సీఎం చంద్రబాబు

15:04 - December 13, 2018

విశాఖ : ఉక్కు నగరం విశాఖ మరో అంతర్జాతీయ స్థాయి సదస్సుకి వేదికైంది. విశాఖలో డబ్ల్యూహెవో సదస్సు జరుగుతోంది. మూడు రోజుల పాటు ఈ సదస్సు జరగనుంది. ఈ సదస్సులో పాల్గొన్న ఏపీ ముఖ్యమంత్రి చంద్రబాబు నాయుడు.. డబ్ల్యూహెచ్‌వో సదస్సు విశాఖలో నిర్వహించడం సంతోషంగా ఉందన్నారు. ఈ సదస్సులో అనేక అంశాలు వైద్యపరంగా చర్చించాలని చంద్రబాబు అన్నారు. నగరంలో మెడ్‌టెక్ జోన్‌తో పరిస్థితిలో మార్పు వస్తుందని ఆశాభావం వ్యక్తం చేసిన ముఖ్యమంత్రి చంద్రబాబు..  మెడికల్ ఉత్పత్తుల పంరగా మెడ్‌టెక్ జోన్‌ను దేశంలో నెంబర్ వన్‌గా నిలుపుతామని చంద్రబాబు చెప్పారు. ప్రపంచవ్యాప్తంగా 2023 నాటికి 409 బిలియన్ డాలర్ ఉత్పత్తులు వచ్చే అవకాశం ఉందన్నారు. మెడ్‌టెక్ జోన్‌లో వచ్చే ఏడాదికి  మరిన్ని సంస్థలు కార్యకలాపాలు ప్రారంభిస్తాయన్నారు. అన్ని శాఖలను ఒక తాటిపైకి తీసుకొస్తున్నామని సీఎం చెప్పారు. ప్రతి ఏటా విశాఖలో సదస్సు నిర్వహించాలని కోరారు. వైద్య సేవలకు ప్రజలు ఎక్కువ ఖర్చు చేయాల్సి వస్తోందని, ఈ పరిస్థితిలో మార్పు రావాలని ముఖ్యమంత్రి అన్నారు. మరో 50 ఎకరాల్లో నిర్మాణ పనులకు శంకుస్థాపన చేశామన్నారు.

19:52 - December 12, 2018

హైదరాబాద్ : ప్రత్యేక హోదాపై ఏపీ సీఎం చంద్రబాబుకే క్లారిటీ లేదని టీఆర్‌ఎస్ అధ్యక్షుడు కేసీఆర్‌ విమర్శించారు. ప్రత్యేక హోదాతో వచ్చేది ఏముందని చంద్రబాబు పెద్ద పెద్ద డైలాగులు కొట్టారని ఎద్దేవా చేశారు. హోదా విషయంలో చంద్రబాబు మూర్ఖంగా మాట్లాడుతున్నారన్నారు. ఈమేరకు హైదరాబాద్ లో కేసీఆర్ మీడియాతో మాట్లాడారు. ప్రత్యేక హోదా అడిగేవాళ్లు మూర్ఖులని చంద్రబాబు అన్నారని, ఇప్పుడు ఆయనే హోదా అడుగుతున్నారని కేసీఆర్‌ వ్యాఖ్యానించారు. ఆంధ్రాకు రావాలని చాలా మంది అడుగుతున్నారని, వంద శాతం ఆంధప్రదేశ్‌కు వెళ్తామని ఆయన స్పష్టం చేశారు. 

 

19:24 - December 12, 2018

ప్రకాశం : చంద్రబాబుకు రిటర్న్ గిఫ్ట్ ఇస్తానని కేసీఆర్ వ్యాఖ్యానించిన సంగతి తెలిసిందే. కేసీఆర్ వ్యాఖ్యలపై ఏపీ సీఎం చంద్రబాబు స్పందించారు. ’కేసీఆర్ ఏపీకి వచ్చి నాకు గిఫ్ట్ ఇస్తానంటున్నారు... ప్రజాస్వామ్యంలో ఎవరు ఎక్కడి నుంచైనా పోటీ చేసే హక్కు ఉంది’ అని చంద్రబాబు అన్నారు. టీడీపీ విద్వేషాలకు దూరమని తెలిపారు. టీడీపీ పద్ధతి ప్రకారం నడుచుకుంటుందన్నారు. టీడీపీ.. తెలుగువారి ఆత్మగౌరవం కోసం పుట్టిన పార్టీ అని పేర్కొన్నారు. 

17:50 - November 20, 2018

నెల్లూరు : బీజేపీపై ఏపీ సీఎం చంద్రబాబు తీవ్రస్థాయిలో ధ్వజమెత్తారు. ప్రధాని మోడీపై ఫైర్ అయ్యారు. కేంద్ర ప్రభుత్వం ఏపీకి చేసిన అన్యాయాన్ని ఎండగట్టారు. ఏపీకి బేజేపీ నమ్మక ద్రహం చేసిందని మండిడ్డారు. నెల్లూరు ధర్మ పోరాట దీక్షలో చంద్రబాబు ప్రసంగించారు.
ఇచ్చిన మాట నిలబెట్టుకోలేని మోడీ.. 
జాతి ప్రయోజనాల కోసం నాడు బీజేపీతో పొత్తు పెట్టుకున్నామని తెలిపారు. తిరుపతి వెంకన్న సాక్షిగా ఆనాడు ప్రధాని అభ్యర్థి మోడీ హామీ ఇచ్చి నిలబెట్టుకోలేదన్నారు. దేవుడి సాక్షిగా ఇచ్చిన మాటను బీజేపీ మర్చిపోయిందని పేర్కొన్నారు. ఇచ్చిన హామీని బీజేపీ ఎందుకు నిలబెట్టుకోలేదని నిలదీశారు. అమరావతిని ప్రపంచ నగరంగా చేస్తామని..ఢిల్లీ కూడా చిన్నబోయే విధంగా చేస్తామని ఆనాడు మోడీ ఎన్నికల్లో చెప్పారని.. అదే విధంగా అమరావతిలో కూడా హామీ ఇచ్చారని గుర్తు చేశారు. యమునా నది జలాలు, పార్లమెంట్ సాక్షిగా మట్టిని తీసుకొచ్చి ఇచ్చారని తెలిపారు. అమరావతి అభివృద్ధికి అన్ని చేస్తానని చెప్పిన మోడీ.. మనసులోని మాటలను బయట పెట్టారని చెప్పారు.
హామీలను విస్మరించారు..
ప్రత్యేకహోదా ఇస్తామని చెప్పారని.. చట్టంలోని అన్నింటినీ ఇస్తామని చెప్పి విస్మరించారని తెలిపారు. రెవెన్యూ లోటు 16 వేల కోట్లు ఇవ్వాల్సివుండగా 3900 కోట్లు మాత్రమే ఇచ్చారన్నారు. అమరావతి రాజధాని నిర్మాణం కోసం కేంద్రం కేవలం 1500 కోట్లు ఇచ్చిందని పేర్కొన్నారు. 
ప్రపంచం మెచ్చే విధంగా అమరావతి రాజధానిని నిర్మిస్తాం.. 
అమరావతి రాజధాని నగరానికి రైతులు 35 వేల ఎకరాలు ఇచ్చారని కొనియాడారు. ప్రపంచం మెచ్చే విధంగా అమరావతి రాజధానిని నిర్మిస్తామన్నారు. ఆంధ్రప్రదేశ్‌కు న్యాయం జరగాలంటే టీడీపీని 25కు 25 సీట్లలో గెలిపించాలన్నారు. హైదరాబాద్‌ను ఎవరు అభివ‌ృద్ధి చేశారని రిక్షావాలాలను అడిగినా చెబుతారని చెప్పారు. మన శ్రమను హైదరాబాద్‌లో ఎవరూ ప్రజలు మరిచిపోలేరని అన్నారు.

 

22:11 - November 10, 2018

గుంటూరు : కేంద్ర ప్రభుత్వంపై ఏపీ సీఎం చంద్రబాబు ఫైర్ అయ్యారు. ఐటీ రైడ్స్ జరుపుతూ ప్రత్యర్థులపై కక్ష తీర్చుకుంటూ... రాజకీయ లబ్ధి పొందే పరిస్థితికి వచ్చారని మండిపడ్డారు. దేశాన్ని కాపాడుకోవాలని, ప్రజాస్వామ్యాన్ని పరిరక్షించుకోవాలన్నారు. ఎన్డీఏ హయాంలో నోట్లరద్దుతో ఏటిఎంలు ఖాళీ అయ్యాయని విమర్శించారు. ప్రజలు తీవ్ర ఇబ్బందులు ఎదుర్కొన్నారని పేర్కొన్నారు. ఈమేరకు ఆయన అమరావతిలో మీడియాతో మాట్లాడారు. డిమానిటైజేషన్ స్వార్థంతో చేశారని...దీని వల్ల అందరూ ఇబ్బందులు పడ్డారని విమర్శించారు. ఏటీఎంలు, బ్యాంకులలో డబ్బులు లేవని, ఎక్కడికక్కడ సమస్యలు వచ్చాయన్నారు. ’మన డబ్బులు తీసుకునేందుకు ఏటీఎం, బ్యాంకుల చుట్టూ క్యూ కట్టే పరిస్థితి వచ్చింది’ అని పేర్కొన్నారు. నోట్లరద్దు వల్ల దుష్ఫలితాలు వచ్చాయని, ఆర్థిక వ్యవస్థ చిన్నాభిన్నం అయిందని విమర్శించారు. గ్రోత్ రేట్ పడిపోయిందన్నారు. రూపాయి విలువ పతనం అయిందని, పెట్రోల్, డీజిల్ ధరలు, నిత్యావసర వస్తువుల ధరలు పెరిగాయన్నారు. ఫెర్టిలైజర్ ధరలు విపరీతంగా పోయాయని తెలిపారు. ఆర్థిక వ్యవస్థ దెబ్బతినడం వల్ల నిరుద్యోగం పెరిగిందన్నారు. వ్యవసాయ సంక్షోభం తలెత్తిందని, రైతులు తీవ్రంగా నష్టపోయారని పేర్కొన్నారు. 

ఎవరైనా మాట్లాడితే వారిపై దాడులు చేస్తున్నారని తెలిపారు. మీడియా, కంపెనీలు, రాజకీయ పార్టీల నాయకులపై దాడులు చేస్తున్నారని తెలిపారు. భయభ్రాంతులకు గురి చేసే పరిస్థితికి వచ్చారని అన్నారు. తనకు స్వలాభం లేదని చెప్పారు. రాజ్యాంగబద్ధ వ్యవస్థలని సురక్షితంగా భావితరాలకు అందించాల్సిన అవసరం ఉందన్నారు. రాహుల్ గాంధీ అమరావతి పర్యటనపై త్వరలో ప్రకటన చేస్తామని చెప్పారు. యాంటీ బీజేపీ వేదిక ఏర్పాటు చేస్తామని చెప్పారు. 

 

09:27 - November 5, 2018

శ్రీకాకుళం : తిత్లీ తుపాన్‌ బాధితులకు ముఖ్యమంత్రి చంద్రబాబు ఇవాళ చెక్కులు పంపిణీ చేయనున్నారు. శ్రీకాకుళం జిల్లాలోని పలాసలో చెక్కుల పంపిణీకి అధికారులు ఏర్పాట్లు చేశారు. జిల్లా వ్యాప్తంగా వ్యవసాయం, మత్స్యకారులు, ఇల్లు కోల్పోయినవారు.. ఇలా బాధితులందరికీ మొత్తం 540 కోట్ల రూపాయలు పరిహారం అందించనున్నారు. పలాస మున్సిపాలిటీ పరిధిలోని జూనియర్‌ కళాశాల గ్రౌండ్స్‌లో చంద్రబాబు కొంతమందికి చెక్కులు అందిస్తారు. అలాగే జిల్లాలోని అన్ని పంచాయితీల్లో అధికారులు చెక్కులు అందిస్తారు. మధ్యాహ్నం పలాసకు చేరుకోనున్న చంద్రబాబు... చెక్కుల పంపిణీ అనంతరం.. బహిరంగ సభలో పాల్గొంటారు. 

 

09:01 - November 5, 2018

తూర్పు గోదావరి : గత ఎన్నికల్లో తాను మద్దతు ఇవ్వకపోతే చంద్రబాబు ఈపాటికి రాజకీయాల నుంచి రిటైర్‌ అయ్యేవారని జనసేన అధినేత పవన్‌ కల్యాణ్‌ అన్నారు. తాను మద్దతు ఇవ్వడంతోనే ఆయన సీఎం అయ్యారని చెప్పారు. చంద్రబాబు కాంగ్రెస్‌తో జతకట్టి తెలుగు ప్రజల ఆత్మగౌరవాన్ని దెబ్బతీశారని దుయ్యబట్టారు. తూర్పుగోదావరి జిల్లా పర్యటనలో ఉన్న ఆయన.... బీజేపీపైనా, జగన్‌పైనా విమర్శనాస్త్రాలు సంధించారు. 

ప్రజాపోరాటయాత్రలో భాగంగా తూర్పుగోదావరి జిల్లా జగ్గంపేటలో జనసేన అధినేత పవన్‌ కల్యాణ్‌ పర్యటించారు. అక్కడ నిర్వహించిన బహిరంగ సభలో మాట్లాడిన పవన్‌... చంద్రబాబుపై మండిపడ్డారు. గత ఎన్నికల్లో తాను మద్దతు ఇవ్వకపోతే చంద్రబాబు రిటైరై  ఉండేవారని ఎద్దేవా చేశారు. తన మద్దతుతోనే సీఎం అయ్యారని చెప్పారు. చంద్రబాబు తెలుగు జాతి ఆత్మగౌరవాన్ని కాంగ్రెస్‌కు పెట్టారని ధ్వజమెత్తారు. రాష్ట్ర విభజన బిల్లు ఆమోద సమయంలో టీడీపీ ఎంపీలను కొట్టిన కాంగ్రెస్‌తో టీడీపీ జట్టుకట్టడమేంటని నిలదీశారు.

ప్రతిపక్ష నేత వైఎస్‌ జగన్‌మోహన్‌రెడ్డిపైనా పవన్‌ కల్యాణ్‌ పదునైన విమర్శలు సంధించారు. ఆంధ్రులు దోపిడీదారులని టీఆర్ఎస్‌ నేతలు కించపరుస్తోంటే జగన్‌ నోరు మెదపకపోవడాన్ని పవన్‌ తప్పుపట్టారు. టీఆర్‌ఎస్‌ నేతలను ప్రశ్నించాలంటే జగన్‌కు ఏవో భయాలున్నాయన్నారు.  తెలుగుజాతి ఆత్మగౌరవాన్ని కాపాడలేనివారు ఏపీకి ముఖ్యమంత్రి కాలేరని... కారాదని.. ఇదే శాసనమని ఆవేశంగా మాట్లాడారు. 

అవినీతిలో టీడీపీ నేతలు కాంగ్రెస్‌ నాయకులను మించిపోయారని పవన్‌ ఆరోపించారు. అధికారంలోకి వచ్చిన వెంటనే దోపిడీకి తలుపులు బార్లా తెరిచారని దుయ్యబట్టారు. బీజేపీ అంటే చాలా కోపముందని పవన్‌ అన్నారు. రాష్ట్రాన్ని విడదీస్తుంటే ఎందుకు చేస్తున్నారని ఒక్క బీజేపీ నాయకుడూ ప్రశ్నించలేదన్నారు.  యూపీని ఇలాగే చీల్చుతారా అని ప్రశ్నించారు. యూపీని నాలుగు ముక్కలుగా చెయ్యకపోతే తమ కడుపుమంట చల్లారదని అన్నారు.

08:38 - November 4, 2018

ప్రకాశం : ప్రజాస్వామ్యం ప్రమాదం బారిన పడినప్పుడు.. తనలాంటి వారు కూడా మౌనం వహిస్తే.. స్వాతంత్ర్యంకోసం పోరాడిన మహనీయుల ఆత్మ క్షోభిస్తుందని ఏపీ సీఎం చంద్రబాబు నాయుడు అన్నారు. అలా జరగకూడదన్న ఉద్దేశంతోనే.. జాతీయ కూటమికి శ్రీకారం చుట్టినట్లు చెప్పారు. కాంగ్రెస్‌తో పొత్తుపై పవన్ కల్యాణ్ చేసిన విమర్శలను చంద్రబాబు తప్పుపట్టారు. బీజేపి రాసిచ్చిన స్క్రిప్ట్‌ను పవన్ చదువుతున్నారని విమర్శించారు. కోడి కత్తిని మోడీ తన కత్తిగా మార్చుకుని.. ఏపీలో రాష్ట్రపతి పాలన విధించేందుకు కుట్ర పన్నారని చంద్రబాబు ఆరోపించారు

 

08:44 - November 1, 2018

హైదరాబాద్ : కాసేపట్లో ఏపీ సీఎం చంద్రబాబు ఢిల్లీ వెళ్లనున్నారు. సీఎంతోపాటు కళా వెంకట్రావు, యనమల రామకృష్ణుడు వెళ్లనున్నారు. బీజేపీయేతర పార్టీలను ఏకతాటిపైకి తేవడం లక్ష్యంగా సీఎం పర్యటన కొనసాగనుంది. కాంగ్రెస్ జాతీయ అధ్యక్షుడు రాహుల్ గాంధీ, శరద్‌పవార్, ఫరూక్‌అబ్దుల్లా, సీపీఎం జాతీయ ప్రధాన కార్యదర్శి సీతారాం ఏచూరి, తేజస్వియాదవ్‌లతో ఆయన భేటీ కనున్నారు. మధ్యాహ్నం 12 గంటలకు చంద్రబాబు శరద్‌పవార్‌ను కలవనున్నారు. మధ్యాహ్నం 3.30 గంటలకు రాహుల్ గాంధీతో సమావేశం కానున్నారు. రాబోయే ఎన్నికలు, దేశ రాజకీయాలపై సీఎం చర్చించనున్నారు. ములాయంసింగ్‌ యాదవ్‌ను కూడా కలవనున్నట్లు టీడీపీ వర్గాలు చెబుతున్నాయి. బీజేపీని ఓడించాలని చంద్రబాబు కసర్తత్తు చేస్తున్నారు.

 

08:03 - November 1, 2018

గుంటూరు : రాజకీయాల్లో శాత్వత మిత్రులు, శాశ్వత శత్రువులు ఉండరని మరోసారి నిరూపితమైంది. ఇన్నాళ్లూ బద్ద శత్రువులుగా ఉన్న కాంగ్రెస్‌, టీడీపీ తెలంగాణ ఎన్నికల్లో ఒకటి అయ్యాయి. తొలిసారి టీజేఎస్‌, సీపీఐతో కూటమిగా ఏర్పడి టీఆర్‌ఎస్‌ ఓటమే లక్ష్యంగా పనిచేస్తున్నాయి. ఇక టీడీపీ అధినేత చంద్రబాబు కూడా రాహుల్‌గాంధీతో ఇవాళ భేటీ కాబోతున్నారు. బీజేపీకి వ్యతిరేకంగా అందరితో మాట్లాడి అందరినీ ఒకతాటిపైకి తీసుకొచ్చేందుకు కృషి చేస్తానని ప్రకటించారు.

అమరావతిలో టీడీపీ చేపట్టిన సభ్యత్వ నమోదు కార్యక్రమంలో చంద్రబాబు కీలక వ్యాఖ్యలు చేశారు. తన ఢిల్లీ పర్యటనలో భాగంగా ఇవాళ కాంగ్రెస్‌ అధ్యక్షుడు రాహుల్‌గాంధీతో భేటీ అవుతున్నట్టు తెలిపారు.  ఆయనతో కూడా మాట్లాడి అందరినీ ఏకతాటిపైకి తీసుకొస్తానన్నారు. అందరితో కలిసి జాతీయ స్థాయిలో ఒక ప్రత్యామ్నాయ శక్తిగా ఎదుగుతామన్నారు. దేశాన్ని ప్రమాదం నుంచి బయటపడవేసేందుకు తాను బాధ్యత తీసుకుంటానన్నారు.   ప్రధాని మోదీ, బీజేపీ అధ్యక్షుడు అమిత్‌షా ఎన్ని దాడులు చేసినా భయపడేది లేదన్నారు.  టీడీపీ దేశానికి ఎన్నోసార్లు దశ దిశ చూపిందని, మరోసారి దేశ రాజకీయాల్లో కీలక పాత్ర పోషించాల్సిన సమయం వచ్చిందన్నారు.  దేశాన్ని కాపాడుకోవాల్సిన బాధ్యత అందరిపైనా ఉందన్నారు. 

కేంద్ర ప్రభుత్వంపై మరోసారి చంద్రబాబు తీవ్రస్థాయిలో మండిపడ్డారు. ఏపీ ప్రజలను నమ్మించి మోసం చేశారని, నమ్మక ద్రోహం  చేశారని ధ్వజమెత్తారు. ఎన్డీయే ప్రభుత్వం విభజన చట్టంలోని హామీలను విస్మరించారని విమర్శించారు. ప్రత్యేకహోదా హామీని తుంగలో తొక్కారని ఫైర్‌ అయ్యారు. ఏపీకి కేంద్రం  చేసిన ద్రోహంపై ప్రజలను చైతన్యవంతం చేయాల్సిన బాధ్యత టీడీపీ కార్యకర్తలదేన్నారు. ప్రజలను చైతన్యవంతం చేస్తే... వారే బీజేపీతో కలిసి పనిచేస్తోన్న వైసీపీ, జనసేనను వచ్చే ఎన్నికల్లో గంగలో ముంచుతారన్నారు.

దేశంలోని ప్రభుత్వ వ్యవస్థలను బీజేపీ భ్రష్టు పట్టిస్తోందని చంద్రబాబు దుయ్యబట్టారు. బీజేపీ విధానాలతో దేశంలో ప్రజాస్వామ్యం ప్రమాదంలో పడిందని ఆందోళన వ్యక్తం చేశారు. అనంతరం చంద్రబాబు టీడీపీ సభ్యత్వ పునరుద్దరణ కార్యక్రమాన్ని ప్రారంభించారు. తన సభ్యత్వాన్ని పునరుద్దరించుకున్నారు.

Pages

Don't Miss

Subscribe to RSS - సీఎం చంద్రబాబు