హైదరాబాద్‌

13:03 - June 13, 2018

హైదరాబాద్ : అందరూ ఆత్మగౌరవంతో బ్రతకాలి. అందుకే  డబుల్‌ బెడ్‌ రూం ఇళ్లు నిర్మిస్తున్నాం. మీరున్న స్థలాలు ఖాళీ చెయండి. 14 నెలల్లో ఇళ్లు కట్టిస్తాం.. ఇది గ్రేటర్‌ హైదరాబాద్‌ పరిధిలో డబుల్‌ బెడ్‌ రూం ఇళ్ల నిర్మాణం సమయంలో ప్రభుత్వం పెద్దలు అధికారులు చెప్పిన మాటలు. కానీ ఇళ్ల నిర్మాణ పనుల్లో మాత్రం ఎలాంటి పురోగతి లేదు. గ్రేటర్‌ పరిధిలో స్లమ్స్‌ను తొలగించి, ఇళ్లు నిర్మిస్తామన్నా పనులు మాత్రం ఒక్క అడుగు కూడా ముందుకు పడలేదు.

హైదరాబాద్‌ నగరంలో లక్ష డబుల్‌ బెడ్‌ రూం ఇళ్ల నిర్మాణం చేపడుతామని ప్రభుత్వం ప్రకటించింది. ప్రభుత్వ ఖాళీ స్థలాలతో పాటు మురికి వాడలు... బస్తీల్లో కూడా రెండు పడక గదులను నిర్మిస్తామన్నారు. అయితే మురికి వాడల్లో ఇళ్ల నిర్మాణం పెద్ద సమస్యగా మారింది. అక్కడున్న కుటుంబాలను ఒప్పించి, భూవివాదాలను చక్కబెట్టడం అధికారులకు తలనొప్పిగా మారింది. మరో వైపు లబ్ధిదారులు ఒప్పుకున్న ప్రాంతాల్లో కూడా నిర్మాణ పనులు పూర్తికాకపోవడంతో చర్చనీయాంశంగా మారింది.

ఇక కార్వాన్‌ నియోజకవర్గంలో గుడిమల్కాపూర్‌ బోజగుట్ట వద్ద ఉన్న మురికివాడలో 1800 కుటుంబాలు నివసిస్తున్నాయి. ఈ స్లమ్‌లో డబుల్‌ బెడ్‌ రూం ఇళ్ల నిర్మాణానికి ప్రభుత్వం శ్రీకారం చుట్టింది. 14 నెలల్లో నిర్మాణ పనులు పూర్తిచేస్తామని, అప్పటి వరకు పక్కనే ఉన్న ఖాళీ స్థలాల్లో గుడిసెలు ఏర్పాటు చేసుకోవచ్చంటూ అంధికారులు సెలవిచ్చారు. దీంతో కొంతమంది అక్కడే గుడిసెలు వేసుకోగా మరి కొందరు... ఇతర ప్రాంతాల్లోకి వెళ్లారు. ఇప్పటికి 7 నెలలు గడుస్తున్నా పనుల్లో పురోగతి కనిపించకపోవడంతో స్థానికులు ఆగ్రహం వ్యక్తం చేస్తున్నారు. అధికారులు పనుల్లో తీవ్రజాప్యం చేస్తున్నారని లబ్ధిదారులు మండిపడుతున్నారు.

మొత్తం 68బ్లాకుల్లో  1800 కుపైగా ఇళ్లు నిర్మించాల్సి ఉంటే 5,6 బ్లాకులకు మించి పనులు కాలేదు. టెండర్‌ అగ్రిమెంట్‌ పూర్తయ్యి 7 నెలలు అయినా.. పనుల్లో మాత్రం వేగం లేదని బోజగుట్ట వాసులు అంటున్నారు. పక్కనే చిన్న అవాసాలు ఏర్పాటు చేసుకొని  అనేక ఇబ్బందులు పడుతున్నామని బాధితులు ఆవేద వ్యక్తం చేస్తున్నారు. పనులు త్వరగా పూర్తిచేయాలని వారు డిమాండ్ చేస్తున్నారు. 

జిహెచ్‌ఎంసీ సీటీ పరిధిలోని మురికి వాడల్లో 10వేల ఇళ్ల వరకు నిర్మిస్తోంది. కొన్ని ప్రాంతాల్లో డబుల్‌ బెడ్‌ రూం ఇళ్ల నిర్మాణానికి కోర్టు కేసులు, భూవివాదాలు వెంటాడుతున్నాయి. వివిధ విభాగాల అధికారులు సమన్వయంతో పనిచేసిప్పుడు మాత్రమే ప్రాజెక్టు పట్టాలెక్కుతుందని లేదంటే సామన్యూలకు కష్టాలు తప్పవని స్థానికులు అంటున్నారు.  

11:49 - June 13, 2018

హైదరాబాద్‌ : హైదరాబాద్ క్రికెట్‌ అసోసియేషన్‌ అధ్యక్షుడు వివేక్‌కు హైకోర్టులో ఎదురుదెబ్బ తగిలింది. వివేక్‌ ఎన్నిక చెల్లదంటూ అంబుడ్స్‌మన్‌ ఇచ్చిన తీర్పును నిలిపివేస్తూ హైకోర్టు సింగిల్‌ జడ్జ్‌ ఇచ్చిన మధ్యంతర ఉత్తర్వులను... ధర్మాసనం కొట్టివేసింది. తాజాగా పునర్విచారణ జరపాలని సింగిల్‌ జడ్జిని ధర్మాసనం ఆదేశించింది. కోర్టు తాజా ఉత్తర్వులతో  వివేక్ మరోసారి హెచ్‌సీఏ అధ్యక్ష పదవి కోల్పోనున్నారు. 
అంబుడ్స్‌మన్‌ తీర్పును సమర్ధించిన హైకోర్టు
హెచ్‌సీఏ అధ్యక్షుడు వివేక్‌కు హైకోర్టులో చుక్కెదురైంది. హెచ్‌సీఏ పదవికి వివేక్‌ అనర్హుడన్న అంబుడ్స్‌మన్ తీర్పును హైకోర్టు సమర్థించింది. గతంలో సింగిల్ బెంచ్ ఇచ్చిన తీర్పును నిలిపివేస్తూ డివిజన్ బెంచ్ ఉత్తర్వులు జారీ చేసింది. ఈ విషయంపై మరోసారి పూర్తి విచారణ చేపట్టాలని ఆదేశించింది. అయితే తాజా ఉత్తర్వులతో వివేక్‌ ప్రత్యర్థులు హర్షం వ్యక్తం చేస్తున్నారు. ఇన్ని రోజులూ వివేక్‌ అడ్డదారిలో హెచ్‌సీఏలో ఇష్టారాజ్యంగా వ్యవహరించారని ఆరోపించారు. 
వివేక్‌ ఎన్నిక చెల్లదన్న అంబుడ్స్‌మన్‌ 
హైదరాబాద్‌ క్రికెట్‌ సంఘం ఎన్నికల్లో వివేక్‌పై పోటీ చేసి ఓడిపోయిన అజారుద్దీన్‌... వివేక్‌ ప్రభుత్వ సలహాదారుడిగా ఉంటూ హెచ్‌సీఏ పదవిలో కొనసాగడం లోధా కమిటీ సిఫార్సులకు, చట్టానికి విరుద్ధమంటూ అంబుడ్స్‌మెన్‌కు ఫిర్యాదు చేశారు. దీనిపై విచారణ జరిపిన అంబుడ్స్‌మన్‌ లోదా సంస్కరణలకు అనుగుణంగా వివేక్ ఎన్నిక చెల్లదని తేల్చిచెప్పింది. ఈ తీర్పును సవాల్‌ చేస్తూ వివేక్‌ హై కోర్టును ఆశ్రయించారు. విచారణ జరిపిన హైకోర్టు సింగిల్ జడ్జ్‌ అంబుడ్స్‌మన్‌ తీర్పును నిలిపివేస్తూ మధ్యంతర ఉత్తర్వులు ఇచ్చింది. దీంతో సింగిల్‌ జడ్జ్‌ తీర్పును సవాల్‌ చేస్తూ అజారుద్దీన్‌ ధర్మాసనంకు అప్పీలు చేశారు. అయితే తాజాగా అంబుడ్స్‌మన్‌ తీర్పునే తాజాగా ధర్మాసనం సమర్ధించింది. అయితే 2017లో హెచ్‌సీఏకు ఎన్నికలు జరిగినప్పటి నుండి అధ్యక్ష, కార్యదర్శులు ఈ ఎన్నికను తీవ్రంగా వ్యతిరేకించారు. ముఖ్యంగా వివేక్‌ను ఎన్నిక చేయడంపై విమర్శలు వెల్లువెత్తాయి. అంబుడ్స్‌మన్‌కు వేలాదిగా ఫిర్యాదులు చేరాయి. 
వివేక్‌పై తీవ్ర స్థాయిలో ఆరోపణలు
వివేక్‌ తెలంగాణ రాష్ట్ర ప్రభుత్వానికి సలహాదారు....ఇది కేబినేట్‌ మంత్రి స్థాయి పోస్టు. జస్టిస్‌ లోదా సిఫార్సుల ప్రకారం వివేకానంద హెచ్‌సీఏ అధ్యక్ష పదవికి అనర్హుడు. అయినప్పటికీ స్టేడియం స్పాన్సర్‌షిప్‌ కోసం హెచ్‌సీఏపై కోర్టులో పోరాటం చేస్తున్నారు. గతంలో హెచ్‌సీఏ ఎన్నికలకు నామినేషన్‌ దాఖలు చేసేందుకు వచ్చిన రోజునే వివేక్‌పై తీవ్ర స్థాయిలో ఆరోపణలు వెల్లువెత్తాయి. ప్రత్యర్థులు ఆయన విషయాన్ని ఎన్నికల అధికారి రాజీవ్‌రెడ్డి దృష్టికి తీసుకురాగా ఆయన వాటిని ఖాతరు చేయకుండా పక్కన పెట్టారు. 
హైకోర్టు తీర్పును స్వాగతిస్తున్నానన్న అజారుద్దీన్‌
హైకోర్టు తీర్పును స్వాగతిస్తున్నట్లు భారత మాజీ కెప్టెన్‌ అజారుద్దీన్‌ తెలిపారు. వివేక్‌పై అంబుడ్స్‌మెన్‌ తీసుకున్న నిర్ణయమే సరైందన్నారు. మొదటి నుండి తాము వివేక్‌ ప్యానల్‌పై పోరాటం చేస్తున్నామని చివరకు న్యాయమే గెలిచిందన్నారు. ఇక హెచ్‌సీఏలో ఏం జరగాలన్న దానిపై జనరల్‌ బాడీ మీటింగ్‌లో నిర్ణయిస్తామన్నారు. 

 

13:37 - June 3, 2018

హైదరాబాద్‌ : కర్ణాటక ఎన్నికల ఫలితాలు తెలుగు రాష్ట్రాల ముఖ్యమంత్రులకు బుద్ది చెప్పాయని తెలంగాణ బీజేపీ అధ్యక్షుడు లక్ష్మణ్‌ అన్నారు. 40 ఏళ్లు పాలించిన కాంగ్రెస్‌ చేయలేని అభివృద్ధిని మోదీ సర్కార్‌ నాలుగేళ్లలో చేసిందన్నారు. 'సబ్‌ కా సాత్‌.. సబ్‌ కా వికాస్‌' అనే నినాదంతో ముందుకువెళ్తున్నామన్నారు. కేంద్రంలో బీజేపీ సర్కార్‌ ఏర్పడడంతో... ప్రజలు అవినీతి పాలన నుంచి విముక్తి పొందారన్నారు. కేంద్రం నుంచి విడుదలయ్యే ప్రతి పైసా ప్రజలకు నేరుగా వారి ఖాతాల్లోకే చేరుతుందన్నారు. 

 

08:47 - May 31, 2018

హైదరాబాద్ : అధికారుల నిర్లక్ష్యం ఇద్దరు కార్మికుల ప్రాణాలను బలిగొంది. జలమండలి వాటర్‌ పైప్‌లైన్‌ నిర్మాణం పనుల్లో భాగంగా... ఇద్దరు కార్మికులు మ్యాన్‌ హోల్‌లోకి దిగి సెంట్రింగ్‌ కర్రలు తీస్తుండగా విషవాయువులు వెలువడ్డాయి. దీంతో కార్మికులు మ్యాన్‌హోల్‌లో పడి మృతి చెందారు. దీంతో మృతుల కుటుంబాలలో విషాద ఛాయలు అలుముకున్నాయి.  
మ్యాన్‌ హోల్‌లోకి దిగిన ఇద్దరు కార్మికులు మృతి 
హైదరాబాద్‌ ఉప్పల్‌ క్రికెట్‌ స్టేడియం వద్ద విషాదం నెలకొంది. జల మండలి వాటర్‌పైప్‌లైన్‌ నిర్మాణ పనుల్లో భాగంగా మ్యాన్‌ హోల్‌లోకి దిగిన ఇద్దరు కార్మికులు మృతి చెందారు. సెంట్రింగ్‌ కర్రలు తీస్తుండగా ఈ ప్రమాదం జరిగింది. 
విషవాయువుల కారణంగా ఊపిరి ఆడక మృతి 
ఉప్పల్‌ స్టేడియం రోడ్డులో రెండు భారీ పైపులైన్‌లను వేరు చేస్తూ ఇన్స్‌పెక్షన్‌ ఛాంబర్ నిర్మించారు. అయితే ఉప్పల్‌ స్టేడియంలో ఐపీఎల్‌ మ్యాచ్‌లు జరగడంతో ఆ ఛాంబర్‌ కోసం ఏర్పాటు చేసిన సెంట్రింగ్‌ కర్రలు తొలగించలేదు. ఇటీవలే మ్యాచ్‌లు పూర్తి కావడంతో ఎల్‌ అండ్‌ టీకి నిర్మాణ సంస్థ అధికారులు అక్కడ పనులు మొదలు పెట్టారు. అయితే ఎలాంటి భద్రతా ప్రమాణాలు పాటించకుండా చాంబర్‌లో ఉన్న సెంట్రింగ్‌ను తొలగించాలని కార్మికులను ఆదేశించారు అధికారులు. దీంతో మ్యాన్‌హోల్‌లోకి దిగిన కార్మికులు విషవాయువుల కారణంగా ఊపిరి ఆడక చనిపోయారు. వీరిద్దరూ ఒరిస్సాకు చెందిన సంతోష్‌,విజయ్‌లుగా గుర్తించారు. 
ఘటనపై పూర్తి స్థాయి విచారణ 
ఘటనా స్థలాన్ని జలమండలి అధికారులు పరిశీలించారు. కార్మికుల మృతితో ఈ ఘటనపై పూర్తి స్థాయి విచారణకు ఆదేశించారు. నిర్మాణ సంస్థలకు నోటీసులు ఇచ్చి, బాధ్యులపై క్రిమినల్‌ చర్యలు తీసుకుంటామన్నారు. చనిపోయిన వారి కుటుంబీకులకు 10 లక్షల పరిహారం అందిస్తామని ప్రకటించారు. అయితే ఎన్ని హెచ్చరికలు చేస్తున్నా కొన్ని నిర్మాణ సంస్థలు తమ తీరు మార్చుకోకపోవడంతో ఇలాంటి ఘటనలు పునరావృతం అవుతున్నాయి. ఇప్పటికైనా అధికారులు కఠిన చర్యలు తీసుకోకపోతే మరిన్ని ప్రాణాలు బలి కావాల్సి ఉంటుందంటున్నారు నిపుణులు. ఇప్పటికైనా అధికారులు చర్యలు తీసుకోవాలంటున్నారు.
 

 

08:16 - May 31, 2018

హైదరాబాద్ : ఆర్టీసీని మూసేసి కార్పొరేట్‌ శక్తులకు అప్పనంగా కట్టబెట్టేందుకు సీఎం కేసీఆర్‌ యత్నిస్తున్నారని తెలంగాణ ఆర్టీసీ జాయింట్‌ యాక్షన్‌ కమిటీ కన్వీనర్‌ కె. రాజిరెడ్డి విమర్శించారు.  కార్మికుల న్యాయమైన డిమాండ్లు పరిష్కరించాలని అడిగితే... కార్మికుల వల్లే ఆర్టీసీ నష్టాల్లో కూరుకుపోయిందని మాట్లాడుతున్నారని ఆగ్రహం వ్యక్తం చేశారు.  హైదరాబాద్‌లోని సీబీఎస్‌ దగ్గర.. ఆర్టీసీ పరిరక్షణ - కార్మికుల వేతన ఒప్పందం - ప్రభుత్వ వైఖరి అనే అంశంపై బహిరంగ నిర్వహించారు.  కేసీఆర్‌ ఆర్టీసీ కార్మికులు, యూనియన్లపట్ల వివక్ష చూపుతున్నారని అన్నారు. తమ డిమాండ్లపై స్పందించకుంటే.... సమ్మెతో సహా ఎలాంటి పోరాటానికైనా సిద్దంగా ఉండాలని కార్మికులకు ఆయన పిలుపునిచ్చారు.  ఆర్టీసీ చెట్టును సీఎం కేసీఆర్‌ నరికివేసేందుకు  కుట్రలు చేస్తున్నారని కో- కన్వీనర్‌ వీఎస్‌ రావు అన్నారు. 

 

13:03 - May 30, 2018

హైదరాబాద్ : వేతన సవరణ చేపట్టాలంటూ దేశవ్యాప్తంగా బ్యాంకు ఉద్యోగులు సమ్మెకు దిగారు. రెండు రోజులపాటు దేశవ్యాప్తంగా బ్యాంకులు మూతపడనున్నాయి. ఎస్‌బీఐ తోపాటు  ప్రభుత్వరంగ, కొన్ని ప్రైవేటు బ్యాంకుల సేవలు నిలిచిపోనున్నాయి. 21 ప్రభుత్వ రంగ బ్యాంకులు, పాత తరం ప్రైవేట్‌ బ్యాంకులు, విదేశీ బ్యాంకులకు చెందిన సుమారు 10 లక్షల మంది ఉద్యోగులు, అధికారులు సమ్మెలో పాల్గొంటున్నారు. ఉద్యోగుల సమ్మెతో ఆన్‌లైన్‌ లావాదేవీలు మినహా ఎలాంటి సేవలు లభించవు. తెలుగు రాష్ట్రాల్లో దాదాపు 80వేల మంది ఉద్యోగులు ఈ సమ్మెలో పాల్గొననున్నట్లు బ్యాంకు ఉద్యోగ సంఘాల నాయకులు ప్రకటించారు. బ్యాంకులతో పాటు ఏటీఎం సేవలు కూడా  నిలిచిపోయాయి. సోమవారం కార్మిక విభాగం ప్రధాన కమిషనర్‌తో జరిగిన చర్చలు ఫలించక పోవడంతో బ్యాంకు ఉద్యోగుల సంఘాల ఐక్యవేదిక సమ్మెకు వెళ్లింది.  బ్యాంకుల పట్ల కేంద్రప్రభుత్వం చిన్నచూపు చూస్తోందని, కేవలం 2 శాతం వేతన పెంపు ప్రకటించి ఉద్యోగులను అవమానించిందని యూనియన్‌ నాయకులు  ఆగ్రహం వ్యక్తం చేశారు. దేశవ్యాప్త సమ్మెలో భాగంగా హైదరాబాద్‌లో బ్యాంకు ఉద్యోగులు ఆందోళనకు దిగారు. మరిన్ని వివరాలను వీడియోలో చూద్దాం... 

 

08:28 - May 26, 2018

పశ్చిమబెంగాల్ : ఐపీఎల్‌ ఫైనల్లోకి హైదరాబాద్‌ దూసుకెళ్లింది. శుక్రవారం రాత్రి ఈడెన్‌గార్డెన్స్‌లో జరిగిన మ్యాచ్‌లో 13 పరుగుల తేడాతో కోల్‌కతా ను మట్టికరిపించింది. బ్యాటింగ్‌, బౌలింగ్‌, ఫీల్డింగ్‌లోనూ మెరుపులు మెరిపించిన సన్‌రైజర్స్‌ గ్రాండ్‌గా ఫైనల్లోకి ఎంటర్‌ అయ్యారు. ఫైనల్లో చెన్నై సూపర్‌కింగ్స్‌తో హైదరాబాద్‌ తలపడనుంది.

చెలరేగిపోయిన సన్ రైజర్స్..
ఈడెన్‌గార్డెన్స్‌లో సన్‌రైజర్స్‌ చెలరేగిపోయారు. పదునైన బౌలింగ్‌తో నైట్‌రైడర్స్‌కు చుక్కలు చూపించారు. 13 పరుగుల తేడాతో విజయం సాధించిన హైదాబాద్‌ టీం.. ఫైనల్లోకి దూసుకెళ్లింది. తొలుత బ్యాటింగ్ చేసిన సన్‌రైజర్స్ నిర్ణీత 20 ఓవర్లలో 7 వికెట్ల నష్టానికి 174 పరుగులు చేసింది. 175 పరుగుల విజయలక్ష్యంతో బరిలోకి దిగిన కోల్‌కతా ఓపెనర్లు జట్టుకు మంచి ఆరంభాన్ని అందించారు. తొలి వికెట్‌కి 40 పరుగుల భాగస్వామ్యాన్ని నమోదు చేశారు. అయితే సిద్ధార్థ్‌ కౌల్ వేసిన నాలుగో ఓవర్‌లో నరైన్‌ భారీ షాట్‌కు ప్రయత్నించి బ్రాత్‌వైట్‌కి క్యాచ్ ఇచ్చి వెనుదిరిగాడు. రషీద్ వేసిన 9వ ఓవర్ మూడో బంతికి రానా రనౌట్ అయ్యాడు. ఆ తర్వాత రషీద్ బౌలింగ్‌లోనే ఉతప్ప్‌ 2పరుగుల వ్యక్తిగత స్కోర్‌ వద్ద క్లీన్ బౌల్డ్ అయ్యాడు.

జట్టును ఆదుకునేందుకు గిల్ యత్నం..
కెప్టెన్ దినేశ్ కార్తీక్ 8 పరుగులు చేసి షకీబ్ బౌలింగ్‌లో క్లీన్ బౌల్డ్ అయ్యాడు. ఈ దశలో లిన్ పట్టు వదలకుండా బ్యాటింగ్ చేశాడు. 31 బంతుల్లో 6 ఫోర్లు, 2 సిక్సులు కొట్టి 48 పరుగులు చేశాడు. కానీ రషీద్ వేసిన 13వ ఓవర్ 2 బంతికి ఎల్‌బీడబ్ల్యూ అయ్యాడు. రషీద్ వేసిన ఆ తర్వాతి ఓవర్‌లో లిన్ స్లిప్‌లో ఉన్న ధవన్‌కి క్యాచ్ ఇచ్చి వెనుదిరిగడంతో కోల్‌కతా కష్టాల్లోపడింది. కష్టాల్లోపడ్డ జట్టును శుభ్‌మాన్ గిల్ జట్టును ఆదుకొనే ప్రయత్నం చేశాడు. సన్‌రైజర్స్ బౌలింగ్‌ని ధీటుగా ఎదురుకుంటూ.. మ్యాచ్‌ను ఉత్కంఠగా మార్చాడు. అయితే ఆఖరి ఓవర్‌లో 15 పరుగులు కావాల్సి ఉండగా.. బ్రాత్‌వైట్ బంతులకు మావీ, గిల్‌లు వరుసగా పెవిలియన్ కు చేరారు. దీంతో సన్‌రైజర్స్ ఈ మ్యాచ్‌లో 13 పరుగల తేడాతో విజయం సాధించి ఫైనల్స్‌కి దూసుకెళ్లింది. అటు బ్యాటింగ్‌లోనూ, బౌలింగ్‌లోనూ, ఫీల్డింగ్‌లో అద్భుత ప్రదర్శన చేసిన రషీద్ ఖాన్‌కు మ్యాచ్ ఆఫ్ ది మ్యాచ్ అవార్డు దక్కింది. ఈనెల 27న ఫైనల్లో చెన్నై సూపర్‌కింగ్స్‌తో హైదరాబాద్‌ సన్‌రైజర్స్‌ తలపడనుంది. 

19:10 - May 25, 2018

హైదరాబాద్ : తెలంగాణ రాష్ట్రంలో బహుజన లెఫ్ట్‌ ఫ్రంట్‌ను ప్రతి గ్రామంలో విస్తృతంగా తీసుకెళ్తామని బీఎల్‌ఎఫ్‌ కన్వీనర్‌ తమ్మినేని వీరభద్రం అన్నారు. హైదరాబాద్‌ ఎస్వీకెలో జరిగిన రాష్ట్ర విస్తృత స్థాయి సమావేశంలో ఆయన పాల్గొన్నారు. జులై నెలలో ప్రతి అసెంబ్లీ నియోజకవర్గంలో 10వేల మందితో బహిరంగ సభ నిర్వహిస్తామన్నారు. తెలంగాణ పరిపాలనా విధానంలో మార్పు రావాలంటే బీఎల్‌ఎఫ్‌తోనే సాధ్యమన్నారు. 

07:54 - May 16, 2018

హైదరాబాద్ : ధర్నాచౌక్‌ను ఎత్తివేసి కేసీఆర్‌ సర్కార్‌ ఉద్యమాలు ఆపే ప్రయత్నం చేసిందనీ, కానీ ముఖ్యమంత్రి నిలయం ప్రగతిభవన్‌ కొత్త ధర్నచౌక్‌గా మారిందని పలువురు వక్తలు అన్నారు. ప్రభుత్వం ధర్నా చౌక్‌ను ఆక్యుపై చేసుకుని ఏడాది పూర్తి అయిన సందర్భంగా సోమాజిగూడ ప్రెస్ క్లబ్‌లో ఆక్యుపై ధర్నా చౌక్ కార్యక్రమాన్ని నిర్వహించారు. ఈ కార్యక్రమంలో ధర్నాచౌక్‌ పరిరక్షణ కమిటీ ప్రజాగొంతుక ధర్నాచౌక్‌ అనే పుస్తకాన్ని ఆవిష్కరించింది. కేసీఆర్ నిరంకుశ పాలనకు ధర్నాచౌక్‌ను మూసివేడమే నిదర్శనం అన్నారు. సర్కార్ కుట్రలను చేధించి వేలాది మందితో ధర్నాచౌక్‌ను ఆక్రమించినట్టు చాడ వెంకట్‌రెడ్డి గుర్తుచేశారు. అసెంబ్లీ ప్రజాప్రతినిధుల వేదిక అయితే, ధర్నాచౌక్‌ ప్రజల గొంతుకకు వేదికని రచయితల సంఘం నేత వరవరరావు అన్నారు.

 

16:55 - May 8, 2018

హైదరాబాద్‌ : నగరంలో హోర్డింగ్‌లు, ఫ్లెక్సీల ప్రమాదం పొంచిఉందని వాతావరణ శాఖ హెచ్చరికలు జారీ చేసింది. అకాల వర్షాలు, గాలులతో జాగ్రత్తలు తీసుకోవాలని వాతావరణ అధికారులు సూచిస్తున్నారు. చిన్నపాటి గాలులకే హోర్డింగ్‌లు, ఫ్లెక్సీలు కుప్పకూలుతుండటంతో ప్రజల్లో ఆందోళన నెలకొంది. ఫ్లెక్సీలు రోడ్లు, విద్యుత్‌ లైన్లపై పడిపోతుండటంతో ప్రజల్లో ఆందోళన నెలకొంది. హైదరాబాద్‌లో మొత్తం 2,651 హోర్డింగ్స్‌ ఉన్నాయి. వీటిలో 333 హోర్డింగ్‌లు అక్రమంగా ఏర్పాటు చేశారు. జీహెచ్‌ఎంసీ 115 హోర్డింగ్‌లను తొలగించింది. హైదరాబాద్‌ పబ్లిక్‌ను హోర్డింగ్‌లు హడలెత్తిస్తున్నాయి. 

 

Pages

Don't Miss

Subscribe to RSS - హైదరాబాద్‌