Central Government

12:43 - April 22, 2018

ఢిల్లీ : పోక్సో చట్ట సవరణ ఆర్టినెన్స్‌కు రాష్ట్రపతి రామ్‌నాథ్‌ కోవింద్‌ ఆమోదం తెలిపారు. ఈ చట్టం ద్వారా ఇకపై 12 ఏళ్లలోపు బాలికలపై అత్యాచారానికి పాల్పడితే మరణదండన విధిస్తారు. గత కొన్ని రోజులుగా చిన్నారులపై లైంగికదాడులు పెరిగిపోవడంతో... నిన్న కేంద్రమంత్రి వర్గం సమావేశంలో ఈ చట్టానికి సవరణలు చేస్తూ ఆర్డినెన్స్‌ విడుదల చేశారు. దీనికి ఇవాళ రాష్ట్రపతి ఆమోదం తెలిపారు. దీంతో ఇకపై 12 ఏళ్ల బాలికపై అత్యాచారం చేస్తే మరణశిక్ష విధిస్తారు. ఇక ఈ కేసు దర్యాప్తు రెండు నెలల్లోనే పూర్తి చేయాలి. ఇందుకోసం అన్ని పోలీస్‌స్టేషన్లకు, ఆస్పత్రులకు ఫోరెన్సిక్‌ కిట్లను అందించాలని నిర్ణయించారు. ఇక 12 నుంచి 16 ఏళ్ల బాలికలపై లైంగికదాడులకు పాల్పడితే గతంలో కంటే కఠిన శిక్ష విధించనున్నారు. అలాగే మహిళలపై లైంగికదాడులకు పాల్పడితే శిక్షను ఏడేళ్ల నుంచి పదేళ్లకు పెంచాలని నిర్ణయించారు. 

 

10:59 - April 22, 2018

ఢిల్లీ : చిన్నారులపై జరుగుతున్న అత్యాచారాలపై కేంద్రం కీలక నిర్ణయం తీసుకుంది. 12 ఏళ్ల లోపు బాలికలపై అత్యాచారానికి పాల్పడేవారికి మరణ శిక్ష విధించాలని నిర్ణయించింది. పోక్సో చట్ట సవరణకు కేంద్ర మంత్రివర్గం ఆమోదం తెలిపింది. కథువా, సూరత్‌, ఎటా, ఛత్తీస్‌గఢ్‌, ఇండోర్‌...దేశంలో ఎక్కడో ఓ చోట చిన్నారులపై జరుగుతున్న అత్యాచారాలు హృదయాన్ని కలచివేస్తున్నాయి. రోజు రోజుకు పెరిగిపోతున్న ఈ ఘటనలపై దేశవ్యాప్తంగా నిరసనలు వెల్లువెత్తాయి. చట్టాన్ని మరింత కఠినతరం చేయాలని డిమాండ్లు ఊపందుకున్నాయి.  ఈ ఘటనలపై పెద్ద ఎత్తున దుమారం రేగుతుండడంతో . ప్రధాని నరేంద్రమోది నేతృత్వంలో కేంద్ర మంత్రివర్గం అత్యవసర సమావేశం జరిపింది.

సుమారు రెండున్నర గంటలపాటు జరిగిన సమావేశంలో పోక్సో చట్టాన్ని సవరించడానికి క్యాబినెట్ ఆమోదం తెలిపింది. 12 ఏళ్ల లోపు బాలికలపై అత్యాచారానికి పాల్పడే దోషులకు మరణశిక్ష విధించేలా మోది ప్రభుత్వం ఆర్డినెన్స్‌ తీసుకొచ్చింది. ఈ కేసుల్లో విచారణ 2 నెలల్లోనే పూర్తి చేయాల్సి ఉంటుంది. 16 ఏళ్ల బాలికలపై అత్యాచారానికి పాల్పడేవారి శిక్షను పదేళ్ల నుంచి 20 ఏళ్లకు పెంచారు.

చిన్నారులపై అత్యాచారానికి పాల్పడితే ప్రస్తుతం ఉన్న చట్టం కింద కనిష్ఠంగా ఏడేళ్లు, గరిష్ఠంగా జీవిత ఖైదును విధించే అవకాశం ఉంది. లైంగిక దాడి తర్వాత బాధితురాలు మృతి చెందినా, అచేతనంగా మారినా ముద్దాయికి మరణదండన విధించేలా పోక్సో చట్టంలో నిబంధనలు మార్చనున్నారు. ఈ ఆర్డినెన్స్‌కు ఆమోదం కోసం రాష్ట్రపతికి పంపనున్నారు. వర్షాకాల సమావేశాల్లో ఈమేరకు పార్లమెంట్‌లో బిల్లు పెట్టాలని కేంద్రం భావిస్తోంది. 

07:21 - March 21, 2018

గుంటూరు : ఆంధ్రప్రదేశ్‌ జీవనాడి పోలవరం ప్రాజెక్టుకు నాబార్డు ద్వారా 1400 కోట్లు మంజూరు చేసేందుకు కేంద్ర ఆర్థికశాఖ అనుమతించింది. పోలవరం ప్రాజెక్ట్‌ నిర్మాణానికి 1795 కోట్ల రుణం ఇవ్వాల్సిందిగా కేంద్రానికి రాష్ట్రం విజ్ఞప్తి చేసింది. దీనిపై స్పందించిన కేంద్రం.. నాబార్డు ద్వారా 1400 కోట్లు రుణం మంజూరుకు అనుమతించింది. ఈ మేరకు కేంద్ర ఆర్థికశాఖ, కేంద్ర జలవనరుల శాఖకు సమాచారమిచ్చింది. ప్రాజెక్టుకు సంబంధించిన ఆడిట్లు వచ్చిన తర్వాత మిగిలిన 300 కోట్ల రూపాయలు మంజూరు చేయనున్నట్లు ఆర్థికశాఖ తెలిపింది. 

 

07:47 - March 19, 2018

కొమరం భీం ఆసిఫాబాద్ : ప్రభుత్వ ఆస్పత్రుల్లో వైద్యం అంటేనే భయపడుతున్న ఈ రోజుల్లో... మారుమూలన ఉన్న ఓ పీహెచ్‌సీ ఎంతో మెరుగైన సేవలందిస్తోంది. నార్మల్‌ డెలివరీలకు కాలం చెల్లిందని అందరూ భావిస్తున్న తరుణంలో... గర్భీణీలందరికీ ప్రసవాలన్నీ నార్మల్‌గానే చేసేందుకు సిబ్బంది ఎంతో ప్రయత్నిస్తున్నారు. గర్భిణీలకు వైద్యం పట్ల అవగాహన కల్పించడంతో పాటు... సరైన సమయంలో సరైన వైద్యం అందించేలా నిత్యం ప్రయత్నిస్తున్నారు. అందుకే ఈ పీహెచ్‌సీకి నీతి అయోగ్‌ గుర్తింపు కూడా లభించింది. దీంతో మరిన్ని నిధులు వచ్చే అవకాశం ఉంది. అంతేకాదు... ప్రధాని మోదీ కూడా ఈ పీహెచ్‌సీని సందర్శించే అవకాశాలున్నాయి.

కుమురం భీం అసిఫాబాద్‌ జిల్లా..కౌటాల మండల కేంద్రంలో ఉన్న ప్రాథమిక ఆరోగ్య కేంద్రం రాష్ట్రంలోని ఇతర వైద్యశాలలకు ఎంతో ఆదర్శంగా నిలుస్తుంది. సర్కారు వైద్యంపై నమ్మకం లేకుండాపోయిన ఈ రోజుల్లో ఈ ఆరోగ్య కేంద్రం చరిత్ర తిరగరాస్తుంది. గడిచిన రెండేళ్లలో వెయ్యి నార్మల్‌ ప్రసవాలు చేసి శబాష్ అనిపించుకుంటుంది. కౌటాల లాంటి మారుమూల ప్రాంతంలోని ఈ పీహెచ్‌సీ డాక్టర్లు గర్బిణిల కోసం ప్రత్యేక శ్రద్ధ పెట్టారు. అందుకే సిజేరియన్లు కాకుండా నార్మల్‌ డెలివరీలు చేస్తూ, డబ్చుతో పాటు బాలింతల ఆరోగ్యాన్ని కాపాడుతున్నారు.

ప్రయివేటు ఆసుపత్రిలకు దీటుగా ఈ పీహెచ్‌సీలో సకల సౌకర్యాలున్నాయి. గర్భిణిలలో అవగాహన కల్పిస్తూ.. నార్మల్‌ డెలివరీలు అయ్యేలా చర్యలు తీసుకుంటున్నారు. దీనికితోడు 102 వాహనాలు... ఐటీడీఏ అంబులెన్స్‌లు బాలింతలను ఇంటినుండి ఆస్పత్రికి,... ఆస్పత్రి నుండి ఇంటికి చేరుస్తూ గ్రామీణుల ఆదరణ పొందుతోంది. తెలంగాణ ప్రభుత్వం గర్బణిలకు అందిస్తున్న పలు సౌకర్యాలు.. కేసీఆర్‌ కిట్‌తో పాటు స్థానిక సిర్పూర్‌ ఎమ్మెల్యే కోనేరు కోనప్ప చారిటబుల్‌ ట్రస్ట్ ద్వారా పౌష్టికాహారం, కిట్లు కూడా ప్రభుత్వం వైద్యంపైన ప్రజలు మొగ్గు చూపేలా చేస్తున్నాయి.

గ్రామాలలో ఆశావర్కర్స్‌, అంగన్‌వాడీ కార్యకర్తలు గర్బిణిలకు ఆరోగ్యం పట్ల, సర్కారు వైద్యం పట్ల అవగాహన కల్పిస్తున్నారు. ప్రతి నెల 9వ తేదీన ఇక్కడి పీహెచ్‌సీలో ప్రత్యేక పరీక్షలు చేసి, వారి ఆరోగ్యానికి కృషి చేయడం వల్ల ఈ ఘనత సాధించినట్టు కౌటాల ఆరోగ్య కేంద్రం వైద్యులు అంటున్నారు.

కౌటాల ప్రాథమిక ఆరోగ్య కేంద్ర సిబ్బంది ప్రజలకు అందిస్తున్న సేవలను నీతి అయోగ్‌ సంస్థ గుర్తించింది. కౌటాల పీహెచ్‌సీకి మరిన్ని సౌకర్యాలు కల్పించాలని నీతి అయోగ్‌ కేంద్ర ప్రభుత్వానికి సిఫార్సు చేసింది. వెనుకబడిన ప్రాంతాలలో ప్రధాన మంత్రి నరేంద్ర మోదీ పర్యటిస్తున్న నేపథ్యంలో ఈ పీహెచ్‌సీలో అందిస్తున్న సేవలను దృష్టిలో ఉంచుకుని ప్రధాని సందర్శిస్తారనే ఊహాగానాలు వినిపిస్తున్నాయి. ఎంతైనా మారుమూల ప్రాంతంలోని చిన్న ప్రాథమిక కేంద్రంలో ప్రజలకు సేవలు అందిస్తున్న సిబ్బందికి హాట్సాప్‌ చెప్పాల్సిందే

18:43 - March 16, 2018

గుంటూరు : రాష్ట్ర విభజన సమయంలో పార్లమెంటులో ఇచ్చిన హామీలను కేంద్రం నెరవేర్చాల్సిందే అన్నారు ఏపీ సీఎం చంద్రబాబు. ఏపీ శాసన మండలిలో రాష్ట్ర ప్రభుత్వ ఆర్థిక స్థితిపై ఆయన మాట్లాడారు. ప్రధాని మోదీ మాట తప్పారని అన్నారు. అమరావతి నిర్మాణానికి  శంకుస్థాపన సమయంలో ప్రధాని మోదీ ఇచ్చిన హామీలు మర్చిపోయారని బాబు ప్రశ్నించారు. తాజాగా కేంద్ర బడ్జెట్‌లో అహ్మదాబాద్‌, ముంబైలో మెట్రో ప్రాజెక్టులకు వందల కోట్లు కేటాయించిన మోదీ ప్రభుత్వానికి అమరావతి ఎందుకు కనిపించడంలేదని సభలో సీఎం నిలదీశారు. ఏపీ ప్రజల పట్ల బీజేపీ పాలకులకు ఎందుకు ఈ వివక్ష..? అని ప్రశ్నించారు.
పోలవరం ప్రాజెక్టుపై క్లీయర్‌గా నివేదిక 
2014లో అప్పటి ప్రధాని మన్మోహన్‌సింగ్‌  మంత్రివర్గం చివరి సమావేశంలో పోలవరం ప్రాజెక్టుపై క్లీయర్‌గా నివేదిక ఇచ్చారని... చంద్రబాబు అన్నారు. ప్రాజెక్టు నిర్మాణానికి అయ్యే వ్యయం అంతా కేంద్రమే భరిస్తుందని ఆరోజు పేర్కొన్నారని బాబు చెప్పారు. తర్వాత 2014 మేనెలలో ప్రధానిగా మోదీ ప్రమాణ స్వీకారం చేసిన రోజే తాను పోలవరం ప్రాజెక్టుపై చర్చించాన్నారు. పోలవరం ప్రాజెక్టు కోసం తెలంగాణలోని 7 మండలాలను ఏపీలో కలపాలని తానే పట్టుపట్టానన్నారు. తన పట్టుదలతోనే 7మండలాలను ఏపీలో కలిపారని చంద్రబాబు సభకు తెలిపారు. 
అమరావతి నిర్మాణం పూర్తిచేయాల్సిన బాధ్యత కేంద్రానిదే...
అమరావతి నిర్మాణాన్ని పూర్తి చేయాల్సిన బాధ్యత కేంద్రానిదే అన్నారు ఏపీ సీఎం చంద్రబాబు.. శానమండలిలో ఏపీ ఆర్థిక పరిస్థితి, కేంద్రం సహాయ నిరాకరణపై ఆయన మాట్లాడారు. అమరావతి నిర్మాణానికి పుణ్యక్షేత్రా నుంచి పవిత్ర, జలాలు, మట్టి తీసుకొచ్చిన ప్రధానిమోదీ.. డబ్బులివ్వడం మాత్రం మర్చిపోయారని బాబు విమర్శించారు. అటు దుగరాజపట్నం పోర్టును విషయంలో కూడా 4ఏళ్లు తాత్సారం చేసి..ఇపుడు ప్రత్నామ్నాయం చూసుకోవాలని అంటున్నారని చంద్రబాబు ఆవేదన వ్యక్తం చేశారు. తమ ప్రభుత్వాన్ని అప్రతిష్టపాలు చేసేందుకే  బీజేపీ పాలకులు ప్రయత్నిస్తున్నారని ఏపీ సీఎం విమర్శించారు. 
జగన్‌పై విమర్శలు గుప్పించిన చంద్రబాబు 
ప్రతిపక్షనేత వైఎస్‌ జగన్‌పై ఏపీ శాసన మండలిలో సీఎం చంద్రబాబు విమర్శలతో విరుచుకు పడ్డారు. 2017లో ప్రధానిని కలిసిన జగన్‌ ఏపీకి ప్రత్యేక హోదా అడగబోమని చెప్పారన్నారు. అటు రాష్ట్రపతి అభ్యర్థిగా రామ్‌నాథ్ కోవింద్‌ను ప్రకటించగానే బీహార్‌కు వెళ్లి ఆయన కాళ్లమీద పడి.. రాబోయే రోజుల్లో తమపై కేసులు లేకుండా చేయించుకోడానికి ప్రయత్నించారని బాబు విమర్శించారు. మోదీ,  రామ్‌నాథ్‌ కోవింద్‌తో ఫోటోలు దిగి..తమకు కేంద్రం పెద్దల అండఉందన్న మెసేజ్‌ను  సీబీఐ, ఈడీలకు పంపించే ప్రయత్నిం చేశారని చంద్రబాబు  విమర్శించారు. జగన్‌ మాటలు వినే ప్రధాని మోదీ ఏపీకి నిధులు రాకుండా చేస్తున్నారని సీఎం అన్నారు. 

 

18:13 - March 16, 2018

ఢిల్లీ : సేతు సముద్రం ప్రాజెక్ట్‌ నిర్మాణంలో భాగంగా జాతి హితాన్ని దృష్టిలో పెట్టుకుని రామసేతుకు ఎలాంటి నష్టం కలిగించమని కేంద్రం సుప్రీంకోర్టుకు చెప్పింది. రామసేతు కేసులో సుప్రీంకోర్టులో కేంద్ర ప్రభుత్వం అఫిడవిట్ దాఖలు చేసింది. ఆ చారిత్రక నిర్మాణాన్ని ఎట్టి పరిస్థితుల్లోనూ తొలగించబోమని కేంద్రం అఫిడవిట్‌లో స్పష్టంచేసింది. 1990లో అప్పటి భారత ప్రభుత్వం సేతుసముద్రం ప్రాజెక్ట్‌ను ప్రతిపాదించింది. యూపీఏ హయాంలో ఈ ప్రాజెక్ట్‌ నిర్మాణానికి తుదిరూపు ఇచ్చారు. ఈ ప్రాజెక్ట్ నిర్మాణం కారణంగా 350 నాటికల్ మైల్స్ దూరం మేర ప్రయాణం తగ్గుతుంది. సేతుసముద్రం ప్రాజెక్ట్ కారణంగా రామసేతు నిర్మాణం దెబ్బతింటుందని 2014లో బీజేపీ ఎంపీ సుబ్రమణ్యస్వామి కోర్టుకెక్కారు. రామసేతుకు జాతీయ వారసత్వ సంపద హోదా ఇవ్వాలని ఆయన కోరుతున్నారు. 

 

17:31 - March 15, 2018

గుంటూరు : ఎన్డీయే నుంచి బయటకు వచ్చే అంశంపై కీలక నిర్ణయం తీసుకునేందుకు తెలుగుదేశం పొలిట్‌బ్యూరో శుక్రవారం సమావేశం కానుంది. రేపు సాయంత్రం ఐదుగంటలకు ముఖ్యమంత్రి చంద్రబాబు అధ్యక్షతన భేటీ కానున్న పొలిట్‌బ్యూరోలో తాజా రాజకీయ పరిణామాలపై చర్చించి తదుపరి వ్యూహం సిద్ధం చేసుకోనున్నారు. తెలుగుదేశాన్ని దెబ్బతీసేందుకు మహాకుట్ర జరుగుతోందంటూ ముఖ్యమంత్రి చంద్రబాబు టెలీకాన్ఫరెన్స్‌లో నేతల వద్ద ప్రస్తావించాక భిన్నాభిప్రాయాలు వ్యక్తమయ్యాయి. ఎన్డీయేలో ఇంకా కొనసాగడం భావ్యంకాదనే అభిప్రాయాన్ని మెజార్టీ నేతలు వ్యక్తం చేశారు. జగన్‌, జనసేనలను బీజేపీ దగ్గరకు చేర్చుకుని ఆడిస్తున్న నాటకం కుట్రలో భాగమనే నిర్ధారణకు తెలుగుదేశం నేతలు అభిప్రాయపడుతున్నారు. దీనిపై తక్షణమే నిర్ణయం తీసుకోవాల్సిన అవసరం ఉందనే భావనకు అధినేత చంద్రబాబు వచ్చారు. ఇందుకు అనుగుణంగా రేపు సాయంత్రం పొలిట్‌బ్యూరో సమావేశం నిర్వహించి ఎన్డీయే నుంచి తెలుగుదేశం బయటకు వచ్చే అంశంపై ఓ నిర్ణయాన్ని ప్రకటించనున్నట్లు సమాచారం.

 

14:49 - March 15, 2018

గుంటూరు : రేపు సాయంత్రం 5 గంటలకు టీడీపీ పోలిట్ బ్యూరో సమావేశం జరుగనుంది. ఎన్ డీఏ ప్రభుత్వం నుంచి బయటకు వచ్చే అంశంపై కీలక నిర్ణయం తీసుకోనున్నట్లు సమచారం. 

11:25 - March 4, 2018

విజయవాడ : మార్చి 8న ఏపీ ఆర్థిక మంత్రి యనమల రామకృష్ణుడు ప్రవేశపెట్టబోయే బడ్జెట్‌లో ప్రాజెక్టుల వాటా ఎంత..?, గతంలో కంటే నిధులు పెరుగుతాయా... తగ్గుతాయా.. పోలవరంపై ప్రభుత్వం దృష్టి ఎలా ఉండబోతోంది.. ఇప్పుడిదే రాష్ట్రంలో హాట్ టాపిక్‌గా మారింది. ఆంధ్రప్రదేశ్‌లో ఈసారి ప్రవేశపెట్టబోయే బడ్జెట్ కీలకంగా మారనుంది. ఈ యేడాది ఖర్చులతోపాటు ఇతరత్రా అంశాలను పరిగణనలోకి తీసుకోనున్నట్లు సమాచారం. 2017-2018 బడ్జెట్‌లో జలవనరుల శాఖకు 12770.26 కోట్ల రూపాయలు కేటాయించారు. ఫిబ్రవరి నెలాఖరు వరకు 11240.67 కోట్ల రూపాయలు ఖర్చు చేశారు. పోలవరం కేటాయింపులు, ఇతర ఖర్చులు కూడా ఇందులోనే కలిపారు. కొత్త బడ్జెట్‌లో పోలవరం కాకుండా మిగతా ప్రాజెక్టులకు దాదాపు 11 వేల కోట్ల రూపాయలు కేటాయించాలని ఆర్థికశాఖ భావిస్తున్నట్లు తెలుస్తోంది. పోలవరం ప్రాజెక్ట్‌కుకు ముందుగా రాష్ర్ట ప్రభుత్వ నిధులు ఖర్చుచేశాకే.. కేంద్రం నుంచి నిధులు రాబట్టాల్సి ఉంది.

ఈ ఏడాది సాగునీటి రంగానికి ఎక్కువ శాతం నిధులు కేటాయించే అవకాశం ఉన్నట్లు సమాచారం. సుమారు 24 వేల కోట్ల రూపాయలు కేటాయించేలా రూపకల్పన చేస్తున్నట్లు తెలుస్తోంది. ఇందులో ఒక్క పోలవరానికే అత్యధికంగా రూ.13 వేల కోట్లు కేటాయించేందుకు కసరత్తు చేస్తున్నారు. పోలవరం మొత్తం పనులకు సంబంధించి పోలవరం కుడి కాలువ, ఎడమ కాలువ, పురుషోత్తపట్నం ఎత్తిపోతల పథకంలో మిగిలిన పనులకు కలిపి కేటాయింపులు ఉండనున్నట్లు తెలుస్తోంది.

హంద్రీనీవా, గాలేరు నగరి, వెలిగొండ, వంశధార వంటి భారీ ప్రాజెక్టులతోపాటు రాష్ట్రంలో చేపడుతున్న మొత్తం 60 ప్రాజెక్టులు, జలసంరక్షణ పనులు, చిన్ననీటి వనరులకు కలిపి సుమారు 11 వేల కోట్ల రూపాయలు మాత్రమే కేటాయించే ప్రక్రియను పరిశీలిస్తున్నట్లు తెలుస్తోంది. ఈ ఏడాది జలవనరుల శాఖకు తొలుత 35 వేల కోట్ల రూపాయలకుపైగా ప్రతిపాదనలు సిద్ధం చేసినట్లు సమాచారం. ఐతే ఆర్థిక శాఖ విధించిన పరిమితి మేరకు ప్రాధాన్యత రీత్యా అవసరమైన మార్పులతో ప్రతిపాదనలు సిద్ధం చేసినట్లు తెలుస్తోంది.

బడ్జెట్‌లో పోలవరానికి 13 వేల కోట్ల రూపాయలు చూపిస్తే.... ఆ మేరకు రాష్ర్ట ఖజానాపై భారం ఉండదని అధికారులు లెక్కలు కడుతున్నారు. పోలవరానికి ఈ ఆర్థిక సంవత్సరంలో ఇంకా కేంద్రం నుంచి 2,800 కోట్ల రూపాయల వరకు రావాల్సి ఉంది.. సకాలంలో పోలవరం నిధులు విడుదలైతేనే.... ఆ నిధులు ఇతర ప్రాజెక్టులపై ఖర్చు చేసేందుకు వెసులుబాటు కలగనుంది. తుది దశకు చేరుకున్న ప్రాజెక్టులను పూర్తిచేసే లక్ష్యంతోనే బడ్జెట్ ను సిద్ధం చేయాలన్న ధ్యేయంతో ప్రభుత్వం ఉన్నట్లు తెలుస్తోంది.

రాష్ట్ర బడ్జెట్ పై ప్రభుత్వం ఒకింత తర్జనభర్జనలు పడుతున్నట్టు తెలుస్తోంది. కేంద్ర బడ్జెట్ పై తెలుగు రాష్ర్టాలతోపాటు.. దేశవ్యాప్తంగా దుమారం రేగిన నేపథ్యంలో... బడ్జెట్‌పై విమర్శలు రాకుండా చూడాలని ఏపీ ప్రభుత్వం భావిస్తోంది. అందుకోసమే బడ్జెట్‌ను హెచ్చుతగ్గులతో రూపొందిస్తే విపక్షాల నుంచి ఎదురయ్యే విమర్శల నుంచి కొంతలో కొంత బయటపడొచ్చన్న భావనలో ఉంది. ఇప్పటికే పోలవరం విషయంలో ప్రభుత్వాలపైన విమర్శలు వెల్లువెత్తుతున్నాయి. కేంద్ర, రాష్ర్ట ప్రభుత్వాలు పోలవరంపై ఆడే నాటకాలను కట్టిపెట్టాలంటూ ప్రతిపక్షాలు మండిపడుతున్నాయి. మొత్తం మీద ఈసారి బడ్జెట్‌ చర్చనీయాంశంగా మారనుంది.

21:27 - February 18, 2018

కృష్ణా : ప్రత్యేక హోదా విభజన హామీల సాధన సమితి ఆధ్వర్యంలో విజయవాడలో రౌండ్‌ టేబుల్‌ సమావేశం జరిగింది. ఈ సమావేశంలో వివిధ పార్టీల నేతలు హాజరై ప్రత్యేక హోదా సాధనకు ఉద్యమాన్ని ఉద్ధృతం చేసే అంశంపై చర్చించారు. ఈ సమావేశంలో ఉద్యమాన్ని ఖరారు చేశారు. మంగళవారం ఏపీజేఎఫ్‌ ఆధ్వర్యంలో ఒంగోలులో నిరసన దీక్ష చేపడతారు. ఈనెల 19 నుంచి 28 వరకు కాంగ్రెస్‌ ఆధ్వర్యంలో ఆత్మగౌరవ దీక్షలు జరుగుతాయి. ఫిబ్రవరి 20న రాజమండ్రిలో బహిరంగ సభ నిర్వహిస్తారు. టాలీవుడ్‌ నటుడు శివాజీ నేతృత్వంలో ఈనెల 28న కర్నాటకలో సమావేశం ఏర్పాటు చేస్తారు. మార్చి 1న వైసీపీ ఆధ్వర్యంలో అన్ని కలెక్టరేట్ల ముట్టడి జరుగుతుంది. వచ్చే నెల 4న మాజీ మంత్రి కొణతాల రామకృష్ణ నేతృత్వంలో కొవ్వొత్తుల ర్యాలీ నిర్వహిస్తారు. మార్చి 5న ఢిల్లీలో వైసీపీ ఎంపీల ఆధ్వర్యంలో ధర్నా నిర్వహిస్తారు. వచ్చే నెల 2 నుంచి 4 వరకు జిల్లా, నియోజకవర్గ కేంద్రాల్లో దీక్షలు చేపట్టాలని సీపీఎం నిర్ణయించింది. మార్చి 5న వామపక్షాల ఆధ్వర్యంలో గుంటూరులో భారీ సదస్సు నిర్వహిస్తారు. మార్చి 2న జాతీయ రహదారులు దిగ్బంధానికి కాంగ్రెస్‌ పిలుపునిచ్చింది. వచ్చే నెల 6 నుంచి 8 వరకు ఢిల్లీలో కాంగ్రెస్‌ నేతల ఆందోళన, చలో పార్లమెంటు నిర్వహిస్తారు. ఇలా ఏ పార్టీకి ఆపార్టీ విడివిడిగా కార్యాచరణ ప్రకటించాయి.ప్రత్యేక హోదా పై చంద్రబాబు బాధ్యతారహితంగా వ్యవహరించారని రౌండ్‌ టేబుల్‌ సమావేశానికి హాజరైన సీపీఎం రాష్ట్ర కార్యదర్శి మధు విమర్శించారు. హోదా సాధనలో విఫలమైన చంద్రబాబు... ప్రజలను అయోమయానికి గురి చేస్తున్నారని సీపీఐ రాష్ట్ర కార్యదర్శి రామకృష్ణ విమర్శించారు. హోదా విషయంలో బీజేపీ, టీడీపీలు రాష్ట్రానికి తీరని ద్రోహం చేశాయని ఏపీసీసీ చీఫ్‌ రఘువీరారెడ్డి ఆగ్రహం వ్యక్తం చేశారు. ప్రత్యేక హోదాను తాకట్టుపెట్టి ప్యాకేజీకి ఒప్పుకున్న టీడీపీ... ఒక్క రూపాయి కూడా సాధించలేకపోయిందని వైసీపీ నేత పార్థసారధి విమర్శించారు. ప్రత్యే క హోదా సాధన కోసం ప్రత్యక్ష కార్యాచరణ అవసరమని, దీనిలో అందరూ భాగస్వాములు కావాలని సినీ నటుడు శివాజీ పిలుపు ఇచ్చారు. 

 

Pages

Don't Miss

Subscribe to RSS - Central Government