ap government

19:46 - October 19, 2017

విశాఖ : జిల్లాలో ఇసుక అక్రమ రవాణాపై అధికారులు ఉక్కుపాదం మోపారు. జిల్లాలోని చోడవరం, మాడుగుల నియోజకవర్గాల్లోని పలు ప్రాంతాల్లో ఉదయం నుంచి తనిఖీలు చేపట్టారు. ఈ ప్రాంతంలో ఇసుక అక్రమ రవాణా జోరుగా సాగుతోందని.. స్థానికులు కొందరు... డిప్యూటీ సీఎం చినరాజప్పకు ఫిర్యాదు చేశారు. దీంతో ఈ అంశంపై దృష్టిపెట్టాలని డిప్యూటీ సీఎం అధికారులను ఆదేశించారు. ఉదయం నుంచి మైనింగ్ శాఖ, పోలీసు,రెవెన్యూ శాఖ అధికారులు ఆకస్మిక దాడులు నిర్వహించి... పలు వాహనాలను సీజ్ చేశారు. 

19:45 - October 19, 2017

ప్రకాశం : జిల్లా కలెక్టరేట్ ముందు ఓ ఉద్యోగి ఆత్మహత్యాయత్నం చేశాడు. ఒంగోలు నగర పాలక సంస్థలో పారిశుద్ధ్య విభాగంలో ఆదాము అతని భార్య కార్మికులుగా పనిచేస్తున్నారు. ఇటీవల ఇద్దరిని విధుల నుంచి తొలగించడంతో... కుటుంబ పోషణ భారంగా మారింది. దీంతో ఇవాళ కలెక్టరేట్ వద్దకు వచ్చి కిరోసిన్ తాగి ఆత్మహత్యాయత్నానికి పాల్పడ్డాడు. సకాలంలో అదామును పోలీసులు రిమ్స్ ఆసుపత్రికి తరలించడంతో... ప్రాణాపాయం తప్పింది.

18:01 - October 19, 2017

హైదరాబాద్ : రాష్ట్ర ప్రజలకు గవర్నర్‌ నరసింహన్‌ దంపతులు దీపావళి శుభాకాంక్షలు తెలిపారు. దీపావళి సందర్భంగా రాజ్‌భవన్‌లో పలువురు ప్రముఖులు గవర్నర్‌ను కలిసి.. శుభాకాంక్షలు తెలిపారు. ప్రజలందరూ సుఖ సంతోషాలతో ఉండాలని నరసింహన్‌ ఆకాంక్షించారు. 

11:34 - October 19, 2017

అమరావతి: గత ఎన్నికల్లో ఇచ్చిన నిరుద్యోగ భృతి హామీని నెరవేర్చే దిశగా ఏపీ ప్రభుత్వం అడుగులు వేస్తోంది. రాష్ట్ర వ్యాప్తంగా ఉన్న నిరుద్యోగులకు భృతి ఇవ్వడానికి విధివిధానాల రూపనకల్పనపై మంత్రి నారాలోకేష్‌ సమీక్ష నిర్వహించారు.

వివిధశాఖల సమాచారంతో నివేదిక....

రాష్ట్రంలో ఉన్న నిరుద్యోగుల సంఖ్య తేల్చేందుకు వివిధశాఖల నుంచి సమాచారం తీసుకుని.. సమగ్ర నివేదిక రూపొందించాలని మంత్రి సూచించారు. నిరుద్యోగి విద్యార్హత, వయస్సు, ఆర్థిక పరిస్థితి లాంటి అంశాలపై ఇప్పటికే సిద్ధం చేసిన సమాచారంపై మంత్రి చర్చించారు. అయితే పూర్తిస్థాయి ప్రణాళిక సిద్ధం చేయడానికి గతంలో పశ్చిమబెంగాల్లో అనుసరించిన విధానాన్ని అధ్యయనం చేయాలని మంత్రి అధికారులకు సూచించారు. అర్హత గల ప్రతి నిరుద్యోగి అధార్‌కార్డ్‌ లాంటి గుర్తింపుకలిగిన అంశాలతో దరఖాస్తు చేసుకునే విధంగా వ్యవస్థను రూపొందించాలని మంత్రి సూచించారు. అయితే నిరుద్యోగ భృతి తీసుకునే వారు ఏదో ఒక సామాజిక కార్యక్రమంలో భాగస్వాములు కావాలనే నిబంధన కూడా పెట్టనున్నట్టు తెలుస్తోంది. ( దీనిపై సీపీఎం నేతలు మండిపడుతున్నారు. గత ఎన్నికల ముందు ఇచ్చిన హామీని నెరవేర్చకుండా.. 2019 ఎన్నికలు సమీపిస్తున్నందునే మరోసారి నిరుద్యోగ భృతి అంటూ టీడీపీ నేతలు ప్రచారం చేసుకుంటున్నారని మండిపడుతున్నారు. ) అధికారంలోకి వచ్చి నాలుగేళ్లు గడుస్తున్నా.. ఇంతవరకు రాష్ట్రంలో నిరుద్యోగుల సంఖ్యపైనే ప్రభుత్వానికి క్లారిటీ లేదని సీపీఎం నేతలు విమర్శించారు.

అన్ని విషయాలు ఆన్‌లైన్లో..!

ఒకవేళ ఎవరికైనా నిరుద్యోగ భృతి రాలేదంటే..దానికి కారణాలు కూడా ఆన్‌లైన్‌ద్వారా తెలుసుకునే వీలు కల్పించాలని మంత్రి అధికారులకు సూచించినట్టు తెలుస్తోంది. మొత్తానికి ఎన్నికల హామీని నెరవేర్చడానికి టీడీపీ ప్రభుత్వం కసరత్తు చేయడం.. నిరుద్యోగుల్లో ఆశలు రేపుతోంది.

12:59 - October 17, 2017

గుంటూరు : విద్యార్థుల ఆత్మహత్యల నివారణకు ప్రభుత్వం ఎన్ని చర్యలు తీసుకుంటున్నా... ఫలితం లేకుండాపోతోంది. తాజాగా గుంటూరు జిల్లాలో టెన్త్‌ విద్యార్థి రైలు కిందపడి ఆత్మహత్య చేసుకున్నాడు. వినుకొండలోని నారాయణ స్కూల్‌లో పదో తరగతి చదువుతున్న అఖిబ్‌ జావేద్‌... తోటి విద్యార్థుల మధ్య ఘర్షణ జరిగింది. ఈ విషయం తల్లిదండ్రులకు తెలుస్తుందేమోనన్న భయంతో జావేద్‌ రైలు కిందపడి ఆత్మహత్య చేసుకున్నాడు. 

 

17:13 - October 16, 2017

కర్నూలు : పెండింగ్‌లో ఉన్న సమస్యలు పరిష్కరించాలని డిమాండ్ చేస్తూ కర్నూలులో అంగన్‌వాడీలు ఆందోళన చేపట్టారు. సీఐటీయూ ఆధ్వర్యంలో జిల్లా కలెక్టర్ కార్యాలయం ఎదుట బైఠాయించారు. కనీస వేతనం, ఉద్యోగ భద్రత, పెండింగ్ బకాయిలు వెంటనే చెల్లించాలని డిమాండ్ చేస్తున్న అంగన్‌వాడీ వర్కర్స్‌తో టెన్ టివి ఫేస్ టూ ఫేస్ నిర్వహించింది. మరిన్ని వివరాలను వీడియోలో చూద్దాం....

 

16:22 - October 16, 2017

కృష్ణా : విద్యార్థుల ఆత్మహత్యలను నిరసిస్తూ విద్యార్థి సంఘాల నేతలు తలపెట్టిన విద్యాసంస్థల బంద్ విజయవాడలో ప్రశాంతంగా కొనసాగుతోంది. కృష్ణాజిల్లాలో 10 రోజుల్లో 7 మందికి పైగా విద్యార్థులు ఆత్మహత్యలు చేసుకోవడంపై విద్యార్ధి సంఘాలు ఆగ్రహం వ్యక్తం చేస్తున్నాయి. మంత్రులు  నారాయణ, గంటాను తక్షణమే బర్తరఫ్‌ చేయాలని, ఆత్మహత్యలపై సిట్టింగ్ జడ్జితో విచారణ జరిపించాలని డిమాండ్ చేశారు. ప్రభుత్వం చర్యలు తీసుకోకపోతే ఉద్యమాన్ని ఉద్ధృతం చేస్తామని హెచ్చరిస్తున్నారు. మరింత సమాచారాన్ని వీడియోలో చూద్దాం...
 

16:09 - October 16, 2017

విజయనగరం : పేద దళితులకు ప్రభుత్వం ఇచ్చిన భూములను పెత్తందారులు స్వాహా చేస్తున్నారు. వారికి తెలియకుండా రిజిస్ట్రేషన్లు చేసుకుని అమ్మేసుకుంటున్నారు. ఇదేమని ప్రశ్నిస్తే దౌర్జన్యానికి తెగబడుతున్నారు. విజయనగరం జిల్లాలో జరుగుతున్న భూకబ్జాలపై 10 టీవీ ప్రత్యేక కథనం.
నర్సిపురంలో వెలుగు చూసిన కబ్జా పర్వం
విజయనగరం జిల్లా పార్వతీపురం గ్రామీణ ప్రాంతాల్లో భూ కబ్జాలకు అడ్డూ అదుపు లేకుండా పోతోంది. పేద, దళిత, గిరిజనులకు ఇచ్చిన భూములను కబ్జారాయుళ్లు యథేచ్చగా కబ్జా చేసేస్తున్నారు. ఇదేమని ప్రశ్నిస్తే దౌర్జన్యాలకు దిగుతున్నారు. తాజాగా, పార్వతీపురం మండలం నర్సిపురం గ్రామంలో ఇటువంటి కబ్జా పర్వం వెలుగులోకి వచ్చింది. 
దళితుల భూములపై కన్నేసిన అధికారపార్టీ నేతలు
నాలుగేళ్ల క్రితం అప్పటి పార్వతీపురం ఐటీడీఏ పీవో శ్వేతా మహంతి గ్రామ పంచాయతీ పరిధిలోని 486 సర్వే నెంబర్లో ఉన్న ప్రభుత్వ భూముల్లో 5.29 ఎకరాల భూమిని 13 దళిత కుటుంబాలకు సాగు కోసం ఇచ్చారు. తమకిచ్చిన భూములను దళితులు బాగు చేసుకుని దానిలో మామిడి, జీడి, మొక్కల పెంపకం చేపట్టారు. ఇటీవల అధికార పార్టీకి చెందిన నేతలు ఆ భూములపై కన్నేశారు. అధికారపార్టీకి చెందిన దొగ్గ నరిసింహనాయుడు మరికొంతమంది సహకారంతో పాస్ పుస్తకాల్లో ఉన్న సర్వే నెంబర్లను మార్చేసి వేరొకరికి అమ్మేశాడు. వారి పేర్లపై రిజిస్ట్రేషన్లు కూడా పూర్తి చేసేసాడు. ఆ భూముల్లో వేసిన మొక్కలను సైతం పీకి పారేశారు. 
అధికార పార్టీ నేతను నిలదీసిన భూ యజమానులు 
ఇక ఆలస్యంగా విషయం తెలుసుకున్న భూ యజమానులు అధికార పార్టీ నేతను నిలదీశాడు. అక్కడితో ఆగకుండా అధికార పార్టీ నేత దౌర్జన్యంపై స్థానిక తహసీల్దార్‌కి ఫిర్యాదు చేశారు. న్యాయం చేస్తానని హామీ ఇచ్చిన తహశీల్దార్ ఇంతవరకు భూములను చూసేందుకైనా వెళ్లకపోవడంతో దళితులు ఆందోళన వ్యక్తం చేస్తున్నారు. ఇప్పుడు తమ పరిస్థితి ఏంటని వారు వాపోతున్నారు. 
దళితులకు అండగా నిలిచిన సీపీఎం నేతలు
మరోవైపు దళితులకు సీపీఎం నేతలు అండగా నిలిచారు. వారికి కేటాయించిన భూములను చట్ట ప్రకారం తిరిగి వారికి అప్పగించాలంటూ ఆందోళన బాట పట్టారు. దళితులకు న్యాయం జరిగే వరకూ వారికి అండగా ఉంటామని సీపీఎం నేతలు భరోసా ఇచ్చారు. ఇప్పటికైనా అధికారులు స్పందించి, దళితుల భూములను వారికి తిరిగి ఇప్పించాలని.. కబ్జారాయుళ్లపై కఠిన చర్యలు చేపట్టాలని ప్రజా సంఘాలు డిమాండ్ చేస్తున్నాయి. 

 

21:27 - October 15, 2017

కృష్ణా : విజయవాడలోని కాపు కార్పొరేషన్‌ ఆఫీస్‌లో హైడ్రామా నడిచింది. ఎండీ అమరేందర్‌ను ప్రభుత్వం  ఇవాళ బాధ్యతల నుంచి  తప్పించింది. దీనిపై క్లారిటీ ఇచ్చేందుకు  అమరేందర్‌ ప్రెస్‌మీట్‌ ఏర్పాటు చేశారు. అయితే  తన  అనుమతి లేకుండా ప్రెస్‌మీట్‌ ఎలాపెడతారంటూ చైర్మన్‌ రామానుజయ అమరేందర్‌ను నిలదీశారు. దీనిపై ఎండీ అమరేందర్‌ సీరియస్‌ అయ్యారు. తనకు సీఎం ఆఫీసు నుంచి అనుమతి ఉందని అడ్టుకోవద్దని తేల్చి చెప్పారు. దీంతో ప్రెస్‌మీట్‌లో తానుకూడా కూర్చుంటానంటూ చైర్మన్‌ రామానుజయ పేచీపెట్టారు. ఇద్దరు నేతల మధ్య వాగ్వాదంతో కాపుకార్పొరేషన్‌లో రాజకీయం మరింత వేడెక్కింది. మరిన్ని వివరాలను వీడియోలో చూద్దాం...

16:32 - October 15, 2017

విజయవాడ : చేనేత కార్మికులకు జీఎస్టీ పోటు తప్పడంలేదు. చేనేతను ఆదుకుంటామని చెప్పే పాలకుల మాటలు కేవలం కాగితాలకే పరిమితమవుతున్నాయి. అండగా ఉంటామన్న వారు ఆమడదూరంలో ఉంటూ ఆర్భాటపు ప్రకటనలు చేయడంతో సగటు చేనేత కార్మికుడి ఆవేదన వర్ణనాతీతంగా మారింది. 
జీఎస్టీతో తగ్గిన ఉత్పత్తి
దేశంలోనే అత్యధిక జీవనాధారమైన చేనేత రంగంపై జీఎస్టీ దెబ్బ గట్టిగానే పడింది. వస్తుసేవల పన్ను ప్రభావం చేనేత కళాకారులు, రంగంపై తీవ్ర ప్రభావం చూపుతోంది. సంప్రదాయ వస్త్రకళకు కొత్త డిజైన్లతో వన్నె తెస్తామన్న దేశ ప్రధాని ఆ హామిని నెరవేర్చలేదు సరికదా జీఎస్టీ తీసుకొచ్చి చేనేత పరిశ్రమను కోలుకోలేని దెబ్బతీశారు. జీఎస్టీ అమలుతోనే ఉత్పత్తిదారుల వద్ద 50 శాతానికి పైగా ఉత్పత్తి తగ్గిపోయింది. దీంతో నిల్వలు పేరుకుపోయి 30 శాతానికిపైగా ఎగుమతులు తగ్గుముఖం పట్టాయి. 
జీఎస్టీతో నేతన్నలపై మోయలేని పెనుభారం
చేనేత ఎగుమతుల్లో వృద్ధి సాధించాలంటే నిఫ్ట్‌ లాంటి సంస్థల సాయం తప్పనిసరి. అధునాతన మగ్గాల ఏర్పాటుకు చేనేత ఫైనాన్స్‌ కార్పొరేషన్‌ ఏర్పాటు అవసరం ఉన్నా ప్రభుత్వాలు ఏమీ పట్టనట్టు వ్యవహరిస్తున్నాయి.  ఇలాంటి అంశాలను విస్మరించిన కేంద్రం చేనేతపై జీఎస్టీని తెచ్చి నేతన్నలపై మోయలేని పెనుభారాన్ని వేసింది. దీంతో ఎన్నడూ లేని విధంగా చేనేత ముడి సరుకు మొదలుకొని ఉత్పత్తుల వరకు పన్ను పోటు ఎక్కువైంది. అయితే కేంద్ర ప్రభుత్వ నిర్ణయం పట్ల పలువురు విమర్శలు గుప్పిస్తున్నారు. 
కాటన్‌, వూల్‌ కొనుగోలు నుండి 5 శాతం జీఎస్ టీ 
వస్త్ర ఉత్పత్తికి కావలసిన ముడిసరుకైన కాటన్‌, వూల్‌ కొనుగోలు నుండే జీఎస్ టీ 5 శాతం పడుతోంది. దేశంలోనే అత్యధిక మగ్గాలున్న అనంతపురం జిల్లాలో చేనేత పరిశ్రమే జీవనాధారం. ఆంధ్రప్రదేశ్‌లో 1.75 లక్షల మగ్గాలుంటే ఒక్క అనంతపురం జిల్లాలోనే 75 వేల మగ్గాలున్నాయి. ఎక్కువ శాతం ఉత్పత్తయ్యే పట్టు వస్త్రాలకు దారం కొనుగోలు చేయాలంటే కిలో రూ. 4వేలకు పైనే ధర ఉంది. జీఎస్టీతో అది రెండువందలు పెరిగింది. చేనేత మగ్గంపై తయారైన వస్త్రానికి మరో 5 శాతం పన్ను అదనంగా విధిస్తున్నారు. అది సాధారణ వస్త్రమైనా, చీరైనా బాదుడు తప్పడంలేదు. అయితే మరో 18 శాతం అదనపు పన్ను చెల్లింపు అనివార్యంగా మారింది.
చేనేతపై పన్నును 15 శాతం పెంచిన కేంద్రం
చేనేత పన్నును 5 శాతానికి పరిమితం చేస్తామన్న కేంద్రం 15 శాతం పెంచింది. పట్టు చీర ఖరీదు 5వేలు ఉంటే, దానిపై జీఎస్టీ 750 విధించి చీర ఖరీదు కాస్తా 5,750 చేస్తున్నారు. దీంతో మహిళలు చీరలు కొనుగోలు చేసేందుకు ముందుకు రావడంలేదు. ఫలితంగా స్టాకు నిల్వలు పెరిగిపోతున్నాయని ఉత్పత్తిదారులు ఆవేదన చెందుతున్నారు.
ముడిసరుకు కొనుగోలుకు 5 శాతం జీఎస్టీ 
ముడి సరుకు కొనుగోలుకు 5 శాతం జీఎస్టీ చెల్లించిన ఉత్పత్తిదారుడు తాను తయారు చేసిన వస్త్రానికి కూడా బిల్లువేసి వెంటనే జీఎస్టీ చెల్లించాలి. అదే రిటైలర్లు షాపులో కస్టమర్‌ నుండి జీఎస్టీ వసూలు చేసినా ఏడాది తర్వాత అయినా ఉత్పత్తిదారులకు మొత్తం సొమ్ము ఇస్తారన్న గ్యారెంటీ లేదు. దీంతో ఈ భారం ఉత్పత్తిదారులపై పడుతోంది. 
చేనేత రంగం సంక్షోభంలో 
కేంద్ర ప్రభుత్వ నిర్ణయం పట్ల చేనేత రంగం సంక్షోభంలో పడిందంటున్నారు విపక్షాలు. కేంద్రంపై ఒత్తిడి తెస్తే తప్ప పరిస్థితులు చక్కబడే పరిస్తితులు కనిపించడంలేదు. ఇప్పటికైనా ప్రభుత్వాలు స్పందించి చేనేత కార్మికులను ఆదుకోవాల్సిన అవసరం ఎంతైనా ఉంది. 

Pages

Don't Miss

Subscribe to RSS - ap government