హైదరాబాద్: కోల్‌కతా నైట్‌రైడర్స్‌పై కీలక విజయం సాధించి ప్లే ఆఫ్‌ రేస్‌లో ముందువరుసలో నిలిచిన సన్‌రైజర్స్‌ హైదరాబాద్‌ జట్టు విన్నింగ్‌ మూమెంట్స్‌ మరోసారి చూద్దాం....

హైదరాబాద్ : సొంతగడ్డపై తిరుగులేదని సన్‌రైజర్స్‌ హైదరాబాద్‌ మరోసారి నిరూపించింది. వరుస విజయాలతో జోరు మీదున్న కోల్‌కతా నైట్‌రైడర్స్‌కు ఉప్పల్‌ వేదికగా జరిగిన మ్యాచ్‌లో సన్‌రైజర్స్‌ ఓటమి రుచి చూపించింది. అంతేకాకుండా వరుసగా ఉప్పల్‌లో ఐదో విజయాన్ని నమోదుచేసుకుంది. కోల్‌కతా నైట్‌రైడర్స్‌తో జరిగిన మ్యాచ్‌లో సన్‌రైజర్స్ హైదరాబాద్ జట్టు 48 పరుగుల తేడాతో ఘనవిజయం సాధించింది. 210 పరుగుల భారీ విజయలక్ష్యంతో బ్యాటింగ్ ప్రారంభించిన కోల్‌కతా జట్టు నిర్ణీత 20 ఓవర్లకు 7 వికెట్లు కోల్పోయి 161 పరుగులు మాత్రమే చేయగలిగింది. టాస్ ఓడి ఫస్ట్ బ్యాటింగ్ చేసిన సన్‌రైజర్స్ హైదరాబాద్ జట్టు నిర్ణీత 20 ఓవర్లకు 3 వికెట్లు కోల్పోయి 209 పరుగులు చేసింది. 59 బంతుల్లో 10 ఫోర్లు 8 సిక్సర్లతో 126 పరుగులతో సన్‌రైజర్స్ కెప్టెన్ డేవిడ్ వార్నర్ వీరవిహారం చేశాడు. హైదరాబాద్ బౌలర్లలో భువనేశ్వర్ కుమార్ 2, మహ్మద్ సిరాజ్ 2, సిద్దార్ధ్ కౌల్ 2, రషీద్ ఖాన్ ఒక వికెట్ పడగొట్టారు.
 

రాజకీయాల్లో నేతలు గెలిచిన అనంతరం సంబరాలు జరుపుకుంటుంటారు. ర్యాలీలు..వినూత్నంగా నిర్వహిస్తూ సంతోషం వ్యక్త పరుస్తుంటారు. తాజాగా కేరళలో ఓ నాయకుడి విజయం సాధించిన తరువాత నిర్వహించిన సంబరాల ఫొటోలు సోషల్ మాధ్యమాల్లో వైరల్ గా మారిపోయాయి. కేరళ..మళప్పురం నియోజకవర్గం నుండి లోక్ సభకు కున్హలికుట్టి విజయం సాధించారు. 12వ తేదీన జరిగిన ఉప ఎన్నికల్లో ఇండియన్ యూనియన్ ముస్లిం లీగ్ (ఐయూఎంఎల్) పార్టీ తరపున కున్హలికుట్టి గెలుపొందారు. ఆయనకు మొత్తం 5,15,330 ఓట్లు పోలయ్యాయి. ఐయూఎంఎల్ ఎంపీ, మాజీ కేంద్ర మంత్రి ఇ.అహ్మద్ కన్నుమూయడంతో మళప్పురంలో ఉప ఎన్నిక అనివార్యమైంది. ఈ ఎన్నికల్లో కున్హలికుట్టి విజయం సాధించడంతో వినూత్నంగా ర్యాలీ నిర్వహించాలని..విజయోత్సవాలు జరుపుకోవాలని అభిమానులు నిర్ణయించుకున్నారు. అందులో భాగంగా ముళప్పురంలో కార్యకర్తలకు విందు ఏర్పాటు చేశారు. విందులో అన్ని ఆకుపచ్చ ఆహార పదార్థాలు ఉండడం విశేషం. వంటకాలన్నీ ఆకుపచ్చ రంగులో ఉండడంతో ఒక్కసారిగా అందది దృష్టి దీనిపై పడింది. ఆకుపచ్చ చికెన్, ఆకుపచ్చ లడ్డు, ఆకుపచ్చ పాయసం.. ఇలా అన్నీ పచ్చ రంగులోనే వండారు. ముస్లిం లీగ్ అధికారిక రంగు ఆకుపచ్చ కావడంతో వంటలను కూడా అదే రంగులో వడ్డించాలని భావించి ఈ విధంగా చేశారు. ప్రస్తుతం దీనికి సంబంధించిన ఫొటోలు వైరల్ గా మారాయి.

ఐపిఎల్ 10 : గుజరాత్ లయన్స్‌తో జరిగిన ఐపిఎల్ మ్యాచ్‌లో ముంబై ఇండియన్స్ 6 వికెట్ల తేడాతో గెలిచింది. ఇంకా 3 బంతులు మిగిలి ఉండగానే... కేవలం 4 వికెట్లు కోల్పోయి టార్గెట్‌ చేధించింది. నితీష్ రానా 53 పరుగులు, రోహిత్ శర్మ 40 రన్స్ తో రాణించారు. అంతకు ముందు టాస్ ఓడి బ్యాటింగ్ చేసిన గుజరాత్ జట్టు నిర్ణీత 20 ఓవర్లకు 4 వికెట్లు కోల్పోయి 176 పరుగులు చేసింది.

జమ్మూకాశ్మీర్ : శ్రీనగర్‌ లోక్‌సభ ఉప ఎన్నికల్లో నేషనల్‌ కాన్ఫరెన్స్‌ నేత, జమ్ము కశ్మీర్‌ మాజీ ముఖ్యమంత్రి  ఫరూఖ్‌ అబ్దుల్లా విజయం సాధించారు. పిడిపి అభ్యర్థి నజీర్‌ ఖాన్‌పై ఆయన 10 వేల ఓట్ల మెజారిటీతో గెలుపొందారు. ప్రజల మద్దతు కోల్పోయిన పిడిపి ప్రభుత్వాన్ని రద్దు చేయాలని ఫరూక్‌ అబ్దుల్లా డిమాండ్‌ చేశారు.  ఏప్రిల్‌ 9న శ్రీనగర్‌ లోక్‌సభ స్థానానికి జరిగిన ఉప ఎన్నికల్లో అల్లర్ల కారణంగా పోలింగ్‌ అత్యల్పంగా 7 శాతం పోలింగ్‌ నమోదైంది.  బుద్గాం జిల్లాలోని 38 కేంద్రాల్లో గురువారం రీ పోలింగ్‌ నిర్వహించారు. పీడీపీ నేత తారిఖ్‌ హమీద్‌ కర్రా రాజీనామతో  శ్రీనగర్‌ లోక్‌సభ స్థానానికి ఉప ఎన్నిక జరిగింది. పోలింగ్‌ సందర్భంగా హింసాత్మక ఘటనలు చోటుచేసుకోవడంతో 8 మంది మృతి చెందారు. 

ధర్మశాల టెస్టు : భారత్, ఆస్ట్రేలియా మధ్య జరిగిన నాలుగో టెస్ట్ మ్యాచ్ లో భారత్ ఘన విజయం సాధించింది. ఆస్ట్రేలియాపై 8 వికెట్ల తేడాతో గెలుపొందింది. 4 టెస్టుల సిరీస్ ను 2..1 తేడాతో భారత్ కైవసం చేసుకుంది. సీజన్ ను నెంబర్ వన్ ర్యాంక్ తో ముగించింది. 

హైదరాబాద్ : మహబూబ్‌నగర్‌..రంగారెడ్డి..హైదరాబాద్‌ ఉపాధ్యాయ ఎమ్మెల్సీగా టీఆర్‌ఎస్‌ బలపరిచిన అభ్యర్థి కాటేపల్లి జనార్థన్‌రెడ్డి విజయం సాధించారు. అంబర్‌పేట ఇండోర్‌ స్టేడియంలో జరిగిన ఓట్ల లెక్కింపులో జనార్థన్‌రెడ్డికి 9734 ఓట్లు రాగా..తన ప్రత్యర్థి పాపన్నగారి మాణిక్‌రెడ్డికి 5095 ఓట్లు వచ్చాయి. ప్రత్యర్థి పాపన్నగారి మాణిక్‌రెడ్డిపై 4,639 ఓట్ల తేడాతో జనార్థన్‌రెడ్డి విజయం సాధించారు. 

అమరావతి : ఆంధ్రప్రదేశ్‌లో జరిగిన స్థానిక సంస్థల ఎమ్మెల్సీ ఎన్నికల్లో టీడీపీ విజయకేతనం ఎగురువేసింది. జరిగిన మూడు స్థానాల్లోనూ టీడీపీ అభ్యర్థులు విజయం సాధించారు. వైఎస్‌ కంచుకోట కడప జిల్లాలో వైసీపీ అభ్యర్థి వైఎస్‌ వివేకానందరెడ్డిని ఓడించి.. అక్కడ టీడీపీ పాగా వేసింది. 40 ఏళ్ల వైఎస్‌ రాజకీయ కుటుంబ పాలనకు అడ్డుకట్ట వేసి.. బీటెక్‌ రవి 33 ఓట్లతో విజయం సాధించారు. కడపలో విజయం కోసం మంత్రి గంటా శ్రీనివాసరావు అక్కడే మకాం వేసి వ్యూహాలు రచించి సఫలీకృతమయ్యారు. ఇక బీటెక్‌ రవి విజయంతో తెలుగు తమ్ముళ్లు బాణాసంచా కాల్చి సంబరాలు జరుపుకున్నారు. కార్యకర్తలంతా స్వీట్లు పంచుకుని ఆనందాన్ని వ్యక్తం చేశారు.

62 ఓట్ల మెజారిటీతో శిల్పా చక్రపాణిరెడ్డి విజయం ....

ఇక కర్నూలులోనూ ఎమ్మెల్సీ స్థానాన్ని టీడీపీ కైవసం చేసుకుంది. వైసీపీ అభ్యర్థి గౌరు వెంకటరెడ్డిపై.. టీడీపీ అభ్యర్థి శిల్పా చక్రపాణిరెడ్డి.. 62 ఓట్ల మెజారిటీతో గెలుపొందారు. మొత్తం 1084 ఓట్లకు గాను 1077 ఓట్లు పోలయ్యాయి. ఇందులో టీడీపీకి 564 ఓట్లు రాగా.. వైసీపీకి 502 ఓట్లు వచ్చాయి. 11 ఓట్లు చెల్లకుండాపోయాయి. చంద్రబాబు, లోకేశ్‌ ఆశీస్సులతో విజయం సాధించానని.. ప్రజాసమస్యలపై మండలిలో తన గళం విప్పుతానన్నారు శిల్పా చక్రపాణిరెడ్డి.

87 ఓట్ల మెజారిటీతో వాకాటి నారాయణరెడ్డి గెలుపు ...

నెల్లూరు జిల్లాలో వాకాటి నారాయణరెడ్డి.. వైసీపీ అభ్యర్థి ఆనం విజయ్‌కుమార్‌రెడ్డిపై 87 ఓట్ల మెజారిటీతో విజయం సాధించారు. జిల్లాలో మొత్తం 851 ఓట్లకు గాను వాకాటి 465 ఓట్లు సాధించారు. ఆనం విజయ్‌కుమార్‌రెడ్డికి 378 ఓట్లు పోలయ్యాయి.

అభివృద్ధిని చూసి టీడీపీ అభ్యర్థులను గెలిపించారు...

ఇదిలావుంటే.. చంద్రబాబు చేసిన అభివృద్ధిని చూసి టీడీపీ అభ్యర్థులను గెలిపించారన్నారు ఏపీ టీడీపీ రాష్ట్ర అధ్యక్షుడు కళా వెంకట్రావు. వైఎస్‌ కంచుకోట అయిన కడపలో టీడీపీ అడుగుపెట్టిందని.. భవిష్యత్‌లో పులివెందులలోనూ గెలుస్తామని ధీమా వ్యక్తం చేశారు.

టీడీపీ విజయాన్ని కొట్టి పారేసిన వైసీపీ ....

అయితే.. వైసీపీ మాత్రం టీడీపీ గెలుపును కొట్టిపారేస్తున్నారు. ఎన్నికలలో అక్రమాలకు పాల్పడి విజయం సాధించారన్నారు. టీడీపీకి ధైర్యం ఉంటే.. ఆ పార్టీలో చేరిన ఎమ్మెల్యేలతో రాజీనామా చేయించి గెలవాలని సవాల్‌ విసురుతున్నారు. మొత్తానికి స్థానిక సంస్థల ఎన్నికల్లో మూడు స్థానాలను టీడీపీ కైవసం చేసుకోవడం పట్ల తెలుగు తమ్ముళ్లు సంబరాలు జరుపుకుంటున్నారు. ఇదే ఉత్సాహంతో రాష్ట్రాన్ని మరింత అభివృద్ధి చేస్తామని పాలక పక్షం నేతలు అంటున్నారు.

లక్నో : ఉత్తర్‌ప్రదేశ్‌ అసెంబ్లీ ఎన్నికల ఫలితాల్లో బీజేపి చరిత్ర సృష్టించింది. త్రిబుల్‌ సెంచరీతో యూపీలో రాజకీయ సునామీని సృష్టించింది. ఓ వైపు మోదీ వాక్‌చాతుర్యం..మరోవైపు అమిత్‌షా రాజకీయ చతురత..ఈ రెండు కలిసి ఉత్తరప్రదేశ్‌ను ఇప్పుడు శాసించబోతున్నాయి. ఇంతటీ ఘనవిజయం సాధించిన యూపీలో... బీజేపీ ఎవరిని సీఎం పీఠంపై కూర్చోబెట్టనుంది..? 
యూపీలో రాజకీయ సంచలనం 
ఉత్తర్‌ప్రదేశ్‌ అసెంబ్లీ ఎన్నికల ఫలితాల్లో బిజేపి ప్రభంజనం సృష్టించింది. 2014 లోక్‌సభ ఎన్నికల్లో మాదిరిగానే, అసెంబ్లీ ఎన్నికల్లోనూ రికార్డ్ స్థాయిలో సీట్లు గెలుచుకొని విపక్షాలకు దడపుట్టించింది. ఎగ్జిట్‌పోల్స్‌, రాజకీయ విశ్లేషకుల అంచనాలకు సైతం అందకుండా బిజేపి సాధించిన ఈ ఘన విజయం అందరి దృష్టినీ ఆకర్షించింది. 
యూపీ సీఎం రేసులో ఐదుగురు 
త్రిబుల్‌ సెంచరీతో యూపీ సీఎం పీఠాన్ని కైవసం చేసుకున్న బీజేపి..ఆ రాష్ట్ర ముఖ్యమంత్రి కుర్చీని ఎవరు అధిష్టింపబోతున్నారనే విషయాన్ని ఇప్పటివరకు ప్రకటించలేదు. సీఎం రేసులో ప్రధానంగా ఐదుగురు నేతల పేర్లు ప్రచారంలోకి వచ్చాయి. కేంద్ర హోంశాఖ మంత్రి రాజ్‌నాథ్‌సింగ్‌, గోరఖ్‌పూర్‌ ఎంపీ యోగి ఆదిత్యనాథ్‌, బీజేపి యూపీ అధ్యక్షుడు కేశవ్‌ప్రసాద్‌ మౌర్య, ఘాజీపూర్‌ ఎంపీ మనోజ్‌ సిన్హా, బీజేపి  ప్రధాన కార్యదర్శి, అధికార ప్రతిధిగా ఉన్న శ్రీకాంత్‌ శర్మల పేర్లు ప్రధానంగా వినబడుతున్నాయి. అయితే, ఇప్పటివరకు కేంద్రంలో కీలక బాధ్యతల్లో ఉన్న రాజ్‌నాథ్‌సింగ్‌ యూపీ సీఎం బరిలో ఉన్నట్టు జోరుగా ప్రచారం జరుగుతోంది. గతంలోనూ యూపీ సీఎంగా చేసిన అనుభవం ఆయనకు కలిసొచ్చే అంశం. రాజ్‌నాథ్‌తో పాటు..గోరఖ్‌పూర్‌ ఎంపీ యోగి ఆదిత్యనాథ్‌ రేసులో ఉన్నారు. ఇక పార్టీ బలోపేతం నుంచి ప్రచార కార్యక్రమాలన్ని చూసుకున్న బీజేపి యూపీ అధ్యక్షుడు కేశవ్‌ప్రసాద్‌ మౌర్యకు కూడా అవకాశాలు లేకపోలేదు. వీరితో పాటు రాష్ట్ర బీజేపీలో గట్టిపట్టున్న ఘాజీపూర్‌ ఎంపీ మనోజ్‌ సిన్హా, పార్టీ ప్రధాన కార్యదర్శి, అధికార ప్రతిధిగా ఉన్న శ్రీకాంత్‌ శర్మల పేర్లు కూడా వినిపిస్తున్నాయి. 

చెన్నై : తమిళనాడు రాష్ట్ర అసెంబ్లీలో విశ్వాస తీర్మానం రచ్చ రచ్చ చోటు చేసుకుంది. డీఎంకే ఎమ్మెల్యేల విధ్వంసంతో అసెంబ్లీ రణరంగమై పోయింది. కుర్చీలు..బళ్లాలను విరిచివేశారు. స్పీకర్ ధన్ పాల్ పై పేపర్లు చించివేశారు. దీనితో సభను రెండుసార్లు వాయిదా వేశారు. జరిగిన తీరుపై డీఎంకే సభ్యులందరినీ సస్పెండ్ చేస్తున్నట్లు స్పీకర్ ప్రకటించడంతో తీవ్ర ఉత్కంఠ చెలరేగింది. స్పీకర్ తీరును నిరసిస్తూ అసెంబ్లీలోనే డీఎంకే సభ్యులు బైఠాయించారు. రంగంలోకి దిగిన మార్షల్స్ సభ్యులను బయటకు పంపించారు. ఇరువర్గాల మధ్య తీవ్ర వాగ్వాదం..తోపులాట చోటు చేసుకుంది. దీనిపై స్టాలిన్ తీవ్ర ఆగ్రహం వ్యక్తం చేశారు. చిరిగిన చొక్కాతో స్టాలిన్ బయటకు రావడం కలకలం రేగింది. అక్కడున్న వారికి అభివాదం చేస్తూ మీడియాతో మాట్లాడారు.

స్టాలిన్ ఆగ్రహం..
స్పీకర్ సభా మర్యాదలను పాటించలేదని విమర్శించారు. రహస్య ఓటింగ్ జరగకుండా సభను నడపాలని స్పీకర్ ప్రయత్నించారని, స్పీకర్ తన చొక్కా తానే చించుకున్నారని ఆరోపించారు. తనపట్ల మార్షల్స్ ఘోరంగా ప్రవర్తించారని, కొట్టి..తిట్టి..బలవంతంగా బయటకు లాక్కెళ్లారని తెలిపారు. తమను లోపల బంధించి చేయి కూడా చేసుకున్నారని ఆరోపించారు. తమ ఎమ్మెల్యేలు కొంతమంది గాయపడ్డారని, అసెంబ్లీలో తనను కూడా కొట్టారని తెలిపారు. దీనికి నిరసనగా గవర్నర్ ను కలుస్తున్నట్లు స్టాలిన్ తెలిపారు.

సభ ప్రారంభం..పళని విజయం..
డీఎంకే సస్పెండ్ అనంతరం సభను స్పీకర్ ధన్ పాల్ ప్రారంభించారు. సభ ప్రారంభం అయిన తరువాత జరిగిన పరిణామాలు, స్పీకర్ చర్యలను నిరసిస్తూ 8మంది సభ్యులున్న కాంగ్రెస్ సభ్యులు, ముస్లీం లీగ్ సభ్యుడు వాకౌట్ చేయడం ప్రాధాన్యత సంతరించుకుంది. దీనితో తామే నెగ్గామని పళనిసెల్వం వర్గీయులు సంతోషం వ్యక్తం చేశారు. ఏకంగా స్వీట్లు కూడా పంచేశారు. సభలో బయట అలాంటి పరిస్థితి నెలకొనగా సభ లోపల స్పీకర్ ఓటింగ్ ప్రక్రియ ప్రారంభించారు. మొత్తం ఆరు డివిజన్ లుగా ఓటింగ్ నిర్వహించారు. చివరకు పళనిస్వామికి అనుకూలంగా 122, వ్యతిరేకంగా 11 ఓట్లు పడ్డాయి. దీనితో పళని స్వామి విజయం సాధించినట్లు స్పీకర్ వెల్లడించారు. పళని విజయం సాధించడంతో శశికళ వర్గీయులు సంతోషం వ్యక్తం చేస్తున్నారు. గత కొన్ని రోజులుగా నెలకొన్న రాజకీయ సంక్షోభం తెరపడినట్లేనని భావిస్తున్నారు.