రాజకీయాలు

12:42 - June 23, 2017

విశాఖపట్టణం..ఉక్కు నగరం..ప్రస్తుతం ప్రతి రోజు వార్తల్లో నిలుస్తుంది. ఇక్కడ జరిగిన భూ కుంభకోణమే ఇందుకు కారణం. దీనితో ప్రతిపక్షాలు పోరాటం ఉధృతం చేస్తున్నాయి. సర్కార్ పై తీవ్ర ఆరోపణలు..విమర్శలు గుప్పిస్తున్నాయి. ప్రధాన ప్రతిపక్షమైన వైసీపీ తారాస్థాయిలో పోరాటం చేసేందుకు సిద్ధమౌతోంది. ఇప్పటికే భూములు..రైతులు..కార్మికులు..ఇతరత్రా సమస్యలపై చురుగ్గా పోరాటం చేస్తున్న వామపక్షాలను కలుపుకుని పోరాటం చేయాలని వైసీపీ భావిస్తోంది.

భూముల చుట్టూ రాజకీయాలు..
విశాఖపట్టణంలో భూ కుంభకోణాలు తీవ్ర వివాదాన్ని సృష్టిస్తున్నాయి. నెల రోజుల నుండి భూముల చుట్టూ రాజకీయాలు తిరుగుతున్నాయి. విశాఖ జిల్లాలో భూ రికార్డులు మార్చివేసి అధికార పార్టీ నేతలు..ప్రభుత్వ భూములను కొట్టేశారని, 6,000 ఎకరాలకుపైగా ప్రభుత్వ భూములు మాయమయ్యాయని వెలుగులోకి రావడంతో ఒక్కసారిగా ఏపీలో పరిస్థితులు మారిపోయాయి. దీనిని చక్కదిద్దేందుకు ప్రభుత్వం రంగంలోకి దిగింది. మధురవాడ..కొమ్మాది ప్రాంతాల్లో భూముల రికార్డులు తారుమారు అయినట్లు ప్రాథమిక విచారణలో వెల్లడైందని పేర్కొంటూ సిట్ దర్యాప్తుకు ఆదేశాలు జారీ చేసింది.

గంటా శ్రీనివాస్ రావుపై ఆరోపణలు..
మంత్రి గంటా శ్రీనివాసరావు భీమునిపట్నం ప్రాంతం నుంచి ఎమ్మెల్యేగా ప్రాతినిథ్యం వహిస్తుండడంతో ఆయన అనుచరుల పాత్రే ఈ భూముల ట్యాంపరింగ్‌లో అధికంగా ఉందనే ఆరోపణలు వినిపిస్తున్నాయి. టీడీపీలో అత్యంత సీనియర్ నేత, సీనియర్ మంత్రి అయిన అయ్యన్నపాత్రుడు బహిరంగంగానే విశాఖలో భూ స్కామ్ జరిగిందని ప్రకటించిన విషయం తెలిసిందే. ఈవిషయంలో చంద్రబాబు మౌనం ఎందుకు వ్యవహించారనే విమర్శలు వినిపించాయి. ప్రస్తుతం ఆరోపణలు ఎదుర్కొంటున్న మంత్రి గంటా శ్రీనివాసరావే సీబీఐ, సిట్టింగ్ జడ్జి విచారణ కావాలని కోరుతుండడం విశేషం. మరోవైపు హుద్ హుద్ తుఫాన్‌లో రికార్డులు కొట్టుకుపోయాయంటూ విశాఖ జిల్లాలో కొందరు అధికారులు..నేతలు కుమ్మక్కై భూ అక్రమణలకు పాల్పడ్డారని ప్రచారం జరుగుతోంది.

వైసీపీ ధర్నా..
ఇప్పటి వరకు హోదా..జోన్..ప్రత్యేక నిధులు వంటి అంశాలతో ఉద్యమం చేస్తున్న ప్రధాన ప్రతిపక్షం దీనిపై పోరాటం చేసేందుకు నడుం బిగించింది. విశాఖలో 'సేవ్ విశాఖ' పేరిట మహాధర్నా చేపట్టింది. ఈధర్నాకు వామపక్షాలు సైతం మద్దతిచ్చి ధర్నాలో పాల్గొన్నాయి. ధర్నాలో పాల్గొన్న జగన్ ప్రభుత్వంపై తీవ్రస్థాయిలో విరుచుకపడ్డారు. చంద్రబాబు..లోకేష్..మంత్రులు..ఇతరులపై తీవ్ర ఆరోపణలు గుప్పించారు. ‘తాము వస్తాం..కబ్జా రాక్షసులను జైళ్లో పెట్టిస్తాం..సీబీఐ చేత విచారణ చేయించాలి..చంద్రబాబును..లోకేష్ ను తన్ని జైల్లో పెడుతారు' అంటూ జగన్ చేసిన వ్యాఖ్యలు రాజకీయ వివాదం సృష్టిస్తున్నాయి.

తిప్పికొడుతున్న అధికారపక్షం..
దీనిపై అధికారపక్షం స్పందిస్తూ విమర్శలకు ప్రతి విమర్శలు చేస్తోంది. వారు చేసిన ధర్నా ప్రాంతం అశుద్ధం అయ్యిందని పేర్కొంటూ నేతలు శుద్ధి చేసే ప్రయత్నం చేశారు. పలు కేసుల్లో ఆరోపణలు ఎదుర్కొంటున్న జగన్ ప్రభుత్వంపై విమర్శలు చేసే హక్కు లేదని విమర్శలను తిప్పికొట్టే ప్రయత్నం చేస్తున్నారు. సీబీఐ చేత విచారణ చేయించాలన్న డిమాండ్ ను కూడా కొట్టిపారేస్తున్నారు.

కానీ విశాఖలో జరిగిన భూ దందాపై నిజాలు బయటకొస్తాయా ? లేదా ? అనేది రానున్న రోజుల్లో తేలనుంది.

12:33 - June 16, 2017

కర్నూలు : జిల్లాలో రాజకీయాలు మరోసారి వెడేక్కాయి. భూమా అఖిలప్రియ వైఖరిపై ఏవీ సబ్బారెడ్డి ఆగ్రహంగా ఉన్నారు. పార్టీ కార్యక్రమాల్లో తనను పక్కన పెట్టేస్తున్నారని ఆయన గుర్రుగా ఉన్నారు. తాజాగా ఏవీ సబ్బారెడ్డి కర్నూలు టీడీపీ కౌన్సిలర్లతో అత్యవసర భేటీ అయ్యారు. తనవైపు ఉంటారో లేదో తేల్చుకోవాలని కౌన్సిలర్లకు ఏవీ సబ్బారెడ్డి అల్టిమేటం జారీ చేశారు. జిల్లా ఇంఛార్జ్ మంత్రులు సుజనా, కాల్వశ్రీనివాసులు సుబ్బారెడ్డి ఫోన్ చేయడంతో ఆయన హుటాహుటిన విజయవాడకు బయలదేరారు. నంద్యాల ఉపఎన్ని నేపథ్యంలో టీడీపీ కుమ్ములాటలు కార్యకర్తలను ఆందోళను గురి చేస్తున్నాయి. 

16:37 - June 4, 2017

కరీంనగర్ : ఉమ్మడి కరీంనగర్ జిల్లాలో రాజకీయాలు వేడెక్కుతున్నాయి. ఎవరికి వారే పార్టీలను బలోపేతం చేసుకునే పనిలో పడ్డారు. సర్వేలతో టీఆర్‌ఎస్, ఆకర్ష్‌తో బిజెపి, పునర్వైభవం కోసం టిడిపి పాకులాడుతున్నాయి. ఇక ఉద్యమాలతో వామపక్షపార్టీలు అధికార పార్టీని ముప్పు తిప్పలు పెడుతున్నాయి. వచ్చే ఎన్నికల్లో సత్తా చాటేందుకు జిల్లా వ్యాప్తంగా దూకుడు పెంచిన రాజకీయ పార్టీలపై టెన్ టీవీ ప్రత్యేక కథనం. 
కుస్తీపాట్లు 
ఉమ్మడి కరీంనగర్ జిల్లాలో రాజకీయాలు రంజుగా మారాయి. పట్టు సడలకుండా కొన్ని పార్టీలు..పట్టు సాధించే పనిలో కొన్ని పార్టీలో కుస్తీపాట్లు పడుతున్నాయి. టిఆర్‌ఎస్‌కు కంచుకోటగా ఉన్న జిల్లాలో గత ఎన్నికల్లో 13 శాసన సభ స్థానాల్లో 12 స్థానాలతో పాటుగా రెండు లోక్ సభ స్థానాలను గులాబి పార్టీ సొంతం చేసుకుంది. ఇప్పుడు ఇదే జిల్లాలో పూర్వ వైభవం కోసం బిజెపి,టిడిపి,కాంగ్రెస్ పార్టీలు ముమ్మరంగా ప్రయత్నం చేస్తున్నాయి. జాతీయ పార్టీలైన బిజెపి,కాంగ్రెస్‌లు ఒకప్పుడు కరీంనగర్ జిల్లాలో సత్తా చాటిన పార్టీలే. అయితే మారుతున్న రాజకీయ సమీకరణలతో ప్రజలకు దూరం అయ్యాయి. ఇక తెలంగాణ ఉద్యమ  ప్రభావం టిడిపిపై తీవ్ర ప్రభావాన్ని చూపడంతో కరీంనగర్ జిల్లాలో పార్టీ ఉనికే ప్రశ్నార్థకంగా మారింది.  
పార్టీ కేడర్‌ను పెంచే పనిలో సీఎం కేసీఆర్
కరీంనగర్ జిల్లాలో టిఆర్‌ఎస్ బలంగా ఉన్నప్పటికీ మిగతా పార్టీలు బలం పెంచుకునే పనిలో ఉండటంతో సీఎం కేసీఆర్ ఇంకా పార్టీ కేడర్‌ను పెంచే పనిలో పడ్డారు. గతంలో ఓ వెలుగు వెలిగిన బిజెపి ప్రస్తుతం సరికొత్త వ్యూహాలు రచిస్తూ పుంజుకునే పనిలో ఉండంతో పార్టీ శ్రేణుల్లో ఆత్మవిశ్వాసం కలుగుతోంది. మోడీ ఇమేజ్‌ జిల్లాలో ఎక్కువగా ఉండటంతో కేంద్ర ప్రభుత్వ పథకాలను విస్తృతంగా ప్రజల్లోకి తీసుకెళ్లేందుకు బిజెపి శ్రేణులు తీవ్రంగా పనిచేస్తున్నాయి. జాతీయ అధ్యక్షుడు అమిత్ షా సూచనలతో  కాంగ్రెస్,టిడిపిలలో ఉన్న బలహీన నేతల్ని పార్టీలోకి తీసుకువచ్చేందుకు రహస్య మంతనాలు పూర్తయ్యాయి. ఆ పార్టీకి చెందిన మాజీ మంత్రులు బిజెపిలో చేరేందుకు మొగ్గుచూపుతున్నట్లు జిల్లాలో ప్రచారం జరుగుతోంది. 
ఒకప్పుడు జిల్లాలో కాంగ్రెస్ హవా 
కాంగ్రెస్ పార్టీ ఒకప్పడు కరీంనగర్ జిల్లాలో తన హవా కొనసాగించింది. అలాంటి పార్టీకి తెలంగాణ రాష్ట్రం ఏర్పడ్డాక తగిన ప్రాధాన్యత లభించకపోవడంతో  ప్రజా వ్యతిరేక ఉద్యమాలతో తిరిగి పట్టు సాధించేందుకు ప్రయత్నిస్తోంది. కమలనాథులు ఎంత ప్రయత్నించినా బలపడరని..టిడిపిని పరిగణనలోకి తీసుకోవాల్సిన అవసరం లేదని భావిస్తున్న కాంగ్రెస్‌ నేతలు టిఆర్‌ఎస్‌కు ధీటైన ప్రత్యామ్నాయం తామేననే ధీమాలో ఉన్నారు. అందులో భాగంగా గ్రామస్థాయి మొదలు జిల్లా,రాష్ట్ర స్థాయి నేతలను కలుపుకుని పోయే ప్రయత్నాలు చేస్తూనే ఇతర పార్టీలు వేస్తున్న ఆకర్ష్ వలలో పడకుండా జాగ్రత్తలు పడుతున్నారు. రాహుల్‌ గాంధీ సభ విజయవంతం కావడంతో హస్తం పార్టీ నేతలు మరింత జోష్‌కు ముందుకు సాగుతున్నారు. 
పునర్వైభవం కోసం తపిస్తున్న టిడిపి
రెండు దశాబ్దాల పాటు చక్రం తిప్పిన తెలుగుదేశం పార్టీ తిరిగి పూర్వ వైభవం కోసం తపిస్తోంది. తెలంగాణ రాష్ట్ర అధ్యక్షుడు ఎల్.రమణ జగిత్యాల వాసి కావడంతో ఈసారి ఉమ్మడి కరీంనగర్ జిల్లాలో పట్టు సాధించేందుకు ముమ్మర ప్రయత్నాలు చేస్తున్నారు. ఇటీవల టిడిపి కార్యనిర్వాహక అధ్యక్షుడు రేవంత్ రెడ్డి హుజురాబాద్‌లో నిర్వహించిన సభ సక్సెస్ కావడంతో ప్రస్తుతం పార్టీ శ్రేణుల్లో కాస్త ఉత్సాహం కనిపిస్తోంది. అయితే ఒకరిద్దరు నేతలు బిజెపివైపు మొగ్గు చూపుతున్నారన్న సమాచారంతో ఎవరిని విశ్వసించాలో తెలియని అయోమయంలో పడ్డారు టిడిపి సీనియర్‌ నేతలు. 
పోరాటాలతో ముందుకు సాగుతున్న వామపక్ష పార్టీలు
టిఆర్ఎస్ ప్రభుత్వం అవలంబిస్తున్న ప్రజా వ్యతిరేక విధానాలపై పోరాటాలు చేస్తు ముందుకు సాగుతున్నాయి వామపక్షా  పార్టీలు. సిపిఐ రాష్ట్ర కార్యదర్శి చాడ వెంకట్ రెడ్డి జిల్లా వాసి కావడంతో తరుచు పర్యటనలు చేస్తూ ఆందోళనలు కొనసాగిస్తూ పట్టు సాధించే పనిలో పడ్డారు. ఈ ధపా జరగబోయే ఎన్నికల్లో హుస్నాబాద్ స్థానాన్ని ఎట్టి పరిస్థితుల్లో గెలవాలనే పట్టుదలతో సిపిఐ నేతలు ఉన్నట్లు తెలుస్తోంది. సిపిఎం రాష్ట్ర కార్యదర్శి తమ్మినేని వీర భద్రం చేపట్టిన పాదయాత్ర,ప్రాజెక్టు నిర్మాణాల విషయంలో నిర్వాసితుల పక్షాన చేసిన ఆందోళనలతో ప్రజల్లో ఆ పార్టీకి మంచి ఆదరణ లభించింది. 
పార్టీలు.. ఎత్తులు..పైఎత్తులు
మొత్తానికి జిల్లాలో అన్ని పార్టీలు ఎత్తులు..పైఎత్తులు వేస్తూ ముందుకు సాగుతున్నాయి. తీరా ఎన్నికల సమయానికి ఏ నేత ఏ పార్టీ కండువాతో ప్రజల్లోకి వస్తాడో మాత్రం సస్పెన్సే. ఇక పార్టీ సమీకరణలు ఏ విధంగా ఉంటాయో తెలియాలంటే ఎన్నికల వరకు ఆగాల్సిందే. 

 

20:04 - May 29, 2017

పశ్చిమ గోదావరి : జిల్లాలో తెలుగుదేశం పార్టీ ఆవిర్భావం తరువాత రాజకీయ రూపురేఖలు మారిపోయాయి. ఎక్కువ సార్లు ఈ జిల్లాలో టిడిపి తన జెండాను రెపరెలాడించింది. ఓవైపు బీసి వర్గాల మద్దతు కూడగట్టుకుని విజయబాహుట ఎగరేసింది. ఇదంతా గతం..ప్రస్తుతం జిల్లా రాజకీయ సమీకరణాల్లో పెనుమార్పులు చోటుచేసుకున్నాయి. ఇప్పుడు ఎన్నికలు మొత్తం వ్యక్తులు, పార్టీల మధ్య కాకుండా కుల సమీకరణల మధ్య జరుగుతుండటం గమనించాల్సిన అంశం.

టిడిపి, వైసిపి నువ్వానేనా...
గత ఎన్నికల్లో టిడిపి, వైసిపి నువ్వానేనా అన్నట్లు పోటీపడ్డా..జనసేనతో చేతులు కలిపి సైకిల్‌ పార్టీ అధికారం సొంతం చేసుకుంది. కాపు సామాజిక వర్గం మొత్తం టిడిపికి ఓట్ల వర్షం కురిపించడంతో జిల్లాలో టిడిపి 15 స్ధానాలు కైవసం చేసుకుంది. రాబోయే ఎన్నికల్లో కూడా ఇదే హవా కొనసాగించాలని టిడిపి ఓవైపు ప్రణాళికలు రచిస్తుంటే.. అటు ప్రతిపక్ష వైసిపి మాత్రం టిడిపి వ్యతిరేకతపై నిత్యం పోరాటం చేస్తూ తమ గెలుపుకోసం వ్యూహాలు రచిస్తోంది. ఇందులో భాగంగానే పశ్చిమలో కాపు ఓట్లు రాబట్టుకోవడానికి అదే సామాజిక వర్గానికి చెందిన మాజీ ఎమ్మెల్యే ఆళ్ల నానికి ఎమ్మెల్సీ పదవిని కట్టబెట్టి తాము కాపులకు అధిక ప్రాధాన్యత ఇస్తున్నామన్న సంకేతాలు పంపింది.

పవన్ సామాజిక వర్గం 
ఇక జనసేన విషయానికొస్తే పవన్ కళ్యాణ్ పశ్చిమ గోదావరి జిల్లా వాడిగా, సామాజిక వర్గం పరంగా ఎక్కువ ఓట్లు వచ్చే అవకాశం ఉంది. ఈ నేపథ్యంలోనే పశ్చిమలో ఏలూరు కేంద్రంగా పార్టీ కార్యాలయాన్ని ఏర్పాటు చేస్తానని.. ఈ జిల్లానుంచే పోటి చేస్తానని పవన్ సంకేతాలు ఇచ్చారు. దాంతో ఈ జిల్లాకు చెందిన అభిమానులు, కొత్తగా రాజకీయాల్లోకి రావాలనుకునేవారు ఆ పార్టీ కోసం ఎదురుచూపులు చూస్తున్నారు. కానీ పవన్ మాత్రం పార్టీ కార్యాలయాన్ని ఏర్పాటు చేయకపోవడంతో ఆశావహులు పెదవి విరుస్తున్నారు.

రెండు రాష్ట్రాల్లో చతికిలపడ్డ కాంగ్రెస్ పార్టీ
మరోవైపు రెండు రాష్ట్రాల్లో చతికిలపడ్డ కాంగ్రెస్ పార్టీ పునరుజ్జీవం కోసం ప్రయత్నాలు ప్రారంభించింది. ప్రత్యేక హోదా పేరుతో పశ్చిమలోని భీమవరంలో భారీ బహిరంగ సభ పెట్టేందుకు సన్నాహాలు చేస్తోంది. ఆ సభకు రాహుల్ గాంధీని తీసుకువచ్చి ఎన్నికల ప్రచారానికి తెరలేపాలని భావిస్తోంది. పశ్చిమ గోదావరి జిల్లాలో విజయం సాధించిన వారు ప్రభుత్వం ఏర్పాటు చేస్తారనే సెంటిమెంటు ఉంది. దీంతో అన్ని రాజకీయపార్టీల చూపు ఈజిల్లాపై ఉండటం విశేషం.

 

16:04 - May 24, 2017
16:45 - May 19, 2017
14:40 - May 19, 2017

విశాఖ:జనసేన కార్యకర్తల ఎంపిక ప్రక్రియలో భాగంగా ఈరోజు విశాఖపట్నంలో పరీక్ష నిర్వహించారు. ఈ టెస్ట్‌కి పెద్దసంఖ్యలో అభిమానులు హాజరయ్యారు. ఈ పరీక్షా ఫలితాలను జనసేన హెడ్‌ ఆఫీస్‌లో పరిశీలించి యువకులను ఎంపిక చేయడం జరుగుతుందని నిర్వాహకులు చెప్పారు. కాగా ఈ పరీక్షలు 'టాలెంట్‌'కి కొలమానంలా భావించవద్దని, మంచి ఆలోచనలున్నవారినిరాజకీయాల్లోకి తీసుకురావడమే తమ ఉద్దేశమని పవన్‌ కల్యాణ్‌ ప్రకటించడంతో ఈ పరీక్షలు చర్చానీయాంశంగా మారాయి.

21:29 - May 15, 2017

చెన్నై : తనకు రాజకీయాల్లోకి వచ్చే ఉద్దేశం లేదని తమిళ సూపర్‌ స్టార్‌ రజనీకాంత్‌ స్పష్టం చేశారు. ఒకవేళ దేవుడు ఆజ్ఞపిస్తే రాజకీయాల్లోకి వస్తానన్నారు. తనని నటించడం కోసమే భగవంతుడు ఆదేశించారని చెప్పారు. కొంత మంది రాజకీయ లబ్ది కోసం తన పేరును దుర్వినియోగం చేస్తున్నారని ధ్వజమెత్తారు. చెన్నైలోని రాఘవేంద్ర కళ్యాణ మంటపం తమిళ సూపర్‌ స్టార్‌ రజనీకాంత్‌ అభిమానులతో కోలాహలంగా కనిపించింది. దాదాపు ఎనిమిదేళ్ల విరామం తరువాత సూపర్‌ స్టార్‌ రజనీకాంత్‌ తన అభిమానులతో​ ప్రత్యక్షంగా సమావేశం అయ్యారు. తన భవిష్యత్‌ ప్రణాళికను వారితో పంచుకున్నారు.

ముత్తురామన్ తో..
సీనియర్‌ దర్శకుడు ముత్తురామన్‌తో కలిసి రజనీకాంత్‌ అభిమానుల నుద్దేశించి మాట్లాడారు. అభిమానుల ఆకాంక్షలను ఎట్టి పరిస్థితుల్లో వమ్ము చేయని చెప్పారు. తనకు రాజకీయాల్లోకి వచ్చే ఉద్దేశం లేదని స్పష్టం చేశారు. రాజకీయాల్లోకి రావడానికి రజనీ భయపడుతున్నాడు...తనను పిరికివాడంటున్న కొందని విమర్శలను పట్టించుకునే అవసరం లేదని రజనీకాంత్‌ అన్నారు. కొన్ని పరిస్థితుల దృష్ట్యా 1996లో డీఎంకేకు మద్దతు ఇవ్వాల్సి వచ్చిందని... కొంతమంది తమ రాజకీయ లబ్ధి కోసం తన పేరును వాడుకుంటున్నారని మండిపడ్డారు. నేను ఏ పార్టీలోనూ చేరను. ఇప్పటివరకు తనని నటించమనే దేవుడు ఆదేశించాడు. ఆ పనే చేస్తాను. భవిష్యత్తు ఎలా ఉంటుందో తెలియదని రజనీ చెప్పారు. నా అభిమానులు నిజాయితీగా జీవించాలని రజనీకాంత్‌ ఆకాంక్షించారు. మద్యపానం, ధూమ పానానికి దూరంగా ఉండి మానసిక ప్రశాంతత పొందాలని రజనీకాంత్ సూచించారు. ఈ నెల 28 నుంచి కొత్త సినిమా షూటింగ్‌లో పాల్గొంటానని చెప్పారు. అనంతరం ఆయన నాలుగు జిల్లాలకు చెందిన అభిమానులతో ఆయన ఫొటోలు దిగారు.

09:53 - May 7, 2017

చెన్నై : తమిళనాడులో అమ్మ జయలలిత మరణం తర్వాత రాష్ట్ర రాజకీయాలు రోజుకో మలుపు తిరుగుతున్నాయి. ఇప్పటికే అన్నాడీఎంకే రెండు వర్గాలుగా చీలిపోయి..రాష్ట్ర రాజకీయాల్ని మరింత రసకందాయంలో పడేశాయి. మరోవైపు శశికళ జైలుకు వెళ్లగా..అమె శిష్యుడు పళనీస్వామి ముఖ్యమంత్రిగా పగ్గాలు చేపట్టారు. అటు పన్నీరు సెల్వం సీఎం పదవి కోల్పోయిన తర్వాత ..ప్రజాక్షేత్రంలో తన బలమెంతో నిరూపించుకునే పనిలో పడ్డారు. ఇదే అదనుగా సీఎం పళనిస్వామి కూడా పన్నీరు సెల్వానికి ధీటుగా తన బలాన్ని నిరూపించుకునేందుకు ప్రయత్నిస్తున్నారు. దీంతో ఓపీఎస్‌, ఈపీఎస్‌ల మధ్య వర్గపోరు మరింత ముదిరింది.   
అర్థాంతరంగా ముగిసిన విలీన ప్రక్రియ 
అమ్మ జయలలిత మరణానంతరం అన్నాడిఎంకే రెండు వర్గాల విలీన ప్రక్రియ అర్ధాంతరంగా ముగిసింది. దీంతో ఇరు వర్గాలు ఇప్పుడు తమ బలాన్ని నిరూపించుకునే ప్రయత్నంలో పడ్డాయి. శశికళ కుటుంబం కూడా పార్టీకి దూరం కావటంతో అటు పార్టీలోనూ ఇటు ప్రభుత్వంలోని రెండు వర్గాలు ప్రజల్లో తమ బలమెంతో తెలుసుకునే ప్రయత్నంలో బహిరంగసభలను ఏర్పాటు చేస్తున్నారు. ఇందులో భాగంగానే ఒకవైపు పన్నీరుసెల్వం వర్గం, మరోవైపు ముఖ్యమంత్రి పళనిస్వామి వర్గం బహిరంగసభల్లో భారీగా ప్రజలను తరలించే ప్రయత్నంలో ఎవరికివారే అన్నవిధంగా ముందుకు సాగుతున్నారు. అమ్మ విశ్వాసపాత్రుడినంటూ, అమ్మ ఆత్మ తనతో మాట్లాడినట్లు కార్యకర్తల సానుభూతిని పొందే ప్రయత్నం చేస్తున్నారు పన్నీరు సెల్వం. దీంట్లో భాగంగానే బహిరంగసభలను నిర్వహిస్తున్నారు. ప్రజా బలంతో మళ్లీ సీఎం పదవిని దక్కించుకునేందుకు పన్నీరు సెల్వం శతవిధాలా ప్రయత్నిన్నారు. చెన్నైలోని కొట్టివాక్కంలో జరిగిన బహిరంగ సభకు సుమారు 10 లక్షల మంది కార్యకర్తలు తరలిరావటం ద్వారా రాష్ట్ర వ్యాప్త పర్యటనకు శ్రీకారం చుట్టిన పన్నీరుసెల్వం భారీ అంచనాలతో ముందుకెళ్తున్నారు. అమ్మకు నిజమైన వారసుడిని తానేనన్న భావనను కల్పించేందుకు పన్నీరు సెల్వం ప్రయత్నిస్తున్నారు. 
ప్రజా బలంతో సీఎం పదవి..? 
ఇక పన్నీరు సభలకు వచ్చే జనాన్ని చూసిన పళనిస్వామి ప్రభుత్వానికి తాము కూడా ధీటుగా జవాబు ఇవ్వాలనే ఆలోచన మొదలైంది. ఇందులో భాగంగానే ముఖ్యమంత్రి పళనిస్వామి తాజాగా మధురైలో భారీ బహిరంగసభను ఏర్పాటు చేశారు. ఈ సభకు కూడా భారీగా కార్యకర్తలు తరలిరావటంతో తమదే అసలు సిసలైన అన్నాడిఎంకె అంటూ ప్రచారం మొదలు పెట్టారు. మొత్తానికి అన్నాడిఎంకెలోని రెండు చీలిక వర్గాలు విలీన ప్రక్రియకు పుల్ స్టాప్ పెట్టి బలబలాలపై దృష్టిసారించటం తమిళ రాజకీయాల్లో సంచలనం సృష్టిస్తోంది.

 

11:38 - May 6, 2017

గుంటూరు : ఏపీ రాజకీయాల్లో మంత్రి లోకేశ్‌ సెంటర్‌ ఆఫ్‌ ఎట్రాక్షన్‌గా మారారు. రాజకీయాలన్నీ లోకేశ్‌ చుట్టూనే తిరుగుతున్నాయి. పరస్పర విమర్శలు, ఆరోపణలకు కూడా లోకేశ్‌ కేంద్ర బిందువుగా మారారు. ప్రతిపక్ష వైసీపీ నేతలు లోకేశ్‌ను టార్గెట్‌ చేస్తే, అధికార పక్షం  జగన్‌పై ముప్పేట దాడి చేస్తోంది. ఏపీ రాజకీయాలు ఇప్పుడు లోకేశ్‌ చట్టూ తిరుగుతున్నాయి. టీడీపీ జాతీయ ప్రధాన కార్యదర్శిగా ఉన్నప్పుడు లోకేశ్‌ అంత క్రియాశీలకంగా లేదన్న వాదనలు ఉన్నాయి. ఎమ్మెల్సీ అయి, మంత్రిగా బాధ్యతలు చేపట్టిన తర్వాత క్రియాశీలకంగా మారడంతో, ఏపీ రాజకీయమంతా లోకేశ్‌ చుట్టూనే నడుస్తోంది. 
జగన్ కు టీడీపీ కౌంటర్‌ 
ప్రతిపక్ష నేత జగన్‌ గుంటూరులో రైతు దీక్ష సందర్భంగా టీడీపీ ప్రభుత్వంపై విరుచుకుపడ్డారు. దీనికి టీడీపీ కౌంటర్‌ ఇచ్చింది. జగన్‌ దీక్షను ఒంగోలు గిత్త సినిమాలో ప్రకాశ్‌రాజ్‌ పాత్రను గుర్తు చేసేవిధంగా ఉందని టీడీపీ నేతలు వ్యాఖ్యానించారు.  
లోకేశ్‌ను టార్గెట్‌ చేసినా వైసీపీ నేతలు  
జగన్‌ దీక్షలో వైసీపీ నేతలు లోకేశ్‌ను టార్గెట్‌ చేశారు. లోకేశ్‌ అవినీతికి పాల్పడుతున్నారని ఆరోపించారు. లోకేశ్‌తోపాటు టీడీపీ నేతలు కూడా వైసీపీ  ఆరోపణలకు దీటైన జవాబే ఇచ్చారు.  ఆతర్వాత కూడా విమర్శల యుద్ధం ఆగలేదు. రెండు పార్టీల నేతల మధ్య లోకేశ్‌ కేంద్రంగా మాటల తూటాలు పేలూతూనే ఉన్నాయి. ఏపీలో భూకేటాయింపులు జరిపేందుకు ఏర్పాటైన మంత్రివర్గ ఉపసంఘం నుంచి రెవెన్యూ మంత్రి కేఈ కృష్ణమూర్తిని తొలగించి, నారా లోకేశ్‌కు స్థానం కల్పించారు. దీనిని ఆధారంగా చేసుకుని వైసీపీ నేతలు లోకేశ్‌ను టార్గెట్‌ చేస్తున్నారు. 
పార్థసారధి విమర్శలపై స్పందించిన టీడీపీ నేతలు 
పార్థసారధి విమర్శలపై టీడీపీ నేతలు ఘాటుగానే స్పందించారు. లోకేశ్‌ అభివృద్ధి ఏనుగుతో పోలిస్తే, జగన్‌ను అవినీతి ఏనుగుతో పోల్చారు టీడీపీ నేత వర్ల రామయ్య. లోకేశ్‌ అభివృద్ధి వైపు పరుగులు తీస్తుంటే, జగన్‌ జైలు వైపు పరుగుపెడుతున్నారని వ్యాఖ్యానించి, ఏపీలో రాజకీయ విమర్శల వేడిని మరింత పెంచారు. చంద్రబాబు, లోకేశ్‌పై వైసీపీ నేతలు, జగన్‌ పై టీడీపీ నేతలు చేస్తున్న పరస్పర విమర్శలు రానున్న రోజుల్లో మరింత పెరిగే అవకాశం ఉందని భావిస్తున్నారు. 

Pages

Don't Miss

Subscribe to RSS - రాజకీయాలు