రాహుల్ గాంధీ

21:54 - September 20, 2017

ప్రిన్స్ టన్ : యుపిఏ వైఫల్యాలను కాంగ్రెస్‌ ఉపాధ్యక్షుడు రాహుల్‌ గాంధీ అంగీకరించారు. రోజుకు 30 వేల ఉద్యోగాలను సృష్టిస్తామని ఇచ్చిన హామీని నెరవేర్చలేకపోయామని రాహుల్‌ అన్నారు. ప్రస్తుత అవసరాలకు తగినవిధంగా ఉద్యోగాల సృష్టిలో ఎన్డీయే ప్రభుత్వం కూడా విఫలమవుతోందని తెలిపారు. తమ మీద ఆగ్రహం వ్యక్తం చేసినవారు ప్రస్తుత మోదీ ప్రభుత్వంపై కూడా ఆగ్రహంతో ఉన్నారని రాహుల్‌ చెప్పారు. నిరుద్యోగం భారత ఆర్థికవ్యవస్థకు పెను సవాల్‌గా మారిందన్నారు. అమెరికాలోని ప్రిన్స్‌టన్‌ యూనివర్సిటీ విద్యార్థుల నుద్దేశించి మాట్లాడుతూ మోది సర్కార్‌ను టార్గెట్‌ చేశారు. విద్య, ఆరోగ్యంపై కేంద్రం నిధులు వెచ్చించడం లేదని విమర్శించారు. మేక్‌ ఇన్‌ ఇండియాను పెద్ద పారిశ్రామికవేత్తలకే పరిమితం చేశారని... చిన్న వ్యాపారులను ప్రోత్సహించేలా చూడాలని అభిప్రాయపడ్డారు.

07:05 - September 13, 2017

నల్లగొండ : కాంగ్రెస్‌ ఎమ్మెల్యే కోమటిరెడ్డి వెంకటరెడ్డి, పార్టీ ఎమ్మెల్సీ కోమటిరెడ్డి రాజగోపాల్‌రెడ్డి వ్యవహారం తెలంగాణ టీపీసీసీలో మరోసారి హాట్‌ టాపిక్‌గా మారింది. పీసీసీ చీఫ్‌ పేరు ఎత్తితే చాలు.. తోక తొక్కిన తాసుపాములా కస్సుమంటూ లేస్తారు. కోపంతో ఊగిపోతారు. శంషాబాద్‌లో జరిగిన కాంగ్రెస్‌ కార్యకర్తల శిక్షణా తరగతుల తర్వాత మరింత రగలిపోతున్నారు. ఈ సమావేశాల్లో ఉత్తమ్‌కుమార్‌రెడ్డి తమను అవమానించారన్న భావంతో ఉన్న కోమటిరెడ్డి సోదరులు... టీపీసీసీ చీఫ్‌ను టార్గెట్‌ చేశారు. ఇరువర్గాల మధ్య ఎప్పటి నుంచే కొనసాగుతున్న అంతర్యుద్ధం ఇప్పుడు ప్రచ్ఛన్న యుద్ధంగా మారింది.

గాంధీభవన్‌ గడప తొక్కనని శపథం
టీపీసీసీ అధ్యక్షుడిగా ఉత్తమ్‌కుమార్‌రెడ్డి ఉన్నంత కాలం గాంధీభవన్‌ గడప తొక్కనని శపథం చేసిన కోమటిరెడ్డి వెంకటరెడ్డి అవకాశం దొరికనప్పుడట్టా పార్టీ రాష్ట్ర అధ్యక్షుణ్ని టార్గెట్‌ చేస్తున్నారు. చాన్స్‌ వచ్చినప్పుడల్లా తన ఆక్రోషం వెళ్లగక్కుతున్నారు. పీసీసీ చీఫ్‌ పదవి కోసం పైరవీలు చేసుకుంటున్న కోమటిరెడ్డి సోదరులు... శంషాబాద్‌ సమావేశం అనుభవంతో ఇక కాంగ్రెస్‌లో ఉండలేమన్న భావనుకు వచ్చారని సమాచారం. పార్టీ శిక్షణా తరగతుల్లో అవమానించారన్న కోపంతో రగలిపోతున్న కోమటిరెడ్డి సోదరులు.. ఆ రోజు వేదికపై ఉన్న ఉత్తమ్‌కుమార్‌రెడ్డి, జానారెడ్డితోపాటు ఐఏసీసీ రాష్ట్ర వ్యవహారాల ఇన్‌చార్జ్‌ కుంతియాకు ఇంగిత జ్ఞానంలేదంటూ వ్యాఖ్యానించడం రాజకీయం పెద్ద రచ్చతోపాటు చర్చకు దారితీసింది.

టీపీసీసీ చీఫ్‌ పదవి తమకు
ఉత్తమ్‌కుమార్‌రెడ్డి తమకు కాంగ్రెస్‌లో పొగబెట్టారని బహిరంగంగా విమర్శలు చేస్తున్న కోమటిరెడ్డి సోదరులు.. టీపీసీసీ చీఫ్‌ పదవి తమకు ఇవ్వకపోతే పార్టీలో ఉండలేమని ప్రకటించారు. సెప్టెంబర్‌లో పీసీసీలో మార్పులు ఉంటాయని అనుకున్న నల్గొండ బద్రర్స్‌ ఆశలపై కుంతియా నీళ్లు చల్లారు. ఉత్తమ్‌కుమార్‌రెడ్డే కెప్టెనంటూ కుంతియా స్పష్టం చేయడంతో.... కాంగ్రెస్‌లో ఇమడలేకపోతున్నారు. శంషాబాద్‌ షాక్‌తో కోమటిరెడ్డి సోదరులకు పార్టీలో కొనసాగలేని పరిస్థితి వచ్చిందని పార్టీలో చర్చ జరుగుతోంది. ఈ విషయాలపై స్పష్టంగా ఉన్న కోమటిరెడ్డి బ్రదర్స్‌.. తమ రాజకీయ భవిష్యత్‌పై అయోమయంలో ఉన్నారని వినిపిస్తోంది.కోమటిరెడ్డి వెంకటరెడ్డి, రాజగోపాల్‌రెడ్డి భవిష్యత్‌ పయనం టీఆర్‌ఎస్‌, బీజేపీ అంటూ ప్రచారం జరుగుతోంది. అయితే వీరికి టీఆర్‌ఎస్‌ తలుపులు ఎప్పుడో మూసుకుపోయాయి. ఇక బ్రదర్స్‌ బీజేపీ గూటికి చేరతారని చర్చ జరుగుతోంది. ఈ విషయంలో కూడా కోమటిరెడ్డి సోదరుల్లో స్పష్టతలేదని వినిపిస్తోంది. కమలం పార్టీపై ప్రజల్లో ఊపు కనిపించడంలేదని భావిస్తున్నారు. నల్గొండ జిల్లాలో బీజేపీ ప్రభావం పెద్దగా లేకపోవడంతో వీరు కలవరపడుతున్నారు. కమలదళంలో చేరితే భవిష్యత్‌ ప్రశ్నార్థకంగా మారుతుందేమోన్న భయం వెంటాడుతోంది. అన్ని విషయాల్లో స్వేచ్ఛగా వ్యవహరించే తాము బీజేపీలో ఇమడలేమన్న భావంతో కోమటిరెడ్డి సోదరులతోపాటు వీరి అనుచరులు ఉన్నారు. దీంతో బీజేపీలోకి వెళ్లే విషయంలో ఎటూ తేల్చుకోలేకపోతున్నారు.

రాహుల్‌ అపాయింట్‌మెంట్‌ ఇస్తారా
మొత్తానికి పార్టీలో పట్టు పెంచిన ఉత్తమ్‌కుమార్‌రెడ్డి ధాటిని తట్టుకోలేక... కోటమిరెడ్డి సోదరులు విలవిల్లాడుతున్నారు. ఇప్పటికిప్పుడు వేరు పార్టీలోకి వెళ్లలేని పరిస్థితి. మరోవైపు వీరిపై వేటు పడకుండా ఉత్తమ్‌కుమార్‌రెడ్డి వ్యూహాత్మకంగా వ్యవహరిస్తున్నారు. ఎటూతేల్చుకోలేని పరిస్థితితుల్లో చివరి అవకాశంగా ఏఐసీసీ ఉపాధ్యక్షుడు రాహుల్‌గాంధీతో భేటీ కోసం ఎదురు చూస్తున్నారని సమాచారం. వీరికి రాహుల్‌ అపాయింట్‌మెంట్‌ ఇస్తారా ? ఇవ్వకపోతే కోమటిరెడ్డి సోదరుల దారెటు ? అన్న అంశాలు ఇప్పుడు ఆసక్తికరంగా మారింది. 

15:41 - September 6, 2017

బెంగళూరు : జర్నలిస్ట్‌ గౌరి లంకేష్‌ హత్యను కాంగ్రెస్‌ ఉపాధ్యక్షుడు రాహుల్‌ గాంధీ ఖండించారు. నిజాన్ని ఎప్పుడూ దాచి పెట్టలేరని... దోషులకు శిక్ష పడాలని అన్నారు. హిందుత్వ భావజాలమే ఈ హత్యకు కారణమని రాహుల్‌ పేర్కొన్నారు. ప్రధాని మోది దీనిపై నోరు మెదపడం లేదని తెలిపారు. అహింసాయుత దేశంలో హింసకు తావు లేదన్నారు. గౌరి అందరి హృదయాల్లో ఉన్నారని ఆమె కుటుంబ సభ్యులకు తాము అండగా ఉంటామని రాహుల్ చెప్పారు. 

07:27 - August 31, 2017

హైదరాబాద్ : తెలంగాణ కాంగ్రెస్‌ నేతల్లో పదవులు ఆశలు చిగురిస్తున్నాయి. ఇప్పటి వరకు ఉన్న పదవులకు తోడు మరికొన్ని కొత్త పదవులు నేతలను వరించనున్నాయి. ఏఐసీసీ వరకు తెలంగాణ నేతలు కొత్త పదవులు చేపట్టే అవకాశాలు కనిపిస్తున్నాయి. టీపీసీసీలో ఎలాంటి మార్పులేకుండా... అదనంగా మరికొంత మందికి పార్టీ పదవులు దక్కనున్నాయి. రాహుల్‌గాంధీ ఇందుకు గ్రీన్‌సిగ్నల్‌ ఇవ్వడంతో... కాంగ్రెస్‌ నేతల్లో కొత్త ఆశలు చిగురిస్తున్నాయి.

రాహుల్‌గాంధీకి అధ్యక్ష బాధ్యతలు
కాంగ్రెస్‌ జాతీయ అధ్యక్ష బాధ్యతలు తీసుకునేందుకు రాహుల్‌గాంధీ రెడీ అవుతున్నారు. తన టీమ్‌ ఎలా ఉండాలన్నదానిపై రాహుల్‌ ఇప్పటికే కసరత్తు పూర్తి చేసినట్టు తెలుస్తోంది. రాహుల్‌గాంధీ కాంగ్రెస్‌పార్టీ అధ్యక్ష బాధ్యతలు అక్టోబర్‌ రెండో వారంలో తీసుకునేందుకు ముహూర్తం ఖరారైనట్లు తెలుస్తోంది. దీంతో పార్టీ పునర్వ్యస్థీకరణలో తెలంగాణలో పెద్దపీట వేయాలని హైకమాండ్‌ డిసైడ్‌ అయినట్టు సమాచారం. దీనిలో భాగంగానే... కాంగ్రెస్‌ అత్యున్నత బాడీ సీడబ్ల్యూసీలో తెలంగాణ నేతలకు పదవులు దక్కే అవకాశాలు మెండుగా కనిపిస్తున్నాయి. సీడబ్ల్యూసీలో ఒకరికి... మరొకరికి ఏఐసీసీ జనరల్‌ సెక్రెటరీ పదవులు దక్కనున్నాయి. ఇద్దరిని కార్యదర్శి పదవులు వరించనున్నాయి. మరొకరికి ఏఐసీసీ అధికార ప్రతినిధిగా అవకాశం కల్పించేందుకు అధిష్టానం సంకేతాలు పంపినట్టు తెలుస్తోంది.

సామాజికవర్గ నేతలకు ప్రాధాన్యత
రాబోయే ఎన్నికలను దృష్టిలో ఉంచుకుని.. అన్ని సామాజికవర్గ నేతలకు ప్రాధాన్యత కల్పించేలా కూర్పు చేసినట్టు సమాచారం. సీడబ్ల్యూసీలో మాజీ కేంద్రమంత్రి జైపాల్‌రెడ్డికి అవకాశం కల్పించనున్నట్టు తెలుస్తోంది. జనరల్‌ సెక్రెటరీ పదవి కోసం చాలామంది నేతలు క్యూలో ఉన్నా... పీసీసీ మాజీ చీఫ్‌ పొన్నాల లక్ష్మయ్యకు అవకాశం దక్కినట్టు సమాచారం. ఇక పార్టీకి దూరంగా ఉంటున్న మాజీ ఎంపీ విజయశాంతిని యాక్టివ్‌ చేసేందుకు అధిష్టానం డిసైడ్‌ అయ్యింది. ఇప్పటికే హైకమాండ్‌ ఆమెతో మాట్లాడినట్టు తెలుస్తోంది. ఇద్దరు ఏఐసీసీ సెక్రెటరీలలో విజయశాంతికి అవకాశం కల్పించనున్నట్టు సమాచారం. మాజీ కేంద్రమంత్రి బలరాంనాయక్‌ కూడా అవకాశం దక్కుతుందని పార్టీ వర్గాలు చెబుతున్నాయి. ఇక ప్రస్తుతం పీసీసీ అధికార ప్రతినిధిగా ఉన్న దాసోజు శ్రవణ్‌కు ప్రమోషన్‌ ఇవ్వాలని నిర్ణయించిన అధిష్టానం... ఆయనను ఏఐసీసీ అధికార ప్రతినిధిగా ఢిల్లీకి పంపనుంది.

పదవులకు రాహుల్ గ్రీన్‌సిగ్నల్‌
ఏఐసీసీ పదవులతోపాటు రాష్ట్ర కాంగ్రెస్‌లో కొత్త పదవులకు రాహుల్ గ్రీన్‌సిగ్నల్‌ ఇచ్చినట్టు తెలుస్తోంది. ప్రస్తుతం పీసీసీ సారథ్య బాధ్యతలు మోస్తున్న ఉత్తమ్‌కుమార్‌రెడ్డి, భట్టి విక్రమార్కలకు అదనంగా మరో వర్కింగ్‌ ప్రెసిడెంట్‌ను నియమించబోతున్నట్టు సమాచారం. ఈ పదవి బీసీకి ఇవ్వాలని డిసైడ్‌ అయిన రాహుల్‌... మాజీ ఎంపీ పొన్నం ప్రభాకర్‌ పేరును ఇందుకు పరిశీలిస్తున్నట్టు తెలుస్తోంది. తెలంగాణ పార్టీ ప్రచార కమిటీ చైర్మన్‌గా మాజీ ఉపముఖ్యమంత్రి దామోదర రాజనర్సింహ పేరును ఖరారు చేశారు. మైనార్టీలకు దగ్గర కావాలని భావిస్తున్న కాంగ్రెస్‌.. మాజీ క్రికెటర్‌ అజహరుద్దీన్‌ను పార్టీ కార్యక్రమాల్లో బిజీ చేయాలని డిసైడ్‌ అయ్యారు. మొత్తానికి 2019లో అధికారమే లక్ష్యంగా టీపీసీసీ పనిచేసేందుకు రాహుల్‌ సిద్ధం చేస్తున్నారు. సమర్థులైన నాయకులకు పార్టీ పదవులిచ్చి ఖుషీ చేయాలని చూస్తున్నారు.

 

21:55 - August 16, 2017

బెంగళూరు : తమిళనాడులో అమ్మ క్యాంటీన్ల తరహా కర్ణాటకలో పేదల ఆకలి తీర్చేందుకు కాంగ్రెస్‌ ప్రభుత్వం ఇందిర క్యాంటీన్‌లను ప్రారంభించింది. అతి తక్కువ ధరకే కార్మికులు, పేదలకు టిఫిన్‌, భోజనం అందజేయనుంది. కాంగ్రెస్‌ ఉపాధ్యక్షుడు రాహుల్‌గాంధీ బెంగళూరులో ఇందిరా క్యాంటీన్లను ప్రారంభించారు. భారత స్వాతంత్ర్య దినోత్సవం సందర్భంగా ఇందిరా క్యాంటీన్లను ప్రారంభిస్తున్నట్లు కర్ణాటక ముఖ్యమంత్రి సిద్ధరామయ్య మంగళవారం ప్రకటించారు. తొలిదశలో బెంగళూరులో101 క్యాంటీన్లను ప్రారంభించారు. ఈ క్యాంటీన్లలో ఉదయం ఐదు రూపాయలకు టిఫిన్... మధ్యాహ్నం, రాత్రి వేళలో 10 రూపాయలకు భోజనం అందజేస్తారు. బెంగళూరులో క్యాంటీన్ల పనితీరుపై అధ్యయనం చేసి ఆ తర్వాత రాష్ట్రవ్యాప్తంగా పట్టణాల్లో వీటిని ప్రారంభించనున్నట్లు ప్రభుత్వం పేర్కొంది.

 

19:40 - August 5, 2017

ఢిల్లీ : గుజరాత్‌ పర్యటనలో రాళ్ల దాడుల వెనక బిజెపి హస్తం ఉందని కాంగ్రెస్‌ ఉపాధ్యక్షుడు రాహుల్‌ గాంధీ ఆరోపించారు. ఆర్‌ఎస్‌ఎస్‌, బిజెపి కార్యకర్తలే తన కారుపై దాడి చేశారని స్పష్టం చేశారు. దాడులు చేయడం మోది, ఆర్‌ఎస్‌ఎస్‌ల నైజమని పేర్కొన్నారు. దాడులకు పాల్పడ్డవారే దాడిని ఎలా ఖండిస్తారని ప్రధాని నరేంద్ర మోది నుద్దేశించి రాహుల్‌ అన్నారు. తన కారుపై ఓ కార్యకర్త పెద్ద రాయి విసిరాగా అది తన గార్డుకు తగిలిందన్నారు. 

 

12:41 - August 5, 2017

హైదరాబాద్‌ :నగరంలోని బీజేపీ కార్యాలయం వద్ద ఉద్రిక్తత ఏర్పడింది.. బీజేపీ కార్యాలయం ముట్టడికి యూత్‌ కాంగ్రెస్‌ నేతలు ప్రయత్నించారు.. నిన్న గుజరాత్‌లో రాహుల్‌ గాంధీపై రాళ్లదాడికి నిరసనగా ఆందోళన చేపట్టారు.. కార్యాలయంలోకి చొచ్చుకువెళ్లేందుకు ప్రయత్నించారు.. వీరిని పోలీసులు అడ్డుకున్నారు... కేంద్ర ప్రభుత్వ దిష్టిబొమ్మను దగ్ధం చేసిన కాంగ్రెస్‌ నేతలు బీజేపీకి వ్యతిరేకంగా నినాదాలు చేశారు..

06:45 - August 5, 2017

ఢిల్లీ : కాంగ్రెస్ యువనేత రాహుల్‌గాంధీ బీసీ కార్డ్‌కు ప‌దును పెడుతున్నారా..? రాహుల్‌ అమల్లో పెట్టనున్న బీసీఫార్ములా ఏంటీ..? 2019 ఎన్నికలే టార్గెట్ గా ఇప్పటి నుంచే బీసీల కు మ‌రింత దగ్గరయ్యేందుకు స్కెచ్ వేస్తున్నారా..? కాంగ్రెస్‌ నేతల నుంచి అవుననే సమాధానం వస్తోంది.

2019 ఎన్నికలే టార్గెట్‌గా కాంగ్రెస్‌ వ్యూహాలు

గత ఎన్నికల్లో ప్రతిపక్షాలకే ప‌రిమితం అయిన‌ కాంగ్రెస్ పార్టీ 2019కి ప‌క్కాగా పావులు కదుపుతోంది. అధికారంలోకి రావ‌డ‌మే ల‌క్ష్యంగా వ్యూహాలు రూపొందిస్తోంది. గ‌త ఎన్నిక‌ల్లో ఎక్క‌డ న‌ష్టం జ‌రిగిందో గుర్తించిన కాంగ్రెస్ పార్టీ .. మ‌ళ్లీ ఆ పొర‌పాటు జ‌ర‌గ‌కుండా.. జాగ్రత్తలు తీసుకుంటోంది. ప్రస్తుతం దీనిపైనే దృష్టిపెట్టారు కాంగ్రెస్ యువ‌నేత రాహుల్ గాంధీ.

మోదీని బీసీ నేతగా జరిగిన ప్రచారంతో దెబ్బతిన్న కాంగ్రెస్‌..!

గ‌త ఎన్నిక‌ల్లో మోదీని బీసీ నేత‌గా బీజేపీ ప్రచారం చేయ‌డం కూడా తమకు వ్యతిరేక ఫలితాన్నిచ్చిందని కాంగ్రెస్ పార్టీ భావిస్తోంది. దీనికి తోడు ఆయా రాష్ట్రాల‌లో రాష్ట్ర నాయ‌క‌త్వాల తీరుతో బీసీలు దూర‌మ‌య్యార‌ని గుర్తించిన కాంగ్రెస్ పెద్దలు... వీట‌న్నిటిని స‌రిదిద్దుకోవాల్సిందేనని డిసైడ్ అయ్యారు. దీని కోసం ఇపుడు రాహుల్ గాంధీ రంగంలోకి దిగారు. పార్టీ అధ్యక్ష బాధ్యతలు తీసుకోడానికి ఓవైపు స‌మాయ‌త్తం అవుతూనే... 2019 నాటికి హ‌స్తానికి బీసీల‌ను దగ్గర చేయ‌డానికి ప‌క్కా ప్లాన్‌తో ముందుకు వెళుతున్నారు. దీనిలో భాగంగా దేశ‌వ్యాప్తంగా అన్నీ రాష్ట్రాల‌లోని పార్టీ బీసీ నేత‌ల‌తో ప్రత్యేకంగా స‌మావేశమ‌వుతున్నారు.

పంజాబ్, హ‌ర్యాణా, గుజ‌రాత్ బీసీ నేతలో రాహుల్‌ భేటీ

బీసీ వ్యూహంలో భాగంగా వరుసగా పంజాబ్, హ‌ర్యానా, గుజ‌రాత్ లకు చెందిన బీసీ నేత‌ల‌తో రాహుల్‌ భేటీ అయ్యారు. 2019 సార్వత్రిక ఎన్నికల సమరానికి అమల్లో పెట్టాల్సిన బిసి మంత్రాగాన్ని ఉప‌దేశించారని కాంగ్రెస్‌నేతలు చెబుతున్నారు.

తెలంగాణపై రాహుల్‌ ప్రత్యేక దృష్టి

ఇటు తెలంగాణలో పార్టీ పరిస్థితిపై రాహుల్‌ ప్రత్యేక దృష్టిపెడుతున్నారు. గత ఎన్నికల్లో రాష్ట్రంలో అధికారంలోకి రాక‌పోవ‌డానికి పార్టీకి బీసీలు దూరం కావడం కూడా ఓ ప్రధానకార‌ణ‌మ‌ని రాహుల్‌ భావిస్తున్నట్టు తెలుస్తోంది. దేశ‌వ్యాప్తంగా ప్రయోగిస్తున్న బీసీ కార్డ్ తెలంగాణలో మ‌రింతగా కలిసి వస్తుందని కాంగ్రెస్‌ పెద్దలు నమ్ముతున్నట్టు సమాచారం. ఈ వ్యూహంలో భాగంగానే శ‌నివారం తెలంగాణకు చెందిన పార్టీ బీసీ నేత‌ల‌తో రాహుల్ భేటీ అవుతున్నారు. 2019 ఎన్నిక‌ల్లో బీసీల‌కు మ‌రింత దగ్గరయ్యేందుకు.. ఏలాంటి పథకాలు ప్రకటించాలన్న నేత‌ల నుంచి స‌ల‌హాలు, సూచ‌న‌లు తీసుకుంటారని టీ కాంగ్రెస్‌ నేతలు చెబుతున్నారు. ఈ స‌మావేశంలో తెలంగాణతో పాటు ఏపీ, తమిళనాడుకు చెందిన కాంగ్రెస్‌పార్టీ బీసీ నేతలతో రాహుల్‌ చర్చలు జరపనున్నారు.

రాహుల్‌ బీసీ మంత్రాంగం కాంగ్రెస్‌కు కలిసి వచ్చేనా..!

మొత్తానికి రాహుల్ గాంధీ.. పార్టీ సార‌థ్య బాధ్యతలను భుజానికి ఎత్తుకోవ‌డానికి సిద్ధమవుతూనే.. 2019లో విక్టరీ కొట్టేందుకు ఇప్పడి నుండే పార్టీ ప్రణాళికలకు ప‌దును పెడుతున్నారు. మ‌రీ రాహుల్ ప్రయోగిస్తున్న బీసీ మంత్రం.. ఏమేర‌కు పార్టీని అధికారంలోకి తెస్తుందో వేచి చూడాలి అంటున్నారు రాజకీయవ విశ్లేషకులు.

20:29 - August 4, 2017

గుజరాత్‌ : కాంగ్రెస్ పార్టీ ఉపాధ్యక్షుడు రాహుల్ గాంధీ కారుపై దాడి జరిగింది.  బనాస్‌కాంతా జిల్లాలో వరద ప్రభావిత ప్రాంతాల్లో పర్యటిస్తుండగా ఈ ఘటన చోటు చేసుకుంది. స్థానికులనుద్దేశించి రాహుల్‌ మాట్లాడుతుండగా రాహుల్‌ కాన్వాయ్‌పై కొందరు రాళ్లతో దాడి చేశారు. ఈ దాడిలో కారు కిటికి అద్దాలు ధ్వంసమయ్యాయి. రాహుల్‌ సెక్యూరిటి సిబ్బందికి గాయాలయ్యాయి.  మరికొందరు రాహుల్‌ పర్యటనను నిరసిస్తూ నల్ల జెండాలు ప్రదర్శించారు. తన పర్యటన చూసి ఓర్వలేక రాళ్ల దాడి చేశారని వీటికి తాను భయపడనని రాహుల్‌ అన్నారు. బీజేపీ పార్టీకి చెందిన గూండాలు రాహుల్ కారును ధ్వంసం చేసిన‌ట్లు కాంగ్రెస్ ఆరోపిస్తోంది. ఈ ఘటనను అవ‌మాన‌క‌ర‌మైన దాడిగా కాంగ్రెస్ పార్టీ ప్రతినిధి సుర్జేవాలా ట్విట్టర్‌లో పేర్కొన్నారు.

 

17:23 - June 18, 2017

హైదరాబాద్ : తెలంగాణ రాష్ట్ర ఆవిర్భావం తర్వాత..సంగారెడ్డిలో నిర్వహించిన తెలంగాణ ప్రజా గ‌ర్జన కాంగ్రెస్‌లో కొత్త జోష్‌ను తీసుకొచ్చింది. స‌భ‌ ఊహించిన విధంగా సూప‌ర్ స‌క్సెస్ చేయ‌డంతో..ఖుషీగా ఉన్న టీ-కాంగ్రెస్.. ఇదే స్పీడ్‌ను కొన‌సాగించాల‌ని డిసైడ్ అయ్యింది. దీనికోసం ప్రత్యేక కార్యాచ‌ర‌ణ‌ను సిద్దం చేసింది హ‌స్తం పార్టీ. గాంధీభ‌వ‌న్లో పీసీసీ చీఫ్ ఉత్తమ్ కుమార్ రెడ్డి అధ్యక్షతన జ‌రిగిన పార్టీ విస్తృతస్థాయి స‌మావేశంలో రాష్ట్రంలో తాజా రాజ‌కీయ ప‌రిణామాల‌పై చ‌ర్చించారు నేత‌లు. మియాపూర్ భూ కుంబ‌కోణంపై పోరాటాన్ని ఉధృతం చేయాల‌ని నిర్ణయించారు నేత‌లు. ముఖ్యంగా మొన్నటి రాహుల్ గాంధీ పాల్గొన్న సంగారెడ్డి స‌భ స‌క్సెస్ టెంపోను కొన‌సాగించాల‌ని నిర్ణయించారు. తెలంగాణ ఆవిర్భావం త‌ర్వాత తొలిసారి బ‌హిరంగ స‌భలో రాహుల్ పాల్గొన‌డంతో పార్టీ లీడ‌ర్, క్యాడ‌ర్లలో నయా జోష వ‌చ్చింద‌ని భావిస్తున్నారు . అయితే జోష్‌ను క్షేత్రస్థాయికి చేర్చాల‌ని నిర్ణయించారు నేత‌లు.

రాహుల్‌ సభతో క్యాడర్లో నయా జోష్‌..
దీనికోసం విస్థృతస్థాయి స‌మావేశంలో కాంగ్రెస్ ప‌క్కా ప్రణాళిక‌ను సిద్దం చేసింది. సంగారెడ్డి బ‌హిరంగ స‌భ‌లో రాహుల్ కేసీఆర్‌కు సంధించిన ప్రశ్నలు తెలంగాణ ప్రజ‌ల‌కు బాగా చేరాయ‌ని భావిస్తున్నారు నేత‌లు. విద్యార్థుల త్యాగాలు, ప్రజ‌ల ఆకాంక్షలకు భిన్నంగా కేసీఆర్‌ పాల‌న సాగుతుందా అంటూ రాహుల్ సంధించిన ప్రశ్నలను క్షేత్రస్థాయి వర‌కు తీసుకుపోవ‌డం ద్వారా భ‌విష్యత్‌లో పార్టీకి లాభీస్తుంద‌ని అంచనావేస్తున్నారు నేత‌లు. అంతేకాదు కేసీఆర్, మోడి మూడేళ్ళ పాల‌న వైఫల్యాలపై రాహుల్ విడుద‌ల చేసిన చార్జ్ షీట్ ప్రజ‌ల్లోకి తీసుకువెళ్ళాల‌ని నిర్ణయించారు హ‌స్తం నేత‌లు. దీనికోసం పీసీసీ..రాహుల్ సందేశ్ యాత్రకు శ్రీకారం చుట్టాల‌ని నిర్ణించారు. సంగారెడ్డిలో రాహుల్ చేసిన ప్రసంగంతో పాటు..స‌భ‌లో కేంద్ర, రాష్ట్ర ప్రభుత్వ వైప‌ల్యాల‌పై రాహుల్ విడుద‌ల చేసిన ఛార్జ్ షీట్‌ను ప్రతి జిల్లా కేంద్రాల‌లో మీటింగ్‌ల ద్వారా..ప్రజల ముందు పెట్టనున్నారు హ‌స్తం నేత‌లు. అంతేకాదు..తాము అధికారంలోకి వ‌చ్చిన త‌ర్వాత ఏమి చేయ‌బోతున్నార‌న్న దాంతో కూడిన మినీ మ్యానిఫెస్టోను కూడా ఈ రాహుల్ సందేశ్ యాత్రలో ప్రజ‌ల‌కు పంచిపెట్టనుంది కాంగ్రెస్. మొత్తానికి మియాపూర్ భూస్కాంతో ఉక్కిరిబిక్కిరి అవుతున్న గులాబి స‌ర్కార్‌ను..ఇదే అద‌నుగా డిఫెన్స్‌లోకి నెట్టాల‌ని భావిస్తుంది కాంగ్రెస్. దీనికోసం రాహుల్ సంగారెడ్డి వేదిక‌గా రాజేసిన తెలంగాణ సెంటిమెంట్‌ను వాడుకోవ‌డంతోపాటు..కేసీఆర్, మోడి వైఫల్యాల‌ను ప్రజ‌ల‌కు వివ‌రిస్తూ..సొంత క్యాడ‌ర్‌లో జోష్ పెంచుకోవాల‌ని త‌హ‌త‌హ‌లాడుతుంది హ‌స్తం పార్టీ. మ‌రి ఈ యాత్ర కాంగ్రెస్‌కు ఏమేర‌కు లాభిస్తుందో చూడాలి.

Pages

Don't Miss

Subscribe to RSS - రాహుల్ గాంధీ