రాజకీయం

06:51 - June 23, 2018

విజయవాడ : ఏపీలో రాజకీయ వేడి రాజుకుంటోంది. వచ్చే ఎన్నికల్లో ఏఏ పార్టీలు కలిసి పోటీ చేస్తాయి అన్న చర్చ అప్పుడే మొదలైంది. ఆయా పార్టీల అగ్రనాయకుల కదలికలూ దీనికి తగ్గట్లే ఉంటున్నాయి. వైరి పక్షంపై వాడి విమర్శనాస్త్రాలు సంధిస్తున్నారు. అవసరం అనుకున్నవారిని కలుపుకు పోయే చర్యలు తీసుకుంటున్నారు. ఆంధ్రప్రదేశ్‌లో ఎన్నికలకు ఏడాది ముందే రాజకీయం రసవత్తరంగా మారుతోంది. ప్రధాన పార్టీలు వచ్చే ఎన్నికల్లో గెలుపే లక్ష్యంగా పావులు కదుపుతున్నాయి. ప్రస్తుత పరిస్థితుల్లో పాలక తెలుగుదేశం పార్టీని ఓడించేందుకు వైసీపీ వ్యూహాత్మకంగా అడుగులు వేస్తోంది.

వచ్చే ఎన్నికల్లో కాపుల ఓట్లను గంపగుత్తగా కొల్లగొట్టగలడని భావిస్తోన్న పవన్‌ కల్యాణ్‌తో సఖ్యతకు వైసీపీ నాయకులు ప్రయత్నిస్తున్నారన్న వార్తలు ప్రచారంలో ఉన్నాయి. వైసీపీ, జనసేన విడివిడిగా పోటీ చేస్తే.. ప్రభుత్వ వ్యతిరేక ఓటు చీలే ప్రమాదం ఉందన్న భావనతో.. పవన్‌తో కలిసి వెళ్లాలనే వైసీపీ కిందిస్థాయి నాయకత్వం యోచిస్తున్నట్లు తెలుస్తోంది. పవన్‌కల్యాణ్‌కు మంచి మిత్రుడని పేరున్న వైసీపీ ఎంపీ వరప్రసాద్‌.. శుక్రవారం చేసిన వ్యాఖ్యలు ఈ వాదనకు బలం చేకూరుస్తున్నాయి.

అటు తెలుగుదేశం అధినాయకత్వం.. పవన్‌ కల్యాణ్‌తో సఖ్యత ఇక అసాధ్యమన్న రీతిలోనే సాగుతున్నట్లు స్పష్టమవుతోంది. గుంటూరు జిల్లా నంబూరులో శుక్రవారం జరిగిన శ్రీ దశావతార వేంకటేశ్వరస్వామి విగ్రహ ప్రతిష్ఠ కార్యక్రమంలో పాల్గొన్న.. ముఖ్యమంత్రి చంద్రబాబునాయుడు.. జనసేనాని పవన్‌ కల్యాణ్‌ చాలా సేపటివరకూ పలుకరించుకోక పోవడం ప్రత్యేకంగా కనిపించింది.

విగ్రహ ప్రతిష్ఠ కార్యక్రమం చివర్లో నవధాన్యాల సమర్పణ వేళ.. చంద్రబాబు, పవన్‌ కల్యాణ్‌ మొక్కుబడిగా కుశల ప్రశ్నలు వేసుకున్నారు. దీన్నిబట్టి.. తెలుగుదేశం పార్టీ... గత ఎన్నికల నాటి మిత్రుడు పవన్‌ కల్యాణ్‌ను పూర్తిగా దూరంగా చేసుకున్నట్లే అని అర్థమవుతోంది. ఈ దశలో... ఏపీ ఉపముఖ్యమంత్రి కేఈ కృష్ణమూర్తి.. పవన్‌ కల్యాణ్‌ గురించి చేసిన వ్యాఖ్యలు కూడా కీలకంగానే భావిస్తున్నారు. ఇప్పటికిప్పుడు ఎన్నికల పొత్తుల అంశం చర్చకు రాకున్నా.. ఆయా పార్టీల నాయకులు.. మద్దతు సమీకరణలపై చేస్తున్న వ్యాఖ్యలు మాత్రం ప్రాధాన్యాన్ని సంతరించుకుంటున్నాయి. 2019 ఎన్నికల్లో ఏ పార్టీ మరే పార్టీతో జతకడుతుందో తెలియాలంటే మరికొన్ని నెలలు వేచి చూడాల్సిందే.

09:53 - June 12, 2018

చిత్తూరు : జిల్లాలో అధికార టీడీపీ రాజకీయం రసకందాయంలో పడింది. ప్రత్యేకించి చంద్రగిరి నియోజకవర్గంలో ఆపార్టీ పరిస్థితి అయోమయంగా మారింది. ఇప్పటి వరకు నియోజకవర్గ ఇంచార్జీగా ఉన్న గల్లా అరుణకుమారి పార్టీకి అంటీముట్టనట్టుగా ఉండడంతో... అటు పార్టీలోనూ... ఇటు క్యాడర్‌లోనూ అయోమయం నెలకొంది. ఇంతకీ చంద్రగిరి టీడీపీలో ఏం జరుగుతోంది? గల్లా అరుణకుమారి టీడీపీలో కొనసాగుతారా? లేక ఇతర పార్టీలో చేరుతారా? చంద్రగిరి రాజకీయంపై 10టీవీ కథనం....
రోజుకో మలుపుతు తిరుగుతున్న పాలిటిక్స్‌
చిత్తూరు అంటేనే సీఎం చంద్రబాబు సొంత జిల్లా. అందులోనూ చంద్రగిరి అంటే చంద్రబాబు స్వగ్రామమైన నారావారిపల్లె కొలువైన నియోజకవర్గం. అలాంటి చంద్రగిరి నియోజకవర్గంలో ఇప్పుడు టీడీపీ రాజకీయాలు రోజుకో మలుపు తిరుగుతున్నాయి. 
టీడీపీ దూరంగా ఉంటోన్న గల్లా అరుణ
గడిచిన మూడు ఎన్నికల్లోనూ చంద్రగిరిలో టీడీపీ ఓటమినే చవి చూసింది. చంద్రగిరిపై పసుపు జెండా ఎగిరి పదిహేనేళ్లు కావొస్తోంది. కాంగ్రెస్‌ నుంచి గల్లా అరుణకుమారి వరుసగా ఇక్కడ విజయం సాధిస్తూ వచ్చారు. అయితే రాష్ట్ర విభజన తర్వాత సీన్‌ రివర్స్‌ అయ్యింది. రాష్ట్రంలో కాంగ్రెస్‌ దెబ్బతినడంతో... గల్లా అరుణకుమారి టీడీపీ కండువా కప్పుకున్నారు.  2014 ఎన్నికల్లో టీడీపీ అభ్యర్థిగా బరిలో దిగగా... ఆమె వైసీపీ చేతిలో ఓడిపోయారు. తన రాకను జీర్ణించుకోలేని టీడీపీలోని ఓ వర్గం తన ఓటమికి కృషి చేసిందని ఆమె మనస్తాపం చెందారు. అంతేకాదు.. కనీసం తనకు ఎమ్మెల్సీ అయినా దక్కుతుందని కొంతకాలంగా ఆమె ఎదురు చూశారు. కానీ అదికూడా దక్కదని తేలడంతో ఆమె టీడీపీకి దూరంగా ఉంటున్నారు. పైకి ఆమె చంద్రగిరి నియోజకవర్గ ఇంచార్జీగా ఉన్నా... పార్టీ కార్యక్రమాలకు అంతంత మాత్రంగానే హాజరయ్యేవారు. ఈ పరిణామాలు అధిష్టానం దృష్టికి కూడా వెళ్లాయి.
రాజకీయాలకే గుడ్‌బై చెప్తానన్న గల్లా
అసలే టీడీపీలో అసంతృప్తిగా ఉన్న గల్లా అరుణకుమారికి.. పార్టీ వదిలిన ఓ లీక్‌ మరింత కోపాన్ని తెచ్చిపెట్టింది. గల్లా అరుణ ఈ దఫా చంద్రగిరి నుంచి కాకుండా పలమనేరు నుంచి పోటీ చేస్తారన్నది ఆ లీక్‌ సారాంశం.  పలమనేరు సిట్టింగ్‌ ఎమ్మెల్యే, మంత్రి అమర్‌నాథ్‌రెడ్డిని పుంగనూరుకు పంపాలని పార్టీ యోచిస్తోంది. ఈ పరిణామాలు అరుణకు స్వతహాగానే కోపం తెప్పించాయి. దీంతో చంద్రగిరి స్థానానికే కాదు... అసలు రాజకీయాలకే గుడ్‌పై బెప్పాలని ఆమె ఆ మధ్య నిర్ణయం తీసుకున్నారు. ఈ విషయాన్ని ఆమె స్వయంగా చంద్రబాబుకు కూడా చెప్పి... అదేరోజు అమెరికాకు వెళ్లారు. అయితే ఈ సమస్య అంతటితో ముగియలేదు. చంద్రగిరి నియోజకవర్గ ఎమ్మెల్యే టికెట్‌ తమకే కావాలంటూ ఆమె.. నియోజకవర్గం అంతటా సమావేశాలు పెట్టారు.  అరుణకుమారే ఈ మీటింగ్‌లు పెట్టిస్తున్నారన్న ప్రచారం కూడా జరిగింది.  ఇటీవలే అమెరికా నుంచి వచ్చిన ఆమె... పార్టీ కేడర్‌తో సమావేశమయ్యారు. పార్టీలో కొంతమంది తనకు ద్రోహం చేస్తున్నారని చెప్తూనే... టీడీపీని వీడబోనని స్పష్టం చేశారు. నియోజకవర్గ ఇంచార్జీగా కూడా తనే కొనసాగుతానని తేల్చి చెప్పారు. 
గల్లా అరుణపై తెలుగు తమ్ముళ్ల ఆగ్రహం
చంద్రగిరి నియోజకవర్గంలోని మరోవర్గం ఆమె నిర్ణయంపై గుర్రుగా ఉంది. పార్టీ కోసం పనిచేయరుకానీ... పార్టీ టికెట్‌ తనకే కావాలంటే ఎలా అని తెలుగు తమ్ముళ్లు ప్రశ్నిస్తున్నారు. ఊహించని పరిణామాలతో చంద్రబాబు అయోమయంలోపడ్డారు. చంద్రగిరి రాజకీయాలు ఆయనకు తలనొప్పి వ్యవహారంగా మారింది. అయితే 2019 ఎన్నికల్లో అధిష్టానం ఎలాంటి నిర్ణయం తీసుకుంటుంది... అంతిమంగా అక్కడ నుంచి పోటీ చేసేది ఎవరన్నది చివరకు ఎలా ముగుస్తుందోన్న ఆసక్తి జిల్లా అంతగా నెలకొంది. 

 

21:45 - June 10, 2018

విజయవాడ : ఏపీలో రాజకీయం హీటెక్కింది.. టీడీపీ ప్రభుత్వంపై విపక్షనేతలు తీవ్రస్థాయిలో ఆరోపణలు చేస్తున్నారు. వైసీపీ, వామపక్షాలతోపాటు బీజేపీ నేతలు కూడా విమర్శల దాడి పెంచారు. ఏపీకి అన్నీ ఇచ్చామని.. అయినా  కేంద్రంపై సీఎం చంద్రబాబు దుష్ప్రచారం చేస్తున్నారని ఏపీ బీజేపీ అధ్యక్షుడు కన్నా లక్ష్మీనారాయణ  విమర్శించారు. ప్రత్యేక హోదాపై గడియకో మాటమార్చిన చంద్రబాబు రాష్ట్రానికి తీరని అన్యాయం చేశారని వైసీపీ ఆరోపించింది. ఇక  బీజేపీ, టీడీపీలు రాష్ట్రానికి జాయింట్‌గా ద్రోహం చేశాయని వామపక్షాలు మండిపడ్డాయి. ప్రత్యేక హోదా సాధన కోసం రాష్ట్రవ్యాప్తంగా పెద్ద ఎత్తున యువతను కదిలిస్తామని వామపక్షాలు, ప్రత్యేక హోదా సాధన సమితి స్పష్టం చేశాయి. 

మిమర్శలు, ప్రతి విమర్శలతో ఏపీ పాలిటిక్స్‌ హాట్‌హాట్‌గా సాగుతున్నాయి. టీడీపీపై బీజేపీ, వైసీపీ నేతలు విమర్శలు ఎక్కుపెట్టగా... బీజేపీ-టీడీపీలు జాయింట్‌గా రాష్ట్రానికి ద్రోహం చేశాయని  వామపక్షాలు  ఆరోపిస్తున్నాయి. సీఎం చంద్రబాబుపై వైసీపీ నేత బొత్స సత్యనారాయణ తీవ్రస్థాయిలో విమర్శలు చేశారు. రాజధాని నిర్మాణం పేరుతో టీడీపీ అధినేత లక్షకోట్ల రూపాయలు దోచుకున్నారని ఆరోపించారు. రాష్ట్రంలో పాలనను గాలికొదిలేసి.. చంద్రబాబు ప్రజాధనాన్ని దోపిడీ చేయడమే లక్ష్యంగా పెట్టున్నారని బొత్స విమర్శించారు. ఎయిర్‌ ఏషియాస్కామ్‌లో కేంద్ర మాజీ మంత్రి అశోక గజపతిరాజుపై వచ్చిన ఆరోపణలపై విచారణ చేపట్టాలని కేంద్రాన్ని కోరే దమ్ము చంద్రబాబుకు ఉందా అని బొత్స సత్యనారాయణ సవాల్ విసిరారు. 

మరోవైపు ఈనెల 12 వైఎస్‌ జగన్‌ పాదయాత్ర పశ్చిమగోదావరి జిల్లాలోకి ప్రవేశిస్తున్న నేపథ్యంలో టీడీపీ నేతలు కుట్రలకు పాల్పడుతున్నారని వైసీపీ ఎంపీ వైవీ సుబ్బారెడ్డి ఆగ్రహం వ్యక్తం చేశారు. గోదావరి బ్రిడ్జిపై జగన్‌ పాదయాత్రకు షరతులు పెట్టడం ఏంటని వైవీ ప్రశ్నించారు. పాదయాత్రలో తొక్కిసలాట జరుగుతుందని టీడీపీ నేతలు తప్పుడు ప్రచారం చేస్తున్నారన్నారు. ప్రత్యేక హోదా అంశాన్ని పక్కన పెట్టిన చంద్రబాబు రాష్ట్రానికి తీరని అన్యాయం చేశారని వైసీపీ ఎంపీ వైవీ సుబ్బారెడ్డి అన్నారు. 

తప్పుడు లెక్కలతో తెలుగుదేశం ప్రభుత్వం ప్రజలను మోసం చేస్తోందని  బీజేపీ ఏపీ అధ్యక్షుడు కన్నా లక్ష్మీనారాయణ అన్నారు. నాలుగేళ్ల కాలంలో కేంద్రంలోని మోడీ సర్కార్ ఏపీకి ఎంతో సహాయం చేసిందన్నారు.  తెలుగుదేశం ప్రభుత్వం అసత్య ప్రచారాలతో బీజేపీని దోషిగా నిలిపిందని కన్నా విమర్శించారు. రాష్ట్రానికి ప్రత్యేక హోదా విషయంలో  చంద్రబాబు మాటమార్చాని బీజేపీ నేత పురందేశ్వరి విమర్శించారు. 

విభజన హామీలను 85శాతం నెరవేర్చామంటున్న బీజేపీ నేతల ప్రకటనలను ప్రత్యేకహోదా సాధన సమితి, వామపక్షాలు ఖండించాయి. విజయవాడలో సమావేశమైన నేతలు బీజేపీపై తీవ్రస్థాయిలో మండిపడ్డారు. కేంద్రం విభజన హామీలు ఏ మేరకు నెరవేర్చిందో ఆ పార్టీ నాయకులు చెప్పాలని సీపీఐ రాష్ట్ర కార్యదర్శి రామ‌కృష్ణ సవాల్‌  చేశారు. రాష్ట్రంలో వెనుకబడిన జిల్లాలకు బుందేల్‌ఖండ్‌ తరహా ప్యాకేజి ఇస్తామని చెప్పి... 350 కోట్లు ఇచ్చి, మళ్లీ కేంద్రం వెనక్కి తీసుకుందని రామకృష్ణ  మండిపడ్డారు. నయవంచన మాటలతో బీజేపీ ప్రజలను మోసగిస్తోందని సీపీఎం నేత, వై. వెంకటేశ్వరరావు విమర్శించారు. 
    
రాష్ట్రానికి ప్రత్యేక హోదా సాధన కోసం విద్యార్థుల్లో చైతన్యం కలిగించేందుకు కార్యాచరణ రూపొందిస్తామని, ఉద్యమంలో కలిసి రాని వారిని రాష్ట్ర  ద్రోహులుగా ప్రకటిస్తామని ప్రత్యేక హోదా సాధన సమితి కన్వీనర్‌ చలసాని శ్రీనివాస్‌ హెచ్చరించారు. మొత్తానికి పార్టీల ఆరోపణలు ప్రత్యారోపణలతో ఏపీలో పాలిటిక్స్ ఆసక్తికరంగా సాగుతున్నాయి. హోదా సాధన కోసం వచ్చేనెల 15 నుంచి కార్యాచరణలోకి దిగుతామని వామపక్షాలు, ప్రత్యేక హోదా సాధన సమితి స్పష్టం చేసింది. 

10:44 - May 18, 2018

హైదరాబాద్ : కర్నాటక రాజకీయం హైదరాబాద్ కు చేరింది. కాంగ్రెస్, జేడీఎస్ ఎమ్మెల్యేల క్యాంపు హైదరాబాద్ కు మారాయి. ఎమ్మెల్యేలను కాపాడుకోవడానికి కాంగ్రెస్, జేడీఎస్ నానా తంటాలు పడుతున్నాయి. ఎమ్మెల్యేలను హైదరాబాద్ కు తరలిస్తున్నారు. మూడు బస్సుల్లో కర్నాటక కాంగ్రెస్, జేడీఎస్ ఎమ్మేల్యేలు హైదరాబాద్ కు చేరుకున్నారు. తాజ్ కృష్ణ, గోల్కొండ హోటల్ లో కాంగ్రెస్ ఎమ్మెల్యేలు, నోవా హోటల్ లో జేడీఎస్ ఎమ్మెల్యేలు మకాం వేశారు. ఉత్తమ్ కుమార్ రెడ్డితోపాటు మరికొంతమంది కాంగ్రెస్ సీనియర్ నేతలు తాజ్ కృష్ణ హోటల్ కు చేరుకున్నారు.

 

10:38 - May 18, 2018
10:16 - May 18, 2018

బెంగళూరు : కర్నాటకలో రాజకీయం రసవత్తరంగా మారింది. కర్నాటక రాజకీయం హైదరాబాద్ కు చేరింది. ఎమ్మెల్యేలను కాపాడుకోవడానికి కాంగ్రెస్, జేడీఎస్ తంటాలు పడుతున్నారు. ఎమ్మెల్యేలను హైదరాబాద్ కు తరలిస్తున్నారు. ఎమ్మెల్యేల తరలింపును చివరి నిముషం వరకు కాంగ్రెస్, జేడీఎస్ లు రహస్యంగా ఉంచారు. ప్రత్యేక విమానానికి కర్నాటక ప్రభుత్వం అనుమతి నిరాకరించడంతో కార్లు, బస్సుల్లో ఎమ్మెల్యేలను హైదరాబాద్ కు తరలిస్తున్నారు. జేడీఎస్, కాంగ్రెస్ ఎమ్మెల్యేలు హైదరాబాద్ కు చేరుకుంటున్నారు. కాంగ్రెస్ బృందానికి డీకే శివకుమార్ నేతృత్వం వహిస్తున్నారు. తమ ఎమ్మెల్యేలను బీజేపీ ప్రలోభపెడుతోందని జేడీఎస్, కాంగ్రెస్ ఆరోపిస్తున్నారు. లింగాయాత్ ఎమ్మెల్యేలను కమలదళం ఆకర్షిస్తోంది. లింగాయత్ ఎమ్మెల్యేలను కాపాడుకోవడానికి కాంగ్రెస్ వ్యూహం పన్నుతోంది. మరిన్ని వివరాలను వీడియోలో చూద్దాం... 

14:42 - February 20, 2018

చెన్నై : సినీ నటుడు కమల్ పెట్టేబోయే పార్టీ బుధవారం పురుడు పోసుకోనుంది. గత 7-8 నెలలుగా రాజకీయాలను స్టడీ చేస్తూ వస్తున్న కమల్ కీలక నిర్ణయం తీసుకున్నారు. ఫిబ్రవరి 21వ తేదీన రాజకీయ పార్టీ పేరును ప్రకటించనున్నట్లు ఇది వరకే కమల్ ప్రకటించిన సంగతి తెలిసిందే. మధురైలోని కమల్ పుట్టిన గ్రామంలో పార్టీ పేరును కమల్ ప్రకటించనున్నారు. ఇందుకు తగిన ఏర్పాట్లు చేస్తున్నారు. చెన్నైలో కాషాయ రంగు కనిపించవద్దని ఆయన వ్యూహాలు పన్నుతున్నారని తెలుస్తోంది.

రామనాథపురం గ్రౌండ్స్ లో అతిపెద్ద బహిరంగ సభ ఏర్పాటు చేసి పార్టీ పేరు..పార్టీ జెండా..పార్టీ విధి విధానాలపై ప్రకటించనున్నారు.
తన మనోభావాలకు అనుగుణంగా...తనపై అభిమానం చూపే వారందరూ సభలో పాల్గొంటారని కమల్ పేర్కొన్నారు. ఈ బహిరంగసభలో ఢిల్లీ సీఎం అరవింద్ కేజ్రీవాల్ పాల్గొంటారని, బీహార్ ముఖ్యమంత్రి నితీష్ కుమార్...కేరళ ముఖ్యమంత్రిలను కమల్ ఆహ్వానించినట్లు తెలుస్తోంది. పార్టీ ఎలా ఉండబోతోంది ? ఎలాంటి విధి విధానాలు ఉంటాయనే దానిపై ఉత్కంఠ నెలకొంది. ద్రవిడ సంస్కృతి ఉట్టిపడేలా...ద్రవిడ సంప్రదాయం ఉండేలా పార్టీ ఉండబోతోందని ప్రచారం జరుగుతోంది. పూర్తి సమాచారం కోసం వీడియో క్లిక్ చేయండి. 

08:43 - February 6, 2018

నల్గొండ : మున్సిపల్‌ చైర్‌పర్సన్‌ లక్ష్మి భర్త బొడ్డుపల్లి శ్రీనివాస్‌ హత్యను కోమటిరెడ్డి సోదరులు రాజకీయం చేస్తున్నారని రాష్ట్ర విద్యుత్‌ శాఖ మంత్రి జగదీశ్‌రెడ్డి  విమర్శించారు. శ్రీనివాస్‌ సంస్మరణ సభలో కోమటిరెడ్డి వెంకటరెడ్డి అభ్యంతరకరమైన వ్యాఖ్యలు చేయడాన్ని మంత్రి తప్పుపట్టారు. రాజకీయ స్వప్రయోజనాల కోసం ఈ హత్యను అడ్డం పెట్టుకోవాలని చూస్తున్నారని ఆరోపించారు. 

11:25 - December 28, 2017

బెంగుళూరు : మరో ఐదు నెలల్లో ఎన్నికలకు సిద్ధమవుతోన్న కర్నాటకలో.. జలరాజకీయాలు కాకపుట్టిస్తున్నాయి. దశాబ్దాలుగా గోవాతో ఉన్న మహాదాయి నదీజలాల పంపిణీ వ్యవహారం ఇప్పుడు.. రాజకీయాలను వేడెక్కిస్తోంది. కొన్నాళ్లుగా.. ఈ అంశంపై బీజేపీ-కాంగ్రెస్‌ శ్రేణుల మధ్య తీవ్ర వాగ్వాదం సాగుతోంది. తాజాగా, ఈరోజు.. ఉత్తర కర్నాటక అంతటా.. రైతులు బంద్‌ పాటించారు. 
రాజకీయ పార్టీల మధ్య రగడ
కర్నాటకలో జల రాజకీయం.. రాష్ట్రాన్ని అట్టుడికిస్తోంది. ఉత్తర కర్నాటకలోని నాలుగు జిల్లాలు, 13 తాలూకాల పరిధిలో.. రైతులు.. రాజకీయ నాయకులపై తీవ్ర స్థాయిలో భగ్గుమంటున్నారు. జయకర్నాటక సంఘటన నేతృత్వంలో రైతులు, బుధవారం ఉత్తరకర్నాటక వ్యాప్తంగా బంద్‌ పాటించారు. దశాబ్దాలుగా ఎడతెగని ఈ సమస్య.. వారం క్రితం ఒక్కసారిగా వెలుగులోకి వచ్చింది. వెన్వెంటనే.. రాజకీయ పార్టీల మధ్య రగడకు హేతువైంది. 
ఇరు రాష్ట్రాల మధ్య రెండు దశాబ్దాలకు పైగా వివాదం 
గోవా, కర్నాటక రాష్ట్రాల మీదుగా ప్రవహించే మహాదాయి నది జలాల పంపిణీ వ్యవహారంపై ఇరు రాష్ట్రాల మధ్య రెండు దశాబ్దాలకు పైగా వివాదం కొనసాగుతోంది. దీని పరిష్కారం కోసం.. బీజేపీ జాతీయ అధ్యక్షుడు అమిత్‌షా వేసిన ఓ ఎత్తుగడ.. కర్నాటక రాజకీయాలను వేడెక్కించింది. వచ్చే ఎన్నికల్లో కర్నాటకలో జెండా ఎగరేయాలని భావిస్తోన్న అమిత్‌షా.. మహాదాయి నదీజలాల వివాదంపై..  గోవా ముఖ్యమంత్రి మనోహర్‌ పారికర్‌, కర్నాటక బీజేపీ అధ్యక్షుడు యడ్యూరప్పలతో ఓ సమావేశం ఏర్పాటు చేశారు. ఇదే.. కన్నడనాట తాజా వివాదానికి కారణమైంది.  
రాజకీయ ప్రాధాన్యతను సంతరించుకున్న మహాదాయి అంశం  
ఎన్నికల ముంగిట్లో ఉన్న కర్నాటకలో.. మహాదాయి అంశం రాజకీయ ప్రాధాన్యతను సంతరించుకుంది. ఉత్తర కర్నాటకలోని హుబ్లి, బాగల్‌కోట, ధారవాడ, బెళగావి, గదగ్‌, హావేరి జిల్లాల్లోని 56 అసెంబ్లీ సెగ్మెంట్లలో బలాన్ని గణనీయంగా పెంచుకోవాలన్న భావనతో.. బీజేపీ ఇప్పుటి నుంచే పావులు కదుపుతోంది. ఈ క్రమంలోనే.. అమిత్‌షా, ముఖ్యమంత్రుల స్థాయిలో జరగాల్సిన సమావేశాన్ని.. ఓ రాష్ట్రముఖ్యమంత్రికి, మరో రాష్ట్రంలోని పార్టీ అధ్యక్షుడికి మధ్య నిర్వహించి.. వివాదానికి తెరలేపారు. 
కమలనాథులు పన్నిన ఎత్తుగడని విమర్శలు
యడ్యూరప్పతో భేటీ అనంతరం.. మనోహర్‌ పారికర్‌ ఆయనకు ఓ లేఖను రాస్తూ.. సమస్య పరిష్కారానికి ప్రయత్నిస్తామని పేర్కొనడం.. కర్నాటకలో అధికారంలోని కాంగ్రెస్‌ నేతలకు మింగుడ పడడం లేదు. ఇదంతా ఎన్నికల స్టంట్‌ అని.. ఓట్లు దండుకునేందుకు కమలనాథులు పన్నిన ఎత్తుగడ అని విమర్శలకు దిగారు. సమస్య పరిష్కారం అవుతుంటే.. కాంగ్రెస్‌ నాయకులకు ఉలుకెందుకంటూ బీజేపీ నాయకులూ ఎదురుదాడికి దిగుతున్నారు. మొత్తానికి, మహాదాయి నదీజల వివాదం.. ఈసారి ఉత్తర కర్నాటకలో కాంగ్రెస్‌, బీజేపీ అభ్యర్థుల భవితవ్యాన్ని తేల్చబోతోందనడంలో ఎలాంటి సందేహం లేదు. 

 

11:07 - December 19, 2017

పాలిటిక్స్ లోకి పరుచూరి

విశాఖ : మంత్రి గంటా శ్రీనివాసరావుకు ప్రధాన అనుచరుడిగా పరుచూరి భాస్కరరావుకు మంచి పేరుంది. ప్రత్యూష కంపెనీ డైరెక్టర్‌గా పారిశ్రామిక వర్గాలకు, గంటా శ్రీనివాసరావుల ప్రతి విజయం వెనుకా ఉండేది, వ్యూహాలు రచించేది పరుచూరే. 1999 నుండి అనకాపల్లిలో ఎంపీగా గెలిచిన నాటి నుండి 2014 ఎన్నికల్లో భీమిలి గెలుపు వరకు అన్నింటా గంటా విజయాలలో పరుచూరిదే కీలక పాత్ర. రాష్ట్ర విభజన అనంతరం జరిగిన ఎన్నికల్లో కూడా పరుచూరి కీలకంగా వ్యవహరించారు.

నియోజక వర్గానికి ఇంచార్జిగా
ఏ నియోజక వర్గానికి ఇంచార్జిగా పనిచేసినా పరుచూరి తనకంటూ ప్రత్యేక గుర్తింపును తెచ్చుకుంటారు. అనకాపల్లి పార్లమెంట్‌ నియోజక వర్గంలో స్వంత నిధులతో చెరువుల పూడికలు తీయించడం, భీమిలి నియోజకవర్గంలో చేసిన అభివృద్ధిని జనచైతన్య యాత్రలకంటే ముందే ప్రతి పంచాయితీలో నియోజక వర్గబోర్డులు ఏర్పాటు చేశారు. ముఖ్యంగా తెలుగుదేశం హయాంలో చేసిన అభివృద్ధిని ప్రతి ఇంటికీ తీసుకువెళ్లారు. ఇక ప్రజారాజ్యం పార్టీ నుండి అనకాపల్లిలో గంటా గెలిచిన తర్వాత పరుచూరి గంటా మహిళా శక్తి, యువసేన, గంటా ఎస్సీ, ఎస్టీ సెల్‌ అనే విభాగాలు ఏర్పాటు చేశారు. కార్యకర్తలకు ఏ చిన్న సమస్య వచ్చినా నేనున్నాను అంటూ ధైర్యం చెప్పేవారు పరుచూరి. అభివృద్ధి కోసం ఎలాంటి నిర్ణయాలు తీసుకోవడానికైనా వెనకాడని నైజం ఆయనది. అనకాపల్లి డంపింగ్‌ యార్డు తరలింపుతో అనకాపల్లి వాసులకు ఆయన మరింత దగ్గరయ్యారు. అనకాపల్లిలోని మామిడాల పాలెంలో మూగజీవాలు చనిపోతే ఆర్థిక సాయం చేశారు పరుచూరి. అంతేకాదు కార్యకర్తల్లో ఎవరు అనారోగ్యం పాలైనా వారిని పరామర్శించడంతో పాటు వారికి ఆర్థిక సాయం కూడా చేసేవారు.

కార్యకర్తల నుండి వస్తున్న ఒత్తిడి
ఎన్ని అభివృద్ధి పనులు చేసినప్పటికీ ఏ పార్టీ నామినేటెడ్‌ పదవులు ఆశించలేదు పరుచూరి. కాని ఇప్పుడు కార్యకర్తల నుండి వస్తున్న ఒత్తిడి నేపథ్యంలో పరుచూరి రాజకీయాల్లోకి అడుగు పెట్టబోతున్నారని సమాచారం. పరుచూరి గనక రాజకీయాల్లోకి వస్తే ఆయనకు అనేక మంది అభిమానులున్న అనకాపల్లి నుండే పోటీ చేయాలని కార్యకర్తలు కోరుకుంటున్నారు. ఇదిలా ఉంటే గంటాతో ఎలాంటి విబేధాలు లేవని చెబుతున్నా ఇటీవల పరుచూరిని భీమిలి నియోజకవర్గ ఇంచార్జి బాధ్యతల నుండి తొలగించడంపై పలు అనుమానాలు వ్యక్తమవుతున్నాయి. దీంతో ఆయన అభిమానులు స్వంతంగా పోటీచేయాలని కోరుతున్నారు. అభిమానుల కోరికను పరుచూరి సమ్మతించినట్లు సమాచారం. అయితే ఏ పార్టీ నుండి పోటీ చేస్తారనేది సస్పెన్స్‌గా మారింది. ఇప్పటికే సిట్టింగ్‌ ఎమ్మెల్యేగా పీలా గోవింద సత్యనారాయణ ఉన్నారు. దీనితో కొత్తగా వస్తున్న జనసేన పార్టీ వైపు ఆసక్తి కనబరుస్తున్నారా లేక ఏ పార్టీ నుండి సీటు తెచ్చుకుంటారో అన్నది వేచి చూడాలి. 

Pages

Don't Miss

Subscribe to RSS - రాజకీయం