హైదరాబాద్‌

08:10 - October 18, 2018

హైదరాబాద్ : నగరంలో బుధవారం ఉదయం నుండి సాయంత్రం వరకు కురిసిన కుండపో్త వానతో నగర ప్రజలు తీవ్ర అవస్థలు పడ్డారు. కార్యాలయాలకు వెళ్లే సమయంలో వర్షం కురవడంతో వాహనదారులు తీవ్ర ఇక్కట్లకు గురయ్యారు. ప్రధాన కూడళ్లలో తీవ్ర ట్రాఫిక్ జాం ఏర్పడదింది. ఊహించని రీతిలో వాన కురవడంతో నగర ప్రజలు తీవ్ర భయాందోళనలకు గురయ్యారు. యూసుఫ్ గూడలోని కృష్ణానగర్‌లో రోడ్లపై నీటి ప్రవాహం పోటెత్తింది. 
దసరా సందర్భంగా ఈ ప్రాంతంలో అమ్మవారి విగ్రహాలు ఏర్పాటు చేశారు. వరద ఉధృతికి కృష్ణానగర్‌లోని సి బ్లాక్ పరిధిలోని అమ్మవారి మంటపాలు నీట మునిగిపోయాయి. ఓ అమ్మవారి విగ్రహం నీటిలో కొట్టుకపోతుండడం చూసిన స్థానికులు తీవ్ర ఆందోళన చెందారు. 

09:14 - October 17, 2018

హైదరాబాద్‌ : నగరంలో భారీ వర్షం కురిసింది. నగరం తడిసిముద్దైంది. పలు ప్రాంతాల్లో కుండపోతగా వర్షం పడింది.నగరంలోని బంజారాహిల్స్, జూబ్లీహిల్స్, చందానగర్, మియాపూర్, ఖైరతాబాద్‌, విద్యానగర్, అశోక్‌నగర్, బాగ్‌లింగంపల్లి, చిక్కడిపల్లి, ఆర్టీసీ క్రాస్ రోడ్డు, నారాయణగూడ, సికింద్రాబాద్, అల్వాల్‌తోపాటు పలు ప్రాంతాల్లో కుండపోత వర్షం కురిసింది. రహదారులు చెరువులను తలపించాయి. లోతట్టు ప్రాంతాలు జలమయం అయ్యాయి. పలుచోట్ల భారీగా ట్రాఫిక్ జామ్ అయింది. వాహనదారులు ఇబ్బందులు పడుతున్నారు. హైదరాబాద్ పరిసర ప్రాంతాల్లో వచ్చే 3 గంటల్లో భారీ వర్షం కురిసే అవకాశం ఉంది. వర్షంతోపాటు 32 కి.మీ వేగంతో గాలులు వీచే అవకాశం ఉంది. 

 

20:52 - October 12, 2018

హైదరాబాద్ : ఓ వ్యక్తి ఏసీ సీఎం చంద్రబాబు డూప్ లాగానే అన్నాడు. అచ్చం చంద్రబాబు పోలికలతో ఉన్నాడు. చంద్రబాబు లాంటి ముఖం, హెయిర్, గడ్డంతో ఉన్నాడు. బాబు పోలికలతో ఉన్న వ్యక్తి వీడియో ఒకటి యూట్యూబ్‌లో హల్ చల్ చేస్తోంది. ఓ హోటల్‌లో సర్వ్ చేస్తున్నట్లు ఉన్న వీడియోలో కనిపిస్తున్నాడు. ఈ వీడియో యూట్యూబ్‌లో ఇప్పుడు వైరల్ అయింది. ఆ వ్యక్తి అచ్చం చంద్రబాబు లాగా ఉండడంతో అతన్ని చూసేందుకు జనం హోటల్‌కు భారీగా వస్తున్నారు. అయితే ఈ వింత ఎక్కడ అనేది మాత్రం తెలియరాలేదు. 

 

19:39 - October 9, 2018

ఢిల్లీ : ఉస్మానియా ఆసుపత్రిలో వైద్యులు పాపకు అరుదైన శస్త్రచికిత్స చేశారు. పది నెలల పాప వీపుపై ఉన్న కణితిని శస్త్ర చికిత్స చేసి తొలగించారు. పాపకు ఉస్మానియా ఆసుపత్రిలోని న్యూరోసర్జరీ, ప్లాస్టిక్‌ సర్జరీ వైద్య నిపుణుల బృందం అరుదైన శస్త్ర చికిత్స విజయవంతంగా పూర్తి చేసింది.

వివరాల్లోకి వెళితే.. కామారెడ్డి జిల్లా బిచ్కుంద మండలం శాంతాపూర్‌ గ్రామానికి చెందిన ఇర్షాద్‌, సన దంపతుల కుమార్తె అనీలా.  పుట్టినప్పుడే అనీలా వీపుపై చిన్న గడ్డ ఉంది. వయస్సు పెరుగుతున్న కొద్దీ పాపతో పాటు కణితి పరిమాణం కూడా పెరుగుతూ వస్తోంది. తల్లిదండ్రులు పాపను తొలుత హైదరాబాద్‌లోని నీలోఫర్‌ ఆసుపత్రిలో చూపించి వైద్యం చేయాలని కోరారు. కానీ ఫలితం లేకుండా పోవడంతో మిన్న కుండిపోయారు. 10 నెలల వయస్సులో కణితి పరిమాణం పెరగడంతో చిన్నారి ఇబ్బంది పడింది. దాంతో తల్లిదండ్రులు ఇటీవలే ఉస్మానియా ఆస్పత్రిలోని న్యూరోసర్జరీ ఫ్రొఫెసర్‌ డాక్టర్‌ శ్రీధరాల శ్రీనివాస్‌ను సంప్రదించారు. చిన్నారికి పలు రకాలైన రోగ నిర్ధారణ పరీక్షలు నిర్వహించారు. ప్లాస్టిక్‌ సర్జరీ విభాగం ఫ్రొఫెసర్‌ డాక్టర్‌ పలుకూరి లక్ష్మీ, అనస్థీషియా ఫ్రొఫెసర్‌ డాక్టర్‌ పాండునాయక్‌లతో కలిసి ఈ నెల 6న శస్త్ర చికిత్స విజయవంతంగా పూర్తి చేశారు.

కార్పొరేట్‌ ఆసుపత్రుల్లో సుమారు రూ.3లక్షల ఖర్చయ్యే ఈ శస్త్ర చికిత్సను ఆరోగ్యశ్రీ సహకారంతో ఉస్మానియాలో పూర్తి ఉచితంగా చేశామని న్యూరోసర్జరీ ఫ్రొఫెసర్‌ డాక్టర్‌ శ్రీధరాల శ్రీనివాస్‌, సత్యనారాయణ తెలిపారు. ఫోలికాసిడ్‌ లోపం వల్ల జన్మించే పిల్లల్లో ఇలాంటి వ్యాధులు సంక్రమిస్తాయని చెప్పారు. గర్భిణి కావడానికి 6 నుంచి 8 నెలల ముందే ఫోలికాసిడ్‌ మాత్రలు వేసుకోవడం వల్ల జన్మించే పిల్లలకు ఎలాంటి జబ్బులు, లోపాలు ఉండవని పేర్కొన్నారు. 

 

14:08 - October 6, 2018

హైదరాబాద్‌ : తెలంగాణ రాష్ట్ర ఆపద్ధర్మ సీఎం కేసీఆర్‌పై కాంగ్రెస్‌ నేత డీకే అరుణ ఫైర్ అయ్యారు. వనపర్తిలో తెరాస ప్రజాఆశీర్వాద సభలో కేసీఆర్‌ తనపై చేసిన ఆరోపణలకు ఆమె ఘాటుగా సమాధానమిచ్చారు. కేసీఆర్‌ మాటల్లో ఓటమి భయం కనబడుతోందన్నారు. సమాధానం చెప్పలేకే కేసీఆర్‌ నోటికొచ్చినట్లు మాట్లాడుతున్నారని మండిపడ్డారు. ఇప్పుడు కూడా ఉద్యమ రోజులు అనుకుంటున్నారా? అని నిలదీశారు. ఈమేరకు ఆమె మీడియాతో మాట్లాడారు.

’నాలుగేళ్ల నుంచి నా గురించి ఏమీ మాట్లాడని మీరు ఇప్పడు నాపై వ్యక్తిగతంగా విమర్శలు చేస్తారా? మీ ఇంట్లో మహిళలు లేరా? జోగులాంబ అమ్మవారు కేసీఆర్‌ను తప్పక శిక్షిస్తుంది అని అన్నారు. తెలంగాణలో పుట్టిన మీకు ఇంత నీచ సంస్కృతి ఎలా వచ్చిందని నిలదీశారు. ముఖ్యమంత్రి స్థాయిలో ఉన్న వ్యక్తి ఎలా మాట్లాడాలో ముందు తెలుసుకోవాలని సూచించారు. బతుకుదెరువు, కుర్చీ కోసం ఉద్యమం పేరుతో ప్రజలను రెచ్చగొట్టారని మండిపడ్డారు. కేసీఆర్‌ దొంగ దీక్ష గురించి నిమ్స్‌కు వెళితే తెలుస్తుందని అన్నారు.

 

09:20 - September 29, 2018

హైదరాబాద్‌ : హైదరాబాద్ మెట్రోరైలుకు మరో అరుదైన గౌరవం దక్కింది. నిర్మాణం నుంచే అనేక అవార్డులు, రివార్డులు అందుకున్న రాజధాని మెట్రోరైల్‌ సౌకర్యాల కల్పనలోనూ, భద్రతలోనూ టాప్‌ప్లేస్‌ సాధించింది.  ప్రపంచశ్రేణి నగరాలైన లండన్‌, బోస్టన్‌, లియోన్‌, మాంచెస్టర్‌ మెట్రోలకంటే హైదరాబాద్‌ మెట్రోనే ప్రయాణికుల సేవల్లో టాప్‌వన్‌లో నిలిచింది. ప్రపంచవ్యాప్తంగా 13 నగరాల్లోని వివిధ రకాల ప్రజా రవాణా వ్యవస్థలను నిర్వహిస్తున్న ప్రాన్స్‌కు చెందిన కియోలిస్‌ సంస్థ జరిపిన సర్వేలో ఈ విషయాన్ని బయటపెట్టింది.
 
హైదరాబాద్‌ నగరంలో పరుగులు పెడుతున్న మెట్రోరైల్‌ పలు రికార్డులకు కేంద్ర బిందువు అవుతోంది. నిర్మాణం ప్రారంభం నుంచే అనేక అవార్డులను సొంతం చేసుకున్న మెట్రోరైల్‌... ప్రయాణికుల సంతృప్తి విషయంలోనూ అగ్రశ్రేణిలో నిలిచింది. ఇప్పటి వరకు రణగొణ ధ్వనుల మధ్య నిత్యం ట్రాఫిక్‌ జామ్‌లతో ఇబ్బందిపడే హైదరాబాదీయులకు.... కూల్‌, స్మూత్‌ జర్నీ అందిస్తోంది మెట్రోరైల్‌. 

 మెట్రోరైల్‌..  అందిస్తోన్న సేవలు,  భద్రత, సౌకర్యాలపట్ల నగరవాసులు ఫిదా అవుతున్నారు. మెట్రో స్టేషన్లు, రైళ్లలో అందుతున్న సేవలపై సంతృప్తి వ్యక్తం చేస్తున్నారు. ప్రాన్స్‌కు చెందిన కియోలిస్‌ అనే సంస్థ ప్రపంచ వ్యాప్తంగా 13 మాస్‌ ట్రాన్స్‌పోర్టు వ్యవస్థలపై అధ్యయనం చేసింది. వివిధ అంశాలపై సర్వే నిర్వహించింది.  ఇందులో హైదరాబాద్‌ మెట్రోరైల్‌ ఫస్ట్‌ ప్లేస్‌ దక్కించుకుంది.  ప్రపంచ వ్యాప్తంగా ఉన్న ముఖ్యమైన నగరాల్లో ట్రాన్స్‌పోర్టు వ్యవస్థలను స్టడీ చేయగా... అందులో మన హైదరాబాద్‌ మెట్రోనే అత్యుత్తమ సేవలు అందిస్తున్నట్టు తేలింది.  

హైదరాబాద్‌ మెట్రోను  ప్రారంభం నుంచే అవార్డులు వరించాయి. 2013లో ద గ్లోబల్‌ ఇంజనీరింగ్‌ ప్రాజెక్ట్‌ ఆఫ్‌ ద ఇయర్‌ అవార్డును కైవసం చేసుకుంది. నిర్మాణంలో  సేఫ్‌ పద్దతులను పాటించినందునా రాయల్‌ సొసైటీ ఫర్‌ ప్రివెన్షన్‌ ఆఫ్‌ యాక్సిడెంట్స్‌ వారు గోల్డ్‌ అవార్డును మెట్రోకు ప్రదానం చేశారు. వీటితోపాటు మరికొన్ని అవార్డులను కూడా హైదరాబాద్‌ మెట్రో సొంతం చేసుకుంది. మెట్రోరైల్‌ ఇక పూర్తిస్థాయిలో అందుబాటులోకి వస్తే మరెన్ని అవార్డులు వరిస్తాయో, ఇంకెలాంటి అద్భుతాలు చేస్తుందో చూడాలి.

19:53 - September 15, 2018

హైదరాబాద్‌ : బీజేపీ జాతీయ అధ్యక్షుడు అమిత్‌షాపై ఎంఐఎం అధినేత అసదుద్దీన్‌ ఒవైసీ విమర్శలు చేశారు. అమిత్‌షా హైదరాబాద్‌లో పోటీచేసినా తమ పార్టీయే గెలుస్తుందని ఒవైసీ వ్యాఖ్యానించారు. ఇవాళ తెలంగాణలో అమిత్‌షా పర్యటన నేపథ్యంలో ఆయనపై అసదుద్దీన్‌ ట్వీటర్‌ వేదికగా పలు వ్యాఖ్యలు చేశారు. ఇప్పుడు ఉన్నఐదు స్థానాలను కూడా బీజేపీ మళ్లీ ఎన్నికల్లో గెలవలేదని పేర్కొన్నారు. పెట్రోల్‌ ధరల నియంత్రణ, యువతకు ఉద్యోగ కల్పనపై బీజేపీ తమ నిర్ణయాలను వెల్లడించాలన్నారు.

 

10:39 - September 8, 2018

హైదరాబాద్‌ : కాంగ్రెస్ ఉపాధ్యక్షులు రాహుల్‌గాంధీని బఫూన్‌ అని కేసీఆర్‌ విమర్శించటంపై ఏఐసీసీ తెలంగాణ వ్యవహారాల ఇన్‌చార్జి ఆర్సీ కుంతియా మండిపడ్డారు. కేసీఆర్ పై కుంతియా త్రీవస్థాయిలో ధ్వజమెత్తారు. కేసీఆర్ ను ఉద్ధేశించి కుంతియా ఘాటు వ్యాఖ్యలు చేశారు. సచివాలయానికి వెళితే చస్తావని జ్యోతిష్కుడు చెప్పిన మాటలను నమ్మి నాలుగేళ్లుగా ఆ గడపదొక్కని బఫూన్‌ ప్రపంచంలో కేసీఆర్‌ ఒక్కడేనని ఘాటుగా విమర్శించారు. 'నెల వ్యవధిలోనే మోదీని 3సార్లు కలిశావు కదా? రాష్ట్రానికి ఏం సాధించావు? పోలవరంలా ఒక్క ప్రాజెక్టుకైనా జాతీయహోదా సాధించావా?' అని నిలదీశారు. తెలంగాణ ఇస్తే కాంగ్రెస్ లో టీఆర్‌ఎ్‌సను విలీనం చేస్తానని సోనియాగాంధీ పాదాలకు మొక్కలేదా? అని ప్రశ్నించారు. సురేశ్‌రెడ్డి పార్టీ వీడినంత మాత్రాన కాంగ్రె స్‌కు వచ్చే నష్టమేమీ లేదని కుంతియా స్పష్టం చేశారు. 
కేసీఆర్ ది దిగజారుడు భాష : ఉత్తమ్‌ 
'కేసీఆర్‌ దొంగ పాసుపోర్టుల వ్యాపారం చేసి రాజకీయాల్లోకి వచ్చారు. ఆయనది దిగజారుడు భాష’అంటూ టీపీసీసీ చీఫ్‌ ఉత్తమ్‌కుమార్‌రెడ్డి ధ్వజమెత్తారు. రాహుల్‌గాంధీని, మాజీ ప్రధాని నెహ్రూ, ఇందిరాగాంధీని విమర్శించే స్థాయి కేసీఆర్‌ది కాదన్నారు. 'కేసీఆర్‌ది పూర్తిగా దిగజారుడు భాష. ఆయన భాషను చూశాక ‘కేసీఆర్‌ గారు' అంటూ సంబోధించాల్సిన అవసరం లేదు. సీఎం పదవికి ఆయన అనర్హుడని ప్రజలు భావిస్తున్నారు’అని అన్నారు. శుక్రవారం టీపీసీసీ కార్యవర్గ అత్యవసర సమావేశం ముగిసిన అనంతరం ఆయన విలేకరులతో మాట్లాడారు. తెలంగాణకు పట్టిన శని వదిలిందన్నారు. వచ్చేది కాంగ్రెస్‌ ప్రభుత్వమేనని చెప్పారు. బీసీల ఆత్మగౌరవమని మాట్లాడే కేసీఆర్‌ తన నాలుగేళ్ల పాలనలో ఒక్క కులసంఘానికి చెందిన భవన నిర్మాణాన్ని కూడా పూర్తి చేయలేదని విమర్శించారు.

 

07:29 - September 5, 2018

హైదరాబాద : హైదరాబాద్‌ మెట్రో రైలు అరుదైన రికార్డు సాధించింది. 2కోట్ల మంది ప్రయాణీకులను తమ గమ్యస్థానాలకు చేర్చి సరికొత్త రికార్డు నమోదు చేసింది. కేవలం 9నెలల్లోనే 20 మిలియన్ల ప్రయాణికులను ఒకచోట నుంచి మరొకచోటుకు చేర్చడంలో కీలకపాత్ర పోషించినట్లు ఆ సంస్థ మేనేజింగ్‌ డైరెక్టర్‌, సీఈవో కేవీబీ రెడ్డి తెలిపారు. గత సంవత్సరం నవంబరు 29న నాగోల్‌.. అమీర్‌పేట, అమీర్‌పేట..మియాపూర్‌ మెట్రో రైలు మార్గాలను ప్రధాని మోడీ ప్రారంభించారు. 9నెలల కాలంలో 2 కోట్లు మందిని వారి గమ్యస్థానాలకు చేర్చడం ఎంతో సంతోషించదగ్గ విషయమన్నారు. మెట్రో సేవలను సాదరంగా ఆహ్వానిస్తున్న హైదరాబాద్‌ నగరవాసులకు ఆయన ధన్యవాదాలు తెలిపారు. తాము ఊహించిన దానికంటే ముందుగానే ఓ మైలురాయిని సాధించామని చెప్పారు. నాగోల్‌..అమీర్‌పేట, అమీర్‌పేట..మియాపూర్‌ మార్గంతోనే బెంచ్‌మార్క్‌ సాధించినట్లు పేర్కొన్నారు.
ప్లాట్‌ఫామ్‌లపైనా రైళ్ల రాకపోకలు, రెగ్యులర్‌ ఎనౌన్స్‌మెంట్లు
అమీర్‌పేట..ఎల్బీనగర్‌ మార్గంలో ప్రయాణ సౌకర్యాలు ప్రారంభించిన తరువాత ఇలాంటి మైలు రాళ్లు మరిన్ని అధిగమిస్తామన్న విశ్వాసం వ్యక్తం చేశారు. ప్రయాణీకుల సేవలను మరింత మెరుగు పరిచేందుకు చర్యలు తీసుకున్నట్లు పేర్కొన్న ఆయన ఇటీవల కాలంలో మంచినీటి సౌకర్యం కల్పించామన్నారు. అన్ని మెట్రో స్టేషన్లల్లోనూ ఉచితంగా రెస్ట్‌ రూమ్‌లను ఉపయోగించుకునే అవకాశం కల్పిస్తామని వివరించారు. ప్రయాణీకుల సౌకర్యార్థం రైళ్ల రాకపోకలు, రెగ్యులర్‌ ఎనౌన్స్‌మెంట్లను రైలుతోపాటుగా ప్లాట్‌ఫామ్‌లపై కూడా ప్రదర్శిస్తున్నామని తెలిపారు. మెట్రో రైలు దిగిన తరువాత వారి గమ్యస్థానాలకు చేరుకునేందుకు అనేక అవకాశాలు ఉన్నాయని వివరించారు. మరిన్ని నూతన సౌకర్యాలు ప్రయాణీకులకు అందుబాటులోకి తీసుకొస్తామని తెలిపారు.

07:19 - August 26, 2018

హైదరాబాద్‌ : గ్రేటర్‌ హైదరాబాద్‌ ప్రధాన పాలకమండల్లో కొత్తబాస్‌లు కొలువుదీరారు. బల్దియా కమిషనర్‌గా దాన కిషోర్‌, హెచ్‌ఎండీఏ కమిషనర్‌గా జనార్ధన్‌రెడ్డి బాధ్యతలు స్వీకరించారు. గ్రేటర్‌ హైదరాబాద్‌ను విశ్వనగరంగా మార్చేందుకు కృషి చేస్తానని బల్దియా కమిషనర్‌ దాన కిషోర్‌ తెలిపారు. మేయర్‌, డిప్యూటి మేయర్‌ కార్పొరేటర్ల సహకారంతో సిటిజన్స్‌కు మరిన్ని సేవలు అందిస్తామన్నారు. మరోవైపు మాజీ కమిషనర్‌ జనార్థన్‌రెడ్డి జీహెచ్‌ఎంసీ కమిషనర్‌గా బాధ్యతలు నిర్వహించటం సంతృప్తి నిచ్చిందని తెలిపారు. నగరంలో అనేక సంస్కరణలు తీసుకొచ్చి బల్దియాను దేశంలో ముందజలో నిలిపామని చెప్పారు. హెచ్‌ఎండీఏ కమిషనర్‌గా బాధ్యతలను సక్రమంగా నిర్వహిస్తానని జనార్ధన్‌రెడ్డి తెలిపారు. 

 

Pages

Don't Miss

Subscribe to RSS - హైదరాబాద్‌