Bhadrachalam

06:49 - August 18, 2018

హైదరాబాద్ : తెలంగాణలో భారీ వర్షాలతో ప్రాజెక్టులన్నీ నిండుకుండను తలపిస్తున్నాయి. గోదావరి, పెనుగంగా, ప్రాణహిత నదులు ఉధృతంగా ప్రవహిస్తున్నాయి. భద్రాచలం వద్ద నీటిమట్టం 46 అడుగులకు చేరడంతో మొదటి ప్రమాద హెచ్చరికను జారీ చేశారు. ఇక కడెం ప్రాజెక్ట్‌లోకి భారీగా వరద చేరడంతో.. గోదావరి పరివాహక ప్రాంతాల్లో ప్రజలు అప్రమత్తంగా ఉండాలని అధికారులు హెచ్చరిస్తున్నారు. ఇక తెలంగాణలోనూ భారీగా కురుస్తున్న వర్షాలతో ఉమ్మడి కరీంనగర్‌, ఆదిలాబాద్‌ జిల్లా అతలాకుతలమవుతున్నాయి. గోదావరి, పెనుగంగా, ప్రాణహిత నదులు ఉధృతంగా ప్రవహిస్తున్నాయి. భూపాలపల్లి జిల్లా మహదేవ్‌పూర్‌ మండలం కాళేశ్వరం వద్ద గోదావరిలో పెరుగుతున్న నీటి ప్రవాహాన్ని అధికారులు పరిశీలించారు.

భారీ వర్షాలతో భద్రాచలం వద్ద గోదావరి నీటిమట్టం 46.2 అడుగులకు చేరింది. దీంతో అధికారులు మొదటి ప్రమాద హెచ్చరికను జారీ చేశారు. భద్రాచలంలోని స్నానఘట్టాలు మునిగిపోయాయి. ఇంకా వరద ఉధృతి పెరిగే అవకాశం ఉందని తెలిపారు. ఇక వరద ఉధృతితో విలీన మండలాల్లో శబరి నదికి వరద పోటెత్తింది. చింతూరు, వీఆర్‌పురం, కూనవరం మండలాల్లో రహదారులు నీటి మునిగాయి. దేవీపట్నం మండలంలోని సీతపల్లి వాగు పొంగిపొర్లుతోంది. వరద ఉధృతికి పలు ప్రాంతాల్లో పంట పొలాలు నీటమునిగాయి. గోదావరి ఉధృతంగా ప్రవహిస్తుండడంతో తీరం వెంబడి ఉన్న గ్రామాల ప్రజలు భయాందోళనకు గురవుతున్నారు. ప్రజలంతా అప్రమత్తంగా ఉండాలని అధికారులు సూచించారు. వరద ఉధృతిని తెలుసుకునేందుకు భద్రాచలం సబ్‌ కలెక్టర్‌ కార్యాలయంలో కంట్రోల్‌ రూమ్‌ ఏర్పాటు చేశారు. 08743-232444 నెంబర్‌కు ఫోన్‌ చేసి వరద పరిస్థితిని తెలుసుకోవచ్చని... సమాచారం ఇవ్వవచ్చని తెలిపారు.

కుమ్రంభీం ఆసిఫాబాద్‌ జిల్లాలో గురువారం 12 సెం.మీ వర్షపాతం నమోదైంది. పెద్దవాగు ఉధృతికి రాకపోకలు నిలిచిపోయాయి. వంతెనల నుంచి నీరు ప్రవహిస్తున్నది. సుమారు 10వేల ఎకరాల్లో పంట నీటి మునిగింది. దహెగాం మండలంలో ఎర్రవాగు ఉప్పొంగడంతో గిరివెల్లి గ్రామానికి చెందిన గర్బిణీని తరలించేందుకు అవస్థలు పడ్డారు.

ఇక వర్షంతో కామారెడ్డి, నిజామాబాద్‌, రాజన్న సిరిసిల్ల, పెద్దపల్లి, నిర్మల్‌ జిల్లాలు తడిసి ముద్దయ్యాయి. పలు ప్రాంతాల్లో వర్షానికి నాని ఇళ్లు కూలిపోయాయి. నిర్మల్‌ జిల్లాలోని కడెం ప్రాజెక్టుకు భారీగా వరద నీరు వచ్చి చేరుతోంది. దీంతో 10 గేట్లను ఎత్తి వరద నీటిని గోదావరిలోకి వదులుతున్నారు. గోదావరి పరివాహక ప్రాంతాల్లో ప్రజలు అప్రమత్తంగా ఉండాలని ఇరిగేషన్ అధికారులు సూచిస్తున్నారు.

హైద్రాబాద్‌లో కురిసిన వర్షానికి మూసీనదిలో నీటి ప్రవాహం పెరిగింది. భువనగిరి నుంచి భూదాన్‌ పోచంపల్లి వరకు రాకపోకలకు అంతరాయం ఏర్పడింది. పెద్దపల్లి జిల్లాలో భారీవర్షాలకు పలుచోట్ల వాగు, వంకలు పొంగాయి. జగిత్యాల జిల్లాలో సరాసరి వర్షపాతం 6 సెంటీమీటర్ల వర్షపాతం నమోదైంది. ఇక ఎడతెరిపి లేకుండా కురుస్తున్న వర్షాలకు భూపాలపల్లి సింగరేణి ఏరియాలోని రెండు ఓపెన్ కాస్టు గనుల్లో బొగ్గు ఉత్పత్తి నిలిచిపోయింది. ఇప్పటివరకు 21,660 టన్నుల బొగ్గు ఉత్పత్తికి విఘాతం కలిగింది. ఉత్పత్తి రూపేణా రూ.5.41 కోట్ల నష్టం సింగరేణి సంస్థకు వాటిల్లినట్లు సింగరేణి అధికారులు తెలిపారు.

ఇక భారీగా కురుస్తున్న వర్షాలపై ఆర్థికమంత్రి ఈటెల రాజేందర్‌ సమీక్ష నిర్వహించారు. ఎలాంటి పరిస్థితులు ఎదురైనా ఎదుర్కొనేందుకు సిద్దంగా ఉండాలని అధికారులను ఆదేశించారు. పంట నష్టం జరిగినప్పటికీ... ప్రాజెక్టులన్నీ నిండుకుండను తలపిస్తున్నాయన్నారు. ప్రస్తుత పరిస్థితుల్లో లోతట్టు ప్రాంత ప్రజలంతా అప్రమత్తంగా ఉండాలని సూచించారు. అన్ని జిల్లాల్లోనూ అధికార యంత్రాంగమంతా అప్రమత్తంగా ఉండాలని సీఎం కేసీఆర్‌ ఆదేశించిన నేపథ్యంలో.... స్పెషల్‌ ఆఫీసర్లు వర్షాల పరిస్థితిని ఎప్పటికప్పుడు పర్యవేక్షిస్తున్నారు. ఇదిలావుంటే మరోవైపు మరో రెండు రోజులు ఇదే పరిస్థితి కొనసాగనున్నట్లు వాతావరణ శాఖ సూచించడంతో... ప్రజలంతా అప్రమత్తంగా ఉండాలని అధికారులు హెచ్చరిస్తున్నారు. 

06:43 - August 18, 2018

విజయవాడ : భారీ వర్షాలతో ఆంధ్రప్రదేశ్‌లో నదులన్నీ ఉధృతంగా ప్రవహిస్తున్నాయి. గోదావరి ఉగ్రరూపం దాలుస్తోంది. మరోవైపు వాగులు, వంకలు పొంగిపొర్లడంతో పలుచోట్ల రహదారులు నీటమునిగాయి. ధవళేశ్వరం వద్ద నీటిమట్టం 11.75 అడుగులకు చేరడంతో.. దిగువకు 10లక్షల క్యూసెక్కుల నీటిని వదిలారు. మరోవైపు వరద ఉధృతితో లంక గ్రామాల ప్రజలు ఇబ్బందులు ఎదుర్కొంటున్నారు. పెద్దాపురం మండలంలో చెరువులో పడి గేదెల కాపరి మృతి చెందాడు. ఎగువ ప్రాంతాల నుంచి వస్తున్న వరద నీటితో తూర్పుగోదావరి జిల్లాలోని రాజమండ్రి వద్ద గోదావరి ఉగ్రరూపం దాల్చింది. వరద నీరు ఉద్ధృతంగా ప్రవహిస్తుండటంతో అధికారులు లంక గ్రామాల ప్రజలను సురక్షిత ప్రాంతాలకు తరలిస్తున్నారు. ధవళేశ్వరం ప్రాజెక్ట్‌ వద్ద నీటిమట్టం 11.75 అడుగులకు చేరింది. దీంతో అధికారులు మొదటి ప్రమాద హెచ్చరికను జారీ చేశారు.

సముద్రంలోకి 10లక్షల క్యూసెక్కుల నీటిని విడుదల చేశారు. మొదటి ప్రమాద హెచ్చరిక జారీ చేయడంతో... కోనసీమలో గౌతమి, వశిష్ట, వైనతేయలు పోటెత్తి ప్రవహిస్తున్నాయి. ఇంకా వరద పెరిగే అవకాశం ఉండడంతో రెవెన్యూ అధికారులు, పోలీసులు ప్రజలను అప్రమత్తం చేశారు. మరోవైపు ముమ్మడివరం మండలం అయినాపురం, కొత్తలంక, సోమిదేవరపాలెం గ్రామాల్లో 400 ఎకరాల వరి పంట ముంపునకు గురైంది. ఇక పెద్దాపురం మండలం వాలుతిమ్మాపురం తోట చెరువులో పడి గేదెల కాపరి పిల్లి నారాయణరావు మృతి చెందాడు.

పశ్చిమగోదావరి జిల్లా పోలవరంలో గోదావరి పరవళ్లు తొక్కుతోంది. ఎగువ ప్రాంతాల నుంచి వరద నీరు భారీగా చేరుతోంది. ప్రస్తుతం పోలవరంలో 13 మీటర్ల మేర వరద కొనసాగుతోంది. నీటిమట్టం మరింత పెరిగే అవకాశం ఉంది. వరద నీరు పోటెత్తడంతో పోలవరం ప్రాజెక్ట్‌ పనులు తాత్కాలికంగా నిలిచిపోయాయి. మరోవైపు గోదావరికి వరద గణనీయంగా పెరిగే అవకాశం ఉండడంతో కోనసీమలో లంక గ్రామాల ప్రజలు బిక్కుబిక్కుమంటూ గడుపుతున్నారు. ఇప్పటికే గత వారం రోజులుగా గోదావరి ఉద్ధృతితో రాకపోకలకు తీవ్ర ఇబ్బందులకు గురవుతున్న లంక గ్రామాల ప్రజలు రానున్న వరద ముప్పుతో భయపడుతున్నారు. చాకలిపాలెం వద్ద కాజ్‌వే వరదనీటిలో మునిగిపోవడంతో పశ్చిమగోదావరి జిల్లా కనకాయలంక ప్రజల రాకపోకలకు తీవ్ర అంతరాయం ఏర్పడింది. మరోవైపు కోనసీమపై ప్రత్యేక దృష్టి నిలిపిన యంత్రాంగం ముందస్తు సహాయ చర్యలను వేగవంతం చేసింది. ప్రజలకు నిత్యావసర వస్తువులు పడవల ద్వారా అందజేస్తున్నారు.

ఇక భారీ వర్షాలతో తుంగభద్ర ప్రాజెక్ట్‌కు భారీ వరద కొనసాగుతోది. గడిచిన దశాబ్ధ కాలంలో ఎప్పుడూ లేనంతగా 2.10 లక్షల క్యూసెక్కుల వరద నీరు ప్రాజెక్టులోకి చేరింది. భారీగా వరద నీరు చేరడంతో.. 33 గేట్ల ద్వారా 2.30 లక్షల క్యూసెక్కుల నీటిని దిగువకు విడుదల చేస్తున్నారు. ఇక శ్రీశైలం ప్రాజెక్ట్‌లోకి భారీ వరద నీరు చేరుతోంది. ప్రాజెక్ట్‌లోకి 3.11 లక్షల క్యూసెక్కుల నీరు చేరుతుండగా... ఔట్‌ఫ్లో లక్ష క్యూసెక్కులుగా ఉంది. ప్రాజెక్ట్‌ పూర్తిస్థాయి నీటిమట్టం 885 అడుగులు కాగా.. ప్రస్తుతం నీటిమట్టం 877 అడుగులకు చేరుకుంది. భారీగా వరద చేరుతుండడంతో.... కుడి, ఎడమగట్టు జలవిద్యుత్‌ కేంద్రాల్లో విద్యుత్‌ ఉత్పత్తి చేస్తున్నారు. మరోవైపు కల్వకుర్తి ఎత్తిపోతల పథకానికి 1600 క్యూసెక్కులు, హంద్రీనీవా ప్రాజెక్ట్‌కు 2,025 క్యూసెక్కుల నీరు విడుదల చేస్తున్నారు. ఇక పోతిరెడ్డిపాడు ఎత్తిపోతల పథకానికి 2300 క్యూసెక్కుల నీటిని విడుదల చేస్తున్నారు.

శ్రీకాకుళం జిల్లా హిరమండలం వద్ద వంశధార ఫేజ్‌-2 రిజర్వాయర్‌లో జలకళ తొణికిసలాడుతోంది. గొట్టా బ్యారేజి వద్ద 39 వేల క్యూసెక్కుల వరద కొనసాగుతోంది. మరోవైపు నాలుగు రోజులుగా కురుస్తున్న వర్షాలతో నాగావళి, వంశధార, మహేంద్రతనయ నదులతోపాటు అన్ని కాలువలు వరద నీటితో నిండిపోయాయి. దీంతో లోతట్టు ప్రాంతాలు, నది పరివాహక ప్రాంతాలతో పాటు రైతులు ఇబ్బందులు పడుతున్నారు. ఈ ఏడాది సకాలంలో నాట్లు వేయడంతో.. పరిస్థితి బాగుంటుందని భావించిన రైతులు వరద ముంపు బారినపడ్డారు. భారీ వర్షాలతో సోంపేట, కవిటి, కంచిలి, ఇచ్చాపురం, నందిగాం, టెక్కలి, ఆముదాలవలస, సరుబుజ్జిలి మండలాల పరిధిలో పంటపొలాలు వరద ముంపునకు గురయ్యాయి. కొద్దిరోజుల క్రితమే ఖరీఫ్‌ సీజన్‌ను ప్రారంభించిన రైతులు.. భారీగా నష్టపోయారు. నాట్లు, ఇతర పనులకు భారీగా ఖర్చు చేశామని... నాట్లు వరద ముంపునకు గురి కావడంతో ఇబ్బందుల పాలయ్యామని రైతులు ఆవేదన వ్యక్తం చేస్తున్నారు. మొత్తానికి భారీ వర్షాలతో పలు ప్రాజెక్టులను నిండుకుండను తలపిస్తుండగా.. లోతట్టు ప్రాంత ప్రజలకు ఇబ్బందులు తప్పడం లేదు. మరోవైపు వాగులు, వంకలు పొంగిపొర్లడంతో పలు ప్రాంతాలకు రాకపోకలు నిలిచిపోయాయి. అయితే.. ఇప్పటికే ప్రజలను అప్రమత్తం చేసిన ప్రభుత్వం... ఎలాంటి ప్రమాదాలు తలెత్తకుండా సహాయచర్యలు చేపట్టింది. 

12:32 - August 17, 2018

తూర్పుగోదావరి : గోదావరి నదిలో నీటి మట్టం క్రమ క్రమంగా ఎక్కువ అవుతోంది. దీనితో అధికార యంత్రాంగం అప్రమత్తమైంది. మొదటి ప్రమాద హెచ్చరికను జారీ చేశారు. గోదావరి నీటి మట్టం ప్రస్తుతం 44 అడుగులకు చేరుకుంది. దీనితో దిగువ ప్రాంతాలకు ప్రమాదం ఉన్న నేపథ్యంలో వారిని అధికారులు హెచ్చరించారు. దేవీపట్నం వద్ద గిరిజన గ్రామాలను అధికారులు ఖాళీ చేయించారు. విలీన మండలాలైన వీఆర్ పురం, చింతూరులో శబరి నది ఉధృతంగా ప్రవహిస్తోంది. దీనితో 50 గ్రామాల్లో రవాణా వ్యవస్థ నిలిచిపోయింది. మరింత సమాచారం కోసం వీడియో క్లిక్ చేయండి. 

11:52 - July 13, 2018

ఖమ్మం : గోదారమ్మ జల కళతో కళకళలాడుతోంది. ఎగువ రాష్ట్రమైన మహారాష్ట్రలో కురుస్తున్న భారీ వర్షాలకు గోదావరి నదిలో వరదనీరు భారీగా వచ్చి చేరటంతో నది ఉప్పొంగి ప్రవహిస్తోంది. గత రాత్రి గోదావరిలో 30.7 అడుగుల నీటి మట్టం నమోదు కాగా ఈరోజు రాత్రికి మరో నాలుగు అడుగుల మేరకు వరద నీరు పెరగనుండటంతో నీటి మట్టం మరింతగా పెరిగే అవకాశముంది. 43 అడుగుల నీటి మట్టం దాటితే మొదటి ప్రమాద హెచ్చరికను అధికారులు ఎగురవేయనున్నారు. కాగా ముందెన్నడూ లేనంతగా గోదావరి నీటి మట్టం 30అడుగులకు పైగా నీటి ప్రవాహం చేరింది. ఈ వర్షాలతో రైతన్నలు సంబరాల్లో మునిగిపోయి పంటలను పండించేందుకు ఇనుమడించిన ఉత్సాహంతో ముందుకు కదులుతున్నారు. మరోపక్క తెలంగాణ నుండి ఏపీలో కలిసిన విభజన ప్రాంతాల వాసులు, గోదావరి తీర ప్రాంతంలోని వాగులు, వంకలు వరద నీటితో పొంగి పొర్లుతున్నాయి. ఏజెన్సీ ప్రాంతాల వారు ఎప్పుడు ఏం జరుగుతుందోననే భయంతో ప్రాణాలు అరచేతిలో పెట్టుకుని జీవన సాగిస్తున్నారు. 

18:36 - April 18, 2018

భద్రాచలం : కోమటిరెడ్డి, సంపత్‌ల సభ్యత్వాల రద్దుపై హైకోర్టు ఇచ్చిన తీర్పు ప్రభుత్వానికి చెంపపెట్టని పీసీసీ చీఫ్‌ ఉత్తమ్‌కుమార్‌ రెడ్డి అన్నారు. ఈ విషయంలో సీఎం, స్పీకర్‌లకు తమ పదవుల్లో కొనసాగే నైతిక హక్కు లేదని అన్నారు. భద్రాచలంలో సీతారామ స్వామిని దర్శించుకున్న ఉత్తమ్ కుమార్ రెడ్డి ప్రభుత్వ తీరుపై మండిపడ్డారు. భద్రాచలం ఆలయ అభివృద్ధికి 100 కోట్లు ఇస్తామన్న హామీని కేసీఆర్ మరిచిపోయారని ఉత్తమ్ విమర్శించారు. టీఆర్ఎస్ ప్రభుత్వం అధికారంలోకి వచ్చని తర్వాత కూడా భద్రాచలం అభివృద్ధికి నోచుకోలేదని...గిరిజనులు సాగు చేసుకుంటున్న పోడు భూములను సైతం వదలటం లేదని ఉత్తమ్ ఆరోపించారు. భద్రాచలం ప్రస్తుతం అక్రమ ఇసుక దందాకు మారు పేరుగా మారుతుందని.. ప్రజల సొమ్ముని, సహజ వనరులను అడ్డంగా దొచుకుంటున్నారని ఉత్తమ్ ఆరోపించారు. 

18:14 - March 27, 2018
16:50 - March 27, 2018

కృష్ణా జిల్లా : ఎ కొండూరులో శ్రీరామనవమి వేడుకల్లో అపశృతి చోటుచేసుకుంది. ప్రసాదం, పానకాలు కల్తీ కావడంతో సుమారు 200 వందల మందికి పైగా భక్తులు అస్వస్థత గురయ్యారు. వెంటనే స్పందించిన స్థానిక పోలీసులు భాదితులను హుటా హుటిన మైలవరం ప్రభుత్వాస్పత్రికి , కొందరిని తిరువూరు ఆస్పత్రికి తరలించారు. ప్రసాదం కల్తీ అవ్వడానికి కారకులైన వారిపై చర్యలు తీసుకోవాలని కలెక్టర్‌ ఆదేశించారు. అస్వస్థతకు గురైన భక్తులకు సీపీయం పార్టీ నాయకులు, ప్రజా సంఘాలు సాయం అదించారు.

22:18 - March 26, 2018
18:44 - March 26, 2018

భద్రాద్ది : భద్రాద్రిలో సీతారాముల కల్యాణం అంగరంగ వైభవంగా జరిగింది. సిగ్గులొలికే సీతమ్మ మెడలో అందాల రాముడు మూడుముళ్లు వేశాడు... సీతారాముల కల్యాణ అపురూప ఘట్టాన్ని చూసి భక్తులు పులకించి పోయారు.

భక్తజన సందోహంతో భద్రాచలం..
భద్రాచలం భక్తజన సందోహంతో కళకళలాడింది... మిథిలా మైదానంలో అట్టహాసంగా రాములోరి కల్యాణం జరిగింది.... స్వామివార్లకు ప్రభుత్వం తరపున మంత్రులు ఇంద్రకరణ్‌రెడ్డి, తుమ్మల నాగేశ్వరరావు, తలసాని శ్రీనివాస్‌యాదవ్‌ పట్టువస్త్రాలు, ముత్యాల తలంబ్రాలు సమర్పించారు. మిథిలా స్టేడియంలో ఉదయం 9 నుంచి 9.30 గంటల వరకు కల్యాణ మూర్తులను పట్టువస్త్రాలతో అలంకరించారు అర్చకులు. ఉదయం 9.30 నుంచి 10.30 గంటల వరకు స్వామివారిని ఊరేగింపుగా మిథిలా మైదానానికి తీసుకువచ్చారు. ఉదయం 10.30 నుంచి మధ్యాహ్నం 12.30 వరకు శ్రీ సీతారాముల కల్యాణ క్రతువు ఘనంగా జరిగింది.

అభిజిత్ లఘ్న సుముహూర్తాన వివాహం
అభిజిత్ లఘ్న సుముహూర్తాన వధూవరుల శిరస్సున జీలకర్ర బెల్లం ఉంచారు. అనంతరం రాములోరు సీతమ్మకు మాంగళ్యధారణ చేశారు. తాళి, మెట్టలు , తలంబ్రాల ప్రాశస్త్యాన్ని వివరించిన అర్చకులు... భారతీయ వివాహ వైభవాన్ని తెలియజేస్తూ కార్యక్రమం పూర్తిచేశారు.. అంతకు మందు అమ్మవారికి చింతాకు పతకధారణ చేశారు. కల్యాణవేడుకలో కీలక ఘట్టమైన తలంబ్రాల వేడుకకూడా ఘనంగా నిర్వహించారు. భక్తులకు కౌంటర్లద్వారా తలంబ్రాలు పంపిణీ చేశారు..

భారీ సంఖ్యలో భక్తులు
రాములవారి కల్యాణాన్ని చూసేందుకు భక్తులు భారీ సంఖ్యలో తరలివచ్చారు.. సీతారాముల కల్యాణోత్సవం సందర్భంగా భద్రగిరి శ్రీరామ స్మరణతో మార్మోగింది. అయితే సీతారాముల కల్యాణానికి ముఖ్యమంత్రి పర్యటన రద్దు కావడంతో భద్రాద్రి ప్రజలు తీవ్ర నిరాశ చెందారు. మంగళవారం రాములవారి పట్టాభిషేకం కార్యక్రమం జరగనుంది...

13:32 - March 26, 2018

Pages

Don't Miss

Subscribe to RSS - Bhadrachalam