CM Chandrababu Naidu

08:27 - March 26, 2018

ఏపీకి ప్రత్యేక హోదా..విభజన హామీల అమల రగడ కంటిన్యూ అవుతోంది. పార్లమెంట్ సమావేశాలు ప్రారంభం నుండి వైసిపి..టిడిపి ఎంపీలు ఆందోళన కొనసాగిస్తున్నారు. బిజెపితో టిడిపి తెగదెంపులు చేసుకోవడం..ఇరు పార్టీల మధ్య మాటల తూటాలు పేలుతున్నాయి. తాజాగా బిజెపి అధ్యక్షుడు అమిత్ షా రాసిన లెటర్ పై ఏపీ సీఎం చంద్రబాబు నాయుడు భగ్గుమంటున్నారు. పార్లమెంట్ లో టిడిపి..వైసిపి పార్టీలు ఇచ్చిన అవిశ్వాస తీర్మానంపై సందిగ్ధత కొనసాగుతుండగా కాంగ్రెస్ మంగళవారం అవిశ్వాస తీర్మాన నోటీసు ఇవ్వడానికి సిద్ధమైంది. ఈ అంశాలపై టెన్ టివిలో జరిగిన చర్చా కార్యక్రమంలో తెలకపల్లి రవి (విశ్లేషకులు), కోటేశ్వరరావు (బిజెపి), అద్దెపల్లి శ్రీధర్ (జనసేన), దుర్గా ప్రసాద్ (టిడిపి) పాల్గొని అభిప్రాయాలు వ్యక్తం చేశారు. పూర్తి వివరాలకు వీడియో క్లిక్ చేయండి. 

15:33 - January 19, 2018

ఢిల్లీ : వాల్మీకి బోయలను ఎస్టీల్లో చేర్చాడాన్ని నిరసిస్తూ ఎస్టీలు ఢిల్లీలో జంతర్ మంతర్ వద్ద ధర్నా దిగారు. వాల్మీ బోయలను ఎస్టీల్లో చేర్చితే తమకు అన్యాయం జరుగుతుందన వారు ఆవేదన వ్యక్తం చేశారు. 

09:27 - January 15, 2018

తూర్పుగోదావరి : ఏపీలో జోరుగా కోడిపందాలు సాగుతున్నాయి. కోర్టు ఆదేశాలు, పోలీసుల హెచ్చరికలు ఉన్నప్పటికీ వాటిని నిర్వాహకులు బేఖాతరు చేస్తున్నారు. తూర్పుగోదావరి, పశ్చిమగోదావరి, కృష్ణా జిల్లాల్లోని శివారు ప్రాంతాలు, పండ్ల తోటల్లో బరులు వేసి పందాలు నిర్వహిస్తున్నారు. పేరున్న ప్రజాప్రతినిధుల ఆధ్వర్యంలో ఈ పందాలు కొనసాగుతున్నాయి. ఇక పాసులు ఉన్నవారినే లోపలికి అనుమతిస్తున్నారు. పట్టణ ప్రాంతాల నుంచి పందాల్లో పాల్గొనేందుకు భారీ ఎత్తున పందెంరాయుళ్లు తరలివస్తున్నారు. మూడు రోజులపాటు జరగనున్న ఈ కోడిపందాల్లో కోట్లాది రూపాయలు చేతులు మారనున్నాయి. భారీ ఎత్తున తరలివస్తున్న వారితో ఆ ప్రాంతాలన్నీ జాతరను తలపిస్తున్నాయి. ఇక కోళ్లపందాలతో పాటు... గుండాట, పేకాట, కోత ముక్కాటలు లాంటి జూద క్రీడలు కూడా కొనసాగుతున్నాయి. మరోవైపు ఆ ప్రాంతాల్లో మద్యం విక్రయాలు కూడా జోరుగా కొనసాగుతున్నాయి. మరిన్ని వివరాలను వీడియోలో చూద్దాం.. 

 

08:14 - January 15, 2018

అనంతపురం : వృత్తి గొర్రెల కాపరి.. ప్రవృత్తి ప్రకృతిని చిత్రించడం.. పగలంతా పశువులు కాస్తూ.. రాత్రిపూట చిత్రాలు వేయడం నేర్చుకున్నాడు. పేదరికం వేధిస్తున్నా.. తనలోని కళాకారుడికి పదునుపెట్టాడు. నట్టడవిలో సంచరిస్తూ నలుగురూ మెచ్చే చిత్రాలు వేస్తున్నాడు..అనంతపురం జిల్లాకు చెందిన వెంకటరమణ. 
వృత్తిరీత్యా గొర్రెలకాపరి
ఇక్కడ పేపర్‌మీద చకచకా బొమ్మలేస్తున్న ఈ కళాకారుడిపేరు వెంకటరమణ. అనంతపురం జిల్లా శింగనమల గ్రామంలో ఉండే ఈ కళాకారుడు వృత్తిరీత్యా గొర్రెలకాపరి. పొద్దుపొడుపు నుంచి పొద్దుకూకే వరకు కొండకోనలు పట్టుకుని తిరిగే వెంకటరమణకు చిన్ననాటి నుంచే బొమ్మలు వేయడం అంటే చాలా ఇష్టం. స్కూల్లో చదువుతుండగానే చిత్రాలు వేస్తూ నలుగురితో శహభాష్‌ అనిపించుకున్నాడు. 
పేదరికంతో కష్టాలు పడుతున్నా
పేదరికంతో కష్టాలు పడుతున్నా.. తనలోని కళాకారుణ్ని మాత్రం రంగులు ప్రపంచంలో విహరింపజేస్తాడు వెంకటరమణ.  ఈ వర్ణచిత్రాలన్నీ ఈ పేద చిత్రకారుడి కుంచెనుంచే జాలువారాయి. చిన్ననాడే చదువుకు దూరమైనా.. చేయితిరిగిన కళాకారులకే సాధ్యం అయ్యేలా ఆలోచింపచేసే చిత్రాలు వేస్తున్నాడు.  పొద్తున్నే అడవిబాట పట్టింది మొదలు హృదయాంతరాళంలో మెదులుతున్న  ఊహాలకు  రాతిబండలపైనే రూపం ఇస్తాడు. రంగు,రంగుల చాక్ పీసులను తీసుకెళ్లీ .. గొర్రెలను మేపుతూనే బొమ్మలు వేయడంలో ప్రావీణ్యం సాధించాడు. 
ఏడో తరగతి చదువుతుండగా తండ్రి మృతి
ఏడవతరగతి చదువుతుండగా తండ్రి చనిపోయాడు.. కుటుంబ భారం మీదపడింది. 12ఏళ్ల పసిప్రాయంలో పశులకాపరిగా మారాడు. ముగ్గురు చెల్లెళ్లు, ఇద్దరు తమ్ముళ్లకు తానే తల్లి-తండ్రి అయ్యాడు. తండ్రి వారసత్వంగా ఇచ్చిన గొర్రెలను మేపుతూ.. జీవనం సాగిస్తున్న వెంకటరమణకు ఇపుడు చెల్లెళ్ల పెళ్లి ఒక సవాల్‌గా మారింది. పేదరికంలో మగ్గుతున్న  తననుఆదుకోవాలని దాతలకు, ప్రభుత్వానికి విజ్ఞప్తి చేస్తున్నాడు. గొర్రెలు కాస్తేనే తన కుటుంబం గడుస్తుందని..పేదరికం నుంచి బయటపడేందుకు చేయూత నిస్తే.. దేశం గర్వించే కళాకారుడినవుతాని వెంకటరమణ చెబుతున్నాడు. ఈ పేదకళాకారుణ్ని ప్రభుత్వమే ఆదుకోవాల్సిన అవసరం ఉంది.  

 

11:38 - January 12, 2018

హైదరాబాద్ : సంక్రాంతికి స్పెషల్‌  దోపిడి  కొనసాగుతోంది. పండగ సీజన్ వచ్చిందంటే చాలు.. ప్రయాణీకుల నుంచి  ప్రైవేట్‌ ట్రావెల్ష్‌ మొదలుకొని ఆర్టీసీ, రైల్వేదాకా అందరూ అదనపు వసూళ్ళకు తెరలేపుతారు. ఒక్క సంక్రాంతి అనేకాదు... పండగ ఏదైనా ఇదే తంతు. ప్రతియేటా ప్రయాణీకులపై ఈ ప్రత్యేక బాదుడు మాత్రం తప్పదు.  సంక్రాంతి అంటే మరింత స్పెషల్‌గా బాదాలని చూస్తారు. అటు ఆర్టీసీ, ఇటు రైల్వే బహిరంగ దోపిడీకి పాల్పడుతుంటే... మేమేం తక్కువా అన్నట్లు ప్రైవేటు ట్రావెల్స్ కూడా సంక్రాంతిని క్యాష్‌ చేసుకునే పనిలో ఉన్నాయి. 
సంక్రాంతికి అదనపు ఛార్జీలు
ప్రజలు పండగ చేసుకుంటారో లేదో కానీ... ఆర్టీసీ, రైల్వే, ప్రైవేటు ట్రావెల్స్‌కు మాత్రం పండగే పండగ. సంక్రాంతి పండుగ ప్రజలు సరిగ్గా చేసుకుంటారో లేదో తెలియదుకానీ... రవాణా సంస్థలు మాత్రం అధిక ధరలతో చేసుకుంటున్నాయి. అసలు పండుగ ఆనందమంతా వారిదే అన్నట్టు ఉంది పరిస్థితి.  సంక్రాంతి పండుగకు ఆర్టీసీ 50 శాతం అదనంగా చార్జీలు వసూలు చేస్తోంటే... ప్రైవేటు ట్రావెల్స్‌ మళ్ళీ ఈ  ఛాన్స్‌ రాదేమో అన్నట్లు... ఇష్టానుషారంగా  ప్రయాణీకుల నుంచి వసూళ్ళు చేస్తున్నారు.. సమయాన్ని బట్టి ఎప్పటికప్పుడు అధిక రేట్లను నిర్ణయిస్తూ... ప్రయాణీకులను బెంబేలెత్తిస్తున్నారు. 
8రోజులు ప్రత్యేక సర్వీసులు
జనవరి 12నుంచి విద్యాసంస్థలకు సెలవులు ప్రకటించారు. దీంతో 8రోజులు పాటు ప్రధాన రూట్లలో ప్రత్యేకంగా 829 బస్సులను నడుపుతున్నారు. హైదరాబాద్‌, విశాఖ, చెన్నై, బెంగుళూరు నగరాల మధ్య 12వతేదీన 112 బస్సులను నడుపుతోంది. ఇక  14 నుంచి 17వ తేదీవరకు రోజూ 125 సర్వీసులను  నడుపుతోంది.
అన్ని రూట్లలోనూ అదనపు ఛార్జీలే
విజయవాడ, హైదరాబాద్‌కు సూపర్‌ లగ్జరీ బస్సు ఛార్జీ సాధారణ రోజుల్లో  355 రూపాయలు.  సంక్రాంతి పండుగకు మాత్రం 530 రూపాయలు వసూలు చేస్తున్నారు. విజయవాడ-విశాఖపట్నం సాధారణ ఛార్జీ  480రూపాయలు కాగా... ప్రస్తుతం 620 వసూలు చేస్తున్నారు. విజయవాడ-బెంగుళూరుకు సాధారణ ఛార్జీ 850 రూపాయలు కాగా.. ప్రస్తుతం 1275 తీసుకుంటున్నారు. విజయవాడ-చెన్నై సాధారణ ఛార్జీ 580 కాగా... 870 రూపాయలు వసూలు చేస్తున్నారు. హైదరాబాద్‌ నుంచి విజయవాడకు సీట్లన్నీ ముందుగానే నిండిపోయాయి. 14, 15, 16 తేదీల్లో ఆర్టీసికి ఎన్నడూ లేని డిమాండ్‌ ఏర్పడింది. 
వెయ్యి రూపాయలకు పైగా వసూలు 
విజయవాడ హైదరాబాద్‌ మధ్య సాధారణంగా ఏసీ సర్వీస్ ధర 600 రూపాయల వరకూ ఉంటుంది. ఇప్పుడు వెయ్యి రూపాయలకు పైగా వసూలు చేస్తున్నారు. ఇక నాన్‌ ఏసీ ధర 350 ఉండగా...  850 వరకూ వసూలు చేస్తూ ప్రయాణీకుల నడ్డి విరిస్తున్నారు.  గుంటూరు నుంచి హైదరాబాద్‌కు సాధారణంగా  ఏసీలో 600, నాన్‌ ఏసీలో 400 కాగా.. ప్రస్తుతం ఏసీ 1300, నాన్‌ ఏసీ 1100 వసూలు చేస్తూ నిలువు దోపిడీకి పాల్పడుతున్నారు.  విజయవాడనుంచి బెంగుళూరుకు  ఏసీ బస్సుకు సాధారణ ఛార్జీ 1200, నాన్‌ ఏసీకి 800 ఉండతగా... ఏసీకి పండుగ సీజనంటూ 2500 నుంచి 3వేల వరకు వసూలు చేస్తున్నారు. నాన్‌ ఏసీకి 1500 వరకు గుంజుతున్నారు. గుంటూరు నుంచి బెంగుళూరుకు కూడా ధరలు భారీగానే పెంచేశారు. సాధారణంగా ఏసీకి 900, నాన్‌ ఏసీకి 800 ఉంటే..  ఇప్పుడు ఏసీ 2500, నాన్‌ ఏసీ 1500 వరకూ వసూలు చేస్తున్నారు.
ప్రధాన నగరాలకు ప్రత్యేక బస్సులు
రాయలసీమ, హైదరాబాద్, విశాఖపట్నం, చెన్నై, బెంగుళూరు నగరాలకు 13వతేదీ వరకూ ప్రత్యేక బస్సులను ఏర్పాటు చేశారు. చెన్నై, బెంగుళూరుకు 20, రాయలసీమకు 94, విశాఖ సహా కోస్తాంధ్రకు 202 బస్సులు ఏర్పాటు చేశారు. హైదరాబాద్‌కు అవసరాన్ని బట్టి మరిన్ని ప్రత్యేక బస్సులు నడపనున్నారు. ఇక రైల్వే కూడా ఏమీ తక్కువ తినలేదు. పండుగ  రద్దీని దృష్టిలో ఉంచుకుని ప్లాట్‌ఫామ్‌ ధరలు పెంచేసింది. నిన్న మొన్నటి వరకు పది రూపాయలున్న ప్లాట్‌ఫామ్‌ ధరను.. ఏకంగా 20 రూపాయలు చేసింది. ఆర్టీసీ, రైల్వే, ప్రైవేటు ట్రావెల్స్ ఇలా ప్రతీ సంస్థ పండగను అవకాశంగా తీసుకుని అదనపు మోత మోగిస్తున్నారు.  పెంచిన ఛార్జీల ధరలు భరించలేక పేదలు కష్టపడుతుంటే... ఆర్థిక స్థోమత ఉన్నవారు... డబ్బుపెట్టి కూడా కూర్చునేందుకు చోటు లేక ఫుట్‌బోర్డు ప్రయాణంతో పడరాని పాట్లు పడుతున్నారు.

 

07:45 - January 12, 2018

కృష్ణా : విజయవాడను గ్రేటర్‌ నగరంగా మలిచేందుకు అడుగులు శరవేగంగా పడుతున్నాయి. గ్రేటర్‌ సిటీలోకి గ్రామ పంచాయతీలను విలీనం చేసేందుకు అధికారులు చర్యలు చేపట్టారు. గత కొన్నేళ్లుగా విజయవాడను గ్రేటర్‌ చేయాలనే డిమాండ్‌ ఉంది. రాజధాని ప్రాంతంగా పేరొందిన విజయవాడను గ్రేటర్‌ సిటీగా సాకారం దిశగా యంత్రాంగం అడుగులు వేస్తోంది.
విజయవాడ గ్రేటర్ కల త్వరలోనే సాకారం 
నవ్యాంధ్ర రాజధాని ప్రాంతమైన విజయవాడ గ్రేటర్ కల త్వరలోనే సాకారం కానుంది. ఈ దిశగా ప్రభుత్వం అడుగులు వేస్తోంది.  2017 అక్టోబర్ 14వ తేదీన సీఎం చంద్రబాబు విజయవాడ నగరంలో ఆకస్మిక తనిఖీల్లో భాగంగా గ్రేటర్ అంశాన్ని ప్రస్తావించారు. విజయవాడ చుట్టుపక్కల 45 గ్రామాలను దశలవారీగా నగరపాలక సంస్థలో విలీనం చేస్తామని ప్రకటించారు. దీంతో గ్రేటర్ ప్రక్రియ జోరందుకుంది. 
విజయవాడ చుట్టుపక్కల గ్రామ పంచాయతీలు విలీనం 
విజయవాడ చుట్టుపక్కల గ్రామ పంచాయతీలు నగరంలో విలీనం కానున్నాయి. విలీనంపై తీర్మానాలు చేయాలంటూ పంచాయతీలకు డీపీవో ఉత్తర్వులు జారీ చేశారు. విజయవాడ నగరం చుట్టుపక్కల ఉన్న పంచాయతీల సర్పంచులు, కార్యదర్శులు, అధికారులతో డివిజనల్ పంచాయతీ అధికారి  ఈనెల 19న కానూరులోని తులసినగర్‌లో  ప్రత్యేక సమావేశం నిర్వహిస్తున్నారు. ఈ సమావేశానికి పంచాయతీలను విలీనం చేస్తూ చేసిన తర్మానాలతో రావాలని ఉత్తర్వుల్లో స్పష్టం  చేశారు. విజయవాడ డివిజన్ పరిధిలోని ఇబ్రహీంపట్నం, పెనమలూరు, కంకిపాడు, విజయవాడ గ్రామీణ మండల పరిధిలోని గ్రామాల పంచాయతీ కార్యదర్శులకు ఈ ఉత్తర్వులు జారీ అయ్యాయి. నూజివీడు డివిజన్ పరిధిలోకి వచ్చే గన్నవరం నియోజకవర్గం పరిధిలోని మరికొన్ని గ్రామాలను కూడా విలీనం చేసే ప్రక్రియను రూపొందిస్తున్నారు. 
విజయవాలో గ్రామాలు కలిస్తే 425.59 చ.కి.మీ
ప్రస్తుతం నగర విస్తీర్ణం 61.88 చదరపు కిలోమీటర్లు ఉంది. విలీన ప్రతిపాదిత  45 గ్రామాల విస్తీర్ణం 363.71 చదరపు కిలోమీటర్ల మేర ఉంది. గ్రేటర్ లో 45 గ్రామాలన్నీ విలీనమైతే..  425.59 చదరపు కిలోమీటర్ల మేర నగరం విస్తరించనుంది. బెజవాడ గ్రేటర్‌గా రూపాంతరం చెందితే 15,17,732 మంది నగర జనాభాగా మారతారు. ప్రభుత్వం 45 గ్రామాలను విజయవాడ నగర పరిధిలోకి తీసుకొస్తే ప్రయోజనాలుంటాయన్న అభిప్రాయం అధికారుల్లో వ్యక్తమవుతోంది. త్వరితగతిన గ్రేటర్ పరిధిలోకి నగరాన్ని తెచ్చి గుంటూరు, విజయవాడ నగరాలను కూడా జంట నగరాలుగా తీర్చిదిద్దాలని ప్రభుత్వ యంత్రాంగం భావిస్తోంది.
గ్రేటర్‌ బెజవాడ నిర్ణయంపై కొన్ని పక్షాల వ్యతిరేకత
విజయవాడను గ్రేటర్‌ మార్చాలన్న ప్రభుత్వ తీరుపై కొన్ని పక్షాల  నుంచి నిరసన వ్యక్తమవుతోంది. తమపై పన్నుల భారాలు మోపవద్దని నగరవాసులు కోరుతున్నారు. విజయవాడ నగరాన్ని గ్రేటర్ సిటీగా మార్చితే ప్రజలపై పన్నుల భారం లేకుండా చూడాలని  వామపక్షాలు కోరుతున్నాయి. ప్రజలపై పన్నుల భారం మోపేలా చర్యలు చేపడితే అడ్డుకుంటామని హెచ్చరిస్తున్నాయి.
గ్రేటర్ బెజవాడపై ప్రజల్లో వ్యతిరేకత
మొత్తానికి ప్రభుత్వం బెజవాడను గ్రేటర్‌ సిటీగా మార్చాలని భావిస్తుంటే.... ప్రజల నుంచి మాత్రం వ్యతిరేకత వ్యక్తమవుతోంది. ప్రజలపై భారాలులేని గ్రేటర్‌ కావాలని కోరుతున్నారు. ప్రజలందరికీ మౌలిక సదుపాయాలు కల్పించాలని డిమాండ్‌ చేస్తున్నారు. 

 

07:31 - January 12, 2018

హైదరాబాద్ : నాగం జనార్దన్‌రెడ్డి కాంగ్రెస్‌వైపు చూస్తున్నారా? హస్తంగూటికి చేరేందుకు ఇప్పటి నుంచే గ్రౌండ్‌ వర్క్‌ ప్రిపేర్‌ చేసుకుంటున్నారా? నాగం కమలంతో కటీఫ్‌ చేసుకోవాలనే నిర్ణయానికి వచ్చారా? ఇంతకు నాగం కాంగ్రెస్‌ ఎప్పుడు చేరుతారు? వాచ్‌ దిస్‌ 10టీవీ స్పెషల్‌ స్టోరీ...
కాంగ్రెస్‌ గూటికి నాగం?
నాగం జనార్దన్‌రెడ్డి వైద్యవృత్తికి రాజీనామా చేసి రాజకీయాల్లోకి వచ్చారు. తెలుగుదేశం పార్టీలో నంబర్‌ టూగా ఉంటూ.. సుదీర్ఘకాలం మంత్రిగా కూడా పనిచేశారు. ప్రత్యేక తెలంగాణ డిమాండ్‌పై చంద్రబాబుతో విభేదించి  టీడీపీకి గుడ్‌బై చెప్పారు. ఆ తర్వాత తెలంగాణ నగారా సమితి పెట్టారు. అంతగా ఆదరణలేకపోవడంతో  బీజేపీ కండువాకప్పుకున్నారు. కమలం పార్టీలో చేరిన నాటి నుంచీ నాగం జనార్దన్‌రెడ్డి అసంతృప్తితోనే  ఉంటూ వస్తున్నారు. 
అంతర్గత కుమ్ములాటలతో విసిగిపోయిన నాగం
బీజేపీలోని అంతర్గతకుమ్ములాటలతో విసిగిపోయిన నాగం... చాలాసార్లు పార్టీ హైకమాండ్‌ దృష్టికి తీసుకెళ్లారు. అధిష్టానం పట్టించుకోకపోవడంతో పార్టీ అగ్రనాయకత్వంపై ఒకింత అసంతృప్తికి గురయ్యారు. దీంతో ఇన్నాళ్లూ అయిష్టంగానే బీజేపీలో కొనసాగిన ఆయిన.. ఇక ఆ పార్టీని వీడాలని డిసైడ్‌ అయ్యారు.  త్వరలోనే కమలంపార్టీకి రాంరాం చెప్పేందుకు రెడీ అయ్యారు. అనుచరుల నుంచి వస్తున్న ఒత్తిడితో ఇక ఆలస్యం చేయకూడదని నిర్ణయించారు. కార్యకర్తల ఒత్తిడి, తన రాజకీయ భవిష్యత్‌ దృష్ట్యా ఉగాది తర్వాత తన నిర్ణయం ప్రకటిస్తాని చెప్పారు.
వేగంగా మారుతున్న రాజకీయ పరిణామాలు
తెలంగాణలో రాజకీయ పరిణామాలు వేగంగా మారుతున్నాయి. కాంగ్రెస్‌ రోజురోజుకు బలం పెంచుకుంటోంది. రేవంత్‌రెడ్డి ఈ మధ్య కాంగ్రెస్‌లో చేరడంతో టీఆర్‌ఎస్‌తో ఆ పార్టీ ఢీ అంటే ఢీ అంటోంది. కాంగ్రెస్‌ క్యాడర్‌లోనూ  నూతనోత్సాహం వచ్చింది.  దీంతో నాగం చూపు కాంగ్రెస్‌ వైపు మళ్లింది. కాంగ్రెస్‌ సీనియర్‌నేత జైపాల్‌రెడ్డితో ఉన్న సత్సంబంధాలతో హస్తం గూటికి చేరేందుకు తెరవెనుక మంత్రాంగం చేస్తున్నారు. వచ్చే ఎన్నికల్లో నాగర్‌కర్నూలు నుంచి నాగంను పోటీ చేయించాలన్న దానిపై కాంగ్రెస్‌ పెద్దలు గ్రీన్‌సిగ్నల్‌ ఇచ్చినట్టు తెలుస్తోంది. 
త్వరలోనే కాంగ్రెస్‌ కండువా కప్పుకోనున్న నాగం
వాస్తవానికి ఈ నెలాఖరులోనే నాగం కాంగ్రెస్‌ కండువా కప్పుకోవాలనుకున్నారు. కానీ అనివార్య కారణాల వల్ల అది కుదరలేదు. ఫిబ్రవరి మొదటివారంలో రాహుల్‌గాంధీ తెలంగాణకు వస్తున్నారు. రాహుల్‌ సమక్షంలో కాంగ్రెస్‌లో  చేరాలని నాగం భావిస్తున్నారు. లేదంటే రేవంత్‌ తరహాలో ఢిల్లీకి వెళ్లి కాంగ్రెస్‌ కప్పుకోవాలా అన్నది ఆలోచిస్తున్నారు. మొత్తానికి బీజేపీ జర్నీకి కటీఫ్‌ చెప్పాలని డిసైడ్‌ అయిన నాగం... ఇక హస్తం గూటికి చేరడమే తరువాయిగా మారింది. మరిరెండు రోజుల్లో ఎప్పుడు చేరుతారన్న దానిపై స్పష్టత రానుంది.

 

12:02 - January 11, 2018

చిత్తూరు : టీటీడీ బోర్డు ఏర్పాటు అంశం టీడీపీ సర్కార్‌కు ప్రహసనంగా మారింది. గత పాలకవర్గం గడువు ఏప్రిల్‌తో ముగిసినా సీఎం చంద్రబాబు ఇప్పటివరకూ కొత్త బోర్డును ఏర్పాటు చేయలేకపోయారు. మిత్రపక్షమైన బీజేపీ పెద్దలు లెక్కకు మించి సిఫార్సులు చేస్తుండమే ఈ జాప్యానికి కారణమని టీడీపీ వర్గాలు అంటున్నాయి. 2014లో ఆంధ్రప్రదేశ్‌లో టీడీపీ అధికారంలోకి వచ్చిన తరువాత ఏడాదిపాటు బోర్డు లేకుండానే కాలం గడిచిపోయింది. టీడీపీ ప్రతిపక్షంలో ఉన్నప్పుడు చంద్రబాబుతో సహా జేఈవో టీడీపీ నేతల్ని అవమానించారంటూ పెద్ద ఎత్తున ఆందోళన చేశారు. తీరా అధికారంలోకి వచ్చాక అవన్నీ మర్చిపోయి అదే జేఈవోతో కంటిన్యూ చేస్తున్నారు. ఇప్పుడు కొత్తగా వేయాల్సిన బోర్డులో తీవ్ర పోటీ నెలకొంది. ఎవరికి వారు తమకు ఒక అవకాశం ఇవ్వాలని చంద్రబాబుపై ఒత్తిడి తెస్తున్నారు. ఈ నేపథ్యంలో చంద్రబాబు వడపోసి టీటీడీ బోర్డును సిద్ధం చేసినట్లు తెలుస్తోంది. సంక్రాంతి పండుగ అనంతరం కొత్తబోర్డు ఏర్పాటుకు చంద్రబాబు గ్రీన్ సిగ్నల్ ఇవ్వనున్నట్లు సమాచారం.

చైర్మన్ రేసులో పుట్టా సుధాకర్ యాదవ్
ఇక టీటీడీ బోర్డు చైర్మన్‌గా ఎప్పటి నుండో వినిపిస్తున్న పుట్టా సుధాకర్ యాదవ్ పేరే చైర్మన్ రేసులో ముందుంది. చంద్రబాబు పుట్టా సుధాకర్‌నే ఈసారి టీటీడీ చైర్మన్‌గా నియమించాలని నిర్ణయించినట్లు సమాచారం. ముందుగా ఈ పదవి కోసం మాజీ ఎమ్మెల్యే బీద మస్తాన్‌రావు, మాజీ ఐఏఎస్ అధికారి లక్ష్మీనారాయణ, ఎంపీ రాయపాటి సాంబశివరావు, మరో ఎంపీ మాగంటి మురళీమోహన్‌లు పోటీపడ్డారు. అయితే పదవుల్లో ఉన్నవారికి నో ఛాన్స్ .. అని చెప్పడంతో వారంతా పోటీ నుంచి తప్పుకున్నారు. ఆర్ధికమంత్రి యనమలకు సుధాకర్ యాదవ్ వియ్యంకుడు కావడంతో పాటు... స్ధానికంగా మాజీ మంత్రి డీఎల్.రవీంద్రారెడ్డికి వచ్చే ఎన్నికల్లో మైదుకూరు టికెట్ ఇవ్వాలని భావిస్తుండటంతో సుధాకర్ యాదవ్ ఎంపికకు మార్గం సుగమమైనట్లు తెలుస్తోంది. కాగా..అప్పట్లో పుట్టా అన్యమతస్తుడనే వివాదం చెలరేగడంతో సీఎం నిర్ణయం సందిగ్ధంలో పడింది. దీనిపై సీఎం ఉన్నతస్ధాయి విచారణ కూడా జరిపించారు. విచారణలో సుధాకర్ యాదవ్‌పై వచ్చిన వివాదం అవాస్తవం అని తేలడంతో ఆయనకే పదవి కట్టబెట్టాలనే నిర్ణయానికి వచ్చినట్లు తెలుస్తోంది.

కేంద్రం నుంచి చైర్మన్ పదవి కోసం
అటు కేంద్రం నుంచి చైర్మన్ పదవి కోసం తమ వారికి అవకాశం కల్పించాలని ముగ్గురి పేర్లు రాష్ట్ర ప్రభుత్వానికి పంపినట్లు తెలుస్తోంది. మరోవైపు బోర్డు పదవుల కోసం గత పాలక మండలిలో ఉన్నవారిలో అత్యధికులు ఈసారి కూడా సభ్యత్వం ఆశిస్తున్నారు. అయితే ఈసారి కొత్తవారికి అవకాశమివ్వాలని అధిష్ఠానం యోచిస్తోంది. రాష్ట్ర పార్టీ కార్యాలయ కార్యదర్శి ఏవీ రమణ గత పాలకమండలిలో నిజాయితీ పనిచేశారనే పేరుండటంతో మరోసారి ఆయనకు అవకాశం దక్కవచ్చని తెలుస్తోంది. గత పాలకమండలిలో సభ్యుడిగా ఉన్న తెలంగాణ రాష్ట్ర సత్తుపల్లి ఎమ్మెల్యే సండ్ర వెంకట వీరయ్య కూడా మరోసారి అవకాశం కోసం ప్రయత్నిస్తున్నారు. అటు ప్రతిపక్ష నేత జగన్ సైతం పాదయాత్రలో టీటీడీ బోర్డు నియమించకపోవడంపై విమర్శలు గుప్పించారు. అదే విధంగా ఇటీవల వైకుంఠ ఏదాదశి సందర్భంగా కొండపై జరిగిన పరిణామాలను చంద్రబాబు దృష్టికి తీసుకువచ్చారు తెలుగు తమ్ముళ్లు. ఈ పరిణామాల నేపథ్యంలో ఎట్టి పరిస్థితుల్లో బోర్డు జాప్యం తగదని చంద్రబాబు డిసైడైనట్లు తెలుస్తోంది. ఇక అధికారికంగా ఎవరు చైర్మన్.. ఎవరు పాలకమండలి సభ్యులు తెలియాలంటే సంక్రాంతి పండుగ వెళ్లేవరకూ ఆగాల్సిందే. 

08:44 - January 9, 2018

జన్మభూమి కమిటీలను రద్దు చేయాలని సీపీఎం ఏపీ రాష్ట్ర నాయకులు బాబురావు అన్నారు. జన్మభూమి కమిటీలు రాజ్యాంగ విరుద్ధమైన, చట్ట విరుద్ధమైన కమిటీలని మండిపడ్డారు. ఇదే అంశంపై నిర్వహించిన జనపథం చర్చా కార్యక్రమంలో ఆయన పాల్గొని, మాట్లాడారు. జన్మభూమి కమిటీల పేరుతో టీడీపీ నేతలు అరాచకం సృష్టిస్తున్నారని విమర్శించారు. జన్మభూమి కమిటీలు పెత్తనం చెలయిస్తున్నాయని పేర్కొన్నారు. చిత్తశుద్ధితో జన్మభూమి సభలను నిర్వహించాలన్నారు. 'జన్మభూమి సభలు ప్రజా సమస్యలపై చర్చిస్తున్నాయా? లేక అధికార పార్టీ సభల్లా మారాయా? పింఛన్లు, రేషన్‌కార్డులు, రుణమాఫీ, ఇళ్ల స్థలాలు తదితర సమస్యలపై  చర్చ జరుగుతుందా? అసలు జన్మభూమి సభలో ప్రజా సంఘాలు ఆందోళన ఎందుకు చేస్తున్నాయి? ఇలాంటి తదితర అంశాలపై బాబురావు మాట్లాడారు. ఆ వివరాలను వీడియోలో చూద్దాం... 

 

08:15 - January 9, 2018

హైదరాబాద్‌ : నగరానికి మరో అరుదైన గౌరవం దక్కింది. విశ్వనగరంగా రూపుదిద్దుకుంటున్న భాగ్యనగరంలో సౌత్‌ ఇండియా సైన్స్‌ ఫెయిర్‌ ఘనంగా ప్రారంభమైంది. నిన్న ప్రారంభమైన ఈ సైన్స్‌ఫెయిర్‌ ఈనెల 12 వరకు కొనసాగనుంది.  ఇందులో మన రాష్ట్రంతోపాటు మరో 5 రాష్ట్రాలకు చెందిన విద్యార్థులు, ఉపాధ్యాయులు పాల్గొంటున్నారు. సైన్స్‌ ఫెయిర్‌ చిన్నారులకు ఎంతగానో ఉపయోగపడుతుందని వక్తలు అభిప్రాయపడ్డారు.
హైదరాబాద్‌ లో సౌత్‌ ఇండియా సైన్స్‌ ఫెయిర్‌ 
తెలంగాణ రాష్ట్రం ఆవిర్భవించిన తర్వాత తొలిసారిగా రాష్ట్ర రాజధాని హైదరాబాద్‌... సౌత్‌ ఇండియా సైన్స్‌ ఫెయిర్‌కు వేదికైంది. సోమవారం సికింద్రాబాద్‌లోని సెయింట్‌ ప్యాట్రిక్స్‌ హైస్కూల్‌లో ఈ సైన్స్‌ ఫెయిర్‌ ఘనంగా మొదలైంది.  తెలుగు రాష్ట్రాలతోపాటు కేరళ, తమిళనాడు, పుదుచ్చేరి, కర్నాటకకు చెందిన పాఠశాలల విద్యార్థులు, ఉపాధ్యాయులు ఇందులో పాల్గొంటున్నారు. సౌత్‌ ఇండియా సైన్స్‌ఫెయిర్‌ను తెలంగాణ విద్యాశాఖమంత్రి కడియం శ్రీహరి ప్రారంభించారు.  ఉపముఖ్యమంత్రి మహమూద్‌అలీ, హోంమంత్రి నాయిని నర్సింహ్మారెడ్డి, స్థానిక ఎమ్మెల్యే సాయన్న, పాఠశాల విద్యాశాఖ కార్యదర్శి కిషన్‌తోపాటు ఇతర ప్రజాప్రతినిధులు ఈ కార్యక్రమంలో పాల్గొన్నారు. 
యువసైంటిస్టులను ప్రోత్సహిస్తాం  : కడియం 
విద్యార్థుల్లో దాగున్న సృజనాత్మకత, ఆలోచనాశక్తిని వెలికి తీసేందుకు సైన్స్‌ఫెయిర్‌లు ఎంతగానో ఉపయోగపడుతాయని ఉపముఖ్యమంత్రి కడియం శ్రీహరి అన్నారు. యువసైంటిస్టులను ప్రోత్సహించడంలో తమ ప్రభుత్వం ఎప్పుడూ ముందుంటుందన్నారు. రాబోయే రోజుల్లో మరింత కృషి జరిపి యువశాస్త్రవేత్తలుగా ఎదిగేందుకు ప్రభుత్వం కృషి చేస్తుందన్నారు. ఇందుకు కేంద్ర ప్రభుత్వం కూడా సహకరించాలని కోరారు.
సైన్స్‌ ఫెయిర్‌లో 300 ప్రదర్శనలు 
సైన్స్‌ ఫెయిర్‌లో ప్రతి రాష్ట్రం నుంచి 50 ప్రదర్శలను ఉంటాయి. అన్ని రాష్ట్రాలు కలిపి దాదాపు 300 ప్రదర్శనలు ఉంటాయి. వీటిలో ప్రతి రాష్ట్రం నుంచి 15 గ్రూప్‌ ప్రదర్శనలు, 20 వ్యక్తిగత ప్రదర్శనలు, మరో 15 ఉపాధ్యాయ ప్రదర్శనలు ఉంటాయి. విద్యార్థులు ప్రదర్శిస్తోన్న అంశాలను చూసేందుకు హైదరాబాద్‌, దాని చుట్టూరా ఉన్న పాఠశాలల విద్యార్థులు భారీగా తరలివస్తున్నారు. మన దగ్గర శాస్త్రవేత్తల కొరత తీవ్రంగా ఉందని... ఈ కొరత పూడ్చాల్సిన బాధ్యత నేటియువతరం మీదనే ఉందని ఉపముఖ్యమంత్రి మహమూద్‌ అలీ అభిప్రాయపడ్డారు.
సైన్స్‌ ఎగ్జిబిషన్‌ 
వివిధ అంశాలపై విద్యార్థులు ప్రదర్శిస్తున్న సైన్స్‌ ఎగ్జిబిషన్‌ అందరినీ ఆలోచింప చేస్తోంది. శాస్త్ర, సాంకేతి రంగాల్లో సాధించిన ప్రగతి వివరిస్తూ ఏర్పాటు చేసిన పలు ప్రదర్శనలు ఆసక్తిగా తిలకిస్తున్నారు. సాయంత్రం జరిగిన విద్యార్థుల సాంస్కృతిక ప్రదర్శనలు ఆకట్టుకున్నాయి.
 

 

Pages

Don't Miss

Subscribe to RSS - CM Chandrababu Naidu