రేవంత్ రెడ్డి

11:30 - December 10, 2018

హైదరాబాద్ : తెలంగాణ పోలింగ్ ప్రశాతంగా పూర్తయింది. దీంతో ఫలితాల కోసం నేతలు వేయి కళ్లతో ఎదురు చూస్తున్నారు. గెలుపుపై ఎవరికి వారే ధీమాగా వున్న క్రమంలో సీఎం పదవి ప్రమాణస్వీకారం కోసం ముహూర్తాలను కూడా ఖరారు చేసేసుకుంటున్నారు. పంచమి తిథి, బుధవారం మంచి రోజు కావటంతో ప్రమాణస్వీకారం కోసం బుధవారం డిసెంబర్ 12న ముహూర్తం పెట్టేసుకుంటున్నారు. 
ఫలితాల అనంతరం ఏం చేయాలన్న దానిపై ఇప్పటి నుంచే ప్రణాళికలు వేసేసుకుంటున్నారు.టీఆర్ఎస్ గెలిస్తే కేసీఆర్ మరోమారు సీఎం పీఠాన్ని అధిష్ఠిస్తారు. ప్రజాఫ్రంట్ గెలిస్తే కనుక కూటమిలోని ప్రధాన పార్టీ అయిన కాంగ్రెస్‌నే ముఖ్యమంత్రి పదవి వరిస్తుంది. మరి ముఖ్యమంత్రి అభ్యర్థిపై ఇప్పటివరకూ క్లారిటీ లేకపోయినా వారు కూడా బుధవారం రోజునే ప్రమాణస్వీకారం ముహూర్తం పెట్టకున్నట్లుగా రాజకీయ వర్గాల సమాచారం. 
బుధవారం పంచమి కావడమే ఇందుకు కారణం. ఆ తర్వాత మంచి రోజులు లేకపోవడంతో బుధవారమే ప్రమాణ స్వీకారం కానిచ్చేందుకు ఇరు పార్టీలు సన్నద్ధమవుతున్నాయి. కూటమి కనుక విజయం సాధిస్తే మంగళవారమే కాంగ్రెస్ శాసనసభాపక్ష సమావేశాన్ని ఏర్పాటు చేసి సీఎల్పీ నేతను ఎన్నుకుంటారు. 12న ఆ నేత ప్రమాణ స్వీకారం చేస్తారు. ఈ మేరకు కాంగ్రెస్ అధిష్ఠానం నుంచి సంకేతాలు అందినట్టు చెబుతున్నారు.  కూటమిలోని పార్టీలు గెలిచిన సీట్లను బట్టి మంత్రి పదవుల పంపకం ఉంటుందని సమాచారం.  
 

12:49 - December 7, 2018

కొడంగల్ (మహబూబ్ నగర్) : రాష్ట్ర వ్యాప్తంగా ఇప్పటి వరకూ పోలింగ్ ప్రశాంతంగా కొనసాగుతోంది. సమస్యాత్మక ప్రాంతాలపై ప్రత్యేక దృష్టి పెట్టిన ఎన్నికల సంఘం డేగకళ్లతో పర్యవేక్షిస్తోంది. అయినాసరే కొడంగల్ నియోజకవర్గంలో డిసెంబర్ 6 తేదీ రాత్రి సమయంలో ఓటర్లను ప్రలోభాలకు గురిచేసే ఘటన జరిగింది. ఓటర్లను ప్రలోభ పెట్టేందుకు మద్యం, డబ్బు పంచుతున్నారంటూ టీఆర్ఎస్,కాంగ్రెస్ కార్యకర్తల మధ్య పరస్పర ఆరోపణలు చేసుకున్నారు. దీంతో ఘర్షణ వాతావరణం చోటుచేసుకుని చిలికి చిలికి గాలివానగా మారి స్థానికంగా ఉద్రిక్తత నెలకొంది. దీంతో కొన్ని చోట్ల వాహనాల అద్దాలను సైతం ధ్వంసం చేశారు ఆందోళనకారులు.
టీఆర్ఎస్ నేతలు లాఠీలు, మద్యం సీసాలను వాహనాల్లో తరలిస్తుండగా ప్రజాకూటమి కార్యకర్తలు అడ్డుకోవడంతో ఉద్రిక్తత చోటుచేసుకుంది. కోస్గి సమీపంలోని బాహర్‌ పేట కాలనీలో టీఆర్ఎస్ అభ్యర్థి నరేందర్‌ రెడ్డి తన అనుచరులతో కలిసి నాలుగు వాహనాల్లో లాఠీలు, మద్యం ఉన్నాయంటూ కాంగ్రెస్ నాయకులు వాటిని అడ్డుకున్నారు. పెద్ద సంఖ్యలో కార్యకర్తలు, నాయకులు చేరుకోవడంతో ఉద్రిక్తత నెలకొంది. దీంతో, పోలీసులు ఆ వాహనాలను తనిఖీ చేయగా లాఠీలు బయటడ్డాయి. అన్ని వాహనాలను తనిఖీ చేయాలంటూ కాంగ్రెస్ అభ్యర్థి రేవంత్‌రెడ్డి సోదరుడు తిరుపతి రెడ్డితో పాటు, ఇతర నాయకులు పట్టుబట్టారు. రెండు గంటల పాటు ఈ ఉద్రిక్తత కొనసాగగా ఎస్పీ ఇరు వర్గాలను శాంతింప జేశారు. కర్రలు లభ్యమైన వాహనాన్ని పోలీసు స్టేషన్‌కు తరలించారు. 
 

21:42 - December 6, 2018

హైదరాబాద్: ఎన్నికల వేళ ఎలక్షన్ కమిషన్ కొరడా ఝళిపించింది. ఎన్నికల కోడ్ ఉల్లంఘించిన నాయకులు, అభ్యర్థులపై కేసులు నమోదు చేసింది. కొడంగల్ కాంగ్రెస్ అభ్యర్థి రేవంత్ రెడ్డి, టీడీపీ నేత జూపూడి ప్రభాకర్, శేరిలింగంపల్లి టీడీపీ అభ్యర్థి భవ్య ఆనంద్ ప్రసాద్, సంగారెడ్డి కాంగ్రెస్ అభ్యర్థి జగ్గారెడ్డి, మేడ్చల్ టీఆర్ఎస్ అభ్యర్థి మల్లారెడ్డి, కంటోన్మెంట్ కాంగ్రెస్ అభ్యర్థి సర్వే సత్యనారాయణలపై సెక్షన్ 171(ఈ) కింద కేసులు నమోదు చేశారు. నామినేషన్ల ప్రక్రియ మొదలు ఇప్పటివరకు 7వేల 852 కేసులు నమోదు చేసినట్టు ఈసీ తెలిపింది. ఇక పోలింగ్‌కు అన్ని ఏర్పాట్లు పూర్తి చేసింది. కట్టుదిట్టమైన చర్యలు తీసుకుంది. ప్రతి ఒక్కరు ఓటు హక్కు వినియోగించుకోవాలని ఈసీ పిలుపునిచ్చింది.

 

09:21 - December 6, 2018

హైదరాబాద్ : తెలంగాణ ఎన్నికల విషయంలో చీఫ్ ఎలక్షన్ కమిషనర్ రజత్ కుమార్ తీవ్రంగా  మనస్తాపం చెందారు. గత నాలుగు నెలల నుండి తాను పడిన కష్టమంతా బూడిదలో పోసిన పన్నీరు చదంగా అయిపోయిందని రజత్ వాపోయారు. తెలంగాణ అసెంబ్లీని రద్దు చేసిన క్షణం నుంచి, ఎన్నికలు నిర్వణలో భాగంగా తాను అహర్నిశలు చేసిన కృషి..రేవంత్ రెడ్డి అరెస్ట్ ను కేంద్ర ఎన్నికల సంఘం తీవ్రంగా తప్పుబట్టడం, రాష్ట్ర అత్యున్నత న్యాయస్థానం అయిన హైకోర్టు కూడా తీవ్రంగా  మందలించడంతో రజత్ కుమార్ మనస్తాపం చెందారు. 
ఈ ఘటన రజత్ తీవ్ర ఆగ్రహాన్ని సైతం తెప్పించిందని..ఆయన దగ్గరకు వెళ్లి మాట్లాడేందుకు కూడా భయపడుతున్నట్లుగా తెలుస్తోంది. కాగా రాత్రికి రాత్రే రేవంత్ రెడ్డిపై తనిఖీలు..అనంతరం కేసీఆర్ కోస్గి సభను అడ్డుకుంటామని చేసిన వ్యాఖ్యలకు ఎన్నికల సంఘం ఆదేశాల మేరకు పోలీసులు రేవంత్ ను అర్థరాత్రి పూట అరెస్ట్ చేయటం..అనంతరం విడిచిపెట్టటం వంటి పలు నాటకీయ పరిణామాలపై హైకోర్టు అటు ఎన్నికల సంఘాన్ని..ఇటు పోలీస్ శాఖపై ఆగ్రహం వ్యక్తంచేసింది. దీంతో కేసీఆర్ అసెంబ్లీని రద్దు చేసిన దగ్గర నుండి గత రెండు రోజుల వరకూ తాను పడిన కష్టం అంతా నేలపాలు అయ్యిందనీ..ఆఖరికి ధర్మాసనంతో కూడా చీవాట్లు పడాల్సి వచ్చిందని రజత్ కుమార్ తీవ్రంగా మనస్తాపం చెందారు.

కేసీఆర్‌ బహిరంగ సభను వ్యతిరేకించిన రేవంత్, బంద్ కు పిలుపునివ్వగా, శాంతిభద్రతల సమస్య తలెత్తకుండా 'అవసరమైన చర్యలు' తీసుకోవాలని మాత్రమే తాను ఆదేశిస్తే, ముందు జాగ్రత్త చర్యగా అరెస్టు చేయాలని ఎస్పీ అన్నపూర్ణ నిర్ణయం తీసుకున్నారని, దీంతో తనపై అపవాదులు వచ్చాయని ఆయన తన సన్నిహితుల వద్ద రజత్ కుమార్ వాపోయినట్లుగా తెలుస్తోంది. పైగా రేవంత్ ను అరెస్ట్ చేసి తీసుకెళ్లకుండా..గృహ నిర్బంధంలో ఉంచితే ఇంత వివాదం వచ్చుండేది కాదని ఆయన అభిప్రాయపడ్డారు. ఈ మొత్తం వ్యవహారంతో తీవ్ర అసంతృప్తికి లోనైన రజత్ కుమార్, గత రెండ్రోజులుగా విలేకరులను సైతం కలిసేందుకు ఇష్టపడకపోవడం గమనించాల్సిన విషయం. 
 

11:33 - December 5, 2018

హైదరాబాద్ : తెలంగాణలో ఎన్నికలు పార్టీల్లోనే కాదు ప్రజల్లో కూడా వేడిపుట్టిస్తున్నాయి. ఈ నేపథ్యంలో ఆయా పార్టీల అభ్యర్థులు ఎటువంటివారు? వారిపై వున్న కేసుల వివరాలపై ఓ నివేదిక విడుదల అయ్యింది. ఆ వివరాలు చూద్దాం..
181 మందిపై క్రిమినల్ కేసులు..
తెలంగాణ శాసనసభకు పోటీలో ఉన్న ప్రధాన పార్టీల అభ్యర్థుల్లో 181 మందిపై క్రిమినల్ కేసులు నమోదై ఉన్నాయని ‘తెలంగాణ ఎలక్షన్ వాచ్’ అనే సంస్థ ప్రకటించింది. టీఆర్‌ఎస్, మహాకూటమి, బీజేపీ, ఎంఐఎం తదితర పార్టీల తరఫున 365 మంది పోటీ చేస్తుండగా, వీరిలో 181 మంది క్రిమినల్ కేసుల్లో వున్నారని  ప్రకటించారు. ఫోరం ఫర్ గుడ్ గవర్నెన్స్‌తో సహా మొత్తం 30 స్వచ్ఛందసేవా సంస్థలు కలిసి ‘తెలంగాణ ఎలక్షన్ వాచ్’ అనే ప్రత్యేక స్వచ్ఛంద సేవా  ఓ నివేదికను విడుదల చేసింది.అనే విషయంపై తెలంగాణ ఎన్నికల కోసం అసోసియేషన్ ఫర్ డెమోక్రాటిక్ రిఫార్మ్స్ (ఎడిఆర్) డిసెంబర్ 3వ తేదీన ఒక నివేదికను విడుదల చేసింది. 
పార్టీలు, అభ్యర్థులు, కేసులు వివరాలు..
టీఆర్‌ఎస్ తరఫున 119 మంది అభ్యర్థులు పోటీలో ఉండగా వీరిలో 57 మందిపై క్రిమినల్ కేసులు నమోదై ఉన్నాయని..అలాగే మహాకూటమి తరఫున 119 మంది పోటీ చేస్తుండగా వీరిలో 77 మందిపై కేసులు నమోదై ఉన్నాయని, బీజేపీ తరఫున 119 మంది పోటీలో ఉండగా, 40 మందిపై కేసులు ఉన్నాయని, ఎంఐఎం తరఫున 8 మంది రంగంలో ఉండగా ఏడుగురిపై కేసులు నమోదై ఉన్నాయని వివరించారు. 
కేసులున్న అభ్యర్థులు వీరే..
ఆపద్ధర్మ ముఖ్యమంత్రి కేసీఆర్‌తో పాటు కేసీఆర్ కొడుకైన ఆపద్ధర్మ మంత్రి కేటీఆర్, మంత్రులు టి. హరీష్‌రావు, జోగురామన్న, పోచారం శ్రీనివాస్‌రెడ్డి, ఈటెల రాజేందర్, తలసాని శ్రీనివాసయాదవ్, స్పీకర్ మధుసూదనాచారితో పాటు పలువురు తాజా మాజీ ఎమ్మెల్యేలపై కేసులు నమోదై ఉన్నాయని వివరించారు. అలాగే మహాకూటమిలో భాగంగా ఉన్న టీపీసీసీ అధ్యక్షుడు ఉత్తం కుమార్‌రెడ్డి, మాజీ ఎంపీ పొన్నం ప్రభాకర్, మాజీ మంత్రులు దామోదర రాజనర్సింహ, వి. సునీత, జే. గీతారెడ్డి, నాగం జనార్దన్‌రెడ్డి, పి. సబితా ఇంద్రారెడ్డి, టీపీసీసీ వర్కింగ్ ప్రెసిడెంట్ కే. రేవంత్‌రెడ్డి తదితరులు కేసులు నమోదైన వారిలో ఉన్నారు. బీజేపీ తరఫున పోటీలో ఉన్న ఈ పార్టీ రాష్ట్ర అధ్యక్షుడు కే. లక్ష్మణ్, మాజీ ఎమ్మెల్యేలు, ఎమ్మెల్సీలు కూడా ఉన్నారు. ఎంఐఎం తరఫున పోటీలో ఉన్న అక్బరుద్ధీన్ ఒవైసీతో సహా ఏడుగురు అభ్యర్థులపై క్రిమినల్ కేసులు నమోదై ఉన్నాయని వెల్లడించారు.
పార్టీలు..క్రిమినల్ అభియోగాల అభ్యర్థులు..
టిఆర్ఎస్ అభ్యర్థులలో 44 మంది, కాంగ్రెస్ నుంచి 45 మంది, బిజెపికి చెందిన 26 మంది అభ్యర్థులతో సహా ఇతర పార్టీలకు చెందిన మొత్తం 181 మందిపై తీవ్రమైన క్రిమినల్ కేసులు నమోదయ్యాయినట్లుగా ఈ సంస్థ తెలిపింది. ఏడీఆర్ నివేదిక విశ్లేషించబడిన  1,777 మంది అభ్యర్థులలో, 368 మంది అభ్యర్థులు క్రిమినల్ కేసులను వున్నారు. వీరిలో 231 మంది అభ్యర్థులు తీవ్రంగా నేరారోపణలు ఎదుర్కొంటున్నారు.
పూర్తి వివరాలు తెలపని అభ్యర్థులు..
799 మంది అభ్యర్థులు వారి విద్యా అర్హతను ప్రకటించగా.. ఐదుగురు అభ్యర్థులు మాత్రం పూర్తి వివరాలను తెలపలేదు. మిగిలినవారు గ్రాడ్యుయేట్ లేదా పైన విద్యా అర్హతను కలిగి ఉన్నారని ప్రకటించింది. 
తీవ్రమైన క్రిమినల్ కేసులు..ఆయా పార్టీల అభ్యర్థులు..
తీవ్రమైన క్రిమినల్ కేసులు అంటే 5 సంవత్సరాల కంటే ఎక్కువ శిక్ష వుండటం, ఉదాహరణకు దాడి, హత్య, కిడ్నాప్, కేసులు అత్యాచారం, అవినీతి నిరోధక చట్టం కింద వంటి కేసులున్నట్లుగా తెలుస్తోంది.  వారిలో ఆరు మంది అభ్యర్థులు హత్య కేసులు వుండగా..24 మందిపై హత్యాయత్నాల కేసులున్నాయి.
కేసులున్న అభ్యర్థులు వీరే..
ఎస్సీ వర్గానికి చెందిన  స్వతంత్ర అభ్యర్థి బొమతి విక్రమ్, వరంగల్ వెస్ట్, బహదూర్పురా నుండి కాంగ్రెస్ పార్టీకి చెందిన  షిక్ మొహద్ కలీముద్దీన్, టీఆర్ఎస్ కు చెందిన వేములా వీరేశం, టీడీపీకి చెందిన మహబూబ్ నగర్ స్వతంత్ర అభ్యర్థి మెరుగు శ్రీనివాస్, చంద్ర షీకర్, జంగాన్ లపై కేసులున్నట్లుగా నివేదిక లో వెల్లడయ్యింది. అలాగే టిఆర్ఎస్ నాయకుడైన తన్నేరు హరీష్ రావుపై  ఐపిసి సెక్షన్ 354 కింద కేసు వుండగా.. కాంగ్రెస్ నేత అనుముల రేవంత్ రెడ్డిపై కూడా పలు అభియోగాల కేసులున్నట్లుగా తెలుస్తోంది.  
ఇక అభ్యర్థుల ఆస్తుల వివరాలు..
టీఆర్ఎస్ అభ్యర్థి అమీర్ మెహ్మద్..
టిఆర్ఎస్ టిక్కెట్  బోధన్ నుంచి పోటీ చేస్తున్న షాకిల్ అమీర్ మొహమ్మద్ సంపద 1311 శాతం పెరిగి రూ .1,34,08,582 నుండి 18,91,55,539 కు చేరినట్లుగా నివేదికలో వెల్లడయ్యింది.
గువ్వల బాలరాజు: 
ఎస్సీ వర్గానికి చెందిన టిఆర్ఎస్ అభ్యర్థి  ఆస్తుల విలువ 1336% పెరిగి రూ .48,51,000 నుంచి రూ .6,96,74,000 కు పెరిగింది.
దాస్యం వినయ్ భాస్కర్:
టిఆర్ఎస్ అభ్యర్థి వరంగల్ వెస్ట్ నుండి పోటీ పడుతున్న దాస్యం వినయ్ భాస్కర్ ఆస్తుల విలువ  1671% పెరిగి రూ .31,69,198 నుండి 5,61,23,057 కు పెరిగింది.
రాజా సింగ్: 
గోషమహాల్ నుంచి పోటీ చేస్తున్న బీజేపీ అభ్యర్థి  రాజాసింగ్ తన పదవీకాలంలో 3376 శాతం ఆస్తులుండగా..రూ. 9,52,738 నుంచి 3,31,17,897 కు పెరిగింది.
గాదరి కిషోర్ కుమార్: 
ఎస్సీ వర్గానికి చెందిన గాదరి కిషోర్ కుమార్ తంగతుర్తి  నుండి తెలంగాణ అభ్యర్థిగా పోటీ చేస్తున్నారు.  తెలంగాణ ఉద్యమంలో ప్రముఖ నాయకుడు కిషోర్ ఆదాయం గత నాలుగున్నర సంవత్సరాల్లో 5718 శాతం పెరిగింది. అతని ఆదాయం ప్రస్తుతం  రూ .1,82,328 నుండి 1,06,08,445 గా వున్నట్లు గా ఏడీఆర్ నివేదిక వెల్లడించింది. 
 

 

10:25 - December 4, 2018

హైదరాబాద్ : కాంగ్రెస్ ఫైర్ బ్రాండ్ రేవంత్ రెడ్డి మరోసారి అరెస్ట్ అయ్యారు. డిసెంబర్ 3వ తేదీ తెలంగాణ కాంగ్రెస్ వర్కింగ్ ప్రెసిడెంట్ రేవంత్ రెడ్డిని ఈ తెల్లవారుజామున బలవంతంగా అరెస్ట్ చేయడం కొడంగల్ ప్రాంతంలో తీవ్ర కలకలం రేపింది. ఏసీబీ దాడులు సమయంలోను..గతంలో నోటుకు నోటు కేసులోను  రేవంత్ అరెస్ట్ కాగా ఇప్పుడు తాజాగా కేసీఆర్ సభను అడ్డుకుంటామనీ..నేడు కోస్గిలో ఆపద్ధర్మ సీఎం కేసీఆర్ సభను అడ్డుకుంటామని, సభను జరగనివ్వబోమని రేవంత్ రెడ్డి హెచ్చరించిన నేపథ్యంలో, ఎన్నికల కమిషన్ ఆదేశాల మేరకు ఆయన్ను అరెస్ట్ చేయాల్సి వచ్చిందని పోలీసు అధికారులు స్పష్టం చేశారు. కోస్గిలో కేసీఆర్ సభను  పోలీసులు భారీ ఎత్తున బందోబస్తును ఏర్పాటు చేశారు. ఈ నేపథ్యంలో రేవంత్ రెడ్డి చేసిన వ్యాఖ్యల నేపథ్యంలో రేవంత్ తో పాటు ఆయన సోదరుడు కొండల్ రెడ్డిని, ఇతర ప్రధాన అనుచరులను ఎన్నికల కమిషన్ ఆదేశాల మేరకు  అరెస్ట్ చేశామని పోలీసులు తెలిపారు. నియోజకవర్గంలో ఎటువంటి అవాంఛనీయ ఘటనలు జరుగకుండా చూసేందుకే ఆయన్ను అరెస్ట్ చేయాల్సి వచ్చిందని పోలీసులు వివరణ ఇచ్చారు. 
 

07:37 - December 3, 2018

హైదరాబాద్: ఎన్నికలు సమీపిస్తున్న కొద్దీ కొడంగల్‌లో పరిస్థితి ఉద్రిక్తంగా మారుతోంది. డిసెంబర్ 4న జరగబోయే కేసీఆర్‌ సభను అడ్డుకుంటానని ప్రకటించిన రేవంత్‌రెడ్డిపై ఈసీ సీరియస్‌ అయ్యింది. వెంటనే చర్యలు తీసుకోవాలని డీజీపీని ఆదేశించింది. దీనిపై సమగ్ర నివేదిక కూడా ఇవ్వాలని ఎన్నికల ప్రధాన అధికారి రజత్‌కుమార్‌ కోరారు.
రెచ్చగొట్టే వ్యాఖ్యలు:
తెలంగాణ పీసీసీ వర్కింగ్‌ ప్రెసిడెంట్‌ రేవంత్‌రెడ్డి వ్యాఖ్యలపై ఎన్నికల సంఘం సీరియస్‌ అయ్యింది. డిసెంబర్ 4న కొడంగల్‌ బంద్‌కు పిలుపునివ్వడంతో పాటు.. సీఎం కేసీఆర్‌ పర్యటనను అడ్డుకుంటామని వ్యాఖ్యానించడంపై టీఆర్‌ఎస్‌ నేతలు తెలంగాణ ఎన్నికల ప్రధాన అధికారి రజత్‌కుమార్‌కు ఫిర్యాదు చేశారు. రేవంత్‌రెడ్డి కొడంగల్‌ ప్రజలను అకారణంగా రెచ్చగొడుతున్నారని ఫిర్యాదులో పేర్కొన్నారు. దీనికి సంబంధించిన వీడియో ఆధారాలను సైతం ఈసీకి అందించారు. రేవంత్‌రెడ్డిపై చర్యలు తీసుకోవాలని డిమాండ్‌ చేశారు. టీఆర్‌ఎస్‌ నేతల ఫిర్యాదుపై స్పందించిన రజత్‌కుమార్‌... తగు చర్యలు తీసుకోవాలని డీజీపీని ఆదేశించారు. రేవంత్‌ ఎపిసోడ్‌పై ఏం చర్యలు తీసుకున్నారో కూడా వివరణ ఇవ్వాలని ఆదేశించారు.
రంగంలోకి హరీష్:
ఇక రేవంత్‌రెడ్డి రెచ్చగొట్టే వ్యాఖ్యల నేపథ్యంలో హరీష్‌రావు రంగంలోకి దిగుతున్నారు. కొడంగల్‌‌లో జరిగే సీఎం కేసీఆర్‌ సభ ఏర్పాట్లతో పాటు.. నేతలు, కార్యకర్తలకు మనోస్థైర్యం కలిగించేందుకు అక్కడికి వెళ్లనున్నారు. అక్కడే ఉండి అన్ని ఏర్పాట్లను పర్యవేక్షించనున్నట్లు తెలుస్తోంది.
మొత్తానికి ఎన్నికలకు సమయం దగ్గరపడుతుండడంతో కొడంగల్‌లో పరిస్థితి ఉద్రిక్తంగా మారుతోంది.

16:30 - November 30, 2018

హైదరాబాద్: టీపీసీసీ వర్కింగ్ ప్రెసిడెంట్ రేవంత్ రెడ్డికి 4+4 భద్రత పెంచాలని హైకోర్టు రాష్ట్ర ప్రభుత్వాన్ని ఆదేశించింది. ఈభద్రత ఎన్నికల ఫలితాలు విడుదలయ్యేంతవరకు కొనసాగించాలని, రేవంత్ రెడ్డి భద్రత రాష్ట్ర ప్రభుత్వానిదేనని, హైకోర్టు డివిజన్ బెంచ్ ఆదేశించింది. టీఆర్ఎస్ ప్రభుత్వం తనను హత్య చేయాలని చూస్తోందని రేవంత్ రెడ్డి ఇటీవలే ప్రకటించిన విషయం తెలిసిందే. తనకు భద్రత పెంచాలని రేవంత్ రెడ్డి గతంలోనే హైకోర్టును కోరారు. దీనిపై  వాదనలు విన్నసింగిల్ జడ్జి కేంద్ర భద్రత కల్పించాలని ఉత్తర్వులు జారీ చేశారు. దీనిపై కేంద్ర హోంశాఖ  హైకోర్టులో అప్పీల్ చేసింది. రేవంత్ రెడ్డి కూడా తనకు భద్రత పెంచాలని ఈరోజు హైకోర్టులో పిటీషన్ దాఖలు చేశారు. పిటీషన్లపై విచారణ చేపట్టిన హైకోర్టు ఈ రోజు రేవంత్ రెడ్డికి రాష్ట్ర ప్రభుత్వమే భద్రత కల్పించాలని ఆదేశించింది. 

08:07 - November 30, 2018

హైదరాబాద్‌ : టీపీసీసీ వర్కింగ్‌ ప్రెసిడెంట్‌ రేవంత్‌రెడ్డి సంచలన వ్యాఖ్యలు చేశారు. తనను చంపేందుకు ప్రభుత్వం కుట్రలు పన్నుతుందని ఆరోపణలు చేశారు. సుశిక్షితులైన పోలీసులతో తనను హత్య చేయాలని ప్రభుత్వం యోచిస్తోందని.. అందుకోసం పోలీసులను రంగంలోకి దింపిందని ఆరోపించారు. మఫ్టీలోని పోలీసులు తనపై దాడికి పాల్పడే అవకాశం ఉందని ఆందోళన వ్యక్తం చేశారు. ఇందుకు సంబంధించి తన వద్ద పూర్తి సమాచారం ఉందని తెలిపారు. నిన్న ఏర్పాటు చేసిన అత్యవసర మీడియా సమావేశంలో రేవంత్‌ మాట్లాడారు. తనకు కేంద్ర బలగాలతో భద్రత కల్పించాలని కేంద్ర హోంశాఖ, కేంద్ర ఎన్నికల సంఘాన్ని హైకోర్టు ఆదేశించినా భద్రత కల్పించకుండా కుట్ర పన్నారంటూ ఆరోపించారు. తనకు ప్రాణహాని ఉందని పదే పదే ఫిర్యాదు చేసినా పట్టించుకోలేదని, తీరా కోర్టు ఆదేశాలను సైతం అమలు చేయకుండా వేధిస్తున్నారంటూ ఆందోళన వ్యక్తం చేశారు. 

 

12:48 - November 19, 2018

వికారాబాద్: తెలంగాణ కాంగ్రెస్ వర్కింగ్ ప్రెసిడెంట్ రేవంత్‌రెడ్డికి పోలీసులు మరోసారి షాక్ ఇచ్చారు. కొడంగల్‌లో నామినేషన్ దాఖలుకు ర్యాలీగా వెళ్లేందుకు పోలీసులు అనుమతిని నిరాకరించారు. నామినేషన్ ర్యాలీలు చేపట్టరాదని ఉత్తర్వులు జారీచేశారు. పోలీసుల తీరుపై రేవంత్ వర్గీయులు మండిపడుతున్నారు. నామినేషన్‌ ర్యాలీకి అనుమతి నిరాకరించడంతో రేవంత్ అనుచరులు పెద్ద ఎత్తున ఆందోళనకు సిద్దమయ్యారు. అధికారులు ఎన్ని అడ్డంకులు సృష్టించినా ర్యాలీని నిర్వహించి తీరుతామని స్పష్టం చేశారు. దీంతో స్థానికంగా ఉద్రిక్త పరిస్థితి నెలకొంది. మరోవైపు శాంతిభద్రతల పరిరక్షణకు భారీగా పోలీసులను మోహరించారు. ఎలాంటి అవాంఛనీయ ఘటనలు జరగకుండా 144 సెక్షన్‌ను విధించారు.
నామినేషన్ల దాఖలుకు చివరి రోజు కావడంతో రేవంత్‌రెడ్డి సోమవారం(19వ తేదీ) నామినేషన్ పత్రాలను ఎన్నికల అధికారులకు సమర్పించనున్నారు. ఈ నేపథ్యంలో ర్యాలీగా వెళ్లాలని అనుకున్నారు. అయితే నామినేషన్ ర్యాలీకి పోలీసులు పర్మిషన్ ఇవ్వలేదు. తమను వేధించడంలో భాగంగానే పోలీసులను అధికార పార్టీ ఆయుధంగా వాడుతోందని రేవంత్ వర్గీయులు ఆరోపించారు. ఇలాంటి ప్రతీకార రాజకీయాలు ప్రజాస్వామ్యానికి మంచివి కావని వారు హితవు పలికారు.
నామినేషన్ల దాఖలుకు చివరి రోజు కావడంతో రాష్ట్రంలోని అన్ని నియోజకవర్గాల్లొ ఆయా పార్టీ అభ్యర్థులు నామినేషన్లు దాఖలు చేస్తున్నారు. మధ్యాహ్నం 3గంటల వరకు నామినేషన్ల స్వీకరిస్తారు. ఈ నెల 20న నామినేషన్ల పరిశీలన ఉంటుంది. 21, 22 తేదీలలో నామినేషన్ల ఉపసంహరణకు అవకాశం కల్పిస్తారు. డిసెంబర్‌ 7న ఎన్నికలు నిర్వహించి.. 11న రిజల్ట్స్ ప్రకటిస్తారు.

Pages

Don't Miss

Subscribe to RSS - రేవంత్ రెడ్డి