హత్య

21:25 - August 17, 2018

హైదరాబాద్ : నగర శివారు రాజేంద్రనగర్‌లో జరిగిన హత్య, దోపిడీ కేసు సంచలనం సృష్టిస్తోంది. ఇది తెలిసినవారి పనేనని పోలీసులు అనుమానం వ్యక్తం చేస్తున్నారు. ఆస్తి కోసమే ఈ దారుణానికి ఒడిగట్టి ఉంటారని భావిస్తున్నారు. ఈ కేసును చేధించేందుకు పోలీసులు ప్రత్యేక బృందాలను నియమించి అన్ని కోణాల్లో దర్యాప్తు చేస్తున్నారు.
హత్య, దోపిడీ కేసు 
హైదరాబాద్‌ శివారు రంగారెడ్డి జిల్లా రాజేంద్రనగర్‌ పోలీసు స్టేషన్‌ పరిధిలోని ఉప్పర్‌పల్లి సిరిమల్లె కాలనీలో జరిగిన హత్య, దోపిడీ కేసు తీవ్ర సంచలనం సృష్టిస్తోంది. ఈ కేసుపై అనేక అనుమానాలు వ్యక్తం చేస్తున్న పోలీసులు... ఇది తెలిసివారి పనేనని ప్రాథమిక నిర్ధారణకు వచ్చారు. 
50తులాల బంగారం, రూ.50 లక్షలు దోపిడీ 
హత్యకు గురైన రాజేంద్రకుమార్‌ అగర్వాల్,  తారామణి హైదరాబాద్‌ బేగంబజార్‌లో హోల్‌సేల్‌ కిరాణ దుకాణం నిర్వహించేవారు. వృద్ధాప్యం, ఆపై అనారోగ్యంతో షాపు నిర్వహణ బాధ్యతలను చిన్న కుమారుడు రోహిత్‌కు అప్పగించారు. ఇంటికే పరిమితమైన రాజేంద్రకుమార్‌ అగర్వాల్‌, తారామణిని ముగ్గురు దుండగులు చేతులు, కాళ్లు కట్టివేసి, మూతికి ప్లాస్టర్‌ వేసి దోపిడికి పాల్పడ్డారు. ఇంట్లో ఉన్న 50 తులాల బంగారం, 50 లక్షల నగదు దోచుకెళ్లారని బాధిత కుటుంబ సభ్యులు పోలీసులకు ఫిర్యాదు చేశారు. ఆస్తమాతో బాధపడుతున్న రాజేంద్రకుమార్‌ అగర్వాల్‌ మూతికి ప్లాస్టర్‌ వేయడంతో ఉపిరాడక మృతిచెంది ఉంటారని అనుమానిస్తున్నారు. కేసు దర్యాప్తు ప్రారంభించిన పోలీసులు ఇది తెలిసినవారి పనేనని అనుమానం వ్యక్తం చేస్తున్నారు. 
పక్కా ప్రణాళికతో దోపిడీకి పాల్పడ్డారా ? 
ఓ భూమి కొనుగోలు కోసం అగర్వాల్‌ దంపతులు 50 లక్షల నగదు సిద్ధం చేసుకున్నారు. దీనికి సంబంధించిన భేటీ శుక్రవారం జరగాల్సి ఉంది. అయితే అగర్వాల్‌ దంపతులు డబ్బు దాచిన విషయం దోపిడీ దొంగలకు ఎలా తెలిసిందన్న అనుమానాన్ని పోలీసులు వ్యక్తం చేస్తున్నారు. పక్కా ప్రణాళికలతో దుండగులు ఈ దోపిడీకి పాల్పడ్డారా... లేక తెలిసినవారే సుపారీ ఇచ్చి దొంగతనానికి పాల్పడే విధంగా చేశారా.. అన్న కోణంలో  కేసు దర్యాప్తు చేస్తున్నారు.  
భూమి రిజిస్ట్రేషన్‌కు సంబంధించిన సమావేశాన్ని అగర్వాల్‌ నివాసంలోనే ఏర్పాటు చేయడానికి గల కారణాలపైనా పోలీసులు ఆరా తీస్తున్నారు. యాభై లక్షల రూపాయల డబ్బు దాచిన విషయం అగ్వర్వాల్‌ దంపతులకు మాత్రమే తెలుసు. కుమారుడు డబ్బు కోసం వేధించడం, ఇంతలోనే హత్య జరగడం పలు అనుమానాలకు తావిస్తోంది.
కట్టేసిన చేతులను ఎలా విడిపించారు ?  
వృద్ధ దంపతులు ఉంటున్న ఇంట్లోకి దుండగులు ప్రవేశించాలంటే తలుపులు లేదా కిటికీలు బద్దలు కొట్టాలి. ఇంటికి తాళంవేసి ఉంటే పగులగొట్టాలి. కానీ అలాంటిదేమీ లేకుండా ఇతరులు ఇంట్లోకి ప్రవేశించడంపై పోలీసులు అనుమానం వ్యక్తం చేస్తున్నారు. అగర్వాల్‌ హత్య జరిగిన సమయంలో హతుడి భార్య తారామణి మెడలోని బంగారం, చేతికి ఉన్న బంగారు గాజులు అలాగే ఉన్నాయి. దొంగలైతే తారామణి ఒంటిపై ఉన్న నగలును ఎందుకు దోచుకోలేదన్న అనుమానం వ్యక్తం చేస్తున్నారు. ఇంట్లో ఎలాంటి పెనుగులాట జరగలేదు. ఎవరికీ ఎలాంటి గాయాలు కాలేదు. దోపిడీ దొంగలైతే అడ్డొచ్చిన వారిని హత్య చేసి  తమపని పూర్తి చేసుకుంటారు. కానీ అలాంటిదేమీ జరగకపోవడంపై పోలీసులు అనుమానం వ్యక్తం చేస్తున్నారు. వృద్ధ దంపతుల చేతులు కట్టేసి దోపిడీకి పాల్పడితే.. చోరీ తర్వాత చేతులు ఎలా విడిపించారన్న అంశంపై కూడా సందేహాలు వ్యక్తమవుతున్నాయి. అన్ని కోణాల్లో దర్యాప్తు చేస్తున్న ఈ కేసును తర్వలోనే చేధిస్తామని సైబరాబాద్‌ పోలీసులు కమిషనర్‌ వీసీ సజ్జనార్‌ చెబుతున్నారు. దర్యాప్తు కొలిక్కి వస్తేకానీ... ఈ కేసులో మిస్టరీ వీడే అవకాశం లేదు. త్వరలోనే అన్ని వాస్తవాలూ వెలుగు చూస్తాయని పోలీసులు చెబుతున్నారు. 

 

13:32 - August 15, 2018

హైదరాబాద్‌ : రాజేంద్రనగర్‌ పోలీస్‌స్టేషన్‌ పరిధిలోని పీ అండ్‌ టీ కాలనీలో దారుణం జరిగింది. సుడాన్‌ దేశానికి చెందిన రాషెష్‌ అనే యువకుడు దారుణహత్యకు గురయ్యాడు. రాత్రి భోజనం చేసిన తర్వాత ముగ్గురి మధ్య చిన్న వివాదం చోటుచేసుకుంది. దీంతో క్షణికవేశానికి లోనైనా తోటి విద్యార్ధులే రాషెష్ ను కత్తితో పోడిచి గాయపరిచారు. తీవ్రగాయాలపాలైన రాషెష్ అక్కడికక్కడే మృతి చెందాడు. విషయం తెలుసుకున్న పోలీసులు నిందితులను అదుపులో తీసుకొని కేసు నమోదు చేసి దర్యాప్తు చేపట్టారు.

12:37 - August 13, 2018

హైదరాబాద్ : గచ్చిబౌలిలోని కొండాపూర్ పోలీస్ బెటాలియన్ లో దారుణం జరిగింది. జీవితాంతం తోడుండాల్సిన భర్తే భార్యను హతమార్చారు. రిటైర్డ్ ఆర్ఎస్ఐ అంజయ్య తన భార్యను అతిదారుణంగా గొంతుకోసి హత్య చేశాడు. అనంతరం పోలీసుల ముందు లొంగిపోయాడు. పోలీసులు కేసు నమోదు చేసి దర్యాప్తు చేపట్టారు. పోలీసుల వివరాల ప్రకారం.. ఆంజనేయరెడ్డి, లక్ష్మీ దంపతులు గచ్చిబౌలి కోడాపూర్ లోని గౌతమి ఎన్ క్లేవ్ 101 ఫ్లాట్ నెంబర్ సెకండ్ ప్లర్ లో ఉంటున్నారు. కొండాపూర్ బెటాలియన్ లో ఆంజనేయరెడ్డి ఆర్ ఎస్ ఐగా విధులు నిర్వహిస్తున్నాడు. ఈనేపథ్యంలో ఆంజనేయరెడ్డికి వేరే మహిళతో వివాహేతర సంబంధం ఉంది. ఇటీవలే ఆంజనేయరెడ్డి రిటైర్డ్ అయ్యారు. అయితే రిటైర్డ్ అయినప్పుడు వచ్చిన డబ్బులను భర్త అక్రమ సంబంధం పెట్టుకున్న వేరే మహిళకు ఇచ్చిన నేపథ్యంలో ఆంజనేయరెడ్డి, భార్య లక్ష్మీకి గొడవ జరిగింది. ఈక్రమంలో అసహనం కోల్పోయిన ఆంజనేయరెడ్డి భార్య లక్ష్మీని కత్తితో పొడిచి అత్యంత దారుణంగా హత మార్చాడు. ఆ తర్వాత గచ్చిబౌలి పీఎస్ లో లొంగిపోయాడు. గచ్చిబౌలీ పోలీసులు అంజయ్యను ఘటనాస్థలికి తీసుకొచ్చారు. హత్యకు ఉపయోగించిన ఆయుధం కత్తిని స్వాధీనం చేసుకున్నారు. ఐపీసీ సెక్షన్ 302, 506 సెక్షన్ల కింద ఆయనపై కేసు నమోదు చేసుకుని విచారణ జరుపుతున్నారు. కుటుంబ కలహాలతోనే భార్య లక్ష్మీని హత్య చేసినట్లు అంజనేయరెడ్డి, కుటుంబీకులు విచారణలో ఒప్పుకున్నారు. నిద్రిస్తున్న భార్యను తానే హత్యచేసినట్లు ఆంజనేయరెడ్డి ఒప్పుకున్నారు. మృతదేహాన్ని గాంధీ ఆస్పత్రి మార్చురీకి తరలించారు. ఈఘటనతో గౌతమి ఎన్ క్లేవ్ లో విషాద ఛాయలు అలుముకున్నాయి. మరిన్ని వివరాలను వీడియోలో చూద్దాం... 

09:47 - August 7, 2018

హైదరాబాద్ : వేధింపులు తాళలేక భర్తను భార్య హతమార్చింది. గుంటూరు జిల్లాకు చెందిన ఉష, జగన్ దంపతులు ఫిల్మ్ నగర్ లో రెండు సంవత్సరాలుగా నివాసముంటున్నారు. గత కొంతకాలంగా భార్యభర్తల మధ్య గొడవలు జరుగుతున్నాయి. జగన్ తరచూ ఉషను వేధిస్తున్నాడు. వేధింపులు తాళ లేక మద్యంలో మత్తులో ఉన్న భర్త నోట్లో హిట్ స్ప్రే చల్లడంతో అతను అపస్మాకరక స్థితికి చేరుకున్నాడు. ఆ తర్వాత అతన్ని చంపేసింది. అనంతరం అక్కడి నుంచి ఉష పరారయ్యారు. స్థానికుల సమాచారం మేరకు పోలీసులు, క్లూస్ టీమ్ ఘటనా స్థలికి చేరుకున్నారు. మృతదేహాన్ని పోస్టుమార్టం నిమిత్తం ఉస్మానియా ఆస్పత్రికి తరలించారు. జగన్ కుటుంబానికి సమాచారం అందించారు. జూబ్లీహిల్స్ పోలీసులు ఆమెను అదుపులోకి తీసుకున్నారు. 

17:10 - July 31, 2018

రంగారెడ్డి : జిల్లాలోని రాజేంద్రనగర్‌లో దారుణం చోటుచేసుకుంది. ప్రియుడితో కలిసి భార్య భర్తను చంపేసింది. అనంతరం మృతదేహాన్ని తగలబెట్టి మూసీనదిలో పడవేశారు. మృతుడు శివరాంపల్లికి చెందిన ఆనంద్‌గా పోలీసులు గుర్తించారు. మృతదేహం కోసం పోలీసులు మూసీనదిలో గాలింపు చేపట్టారు. 

15:47 - July 25, 2018

హైదరాబాద్‌ : మీర్‌పేటలో విషాదం నెలకొంది. జిల్లెలగూడకు చెందిన హరిచంద్‌ గౌడ్‌ అనే వ్యక్తి గొంతు కోసుకొని ఆత్మహత్య చేసుకున్నాడు. గతంలో హరిచంద్‌ భార్య, పిల్లలను హత్య చేసిన కేసులో అతను నిందితుడుగా ఉన్నాడు. ఈ నేపథ్యంలో హరిచంద్‌ ఆత్మహత్యకు పాల్పడ్డాడా లేక హత్యకు గురయ్యాడా అన్న కోణంలో పోలీసులు దర్యాప్తు చేస్తున్నారు. 

13:38 - July 24, 2018

రాజన్న సిరిసిల్ల : జిల్లా గంభీరావుపేట మండలం గోరంటాల పెద్దమ్మ శివారులో ఓ వ్యక్తి దారుణ హత్యకు గురయ్యాడు. దుండగులు వ్యక్తిని హత్య చేసి మొండెం, తలను వేరు చేశారు. మృతుని వివరాలు ఇంకా తెలియలేదు. దర్యాప్త కొనసాగుతోంది.

 

11:03 - July 23, 2018

హైదరాబాద్ : పోలీసుల విచారణలో ఒకొక్కసారి వింత వింత వాస్తవాలు బైటపడుతుంటాయి. హైదరాబాద్ నగరంలో దాదాపు ప్రతీ రోజు నేరాలు జరుగతుండటం పరిపాటిగా మారిపోయింది. హత్యలు, ఆత్మహత్యలు..అనుమానాస్పద మృతి కేసులు ఎక్కడో ఒకచోటు బైటపడుతునే వుంటాయి. ఈ నేపథ్యంలో ఓ ఆత్మహత్య కేసును నమోదు చేసుకున్న పోలీసులు విచారణ చేపట్టిన నేపథ్యంలో మృతుడి భార్య హత్య కేసు వెలుగులోకి రావటం విస్మయాన్ని కలుగజేసింది.
ఆత్మహత్యకు పాల్పడ్డ మాధవ్..
రైలుకింద పడి ఆత్మహత్యలు పరిపాటిగా మారిపోయాయి. ఈ క్రమంలో రైలు కిందపడి ఒక వ్యక్తి ఆత్మహత్య చేసుకున్నాడు. ఈ కేసును ఛేదిస్తున్న క్రమంలో పోలీసులు, ఆ వ్యక్తి భార్య హత్యకు గురైన ఘటన వెలుగులోకి వచ్చింది. హైదరాబాద్ పరిధిలోని నల్లకుంటలో ఈ ఘటన చోటుచేసుకుంది. నల్లగొండ జిల్లాకు చెందిన నల్లకుంట సిండికేట్ బ్యాంకులో అసిస్టెంట్ మేనేజర్ గా పనిచేసే మాధవ్ కు అదే జిల్లాకు చెందిన సుమలత అనే యువతిని 2017లో వివాహం చేసుకున్నాడు. వివాహం జరిగిన ఏడాదిలోపు నుండే వారిద్దరి మధ్య అభిప్రాయబేదాలతో విభేదాలు ఏర్పడ్డాయి. దీంతో ఇద్దరి మధ్య తరచూ గొడవలు జరుగుతూ ఉండేవి. భార్యపై అనుమానాన్ని పెంచుకున్న మాధవ్ జులై 21న విద్యానగర్ సమీపంలో ఎంఎంటీఎస్ రైలు కిందపడి ఆత్మహత్యకు పాల్పడ్డాడు. మాధవ్ మృతి తరువాత సుమలత అదృశ్యం అయ్యింది. దీంతో మాధవ్ హత్యకు భార్య సుమలత ఉందా? అన్న కోణంలో పోలీసులు విచారణ ప్రారంభించారు.
కుమార్తె హత్య బైటపడిన వైనం..
ఈ క్రమంలో కుమార్తె సుమలత ఆచూకీ తెలియని ఆమె తల్లిదండ్రులు నల్లకుంటలోని ఇంటికి వచ్చారు. తాళం వేసున్న ఇంటిని పగులగొట్టేందుకు యత్నించారు. కానీ ఇంటి యజమానికి ఒప్పుకోలేదు. దీంతో వారు, ఇంటి యజమానితో కలిసి పోలీసులకు సమాచారం ఇచ్చారు. సమాచారం అందుకున్న పోలీసులు వచ్చిన అనంతరం మాధవ్ అద్దెకుండే ఇంటి తాళం పగులగొట్టి లోపలికి వెళ్లి చూడగా, మంచంపై సుమలత మృతదేహం కనిపించింది. గొంతుకు చున్నీతో ఉరేసి, ఆపై దిండు ముఖంపై అదిమి ఊపిరాడకుండా చేసి చంపినట్టుగా పోలీసులు నిర్ధారించారు. అనుమానంతో ఆమెను హత్య చేసిన భర్త, ఇంటికి తాళం వేసి వెళ్లి, ఆత్మహత్య చేసుకున్నాడని భావిస్తున్న పోలీసులు, కేసును సమగ్రంగా దర్యాఫ్తు చేస్తామని తెలిపారు.

09:44 - July 22, 2018

మేడ్చల్‌ : జిల్లాలోని కీసర మండల కేంద్రంలో వృద్ధురాలిని ఆగంతకులు హత్య చేశారు. కుతడి పెద్దమ్మను గొంతు నులిమి చంపి నగలను దోచుకెళ్ళారు దుండగులు.  మృతురాలిది యాదాద్రి జిల్లా మల్యాల గ్రామం. కాగా.. కూతురిని చూడటానికి వచ్చిన పెద్దమ్మ దుండగుల చేతిలో హతమైందని బంధువులు ఆవేదన చెందుతున్నారు. సమాచారం అందుకున్న పోలీసులు, ఫోరెన్సిక్‌ ల్యాబ్, డాగ్‌స్క్వాడ్‌ ద్వారా వివరాలు సేకరిస్తున్నారు.

 

16:30 - July 21, 2018

రాజస్థాన్ : గోరక్షణ పేరుతో చట్టాన్ని చేతుల్లోకి తీసుకోవద్దని సుప్రీంకోర్టు పలుమార్లు హెచ్చరించినా దాడులు మాత్రం ఆగడం లేదు. రాజస్థాన్‌లోని అల్వార్‌ జిల్లాలోని రామ్‌గఢ్‌లో ఆవులను స్మగ్లింగ్‌ చేస్తున్నారనే నెపంతో గ్రామస్తులు ఓ యువకుడిని కొట్టి చంపారు. ఈ ఘటనపై పోలీసులు కేసు నమోదు చేసి దర్యాప్తు చేపట్టారు. మృతుడిని హర్యానాకు చెందిన అక్బర్‌ ఖాన్‌గా పోలీసులు గుర్తించారు. ఈ ఘటనకు సంబంధించి పలు సెక్షన్ల కింద పోలీసులు కేసు నమోదు చేశారు. శుక్రవారం రాత్రి అక్బర్‌, అస్లామ్‌ ఆవులను తీసుకెళ్తుండగా.. అల్వార్‌ గ్రామస్తులు అడ్డుకున్నారు. భయాందోళనలకు గురైన ఆ యువకులు ఆవులను వదిలి పారిపోయే ప్రయత్నం చేశారు. గ్రామస్థులు వారిని వెంబడించి అక్బర్‌ను పట్టుకుని చితకబాదారు. అస్లామ్‌ వారి నుంచి తప్పించుకున్నాడు. నిందితులను త్వరలోనే అరెస్ట్‌ చేస్తామని అల్వాల్‌ ఎఎస్‌పి అనిల్‌ బైజల్‌ తెలిపారు. వారు ఆవుల అక్రమ రవాణకు పాల్పడ్డారా... అన్నది ఇంకా స్పష్టత లేదన్నారు.  ఈ ఘటనను రాజస్థాన్‌ ముఖ్యమంత్రి వసుంధరా రాజే ఖండించారు. నిందితులపై తగిన చర్యలు తీసుకుంటామని తెలిపారు. 

 

Pages

Don't Miss

Subscribe to RSS - హత్య