సీఎం చంద్రబాబు

16:39 - February 26, 2017

అమరావతి : చంద్రబాబు సర్కారు.. చెప్పేదొకటి చేసేదొకటిగా తయారైంది. ఇందుకు భవానీద్వీపం ప్రత్యక్ష నిదర్శనంగా నిలుస్తోంది. ఒకప్పుడు ఈ ద్వీపాన్ని సింగపూర్‌ తరహాలో అభివృద్ధి చేస్తానని సాక్షాత్తు ముఖ్యమంత్రి చంద్రబాబు నాయుడే హామీ ఇచ్చారు. దీనిపై తమ చిత్తశుద్ధిని శంకించాల్సిన అవసరం లేదనీ కుండబద్దలు కొట్టారు.

133 ఎకరాల్లో విజయవాడ భవానీ ద్వీపం....

ప్రభుత్వ హయాంలోనే దీన్ని అభివృద్ధి చేస్తామన్న హామీని తుంగలోకి తొక్కి, ద్వీపంపై ప్రైవేటు సంస్థలు కాలుమోపే అవకాశాన్ని ఇస్తోంది. విజయవాడలోని భవానీ ద్వీపం మొత్తం 133 ఎకరాల్లో విస్తరించి ఉంది. ఇందులో మొత్తం 28 కాటేజీలున్నాయి. ఈ కాటేజీలతో పర్యాటకాభివృద్ధి సంస్థకు ఏటా పెద్దమొత్తంలోనే ఆదాయం వస్తుంది. 2016-17 ఆర్థిక సంవత్సరపు భవానీద్వీపం ఆదాయాన్నే పరిగణలోకి తీసుకుంటే.. పర్యాటకం ద్వారా, దాదాపుగా మూడు కోట్ల రూపాయలు ప్రభుత్వానికి సమకూరింది. ఇందులో జీతభత్యాలు, నిర్వహణ ఖర్చులు తదితరాలను దాదాపు రూ.2 కోట్లు వ్యయమయ్యాయని భావించినా.. నికరంగా ప్రభుత్వానికి కోటి రూపాయల ఆదాయం సమకూరింది.

పీపీపీ పద్ధతిలో ప్రైవేట్‌ సంస్థకు కట్టబెట్టేందుకు సిద్ధమైన పర్యాటక శాఖ....

భవానీద్వీపంలోని లాభదాయక కాటేజీలను పీపీపీ పద్ధతిలో ప్రైవేట్‌ సంస్థకు కట్టబెట్టేందుకు పర్యాటక శాఖ సిద్ధమైంది. ప్రభుత్వ సిబ్బందిని అక్కడి నుంచి తప్పించి, ప్రైవేటు సంస్థ సిబ్బంది ద్వారానే కాటేజీల నిర్వహణను చేపట్టాలన్నది సర్కారు యోచనగా తెలుస్తోంది. ఏటా దాదాపు కోటి రూపాయల నికర లాభం తెచ్చిపెట్టే భవానీద్వీపాన్ని... కారుచౌక ధరలకే అప్పగించడంతో పాటు.. పలు రాయితీలూ కట్టబెడుతోంది సర్కారు. ఏపీ టూరిజం డెవలప్‌మెంట్‌ కార్పొరేషన్‌ ద్వారా, యాక్సెస్ రోడ్, వాటర్, పవర్ సప్లై, సీవరేజి కనెక్షన్స్‌కి పెట్టుబడిని బట్టి రాయితీలు కల్పిస్తున్నారు. దీంతోపాటు ల్యాండ్ కన్వర్షన్ చార్జీలు, రిజిస్ట్రేషన్ స్టాంపు డ్యూటీ, వ్యాట్ ఐదు శాతం, లగ్జరీ ట్యాక్స్‌, వినోద పన్ను వంద శాతం మినహాయింపును అందించనున్నారు.

ప్రైవేట్‌ సంస్థవైపే మొగ్గు చూపుతున్న పర్యాటకశాఖ.....

ఈ మొత్తం వ్యవహారంలో, ఏపీ టూరిజం డెవలప్‌మెంట్ కార్పొరేషన్‌ అధికారులతో చర్చించకుండానే కాటేజీలను అప్పగించేందుకు పర్యాటక శాఖ టెండర్లు పిలిచింది. ప్రైవేట్‌ సంస్థవైపే పర్యాటక శాఖ మొగ్గుచూపడాన్ని పలువురు తీవ్రంగా విమర్శిస్తున్నారు. ఇప్పటికైనా ప్రభుత్వం తన నిర్ణయాన్ని మానుకోవాలని, ప్రభుత్వ ఆధీనంలోనే భవానీ ద్వీప నిర్వహణ ఉండాలని స్థానికులు సూచిస్తున్నారు.

అప్పట్లో పెద్ద ఎత్తున ఆందోళనలు రేగడంతో...

భవానీ ద్వీపాన్ని ప్రైవేటు పరం చేసేందుకు గతంలోనూ ప్రయత్నాలు జరిగాయి. అయితే, అప్పట్లో పెద్ద ఎత్తున ఆందోళనలు రేగడంతో, ప్రభుత్వం మౌనం వహించింది. మళ్లీ ఇప్పుడు, పాత నిర్ణయాన్ని అమలు చేసేందుకు ఉవ్విళ్లూరుతోంది. ప్రభుత్వం ఇదే మొండిపట్టుదలకే వెళితే, ఉద్యమాలు తప్పవని పర్యావరణ ప్రేమికులు, ప్రజాసంఘాల నేతలు హెచ్చరిస్తున్నారు.

13:31 - February 24, 2017

విజయవాడ : ఆధునిక సాంకేతిక పరిజ్ఞానం ద్వారా అన్ని శాఖల్లో పనితీరు అంచనావేస్తున్నామని ఏపీ సీఎం చంద్రబాబు తెలిపారు. విజయవాడలో నిర్వహించిన 'మేధోసంపత్తి హక్కులపై అంతర్జాతీయ సదస్సుకు ఆయన హాజరై, ప్రసంగించారు. మానవ ఆహారపు అలవాట్లలో ఎన్నో మార్పులు వస్తున్నాయని... వాటికి తగినట్లుగా ఆయా రంగాల్లో మెరుగైన వృద్ధి సాధిస్తున్నామని చెప్పారు.. ఆక్వా రంగంలో 30శాతం వృద్ధి సాధించామని ప్రకటించారు.. ఒకప్పుడు విద్యుత్ కోతలతో చాలా ఇబ్బందిపడేవాళ్లమని... ఇప్పుడు ఆ పరిస్థితిలో మార్పు వచ్చిందని గుర్తుచేశారు.. ఈ సమస్యను అధిగమించి మిగులు విద్యుత్ ఉండేలా చర్యలు తీసుకున్నామన్నారు. ఈ సదస్సుకు చంద్రబాబుతోపాటు.. సుప్రీంకోర్టు, హైకోర్టు న్యాయమూర్తులు హాజరయ్యారు. 

19:30 - February 21, 2017
18:42 - February 21, 2017

అమరావతి: పోలవరం ప్రాజెక్టు పనుల తీరుతెన్నులపై ఏపీ రాజధాని అమరావతిలో ముఖ్యమంత్రి చంద్రబాబు సమీక్ష సమావేశం నిర్వహించారు. గడువులోగా ప్రాజెక్ట్‌ పనులు పూర్తయ్యేలా అధికారులు చర్యలు తీసుకోవాలని, నిర్మాణ సంస్థలతో సమన్వయంతో ముందుకెళ్లాలని సీఎం సూచించారు. పనుల ఆలస్యంపై క్షేత్రస్థాయి పర్యవేక్షణ అధికారి రమేష్‌బాబును చంద్రబాబు నిలదీశారు. అయితే.. యంత్రసామాగ్రి పూర్తిగా చేరకపోవడం, చిల్లింగ్ ప్లాంట్లు రాకపోవడంతో పనులు ఆలస్యం అవుతున్నాయని రమేష్‌బాబు సీఎంకు వివరించారు.

జాప్యాన్ని ఇక సహించేది లేదని చంద్రబాబు స్పష్టం...

పోలవరం పనుల్లో జాప్యాన్ని ఇక సహించేది లేదని చంద్రబాబు స్పష్టం చేశారు. గడువులోగా పనులు పూర్తి చేయాలని, పనుల్లో నిర్లక్ష్యం, జాప్యం చోటుచేసుకుంటే వేటు తప్పదని చంద్రబాబు సీరియస్‌గా హెచ్చరించారు. పర్యవేక్షణ అధికారి రమేష్ బాబు, కన్సల్టెంట్ మేనేజర్ తో పర్యవేక్షణలో ప్రతిరోజు సీఎం కార్యాలయంతో సమన్వయం చేసుకునేలా అధికారిని నియమించాలని సీఎం ఆదేశించారు.

ఎల్‌ అండ్‌ టీ బావర్‌ గొంతెమ్మ కోర్కెలతో ...

మరోవైపు పోలవరం ప్రాజెక్టు డయాఫ్రం వాల్‌ నిర్మాణ పనులు చేపట్టిన గుత్తేదారు సంస్థ ఎల్‌ అండ్‌ టీ బావర్‌ గొంతెమ్మ కోర్కెలతో ప్రభుత్వానికి, అధికారులకు తలనొప్పిగా మారింది. దీనికి సంబంధించి ఎల్‌ అండ్‌ టీ కంపెనీపై సీఎం చంద్రబాబు సీరియస్‌ అయ్యారు. సమస్యలుంటే పరిష్కరించి పనుల్ని వేగవంతం చేయాలని ఆదేశించారు.

19:55 - February 20, 2017

హైదరాబాద్: ప్రభుత్వాలు చేపట్టే చర్యలు చేనేత కార్మికులను ఆదుకుంటాయా? గుంటూరులో చేనేత సత్యాగ్రహ దీక్ష కు జనసేన అధినేత పవన్ మద్దతు ప్రకటించారు. మరో వైపు చేనేత కార్మికుల పట్ల తెలుగు రాష్ట్రాలు సానుకూలంగా మాట్లాడుతున్నాయి. అవి ఎంత వరకు ఉపయోగపడుతున్నాయి? చేనేత అంటే ఏంటి? పవర్ లూం అంటే ఏమిటి? ఇదే అంశంపై 'హెడ్ లైన్ షో'లో చర్చను చేపట్టింది. ఈ చర్చలో మాజీ ఎమ్మెల్సీ చెరుపల్లి సీతారాములు, కాంగ్రెస్ నేత కొనగాల మహేష్, టిఆర్ ఎస్ నేత తాడూరి శ్రీనివాస్, కాంగ్రెస్ ఎంపి రాపోలు ఆనంద్ భాస్కర్ పాల్గొన్నారు. వారు ఏఏ అంశాలను ప్రస్తావనకు తెచ్చారో చూడాలనుకుంటే ఈ వీడియోను క్లిక్ చేయండి.

12:42 - February 17, 2017

విజయవాడ : ప్రభుత్వం, పార్టీ సమానంగా నడపాలన్న ఉద్దేశంతో సీఎం చంద్రబాబు ఉన్నారని హోంమంత్రి చిన రాజప్ప తెలిపారు. విజయవాడలో నిర్వహించిన టీడీపీ రాష్ట్రస్థాయి సమావేశ లక్ష్యం కూడా ఇదేనన్నారు. గ్రామ కమిటీలు ప్రారంభమయ్యాయని.. త్వరలోనే మండల, జిల్లా కమిటీలు కూడా ఆరంభమవుతాయని చినరాజప్ప స్పష్టం చేశారు.

11:55 - February 17, 2017

విజయవాడ : ఏపీలో తెలుగుదేశం ప్రభుత్వం శాశ్వతంగా అధికారంలో ఉండాలని సీఎం చంద్రబాబు ఆకాంక్షించారు. ఇందుకోసం పార్టీ నేతలు, కార్యకర్తలంతా కృషి చేయాలన్నారు. 80శాతం మంది ప్రజలు సంతృప్తిగా ఉన్నప్పుడే ఇది సాధ్యమని వివరించారు. టీడీపీ అధికారంలో ఉంటేనే రాష్ట్రాభివృద్ధి సాధ్యమన్నారు. 2004 ఎన్నికల్లో టీడీపీ ఓడిపోకపోతే ఏపీ ఇంకా ఎంతో అభివృద్ధి సాధించేందన్నారు. విజయవాడలో టీడీపీ రాష్ట్రస్థాయి వర్క్‌షాప్‌ను చంద్రబాబు ప్రారంభించారు. ప్రారంభోపన్యాసం చేసిన ఆయన... పార్టీకి కార్యకర్తలే బలమని చెప్పారు. ఎమ్మెల్యేగా గెలవాలన్నా కూడా కార్యకర్తల కృషి ఎంతో అవసరమన్నారు. అందుకే ప్రతి ఒక్క నాయకుడు ఎల్లప్పుడూ కార్యకర్తలతో మమేకం కావాలని సూచించారు. పార్టీ సమర్ధవంతంగా లేకపోతే ఎన్ని అభివృద్ధి కార్యక్రమాలు చేపట్టినా పెద్దగా ప్రయోజనం ఉండదన్నారు. ప్రభుత్వం చేపడుతున్న సంక్షేమ, అభివృద్ధి కార్యక్రమాలను ప్రజలకు తెలిజేసేలా కార్యకర్తలు కృషి చేయాలని పిలుపునిచ్చారు

07:04 - February 17, 2017

ఖమ్మం: కేసీఆర్‌ పాలనలో అన్ని వర్గాల ప్రజలు తీవ్ర అసంతృప్తితో ఉన్నారని సీపీఎం రాష్ట్రకార్యదర్శి తమ్మినేని వీరభద్రం అన్నారు. ఉద్యోగాలు, డబుల్‌ బెడ్‌రూమ్‌ ఇళ్లు, కేజీ టూ పీజీ ఉచిత విద్య అమలు చేయకుండా ప్రభుత్వం నిర్లక్ష్యంగా వ్యవహరిస్తోందని తమ్మినేని దుయ్యబట్టారు. ఎస్సీ, ఎస్టీ చట్టాన్ని ఎత్తేయాలని కేసీఆర్‌ ప్రభుత్వం పూనుకుంటోందని, కాంట్రాక్టర్లు, రాజకీయ నాయకులు, డబ్బున్న అధికారులే రాష్ట్రాన్ని మేసేస్తున్నారని తమ్మినేని విమర్శించారు. అందరికి సమాన అవకాశాలు కావాలన్నదే సీపీఎం మహాజన పాదయాత్ర ఉద్దేశమని తమ్మినేని అన్నారు. కులవివక్షకు గురైన రోహిత్‌ వేముల కుటుంబానికి న్యాయం చేయకుండా...కేంద్ర మంత్రులను కాపాడేందుకే.. అతని కులాన్ని వివాదస్పదం చేస్తున్నారని తమ్మినేని అన్నారు. రోహిత్‌ వేముల కులాన్ని మార్చేందుకు ప్రభుత్వం నిస్సిగ్గుగా ప్రయత్నిస్తోందని ఆయన ఆరోపించారు.

ప్రతి ఇంటిలో పిల్లలందరిని చదివించినప్పుడే.. ..

ప్రతి ఇంటిలో పిల్లలందరిని చదివించినప్పుడే.. అభివృద్ధి సాధ్యమవుతోందని, కానీ..కేసీఆర్‌ సర్కార్‌ విద్యావ్యవస్థను పూర్తిగా నాశనం చేసేందుకు పూనుకుందని తమ్మినేని ఆగ్రహం వ్యక్తం చేశారు.

తెలంగాణలో విద్యా రంగాన్ని కాపాడేందుకు సీపీఎం పోరాటం చేస్తోందని తమ్మినేని తెలిపారు. సంస్కరణల్లో భాగంగానే మిషన్‌ భగీరథ పథకాన్ని తీసుకొచ్చిందని, ఈ పథకం కోసం అప్పులు చేసి ప్రజలపై మోయలేని భారం వేస్తోందని పాదయాత్ర కోఆర్డినేటర్‌ వెంకట్‌ ఆరోపించారు. ప్రజాసమస్యలపై పోరాటం చేస్తున్న కోదండరామ్‌పై కేసీఆర్‌ ప్రభుత్వం ఎందుకు అక్కసు వెళ్లగక్కుతోందని ఆయన ప్రశ్నించారు.

సీపీఎం మహాజన పాదయాత్రకు విశేష స్పందన...

సీపీఎం మహాజన పాదయాత్రకు విశేష స్పందన లభిస్తోంది. 123వ రోజుకు చేరుకున్న పాదయాత్రకు జనం నీరాజనాలు పలుకుతున్నారు. ఖమ్మం జిల్లాలోని రాయనపేట, ఆళ్లపాడు, బోనకల్లు, ముష్టికుంట్ల, నాగులవంచలో పాదయాత్ర బృందం పర్యటించింది. ముష్టికుంట్ల గ్రామంలో రెండు కిలోమీటర్ల పొడవునా తమ్మినేని బృందానికి పూలవర్షంతో స్వాగతం పలికారు. అడుగడుగునా ప్రజలు పాదయాత్ర బృంద సభ్యులకు సాదరంగా ఆహ్వానిస్తూ.. యాత్రలో పాల్గొంటున్నారు. ప్రజలు తమ సమస్యలను తమ్మినేని బృందానికి విన్నవిస్తున్నారు. ఇప్పటికే 3వేల 300 కిలోమీటర్ల మేర యాత్రను పూర్తిచేశారు.

08:57 - February 16, 2017

హైదరాబాద్ : ముఖ్యమంత్రి చంద్రబాబునాయుడు ప్రతిపక్ష శాసనసభ్యులను ఎన్ని ప్రలోభాలకు గురిచేసినా వచ్చే ఎన్నికల్లో అధికారమని వైసీపీ దేనని ఆ పార్టీ అధినేత జగన్‌ చెప్పారు. అధర్మ గెలిచినట్టు కనిపించినా చివరకు నెగ్గేది ధర్మమేనన్నారు. కర్నూలు జిల్లా ఆళ్లగడ్డ నియోజకవర్గానికి చెందిన టిడిపి సీనియర్‌ నేత గంగుల ప్రభాకర్‌రెడ్డి హైదరాబాద్‌లో జగన్‌ సమక్షంలో వైసీపీ లో చేరారు. ప్రభాకర్‌రెడ్డితోపాటు వైసీపీ లో చేరిన తెలుగుదేశం నాయకులు, కార్యకర్తలకు కండువాలుకప్పి పార్టీలోకి ఆహ్వానించారు. చంద్రబాబు నీచమైన రాజకీయాలకు పాల్పడుతున్నారని ఈ సందర్భంగా జగన్‌ విమర్శించారు.

22:37 - February 15, 2017

గుంటూరు : తప్పు చేసిన వారెవ్వరూ తప్పించుకోలేరన్న సత్యాన్ని.. శశికళ విషయంలో న్యాయస్థానం నిరూపించిందని.. ఏపీ ముఖ్యమంత్రి చంద్రబాబు నాయుడు అభిప్రాయపడ్డారు. ప్రతిపక్ష నేత జగన్‌ శశికళకన్నా ఎక్కువ అవినీతికి పాల్పడ్డారని, అలాంటి వ్యక్తి రాజకీయాల్లో ఉండాల్సిన అవసరం ఉందా అని ప్రశ్నించారు. కాంగ్రెస్‌ ఎమ్మెల్సీ చెంగల్రాయుడును పార్టీలోకి స్వాగతిస్తూ.. చంద్రబాబు ఈ కీలక వ్యాఖ్యలు చేశారు. 
టీడీపీలో చేరిన చెంగల్రాయుడు 
కడప జిల్లా రైల్వే కోడూరు కాంగ్రెస్‌ ఎమ్మెల్సీ చెంగల్రాయుడు టీడీపీలో చేరారు. రాజధాని అమరావతిలోని చంద్రబాబు నివాసంలో ఆయన టీడీపీ తీర్థం పుచ్చుకున్నారు.  చెంగల్రాయుడుకు కండువా కప్పి పార్టీలోకి ఆహ్వానించిన చంద్రబాబు, విద్యార్థి దశ నుంచీ అనుబంధమున్న ఆయన టీడీపీలోకి రావడం సంతోషంగా ఉందని అన్నారు. ఈ సందర్భంగా ప్రతిపక్ష నేత జగన్మోహన్‌రెడ్డిని ఉద్దేశించి తీవ్ర వ్యాఖ్యలు చేశారు. శశికళ కంటే అత్యంత అధికంగా అవినీతికి పాల్పడిన జగన్‌కు రాజకీయాల్లో ఉండాల్సిన అవసరం ఉందా అని ప్రజలను ప్రశ్నించారు. 
వైసీపీ ఎమ్మెల్యేల ప్రవర్తనపైనా చంద్రబాబు ఛలోక్తులు 
రాజకీయాలను అడ్డుపెట్టుకొని ఆస్తులు సంపాదించడంపై సుప్రీంకోర్టు కూడా ఆందోళన వ్యక్తం చేసిందని, ప్రజలు మంచి నాయకులను ఆదరించి, గౌరవించాలని అన్నారు. దీర్ఘ కాలిక ప్రయోజనాలకోసం రాష్ట్రాన్ని స్వర్ణాంధ్రగా మార్చేందుకే.. ప్రజా ప్రతినిధులను పార్టీలోకి ఆహ్వానిస్తున్నామన్నారు. అసెంబ్లీలో వైసీపీ ఎమ్మెల్యేల ప్రవర్తనపైనా ఆయన ఛలోక్తులు విసిరారు. అమరావతిలో అసెంబ్లీని వారి దూకుడును నిలువరించేలా నిర్మించామన్నారు. ఈకార్యక్రమంలో కడప జిల్లా ఇంచార్జి మంత్రి గంటా శ్రీనివాసరావుతో పాటు, ఆజిల్లాకు చెందిన పలువురు ప్రజాప్రతినిధులు, పార్టీ నాయకులు పాల్గొన్నారు. 

 

Pages

Don't Miss

Subscribe to RSS - సీఎం చంద్రబాబు