్త్రవేత్తల పరిశోధన పత్రాలను ప్రచురితం చేస్తున్నారు. దీనికి ఇప్పుడు అంతర్జాతీయ గుర్తింపు రావడం పట్ల కళాశాల ప్రిన్సిపల్‌ శ్రీనివాసరాజు ఆనందం వ్యక్తం చేస్తున్నారు. నాలుగేళ్లుగా మంజీరా జర్నల్స్‌ను రూపొందిస్తున్న వీరికి కేంద్ర ప్రభుత్వ ఆధీనంలోని యూజీసీ గుర్తించి ఒక ప్రత్యేక నంబర్‌ను ఇచ్చింది. అంతేకాదు ఇంటర్నేషనల్‌ స్టాండెడ్‌ సీరియల్‌నంబర్‌ అనే సంస్థ కూడా ఈ జర్నల్‌ను గుర్తించింది. ఇంతటి అరుదైన గౌరవం తమ కళాశాలకు అభించడం ఆనందంగా ఉందని అధ్యాపకులు డాక్టర్‌ మల్లిఖార్జున రావు హర్షం వ్యక్తం చేస్తున్నారు.

జాతీయ విశ్వవిద్యాలయాలతో సమానంగా
ఇక ఈ కళాశాలలోని విద్యార్థులు కూడా తమ కళాశాల అధ్యాపక బృందం చేస్తున్న కృషిని కొనియాడుతున్నారు. పెద్ద పెద్ద విశ్వవిద్యాలయాలు చేసే పనిని మారుమూల ప్రాంత కళాశాల చేస్తున్నందుకు గర్వకారణంగా ఉందని చెబుతున్నారు.జాతీయ విశ్వవిద్యాలయాలతో సమానంగా తమ కళాశాల కూడా ముందుకు సాగుతుందని కళాశాల అధ్యపకులు గర్వపడుతున్నారు. 

06:41 - August 31, 2015

హైదరాబాద్ : తెలంగాణ సర్కార్‌పై యుజీసీ కన్నెర్రజేసింది. యూనివర్సిటీల్లో నిబంధనలు ఉల్లంఘిస్తున్నారని మండిపడింది. ఇక నుంచి యూజీసీ గ్రాంట్ల నుంచి కోతలు కూడా విధిస్తామని హెచ్చరికలు జారీ చేసింది. పొంతనలేని లోపాలు చూపి నాణ్యతలేని పరిశోధనలు కుప్పలుగా పంపుతున్నారంటూ ఫైర్ అయింది. తెలంగాణ రాష్ట్ర యూనివర్సిటీలకు ఇంకా గడ్డుకాలం వెంటాడుతూనే వుంది. అసలే యూనివర్సిటీలు ప్రొఫెసర్లు లేక విలవిలాడుతుంటే..ఇప్పుడు యూజీసీ క్లాస్‌తీసుకోవడం తలనొప్పిగా మారింది.

అభిప్రాయాలు వ్యక్తం చేసిన యూజీసీ..
విశ్వవిద్యాలయాల్లో పీహెచ్‌డీల క్వాలిటీ తగ్గిపోతున్న నేపథ్యంలో యూజీసీ తన అభిప్రాయాలను వెల్లగక్కింది. ఒక్క ప్రొఫెసర్ కింద ఎనిమిది మంది పీహెచ్‌డీ స్కాలర్స్ మాత్రమే ఉండాలి. కానీ రాష్ట్రంలో ఏకంగా పది నుంచి పదిహేను మందికిపైగా కొనసాగుతున్నారు. ఇలా నిబంధనలకు విరుద్ధంగా కొనసాగితే కఠిన చర్యలు తప్పవనే హింట్‌ని తాజాగా యూజీసీ వర్గాలు అందించాయి. దీంతో...వర్సిటీలకు నిధులకు ఎక్కడ అడ్డుకోగలుగుతారోనని వర్సిటీ వర్గాల్లో ఆందోళన మొదలైంది.

తప్పులను కప్పిపుచ్చుకొనే ప్రయత్నం..
యూజీసీ ఆగ్రహం చెందడంపై వర్సిటీ ప్రొఫెసర్లు తమ తప్పులను కప్పిపుచ్చే ప్రయత్నం చేస్తున్నట్టు తెలుస్తోంది. విద్యార్థుల ఒత్తిడిమేరకు కొందరు సూపర్‌వైజర్స్ విద్యార్థులకు గైడ్‌లుగా వ్యవహరిస్తున్నారని కొందరు ప్రొఫెసర్‌లు చెబుతున్నారు. అధికారుల సమాధానం అలా ఉంటే...యూనివర్శిటీ ఇంజనీరింగ్ విభాగాలతో పోలిస్తే సగానికి పైగా సోషల్ సైన్స్ డిపార్టుమెంట్లు నిర్లక్ష్యానికి గురవుతున్నాయనే ఆరోపణలున్నాయి. అటు విద్యావేత్తలు కూడా యూనివర్సిటీల ప్రవర్తనపై ఆగ్రహం వ్యక్తం చేస్తున్నారు. ఒకే గైడ్ కింద పదుల సంఖల్లో పరిశోధనలు చేయడాన్ని తప్పుపడుతున్నారు. ఈ విధానాన్ని నియంత్రించలేకపోతే భవిష్యత్‌లో తీవ్ర ఇబ్బందులు ఎదుర్కోవాల్సి వస్తుందని వారు ఆందోళన వ్యక్తం చేస్తున్నారు. ఇప్పటికైనా ప్రభుత్వం స్పందించి లోపాలను సరిదిద్ది యూనివర్శిటీలను, ఉన్నత విద్యను బతికించాలని విద్యావేత్తలు సైతం సూచిస్తున్నారు.

Don't Miss

Subscribe to RSS - యూజీసీ