విశాఖ

17:03 - April 24, 2018

విశాఖ : భారత తూర్పుతీర సముద్రంలో అలజడి ఏర్పడుతోందని సునామి హెచ్చరికల సంస్థ ఇన్‌కాయిస్ తెలిపింది. ప్రత్యేక వాతావరణ పరిస్థితుల కారణంగా భారీగా అలలు ఎగిసిపడే ప్రమాదం ఉందని హెచ్చరించింది. ఆఫ్రికా ప్రాంతం నుంచి వీస్తున్న ప్రచండ గాలుల కారణంగా అరేబియాసముద్రంలో భారీ అలలు ఏర్పడ్డాయని, దీని కారణంగా ఇటు హిందూ మహాసముద్రంలో కూడా అలజడి ఏర్పడుతోందని ఇన్‌కాయిస్‌ సంస్థ తెలిపింది. తూర్పుతీరంలోని ఆంధ్రప్రదేశ్‌, ఒడిశా, పశ్చిమబంగా తీర ప్రాంతాలకు ముప్పు ఉండొచ్చని హెచ్చరికలు జారీ అయ్యాయి. తీరంలో 3నుంచి 4 మీటర్ల ఎత్తున అలలు ఎగిసిపడే ప్రమాందం ఉందని ఇన్‌కాయిస్‌ అధికారులు ప్రకటించారు. అటు ఇప్పటికే అరేబియా సముద్రంలో భారీ అలలు కర్నాటక, కేరళ, మహారాష్ట్ర తీరప్రాంతాల్లో రాకాసి అలలు ఎగిసి పడుతున్నాయి. ఇప్పటికే భీకర అలలకు కేరళలో దాదాపు 100 ఇళ్లు ధ్వంసం అయినట్టు తెలుస్తోంది. 

08:36 - April 24, 2018

విశాఖ : సూపర్‌ స్పెషాలిటీ వైద్య సేవలతో ఉత్తరాంధ్రకు తలమానికంగా నిలుస్తున్న విమ్స్‌ ప్రైవేటీకరణకు రంగం సిద్ధమైంది. విశాఖ ఇనిస్టిట్యూట్‌ ఆఫ్‌ మెడికల్‌ సైన్సెన్‌ను కార్పొరేట్‌ ఆస్పత్రులకు అప్పగించే ప్రయత్నాలు ముమ్మరమయ్యాయి. ఇందుకు కోసం కన్సల్టెంట్స్‌ను నియమించేందుకు ప్రభుత్వం జారీ చేసిన 33వ నంబర్‌ జీవో  వివాదాస్పదమవుతోంది. 
ప్రభుత్వరంగలో ప్రతిష్టాత్మక ఆస్పత్రి విమ్స్‌
విశాఖపట్నంలో కేజీహెచ్‌ తర్వాత.. ప్రభుత్వరంగలో ప్రతిష్టాత్మక ఆస్పత్రి విమ్స్‌. సూపర్‌ స్పెషాలిటీ వైద్యంతో ఉత్తరాంధ్ర జిల్లాల ప్రజలకు సేవలు అందిస్తున్న విమ్స్‌ను ఇప్పుడు ప్రైవేటీకరించే దిశగా పాలకులు పావులు కదుపుతున్నారు. విశాఖ ఇనిస్టిట్యూట్‌ ఆఫ్‌ మెడికల్‌ సైన్సెస్‌లో 32 సూపర్‌ స్పెషాలిటీ విభాగాలు  ఉన్నాయి. వీటిలో ఎనిమిది విభాగాలను ప్రైవేటీకరించేందుకు ప్రభుత్వం ప్రయత్నాలు ప్రారంభించింది. దీనిపై అధ్యయనానికి కన్సల్టెంట్లను నియమించేందుకు వైద్యారోగ్య శాఖ జారీ చేసిన 33వ నంబర్‌ జీవో ఆధారంగా ఈనెల 1న టెండర్లు పిలిచారు. ఏప్రిల్‌ 11తో టెండర్ల దాఖలు ప్రక్రియ ముగియడంతో.. ఈనెల 26న తెరవనున్నారు. ఇప్పుడు ఈ అంశం వివాదాస్పదంగా మారింది. 
విమ్స్‌ లో ప్రస్తుతం 500 పడకలు 
కేజీహెచ్‌పై ఒత్తిడి తగ్గేందుకు విమ్స్‌ నిర్మించారు. ప్రస్తుతం 500 పడకలు అందుబాటులో ఉన్నాయి. వందలాది మందికి సేవలు అందిస్తోంది. విమ్స్‌ ప్రైవేటీకరణకు చంద్రబాబు ప్రభుత్వం ప్రయత్నం చేయడం ఇది మొదటిసారికాదు. గత ఏడాది ఏప్రిల్‌లో కూడా కన్సల్టెంట్లను నియమించింది. అప్పట్లో దీనికి వ్యతిరేంగా విపక్షాలు భారీ స్థాయిలో ఉద్యమించడంతో ఈ ప్రయత్నాలను విరమించుకుంది. ఇప్పుడు మరోసారి కూడా ప్రైవేటీకరణ ప్రయత్నం చేయడంపై ఉద్యమాలు ఉవ్వెత్తున ఎగిసిపడుతున్నాయి. దీని వెనుక  కొందరు ప్రభుత్వ పెద్దలతోపాటు అధికార టీడీపీ నేతల హస్తం ఉందన్న వాదనలు వినిపిస్తున్నాయి. విమ్స్‌లో ఖాళీగా ఉన్న 90 ఎకరాల విలువైన భూమిపై కొన్ని కార్పొరేట్‌ సంస్థలు కన్నేశాయి. దీని విలువ 2,400 కోట్ల రూపాయలు ఉంటుందని అంచనా వేస్తున్నారు. ఈ భూమిని లీజు పేరుతో చౌకగా కొట్టేసేందుకు కొందరు బడా బాబులు ముఖ్యమంత్రి చంద్రబాబును ప్రసన్నం చేసుకొని, పావులు కదపడంతో ప్రైవేటీకరణ ప్రయత్నాలు ముమ్మరమయ్యాయి. 
విమ్స్‌ను ప్రైవేటీకరిస్తే పేదలకు కార్పొరేట్‌ ఆరోగ్యం దూరం
విమ్స్‌ను ప్రైవేటీకరిస్తే పేదలకు కార్పొరేట్‌ ఆరోగ్యం దూరమయ్యే ప్రమాదం ఉందన్న ఆందోళన వ్యక్తమవుతోంది. విమ్స్‌ ప్రైవేటీకరణ ప్రయత్నాలను విరమించుకోపోతే తీవ్రపరిణామాలు తప్పవని విపక్షాలు హెచ్చరిస్తున్నాయి. విమ్స్‌లో పనిచేస్తున్న వైద్యులంతా డిప్యుటేషన్‌పై వచ్చినవారే. వైద్య సిబ్బందిది కూడా ఇదే పరిస్థితి. పూర్తి స్థాయి వైద్యారోగ్య సిబ్బందిని నియమించి... ప్రభుత్వరంగంలోనే దీనిని కొనసాగించాలని విపక్షాలు డిమాండ్‌ చేస్తున్నాయి. 
విమ్స్‌ను ప్రైవేటీకరించే ప్రసక్తేలేదు : టీడీపీ ప్రజాప్రతినిధులు 
మరోవైపు విమ్స్‌ను ప్రైవేటీకరించే ప్రసక్తేలేదని టీడీపీ ప్రజాప్రతినిధులు చెబుతున్నారు. హైదరాబాద్‌ నిమ్స్‌ తరహాలో అభివృద్ధి చేసేందుకు చర్యలు చేపడుతున్నామంటున్నారు. విమ్స్ ప్రైవేటీకరణ ప్రయత్నాలు ఏ మలుపు తిరుగుతాయో చూడాలి. ప్రజా ఉద్యమాలకు తలొగ్గి ప్రభుత్వం ఈ ప్రయత్నాన్ని విరమించుకొంటుదా? లేదా మొండికేసి ముందుకెళ్తుందో చూడాలి.

 

17:53 - April 23, 2018

విశాఖ : వేసవి కాలంలో భానుడి ప్రతాపంతో పాటే ప్రజలకు తాగునీటి కష్టాలు మొదలయ్యాయి. స్మార్ట్‌ సిటీ, పర్యాటకానికి కలికితురాయి అంటూ విశాఖను ఆకాశానికెత్తేస్తున్న పాలకులు ఇక్కడి తాగునీటి సమస్యను మాత్రం తీర్చలేకపోతున్నారు. ప్రజల దాహార్తిని తీర్చాలన్న కనీస ధర్మాన్ని కూడా విస్మరించారు పాలకులు. నీటి సరఫరాకు అన్ని ఏర్పాట్లు చేశామని అధికారులు చెబుతున్నప్పటికీ పరిస్థితులు మాత్రం అందుకు భిన్నంగా ఉన్నాయి.

దాహంతో అలమటిస్తోన్న విశాఖ..
వేసవి వచ్చిందంటే చాలు నీటి ఎద్దడి విశాఖ ప్రజలను ఉక్కిరిబిక్కిరి చేస్తోంది. ఏజెన్సీతో పాటు విశాఖ నగర వాసులు నీటి కోసం ఇబ్బంది పడుతున్నారు. జీవీఎంసీ పరిధిలోని కొన్ని ప్రాంతాలకు తాగునీటి సరఫరా జరగడం లేదు. నర్సీపట్నంలో అయితే రెండు రోజులకొకసారి నీటిని సరఫరా చేస్తున్నారు. ప్రభుత్వం ప్రవేశ పెట్టిన మంచినీటి పథకాలు నిరుపయోగంగా తయారయ్యాయి.

మంచినీరు లేక సుమారు 600 కుటుంబాలు
విశాఖలోని సీతమ్మధార ఏఎస్‌ఆర్‌ నగర్‌, పూర్ణమార్కెట్‌ ఇలా అనేక ప్రాంతాల్లో మంచినీరు లేక సుమారు 600 కుటుంబాలు ఇబ్బంది పడుతున్నాయి. కొండ ప్రాంతం కావడంతో జీవీఎంసీకి నీటి సరఫరా జరగడంలేదు. ఈ సమస్యను ప్రభుత్వం దృష్టికి తీసుకెళ్లగా ఆ ప్రాంతంలో ఓ కుళాయిని ఏర్పాటు చేశారు. కాని అది కూడా స్థానిక ప్రజల నీటి అవసరాలను తీర్చలేకపోతున్నాయి. విశాఖ ఉత్తర ఎమ్మెల్యే విష్ణుకుమార్‌ రాజు సీతమ్మధారలోనే నివాసముంటున్నారు. కాలనీ వాసులు నీటి సమస్యను ఆయన దృష్టికి తీసుకెళ్లగా జీవీఎంసీ నుండి కొళాయి కనెక్షన్లు ఇవ్వడం కుదరదని ఆయన తేల్చేశారు. మంత్రి గంటా శ్రీనివాసరావును కలిసినా అక్కడా నిరాశే ఎదురైందని స్థానికులు ఆవేదన వ్యక్తం చేస్తున్నారు.

150 బదులు 120 లీటర్ల నీటిని మాత్రమే అందిస్తోన్న జీవీఎంసీ
ఇప్పటికే విశాఖ నగర జనాభా 25 లక్షలపైకి చేరుకుంది. ఉపాధి కోసం వచ్చే కుటుంబాల సంఖ్య ప్రతి ఏటా 15వేలకు పైగా ఉన్నాయి. వీరికి రోజుకు 150 లీటర్ల నీటిని అందించాల్సిన జీవీఎంసీ 120 లీటర్లు మాత్రమే అందిస్తోంది. రోజూ 79 మిలియన్‌ గ్యాలన్లకు బదులుగా, 63 మిలియన్‌ గ్యాలన్లను సరఫరా చేస్తున్నారు. దీంతో నీటి ఎద్దడి తట్టుకోలేక చాలా ప్రాంతాల్లో ఇతర అవసరాల కోసం ప్రజలు భూగర్భజలాలను ఉపయోగిస్తున్నారు. నగర వ్యాప్తంగా 50 నుండి 60వేల బోర్లు ఉన్నట్లు జీవీఎంసీ లెక్కలు చెబుతున్నాయి. దీంతో కొన్ని మండలాల్లో ఉండాల్సిన పరిమాణం కంటే గ్రౌండ్‌ వాటర్‌ పరిమాణం తగ్గిందని అధికారులే చెబుతున్నారు.

నీటికోసం అల్లాడుతున్న జనం
విశాఖకు తగిన మోతాదులో నీటిని సరఫరా చేస్తున్నామంటున్న ప్రభుత్వం చెప్పే మాటలకు వాస్తవ పరిస్థితికి ఎక్కడా పొంతన కుదరడంలేదు. దీంతో తాగునీటి కోసం ప్రజలు అల్లాడుతున్నారు. భూగర్భ జలాలు సైతం తగ్గుముఖం పట్టడం, చెరువులు, బావులు, ఎండిపోవడం ప్రజలను మరింత కష్టాల్లోకి నెట్టాయి. ఇప్పటికైనా అధికారులు స్పందించి తమ నీటి సమస్యను తీర్చాలని విశాఖ వాసులు కోరుతున్నారు. 

14:17 - April 21, 2018

విశాఖ : ధర్మపోరాట దీక్షలో ప్రధాని మోదీపై అనుచిత వ్యాఖ్యలు చేసిన టీడీపీ ఎమ్మెల్యే బాలకృష్ణపై బీజేపీ నేతలు మండిపడ్డారు. బాలకృష్ణపై చర్యలు తీసుకోవాలంటూ గవర్నర్‌కు ఫిర్యాదు చేశారు. బీజేపీ నేత విష్ణుకుమార్‌ రాజు, ఎమ్మెల్సీ మాధవ్‌లు గవర్నర్‌ను కలిసి ఫిర్యాదు అందజేశారు.  

07:59 - April 18, 2018

విశాఖ : సింహాచలేశుని చందనోత్సవం నేటి నుంచి ప్రారంభం కానుంది. లక్ష్మీనరసింహస్వామి నిజరూప దర్శనం కోసం వచ్చే భక్తులకు ఎటువంటి ఇబ్బందులు కలగకుండా అధికారులు అన్ని ఏర్పాట్లు పూర్తిచేశారు. 
సింహాచల శ్రీ నృసింహుడి చందనోత్సవ సంరంభం 
సింహాచల శ్రీ నృసింహుడి చందనోత్సవ సంరంభం మొదలైంది. బుధవారం తెల్లవారు జామునుంచే స్వామిని దర్శించుకునేందుకు భక్తులు పెద్ద సంఖ్యలో సింహాచలం తరలి వస్తున్నారు. సింహాచలం అప్పన్న ఆలయంలో ఏడాదికి 12 గంటలు మాత్రమే స్వామి నిజరూపంలో దర్శనమిస్తారు. మిగిలిన రోజుల్లో విగ్రహాన్ని చందనంతో కప్పి ఉంచుతారు. అక్షయ తృతీయ రోజున మాత్రమే లభించే నిజరూప దర్శనం కోసం భక్తులు అప్పన్న సన్నిధికి పెద్ద సంఖ్యలో చేరుకుంటున్నారు 
గంగాజలాలతో అభిషేకం
చందనోత్సవం రోజున స్వామి వారి మూల విరాట్టును గంగాజలాలతో అభిషేకిస్తారు. దీనికోసం 108 వెండి కలశాలను వినియోగిస్తారు. ఆస్థానమంటపంలో వీటిని ఉంచి.. ప్రత్యేక పూజలు చేశాక.. నిజరూపంలోని శ్వేత వరాహ స్వామికి సహస్ర ఘటాభిషేకం నిర్వహిస్తారు. భక్తులకు నిజరూప దర్శనానంతరం.. తిరిగి స్వామి వారి మూలవిరాట్టును చందనంతో అలంకరిస్తారు. 
ఎలాంటి ఇబ్బందులూ రాకుండా.. ఏర్పాట్లు 
చందనోత్సవానికి తరలి వచ్చేందుకు ఎలాంటి ఇబ్బందులూ రాకుండా.. అప్పన్న ఆలయ అధికారులు అన్ని ఏర్పాట్లూ చేశారు. పోలీసులు కూడా కట్టుదిట్టమైన భద్రత ఏర్పాటు చేశారు. తోపులాటలు జరగకుండా బారికేడ్లు నిర్మించారు. వేసవి కావడంతో.. భక్తుల దాహార్తిని తీర్చేందుకూ ఏర్పాట్లు చేశారు. 

 

07:44 - April 17, 2018

విజయవాడ : చిన్నారి ఆసిఫాను అత్యంత దారుణంగా హతమార్చిన నిందితులను కఠినంగా శిక్షించాలని డిమాండ్‌ చేస్తూ గుంటూరులో భారీ క్యాండిల్‌ ర్యాలీ నిర్వహించారు. విద్యార్థినులు, జనసేన పార్టీ నాయకుల ఆధ్వర్యంలో ఈ ర్యాలీ జరిగింది. గుంటూరులోని అంబేద్కర్‌ విగ్రహం దగ్గర క్రొవ్వొత్తుల ర్యాలీ జరిగింది. అభంశుభం తెలియని చిన్నారిని అత్యంత పాశవికంగా హత్యచేసిన వారిని ఎందుకు శిక్షించడం లేదని వారు ప్రశ్నించారు. బీజేపీ ప్రభుత్వం వారిపై చర్యలు తీసుకోకుంటే ఆందోళనలు మరింత ఉధృతం అవుతాయని హెచ్చరించారు. గోవధపై తక్షణం స్పందించిన మోదీ ప్రభుత్వం.. అమ్మాయిలను హత్యచేస్తుంటే ఎందుకు పెదవి విప్పడంలేదని ప్రశ్నించారు. చట్టాల్లో మార్పులు తీసుకురావాలని ఈ సందర్భంగా వారు డిమాండ్‌ చేశారు.

చట్టాల్లో మార్పులు చేయాలని కోరిన విద్యార్థినులు..
చిన్నారి ఆసిఫాకు న్యాయం చేయాలని విశాఖలో విద్యార్థిలోకం గొంతెత్తింది. నిందితులను కఠినంగా శిక్షించాలని విద్యార్థులు క్రొవ్వొత్తుల ర్యాలీ నిర్వహించారు. జీవీఎంసీ దగ్గర ఈ ర్యాలీ జరిగింది. హంతకులెవరో తెలిసినా ఇంతవరకు వారికి ఎందుకు శిక్షించడం లేదని విద్యార్థినులు ప్రశ్నించారు. 

07:31 - April 17, 2018

అమరావతి : ఆంధ్రప్రదేశ్‌ రాష్ట్ర మంత్రిమండలి కీలక నిర్ణయాలు తీసుకుంది. యానిమేషన్‌, విజువల్‌ ఎఫెక్ట్స్‌, గేమింగ్‌ అండ్‌ కామిక్స్‌ పాలసీకి ఏపీ కేబినెట్‌ గ్రీన్‌సిగ్నల్‌ ఇచ్చింది. అమరావతిలో జరిగిన మంత్రి మండలి సమావేశంలో... విశాఖలో 40 ఎకరాల్లో యానిమేషన్‌ అండ్‌ గేమింగ్‌ సిటీకి, ఆక్వా పాలసీకి రాష్ట్ర కేబినెట్‌ ఆమోదం తెలిపింది. పట్టణాల్లో సీఎంఏవై కింద నిర్మించే ఇళ్లకు స్టాంప్‌ డ్యూటీ, రిజిస్ట్రేషన్‌ ఫీజు మినహాయిస్తూ కేబినెట్‌ నిర్ణయం తీసుకుంది. 

20:08 - April 15, 2018

విశాఖ : టీడీపీ అధ్యక్షుడు, ఏపీ సీఎం నారా చంద్రబాబు నాయుడు అవకాశాన్ని బట్టి మాట్లాడే వ్యక్తి అని వైసీపీ ఎంపీ విజయసాయిరెడ్డి అన్నారు. ప్రత్యేక హోదాకు ప్రత్యామ్నాయం కాదని తెలిసినా ప్యాకేజీకి ఎందుకు ఒప్పుకున్నారని చంద్రబాబును ప్రశ్నించారు. ప్రత్యేక హోదా కోసం విశాఖపట్నంలో పార్టీ శ్రేణుల దీక్షా శిబిరాన్ని విజయసాయి సందర్శించారు. టీడీపీ ఎంపీలు కేవలం కేంద్ర మంత్రి పదవులకే రాజీనామా చేశారని, మీకు హోదాపై నిజంగానే చిత్తశుద్ధి ఉంటే కేంద్రమంత్రి పదవులకే కాకుండా... ఎంపీ, ఎమ్మెల్యే పదవులకు కూడా రాజీనామాలు చేయించాలని.. అందుకు తాము సిద్ధమేనని..మీరు సిద్ధమా అంటూ విజయసాయి చంద్రబాబుకు సవాల్ విసిరారు. 

 

17:52 - April 15, 2018

విశాఖ : జమ్ముకాశ్మీర్‌లో ఎనిమిదేళ్ల చిన్నారి అసిఫాను హత్యచేసిన దుండగులను కఠినంగా శిక్షించాలిన డిమాండ్‌ చేస్తూ ఏయూ విద్యార్థులు ర్యాలీ నిర్వహించారు. ఇంజినీరింగ్‌ ఉమెన్స్‌ హాస్టల్‌ నుండి జీవిఎంసీ గాంధీ విగ్రహం వరకు ర్యాలీ చేశారు. అసిఫాకు న్యాయం చేయాలంటూ నల్ల దుస్తులు ధరించి నిరసన తెలిపారు. చిన్నారిని నిర్బంధించి, అత్యాచారం చేసి హతమార్చడం మానవత్వానికే మచ్చని, ఇంతటి దారుణానికి ఒడిగట్టిన మానవ మృగాలను ఉరితీయాలన్నారు ఏయూ రిజిస్ట్రార్‌. ఈ దేశంలో ఆడవారికి భద్రత లేదని విద్యార్థులు ఆవేదన వ్యక్తం చేశారు.

 

 

 

20:20 - April 14, 2018

విశాఖ : నర్సీపట్నం బలిగట్టంలో విషాదం చోటుచేసుకుంది. ఇంటర్ చదువుతున్న విద్యార్థి ఆత్మహత్య చేసుకొని మృతి చెందాడు. నిన్న విడుదలైన ఇంటర్ పరీక్ష ఫలితాల్లో తక్కువ మార్కులు వచ్చాయని తీవ్ర మనస్తాపం చెంది ఉరివేసుకొని చనిపోయాడు. సమాచారం అందుకున్న పోలీసులు విచారణ చేపట్టారు. తల్లిదండ్రుల ఒత్తిడి, పిల్లల తొందరపాటు మనస్తత్వమే... ఇలాంటి ఘటనలకు కారణమని మానసిక వేత్తలు చెబుతున్నారు. 

Pages

Don't Miss

Subscribe to RSS - విశాఖ