హైదరాబాద్‌

21:00 - August 18, 2018

హైదరాబాద్‌ : మెట్రో రైలుకు రోజురోజుకు విశేష ఆదరణ పెరుగుతోంది. ట్రాఫిక్‌ నేపథ్యంలో మెట్రోలో ప్రయాణించేందుకు నగరవాసులు ఆసక్తి కనబరుస్తున్నారు. హైదరాబాద్‌కు మెట్రో ఓ వరంలాంటిదని ప్రయాణికులు భావిస్తున్నారు. మియాపూర్‌-అమీర్‌పేట్‌-నాగోల్‌ వరకు 30 కిలోమీటర్ల మెట్రో ప్రయాణం అందుబాటులోకి రావడంతో ఆ మార్గంలో అనేకమంది మెట్రోలో ప్రయాణం కొనసాగిస్తున్నారు. మెట్రో ప్రారంభంలో ప్రయాణికుల సంఖ్య అంతంత మాత్రంగానే ఉన్నా... ఆ తర్వాత పెరుగుతూనే ఉంది. సాధారణ రోజుల్లో సగటున 80 వేల నుండి 90 వేల మధ్య ఉన్న ప్రయాణికుల సంఖ్య తాజాగా లక్ష మార్కును దాటింది. 
ప్రజలకు అందుబాటులోకి మెట్రో రైలు 
గ్రేటర్‌లో ఉన్న ఆర్టీసీకి ఎంఎంటీఎస్‌లకు తోడుగా పబ్లిక్‌ ట్రాన్స్‌పోర్ట్‌గా మెట్రో రైలు ప్రజలకు అందుబాటులోకి వచ్చింది. నగరంలో ట్రాఫిక్‌ పద్మవ్యూహంలో ప్రయాణించి విసుగు చెందిన ప్రజలు మెట్రోలో ప్రయాణించేందుకు ఆసక్తి కనబరుస్తున్నారు. అయితే.. తొలిదశలో 30 కిలోమీటర్లు మాత్రమే అందుబాటులోకి తేవడంతో ప్రయాణికుల సంఖ్య అంతంతమాత్రంగానే ఉండగా... ఇప్పుడిప్పుడే ప్రయాణికుల సంఖ్య పెరుగుతోంది. మరోవైపు త్వరలోనే అమీర్‌పేట్‌-ఎల్బీనగర్‌ మార్గంలోని 17 కిలోమీటర్లను అందుబాటులోకి తెచ్చేందుకు అన్ని ప్రయత్నాలు చేస్తున్నారు అధికారులు.  
ప్రతిరోజు అనేకమంది మెట్రో రైళ్లలో ప్రయాణం 
ప్రతిరోజు అనేకమంది నగరవాసులు మెట్రో రైళ్లలో ప్రయాణిస్తున్నారు. మెట్రో రైలు ఎంతో సౌకర్యవంతంగా ఉంటుందని స్టూడెంట్స్‌, సాఫ్ట్‌వేర్‌ ఇంజనీర్లతో  పాటు పలువురు అభిప్రాయపడుతున్నారు. మెట్రో రైలు ద్వారా గమ్యస్థానానికి అనుకున్న సమయానికి చేరుకుంటున్నామని దీనివల్ల ఎంతో సమయం ఆదా అవుతుందని.. ఎలాంటి ప్రమాదాలు లేకుండా సురక్షితంగా ప్రయాణిస్తున్నామని నగరవాసులు సంతోషం వ్యక్తం చేస్తున్నారు. 
మెట్రోలో ప్రయాణించేందుకు ప్రయాణికులు ఆసక్తి 
మొదట్లో ప్రయాణికులకు మెట్రోలో ప్రయాణించేందుకు అనేక ఇబ్బందులు ఎదుర్కొన్నప్పటికీ అధికారులు వాటికి పరిష్కారాలు చూపిస్తున్నారు. దీంతో మెట్రోలో ప్రయాణించేవారి సంఖ్య రోజురోజుకు పెరుగుతోంది. ప్రయాణికుల వాహనాలకు పార్కింగ్‌ సౌకర్యంతో పాటు... మెట్రో స్టేషన్‌ నుంచి ఇతర ప్రాంతాలకు వెళ్లే వారికి సైకిళ్లు, బైక్‌లు ఏర్పాటు చేయడంతో మెట్రోలో ప్రయాణించేందుకు ప్రయాణికులు ఆసక్తి కనబరుస్తున్నారు. 
మెట్రోలో ప్రయాణం బాగానే ఉన్నా.. 
మెట్రోలో ప్రయాణం బాగానే ఉన్నా.. సాధారణ ప్రజలకు చార్జీలు అందుబాటులో లేవని పలువురు అభిప్రాయపడుతున్నారు. అధికారులు మెట్రో చార్జీలు తగ్గిస్తే ప్రయాణికుల సంఖ్య ఇంకా పెరిగే అవకాశం ఉంటుందని భావిస్తున్నారు. అమీర్‌పేట నుంచి ఎల్బీనగర్ వరకు 17 కిలోమీటర్ల మార్గాన్ని ప్రారంభిస్తే ప్రయాణికుల సంఖ్య పెరుగుతుందని మెట్రో అధికారులు భావిస్తున్నారు. అదేవిధంగా ఈ ఏడాది చివరినాటికి ఐటీ కారిడార్‌కు మెట్రోను అందుబాటులోకి తీసుకువచ్చేందుకు ప్రయత్నాలు జరుగుతున్నాయి. ఈ రెండు మార్గాలు అందుబాటులోకి వస్తే ప్రయాణికుల సంఖ్య విపరీతంగా పెరగనుంది. నగరవాసులకు ట్రాఫిక్‌ కష్టాలు తొలిగిపోవడమే కాకుండా సుఖవంతమైన ప్రయాణం చేయవచ్చు. 
మెట్రోరైలు రాకతో తప్పిన ట్రాఫిక్‌ తిప్పలు 
మెట్రోరైలు రాకతో నాగోల్‌ అమీర్‌పేట మార్గంలో ప్రయాణికులు కాస్త ట్రాఫిక్‌ తిప్పలు తప్పాయి. అమీర్‌పేట్‌-ఎల్బీనగర్‌ రూట్‌ అందుబాటులోకి వస్తే... ఎంతోమంది నగరవాసులు సౌకర్యవంతమైన ప్రయాణం చేసేందుకు అనువుగా ఉంటుంది. అయితే... చార్జీలు అధికంగా ఉన్నాయన్న అభిప్రాయం ప్రయాణికుల నుంచి  వినిపిస్తోంది. మెట్రో అధికారులు దీనిపై దృష్టి సారిస్తే మెట్రో ప్రయాణికుల సంఖ్య ఇంకా పెరిగి అవకాశం ఉంది. 
దూసుకుపోతోన్న మెట్రో రైలు  
మొత్తానికి భాగ్యనగరానికి మరో మణిహారమైన మెట్రో రైలు దూసుకుపోతోంది. మరో రెండు మార్గాల్లో మెట్రోరైలు రాకపోకలు ప్రారంభమైతే... మరింత ఆదరణ పెరిగే అవకాశం కనిపిస్తోంది. అదేవిధంగా సాధారణ ప్రజలకు అందుబాటులో ఉండేవిధంగా చార్జీలను తగ్గిస్తే నగరవాసుల మరింత ఆసక్తి కనబరుస్తారనడంలో ఎలాంటి సందేహం లేదు. 

 

18:35 - August 18, 2018

హైదరాబాద్‌ : ఫిలింనగర్‌లోని  హైదరాబాద్ వైన్ మార్ట్‌లో భారీ చోరీ జరిగింది. వైన్ మార్ట్ షెటర్స్ తొలగించి దొంగలు ఈ చోరీకి పాల్పడ్డారు. షాపులో గల నగదును దొచుకెళ్లారు. ఘటన స్థలికి చేరుకున్న పోలీసులు క్లూస్ టీమ్‌తో ఆధారాలు సేకరించారు. సీసీ కెమెరాల్లో రికార్డైన దృశ్యాల ఆధారంగా పోలీసులు దర్యాప్తు చేపట్టారు. 

 

17:10 - August 18, 2018

హైదరాబాద్ : నగరంలో మరో డ్రగ్స్ రాకెట్  కలకలం సృష్టించింది. పబ్స్‌కు డ్రగ్స్‌ సరఫరా చేస్తున్న ఇమ్మనియేల్‌ను ఎక్సైజ్‌ శాఖ పోలీసులు అరెస్ట్ చేశారు. 3 గ్రాముల కొకైన్‌ను స్వాధీనం చేసుకున్నారు. మరిన్ని వివరాలను వీడియోలో చూద్దాం.. 

13:43 - August 11, 2018

హైదరాబాద్‌ : మాసబ్‌ట్యాంక్‌లోని ఫైన్‌ ఆర్ట్స్‌ కాలేజీలో విద్యార్థులు ఆందోళనకు దిగారు. కాలేజీలో ప్రవేశ పరీక్ష పేపర్‌ లీక్‌ అయిందని వీసీ చాంబర్‌ వద్ద ఆందోళన చేస్తున్నారు. ఇవాళ్టి నుంచి కౌన్సిలింగ్‌ ప్రారంభం కావడంతో ప్రవేశ పరీక్షను రద్దు చేసి మళ్లీ పరీక్ష నిర్వహించాలని విద్యార్థులు డిమాండ్ చేస్తున్నారు. ఎంట్రెన్స్‌ ఎగ్జామ్‌ పేపర్‌ లీక్‌ అవడంతో విద్యార్థులు నష్టపోతారని వారు ఆవేదన వ్యక్తం చేస్తున్నారు. వీసీ డౌన్‌ డౌన్‌ అంటూ విద్యార్థులు నినాదాలు చేస్తున్నారు. ఎంట్రెన్స్‌ ఎగ్జామ్‌ రద్దు చేసి మళ్లీ పరీక్ష నిర్వహించాలని విద్యార్థులు డిమాండ్‌ చేస్తున్నారు. వీసీ చాంబర్‌ వద్దకు ఒక్కసారిగా విద్యార్థులు దూసుకురావడంతో విద్యార్థుల మధ్య తోపులాట జరిగి కొందరికి గాయాలయ్యాయి. మరిన్ని వివరాలను వీడియోలో చూద్దాం.... 

07:14 - August 11, 2018

హైదరాబాద్ : రాష్ట్రంలో చేనేతలకు అవసరమైన చేయూత, ప్రోత్సాహం అందిస్తామని ముఖ్యమంత్రి కేసీఆర్‌ స్పష్టం చేశారు. చేనేతల కోసం ఎన్నో సంక్షేమ పథకాలు చేపడుతున్నామని... వారి అభ్యున్నతికి బహుముఖ వ్యూహంతో ముందుకెళ్లాల్సిన అవసరముందన్నారు. ఇందుకోసం ప్రభుత్వం, పద్మశాలి సంక్షేమ సంఘం కలిసి పని చేయాల్సిన అవసరముందన్నారు. ప్రగతిభవన్‌లో వివిధ పద్మాశాలీ, చేనేత కార్మిక సంఘాల ప్రతినిధులతో సమావేశమైన కేసీఆర్‌... పలు అంశాలపై చర్చించారు. చేనేత వృత్తిని వదిలిపెట్టిన వారికి ప్రత్యామ్నాయ ఉపాధి మార్గాలు చూపేందుకు అవసరమైన ప్రణాళికలు సిద్దం చేయాలని అధికారులను కేసీఆర్‌ ఆదేశించారు. వస్తున్న సాంకేతిక అభివృద్ధిని దృష్టిలో ఉంచుకొని అవసరమైన వృత్తిపరమైన మార్పులు తీసుకురావాలన్నారు. హైదరాబాద్‌లో పద్మశాలీ భవనం నిర్మాణానికి రెండున్నర ఎకరాల స్థలం.. 5 కోట్ల రూపాయల నిధులు మంజూరు చేస్తున్నట్లు కేసీఆర్‌ ప్రకటించారు. చేనేత సంక్షేమం కోసం ఏర్పాటు చేయబోయే నిధికి తమ పార్టీ తరపున 50 లక్షలు ఇస్తున్నట్లు ప్రకటించారు. 

 

11:28 - August 10, 2018

హైదరాబాద్ : గత నాలుగేళ్లలో తెలంగాణలో ఎంతో అభివృద్ధి సాధించామన్నారు మంత్రి కేటీఆర్‌. హైదరాబాద్‌లోని పార్క్ హయత్‌లో ఇండియన్ ఛాంబర్స్ ఆఫ్ కామర్స్ సమావేశం జరిగింది. ఈ సమావేశంలో కేటీఆర్ పాల్గొన్నారు. దేశంలో ఎన్ని కంపెనీలు ఉన్నాయన్నది ముఖ్యం కాదని.. ఎంత ఉపాధి కల్పించామన్నదే ముఖ్యమని కేటీఆర్ అన్నారు. హైదరాబాద్‌లో పెట్టుబడులకు అద్భుతమైన అవకాశాలు ఉన్నాయని తెలిపారు. రాష్ర్టాభివృద్ధి కోసం ఇండియన్ ఛాంబర్ ఆఫ్ కామర్స్‌తో కలిసి పని చేస్తామని చెప్పారు. రాష్ట్రం ఏర్పడిన ఆరు నెలల్లోనే విద్యుత్ సమస్యను అధిగమించామని.. సోలార్ విద్యుత్ ఉత్పత్తిలో రాష్ట్రం దేశంలో రెండో స్థానంలో ఉందన్నారు. గ్రామీణ ఆర్థిక వ్యవస్థ బలోపేతం కోసం సీఎం కేసీఆర్ కృషి చేస్తున్నారని కేటీఆర్ స్పష్టం చేశారు. టీఎస్ ఐపాస్‌తో రాష్ర్టానికి పెట్టుబడులు తరలి వచ్చాయని తెలిపారు.  

 

07:30 - August 10, 2018

హైదరాబాద్ : స్వీడన్‌కు చెందిన అంతర్జాతీయ ఫర్నీచర్‌ దిగ్గజ సంస్థ ఐకియా... హైదరాబాద్‌లో తన స్టోర్‌ను ప్రారంభించింది. మన దేశంలో ఐకియాకు ఇదే మొదటి షోరూం. ఐటీ శాఖ మంత్రి కేటీఆర్‌ఈ స్టోర్‌ను ప్రారంభించారు. 
హైదరాబాద్‌ షోరూం కోసం ఐకియా భారీగా పెట్టుబడి 
హైదరాబాద్‌లో ఐకియా ఫర్నిచర్‌ స్టోర్‌ ప్రారంభమైంది. సైబర్‌ టవర్స్‌ సమీపంలోని మైండ్‌ స్పేస్‌ ఎదురుగా దీనిని ఏర్పాటు చేశారు. స్వీడన్‌కు చెందిన ఐకియా.. మన దేశంలో షోరూం ఏర్పాటు చేయడం ఇదే మొదటిసారి. మంత్రి కేటీఆర్‌ దీనిని ప్రారంభించారు. హైదరాబాద్‌ షోరూం కోసం ఐకియా భారీగా పెట్టుబడి పెట్టింది. వెయ్యి కోట్ల రూపాయల వ్యయంతో నాలుగు లక్షల చదరపు అడుగుల విస్తీర్ణంలో దీనిని ఏర్పాటు చేశారు. ఒకేసారి వెయ్యి మంది కూర్చుకునేందుకు వీలున్న రెస్టారెంట్‌ ఈ ఐకియా స్టోర్‌లో ప్రత్యేకత. దాదాపు 7,500 రకాల వస్తువులు అందుబాటులో ఉన్నాయి. వీటిలో వెయ్యి రకాల ఉత్పత్తుల ధరలు 200 రూపాయలలోపే. దీనిలో 950 మంది పనిచేస్తున్నారు. ఐకియా విధానం ప్రకారం వీరిలో సగం మంది మహిళలు. పరోక్షంగా మరో 1500 మందికి ఉపాధి లభిస్తుంది. హైదరాబాద్‌ ఐకియా షోరూం తమకు ఎంతో ప్రతిష్ఠాత్మకమని కంపెనీ ప్రతినిధులు తెలిపారు. 
2019 వేసవిలో ముంబైలో ఐకియా స్టోర్‌ 
హైదరాబాద్‌ తర్వాత దేశంలోని ఇతర ప్రాంతాలకు విస్తరించేందుకు ఐకియా ప్రణాళికలు రూపొందించింది. 2019 వేసవికి ముంబైలో షోరూం ప్రారంభించాలని నిర్ణయించింది. ఆ తర్వాత బెంగళూరు, గురుగావ్‌, అహ్మదాబాద్‌, పుణె, చెన్నై, కోల్‌కతా, సూరత్‌లో ఏర్పాటు చేయాలని ప్రతిపాదించింది. 2025 నాటికి దేశంలోని 25 నగరాలకు విస్తరించాలని నిర్ణయించిన ఐకియా... ఆ తర్వాత మరో 15 నగరాల్లో విస్తరించేందుకు ఏర్పాటు చేస్తోంది. మూడేళ్లలో 20 కోట్ల మంది ఖాతాదారులను సొంతం చేసుకోవాలని ఐకియా లక్ష్యంగా పెట్టుకునింది. 

 

10:08 - August 7, 2018

హైదరాబాద్‌ : పాతబస్తీలో జాతీయ దర్యాప్తు సంస్థ ఎన్‌ఐఏ సోదాలు నిర్వహించింది. స్థానిక పోలీసుల సాయంతో ఎన్‌ఐఏ అధికారులు షాహీన్‌ నగర్‌, పహాడీ షరీఫ్‌ ప్రాంతాల్లో దాడులు చేశారు. గుజరాత్‌, కర్ణాటకకు చెందిన రెండు ఎన్‌ఐఏ బృందాలు అర్థరాత్రి నుంచి సోదాలు చేస్తూ కీలక డాక్యుమెంట్లను స్వాధీనం చేసుకున్నాయి. ఓ ఇంట్లోని ఆరుగురు అనుమానితులను అదుపులోకి తీసుకున్నారు. అయితే ఈ దాడుల విషయాన్ని స్థానిక పోలీసులు గోప్యంగా ఉంచారు. ఇంకా సోదాలు కొనసాగుతున్నాయి. ఉగ్రకదలికల నేపథ్యంలో సెంట్రల్‌ ఇంటెలిజెన్స్‌ వర్గాల సమాచారం మేరకు ఈ దాడులు జరిపినట్లు తెలుస్తోంది. ఐఎస్‌ఐఎస్‌ ఉగ్రవాద సంస్థ ఆధీనంలో పనిచేసే ఓ వాట్సాప్‌ నంబర్‌ ద్వారా దేశంలో ఉగ్రదాడుల యత్నం జరుగుతుందని గుర్తించిన ఇంటలిజెన్స్‌ వర్గాలు అప్రమత్తమయ్యాయి.  ఈ ఆరుగురు అనుమానితులకు ఉగ్రవాద సంస్థలతో సంబంధాలున్నాయని ఎన్‌ఐఏ అధికారులు అదుపులోకి తీసుకున్నారు. ఎండీ అజీమ్‌ షాన్‌, ఎండీ ఒసమా అలియాస్‌ అదిల్‌ అలియాస్‌ పీర్‌, అకాలకుర్‌ రెహ్మాన్‌ అలియాస్‌ అక్లక్‌, మహ్మద్‌ మెహ్‌రాజ్‌ అలియాస్‌ మోనూ, మోహ్‌సిన్‌ ఇబ్రహీం సయ్యద్‌, ముదాబ్బిర్‌ ముస్తాక్‌ షేక్‌లను అధికారులు జ్యూడీషియల్‌ కస్టడీకి తీసుకున్నారు.

 

21:34 - August 5, 2018

హైదరాబాద్ : ఐఐటీ వంటి ఉన్నత సాంకేతిక విద్యాసంస్థలు కేవలం డిగ్రీలు ఇవ్వడానికే పరిమితం కాకుండా... పరిశోధనాభివృద్ధికి పెద్దపీట వేయాలని రాష్ట్రపతి రామ్‌నాథ్‌ కోవింద్‌ పిలుపునిచ్చారు. శాస్త్ర, సాంకేతిక రంగాల్లో దేశాన్ని అగ్రపథాన నిలిపేందుకు ఐఐటీయన్లు కృషి చేయాలని సూచించారు. నూతన ఆవిష్కరణలకు ప్రధాన్యత ఇవ్వాలని హైదరాబాద్‌ ఐఐటీ స్నాతకోత్సవంలో రామ్‌నాథ్‌ కోవింద్‌ కోరారు. 

రెండు రోజుల రాష్ట్ర పర్యటనలో భాగంగా హైదరాబాద్‌ వచ్చిన రాష్ట్రపతి రామ్‌నాథ్‌ కోవింద్‌.. ఆదివారం వివిధ కార్యక్రమాల్లో పాల్గొన్నారు. హరితహారం కార్యక్రమంలో భాగంగా బొల్లారంలోని రాష్ట్రపతి నిలయంలో మొక్కలు నాటారు. ఆ తర్వాత సంగారెడ్డి జిల్లా కందిలోని హైదరాబాద్‌ ఐఐటీ 7వ స్నాతకోత్సవానికి రాష్ట్రపతి ముఖ్య అతిథిగా హాజరయ్యారు. ఐఐటీలో వివిధ కోర్సులు పూర్తి చేసిన 560 మంది విద్యార్థులను పట్టాలు ప్రధానం చేశారు.  

విద్యార్థుల పరిశోధనాభివృద్ధి, నూతన ఆవిష్కరణలకు ప్రధాన్యత ఇవ్వాలని రామ్‌నాథ్‌ కోవింద్‌ కోరారు. సాంకేతిక పరిశోధనలు, నూతన ఆవిష్కరణలతో అమెరికాలోని సిలికాన్‌వ్యాలీ ప్రపంచ దృష్టిని ఆష్కరించిన విషయాన్ని రాష్ట్రపతి గుర్తు చేశారు. ఐఐటీ వంటి ఉన్నత విద్యాసంస్థల్లో డిగ్రీలు పొందిన విద్యార్థులు సామాజిక దృక్పథంతో ముందుకు సాగాలని రామ్‌నాథ్‌ కోవింద్ కోరారు. 

ఐఐటీ స్నాతకోత్సవం పూర్తైన తర్వాత రాష్ట్రపతి రామ్‌నాథ్‌ కోవింద్‌ బేగంపేట విమానాశ్రయం చేరుకుని నేరుగా చెన్నై బయలుదేరి వెళ్లారు. చెన్నైలోని కావేరి ఆస్పత్రిలో చికిత్స పొందుతున్న డీఎంకే అధినేత కరుణానిధిని పరామర్శించారు. కరుణానిధి కుమారుడు స్టాలిన్‌, కుమార్తె కణిమొలిని అడిగి తండ్రికి అందిస్తున్న వైద్యంపై ఆరా తీశారు. త్వరగా కోలుకోవాలని ఆకాంక్షించారు. రామ్‌నాథ్‌ కోవింద్‌ సోమ, మంగళవారాల్లో కేరళలో పర్యటిస్తారు. ఈనెల 6న తిరువనంతపురంలో ప్రజాస్వామ్య వేదిక..  ఫెస్టివల్‌ ఆఫ్‌ డెమోక్రసీని ప్రారంభిస్తారు. కేరళ శాసనసభ వజ్రోత్సవాల ముగింపు వేడుకల్లో పాల్గొంటారు. ఆగస్టు 7న త్రిసూర్‌లోని సెయింట్‌ థామస్‌ కాలేజీ శతాబ్ది ఉత్సాలను రాష్ట్రపతి ప్రారంభిస్తారు. ఆ తర్వాత ఢిల్లీ బయలుదేరి వెళ్తారు. 

20:31 - August 2, 2018

హైదరాబాద్‌ : అంతరాష్ట్ర ముఠాను టాస్క్‌ఫోర్స్‌ పోలీసులు అరెస్ట్‌ చేశారు. ఉద్యోగాల పేరుతో ఈ ముఠా మోసాలకు పాల్పడుతున్నట్లు హైదర్‌బాద్‌ కమిషనర్‌ అంజనీకుమార్‌ తెలిపారు. 8 మంది ముఠా సభ్యులను టాస్క్‌ఫోర్స్‌ పోలీసులు అరెస్ట్‌ చేసినట్లు సీపీ  చెప్పారు. ముఠా నుంచి 25 లక్షల నగదు, నకిలీ అపాయిట్మెంట్‌ లెటర్స్, యూనిఫార్మ్స్‌ స్వాధీనం చేసుకున్నామన్నారు. 

 

Pages

Don't Miss

Subscribe to RSS - హైదరాబాద్‌