రాజకీయాలు

18:54 - December 7, 2017

హైదరాబాద్ : సీఎం కేసీఆర్‌ ఓటుబ్యాంకు రాజకీయాలు చేస్తున్నారని కాంగ్రెస్ సీనియర్ నేత వి.హనుమంత రావు ఆరోపించారు. బీసీ డిక్లరేషన్ పేరుతో సీఎం ఓట్ల రాజకీయానికి తెరలేపారని మండిపడ్డారు. కేసీఆర్ బీసీలపై కపట ప్రేమ చూపిస్తున్నారని విమర్శించారు. బీసీ డిక్లరేషన్‌పై అసెంబ్లీలో తీర్మాణం చేసి చేతులు దులుపుకుంటున్నారని విమర్శించారు.  కేసీఆర్ క్రిమిలేయర్ గురించి ఎందుకు మాట్లాడటం లేదని వీహెచ్ ప్రశ్నించారు. ఒక్క శాతం ఉన్న సీఎం సామాజిక వర్గానికి ఐదు మంత్రి పదవులిచ్చారని చెప్పారు.

 

21:21 - December 1, 2017

 

విజయవాడ : పోలవరం ప్రాజెక్టు పనులు నిలిపివేయాలంటూ కేంద్రం రాసిన లేఖపై ఏపీలో రాజకీయ రగడ జరుగుతోంది. ఇందుకు చంద్రబాబు కేంద్రాన్ని నిందిస్తుంటే.. టీడీపీ మిత్రపక్షమైన బీజేపీ సహా ఇతర ప్రతిపక్షాలు ముఖ్యమంత్రి వైఖరిని తప్పుపడుతున్నాయి. మరోవైపు ఎవరు ఎన్ని అడ్డంకులు, అవరోధాలు సృష్టించినా పోలవరం ప్రాజెక్టుపై వెనుకడుగు వేసే ప్రసక్తేలేదని ఏపీ ముఖ్యమంత్రి చంద్రబాబు స్పష్టం చేశారు. పోవలరం నిర్మాణంతోపాటు రాష్ట్రాభివృద్ధికి చేయూత ఇవ్వాల్సిన బాధ్యత కేంద్రంపై ఉందన్న విషయాన్ని మరోసారి గుర్తు చేశారు. రాష్ట్రాభివృద్ధిలో ముడిపడివున్న అతి సున్నితమైన పోలవరం అంశాన్ని రాజకీయం చేయొద్దని టీడీఎల్‌పీ సమావేశంలో పార్టీలకు విజ్ఞప్తి చేశారు.

అమరావతిలో తెలుగుదేశం శాసనసభాపక్షం సమావేశం జరిగింది. టీడీపీ జాతీయ అధ్యక్షుడు, ముఖ్యమంత్రి చంద్రబాబు అధ్యక్షతన జరిగిన ఈ భేటీకి పార్టీ ఎమ్మెల్యేలు, ఎమ్మెల్సీలు హాజరయ్యారు. అసెంబ్లీ సమావేశాలు జరుగుతున్న తీరుతోపాటు రాష్ట్రాభివృద్ధికి ప్రభుతం తీసుకుంటున్న చర్యలపైనా సమావేశంలో చర్చించారు. అమరావతిలో ప్రభుత్వ ఉద్యోగులు, కార్యదర్శులు, శాసనసభ్యులకు నిర్మిస్తున్న వసతి, సచివాలయం కొత్త నమూనాల గురించి సీఎం శాసనసభ్యుల దృష్టికి తెచ్చారు.

విభజనతో అన్ని విధాల నష్టపోయిన రాష్ట్రానికి చేయూత ఇవ్వాల్సిన బాధ్యత కేంద్రంపై ఉందని చంద్రబాబు టీడీఎల్‌పీ భేటీలో అన్నారు. పోలవరం పనులు నిలిపివేయాలంటూ కేంద్ర జలనవరుల శాఖ కార్యదర్శి అమర్‌జిత్‌సింగ్‌ రాసిన లేఖపై ప్రధాని మోదీతో మాట్లాడాలని చంద్రబాబు నిర్ణయించుకున్నారు. పోలవరం ఆపాలంటూ కేంద్రం రాసిన లేఖపై రాజకీయ పార్టీలు రకరకాల వ్యాఖ్యలు చేస్తున్న తరుణంలో చంద్రబాబు తీవ్రంగా స్పందించారు. పోలవరం లేఖను బీజేపీ-టీడీపీ సంబంధాలతో ముడిపెట్టడాన్ని తప్పు పట్టారు. పార్టీ ప్రజాప్రతినిధులెవ్వరూ కూడా దీనిపై రాజకీయ వ్యాఖ్యలు చేయొద్దని ఆదేశించారు.

మరోవైపు పోలవరం లేఖపై చంద్రబాబు తీవ్రంగా స్పదిస్తున్న తీరును బీజేపీ తప్పుపడుతోంది. పద్నాలుగు వందల కోట్ల స్పిల్‌వే టెండర్ల ప్రక్రియలో లోపాలు ఉండటం వలనే కేంద్రం జోక్యం చేసుకోవాల్సి వచ్చిందని బీజేపీ ఎమ్మెల్సీ సోము వీర్రాజు మండపడ్డారు. పోలవరం నిర్మాణాన్ని నీరుకార్చేందుకు చంద్రబాబు ప్రయత్నిస్తున్నారని వైసీపీ ఆరోపించింది. కేంద్రం నిర్మిస్తామని చెప్పినా... దరిద్రపు ఆలోచనలతోనే చంద్రబాబు ఈ ప్రాజెక్టు బాధ్యతలను భుజాలకెత్తుకున్నారని వైసీపీ ఎంపీ మేకపాటి రాజమోహన్‌రెడ్డి ఆగ్రహం వ్యక్తం చేశారు. అటు సీపీఐ కూడా.. మోదీ బ్లాక్‌మెయిల్‌ రాజకీయాలు చేస్తున్నారని ఆరోపిస్తూ.. చంద్రబాబు ఇప్పటికైనా అఖిలపక్షాన్ని ఢిల్లీకి తీసుకు వెళ్లాలని పార్టీ కార్యదర్శి నారాయణ డిమాండ్‌ చేశారు. పోలవరంపై కేంద్ర, రాష్ట్ర ప్రభుత్వాలు నాటకాలు ఆడుతున్నాయిన ఏపీ పీసీసీ చీఫ్‌ రఘువీరెడ్డి విమర్శించారు. పోలవరం పనులు నిలిపివేయాలంటూ కేంద్రం రాసిన లేఖపై పరస్పర నిందారోపణలు చేసుకుంటున్న రాజకీయ పార్టీలకు లోక్‌సత్తా నేత జయప్రకాశ్‌నారాయణ్‌ చురకలు అంటించారు. కేంద్రం స్పష్టత ఇచ్చే వరకు పోలవరంపై రగులుతున్న రాజకీయ రగడ సమసిపోయే అవకాశాలు కనిపించడంలేదని భావిస్తున్నారు. 

09:15 - December 1, 2017

అనంతపురం : సమృద్ధిగా సాగునీటి నిల్వలు...భారీ వర్షాలతో కళకళలాడుతున్న జలాశయాలు, చెరువులు అయినా చెరువులకు నీటి విడుదలలో అనంత నాయకులు నీటి రాజకీయాలు. తమ ప్రాంత ప్రయోజనాలే ముఖ్యమంటూ జలవనరులశాఖ అధికారులపై వత్తిడితో అన్నదాతలు ఆందోళన చెందుతున్నారు. ఇన్నాళ్లు కరువుతో అల్లాడిన అనంత రైతన్నకు ఇప్పుడు నీటి విడుదలలో రాజకీయాలు కొత్త కష్టాలను తెచ్చిపెట్టాయి. జిల్లాలో ఇటీవల కురిసిన భారీ వర్షాలకు ప్రాజెక్టులకు, చెరువులకు నీళ్ళు రావడంతో రైతన్నల కళ్ళలో ఆనందనం కనిపించింది. హంద్రీనీవా కాలువ ద్వారా జిల్లాకు వచ్చే నీటిని జిల్లా అంతా సమానంగా విడుదల అయ్యేలా చూడాల్సిన నాయకులు నీటి రాజకీయాలు చేస్తూ రైతులను ఆందోళనకు గురిచేస్తున్నారు. 

అనంతపురం జిల్లాలో మొత్తం 1265  చెరువులుండగా.. మొన్న కురిసిన వర్షాలకు 532 చెరువులకు నీరు చేరినట్లు అధికారులు చెబుతున్నారు. అయితే హంద్రీనీవా కాలువ ద్వారా జిల్లాలోని జలాశయాలు, చెరువులకు పూర్తిస్ధాయితో నీటిని నింపుకునే అవకాశముంది. ఈ కాలువ ఇప్పటివరకు ద్వారా జిల్లాలోని గుంతకల్లు, ఉరవకొండ, శింగనమల, తాడిప్రతి, రాప్తాడు, ధర్మవరం, పెనుగొండ, పుట్టపర్తి నియోజకవర్గాల పరిధిలోని వందకు పైగా చెరువులకు నీటిని విడుదల చేశారు.

అయితే జిల్లాలో ఎవరికి వారు పైప్రాంతంలోని నేతలు ముందుగా తమ ప్రాంతంలోని చెరువులకు నీటిని విడుదల చేయాలని ఆదేశించడంతో...అధికారులంతా తలలు పట్టుకుంటున్నారు. పుట్టపర్తి, బుక్కపట్నం, కొత్తచెరువు మండలాల పరిధిలోని బుక్కపట్నం చెరువు జిల్లాలోనే అతి పెద్దది. అర టీఎంసీకి పైగా నీటి సామర్ధం కలిగిన చెరువుకు ఎనిమిదేళ్ళుగా నీరు లేక తాగునీటి కోసం ప్రజలు అనేక ఇబ్బందులు పడుతున్నారు. గతంలో సీఎం చెప్పినప్పుడు నీరు విడుదల చేశారని అన్నారు. ఇప్పుడు బుక్కపట్నం చెరువుకు నీటి విడుదలకు అనేక అడ్డంకులు ఎదురవుతున్నాయని రైతులు ఆందోళన వ్యక్తం చేస్తున్నారు. 

బుక్కపట్నం చెరువు కింద 10 వేల ఎకరాల ఆయకట్టు భూమి సాగవుతోంది. మరో 200 గ్రామాలకు తాగునీరు అందుతోంది. అంతేకాక బుక్కపట్నం చెరవులో నీటిని నింపడం వల్ల చేపల పెంపకంతో మత్స్యకారులకు ఉపాధి లభించనుంది. అయితే ఈ చెరువుకు నీటిని విడుదల చేయాలని ఇప్పటికే పలుమార్లు అధికారులను, జిల్లా కలెక్టర్‌ను ఆదేశించినట్లు ప్రభుత్వ చీఫ్‌ విప్‌ పల్లె రఘునాథరెడ్డి తెలిపారు.

జలవనరులశాఖ అధికారులు మాత్రం పైప్రాంతంలోని చెరువులకు నీటిని విడుదల చేయడం వల్ల.. దిగువ ప్రాంతంలోని చెరువులకు నీరు చేరడంలో అలస్యమవుతోందని అంటున్నారు. మరో వారం రోజుల్లో పూర్తిస్థాయిలో బుక్కపట్నం చెరువుకు నీటిని విడుదల చేసి పది రోజుల్లోగా నీటిని నింపుతామంటున్నారు. 

08:11 - November 20, 2017

అనంతపురం : జిల్లా రాజకీయాల్లో యువ శకం నాంది పలకబోతుంది. రానున్న సాధారణ ఎన్నికల్లో ప్రస్తుత ఎమ్మెల్యేలు, ఎంపీల తనయులు పోటీ చేసేందుకు సిద్దమయ్యారు. గత మూడేళ్లుగా తమ తండ్రుల అధికార బాధ్యతల్లో పరోక్షంగా పెత్తనం చలాయిస్తున్న యువ నేతలు... వచ్చే ఎన్నికల్లో పోటీ చేయడం ఖాయంగా కనిపిస్తోంది. ఇప్పటికే క్రియాశీల రాజకీయాల్లో చురుకుగా వ్యవహరిస్తున్న తనయులను పోటీ చేయించేందుకు నేతలు సైతం పావులు కదుపుతున్నారు. అనంత రాజకీయాల్లో హాట్‌టాపిక్‌గా మారిన రాజకీయ వారసులపై 10టీవీ ప్రత్యేక కథనం.

రాష్ట్రంలో సంచలన రాజకీయాలకు కేంద్ర బిందువైన అనంతలో వచ్చే ఎన్నికలు కీలకంగా మారబోతున్నాయి. రానున్న ఎన్నికల్లో పోటీ చేసేందుకు అనేకమంది యువనేతలు వ్యూహాలు రచిస్తున్నారు. తనయులకు తమ రాజకీయ వారసత్వం అప్పగించేందుకు.. తండ్రులు సైతం పుత్రోత్సాహం చూపిస్తున్నారు. అంతేకాకుండా... అన్ని విషయాల్లో వారికి అండగా ఉంటూ ముందుకు నడిపిస్తున్నారు. రాజకీయాల్లో ఎలాంటి వ్యూహం అనుసరించాలి... ప్రజాదరణ ఎలా పొందాలి,.. ప్రత్యర్థులను ఎలా కట్టడి చేయాలనే అంశాలను దగ్గరుండి నేర్పిస్తున్నారు. అయితే... వచ్చే ఎన్నికల్లో పోటీ చేసేందుకు తపనపడుతున్న వారసుల్లో చాలామంది అధికార పార్టీకి చెందినవారే ఉండడం విశేషం. 

రాష్ట్ర విభజన అనంతరం చోటు చేసుకున్న రాజకీయ పరిణామాలతో కాంగ్రెస్‌ నుంచి టీడీపీలో చేరిన జేసీ బ్రదర్స్‌.... తమ తనయులను ఎన్నికల్లో పోటీ చేయించేందుకు సిద్దమవుతున్నారు. మూడున్నర దశాబ్ధాలుగా ఓటమి ఎరుగని జేసీ దివాకర్‌రెడ్డి... తన తనయుడు పవన్‌కుమార్‌రెడ్డిని వచ్చే ఎన్నికల్లో పార్లమెంట్‌ అభ్యర్థిగా పోటీ చేయించడం ఖాయంగా కనిపిస్తోంది. ఇదే విషయాన్ని జేసీ స్పష్టం చేశారు. వచ్చే ఎన్నికల్లో తాను పోటీ చేయనని... తన కొడుకును రాజకీయాల్లోకి తీసుకువస్తానన్నారు. ఇక తాడిపత్రి ఎమ్మెల్యే జేసీ ప్రభాకర్‌రెడ్డి సైతం... తన తనయుడు అస్మిత్‌రెడ్డిని ఎమ్మెల్యేగా పోటీ చేయించాలని నిర్ణయానికి వచ్చినట్లు సమాచారం. మొత్తానికి జేసీ బ్రదర్స్‌ ఇద్దరూ తమ తనయులను వచ్చే ఎన్నికల్లో పోటీ చేయించనుండడంతో రాజకీయాలు ఆసక్తికరంగా మారాయి. మరోవైపు జేసీ బ్రదర్స్‌ తనయులిద్దరూ ఇప్పటికే అనేక కార్యక్రమాలు నిర్వహిస్తూ బిజీబిజీగా గడుపుతున్నారు. 

ఇక రాప్తాడు నియోజకవర్గానికి చెందిన మంత్రి పరిటాల సునీత సైతం రానున్న ఎన్నికల్లో తన తనయుడు శ్రీరామ్‌ను ఎమ్మెల్యేగా పోటీ చేయించనున్నట్లు తెలుస్తోంది. శ్రీరామ్‌ ఇప్పటికే పరిటాల రవీంద్ర మెమోరియల్‌ ట్రస్ట్‌ పేరిట అనేక సామాజిక సేవ కార్యక్రమాలు నిర్వహిస్తున్నారు. నియోజకవర్గంలో జరిగే ప్రతి కార్యక్రమంలోనూ పాల్గొనడమే కాకుండా.... నేతలు, కార్యకర్తలతో సత్సంబంధాలు ఏర్పరుచుకున్నారు. అభివృద్ధి పనులు సైతం శ్రీరామ్‌ నిర్ణయం మేరకే జరుగుతున్నాయి. దీంతో వచ్చే ఎన్నికల్లో శ్రీరామ్‌ పోటీ చేయడం ఖాయమనిపిస్తోంది. 

అలాగే... కళ్యాణదుర్గం ఎమ్మెల్యే ఉన్నం హనుమంతరాయచౌదరి కూడా తన తనయుడు మారుతిని ఎమ్మెల్యేగా పోటీ చేయించే ఆలోచనలో ఉన్నారు. తండ్రి వయోభారం నేపథ్యంలో మారుతి ఇప్పటికే క్రీయాశీలకంగా పార్టీ కార్యక్రమాల్లో పాల్గొంటున్నారు. ఇక హిందూపురం పార్లమెంట్‌ సభ్యుడు నిమ్మల కిష్టప్ప సైతం వచ్చే ఎన్నికల్లో తన తనయుడు నిమ్మల శిరీష్‌ను ఎమ్మెల్యే లేదా ఎంపీగా పోటీ చేయించాలనే ఆలోచనలో ఉన్నారు. ఏది ఏమైనా శిరీష్‌ వచ్చే ఎన్నికల్లో పోటీ చేయడం ఖాయమని ప్రచారం జరుగుతోంది. 


అధికారపక్షం రాజకీయ వారసులు ఇలా ఉంటే... ఉరవకొండ నియోజకవర్గంలో ప్రతిపక్ష వైసీపీ నుంచి పోటీ చేసేందుకు కొనకొండ్ల భీమిరెడ్డి సిద్దమయ్యారు. ఈయన మాజీ ఎమ్మెల్యే, మాజీ ఎమ్మెల్సీ కొనకొండ్ల శివరామిరెడ్డి తనయుడు... మాజీ ఎంపీ అనంత వెంకటరామిరెడ్డికి స్వయానా మేనల్లుడు. దీంతో ఈయనకు రాజకీయంగా మరింత కలిసి వచ్చే అవకాశం ఉంది. మొత్తానికి అనేకమంది నేతలు తమ వారసులను వచ్చే ఎన్నికల్లో పోటీ చేయించేందుకు సిద్దమయ్యారు. అన్నీ అనుకున్నట్లు టిక్కెట్లు లభిస్తే... అనంత రాజకీయాలు నవతరంతో రసవత్తరంగా మారుతాయి. 

17:21 - November 12, 2017

ప్రకాశం : జిల్లా కందుకూరులో రాజకీయాలు రసవత్తరంగా మారాయి.  వచ్చే ఎన్నికల నాటికి ఎవరు ఏ పార్టీ నుంచి బరిలోకి దిగుతారో తేల్చుకోలేకపోతున్నారు. అధికార పార్టీలో వర్గపోరు ఎసరు పెడుతుంటే.. ప్రతిపక్ష నేతల వైఖరిపై ప్రజలు పెదవి విరుస్తున్నారు. సీనియర్‌ నేతల సెకండ్ ఇన్నింగ్స్‌పై స్పష్టత కోరుతున్నారు. కందుకూరు రాజకీయంపై 10టీవీ ప్రత్యేక కథనం. 
నియోజకవర్గంపై దృష్టి సారించిన టీడీపీ, వైసీపీ
ఎన్నికలు ముగిసి మూడున్నరేళ్లైంది. ఇక ఎన్నికలకు ఏడాదిన్నర మాత్రమే గడువు ఉండటంతో అధికార, ప్రతిపక్షాలు  రంగం సిద్ధం చేస్తున్నాయి. అన్ని పార్టీల్లోనూ తీసివేతలు, కూడికలు మొదలయ్యాయి. నేతల సామర్ధ్యాలను అధినేతలు అంచనాలేస్తున్నారు. ఈ క్రమంలోనే ప్రకాశం జిల్లా కందుకూరు నియోజకవర్గంపై అధికార టీడీపీ, ప్రతిపక్ష వైసీపీలు దృష్టి సారించాయి. 
కందుకూరును ప్రతిష్టాత్మకంగా తీసుకున్న పార్టీలు
ప్రకాశం జిల్లాలోని 12 నియోజకవర్గాల్లో ప్రధానంగా కందుకూరు నియోజక వర్గాన్ని పార్టీలు ప్రతిష్టాత్మకంగా తీసుకున్నాయి. ఇక్కడ కీలక నేతగా పేరున్న మాజీ మంత్రి.. సీనియర్ నేత మానుగుంట మహీధర్‌రెడ్డి కేంద్రంగా ప్రస్తుతం రాజకీయాలు వేడెక్కుతున్నాయి. ఆయనను తమ పార్టీలోకి రమ్మంటూ ఇప్పటికే పార్టీలు పిలుస్తున్నాయి. అయితే నియోజకవర్గంలో సీటుతో పాటు సముచిత స్ధానంపై భరోసా కావాలంటూ మహీధర్‌రెడ్డి షరతు పెట్టడంతో ఆయా పార్టీలు స్పష్టత ఇవ్వలేదు. 
కొందరు టీడీపీ నేతలతో మహీధర్‌రెడ్డి విందు రాజకీయాలు
జిల్లాలో సీనియర్‌ నేత అయిన మహీధర్‌రెడ్డికి తనకంటూ ప్రత్యేక వర్గం కూడా ఉంది. చీరాల ఎమ్మెల్యే ఆమంచి కృష్ణమోహన్, అన్నా రాంబాబు, ముక్కు కాశిరెడ్డి, ఉగ్ర నరసింహారెడ్డి ఇలా చాలామంది మహీధర్‌రెడ్డికి విశ్వాసపాత్రులు. దాంతో వైసీపి, టీడీపీలు మహీధర్‌రెడ్డిని  చాలాసార్లు సంప్రదించారు. అయితే ఆయనే ఏ విషయం చెప్పకుండా దాటవేసినట్లు సమాచారం. ఇక జిల్లాలో మహీధర్‌రెడ్డి వర్గానికి చెందిన వారు ఎక్కువగా టీడీపీలో ఉన్నారు. వారిలో కొందరు కీలక నేతలతో మహీధర్‌రెడ్డి విందు రాజకీయాలు నడిపినట్లు తెలుస్తోంది. మరోవైపు మహీధర్‌రెడ్డి రాకతో రెండు పార్టీల్లోని కొందరు నేతలు తమ ఉనికికి ప్రమాదంగా భావిస్తున్నారు. దీంతో ఆయన రాకకు బ్రేకులు వేస్తున్నట్లు తెలుస్తోంది. 
ఎమ్మెల్యే రామారావుకు పొంచి ఉన్న వర్గపోరు
ఇక కందుకూరు సిట్టింగ్ ఎమ్మెల్యే పోతుల రామారావుకు నియోజకవర్గంలో వర్గ పోరు పొంచి వుంది. దీంతో పార్టీ రోజురోజుకు నియోజకవర్గంలో పట్టు కోల్పోతున్న పరిస్థితి స్ఫష్టమవుతోంది. దీనికితోడు ఆయనపై అందిన నివేదికను చూసి సీఎం పెదవి విరిచినట్లు తెలుస్తోంది. ఇటు వైసీపీ పరిస్థితి కూడా దారుణంగా మారింది. ప్రస్తుతం తూమాటి మాధవరావు ఒక్కరే వైసీపీకి దిక్కయ్యారు. దీంతో బలమైన నేత కోసం వైసీపీ నేతలు కూడా కరసరత్తు చేస్తున్నారు. ఈ క్రమంలోనే మహీధర్‌రెడ్డిని పలుమార్లు కలిశారు. అయితే నంద్యాలలో వైసీపీ ఓటమితో ఔత్సాహిక నేతలు సైతం వెనకడుగు వేస్తున్న పరిస్థితి కనిపిస్తోంది. ఏది ఏమైనా ఎన్నికల నాటికి కందుకూరు నియోజకవర్గ రాజకీయాలు ఎలా మారతాయో అన్న ఉత్కంఠ అందరిలోనూ కనిపిస్తోంది. 

 

20:45 - October 26, 2017

హైదరాబాద్ : ఇప్పుడు రాష్ట్ర రాజకీయాల్లో హాట్‌ టాపిక్‌గా ఉన్న మాస్‌ లీడర్‌ రేవంత్‌ రెడ్డి. గత కొద్ది రోజులుగా పార్టీ మారుతున్నారని వార్తలు వస్తున్న నేపథ్యంలో తాజాగా కాంగ్రెస్‌ నేతలను ఆత్మీయంగా ఆలింగనం చేసుకుని అన్ని ప్రశ్నలపై క్లారిటీ ఇచ్చాడు. ఈ సన్నివేశం అసెంబ్లీ ఆవరణలో యాదృచ్చికంగా జరిగినా.. పొలిటికల్‌ సర్కిల్‌లో ఆసక్తికర చర్చకు దారితీసింది.
అసెంబ్లీ ఆవరణలో రేవంత్‌ హల్‌చల్‌
టీటీడీపీ వర్కింగ్‌ ప్రెసిడెంట్‌ రేవంత్ రెడ్డి త్వరలోనే కాంగ్రెస్‌ పార్టీలో చేరుతున్నారన్న ప్రచారం ఇప్పుడు స్టేట్‌ పాలిటిక్స్‌లో సెగలు రేపుతోంది. ఇప్పటికే ఏఐసీసీ ఉపాధ్యక్షులు రాహుల్‌ గాంధీని రేవంత్‌ కలిసారని.. ఇక త్వరలోనే కాంగ్రెస్‌ కండువా కప్పుకుంటారన్న చర్చ జరుగుతోంది. ఇక ముహూర్తం మాత్రమే మిగిలిందంటూ చర్చ జరుగుతుందన్న సమయంలో ఆసక్తికర సన్నివేశం చోటుచేసుకొంది.. 
రేవంత్‌ను ఆలింగనం చేసుకున్న షబ్బీర్‌ ఆలి
తెలంగాణ అసెంబ్లీ ఆవరణలో  సీఎల్పీ సమావేశం ముగించుకొని కాంగ్రెస్‌ నేతలు బయటికి వస్తున్న సమయంలో.. అసెంబ్లీకి వస్తూ రేవంత్‌ వారికి ఎదురయ్యాడు. అంతే ఒక్కసారిగా సీన్‌ ఆసక్తికరంగా మారింది. రేవంత్‌కి ఎదురుపడ్డ కాంగ్రెస్‌ నేతలు అతన్ని నవ్వుతూ పలకరించారు. మండలి డిప్యూటి లీడర్‌ షబ్బీర్‌ ఆలీ ఏకంగా రేవంత్‌ని ఆలింగనం చేసుకుని అందరిని ఆశ్చర్యపరిచారు. ఇక మరో కాంగ్రెస్‌ ఎమ్మెల్సీ పొంగులేటి సుధాకర్‌ రెడ్డి రేవంత్‌తో చేతులు కలిపారు. ఈ హడావుడంతా ఏంటని రేవంత్‌ని ప్రశ్నించారు. అంతే కాకుండా అలంపూర్‌ ఎమ్మెల్యే సంపత్‌ కుమార్‌ రేవంత్‌ని పలకరిస్తూ స్వాగతం పలికారు. కాంగ్రెస్‌ నేతలను పలకరించిన అనంతరం రేవంత్‌ టీడీఎల్పీ కార్యాలయంలోకి వెళ్లారు
తన సీటులో కాకుండా పక్కసీట్లో కూర్చున్న రేవంత్  
టీడీఎల్పీ కార్యాలయంలోనూ తన సీటులో కాకుండా పక్కసీట్లో కూర్చున్నారు. కాంగ్రెస్‌ నేతలతో రేవంత్‌ కలవడం యాదృచ్చికంగా జరిగినా రాజకీయ వర్గాల్లో ఆసక్తికరంగా మారింది. ఇప్పటికే టీడీపీ అధ్యక్షుడు ఎల్‌. రమణ రేవంత్‌ను వర్కింగ్‌ ప్రెసిడెంట్‌గా, టీడీఎల్పీ నేత పదవుల నుంచి తప్పించారు. ఇక నేడో రేపో.. కాంగ్రెస్‌లోకి చేరడానికి ముహూర్తం ఖరారు కానున్న నేపథ్యంలో.. ఒక్కసారిగా చోటు చేసుకుంటున్న సన్నివేశాలు ఆసక్తికరంగా మారాయి.

 

19:11 - October 26, 2017

విశాఖపట్నం : ఈ మధ్య కాలంలో రాజకీయాల్లోకి సినీనటులు ఎక్కువగా వస్తున్నారని,  కానీ పాలిటిక్స్‌లో రాణించిన నటులు చాలా తక్కువ మంది ఉన్నారన్నారు సినీనటి గౌతమి. ఈనెల 28న విశాఖ బీచ్‌ రోడ్డులో జరిగే  కేన్సర్‌ అవగాహన కార్యక్రమంలో పాల్గొనేందుకు గౌతమి విశాఖ వచ్చారు. లైఫ్‌ ఎగైన్‌ ఫౌండేషన్‌ ఆధ్వర్యంలో విన్నర్స్‌ వాక్‌  జరుగునుంది. టాలీవుడ్‌ హీరో నందమూరి బాలకృష్ణ ఈ కార్యక్రమానికి ముఖ్యఅతిథిగా హాజరుకానున్నారు.  ఈ సందర్భంగా గౌతమి సినీ నటుల రాజకీయ రంగప్రవేశంపై తనదైన శైలిలో స్పందించారు. తమిళనాడులో ఎంజీఆర్‌, జయలలిత లాంటి నేతలు ప్రత్యేక నాయకత్వం లక్షణాలతో ఉన్నత స్థానానికి చేరుకున్నరని చెప్పారు. 

 

21:56 - October 25, 2017

ఢిల్లీ : వచ్చే నవంబర్‌ 8 నాటికి మోది సర్కార్ పెద్దనోట్ల రద్దు అమలు చేసి ఏడాది పూర్తవుతున్నందున రాజకీయాలు వేడెక్కాయి. నోట్లరద్దును సమర్థిస్తూ అధికార బిజెపి, నోట్లరద్దు వ్యతిరేకిస్తూ విపక్షాలు ఆందోళనలకు సిద్ధమయ్యాయి. నవంబర్‌ 8వ తేదీని విపక్షాలు బ్లాక్‌ డేగా ప్రకటించగా... ఆ రోజును బ్లాక్‌మనీ వ్యతిరేకదినంగా పాటించనున్నట్లు కేంద్రం పేర్కొంది.
నవంబర్‌ 8...దేశవ్యాప్తంగా ఆందోళనలు...
నవంబర్‌ 8...దేశవ్యాప్తంగా ఆందోళనలు...నిరసన ప్రదర్శనలు హోరెత్తనున్నాయి. మోది ప్రభుత్వం నోట్ల రద్దు నిర్ణయం తీసుకుని ఏడాది పూర్తవుతున్నందున రాజకీయాలు వేడెక్కాయి. నోట్లరద్దు నిర్ణయాన్ని సమర్థిస్తూ అధికార బిజెపి, నోట్లరద్దును వ్యతిరేకిస్తూ విపక్షాలు దేశవ్యాప్తంగా ఆందోళనకు సిద్ధమయ్యాయి.
నవంబర్‌ 8న నల్లధనం వ్యతిరేక దినాన్ని నిర్వహణ : కేంద్రం 
నవంబర్‌ 8న నల్లధనం వ్యతిరేక దినాన్ని నిర్వహించనున్నట్లు కేంద్రం ప్రకటించింది. నల్లధనాన్ని వ్యతిరేకిస్తూ దేశవ్యాప్తంగా జరిగే ఈ కార్యక్రమంలో బిజెపి నేతలు పాల్గొంటారని కేంద్ర ఆర్థికమంత్రి అరుణ్‌ జైట్లీ పేర్కొన్నారు. నల్లధనానికి వ్యతిరేకంగా కేంద్రం తీసుకున్న చర్యలను ప్రజలకు వివరిస్తారని ఆయన చెప్పారు. నల్లధనం నిర్మూలనలో భాగంగానే పెద్దనోట్లను రద్దు చేసినట్లు జైట్లీ తమ చర్యను సమర్థించుకున్నారు. 
దేశవ్యాప్తంగా ఆందోళనలకు వామపక్షాలు పిలుపు 
కేంద్రం తీసుకున్న నోట్లరద్దు నిర్ణయాన్ని వ్యతిరేకిస్తూ నవంబర్‌ 8న దేశవ్యాప్తంగా ఆందోళనలు చేపట్టనున్నట్లు వామపక్షాలు ప్రకటించాయి. 6 వామపక్ష పార్టీలు ఢిల్లీలో సమావేశమై ఈ నిర్ణయం తీసుకున్నాయి. మోది ప్రభుత్వం తీసుకున్న నోట్ల రద్దు, జిఎస్‌టి నిర్ణయాలతో భారత ఆర్థిక వ్యవస్థ క్షీణించిందని సిపిఎం జాతీయ ప్రధాన కార్యదర్శి సీతారాం ఏచూరి తెలిపారు. నోట్లరద్దుతో ప్రజలు ఉపాధి కోల్పోయారని, సామాన్య, పేదల ప్రజల జీవితాలు దుర్భరంగా తయారయ్యాయని ఆయన పేర్కొన్నారు.  
నవంబర్‌ 8న బ్లాక్‌డేగా 18 ప్రతిపక్ష పార్టీలు ప్రటకన 
నవంబర్‌ 8న బ్లాక్‌డేగా పరిగణిస్తున్నట్లు కాంగ్రెస్‌ నేతృత్వంలోని 18 ప్రతిపక్ష పార్టీలు ప్రకటించాయి. నోట్ల రద్దు నిర్ణయాన్ని వ్యతిరేకిస్తూ ఆరోజు దేశవ్యాప్త ఆందోళనలు చేపట్టనున్నట్లు విపక్షాలు పేర్కొన్నాయి. మోది ప్రభుత్వం తీసుకున్న అనాలోచిత నిర్ణయం వల్ల దేశవ్యాప్తంగా ప్రజలు ఇబ్బందులు ఎదుర్కొన్నారని కాంగ్రెస్‌ సీనియర్‌ నేత గులాం నబీ ఆజాద్ గుర్తు చేశారు. నోట్లరద్దుతో నల్లధనం, ఉగ్రవాదం, ఫేక్‌ కరెన్సీ నిర్మూలిస్తామన్న మోది ఆకాంక్ష నెరవేరకపోగా....అది మరింత పెరిగిందని ఆయన ధ్వజమెత్తారు. గుజరాత్‌, హిమాచల్‌ ప్రదేశ్‌ అసెంబ్లీ ఎన్నికలు సమీపిస్తున్న వేళ నోట్లరద్దు నిర్ణయంపై అధికార, విపక్షాల ఆందోళన ప్రజలపై ఎంత ప్రభావితం చేస్తుందన్నది వేచి చూడాలి.

 

18:34 - October 23, 2017

విజయవాడ : ఇప్పటికైనా వైసీపీ అధినేత జగన్ తీరు మార్చుకోవాలని ఏపీ మంత్రి సోమిరెడ్డి ఉచిత సలహా ఇచ్చారు. అనేక కేసుల్లో నిందితుడిగా ఉన్న జగన్ వెంటనే ప్రతిపక్ష నేతగా తప్పుకోవాలని..పార్టీ బాధ్యతలు కూడా వేరే వారికి అప్పగిస్తే బాగుంటుందని పేర్కొన్నారు. జగన్ వైఖరితో రాజకీయ నేతలంటే సమాజంలో చిన్న చూపు ఏర్పడుతోందని తెలిపారు. 

11:55 - October 23, 2017

అనంతపురం : జిల్లా కరవుకు శాశ్వత చిరునామా. ఈ జిల్లాలో ఎప్పుడూ కరువు విలయతాండవం చేస్తూనే ఉంటుంది. వర్షాలు పడక, సాగునీరు అందక పంటలు పండవు. తాగడానికి నీరు దొరకక అనేక పల్లెలు అలమటిస్తుంటాయి. కానీ వీటన్నిటికి మొన్న కురిసిన కుండపోత వర్షం చెక్‌పెట్టింది. సాగు,తాగునీటి కష్టాలకు పరిష్కారం చూపింది. ఎడతెరపిలేకుండా కురిసిన వర్షాలతో జిల్లాలో ఎక్కడ చూసినా నీరే కనిపిస్తోంది. కొండలు, గుట్టలు, వ్యవసాయ పొలాలు, బీడు భూముల్లో పచ్చదనం పరుచుకుంది. జలాశయాలు, కుంటలు, వాగులు, కాలువలు, చెరువులు వర్షపునీటితో నిండుకుండలా కళకళలాడుతున్నాయి.

ఒక్కసారిగా పరిస్థితి మారిపోయింది
పది రోజులపాటు జిల్లాలో ఎడతెరపిలేకుండా వర్షాలు కురవడంతో పరిస్థితి ఒక్కసారిగా మారిపోయింది. గుక్కెడు నీటికోసం కిలోమీటర్లు నడిచిపోయే బాధ తప్పింది. ఆరుతడి పంటలసాగుకు సైతం నీరివ్వలేమని క్రాఫ్‌ హాలిడే ప్రకటించిన అధికారుల ప్రకటనలకు కాలం చెల్లిపోయింది. గత కొన్నేళ్లుగా తమ ప్రాంతానికి తాగునీటి కేటాయింపుల్లో తీరని అన్యాయం జరుగుతోందని, ఈసారి తమ ప్రాంతానికి తొలిదశలోనే నీటిని విడుదల చేయకపోతే తన పదవికి రాజీనామా చేస్తానంటూ అనంతపురం ఎంపీ జేసీ దివాకర్‌రెడ్డి సంచలన ప్రకటన చేశారు. ఆ వెనువెంటనే తమ ప్రాంతం నుంచే నీటిని విడుదల చేస్తూ తమకు నీరివ్వకపోతే తీవ్రంగా నష్టపోతామంటూ ప్రభుత్వవిఫ్‌ యామినిబాల ప్రత్యక్ష ఆందోళనకుదిగారు. తమ నియోజకవర్గానికి నీటిని తేలేని పరిస్థితుల్లో రైతుల నుంచి తీవ్ర వ్యతిరేకత తప్పదని గ్రహించిన సింగనమల ఎమ్మెల్యే యామినిబాల అధికారుపై యుద్ధమే ప్రకటించారు. మరోవైపు వారం రోజుల్లో నీరు విడుదల చేయకపోతే మూడు నియోజకవర్గాలకు తాగునీరు లేకుండాపోతుందని వెంటనే నీటిని విడుదల చేయాలని ధర్మవరం, కదిరి ఎమ్మెల్యేలు గోనుగుంట్ల సూర్యనారాయణ, అత్తార్‌ చాంద్‌ బాషా ప్రభుత్వంపై ఒత్తిడి పెంచారు.

నేతల రాజకీయాలు
తామేమి తక్కువకాదన్నట్టు సమాచారాశాఖ మంత్రి కాల్వ శ్రీనివాసులు సైతం రాయదుర్గం నియోజకవర్గానికి నీటిని విడుదల చేయాలంటూ అధికారులపై ఒత్తిడి తీసుకువచ్చారు. నీటికోసం పరిస్థితి పూర్తిగా అదుపుతప్పేలా కనిపించింది. ఈ సమయంలోనే వరుణుడు కరుణించాడు. కుండపోతగా వర్షం కురిపించాడు. తాగునీటి కష్టాలకు , వాటిపై నేతలు చేస్తున్న రాజకీయాలకు చెక్‌ పెట్టాడు. కుండపోతగా కురిసిన వర్షాలతో నీరు పుష్కలంగా ఉండడంతో రైతులు సంతోషం వ్యక్తం చేస్తున్నారు. ఉత్సాహంగా పంటలను సాగు చేసుకుంటున్నారు. మరోవైపు నీటికోసం పాట్లు పడనవసరం లేదని తెలుసుకున్న నేతలు.. నీటి విడుదల అంశాన్ని పూర్తిగా అధికారులకే అప్పగించారు. ప్రాజెక్టుల్లో పెద్ద ఎత్తున నీరు వచ్చి చేరడంతో సమతుల్యత పాటించి నీటిని విడుదల చేయాలని నేతలు కోరుతున్నారు.

Pages

Don't Miss

Subscribe to RSS - రాజకీయాలు