ap cm

15:47 - November 28, 2018

ఖమ్మం: ఎన్నికల ప్రచారంలో భాగంగా మహాకూటమి నిర్వహిస్తున్న బహిరంగ సభలో అరుదైన ఘట్టం ఆవిష్కృతమైంది. కాంగ్రెస్ చీఫ్ రాహుల్ గాంధీ, టీడీపీ జాతీయ అధ్యక్షుడు చంద్రబాబు నాయుడు ఒకే వేదికను పంచుకున్నారు. ఇద్దరూ పక్కపక్కనే కూర్చున్నారు. నిన్నమొన్నటి వరకూ బద్ధ శత్రువులుగా ఉండి, ఒకరిపై ఒకరు విమర్శలు చేసుకున్న కాంగ్రెస్, తెలుగుదేశం పార్టీలు ఇప్పుడు స్నేహితులుగా మారిన సంగతి తెలిసిందే. రాహుల్, చంద్రబాబు ఒకే బహిరంగ వేదికను పంచుకోవడం ఓ అరుదైన దృశ్యం. ఇక ప్రత్యేక తెలంగాణ ఏర్పడిన తర్వాత చంద్రబాబు పాల్గొంటున్న తొలి బహిరంగ సభ కావడం మరో విశేషం.
రాహుల్, చంద్రబాబు పక్కపక్కనే కూర్చుని పార్టీ శ్రేణుల్లో ఉత్సాహం నింపారు. ఇద్దరు నేతలు ఒకేసారి సభాప్రాంగణానికి చేరుకున్నారు, కలిసే వేదికపైకి వెళ్లారు. ఈ సందర్భంగా ఇరువురు నేతలకు మహాకూటమి నేతలు గ్రాండ్‌గా వెల్‌కమ్ చెప్పారు. స్టేజ్‌పై సురవరం సుధాకర్ రెడ్డి, గద్దర్, ఉత్తమ్ కుమార్‌రెడ్డి, మల్లు భట్టివిక్రమార్క, మందకృష్ణ, ఎల్.రమణ తదితరులు ఆశీనులయ్యారు. మహాకూటమి తరుఫున ఎన్నికల ప్రచారం చేసేందుకు రాహుల్ గాంధీ, చంద్రబాబు తరలివచ్చారు.

11:13 - November 19, 2018

విజయవాడ : బీజీయేతర పార్టీలను ఏకం చేయడానికి..జాతీయ స్థాయంలో మరోసారి చక్రం తిప్పేందుకు టీడీపీ జాతీయ అధ్యక్షుడు, ఏపీ సీఎం చంద్రబాబు నాయుడు సిద్ధమౌతున్నారు. ఇప్పటికే పలువురు జాతీయ పార్టీలతో భేటీ అయిన ఆయన కేంద్ర ప్రభుత్వం వ్యవహరిస్తున్న తీరు..ఏపీ రాష్ట్రంపై కేంద్రం వివక్ష..ఇతరత్రా అంశాలను ఆయా నేతలకు వివరిస్తూ పార్టీలను ఒక్కతాటిపైకి తీసుకొచ్చే ప్రయత్నం చేస్తున్న సంగతి తెలిసందే. విరోధిగా ఉన్న కాంగ్రెస్‌ పెద్దలతో కూడా బాబు భేటీ అయ్యారు కూడా. అందులో భాగంగా నవంబర్ 19వ తేదీ సోమవారం కోల్‌కతాకు బాబు బృందం వెళ్లనుంది. ఈ రెండు రాష్ట్ర ప్రభుత్వాలు కీలక నిర్ణయాలు తీసుకున్న సంగతి తెలిసిందే. సీబీఐకి నో ఎంట్రీపై ఏపీ ప్రభుత్వం తీసుకున్ననిర్ణయాన్ని మమత స్వాగతించారు. 
బీజేపీయేతర కూటమిపై ఆ రాష్ట్ర ముఖ్యమంత్రి మమతో చర్చించనున్నారు. మధ్యాహ్నం జరిగే భేటీలో మమత పేర్కొనే పలు సందేహాలు..ఇతరత్రా అంశాలపై బాబు సుదీర్ఘంగా వివరించనన్నట్లు టాక్. కాంగ్రెస్‌ను కలుపకపోవడం మమతకు నచ్చడం లేదని తెలుస్తోంది. ఎలాగైనా మమతను నచ్చచెప్పాలని బాబు ప్రయత్నాలు చేస్తున్నారు. భవిష్యత్ లో బీజేయేతర పార్టీల ప్రాధాన్యం ఉంటుందని..బీజేయేతర కూటమి ప్రభుత్వం ఏర్పడుతుందని బాబు స్పష్టంగా చెప్పనున్నారని తెలుస్తోంది. అంతేగాకుండా మమత బెనర్జీ...కమ్యూనిస్టు పార్టీల మధ్య నెలకొన్న విబేధాలపై కూడా చర్చించనున్నట్లు సమాచారం. నవంబర్ 22వ తేదీన ఢిల్లీలో బీజేయేర పార్టీల మీటింగ్ జరుగనుంది.  మమత..బాబు భేటీలో ఎలాంటి అంశాలపై చర్చ జరుగనుందో కాసేపట్లో తెలియనుంది. 

 

09:40 - November 16, 2018

విజయవాడ : ఏపీ రాష్ట్రంలో టీడీపీని సమూలంగా రాష్ట్రం నుండి తరిమి కొట్టాలని జనసేన అధ్యక్షుడు పవన్ కళ్యాణ్ పిలుపునిచ్చారు. ఈ మేరకు ఆయన ట్విట్టర్ లో ఆయన ఒక ప్రకటన విడుదల చేశారు. తెలుగు వారి ఆత్మగౌరవాన్ని ఢిల్లీలో కాంగ్రెస్ దగ్గర తాకట్టు పెట్టేసి...పాలనలో అవినీతి పెచ్చుమీరేలా చేసిన తెలుగుదేశం పార్టీని సమూలంగా రాష్ట్రం నుండి తరిమికొట్టాలని ప్రజలకు పిలుపునిచ్చారు.

  • ఢిల్లీ కోటలు బద్దలు కావాలి..కాంగ్రెస్ కోటకు బీటలు వారాలి.
  • జగన్, చంద్రబాబు మనకు వద్దు..లోకేష్ అసలే వద్దు
  • వీళ్లంతా అవినీతిని అలవాటుగా మార్చేస్తున్నారు.
  • జనసేన ప్రభుత్వంలో 2013 భూ సేకరణ చట్టాన్ని అమలు చేస్తాం

ఏపీకి అన్యాయం చేస్తున్న ఢిల్లీ కోటను బద్ధలు కొట్టాలని..కాంగ్రెస్ కోటలకు బీటలు వారేలా చేయాలని సూచించారు. ఇప్పుడున్న నాయకులు మాత్రం అవినీతిని ఇబ్బడిముబ్బడిగా పెంచుకుంటూ పోతున్నారని, గతంలో రూ. 100 కోట్ల అవినీతి అంటే చాలా పెద్ద విషయమని, దేశాన్ని కుదిపేసిన భోపార్స్ కుంభకోణం అలాంటిదేనని పవన్ రాజానగరంలో నిర్వహించిన బహిరంగ సభలో తెలిపారు. ప్రజా జీవితాల్లో వెలుగులు నింపేలా జనసేన ప్రభుత్వాన్ని స్థాపిద్ధామని తెలిపారు.

10:58 - November 3, 2018

ప్రకాశం: ఎన్నికల కాలం వచ్చిందన్న టీడీపీ అధినేత చంద్రబాబు ఆ దిశగా కేడర్‌ను సమాయత్తం చేస్తున్నారు. దాదాపు ఆరు నెలల కాలం ఉన్నా.. ఇప్పటి నుంచే పార్టీలో నెలకొన్న అంతర్గత విబేధాలకు చెక్ పెట్టే పని ప్రారంభించారు. ప్రకాశం జిల్లా నుంచి తెలుగుదేశం పార్టీకి కాయకల్ప చికిత్స ప్రారంభించారు. అర్ధరాత్రి వరకు సమీక్షలు నిర్వహించిన ఆయన.. పద్ధతి మార్చుకోకుంటే ఫైరింగే అంటు నేతలకు స్ట్రాంగ్ వార్నింగ్ ఇచ్చారు. 

2014లో టీడీపీ ప్రభుత్వం ఏర్పడిన తర్వాత చంద్రబాబు వరుసగా రెండు రోజుల పాటు ప్రకాశం జిల్లాలో పర్యటించడం ఇదే తొలిసారి. అటు అధికారిక కార్యక్రమాలతో పాటు, ఇటు పార్టీ ప్రాధాన్య కార్యక్రమాలకు ప్రాధాన్యం ఉండేలా ఈ సారి షెడ్యూల్ రూపొందించారు. శుక్రవారం జిల్లాలో అభివృద్ధి కార్యక్రమాలను ప్రారంభించిన చంద్రబాబు రాత్రి బస చేసి మరీ పార్టీలో నెలకొన్న వివాదాలను పరిష్కరించే పనిలో పడ్డారు. జిల్లాలోని 12 నియోజకవర్గాల్లో టీడీపీకి పార్టీ పరంగా అత్యంత సమస్యాత్మకమైనవి ఆరు ఉన్నాయి. వాటిలో నాలుగు నియోజకవర్గాలపై అధినేత ప్రత్యేక దృష్టి పెట్టారు. నాయకుల మధ్య పొరపొచ్చాలు, అవినీతి, ప్రజాప్రతినిధుల వ్యవహారశైలి వంటివి ఆయా చోట్ల అసమ్మతికి కారణమైన నేపథ్యంలో సమస్యకు ఫుల్‌స్టాప్ పెట్టే పని ప్రారంభించారు.

Image result for chandrababu angryపార్టీలో నెలకొన్న అంతర్గత విబేధాలు, నేతల ఆధిపత్య ధోరణికి చెక్ పెట్టే దిశగా చంద్రబాబు చర్యలు చేపట్టారు. శుక్రవారం అర్ధరాత్రి వరకు జిల్లా నేతలతో నియోజకవర్గాల వారీగా చంద్రబాబు సమీక్షలు నిర్వహించారు. సంతనూతల పాడు సమన్వయ కమిటీ సమావేశంలో.. పార్టీ నేతలకు చంద్రబాబు సీరియస్ క్లాస్ తీసుకున్నారు. రాజకీయాలు తనకు నేర్పవద్దంటూ సంతనూతలపాడు నేతలపై సీరియస్ అయ్యారు. ప్రతీ ఒక్కరి జాతకం తన వద్ద ఉందన్న సీఎం.. పార్టీ ప్రతిష్టను దెబ్బతీసే విధంగా ఎవరు ప్రవర్తించినా ఉపేక్షించేది లేదని హెచ్చరించారు. నియోజకవర్గ స్థాయిలో ఎమ్మెల్యేను గౌరవించకుండా పార్టీ కోసం పనిచేస్తున్నామంటే అర్ధమేంటని నేతలను నిలదీశారు. జిల్లా పార్టీ అధ్యక్షుడు, మంత్రులు ఆధిపత్యం కోసం ప్రయత్నించడంతో.. వర్గ విబేధాలు పెరుగుతున్నాయన్న చంద్రబాబు.. ఇకనైనా తీరు మార్చుకోవాలని వార్నింగ్ ఇచ్చారు. జిల్లాలో ఇంకా కొత్త, పాత వంటి పదాలు వినిపిస్తున్నాయని, అన్నీ పక్కన పెట్టి అందరూ కలిసి పనిచేయాలన్నారు. దాదాపు గంటకు పైగా జరిగిన సమావేశంలో.. పార్టీ శ్రేణులకు భవిష్యత్ దిశానిర్దేశం  చేశారు. రానున్నది ఎన్నికల కాలమన్న చంద్రబాబు.. కలికట్టుగా పనిచేసి.. పార్టీ విజయానికి దోహద పడాలని సూచించారు. మిగిలిన నియోజకవర్గ నేతలతో చంద్రబాబు ఇవాళ సమావేశం కానున్నారు.

Image result for veligonda projectఇక తొలి రోజు.. పలు అభివృద్ధి కార్యక్రమాలకు శంకుస్థాపనలు, ప్రారంభోత్సవాల్లో చంద్రబాబు బిజీబిజీగా గడిపారు. మార్టూరు మండలం డేగరమూడి గ్రామదర్శిని కార్యక్రమంలో పాల్గొన్న చంద్రబాబు....వెలిగొండ  ప్రాజెక్టును పూర్తి చేసి జిల్లాను సస్యశ్యామలం చేస్తామన్నారు. ఇప్పటికే పట్టిసీమ ద్వారా కృష్ణా పశ్చిమ డెల్టాకు నీళ్లు ఇచ్చామన్న చంద్రబాబు...త్వరలోనే గోదావరి నీళ్లను నాగార్జున సాగర్‌కు తీసుకొస్తామని స్పష్టం చేశారు. ప్రకాశం జిల్లాను రాష్ట్రంలోనే నెంబర్ వన్‌ స్థానానికి తీసుకొస్తామని హామీ ఇచ్చారు. 

జగన్‌పై జరిగిన దాడిపై చంద్రబాబు తన శైలిలో స్పందించారు. కోడి కత్తిపైన వైసీపీ నానా రచ్చ చేసిందని...దాడి చేసింది జగన్ వీరాభిమాని అయితే అది టీడీపీ పెట్టారంటే తనకు ఏం చెప్పాలో  తెలియట్లేదన్నారు. అసలు ఇదెక్కడి కోడి కత్తి డ్రామానో అర్థం కావడం లేదని  చంద్రబాబు అన్నారు.

Image result for attack on ys jaganవిభజన హామీలను నెరవేర్చమంటే కేంద్రం దాడులకు దిగుతోందని చంద్రబాబు మండిపడ్డారు. ఇదంతా కేవలం రాజకీయ ప్రయోజనాలు, ప్రత్యర్థులను వేధించడం కోసమేనని అన్నారు. ఇవన్నీ చూసి ఓ సీనియర్ నాయకుడిగా తట్టుకోలేకపోయానని..రాజ్యాంగం, ప్రజాస్వామ్యాన్ని కాపాడుకునే ఉద్ధేశ్యంతోనే జాతీయ స్థాయిలో అందరినీ కూడగడుతున్నాని చంద్రబాబు స్పష్టం చేశారు.

తొలిరోజు ప్రజా సమస్యలు, అభివృద్ధి కార్యక్రమాలపై దృష్టి సారించినా.. రెండో రోజు మాత్రం పార్టీకి ఇబ్బంది పెడుతున్న సమస్యలకు చెక్ పెట్టనున్నారు. మరి చంద్రబాబు హెచ్చరికలు ఏ మేర ఫలిస్తాయో చూడాలి. 

 
10:44 - October 29, 2018

విజయవాడ : ఏపీలో ఆపరేషన్ గరుడ వాస్తవమేనా? అంటే అవుననే అంటోంది తెలుగుదేశం పార్టీ. తాము ఆరోపణలు చేయడం లేదు వాస్తవాలే చెబుతున్నామని ఆపార్టీ నేతలు చెబుతున్నారు. ఆపరేషన్ గరుడకు బీజేపీ నేత రాం మాధవ్ చేసిన వ్యాఖ్యలు అద్దం పడుతున్నాయంటున్నారు. ఇంతకీ రాం మాధవ్ ఏమన్నారు?ఆంధ్రప్రదేశ్‌లో రాజకీయ వేడి రోజు రోజుకు పెరుగుతోంది. బీజేపి, వైసీపీ వర్సెస్ టీడీపీ అన్నట్లు నేతల మధ్య మాటల తూటాలు పేలుతున్నాయి. ఆంధ్రప్రదేశ్‌పై కేంద్రం కక్షపూరితంగా వ్యవహరిస్తోందని అధికార తెలుగుదేశం నేతలు నిత్యం కోడై కూస్తున్నారు. వైసీపీ కేంద్రానికి సహకరిస్తూ రాష్ట్రానికి తీరని అన్యాయం చేస్తోందని మండిపడుతున్నారు. అటు బీజేపి నేతల తాజా స్టేట్‌మెంట్లు అగ్నికి ఆజ్యం పోస్తున్నాయి. ఆపరేషన్ గరుడ నిజామా కాదా అన్న మీమాంశలో ఉన్న ప్రజల్లో లేని పోని అనుమానాలు రేకెత్తిస్తున్నారు. టీడీపీ ఆరోపణలకు బలం చేకూర్చుతూ.. బీజేపి నేత రాం మాధవ్ చేసిన వ్యాఖ్యలు ఇప్పుడు దుమారం రేపుతున్నాయి. 
Image result for operation garuda babuదేశ సంక్షేమం కోసమే తాను ఢిల్లీ వచ్చానన్న చంద్రబాబు వ్యాఖ్యలపై రాంమాధవ్ సెటైర్లు వేశారు. దేశం కాదు ముందు పదవి పోతుంది కాపాడుకోమంటూ ఆయన చేసిన వ్యాఖ్యలపై టీడీపీ నేతలు మండిపడుతున్నారు. వైసీపీ అధినేతకు సీఎం పదవి పిచ్చి పట్టిందని, బీజేపితో కలిసి రాష్ట్రంలో రాజకీయ సంక్షోభం సృష్టించాలన్నదే జగన్ ఉద్దేశమని మంత్రి దేవినేని విమర్శించారు.
Related imageఅటు బీజేపి.. ఇటు వైసీపీ చంద్రబాబును పద్మవ్యూహంలోకి నెట్టామని సంబర పడుతున్నాయని.. ఆ పద్మవ్యూహాన్ని చేధించుకోవడం చంద్రబాబు కొత్తేమీ కాదన్నారు టీడీపీ నేత వర్ల రామయ్య. పద్మవ్యూహంలో చిక్కుకోవడానికి చంద్రబాబు అభిమన్యుడు కాదు.. అర్జునడన్నారు రామయ్య. బీజేపీ నేతల వ్యాఖ్యలు ఇప్పుడు ఏపీలో హాట్ టాపిక్‌గా మారాయి. రాష్ట్రం ప్రభుత్వాన్ని కూల్చివేసేందుకు కేంద్రం కుట్ర పన్నిందన్న తమ వాదనకు.. కాషాయ నేతల స్టేట్‌మెంట్లు అద్దం పడుతున్నాయన్న వాదన ఎక్కువైంది. 

15:48 - October 27, 2018

ఢిల్లీ : ఏపీ సీఎం చంద్రబాబు నాయుడు స్వరం పెంచారు. గత నాలుగేళ్లుగా మిత్రపక్షంగా ఉన్న టీడీపీ ఇటీవలే బయటకు వచ్చిన సంగతి తెలిసిందే. అనంతరం రాష్ట్రంపై కేంద్రం వివక్ష చూపిస్తోందంటూ ఏపీ ప్రభుత్వం పలు విమర్శలు గుప్పిస్తోంది. ఇటీవలే ఏపీలో జరిగిన పరిణామాలను దేశ రాజధాని వేదికగా ఏపీ సీఎం చంద్రబాబు నాయుడు ఎండగట్టే ప్రయత్నం చేశారు. శనివారం ఆయన మీడియాతో మాట్లాడారు. మోడీ ప్రభుత్వం..కేంద్ర ప్రభుత్వం అనుసరిస్తున్న విధానాలపై మండిపడ్డారు. 
ఏపీలో పునర్ విభజన చట్టం హామీలు నెరవేర్చలేదని, నూతనంగా ఏర్పడిన రాష్ట్రం ఆర్థిక ఇబ్బందులో ఉందన్నారు. గతంలో ఏపీకి ప్రత్యేక హోదా ఇస్తామని చెప్పారని గుర్తు చేశారు. రాష్ట్రపతి, ఉప రాష్ట్రపతి ఎన్నికలకు వైసీపీ మద్దతు తీసుకున్నారని పేర్కొన్నారు. వైసీపీ, బీజేపీ మధ్య లోపాయికారీ ఒప్పందం ఉందన్నారు. నేర చరిత ఉన్న పార్టీలకు మద్దతిస్తున్నారని, అందుకే ఎన్డీయేతో తెగదెంపులు చేసుకోవడం జరిగిందన్నారు. మోడీ ప్రభుత్వ తీరువల్ల అవిశ్వాస తీర్మనం పెట్టడం జరిగిందన్నారు. 
రాష్ట్రాల మధ్య ప్రధాని సమస్యలు సృష్టిస్తున్నారని, కేంద్రం ఏపీకి వ్యతిరేకంగా పనిచేస్తోందని విమర్శించారు. వెనుకబడిన జిల్లాలకు నిధులిచ్చి మళ్లీ వెనక్కి తీసుకున్నారని, మోడీ విధానాలతో ఆర్థిక వ్యవస్థ కుదేలైందన్నారు. ఏపీలో ప్రభుత్వాన్ని అస్థిరపరిచేందుకు కుట్రలు జరుగుతున్నాయన్నారు. చెప్పిన హామీలేవీ మోడీ ప్రభుత్వం నెరవేర్చలేదన్నారు. రాష్ట్రంలో జరుగుతున్న పరిణామాలను అందరూ గమనిస్తున్నారని, రాజకీయ పార్టీల మధ్య ఆరోగ్యకరమైన పోటీ ఉండాలన్నారు. రైతుల ఆదాయన్ని ఎక్కువ చేస్తామన్నారు ఏమైందని ఏపీ సీఎం చంద్రబాబు ప్రశ్నించారు. 

11:49 - October 17, 2018

విజయవాడ : తిత్లీ తుపాను సాయంపై కేంద్రంపై టీడీపీ ఒత్తిడి పెంచుతోంది. తిత్లీ తుపాను ప్రభావంతో అతలాకుతలమైన  శ్రీకాకుళం, విజయనగరం జిల్లాలను ఆదుకోవాలని ఏపీ సీఎం చంద్రబాబు .. కేంద్రహోంమంత్రి రాజ్‌నాథ్‌ను కోరారు. ఈ మేరకు ఆయనకు ఓ లేఖను రాశారు. రెండు జిల్లాలను ఆదుకోవడానికి తక్షణ సాయంగా 1200 కోట్ల రూపాయలను వెంటనే విడుదల చేయాలని కోరారు.  టీడీపీ ఎంపీలు  కేశినేని నాని, కొనకళ్ల  నారాయణ, మాగంటి బాబుతో పాటు మంత్రులు దేవినేని ఉమా, సోమిరెడ్డి గన్నవరం విమానాశ్రయంలో రాజ్‌నాథ్‌ను కలిశారు. సీఎం చంద్రబాబు రాసిన లేఖను ఆయనకు అందజేశారు. తుఫానుతో విజయనగరం, శ్రీకాకుళం జిల్లాల్లో మొత్తం 3,435.29 కోట్ల నష్టం వాటిల్లినట్టు రాజ్‌నాథ్‌ దృష్టికి తీసుకొచ్చారు. నష్టం అంచనాకు కేంద్ర బృందాన్ని వెంటనే పంపాలని కోరారు.
శ్రీకాకుళం జిల్లాలోనే మకాం వేసిన ఏపీమంత్రి నారా లోకేష్‌.... సహాయక చర్యలను పర్యవేక్షిస్తున్నారు. కేంద్రం ఒక్క రూపాయి ఇవ్వకున్నా... తుపాను ప్రభావిత ప్రాంతాల్లో ఎన్నడూ లేని విధంగా సహాయం అందిస్తున్నామన్నారు. రాజకీయాలకు ఇది సమయం కాదని,  పునరావాసం కల్పించడమే తమ ముందున్న లక్ష్యమన్నారు. తుపాను ప్రభావిత ప్రాంతాల్లో నష్టం అంచనాకు కేంద్ర బృందాలను వెంటనే పంపాలని ఏపీ ప్రభుత్వం కోరుతోంది. రాజ్‌నాథ్‌ దృష్టికి ఈ అంశాన్ని తీసుకెళ్లింది. మరి దీనిపై కేంద్రం ఏ నిర్ణయం తీసుకుంటుందో చూడాలి.

21:39 - August 22, 2018

అమరావతి : భారీ వర్షాలు, వరదలో పంట నష్టపోయిన రైతులను ఆదుకునేందుకు ఏపీ ప్రభుత్వం ముందుకు వచ్చింది. హెక్టారుకు పాతికవేల రూపాయల పరిహారం ఇవ్వాలని నిర్ణయించింది. ప్రత్యామ్నాయ పైర్ల సాగుకు సహాయం చేస్తామని తూర్పుగోదావరి జిల్లా వరద ప్రభావిత ప్రాంతాల్లో ఏరియల్‌ సర్వే నిర్వహించిన అనంతరం ముఖ్యమంత్రి చంద్రబాబు హామీ ఇచ్చారు.

తూ.గో. జిల్లా వరద ముంపు ప్రాంతాల్లో సీఎం ఏరియల్‌ సర్వే
ముఖ్యమంత్రి చంద్రబాబు తూర్పుగోదావరి జిల్లాలోని వరద ముంపు ప్రాంతాల్లో ఎరియల్‌ సర్వే నిర్వహించారు. భారీ వర్షాలు, వరదలతో నష్టపోయిన పంటలను పరిశీలించారు. గ్రామాల్లో నిలిచివున్న వరదనీటిని చూసి చలించిపోయారు. ఇబ్బందుల్లో ఉన్న ప్రజలను అన్ని విధాల ఆదుకోవాలని అధికారులను ఆదేశించారు.

తూ.గో.జిల్లాలో 6,600 హెక్టార్లలో పంటనష్టం
తూర్పుగోదావరి జిల్లా 19 మండల్లాలోని 45 గ్రామాలు వరద తాకిడికి గురయ్యాయి. పునరావాస కేంద్రాల్లో తలదాచుకుంటున్న బాధితులను పరార్శించిన చంద్రబాబు.. ఇబ్బందుల్లో ఉన్న ప్రజలను అన్ని విధాల ఆదుకుంటామని హామీ ఇచ్చారు. రాజమండ్రి విమానాశ్రయంలో వరద నష్టంపై అధికారులతో సమీక్ష నిర్వహించారు. మొత్తం 6,600 హెక్టార్లలో పంటనష్టం జరిగినట్టు నివేదించారు. పంట నష్టపోయిన రైతులకు హెక్టారుకు పాతికవేల రూపాయల పరిహారం ఇస్తామని హామీ ఇచ్చారు. ఉభయగోదావరి జిల్లాల్లో 600 కోట్ల రూపాయల మేర నష్టం జరిగినట్టు అధికారులు చంద్రబాబు దృష్టికి తెచ్చారు. పశ్చిమగోదావరి జిల్లాలో ఎర్రకాల్వ పొంగిపొర్లడంతో ఎక్కువ నష్టం జరిగినట్టు తేల్చారు. ఎర్రకాల్వ ముంపు సమస్య పరిష్కారానికి శాశ్వత చర్యలు తీసుకుంటామని హామీ ఇచ్చిన చంద్రబాబు.. ఆర్‌ అండ్‌ బీ రోడ్ల మరమ్మతులకు 35 కోట్ల రూపాయాలు కేటాయిస్తున్నట్టు చెప్పారు.

ఇంతవరకు 1500 టీఎంసీల గోదావరి నీరు సముద్రం పాలు
కోస్తా జిల్లాలు వరదలతో తల్లడిల్లుతుంటే.. రాయసీమ నాలుగు జిల్లాలతోపాటు ప్రకాశం, నెల్లూరు జిల్లాల్లో కరవు ఉన్న విషయాన్ని చంద్రబాబు ప్రస్తావించారు. ఈ సీజన్‌లో ఇంతవరకు 1500 టీఎంసీల గోదావరి జలాలు సముద్రంపాలు కావడంపై చంద్రబాబు ఆవేదన వ్యక్తం చేశారు. వరదలతో పోలవరం పనులకు ఆటంకం ఏర్పడిన విషయాన్ని గుర్తు చేసిన చంద్రబాబు.. వచ్చే ఏడాది మే నాటికి ప్రాజెక్టు పూర్తి చేసేందుకు చర్యలు తీసుకుంటున్నామని వివరించారు. ఇంతవరకు 57.5 శాతం పనులు పూర్తైన విషయాన్ని ప్రస్తావించారు. పోలవరం కోసం చేసిన ఖర్చులో కేంద్రం నుంచి ఇంకా 2,600 కోట్ల రూపాయల రావాల్సి ఉందన్నారు. నిర్మాణ బాధ్యతలను పూర్తిగా కేంద్రం తీసుకున్నా అభ్యంతరంలేదని చంద్రబాబు చెప్పారు.

ప్రాజెక్టు నిర్మానానికి ప్రతిపక్షాలు అవరోధాలు : చంద్రబాబు
మరోవైపు ప్రాజెక్టు నిర్మానానికి ప్రతిపక్షాలు అవరోధాలు సృష్టిస్తున్నాయని చంద్రబాబు విమర్శించారు. రాష్ట్రంలో 57 ప్రాజెక్టుల నిర్మాణం చేపట్టామని, 16 పూర్తయ్యాయని చంద్రబాబు వివరించారు. ప్రాజెక్టుల నిర్మాణంపై ప్రభుత్వాన్ని విమర్శించే నైతిక హక్కు విపక్షాలకులేదని మండిపడ్డారు.వరద ముంపు ప్రాంతాల్లో ఏరియల్‌ సర్వే, పంటనష్టంపై సమీక్ష నిర్వహించిన తర్వాత చంద్రబాబు రాజమండ్రి నుంచి అమరావతి బయలుదేరి వెళ్లారు. 

20:18 - August 22, 2018

తూర్పుగోదావరి : వరదలతో పంట నష్టపోయిన రైతులను ఆదుకునేందుకు ఏపీ ప్రభుత్వం ముందుకొచ్చింది. హెక్టారుకు పాతిక వేల రూపాయల పరిహారం చెల్లిస్తామని ముఖ్యమంత్రి చంద్రబాబు ప్రకటిస్తారు. తూర్పుగోదావరి జిల్లాలోని వరద ప్రభావిత ప్రాంతాల్లో ఏరియల్‌ సర్వే నిర్వహించిన చంద్రబాబు... ముంపును పరిశీలించారు. మొత్తం 6,600 హెక్టార్లలో పంటనష్టం జరిగినట్టు అధికారులు నివేదించారు. పునరావాస కేంద్రాల్లో తలదాచుకుంటున్న వరద బాధితులను ముఖ్యమంత్రి పరామర్శించారు. అన్ని విధాల ఆదుకుంటామని హామీ ఇచ్చారు. పశ్చిమగోదావరి జిల్లాలో ఎర్రకాల్వ ప్రాజెక్టు పొంగిపొర్లడంతో ఎక్కువ నష్టం జరిగిన విషయాన్ని చంద్రబాబు గుర్తు చేశారు. వర్షాలు, వరదలతో దెబ్బతిన్న రోడ్లు, కాజ్‌వేలు మరమ్మతులుకు నిధుల కేటాయిస్తామని చెప్పారు. మరోవైపు సాగునీటి ప్రాజెక్టుల నిర్మాణానికి విపక్షాలు సృష్టిస్తున్న అడ్డంకులను అధిగమించి... ముందుకుసాగుతున్నామని చంద్రబాబు చెప్పారు. 

06:52 - August 20, 2018

విజయవాడ : కోట్లాది రూపాయలు రాబడి.. వేలాది సంఖ్యలో బస్సులు.. లక్షలాది మంది ప్రయాణికులతో నిత్యం కళకళలాడే విజయవాడ బస్టాండ్‌లో భద్రత కరువైంది. పండిట్ నెహ్రూ బస్టేషన్‌లో చోరీలు యథేచ్ఛగా కొనసాగుతున్నాయి. పేరుకు సీసీ కెమెరాలు ఉన్నా.. అవి అలంకార ప్రాయంగా మారాయి. భద్రత కరువైన విజయవాడ బస్టాండ్‌పై టెన్‌టీవీ స్పెషల్‌ స్టోరీ.

రాష్ట్ర విభజన అనంతరం విజయవాడలోని పండిట్ నెహ్రూ బస్టాండ్ రూపురేఖలే ఆసాంతం మారిపోయాయి. కోట్లాది రూపాయలు వెచ్చించిన అధికారులు బస్టాండ్‌లో అధునాతన సౌకర్యాలు ఏర్పాటు చేశారు. వేలాది సంఖ్యలో బస్సులు నడుపుతుండటంతో రాబడి కూడా అధికంగానే వస్తుంది. అయితే ఇన్ని సౌకర్యాలు ఏర్పాటు చేసిన అధికారులు భద్రతను ఏర్పాటు చేయటం మర్చిపోయారు. దీంతో బస్టాప్‌లో ప్రయాణికులు తీవ్ర ఇబ్బందులు ఎదుర్కొంటున్నారు. వారు తెచ్చుకున్న లగేజీకి, ఒంటిమీద ఉన్న బంగారానికి, వారి ప్రాణాలకే భరోసా లేకుండాపోతుంది. వేలాది రూపాయలు ఖర్చు చేసి ఏర్పాటు చేసిన 58 సీసీ కెమెరాలు అలంకార ప్రాయంగా మారాయి. సీసీ కెమెరాలు కంట్రోల్ చేసే గదిలో పర్యవేక్షణ కొరవడటంతో అవి ఎప్పుడు ఎలా పనిచేస్తున్నాయో తెలియటం లేదు. సీసీ కెమెరాలు పర్యవేక్షించాల్సిన పోలీసులు, టెక్నీషియన్స్‌ అందుబాటులో లేకపోవటంతో వాటి పర్యవేక్షణ కరువైంది. మరోవైపు పెరుగుతున్న ప్రయాణికుల రద్దీతో చోరీలు, నేరాలు పెరుగుతున్నాయి. రెండ్రోజుల క్రితం బస్టాండ్‌లో ఓ వృద్ధ మహిళ మెడలోని నాలుగు కాసుల బంగారాన్ని మరో మహిళ దోచుకుని అక్కడ్నుంచి ఉడాయించింది.

అవనిగడ్డ బస్సెక్కేందుకు వేచి ఉన్న నాంచారమ్మకు అపరిచిత మహిళ మత్తు పదార్థాలతో కూడిన తినుబండారం ఇచ్చింది. ఇది తిన్న వృద్ధురాలు అస్మారక స్థితికి చేరుకోవడంతో ఆమె మెడలోని బంగారు గొలుసును మహిళ ఎత్తుకుపోయింది. చోరీ జరిగిన చాలాసేపటి తరువాత పోలీసులు సీసీ టీవీని పరిశీలించి.. నిందితురాలని పట్టుకుంటామని చెప్పుకొచ్చారు. అయితే ఇంతవరకు ఆ మహిళను పట్టుకొలేకపోయారు. ఇది కేవలం మచ్చుకే అని.. ఇలాంటి సంఘటనలు ఎన్నో ఉన్నాయని ప్రయాణికులు ఆరోపిస్తున్నారు. ఆసియాలోనే అతిపెద్ద బస్టేషన్‌గా పేరొందిన విజయవాడ బస్టాండ్‌లో ఇలాంటి చోరీలు జరగటంపై ప్రయాణికులు మండిపడుతున్నారు. వెంటనే భద్రతను కట్టుదిట్టం చేయాలని.. సీసీ కెమెరాలు పనిచేసేలా చేసి ప్రమాదాలు నివారించాలని ప్రయాణికులు డిమాండ్‌ చేస్తున్నారు. మరి ఇప్పటికైనా ఆర్టీసీ అధికారులు, పోలీసులు భద్రతను ఏర్పాటు చేసి ప్రమాదాలు నివారిస్తారో లేదో వేచి చూడాల్సి ఉంది. 

Pages

Don't Miss

Subscribe to RSS - ap cm