BV Raghavulu

21:27 - April 8, 2018

హైదరాబాద్ : జాతీయ స్థాయిలో బీజేపీ, కాంగ్రెస్‌కు సీపీఎం మాత్రమే ప్రత్యామ్నాయం అన్నారు ఆ పార్టీ పొలిట్ బ్యూరో సభ్యులు బీవీ రాఘవులు. ఈ నెల 18 నుంచి 22 వరకు సీపీఎం అఖిల భారత మహాసభలు నిర్వహిస్తున్నామన్నారు. ఈ సభల్లో దేశంలో పలు అంశాల్లో చోటుచేసుకుంటున్న మార్పులు, అభివృద్ధి నమూనాలపై చర్చిస్తామన్నారు. మతోన్మాద, కార్పొరేట్ అనుకూల వైఖరితో ఉన్న బీజేపీకి వ్యతిరేకంగా.. వామపక్ష, ప్రజాస్వామ్య, లౌకిక శక్తులు ఏకం కావాలన్నారు. ఇవే అంశాలపై ఈ నెల 18 నుంచి 22 వరకు జరిగే సీపీఎం అఖిల భారత మహా సభల్లో చర్చిస్తామని చెప్పారు. ఈ మహా సభల ఉద్దేశాన్ని ప్రజలకు చేరవేసేందుకు సహకరించాలని హైదరాబాద్‌లో జరిగిన మీడియా ఎడిటర్స్‌ మీట్‌లో కోరారు.

ప్రజా వ్యతిరేక విధానాల్లో కాంగ్రెస్ కన్నా బీజేపీ ప్రభుత్వం దూకుడును ప్రదర్శిస్తుందని.. బీవీ రాఘవులు అన్నారు. కుల, మత వైషమ్యాలతో సమగ్రత, అభివృద్దికి ఆటంకం కలిగించేలా మోదీ చర్యలు ఉన్నాయని విమర్శించారు.. అమెరికా జోక్యంతో మేకిన్ ఇండియాకు అర్ధమే లేకుండా పోయిందన్నారు.

రాష్ర్టంలో అనేక అంశాలపై పోరు సలుపుతున్న తరుణంలో సీపీఎం మహాసభలు జరగడం... ఎంతో ప్రాధాన్యత సంతరించుకుంటున్నాయని సీపీఎం రాష్ట్ర కార్యదర్శి తమ్మినేని వీరభద్రం అన్నారు. ప్రత్యామ్నాయ అభివృద్ధి నమూనా అమలు కావాలంటే రాజకీయ జోక్యం తప్పనిసరన్నారు. అందుకోసమే ఆ కోణంలో నుంచే బీఎల్ఎఫ్ పుట్టుకొచ్చిందని తెలిపారు. గొర్రెలు, బర్రెలు ఇవ్వడం సామాజిక సహాయం అవుతుందే కానీ సమాజిక న్యాయం కాదని తమ్మినేని అన్నారు. సరూర్ నగర్ స్టేడియంలో భారీ బహిరంగ సభతో పాటు.. 25 వేల మంది రెడ్ షర్ట్ వాలంటీర్లతో కవాతు నిర్వహిస్తామని తమ్మినేని అన్నారు. కోదండరాం, పవన్‌ కళ్యాణ్‌లతో కలిసి పని చేసే అంశాన్ని పరిశీలిస్తామని అన్నారు. 

18:55 - March 24, 2018

రంగారెడ్డి : బీజేపీ దేశంలో అధికారంలోకి వచ్చాక దళితులు, మైనార్టీలపై దాడులు పెరిగాయని సీపీఎం పొలిట్‌బ్యూరో సభ్యుడు బీవీ రాఘవులు ఆరోపించారు. మనుధర్మ శాస్త్రాన్ని బీజేపీ అమలు పరచాలని ప్రయత్నిస్తోందన్నారు. బీజేపీ ప్రభుత్వంలో దళితులు, మైనార్టీల ప్రాణాలకు రక్షణ లేకుండా పోయిందని ఆవేదన వ్యక్తం చేశారు. తీవ్ర అణచివేతకు గురవుతున్నారన్నారు. సీపీఎం అఖిలభారత మహాసభలను పురస్కరించుకుని రంగారెడ్డి జిల్లా మంచాల మండలంలోని ఆరుట్లలో బస్సు ప్రచార జాతాను ఆయన ప్రారంభించారు. దేశ ప్రజలు ఎదుర్కొంటున్న సమస్యలను ఈ మహాసభల్లో చర్చించనున్నామని తెలిపారు. ఇదే కార్యక్రమంలో పాల్గొన్న సీపీఎం రాష్ట్ర కార్యదర్శివర్గ సభ్యుడు జూలకంటి రంగారెడ్డి టీఆర్‌ఎస్‌ ప్రభుత్వంపై మండిపడ్డారు. తెలంగాణను కేసీఆర్‌ పోలీస్‌ రాజ్యంగా మార్చుతున్నారని ఆగ్రహం వ్యక్తం చేశారు. నిరసన తెలిపే హక్కునూ కాలరాస్తున్నారని ధ్వజమెత్తారు. కేసీఆర్‌ నియంతృత్వ పోకడలు మానుకోకుంటే ప్రజలే గుణపాఠం చెబుతారని హెచ్చరించారు. అవసరసమైతే మరో తెలంగాణ పోరాటానికి తాము సిద్ధమని ప్రకటించారు. అంతకుముందు అంబేద్కర్‌ విగ్రహానికి సీపీఎం నేతలు పూలమాలవేసి నివాళులు అర్పించారు. 

16:50 - March 24, 2018

రంగారెడ్డి : సీపీఎం మహాసభల్లో ప్రజలు ఎదుర్కొంటున్న సమస్యలపై చర్చించి పోరాట కార్యాచరణ రూపొందిస్తామని సీపీఎం పొలిట్ బ్యూరో సభ్యులు రాఘవులు పేర్కొన్నారు. సీపీఎం జాతీయ మహాసభల సందర్భంగా రంగారెడ్డి జిల్లాలో బస్సు జాతాలు ప్రారంభమయ్యాయి. బస్సు జాతాలను ప్రారంభించిన రాఘవులుతో టెన్ టివి ముచ్చటించింది.

మహసభల కోసం విస్తృత ప్రచారం నిర్వహిస్తున్నామని పేర్కొన్నారు. సీఎం కేసీఆర్ ఇటీవలే వెల్లడించిన థర్డ్ ఫ్రంట్ తో ఉపయోగం లేదని, కాంగ్రెస్ బిజెపిలు అనుసరిస్తున్న విధానాలను కేసీఆర్ అవలింబిస్తున్నారని విమర్శించారు. మహారాష్ట్రలో జరిగిన లాంగ్ మార్చ్ లాగే తెలంగాణ రాష్ట్రంలో పోరాటాలు చేయాల్సినవసరం ఉందన్నారు. 

22:02 - March 6, 2018

విజయం సాధించినప్పుడు పండుగ చేసుకుంటే తప్పులేదు..పతంగులు ఎగురవేసుకుంటే తప్పులేదు.. కానీ విధ్వంసానికి పాల్పడితే, పగ ప్రతీకారాలకు తెగబడితే ప్రజాస్వామ్యానికే చేటు. భారత రాజ్యాంగ ప్రవచించిన మౌలిక సూత్రాల విలువలకే సిగ్గుచేటు. మూర్తీభవించిన మూర్ఖత్వం సిద్ధాంత మూర్తుల విగ్రహాలపై పగబడితే ఏమనాలి ? ఇది రాజకీయా ? కట్టుతప్పిన మౌఢ్యమా ? ఏ విలువలకు ఈ ప్రస్తానం. శాంతిభద్రతలను చెరపట్టిన దుష్టపన్నాగం, ప్రత్యర్థులను దునుమాడడమేనా రాజ్యాధికారం. అనూహ్యవిజయంతో త్రిపురలో రెచ్చిపోయిన సంఘ్ పరివార్ శక్తులు భారత్ సమాజానికే సవాల్ విసురుతున్నాయి. ఒకవైపు అత్యున్నత ప్రజాస్వామ్య వేదిక పార్లమెంట్ సమావేశాల్లో ఉండగానే..ఈశాన్య రాష్ట్రాన ఈ మూకల ముట్టడి గగుర్పాటు కల్గిస్తోంది. ఇది విజయగర్వం కాదు.. వికటాట్టహాసం.. ప్రజాతీర్పుపైనే పరాభవం. త్రిపురలో జరిగిన ఘట్టాలు ఒకసారి మననం చేసుకుంటే ప్రజాస్వామ్య హితైశిలు కన్నీళ్లు పెట్టకమానరు. కళ్లెర్రచేయకపోరు...134 పార్టీ కార్యాలయాలపై దాడి..514 మందిపై హింసాత్మ కగాయాలు, 196 గృహాలు దహనం, 1500 ఇళ్లపై విరుచుకుపడడం, ఇదా రాజనీతి? ఎటు తీసుకెళ్తున్నారు ఈ దేశాన్ని ? నేటి భారతం ప్రశ్నిస్తోంది..ఎవరు సమాధానం ఇవ్వగలరు? ప్రజాస్వామ్యంలో హింసకు తావులేదంటారు.. కానీ రాజ్యమే అందుకు తెగబడితే... అడిగేవారెవరు ? త్రిపుర పరిణామాలు, పర్యవసానాలు, అసలు వీటికి కారణాలపై నిర్వహించిన ప్రత్యేక చర్చా కార్యక్రమంలో సీపీఎం రాష్ట్ర కార్యదర్శివర్గ సభ్యులు వి.వెంకట్ పాల్గొని, మాట్లాడారు. ఆయన తెలిపిన వివరాలను వీడియోలో చూద్దాం..

 

18:54 - March 6, 2018

ఢిల్లీ : త్రిపురలో కాషాయ శ్రేణులు రెచ్చిపోతున్నాయని సీపీఎం కేంద్రకార్యదర్శివర్గ సభ్యులు వి.శ్రీనివాసరావు విమర్శించారు. త్రిపురలో కాషాయ శ్రేణులు అరాచకం సృష్టిస్తున్నాయని అన్నారు. ఆ రాష్ట్రంలో లెనిన్‌ విగ్రహాన్ని కూల్చడాన్ని ఆయన తప్పుబట్టారు. లెనిన్‌ విగ్రహాన్ని కూల్చి బీజేపీ తమ అరాచక సంస్కృతిని చాటుకుందని ఎద్దేవాచ చేశారు. సీపీఎం ఆఫీసుల మీద దాడులు చేస్తూ.. బీజేపీ, ఆర్‌ఎస్‌ఎస్‌ అరాచకానికి తెరతీశాయని ఆగ్రహం వక్తం చేశారు. బీజేపీ, ఆర్‌ఎస్‌ఎస్‌ దాడులను ప్రజా ఉద్యమాలతో ఎదుర్కొంటామని పేర్కొన్నారు. 

18:20 - March 6, 2018

ఢిల్లీ : త్రిపురలో సీపీఎం కార్యకర్తలపై, కార్యాలయాలపై బీజేపీ దాడులు చేయడాన్ని సీపీఎం పొలిట్‌బ్యూరో సభ్యులు బివి.రాఘవులు తీవ్రంగా ఖండించారు. సీపీఎం బలంగా ఉన్న ప్రాంతాల్లో బీజేపీ దాడులకు తెగబడుతూ ప్రజలను భయాందోళలను గురిచేస్తోందని మండిపడ్డారు. ఈమేరకు ఆయనతో టెన్ టివి ఫేస్‌ టూ ఫేస్ నిర్వహించింది. లెనిన్‌ విగ్రహాన్ని కూల్చడాన్ని ఆయన తీవ్రంగా ఖండించారు. విగ్రహాలు కూల్చినంతమాత్రాన వారి పేరు ప్రతిష్టలు తగ్గిపోవన్నారు. సీపీఎం శాంతిని కోరుకుంటుందన్నారు. 45 శాతం ప్రజలు సీపీఎంకు మద్దతు తెలిపారని పేర్కొన్నారు.

 

18:52 - February 9, 2018

పశ్చిమగోదావరి : పశ్చిమ గోదావరి జిల్లా భీమవరంలో సీపీఎం రాష్ట్ర 25వ మహా సభలకు అన్ని ఏర్పాట్లు పూర్తయినట్లు సీపీఎం రాష్ట్ర కార్యదర్శి మధు తెలిపారు. రేపు ప్రారంభం కానున్న ఈ మహా సభల్లో సీపీఎం జాతీయ కార్యదర్శి సీతారాం ఏచూరి, పొలిట్ బ్యూరో సభ్యులు ప్రకాష్ కరత్, B.V.రాఘవులు సహా సీపీఎం నాయకులు పాల్గొంటున్నారన్నారు. కేంద్రం ఆంధ్రప్రదేశ్‌కు ఇచ్చిన విభజన హామీలు అమలు చేసే వరకు తమ పోరాటం ఆగదని మధు అన్నారు.

19:21 - February 7, 2018

కేంద్ర బడ్జెట్ లో ఏపీకి జరిగిన అన్యాయంపై తీవ్ర విమర్శలు వెల్లువెత్తుతున్నాయి. ప్రత్యేక హోదా..తదితర డిమాండ్లను వెంటనే పరిష్కరించాలని ప్రతిపక్షాలు డిమాండ్ చేస్తున్నాయి. పార్లమెంట్ లో ఉభయసభలనుద్దేశించి ప్రసంగించిన ప్రధాన మంత్రి మోడీ ఏపీకి ఎలాంటి హామీలు గుప్పించకపోవడం గమనార్హం. ఈ నేపథ్యంలో వామపక్షాలు ఏపీ బంద్ కు పిలుపునిచ్చాయి. కాంగ్రెస్ సంఘీభావం తెలుపగా..వైసీపీ బంద్ కు మద్దతినిచ్చింది. జనసేన కూడా మద్దతినిచ్చింది. శాంతియుతంగా నిరసన కార్యక్రమాలు చేయాలని టిడిపి నిర్ణయం తీసుకుంది. ఈ నేపథ్యంలో టెన్ టివి విజయవాడ స్టూడియోలో ప్రత్యేక చర్చ జరిగింది. ఈ చర్చలో బాబురావు (సీపీఎం), గొట్టిపాటి రామకృష్ణ (టిడిపి), మల్లాది విష్ణు (వైసీపీ) పాల్గొని అభిప్రాయాలు వ్యక్తం చేశారు. పూర్తి వివరాలకు వీడియో క్లిక్ చేయండి. 

19:30 - January 27, 2018

హైదరాబాద్ : రాష్ట్ర ప్రయోజనాలను నష్టపరుస్తున్న కేంద్ర విధానాలను తెలంగాణ ప్రభుత్వం ప్రశ్నించలేని పరిస్థితిలో ఉందని సీపీఎం తెలంగాణ రాష్ట్ర కార్యదర్శి తమ్మినేని వీరభద్రం ఆరోపించారు. బీజేపీ, ఎంఐఎంలతో దోస్తీ చేస్తూ కేసీఆర్ ఓట్ల రాజకీయం చేస్తున్నారని విమర్శించారు. ఆర్ధిక వ్యవస్థను పురోగమనం దిశగా వెళ్లాలంటే కేంద్రం తమ తప్పుడు నిర్ణయాలను సవరించుకుని ప్రజలకు ఉపయోగపడేలా బడ్జెట్ రూపొందించాలని సీపీఎం పొలిట్‌బ్యూరో సభ్యులు బీవీ.రాఘవులు డిమాండ్ చేశారు.

తెలంగాణ సీపీఎం రాష్ట కమిటీ సమావేశాలు హైదరాబాద్ ఎంబీ భవన్ లో జరిగాయి . ఈ సమావేశానికి సీపీఎం పొలిట్‌బ్యూరో సభ్యులు బీవీ.రాఘవులు, తెలంగాణ రాష్ట్ర కార్యదర్శి తమ్మినేని వీరభద్రం, రాష్ట్ర కమిటీ సభ్యులు జూలకంటి రంగారెడ్డిలతో పాటు పలువురు నేతలు ఈ సమావేశానికి హాజరయ్యారు. ఈ సమావేశాల్లో ప్రస్తుత రాజకీయ పరిస్థితులు, రాష్ట, జాతీయ మహాసభల నిర్వహణపై చర్చ జరిగింది.

కేంద్రం ఆర్ధిక విధానాల్లో తీసుకొస్తున్న ప్రైవేటైజేషన్ చర్యల్ని తెలంగాణ ప్రభుత్వం సమర్ధిస్తూ వస్తోందని సీపీఎం తెలంగాణ రాష్ట్ర కార్యదర్శి తమ్మినేని వీరభద్రం విమర్శించారు. ఓవైపు బీజేపీతో దోస్తీ చేస్తూనే.. మరోవైపు ఎంఐఎంతో దోస్తీ చేస్తూ కేసీఆర్ ఓట్ల రాజకీయం చేస్తున్నారని తమ్మినేని ఆరోపించారు. ఈ రాష్ట్రంలో ప్రత్యామ్నాయ ఏర్పాటు కోసమే బీఎల్‌ఎఫ్‌ ఏర్పాటు అన్న తమ్మినేని... ఫిబ్రవరిలో నల్లగొండలో జరిగే సభల్లో ఫ్రంట్‌ను మరింత బలోపేతం చేసే చర్యలు తీసుకుంటామని చెప్పారు.

తెలంగాణ అభివృద్ధికి సీఎం కేసీఆర్‌ చిత్తశుద్ధితో పనిచేయాలన్నారు.. సీపీఏం పొలిట్‌బ్యూరో సభ్యలు బీవీ రాఘవులు. రాష్ట్రంలో ఎగుమతులు దిగుమతులను పెంచడానికి డ్రైపోర్టులపై దృష్టిపెట్టాలన్నారు. డ్రైపోర్టుల ఏర్పాటుకు కేంద్రం అనుకూలంగా ఉన్న సీఎం కేసీఆర్‌ నిర్లక్ష్యంగా వ్యవహరించారని రాఘవులు విమర్శించారు. ఇప్పటికైనా కేంద్ర బడ్జెట్‌ ప్రవేశపెడుతున్న ప్రస్తుత తరుణంలో రాష్ట్రానికి మరిన్ని ప్రయోజనాలు తెచ్చుకునేందుకు కేసీఆర్‌ కృషిచేయాలని రాఘవులు డిమాండ్ చేశారు. తెలంగాణలో ప్రత్యామ్నాయం కోసం ఏర్పడిన బహుజన లెఫ్ట్ ఫ్రంట్ బలోపేతానికి సీపీఎం ప్రయత్నాలు ప్రారంభించింది. ఫిబ్రవరి 4 నుంచి 7 వరకు నల్గొండలో జరుగనున్న ఈ సభలకు సంబంధించిన పోస్టర్‌ను సీపీఎం నేతలు ఆవిష్కరించారు. కేసీఆర్ ప్రభుత్వం అనుసరిస్తున్న విధానాలతో తెలంగాణ అభివృద్ధి జరగదని సీపీఎం అభిప్రాయపడుతోంది. ఇపుడు బీఎల్‌ఎఫ్‌ను ప్రజల్లోకి తీసుకువెళ్లి మరింత బలోపేతం చేసేందుకు ప్రణాళికలు రూపొందించారు. 

17:18 - January 27, 2018

హైదరాబాద్ : తెలంగాణ రాష్ట్ర అభివృద్ధికి సీఎం కేసీఆర్ చిత్తశుద్ధితో పనిచేయాలని సీపీఎం పొలిట్ బ్యూరో సభ్యులు రాఘవులు పేర్కొన్నారు. రాష్ట్రంలో ఎగుమతులు..దిగుమతులను పెంచడానికి డ్రై పోర్టులపై దృష్టి పెట్టాలని సూచించారు. డ్రై పోర్టుల నిర్మాణాలకు కేంద్రం అనుకూలంగా ఉన్నా రాష్ట్ర ప్రభుత్వం నిర్ణక్ష్యంగా వ్యవహరించారని, ఇప్పటికైనా కేంద్ర ప్రభుత్వ బడ్జెట్ ప్రవేశ పెట్టనున్న తరుణంలో రాష్ట్రానికి మరిన్ని ప్రయోజానాలను తెచ్చే విధంగా కృషి చేయాలన్నారు. సంక్షోభంలో ఉన్న రైతులను ఆదుకోవాలంటే పంటలకు గిట్టుబాటు ధర కల్పించే ప్రత్యేక చట్టం తీసుకరావాలని రాఘవులు డిమాండ్ చేశారు. 

Pages

Don't Miss

Subscribe to RSS - BV Raghavulu