రోడ్డు ప్రమాదం

08:37 - November 5, 2018

చంఢీఘర్ : హర్యానాలోని సోనిపణ్‌లో ఘోర రోడ్డు ప్రమాదం జరిగింది. రాంగ్‌రూట్‌లో వేగంగా ప్రయాణిస్తున్న ట్రక్కు అదుపుతప్పి కారు, రెండు బైక్‌లను ఢీకొట్టింది. ఈ ఘటనలో 13 మంది అక్కడికక్కడే మృతి చెందగా.. మరో 16 మందికి తీవ్రగాయాలయ్యాయి. గాయపడినవారిని వెంటనే ఖానాపూర్‌లోని ఆస్పత్రికి తరలించారు. వీరిలో నలుగురి పరిస్థితి విషమంగా ఉంది. ఘటనాస్థలానికి చేరుకున్న పోలీసులు కేసు నమోదు చేసి.. దర్యాప్తు చేపట్టారు. 

 

09:14 - November 1, 2018

హైదరాబాద్ : నగరంలోని ఎస్ఆర్ నగర్‌లో కారు బీభత్సం సృష్టించింది. అతివేగతంతో వెళ్తున్న కారు అదుపు తప్పి ఆటో, టిప్పర్ లారీని ఢీకొట్టింది. ఈ ప్రమాదంలో ఇద్దరికి గాయాలు అయ్యాయి. క్షతగాత్రులను స్థానిక ప్రైవేట్ ఆస్పత్రికి తరలించారు. ప్రమాదానికి కారణం కారు డ్రైవర్ నిద్రమత్తే కారణమని పోలీసులు భావిస్తున్నారు. కారు డ్రైవర్‌ను పోలీసులు అదుపు చేసుకున్నారు. కేసు నమోదు చేసుకుని, విచారణ చేపట్టారు. 

 

10:17 - October 29, 2018

హైదరాబాద్ : రోడ్డు ప్రమాదాలకు చెక్ పడడం లేదు. ఎక్కడో ఒక చోట ప్రమాదాలు జరిగి నిండు ప్రాణాలు గాలిలో కలిసిపోతున్నాయి. మొన్న గచ్చిబౌలిలో జరిగిన రోడ్డు ప్రమాదంలో సాఫ్ట్‌వేర్ ఇంజినీర్ రమ్య మృతి చెందిన ఘటన మరువకముందే మరో ఘటన చోటు చేసుకుంది. కూకట్‌పల్లి జాతీయ రహదారిపై చైతన్య కళాశాలకు చెందిన బస్సు బీభత్సానికి ఇంటర్ విద్యార్థిని బలైంది. 
సోమవారం ఉదయం కళాశాలకు వెళ్లడానికి జగద్గిరిగుట్టకు చెందిన రమ్య కూకట్‌పల్లి వద్ద రోడ్డు దాటుతోంది. అదే సమయంలో చైతన్య కళాశాలకు చెందిన బస్సు వేగంగా వచ్చి రమ్యను ఢీకొట్టింది. తలపై నుండి వెళ్లిపోవడంతో అక్కడికక్కడనే విద్యార్థిని మృతి చెందింది. 
అక్కడనే ఉన్న విద్యార్థులు తీవ్ర ఆగ్రహానికి గురై కళాశాలకు చెందిన బస్సు అద్దాలను ధ్వంసం చేశారు. సమాచారం తెలుసుకున్న పోలీసులు ఘటనా ప్రదేశానికి చేరుకుని పరిస్థతి సమీక్షించారు. రమ్య మృతదేహాన్ని గాంధీ ఆసుపత్రికి తరలించారు. విషయం తెలుసుకున్న తల్లిదండ్రులు కన్నీరుమున్నీరవుతున్నారు. యాజమాన్యం ఎలాంటి స్పందన వ్యక్తం చేయడం లేదని తెలుస్తోంది. దీనిపై విద్యార్థి సంఘాలు, తల్లిదండ్రులు తీవ్ర ఆగ్రహం వ్యక్తం చేస్తున్నారు. 

18:26 - October 27, 2018

హైదరాబాద్ : నగరంలో ఘోర రోడ్డు ప్రమాదం జరిగింది. ఈప్రమాదంలో ఓ మహిళ మృతి చెందింది. సాఫ్ట్ వేర్ ఇంజనీర్ చేస్తున్న దంపతులు రమ్య, ప్రవీణ్ కుమార్ బైక్ వెళ్తున్నారు. గచ్చిబౌలిలో బైక్ వెళ్తున్న దంపతులను ఓ లారీ ఢీకొట్టింది. దీంతో భార్య రమ్య అక్కడికక్కడే మృతి చెందింది. భర్త ప్రవీణ్ కుమార్ కు తీవ్ర గాయాలు అయ్యాయి. అతన్ని ఆస్పత్రికి తరలించారు. లారీ డ్రైవర్ ను పోలీసులు అదుపులోకి తీసుకున్నారు. కేసు నమోదు చేసి, దర్యాప్తు చేస్తున్నారు. 

 

07:56 - October 17, 2018

కర్నూలు : జిల్లాలో విషాదం నెలకొంది. చిన్నారికి పుట్టు వెంట్రుకలు తీయించేందుకు దర్గాకు వెళ్తూ మృత్యులోకాలకు వెళ్లారు. ఘోర రోడ్డు ప్రమాదం జరిగింది. ఈ ప్రమాదంలో ఆరుగురు దుర్మరణం పాలయ్యారు. 

కర్నూలు వన్‌టౌన్‌కు చెందిన ఓ కుటుంబం చిన్నారికి పుట్టు వెంట్రుకలు తీయించేందుకు కర్నూలు నుంచి ఎల్లార్తి దర్గాకు ట్రాలీ ఆటోలో వెళ్తున్నారు. మార్గంమధ్యలో ఆలూరు మండల పెద్దహోతూరు సమీపంలో బుధవారం తెల్లవారుజామున ట్రాలీ ఆటోను గుర్తు తెలియని వాహనం ఢీకొట్టింది. ఈ ఘటనలో ఆటోలోని ఆరుగురు మృతి చెందారు. మరో 15 మందికి తీవ్ర గాయాలయ్యాయి. మృతుల్లో ముగ్గురు యువకులు, ఇద్దరు చిన్నారులు, ఓ మహిళ ఉన్నారు. ప్రమాదం సమయంలో ఆటోలో 21 మంది ఉన్నారు. సమాచారం తెలుసుకున్న పోలీసులు ఘటనాస్థలానికి చేరుకుని క్షతగాత్రులను 108 అంబులెన్స్‌లో కర్నూలు ప్రభుత్వ ఆస్పత్రికి తరలించారు.

 

09:41 - October 7, 2018

కిన్‌షాసా : కాంగోలో ఘోర ప్రమాదం జరిగింది. 50 మంది అగ్నికి ఆహుతయ్యారు. ఆర్టేరియల్‌ హైవేపై వెళ్తున్న ఆయిల్‌ ట్యాంకర్‌ ఎదురుగా ఉన్న మరో వాహనాన్ని ఢీ కొట్టింది. దీంతో అయిల్ ట్యాంకర్ పేలి మంటలు చెలరేగాయి. ఈ ప్రమాదంలో దాదాపు 50 మంది అగ్నికి ఆహుతయ్యారు. పెద్ద ఎత్తున మంటలు వ్యాపించడంతో వాహనాల్లో ఉన్న వాళ్లు ఉన్నట్లే అగ్నికీలల్లో చిక్కుకొని సజీవదహనమయ్యారు. మరో 100 మందికి పైగా తీవ్రంగా గాయపడ్డారు. పలు వాహనాలకు మంటలు అంటుకోవడంతో బుగ్గయ్యాయి. ఈ ప్రమాదం కారణంగా హైవేపై వెళ్లాల్సిన వాహనాలను నిలిపివేశారు. 

క్షతగాత్రుల ఆర్తనాదాల హాహాకారాలతో ఆ ప్రాంతమంతా భీతావహంగా మారింది. విషయం తెలుసుకున్న రెస్క్యూ సిబ్బంది ఘటనా స్థలానికి చేరుకొని క్షతగాత్రులను ఆస్పత్రికి తరలించారు. ప్రమాదం జరిగిన విషయాన్ని కాంగో తాత్కాలిక గవర్నర్‌ అటో మటుబువనా ధ్రువీకరించారు. హైవే పక్కన ఇళ్లకు మంటలు అంటుకున్నాయి. అగ్నిమాపక సిబ్బంది మంటలను అదుపు చేస్తున్నారు. ఆ ప్రాంతమంతా దట్టమైన పొగలు కమ్ముకోవడంతో వాహనదారులు తీవ్ర ఇబ్బందులు ఎదుర్కొంటున్నారు. చుట్టుపక్కల ప్రాంతాల్లో నివసిస్తున్న వారిని అధికారులు ఖాళీ చేయించి సురక్షిత ప్రాంతాలకు తరలించారు.

 

10:20 - October 3, 2018

అమెరికా : గీతం యూనివర్సిటీ అధినేత, తెలుగుదేశం పార్టీకి ఎమ్మెల్సీ ఎంవీవీఎస్‌ మూర్తి రోడ్డు ప్రమాదంలో మృతిచెందారు. అమెరికాలో అలస్కాలోని ఆంకరేజ్‌ సిటీలో జరిగిన రోడ్డు ప్రమాదంలో మూర్తితో పాటు మరో ముగ్గురు మృతిచెందారు. ప్రమాదం జరిగిన సమయంలో ఎంవీవీఎస్ మూర్తితోపాటు మరో నలుగురు కారులో ఉన్నారు. కడియాల వెంకటరత్నం తీవ్రంగా గాయపడటంతో స్థానికంగా ఉన్న ఆసుపత్రిలో చికిత్స అందిస్తున్నారు. 

గీతం యూనివర్శిటీ ఛైర్మన్ ఎంవీవీఎస్ మూర్తి....గతంలో తెలుగుదేశం పార్టీ తరపున విశాఖపట్నం ఎంపీగా పని చేశారు. ప్రస్తుతం ఎమ్మెల్సీగా కొనసాగుతున్నారు. ప్రమాద వార్త తెలుసుకున్న తానా సభ్యులు హుటాహుటిన సంఘటనా స్థలానికి చేరుకున్నారు. ఈ నెల 6న కాలిఫోర్నియాలో జరగనున్న గీతం యూనివర్సిటీ పూర్వ విద్యార్థుల సమావేశంలో ప్రసంగించించేందుకు ఎంవీవీఎస్‌ మూర్తి అమెరికా వెళ్లారు.

తూర్పు గోదావరి జిల్లా మూలపాలెంకు చెందిన ఎంవీవీఎస్ మూర్తి...ఆంధ్రా యూనివర్శిటీలో ఆర్థికశాస్త్రంలో పీహెచ్ డీ చేశారు. లా కోర్సు చేసి హైకోర్టులో కొంతకాలం న్యాయవాదిగా పని చేశారు. ఆయన పూర్తి పేరు మతుకుమిల్లి వీర వెంకట సత్యనారాయణమూర్తి. 

గీతం యూనివర్శిటీ ఛైర్మన్ ఎంవీవీఎస్ మూర్తి...1991, 1999లో రెండు సార్లు టీడీపీ ఎంపీగా ఎన్నికయ్యారు. ఆ తర్వాత రెండు సార్లు ఎమ్మెల్సీ ఎన్నికయ్యారు. ఎంవీవీఎస్ మూర్తి టీడీపీ నేతల్లో విషాదం నెలకొంది. తెలుగుదేశం పార్టీ నేతలకు రోడ్డు ప్రమాదాలు వెంటాడుతున్నాయి. గతంలో టీడీపీ సీనియర్ నేతలు ఎర్రన్నాయుడు, లాల్ జాన్ భాషా, నందమూరి హరికృష్ణ, ప్రస్తుతం ఎంవీవీఎస్ మూర్తి...వీరంతా రోడ్డు ప్రమాదాల్లోనే మృతి చెందారు. ఎర్రన్నాయుడు, లాల్ జాన్ భాషా, నందమూరి హరికృష్ణతో పాటు ఎంవీవీఎస్ మూర్తిలు గతంలో తెలుగుదేశం పార్టీ ఎంపీలుగా పని చేశారు.

16:58 - September 26, 2018

మహారాష్ట్ర : నిత్యం రోడ్డు ప్రమాదాల్లో అనేక మంది ప్రాణాలు కోల్పోతున్నారు. కాని కారు పైనుంచి వెళ్లినా ఓ పిల్లాడు బతికాడు. ఈ అద్భుతం ముంబాయిలో చోటుచేసుకుంది. ముంబైలోని ఓ అపార్ట్‌మెంట్‌లో పిల్లాడు స్నేహితులతో కలిసి ఫుట్ బాల్ అడుకుంటున్నాడు. ఇంతలో షూలేస్ ఊడిపోవడంతో కారుకు కొద్దిదూరంలో కూర్చున్న పిల్లాడు.. వాటిని కట్టుకుంటున్నాడు. అప్పుడే ఓ యువతి పక్కనే పార్క్ చేసిన కారులోకి వెళ్లి కూర్చుంది. అయితే పిల్లాడిని గమనించని యువతి, కారును స్టార్ట్ చేసి అతనిపై నుంచి పోనిచ్చింది. దీంతో ఆ బాలుడిని కొద్ది దూరం తోసుకెళ్లిన కారు.. అనంతరం అతనిపై నుంచి వెళ్లిపోయింది. అయితే అదృష్టం కొద్దీ పిల్లాడు కారు మధ్యలోకి జారిపోవడంతో స్వల్ప గాయాలతో బయటపడ్డాడు. ప్రమాదం తర్వాత బాలుడు లేచి స్నేహితుల దగ్గరకు పరిగెత్తాడు. అక్కడే ఏర్పాటు చేసిన సీసీటీవీల్లో ఈ ఘటన రికార్డైంది. ప్రస్తుతం ఈ వీడియో సోషల్ మీడియాలో వైరల్ అవుతోంది.

 

14:04 - September 25, 2018

మలయాళ సినీ  రంగంలో  ప్రముఖ సంగీత   దర్శకుడు , వయోలనిస్టు  బాలభాస్కర్ కుటుంబం మంగళవారం   తెల్లవారుఝూమున రోడ్డు ప్రమాదానికి గురైంది.  అతని రెండేళ్ల కుమార్తె  తేజస్వి  ప్రమాద స్దలంలోనే  మరణించింది,  ప్రమాదంలో  తీవ్రంగా గాయపడిన    బాల భాస్కర్  అతని  భార్య లక్ష్మి , కారు డ్రయివర్ లను తిరువనంతపురం సమీపం లోని ఒక మెడికల్ కళాశాల  ఆసుపత్రిలో  ప్రాధమిక చికిత్స  అందించిన అనంతరం మెరుగైన చికిత్స కోసం వేరే  ఆస్పత్రికి తరలించారు. బాల భాస్కర్  పరిస్ధితి కూడా  విషమంగా ఉన్నట్లు  తెలుస్తోంది.  త్రిశూర్ లోని  ఒక దేవాలయం దర్శనం ముగించుకుని  తిరుగు ప్రయాణంలో ఉండగా  పల్లిప్పురం  వద్ద    డ్రయివర్ నిద్రమత్తు  లో  కారును  చెట్టుకు ఢీ కొట్టడంతో  ఈ ప్రమాదం జరిగినట్లు  తెలుస్తోంది.  బాల భాస్కర్  17 ఏళ్ల చిన్న వయసులోనే  "మాంగళ్య పల్లక్కు " అనే  చిత్రానికి  సంగీత దర్సకత్వం వహించి రికార్డు సృష్టించారు, మలయాళ సినిమాలకు సంగీతదర్శకత్వం వహించటమే కాకుండా పలు ప్రయివేట్ ఆల్బమ్స్ కూడ రూపోందించాడు, ఉస్తాద్ జాఖిర్ హుస్సేన్, శివమణి, లూయిస్ బ్యాంక్స్, వికు వినాయగమ్ , హరిహరన్, మత్తన్నూర్ శంకరకుట్టి, రంజిత్ బారోట్ , ఫజల్ ఖురేషి వంటి  ప్రముఖ సంగీత విద్వాంసుల కచేరిలకు వాద్యసహకారం కూడా  అందించాడు.

22:11 - September 14, 2018

సిద్ధిపేట : కొండ గట్టు బస్సు ప్రమాద ఘటన మరువకముందే మరో ప్రమాదం చోటుచేసుకుంది. సిద్ధిపేట జిల్లాలో జిరిగిన రోడ్డు ప్రమాదంలో ఐదుగురు దుర్మరణం చెందారు. పాములపర్తి గ్రామానికి చెందిన 20 మంది ఆటోలో నాగపురి గ్రామానికి వెళ్తున్నారు. గజ్వేల్ మండలం రిమ్మనగూడ వద్ద రోడ్డు పక్కన ఆగిఉన్నటాటా ఏస్ వాహనాన్నిలారీ ఢీకొనడంతో ఆటోలోని ఐదుగురు వ్యక్తులు మృతి చెందారు. మరో 13 మంది గాయపడ్డారు. వీరిలో నలుగురి పరిస్థితి విషమంగా ఉంది. క్షతగాత్రులను ఆస్పత్రికి తరలించి చికిత్స అందిస్తున్నారు. సమాచారం అందుకున్నపోలీసులు సంఘటనా స్థలానికి చేరుకున్నారు. కేసు నమోదు చేసి, దర్యాప్తు చేస్తున్నారు.

 

Pages

Don't Miss

Subscribe to RSS - రోడ్డు ప్రమాదం