రాహుల్ గాంధీ

21:24 - November 20, 2017

ఢిల్లీ : కాంగ్రెస్‌ ఉపాధ్యక్షుడు రాహుల్‌గాంధీకి పార్టీ అధ్యక్ష పీఠం అప్పగించేందుకు ముహూర్తం ఖరారైంది. ఎఐసిసి అధ్యక్షురాలు సోనియాగాంధీ అధ్యక్షతన ఢిల్లీలో కాంగ్రెస్‌ వర్కింగ్‌ కమిటీ సమావేశం జరిగింది. సోనియా నివాసంలో జరిగిన ఈ సమావేశంలో రాహుల్‌ను అధ్యక్షుడిగా ఎన్నుకునేందుకు కాంగ్రెస్‌ వర్కింగ్‌ కమిటీ ఏకగ్రీవంగా తీర్మానం చేసింది.అధికార బదలాయింపు కోసం పార్టీ ఎన్నికలు జరపనుంది. పార్టీ అధ్యక్ష ఎన్నికలకు సంబంధించి డిసెంబర్‌ 1న నోటిఫికేషన్‌ జారీ చేయనున్నారు. డిసెంబర్‌ 4న నామినేషన్లు స్వీకరిస్తారు. డిసెంబర్‌ 16న ఎన్నికలు నిర్వహించి.. 19న ఫలితాలు వెల్లడించనున్నారు. 

నామినేషన్ల పరిశీలన రోజే రాహుల్‌ను అధ్యక్షుడిగా
రాహుల్‌ గాంధీ ఎఐసిసి అధ్యక్ష పదవిని చేపట్టడం ఇక లాంఛనమే...రాహుల్‌ గాంధీ తప్ప ఇంకెవరూ నామినేషన్‌ వేయకపోతే.. నామినేషన్ల పరిశీలన రోజే రాహుల్‌ను అధ్యక్షుడిగా ప్రకటించే అవకాశం ఉంది. డిసెంబర్‌ 5న రాహుల్‌ ఏకగ్రీవ ఎన్నిక జరుగుతుందని పార్టీ వర్గాలు చెబుతున్నాయి. గుజరాత్‌ అసెంబ్లీ ఎన్నికలకు ముందే కొత్త అధ్యక్షుడిగా రాహుల్‌గాంధీ బాధ్యతలు చేపట్టడం దాదాపు ఖాయమైనట్లే. గత కొన్నాళ్లుగా కాంగ్రెస్‌ దిగ్గజ నేతలంతా రాహుల్‌ గాంధీకి అధ్యక్ష పదవిని అప్పగించాలని డిమాండ్‌ చేస్తున్నారు. ఈ నేపథ్యంలో రాహుల్‌గాంధీకి పోటీగా ఎవరూ నామినేషన్‌ వేసే అవకాశం కనిపించడం లేదు. 2013లో రాహుల్‌గాంధీ కాంగ్రెస్‌ ఉపాధ్యక్షుడిగా బాధ్యతలు చేపట్టారు. గుజరాత్‌, హిమాచల్‌ ఎన్నికల్లో పార్టీ విజయం కోసం రాహుల్‌ బాగా కష్టపడ్డారని మాజీ ప్రధాని మన్మోహన్‌ సింగ్‌ సైతం కితాబిచ్చారు.

13:30 - November 20, 2017
12:37 - November 20, 2017

ఢిల్లీ : సోనియా గాంధీ నివాసంలో కాంగ్రెస్ పార్టీ వర్కింగ్ కమిటీ సమావేశం ముగిసింది. గంటన్నర పాటు సమావేశం కొనసాగింది. రాహుల్ ను అధ్యక్షుడిగా చేయాలని పార్టీ తీర్మానించింది. రెండో నామినేషన్ రాకపోతే డిసెంబర్ 4న రాహుల్ ను పార్టీ అధ్యక్షుడిగా అధికారికంగా ప్రకటించనున్నారు. ఈ సమావేశానికి మన్మోహన్ సింగ్ సహా పలువురు కీలక నేతలు హాజరయ్యారు. రాహుల్.. 2004 సంవత్సరం నుంచి రాజకీయాల్లో ఉన్నారు. అమేథి నుంచి ఎంపీగా ఉన్నారు. 
అధ్యక్షుడి పదవికి రాహుల్ గాంధీని వ్యతిరేకించే వారు ఎవరూ లేరు. మరిన్ని వివరాలను వీడియోలో చూద్దాం...

 

21:23 - November 19, 2017

ఢిల్లీ : కాంగ్రెస్‌ ఉపాధ్యక్షుడు రాహుల్‌ గాంధీ ప్రమోషన్‌ కోసం ఎదురు చూస్తున్న కాంగ్రెస్‌ శ్రేణుల కల త్వరలోనే సాకారం కాబోతోంది. కొద్ది రోజుల్లోనే పార్టీ అధ్యక్షుడిగా రాహుల్‌ పగ్గాలు చేపట్టే అవకాశం ఉందని భావిస్తున్నారు. రాహుల్‌ పట్టాభిషేకానికి రంగం సిద్ధమైంది. సోమవారం ఉదయం పార్టీ విధాన నిర్ణయం మండలి కాంగ్రెస్‌ వర్కింగ్‌ కమిటీ సమావేశం కానుంది. టెన్‌ జన్‌పథ్‌లోని సోనియా నివాసంలో ఉదయం 10.30 గంటలకు CWC భేటీ కానుంది. ఈ సమావేశంలో అధ్యక్ష ఎన్నికలపై స్పష్టత వచ్చే అవకాశం ఉందని భావిస్తున్నారు. AICC అధ్యక్ష ఎన్నికల షెడ్యూలను CWC భేటీలో ఆమోదించనున్నారని పార్టీ వర్గాల్లో విస్తృతంగా ప్రచారం జరుగుతోంది. షెడ్యూలు ఆమోదించగానే కాంగ్రెస్‌ కేంద్ర ఎన్నికల విభాగం అధ్యక్ష ఎన్నికల నోటిఫికేషన్‌ జారీ చేయొచ్చని భావిస్తున్నారు. AICC అధ్యక్ష పదవికి పోటీపడే అభ్యర్థుల్లో రాహుల్‌గాంధీ ఒక్కరే ఉంటారని, దీంతో ఎన్నిక ఏకగ్రీవం అవుతుందని ప్రచారం జరుగుతోంది. ఇందుకు కాంగ్రెస్‌ అధినేత్రి, రాహుల్‌ తల్లి సోనియాగాంధీ వ్యూహ రచన చేశారని సమాచారం.

గుజరాత్‌ అసెంబ్లీ ఎన్నికల పోలింగ్‌కు ముందే
గుజరాత్‌ అసెంబ్లీ ఎన్నికల పోలింగ్‌కు ముందే రాహుల్‌గాంధీ కాంగ్రెస్‌ అధ్యక్ష పగ్గాలు చేపట్టే అవకాశం ఉంది. వచ్చే నెల 9న గుజరాత్‌ అసెంబ్లీకి మొదటి విడత పోలింగ్ జరుగుతుంది. ఆలోగానే రాహుల్‌కు అధ్యక్ష బాధ్యతలు అప్పగించేందుకు సోనియా సోనియాగాంధీ నిర్ణయించారని సమాచారం. హిమాచల్‌ప్రదేశ్‌, గుజరాత్‌ అసెంబ్లీ ఎన్నికలకు దృష్టిలో పెట్టుకుని రాహుల్‌కు పార్టీ పగ్గాలు అప్పగించేందుకు ఇంతకు ముందు సోనియాగాంధీ కొద్దిగా సంశయించారు. అయితే గుజరాత్‌లో సర్వేలు కాంగ్రెస్‌కు అనుకూలంగా ఉండటంతో ముందడుగు వేసినట్టు సమాచారం. AICC అధ్యక్షుడిగా రాహుల్‌గాంధీ బాధ్యతలు చేపట్టిన తర్వాత గుజరాత్‌ అసెంబ్లీ ఎన్నికల్లో కాంగ్రెస్‌ గెలిస్తే... ఆ ప్రభావం దేశవ్యాప్తంగా ఉంటుందని భావిస్తున్నారు. దీంతోనే అధ్యక్ష ఎన్నికకు సోనియా మొగ్గు చూపారని సమాచారం. ఈ క్రమంలోనే గతంలో వాయిదా వేసిన రాహుల్‌ పట్టాభిషేకం మహోత్సవాన్ని సోనియాగాంధీ ముందుకు తెచ్చారని కాంగ్రెస్‌లో ప్రచారం జరగుతోంది. గుజరాత్‌ అసెంబ్లీ ఎన్నికల్లో గెలిచి... దేశ వ్యాప్తంగా కాంగ్రెస్‌ శ్రేణుల్లో ఉత్సాహం నింపాలని సోనియా భావిస్తున్నారు. రాహుల్‌ పట్టాభిషిక్తుడైతే కాంగ్రెస్‌లో నవశకం ఆరంభం అవుతుందని అంచనా వేస్తున్నారు. 

15:52 - November 15, 2017

ఢిల్లీ : కాంగ్రెస్‌ ఉపాధ్యక్షుడు రాహుల్‌గాంధీని ఉద్దేశించి 'పప్పు' అని వ్యాఖ్యనించడాన్ని ఎన్నికల కమిషన్‌ తప్పు పట్టింది. ఎన్నికల ప్రచారం, ప్రకటనల్లో పప్పు అనే పదాన్ని ఉపయోగించకుండా దానిపై నిషేధం విధిస్తున్నట్లు ఈసీ పేర్కొంది. గుజరాత్‌ ఎన్నికల ప్రచారంలో భాగంగా బిజెపి... రాహుల్‌ను ఉద్దేశించి పప్పు అనే పదాన్ని ముద్రించింది. దాన్ని పరిశీలించిన ఈసీ...పప్పు అనే పదం అభ్యంతరకరంగా ఉందని... ఆ పదాన్ని తొలగించాలని సూచించింది. ఓ రాజకీయ నాయకుడిని అలా పిలవడమంటే... ఆయనను అవమానించడమేనని ఈసీ స్పష్టం చేసింది. గుజరాత్‌లో డిసెంబరు 9, 14 తేదీల్లో అసెంబ్లీ ఎన్నికలు జరగనున్నాయి. 

13:31 - November 2, 2017

యూపీ : ఉత్తరప్రదేశ్‌ రాయ్‌బరేలీలోని ఎన్టీపీసీ విద్యుత్‌ కేంద్రంలో జరిగిన బ్రాయిల్‌ పేలుడు ఘటనలో మృతుల సంఖ్య 26కు పెరిగింది. 66 మంది గాయాలయ్యాయని అధికారులు లెక్కలు తేల్చారు. క్షతగాత్రులను ఉన్నావ్‌, బలరామ్‌పూర్‌, ప్రతాప్‌గఢ్‌ ఆస్పత్రుల్లో చికిత్స అందిస్తున్నారు. గాయపడినవారిలో మరికొందరి పరిస్థితి ఆందోళనకంగా ఉంది. కాంగ్రెస్‌ ఉపాధ్యక్షుడు రాహుల్‌ గాంధీ గుజరాత్‌లో ఎన్నికల ప్రచారాన్ని వాయిదా వేసుకుని.. రాయ్‌ బరేలీలో పర్యటించారు. బాధిత కుటుంబాలను పరామర్శించారు. 

19:45 - November 1, 2017

ఢిల్లీ : కాంగ్రెస్‌ ఉపాధ్యక్షుడు రాహుల్‌ గాంధీ సైతం సోషల్‌ మీడియాలో అభిమానులను పెంచుకుంటున్నారు. మొన్న తన పెంపుడు కుక్క వీడియోను పోస్ట్‌ చేసిన రాహుల్‌ ఇవాళ.. జపనీస్‌ మార్షల్‌ ఆర్ట్స్‌ ఐకిడో ప్రాక్టీస్‌ చేస్తున్న ఫొటోలను పోస్ట్‌ చేశారు. కోచ్‌తో కలిసి ఐకిడో ప్రాక్టీస్‌ చేస్తున్న ఫోటోలను రాహుల్‌ ట్విటర్‌లో పెట్టారు. రాహుల్‌కు ఐకిడోలో బ్లాక్‌బెల్ట్‌ ఉంది. కానీ దీని గురించి పబ్లిక్‌గా ఎప్పుడూ చెప్పలేదు. ప్రస్తుతం ఈ ఫోటోలు వైరల్‌ అవుతున్నాయి. 

09:54 - October 31, 2017

హైదరాబాద్ : ఇవాళ ఢిల్లీలో రేవంత్‌రెడ్డి కాంగ్రెస్‌ తీర్థం పుచ్చుకోనున్నారు. మధ్యాహ్నం పన్నెండున్నరకు రాహుల్‌గాంధీతో రేవంత్‌రెడ్డి భేటీ అవుతున్నారు. మధ్యాహ్నం 3 గంటలకు కాంగ్రెస్ అధికార ప్రతినిధి, టోమ్ వడక్కన్, కుంతియా, కొప్పుల రాజు, మధుయాష్కి, ఉత్తమ్ కుమార్ రెడ్డిల మీడియా సమావేశం నిర్వహించనున్నారు. సాయంత్రం 4 గంటలకు ఏఐసీసీ కార్యాలయంలో రేవంత్ పార్టీ తీర్ధం పుచ్చుకోనున్నారు. రేవంత్ తో పాటు టిటిడిపి మాజీ ఎమ్మెల్యేలు,ఎమ్మెల్సీలు,టిడిపి మాజీ జిల్లా కార్యదర్శులు, కీలక నేతలు ఢిల్లీ చేరారు. మరిన్ని వివరాలను వీడియోలో చూద్దాం...

 

09:23 - October 30, 2017

హైదరాబాద్ : టి.టిడిపికి, ఎమ్మెల్యే పదవికి రాజీనామా చేసిన రేవంత్ రెడ్డి వ్యూహాత్మకంగా కదులుతున్నారు. టిడిపికి చెందిన పార్టీ కార్యకర్తలు..అనుచరులు..చేజారిపోకుండా వ్యూహాలు రచిస్తున్నారు. వారితో వరుస భేటీలు జరుపుతున్నారు. శనివారం ఉదయం కొడంగల్ లో పలు భేటీలు జరిపిన ఆయన సాయంత్రం హైదరాబాద్ కు చేరుకున్నారు. నగరంలో మరోసారి తనకు మద్దతిస్తున్న వారితో చర్చలు జరపాలని రేవంత్ నిర్ణయం తీసుకున్నారు. జలవిహార్ లో సమావేశం ఏర్పాటు చేయాలని అనుకున్నా పోలీసులు అనుమతినివ్వలేదు.

దీనితో జూబ్లీహిల్స్ లోని తన నివాసంలోనే సమావేశం ఏర్పాటు చేశారు. ‘ఆత్మయులు..మాట ముచ్చట' పేరిట ఫ్లెక్సీలు ఏర్పాటు చేశారు. స్థలం తక్కువగా ఉండడం వల్ల కీలకమైన వారిని మాత్రమే రేవంత్ పిలిచినట్లు తెలుస్తోంది. ఈ భేటీ అనంతరం రేవంత్ సాయంత్రానికి ఢిల్లీకి వెళ్లనున్నారు. అక్కడ కాంగ్రెస్ పార్టీకి చెందిన సీనియర్లతో భేటీ కానున్నారని ప్రచారం జరుగుతోంది. మంగళవారం మధ్యాహ్నం 12.30గంటలకు ఏఐసీసీ ఉపాధ్యక్షుడు రాహుల్ గాంధీ సమక్షంలో రేవంత్ కాంగ్రెస్ కండువా కప్పుకోనున్నారు. 

10:29 - October 28, 2017

మహారాష్ట్ర : రాష్ట్రంలో బిజెపి, శివసేన పార్టీల మధ్య వివాదం ముదురుతోంది. తరచూ బిజెపిపై విమర్శలు చేసే శివసేన ఈసారి ఏకంగా ప్రధాని మోదినే టార్గెట్‌ చేసింది. జిఎస్‌టి, నోట్లరద్దు నిర్ణయాలతో మోది పనైపోయిందని.... ఈ దేశానికి రాహులే దిక్కని పేర్కొంది. శివసేన వ్యాఖ్యలపై మహారాష్ట్ర సిఎం ఫడ్నవిస్‌ సీరియస్‌గా స్పందించారు. బిజెపి ప్రభుత్వంలో కొనసాగుతారా...లేదా... అన్నది తేల్చుకోవాలని శివసేనకు సవాల్‌ విసిరారు. ప్రధానమంత్రి నరేంద్ర మోదీని ఉద్దేశించి శివసేన చేసిన వ్యాఖ్యలు కలకలం రేపుతున్నాయి. వంద మంది రాహుల్‌గాంధీలు కూడా మోదీని ఏమీ చేయలేరని రెండేళ్ల క్రితం పొగడ్తలతో ముంచెత్తిన శివసేన ఇపుడు మాట మార్చింది. మోదీ ప్రతిష్ట మసకబారుతోందని... కాంగ్రెస్‌ పార్టీ ఉపాధ్యక్షుడు రాహుల్‌ గాంధీ దేశాన్ని సమర్థవంతంగా ముందుకు నడిపించేలా కనిపిస్తున్నారని శివసేన వ్యాఖ్యానించింది.

మోదీ ప్రభుత్వం అనుసరిస్తున్న ఆర్థిక విధానాలపట్ల దేశ ప్రజలు ఆగ్రహంగా ఉన్నారని శివసేన ఎంపీ సంజయ్‌ రౌత్‌.. ఒక టీవీ షోలో అన్నారు. జీఎస్టీ, పెద్ద నోట్ల రద్దు వంటి అంశాలు.. ప్రజలను ఆలోచనలో పడేశాయని ఆయన చెప్పారు. జిఎస్‌టి కారణంగా హిమాచల్‌ ప్రదేశ్‌, గుజరాత్‌ ఎన్నికల్లో బీజేపీకి చేదు అనుభవం తప్పదని సంజయ్‌ అభిప్రాయపడ్డారు. రాహుల్‌గాంధీపై సంజయ్‌రౌతే ప్రశంసలు కురిపించారు. ఆయనను పప్పు అనడం సరికాదన్నారు. ఈ దేశంలో అతిపెద్ద రాజకీయ శక్తి ప్రజలే. ఎవరినైనా పప్పును చేసే శక్తి ప్రజలకు ఉందని పరోక్షంగా బీజేపీని ఉద్దేశించి రౌత్ అన్నారు. శివసేన ఎంపీ వ్యాఖ్యలపై మహారాష్ట్ర ముఖ్యమంత్రి దేవేంద్ర ఫడ్నవిస్‌ తీవ్రంగా స్పందించారు. బిజెపి సంకీర్ణ ప్రభుత్వంలో కొనాసాగాలా...లేదా అన్నది ఉద్ధవ్‌ ఠాక్రే తేల్చుకోవాలని స్పష్టం చేశారు. తాము చేసే ప్రతి నిర్ణయాన్ని శివసేన వ్యతిరేకిస్తూనే ఉంది...కానీ ప్రతిపక్ష పార్టీగా వ్యవహరించడం సరికాదన్నారు.

మహారాష్ట్రలో బీజేపీతో కలిసి శివసేన అధికారంలో భాగస్వామిగా ఉంది. ఇటీవల శివసేన- ప్రధాని మోదిని, బిజెపిని టార్గెట్‌ చేస్తూ చురకలు అంటిస్తోంది. సంజయ్‌ రౌత్ వ్యాఖ్యల నేపథ్యంలో వివాదం మరింత ముదిరింది. ఒకవేళ సంకీర్ణ ప్రభుత్వం నుంచి శివసేన వైదొలిగితే ఫడ్నవిస్‌ ప్రభుత్వం మైనారిటీలో పడిపోతుంది. శరద్‌ పవార్‌ మద్దతుపైనే బిజెపి ప్రభుత్వ మనుగడ ఆధారపడి ఉంది.

Pages

Don't Miss

Subscribe to RSS - రాహుల్ గాంధీ