విజయనగరం

14:02 - August 27, 2018

 విజయనగరం : జిల్లాలోని పార్వతీపురం మున్సిపల్‌ కార్యాలయం  దగ్గర ఉద్రిక్త వాతావరణం నెలకొంది. కార్యాలయం ముట్టడికి వచ్చిన సీపీఎం కార్యకర్తలను పోలీసులు అడ్డుకున్నారు. జీ ప్లస్‌ త్రీ హౌసింగ్‌ స్కీంలో అవకతవకలు జరిగాయంటూ సీపీఎం ఆందోళనకు దిగింది.

 

17:05 - August 22, 2018

విజయనగరం : ఇటీవల కురిసిన వర్షాలతో విజయనగరం జిల్లాలో రైతులు హర్షం వ్యక్తం చేస్తున్నారు. నిన్న మొన్నటి వరకు వర్షాలు లేక వరినాట్లు పడకపోవడంతో బెంగపెట్టుకున్న రైతన్న...తాజాగా కురిసిన వర్షాలతో ఊరట చెందుతున్నాడు. ఈపాటికే వరినాట్లు పూర్తికావాల్సి ఉండగా వర్షాలు లేకపోవడంతో ఆలస్యమైంది. రాష్ట్రంలోని కొన్ని జిల్లాల్లో వరదలతో ఇబ్బంది పడుతుంటే...విజయనగరం జిల్లాలో మాత్రం ఖరీఫ్ పనులు ఊపందుకున్నాయి. 

16:50 - August 22, 2018

విజయనగరం : కన్న బిడ్డల్ని కడుపులో దాచుకునే తల్లి ఓ దారుణ ఘటనకు పూనుకుంది. కన్న పెంచి విద్యాబుద్ధులు చెప్పాల్సిన తల్లి తన క్షణిక సుఖం కోసం చెట్టంత కొడుకుని దారుణంగా చంపేసే కసాయిగా మారిపోయింది. తన వివాహేతర సంబంధానికి అడ్డుగా ఉన్నాడని భావించి తన 17ఏళ్ల కుమారుడు హరి భగవాన్ న్ని తల్లి వెంకటపద్మావతి విజయనగరం పట్టణంలోని గాయత్రినగర్‌లో చోటుచేసుకుంది. ఆకలితో ఇంటికి వచ్చిన కొడుకుని ఆప్యాయంగా అన్నం పెట్టాల్సి తల్లి కుమారుడు తినే భోజనంలో నిద్రమాత్రలు కలిపి పెట్టింది. దీంతో మత్తులోకి జారుకున్న కుమారుడిని చీరతో ఉరి వేసి చంపేసింది.

భర్తతో దాదాపు 15 సంవత్సరాల క్రితం విడిపోయిన తల్లి వెంకటపద్మావతి వేరే వ్యక్తితో వివాహేతర సంబంధం కొనసాగిస్తోంది. ఈ నేపథ్యంలో దీంతో కుమారుడు తల్లిని ప్రశ్నించటంతో ఇద్దరి మధ్య గొడవలు చోటుచేసుకుంటున్నాయి. కాగా పద్మావతి వ్యవహార శైలిన నచ్చని కొండల్ రావు విడిపోయినట్లుగా తెలుస్తోంది. భర్తతో విడిపోయిన వెంకట పద్మావతి అదే ప్రాంతానికి చెందిన ఓ వ్యక్తికి దగ్గరయింది. రోజూ గోవింద్‌ ఇంటికి వచ్చి వెళ్లడం కుమారుడు హరిభగవాన్‌కు నచ్చలేదు. ఈ విషయంలో పలుమార్లు తల్లితో ఘర్షణ పడ్డాడు. దీంతో కొడుకుని ఎలాగైనా అడ్డు తొలగించుకోవాలని తల్లి నిర్ణయించుకుంది. దీంతో హరి భగవాన్ తినే ఆహారంలో నిద్రమాత్రలు కలిపింది. హరిభగవాన్‌ నిద్రలోకి జారుకున్న తర్వాత చీరతో ఉరివేసి చంపేసింది. అనంతరం తన కుమారుడు ఆత్మహత్య చేసుకున్నాడని బయట ప్రచారం చేసింది. పోలీసులకు అనుమానం వచ్చి ఆమెను విచారించడంతో నిజం అంగీకరించిందని పోలీసులు తెలిపారు. కాగా దీనిపై మరింతగా దర్యాప్తు చేస్తున్నామని తెలిపారు. 

14:03 - August 21, 2018

విజయనగరం : డెంగ్యూ మరణాలతో విజయనగరం జిల్లాలో ఆందోళనకర పరిస్థితి తలెత్తింది. ఎక్కడ చూసినా విష జ్వర బాధితులే కనిపిస్తున్నారు. పట్టణాలు, గ్రామాలన్న తేడా లేకుండా విష జ్వరాలు ప్రబలుతున్నాయి. విజయనగరం జిల్లాలో గతంలో ఎన్నడూ లేని విధంగా విష జ్వరాలు విజృభించాయి. దీంతో డెంగ్యూ మరణాలు అమాంతం పెరిగిపోయాయి. డెంగ్యూ మరణాలతో జిల్లాలో పరిస్థితి ఆందోళనకరంగా మారింది.

జిల్లాలో వందలాది మంది రోగులు.. దాదాపు అందరిలోనూ డెంగ్యూ లక్షణాలు.. దీంతో ఇప్పటి వరకు సుమారు 50మందికి పైగా మృతిచెందారు. డెంగ్యూ రోగులతో ప్రభుత్వ, ప్రయివేటు ఆస్పత్రులు కిక్కిరిసిపోయాయి. సరైన వైద్యం అందక చాలా మంది రోగులు ఇబ్బందులు పడుతున్నారు. గరివిడి, చీపురుపల్లి, ఎస్.కోట, గజపతినగరం, జామి మండలాల్లో విష జ్వరాలు ఎక్కువగా ప్రబలుతున్నాయి. దీంతో ఈ ప్రాంతాల్లోని ప్రభుత్వ, ప్రయివేటు దవాఖానాలు రోగులతో కిటకిటలాడుతున్నాయి. ఇదే అదునుగా భావించిన ప్రయివేటు ఆస్పత్రులు పరీక్షల పేర్లు చెప్పి రోగుల నుంచి వేలకు వేలు పిండేస్తున్నాయి. గ్రామీణ ప్రాంతాల్లోని పీహెచ్‌సీ కేంద్రాల్లో వైద్యుల కొరత ఉండటంతో రోగులు ప్రయివేటు ఆస్పత్రులను ఆశ్రయిస్తున్నట్లు తెలుస్తోంది. ఇక విజయనగరంలో పరిస్థితి దారుణంగా తయారైంది. పారిశుద్ద్య కార్మికులు సమ్మె చేస్తుండటంతో పట్టణమంతా చెత్త చెదారంతో పేరుకు పోయింది. దీనికి వర్షం తోడు కావటంతో రోగాలు ప్రబలుతున్నాయి. 

ఇక జనం రోగాలతో బెంబేలెత్తిపోతుంటే అధికారులు మాత్రం జిల్లాలో ఎలాంటి రోగాలు లేవంటున్నారు. ఎవ్వరూ డెంగ్యూతో చనిపోలేదని చెబుతున్నారు. అధికారికంగా జిల్లాలో ఇప్పటి వరకు సుమారు 30 వరకు డెంగ్యూ కేసులు నమోదయ్యాయని వైద్యాధికారులు చెబుతున్నప్పటికీ.. వాస్తవంగా ఈ సంఖ్య రెట్టింపు ఉంటుందని తెలుస్తోంది. కేవలం ప్రభుత్వ ఆసుపత్రుల్లో చికిత్స కోసం వచ్చిన వారిని మాత్రమే వైద్య అధికారులు లెక్క గడుతున్నారు. 

మరోవైపు అధికారులపై ప్రజా సంఘాలు, విపక్ష పార్టీలు ఆగ్రహం వ్యక్తం చేస్తూ.. ఆందోళన చేపట్టాయి. మరణాలు కనిపిస్తుంటే ఎలాంటి రోగాలు లేవని అధికారులు చెప్పటంపై మండిపడుతున్నారు. తక్షణమే రోగాల నివారణ చర్యలు తీసుకోవాలని.. జిల్లాలో హెల్త్‌ ఎమర్జెన్సీ ప్రకటించాలని ప్రజా సంఘాల నాయకులు డిమాండ్‌ చేస్తున్నారు. ఇక ప్రజా ప్రతినిధులు కూడా విష జ్వరాలపై స్పందించకపోవటంపై ప్రజా సంఘాల నేతలు, విపక్షాలు మండిపడుతున్నాయి. వెంటనే ప్రజా ప్రతినిధులు డెంగ్యూ రోగులను ఆదుకోవాలని వారు డిమాండ్‌ చేస్తున్నారు. మరి ఇప్పటికైనా అధికారులు, ప్రజాప్రతినిధులు స్పందించి డెంగ్యూ నివారణకు చర్యలు తీసుకుని రోగులను కాపాడుతారో లేదో వేచి చూడాలి. 

19:20 - August 11, 2018

విజయనగరం : జిల్లాకు ప్రభుత్వ వైద్య కాలేజీని మంజూరు చేయాలని డిమాండ్‌ చేస్తూ లోక్‌సత్తా పార్టీ ఆధ్వర్యంలో నిరసన దీక్ష చేపట్టారు. లోక్‌సత్తా పార్టీ రాష్ట్ర అధ్యక్షులు భీశెట్టి బాబ్జీ ఆధ్వర్యంలో చేపట్టిన ఈ దీక్షకు వామపక్షాలు, జనసేన పార్టీలు మద్దతు ప్రకటించాయి. మాజీ మంత్రి కొణతాల రామకృష్ణ దీక్షకు హాజరై తన సంఘీభావం ప్రకటించారు. ఈ విషయంపై మరింత సమాచారం కోసం వీడియో క్లిక్ చేయండి. 

13:20 - August 11, 2018

విజయనగరం : జిల్లాలోని బొబ్బిలి రైల్వేట్రాక్ పై అనుమానస్పందంగా పడివున్న రెండు మృతదేహాలను పోలీసులు గుర్తించారు. మృతులు సాలూరు మండలం నేలపర్తి గ్రామానికి చెందిన వారిగా పోలీసులు గుర్తించారు. మృతులు ఓ విందు కార్యక్రమంలో పాల్గొనడానికి బొబ్బిలి వచ్చినట్టు సమాచారం. మృతులు విశాఖ లోని మొబైల్‌ షాపుల్లో పనిచేస్తుం డేవారు. 

 

14:32 - August 9, 2018

విజయనగరం : జిల్లాలో విష జ్వరాలు విజృంభిస్తున్నాయి. మలేరియా, డెంగ్యూ లక్షణాలతో బాధపడేవారి సంఖ్య రోజు రోజుకూ పెరిగిపోతోంది. ఇప్పటికే అధికారిక గణాంకాల ప్రకారం జిల్లాలో 27 మందికి డెంగ్యూ సోకినట్లు వైద్యులు నిర్థారించారు. జిల్లాలో సాలూరు, ఎస్ కోట ప్రాంతాల్లో డెంగ్యూ వ్యాధి లక్షణాలతో నలుగురు మృతి చెందడంతో ప్రజల్లో ఆందోళన కలిగిస్తోంది. విజయనగరం జిల్లాలో విషజ్వరాలపై మరింత సమాచారం కోసం వీడియో క్లిక్ చేయండి. 

15:47 - August 6, 2018

విజయనగరం : ఓవైపు ప్రభుత్వ పాఠశాలల్లోనే పిల్లలను చదివించాలని పెద్ద ఎత్తున ప్రచారం నిర్వహిస్తోంది రాష్ట్ర ప్రభుత్వం... కానీ దానికి తగ్గట్టు వసతుల కల్పన మాత్రం చేపట్టడం లేదు. దీంతో చాలా పాఠశాలలు చెట్ల కిందో, రేకుల షెడ్డూల్లోనో లేక పశువుల పాకల్లోనో తరగతులు నిర్వహించుకోవాల్సిన దుస్థితి నెలకొంది. విజయనగరం జిల్లాలో చాలా పాఠశాలల్లో ఇదే పరిస్థితి కొనసాగుతోంది. విజయనగరం జిల్లాలోని దుర్భర పరిస్థితిల నడుమ కొనసాగుతున్న ప్రభుత్వ పాఠశాలలపై 10 టీవీ ప్రత్యేక కథనం...

ఇది ఓ పాఠశాల భవనం. రేకుల షెడ్డులా ఉందని ఆశ్చర్యపోకండి. ఇది రేకుల షెడ్డే. కాకపోతే ఆ రేకులషెడ్డే ఇప్పుడు పాఠశాలగా మారింది. ఈ రేకులషెడ్డు కిందే విద్యార్థులు విద్యనభ్యసిస్తున్నారు. విజయనగరం జిల్లా గుమ్మలక్ష్మీపురం మండలం రెల్ల పంచాయతి పరిధిలోని మల్లుగూడాలోని దుస్థితి ఇది. మల్లుగూడాలో 24 మందికి పైగా విద్యార్ధులున్నారు. వీరంతా ఈ రేకులషెడ్డు కిందే చదువుకుంటున్నారు. పాఠశాల భవనం లేక.., అత్యంత ప్రమాదకరమైన పరిస్ధితిలో చవుతున్నారు. నేలపై వాడే టార్బన్‌ను పైకప్పుగా ఏర్పరచుకొని చదువుని సాగిస్తున్నారు.

పాఠశాల నూతన భవనం కోసం పాత భవనాన్ని అధికారులు మూడేళ్ల కిందట కూల్చివేశారు. కానీ ఇప్పటికీ కొత్త స్కూల్ భవనాన్ని మాత్రం నిర్మించలేదు. దీంతో విద్యార్థులకు ఈ రేకులషెడ్డే దిక్కైంది. తేలిక పాటి వర్షానికి ఈ పాఠశాలకు సెలవు ఇవ్వాల్సి వస్తోంది. దీంతో చదువులు ముందుకుసాగడం లేదు. తమ సమస్యను ప్రజా ప్రతినిధులకు, సంబంధిత అధికారులతో మొరపెట్టుకున్నా ఫలితం లేకుండా పోయిందని విద్యార్థులు, ఉపాధ్యాయులు అంటున్నారు.
బాడంగి మండలం పెద్దపల్లి గ్రామంలోని పాఠశాలది మరో దుస్థితి. నిన్న,మొన్నటి వరకు ఈ పశువుల పాకలోనే పాఠశాల కొనసాగేది. అయితే సుమారు 30 మంది విద్యార్థులుండే ఈ ఎలిమెంటరీ స్కూల్ భవనం శిథిలావస్థకు చేరుకోవడంతో గతంలో దీనిని కూల్చివేశారు. ఇక అప్పటి నుంచి పాఠశాలకు భవనం లేకపోవడంతో ఇదిగో...ఇక్కడ కనిపిస్తున్న ఈ పశువుల పాకలోనే తరగతులు నిర్వహించుకోవాల్సిన దుస్థితి తలెత్తింది. ఈ మధ్యే ఈ పాఠశాలను అధికారులు అంగన్వాడీ భవనంలోకి మార్చారు. స్కూల్ బిల్డింగ్ నిర్మించాలని గత రెండు మూడు ఏళ్లుగా ఇటు ఉపాధ్యాయులు, అటు గ్రామస్తులు కోరుతున్నప్పటికీ, ఎవరూ పట్టించుకునే నాధుడే లేడు. జిల్లాలో కేవలం ఈ రెండు పాఠశాలలే కాదు. ఇలా చాలా పాఠశాలల్లో ఇదే పరిస్థితి కొనసాగుతోంది. పక్కా భవనాలు, సరైన మౌళిక సదుపాయాలు లేక పిల్లలు చదువులు కొనసాగించలేని పరిస్థితి తలెత్తింది. ఇప్పటికైనా అధికారులు, ప్రజాప్రతినిదులు స్పందించి ప్రభుత్వ పాఠశాలల బాగోగులపై దృష్టి పెట్టాలని విద్యార్థుల తల్లిదండ్రులు కోరుతున్నారు.

 

19:16 - July 31, 2018

విజయనగరం : ఏపీ ప్రభుత్వానికి జాతీయ మానవహక్కుల కమిషన్‌ నోటీసులు జారీ చేసింది. విజయనగరం జిల్లాలోని గిరిజన ప్రాంతాల్లో రోడ్లు, వైద్య సదుపాయాలు లేక గిరిజనులు పడుతున్న కష్టాలపై మానవ హక్కుల కమిషన్‌ స్పందించింది. ఇటీవల.. అటవీ మార్గంలో నిండు గర్భవతిని 12 కిలోమీటర్లు భర్త, గ్రామస్తులు మోసుకెళ్లగా.. మార్గమధ్యలో మహిళ ప్రసవించగా.. శిశువు మృతి చెందింది. ఈ కథనాలు మీడియాలో రావడాన్ని సుమోటోగా స్వీకరించిన ఎన్ హెచ్ ఆర్సీ... ఏపీ ప్రధాన కార్యదర్శికి నోటీసులు జారీ చేశారు. మరిన్ని వివరాలను వీడియోలో చూద్దాం.. 

09:02 - July 25, 2018

విజయనగరం : ఆయన ఒక అజాత శత్రువు. విలువలకు మారు పేరు. నీతి, నిజాయితీలకు నిలువుటద్దం. నిరాడంబరతకు నిలువెత్తు సాక్ష్యం. కానీ ఇటీవల కొంతకాలంగా ఆయన ప్రతిష్ట మసకబారుతోంది. జిల్లాలో గత కొన్ని రోజులుగా చోటు చేసుకుంటున్న రాజకీయ పరిణామాలతో.. ఆయన వ్యవహార శైలిపై విమర్శలు వెల్లువెత్తుతున్నాయి. అధికార పార్టీలో తిరుగులేని నాయకుడిగా చెలమణి అవుతున్న ఆయన... ఎందుకలా వ్యవహరిస్తున్నారన్న సందేహం ప్రతి ఒక్కరినీ తొలిచేస్తోంది. విజయనగరం సంస్థాన వారసుడు, ఎంపీ పూసపాటి అశోక్‌గజపతిరాజు వ్యవహారశైలిపై కథనం..

పార్లమెంట్‌లో ఇటీవల టీడీపీ ప్రతిపాదించిన అవిశ్వాస తీర్మానంపై జరిగిన చర్చలో కేంద్ర మాజీమంత్రి అశోక్‌గజపతిరాజు గళం విప్పకపోవడం.. సర్వత్రా చర్చనీయాంశమైంది. ఎంతో సీనియర్‌ నాయకుడై ఉండి... ఆంగ్లంలో అనర్గళంగా మాట్లాడే సత్తా ఉన్నా.. పార్లమెంట్‌లో పెదవి విప్పకపోవడంపై జిల్లా ప్రజల్లో సందేహాలు వ్యక్తమవుతున్నాయి. తనకన్నా ఎంతో జూనియరైన రామ్మోహన్‌నాయుడు, గల్లా జయదేవ్‌ ప్రసంగాలకు ప్రశంసలు వస్తుంటే...అశోక్‌గజపతిరాజు కనీసం పెదవి విప్పకపోవడంపై విమర్శలు వ్యక్తమవుతున్నాయి. అశోక్‌ కావాలనే మాట్లాడలేదా.. లేక అధిష్టానమే ఆయనను కానది.... జూనియర్లతో ఆలోచించిందా అన్న ప్రశ్నలు తలెత్తుతున్నాయి.

టీడీపీ.. కేంద్ర ప్రభుత్వం నుంచి బయటకు వచ్చిన తర్వాత... ఎందుకనో ఆయన హోదా పోరాటంలో అంటీముట్టనట్టుగా వ్యవహరిస్తున్నారు. ప్రత్యేకహోదా కోసం టీడీపీ నేతలు చేస్తున్న ధర్మా పోరాట దీక్షల్లో అశోక్‌ కనిపించ లేదు. ఆ మధ్య తిరుపతిలో చంద్రబాబు ఆధ్వర్యంలో జరిగిన ధర్మపోరాట దీక్షకు కూడా ఆయన డుమ్మా కొట్టారు. ఇక జిల్లాలో జరుగుతున్న రాజకీయ పరిణామాలు, అభివృద్ధి విషయంలోనూ అశోక్‌ ప్రతిష్ట రోజురోజుకు తగ్గిపోతోంది. ఆ మధ్య జిల్లా గ్రంథాలయ సంస్థ అధ్యక్షుడి ఎంపికలోనూ అశోక్‌ విమర్శల పాలయ్యారు.

అశోక్‌గజపతిరాజు నాలుగేల్లపాటు కేంద్రమంత్రిగా బాధ్యతలు నిర్వహించారు. ఈ కాలంలో జిల్లా అభివృద్ధికి ఆయన అంతగా చేసిందేమీ లేదన్న విమర్శలు వినిపిస్తున్నాయి. భోగాపురం అంతర్జాతీయ విమానాశ్రయం ,గిరిజన విశ్వవిద్యాలయం నిర్మాణాలకు సంబంధించి ఎక్కడ వేసిన గొంగళి అక్కడే అన్న చందంగా ఉన్నాయి. కేంద్ర పౌర విమానయానశాఖ మంత్రిగా ఉన్నప్పటికీ భోగాపురం విమానాశ్రయ నిర్మాణానికి కనీసం పునాదిరాయి కూడా వేయలేకపోయారన్న విమర్శలు వినిపిస్తున్నాయి. భోగాపురం ఎయిర్‌పోర్టు టెండర్ల వ్యవహారంలోనూ ప్రతిపక్షాలు ఆయనపై ఆరోపణలు గుప్పిస్తున్నాయి. ఇక ఆయన చేసిన అభివృద్ధికి నిదర్శనంగా చెప్పుకునే విజయనగరం పట్టణంలోని సంతకాల బ్రిడ్జి వ్యవహారంలోనూ విమర్శలు మూటగట్టుకున్నారు. బ్రిడ్జి నిర్మాణం పూర్తయి నెలలు గడుస్తున్నా... కొన్ని సాంకేతిక సమస్యలతో అది ప్రారంభానికి నోచుకోకపోవడం. ప్రతిపక్ష నేతల విమర్శలకు అవకాశం కల్పించినట్టైంది. ఇక అశోక్‌ బంగ్లాలో ఆయన ముఖ్య అనుచరుడిగా ఒక కాంట్రాక్టర్‌ జిల్లా పాలనలో జోక్యం చేసుకోవడం, రోడ్ల విస్తరణలో మితిమీరిన జోక్యం, అధికారులపై అజమాయిషీలాంటి వ్యవహారాలు అశోక్‌ ప్రతిష్టను మరింత దిగజార్చుతున్నాయన్న ఆరోపణలు వినిపిస్తున్నాయి.

జిల్లా ఇంచార్జీ మంత్రిగా గంటా శ్రీనివాస్‌రావును నియమించినప్పటి నుంచే అశోక్‌ వ్యవహార శైలిలో మార్పు వచ్చిందని ఆ పార్టీ శ్రేణుల్లో చర్చ జరుగుతోంది. టీడీపీ జిల్లా అధ్యక్షుని ఎన్నికల్లో గంటా శ్రీనివాసరావు మితిమీరిన జోక్యం అశోక్‌ను తీవ్ర మనస్థాపానికిగి గురిచేసింది. వచ్చే ఎన్నికల్లో తన వారసురాలిగా కుమార్తెను ఎన్నికల్లో నిలబెట్టే అంశంపై .. సీఎం తన వద్దకు పిలిపించుకుని ఆరా తీయడంలాంటి ఘటనలతో.. అధిష్టానంతో ఆయన అంటీముట్టనట్టు వ్యవహరిస్తున్నారన్న వాదన వినిపిస్తోంది. విజయనగరం మహారాజుల బిడ్డగా, నీతి నిజాయితీ కలిగిన నేతగా... ప్రతిపక్ష నేతలు సైతం ఆయన్ని గౌరవించే పరిస్థితి ఉండేది. అటువంటి నేతపై ఇప్పుడు చోటామోటా నాయకులు సైతం అదేపనిగా విమర్శలు, ఆరోపణలు గుప్పించే పరిస్థితి రావడం.. ఆయకు, పార్టీకి ప్రతికూలంగా మారింది.

Pages

Don't Miss

Subscribe to RSS - విజయనగరం