CPM MLA Sunnam Rajaiah

09:33 - January 27, 2018

భద్రాద్రి కొత్తగూడెం : జిల్లాలో మావోయిస్టులు అర్థరాత్రి బీభత్సం సృష్టించారు. ఇన్‌ఫార్మర్‌ అనే నెపంతో ఒకరిని పొట్టనపెట్టుకున్నారు. పినపాక మండలం భూపతిరావుపేట, సుందరయ్యనగర్‌లో అర్థరాత్రి మావోయిస్టులు దాడులకు తెగబడ్డారు. పొడియం జోగయ్య అనే వ్యక్తిని గొడ్డలితో నరికి చంపారు. మడివి రమేష్‌పై కాల్పులు జరిపారు. ఈ కాల్పుల్లో రమేష్‌ తీవ్రంగా గాయపడ్డారు. భూపతిరావుపేటలో నాలుగు లారీలు, రెండు జేసీబీలను సైతం దహనం చేశారు. ఇసుక క్వారీలోని ఇద్దరు కూలీలను తీసుకెళ్లి మధ్యలోనే వదిలేసినట్లు తెలుస్తోంది. 

 

21:54 - December 9, 2017

హైదరాబాద్‌ : నగరంలో ఆదివాసీలు కదం తొక్కారు. తమ హక్కుల కోసం ముక్త కంఠంతో నినదించారు. ఎస్టీ జాబితా నుంచి లంబాడీలను తొలగించాలంటూ ఆత్మగౌరవ సభను నిర్వహించారు. ఆదివాసీల సంక్షేమాన్ని గత పాలకులు విస్మరించారని నేతలు మండిపడ్డారు. విద్యా, ఉద్యోగ, ఉపాధిలో ఆదివాసీలకు  నష్టం జరుగుతోందని అన్నారు. 

హక్కుల కోసం ఆదివాసీలు పోరుబాట పట్టారు. లంబాడీలను ఎస్టీ జాబితా నుంచి తొలగించాలంటూ  డిమాండ్‌ చేస్తూ హైదరాబాద్‌లో సభ నిర్వహించారు. ఆదివాసీల హక్కుల పోరాట సమితి - తుడుందెబ్బ ఆధ్వర్యంలో హైదరాబాద్‌లోని సరూర్‌నగర్‌ స్టేడియంలో భారీ బహిరంగ సభ నిర్వహించారు. ఆదివాసీల ఆత్మగౌరవం పేరుతో జరిగిన  ఈ బహిరంగ సభకు వరంగల్‌, ఆదిలాబాద్‌, కరీంనగర్‌, ఖమ్మం జిల్లాలతోపాటు ఛత్తీస్‌గఢ్‌, మహారాష్ట్ర నుంచి ఆదివాసీలు పెద్ద సంఖ్యలో వచ్చారు.  ఈ సభకు గోండు, గోమ, చెంచు, నాయక్‌కోడ్‌, పర్టానా, కొల్లం, కొండరెడ్లు, ఎరుకల, యానాది, ఆదివాసీ, మన్నేవార్‌ తదితర ఉప కులాలకు చెందిన ప్రజలు తరలివచ్చారు. 

ఆదివాసీల ఆత్మగౌరవ సభలో పాల్గొన్న  పార్లమెంటరీ ఎస్సీ,ఎస్టీ  కమిటీ చైర్మన్‌ పగాన్‌సింగ్‌ కుల్తే.. ఆదివాసీల పోరాటానికి సంఘీభావం ప్రకటించారు. ఆదివాసీల ఉద్యమానికి తమ పార్టీ అండగా నిలుస్తుందన్నారు. ఆదివాసీల హక్కులను పూర్వంలో బ్రిటీష్‌, నైజాం నవాబులు అణచివేయాలని చూస్తే కుమ్రంభీం విల్లంబులతో వారిపై పోరాటం చేశారని కుమ్రంభీం మనువడు సోనేరావు అన్నారు. నేడు ఆదివాసీల ఉనికి కోసం మనం మరోసారి అదే  స్ఫూర్తితో ఉద్యమించాలని పిలుపునిచ్చారు. లంబాడీలను ఎస్టీ జాబితా నుంచి తొలగించే వరకు పోరాటం ఉధృతం చేయాలన్నారు.

ఇదే సభకు హాజరైన సీపీఎం ఎమ్మెల్యే సున్నం రాజయ్య...గతంలో పాలించిన పాలకులు ఆదివాసీల సంక్షేమాన్ని విస్మరించారని విమర్శించారు. విద్యా, ఉపాధిలో ఆదివాసీలకు  నష్టం జరుగుతోందని చెప్పారు.  జీవో నంబర్‌ 3ను మార్చేందుకు టీఆర్‌ఎస్‌ ప్రభుత్వం కుట్ర చేస్తోంటే.. అసెంబ్లీ సాక్షిగా ఆదివాసీల ఏకైక ఎమ్మెల్యేగా తాను  ప్రభుత్వ చర్యలను వ్యతిరేకించానని గుర్తు చేశారు. వలసదారులు, చొరబాటుదారుల పేర్లతో ఆదివాసీలను  ప్రభుత్వం అణచివేసే ప్రయత్నం చేస్తోందని మండిపడ్డారు. దీన్ని వెంటనే ఆపేయాలని డిమాండ్‌ చేశారు.

ఆదివాసీల సభలో  టీఆర్‌ఎస్‌ ఎమ్మెల్యే కోవా లక్ష్మీబాయి మాట్లాడుతుండగా ఆదివాసీలు అడ్డుకున్నారు. టీఆర్‌ఎస్‌ ప్రభుత్వానికి వ్యతిరేకంగా నినాదాలు చేశారు. ఆదివాసీల కోసం కేసీఆర్‌ కుమ్రంభీం జిల్లా ఏర్పాటు చేశారని కోవా లక్ష్మి తెలిపారు. తమ ప్రభుత్వం ఆదివాసీల అభివృద్ధి కోసం కృషి చేస్తోందని చెప్పారు.

 

17:18 - November 15, 2017

హైదరాబాద్ : తెలంగాణ రాష్ట్ర శాసనసభలో ఫీయి రీయింబర్స్ మెంట్ పథకంపై విపక్షాలు ప్రభుత్వాన్ని ఇరుకున పెట్టే ప్రయత్నం చేశాయి. బుధవారం అసెంబ్లీలో దీనిపై చర్చ జరిగింది. ఫీజు రీయింబర్స్ మెంట్ ను ప్రభుత్వం నీరుగార్చిందని టి.కాంగ్రెస్ సభ్యుడు ఉత్తమ్ కుమార్ రెడ్డి నిలదీశారు. ఆయన ప్రభుత్వానికి సూటిగా పలు ప్రశ్నలు వేశారు. పేదవర్గాల విద్యార్థులు చదువుకు దూరం అవుతున్నారని, ఈ బకాయిలు వెంటనే విడుదల చేయాలని డిమాండ్ చేశారు. కాంట్రాకర్ల మధ్య ఉన్న ప్రేమ విద్యార్థులపై లేదా ? అని ప్రశ్నించారు. 13 లక్షల విద్యార్థులకు ఇవ్వాల్సి ఉందని, 80 మైనార్టీ స్కూళ్లు మూతపడ్డాయా ? లేదా ? అని నిలదీశారు. అధికారంలోకి వచ్చినప్పటి నుండి విద్యార్థుల సంఖ్య ఎందుకు తగ్గిందని సూటిగా ప్రశ్నించారు. చివరి సంవత్సరం నుండి బకాయిలు ఎంతుందో చెప్పాలన్నారు.

ఫీజు రీయింబర్స్ మెంట్ బకాయిలు చెల్లించకపోవడంతో విద్యార్థులు తీవ్ర ఇబ్బందులు పడుతున్నారని సీపీఎం సభ్యుడు సున్నం రాజయ్య పేర్కొన్నారు. రూ. 4వేల బకాయిలు వెంటనే చెల్లించాలని డిమాండ్ చేశారు. అలాగే ఫీజుల చెల్లింపుల విషయంలో ప్రభుత్వం స్పష్టమైన హామీనివ్వాలన్నారు.

దీనిపై మంత్రి ఈటెల రాజేందర్ సమాధానం చెప్పారు. ఎక్కడా ఇబ్బంది పెట్టడం లేదని చెప్పుకొచ్చారు. ప్రభుత్వం నిర్లక్ష్యం చేయడం లేదని..2016-17 విద్యా సంవత్సరానికి మరో వారంలో ఫీజులు బకాయిలు చెల్లిస్తామన్నారు. చిన్న కాలేజీలకు మొదట..పెద్ద కాలేజీలకు తరువాత ఇవ్వడం జరుగుతోందని తెలిపారు. ఇప్పటి వరకు తాము 52.35 శాతం ఫీజు రీయింబర్స్ మెంట్ చెల్లించడం జరిగిందన్నారు. 

21:17 - November 14, 2017

హైదరాబాద్ : నిరుద్యోగ సమస్యపై తెలంగాణ అసెంబ్లీలో ఆసక్తికర చర్చ జరిగింది. ఉద్యోగాల భర్తీ చేపట్టాలని విపక్షాలు డిమాండ్‌ చేశాయి. దీనిపై స్పందించిన మంత్రి ఈటల రాజేందర్‌ రాష్ట్రంలో ఉద్యోగాల భర్తీ ప్రక్రియ కొనసాగుతోందని తెలిపారు. మిగిలిన ఉద్యోగాల భర్తీకి చర్యలు చేపడుతున్నారు. తెలంగాణ అసెంబ్లీలో ఉదయం ప్రశ్నోత్తరాల అనంతరం... తెలంగాణ ఆర్థిక వ్యవస్థపై హాట్‌హాట్‌ డిస్కషన్ జరిగింది. అప్పుల్లో తెలంగాణ ప్రభుత్వం దేశానికి ఆదర్శంగా ఉందని బీజేపీ ఎమ్మెల్యే కిషన్‌రెడ్డి.. ఆరోపించారు. కార్పొరేషన్లు, కో ఆపరేటివ్‌ ఫెడరేషన్స్‌ కోసం ఎంత అప్పుతీసుకున్నారో ఆర్థికశాఖ దగ్గర లెక్క ఉందా అని ప్రశ్నించారు. వచ్చే బడ్జెట్‌ నాటికి రాష్ట్ర ప్రభుత్వం అప్పు 2 లక్షల 20 వేల కోట్లు అవుతుందని కాంగ్రెస్ శాసనసభ పక్షనేత జానారెడ్డి ఆరోపించారు. రాష్ట్రం సర్‌ప్లస్‌లో ఉందని గొప్పలు చెప్పుకోవడం కాదు...లెక్కలతో సహా చూపించాలన్నారు. అయితే ఈ ఆరోపణలను ఆర్థిక మంత్రి ఈటల ఖండించారు. రాష్ట్రం రెవెన్యూలో సర్‌ప్లస్‌లో ఉన్న మాట వాస్తవమే అని మంత్రి ఈటల అన్నారు. ఏ అప్పులు చేసినా ఎఫ్‌ఆర్‌బీఎం పరిధికి లోబడే చేస్తున్నట్లు స్పష్టం చేశారు.

మధ్యాహ్నం నుంచి నిరుద్యోగ సమస్య, నోటిఫికేషన్ల విషయంలో ప్రభుత్వం నిర్లక్ష్యంపై చర్చ మొదలైంది. ప్రభుత్వం ఎన్నికల నాటి హామీలను మర్చిపోయిందని టీడీపీ ఎమ్మెల్యే ఆర్.కృష్ణయ్య ఆరోపించారు. ప్రభుత్వం వెంటనే ఖాళీగా ఉన్న ఉద్యోగాలను భర్తీ చేయాలని సీపీఎం ఎమ్మెల్యే సున్నం రాజయ్య డిమాండ్ చేశారు. నిరుద్యోగులు రోడ్ల మీదకొచ్చి ఉద్యోగాలు ఇమ్మని అడిగే పరిస్థితి కల్పించకూడదన్నారు.

విపక్ష పార్టీల నేతలను మంత్రి హరీశ్‌రావు తీవ్ర స్థాయిలో విమర్శించారు. తెలంగాణ ప్రభుత్వం ఇచ్చిన మాటకు కట్టుబడి ఉంటుందని ఆయన తెలిపారు. లక్షా 12 వేల ఉద్యోగాల నియామకాలన్నీ వచ్చే 20 నెలల్లో పూర్తి చేస్తామని స్పష్టం చేశారు. తమ మేనిఫేస్టోలో ఉన్న అంశాలు 90 శాతం అమలు చేశామని తెలిపారు.

రాష్ట్రంలో ఇప్పటివరకు 27, 744 ఉద్యోగాలను భర్తీ చేశామని మంత్రి ఈటల రాజేందర్ సభకు తెలిపారు. టీఎస్‌పీఎస్సీ ద్వారా 5,932 ఉద్యోగాలు, సింగరేణిలో 7, 266 పోస్టులు విద్యుత్‌ శాఖలో 1, 427, పోలీస్‌ శాఖలో 12, 157 పోస్టులను భర్తీ చేసినట్లు మంత్రి తెలిపారు. మిగతా ఖాళీల భర్తీకి ప్రభుత్వం చర్యలు తీసుకుంటుందన్నారు. తెలంగాణ ప్రభుత్వం 2 లక్షల 20 వేల మంది కాంట్రాక్ట్‌, ఔట్ సోర్సింగ్ ఉద్యోగులకు జీతభత్యాలు పెంచిన ఘనత సీఎం కేసీఆర్‌కే దక్కుతుందన్నారు. అనంతరం సభ బుధవారానికి వాయిదాపడింది.

13:14 - November 1, 2017

హైదరాబాద్ : నూతన సచివాలయ నిర్మాణాన్ని వ్యతిరేస్తున్నామని సీపీఎం ఎమ్మెల్యే సున్నం రాజయ్య తెలిపారు. కావాలనే ప్రభుత్వం సచివాలయ నిర్మాణానికి పూనుకుంటుందని తెలిపారు. కొత్త సచివాలయం కోసం రూ.500 కోట్లు వృధా చేయడాన్ని వ్యతిరేకిస్తున్నామని చెప్పారు. రాష్ట్రంలో కాంట్రాక్టు, ఔట్ సోర్సింగ్ ఉద్యోగులు చాలీచాలని జీతాలను జీవనం వెల్లదీస్తున్నారని వారిని వేతనాలు పెంచాలని డిమాండ్ చేశారు. ప్రస్తుత సచివాలయాన్ని యధాతధంగా ఉంచాలన్నారు. ఇప్పుడున్న సచివాలయం నుంచే పరిపాలన కొనసాగించాలని పేర్కొన్నారు. మరిన్ని వివరాలను వీడియోలో చూద్దాం...

13:22 - April 30, 2017

హైదరాబాద్ : ప్రతిపక్షాల అభిప్రాయం తెలుసుకోకుండా వెంటనే భూ సేకరణ చట్టాన్ని ఆమోదించడం దారుణమని సీపీఎం ఎమ్మెల్యే సున్నం రాజయ్య విమర్శించారు. ప్రభుత్వ తీరును ఆయన తీవ్రంగా విమర్శించారు. కేంద్రం నుంచి తీసుకొచ్చిన 2013 భూసేకరణ చట్టాన్ని.. ఉన్నది ఉన్నట్టుగా అమలు చేయాలని ముందు నుంచి డిమాండ్ చేసినాపట్టించుకోలేదన్నారు. ప్రభుత్వం నియంతృత్వంగా ప్రవర్తించిందని.. సీపీఎం పార్టీ తరపున ఆయన తీవ్రంగా ఖండించారు. 

 

11:13 - March 23, 2017

హైదరాబాద్ : తెలంగాణ అసెంబ్లీ సమావేశాలు ప్రారంభం అయ్యాయి. ఈ సందర్భంగా మంత్రి జగదీష్ రెడ్డి మాట్లాడుతూ తాను తప్పుగా మాట్లాడివుంటే క్షమాపణలు చెప్పేందుకు సిద్ధంగా ఉన్నానని విజ్ఞప్తి చేశానని తెలిపారు. తాను ఏ పదం వాడానో చెబితే ఆ పదాన్ని ఉపసంహరించుకుంటానని కోరినా... సదరు సభ్యులు చెప్పలేదన్నారు. రికార్డు చూసి అలాంటివేమైనా ఉంటే తొలగిస్తామని స్పీకర్ చెప్పారని గుర్తు చేశారు. రికార్డుల్లో అభ్యంతరకరమైన వ్యాఖ్యలు ఉంటే, తన వైపు నుంచి తప్పువుంటే తొలగించాలని కోరుతున్నట్లు చెప్పారు. 
నేను పశ్చాత్తాపం చెందుతున్నా : కిషన్ రెడ్డి 
గత పదమూడు సంత్సరాలుగా తాను ఎప్పుడు వెల్ లోకి రాలేదని కానీ.. నిన్న తాను వెల్ లోకి రావడం ఫస్ట్ టైమ్.. అని అన్నారు. రాజశేఖర్ రెడ్డి, రోశయ్య, కిరణ్ కుమార్ రెడ్డి సీఎంలుగా ఉన్నప్పుడు సభ్యులతో కలిసి ప్రభుత్వంపై ఏ రకంగా పోరాటం చేశానో టీర్ ఎస్ సభ్యులు, తెలుసన్నారు. నరేంద్రమోడీని అన్నారని తాను కొంచెం తొందరపాటు పడ్డానని తెలిపారు. నిన్న వెల్ లోకి వచ్చినందుకు పశ్చాత్తాపం వ్యక్తం చేస్తున్నట్లు తెలిపారు. 

 

08:46 - March 23, 2017

రైతుల రుణాల మాఫీపై ప్రభుత్వానికి చిత్తశుద్ధి లేదని వక్తలు అన్నారు. ఇదే అంశంపై నిర్వహించిన చర్చ కార్యక్రమంలో ఏపీసీసీ లీగల్ సెల్ కన్వీనర్ రామ్ శర్మ, టీడీపీ నేత దినకర్, సీపీఎం నేత భవన్ నారాయణ పాల్గొని, మాట్లాడారు. రైతులు తీసుకున్న రుణాలకు బ్యాంకుల నుంచి నోటీసులు వస్తున్నాయని చెప్పారు. వ్వవసాయ రంగానికి ప్రభుత్వ నిధులు కేటాయింపు తగ్గుతుందన్నారు. మరిన్ని వివరాలను వీడియోలో చూద్దాం...

 

21:19 - March 22, 2017

హైదరాబాద్ : పాలక, ప్రతిపక్ష సభ్యుల సవాళ్లు ప్రతిసవాళ్ల మధ్య ఇవాల్టి తెలంగాణ శాసనసభా సమావేశాలు వాడివేడిగా సాగాయి. కాంగ్రెస్‌సభ్యుల వాకౌట్‌, బీజేపీ సభ్యుల స్పీకర్‌పోడియం ముట్టడితో సభ హాట్‌హాట్‌గా నడిచింది. మిషన్‌ భగీరథ, పంచాయతీరాజ్‌, విద్యుత్‌ అంశాలపై విపక్షాలు ప్రభుత్వాన్ని నిలదీశాయి. సభ వాయిదా వేయడానికి ముందు ఎస్సీఎస్టీ స్పెషల్‌ డెవలప్‌మెంట్‌ బిల్లు, తెలంగాణ భూదాన బిల్లుతోపాటు తెలంగాణ పేమెంట్‌ అండ్‌ శాలరీస్‌ బిల్లులను మంత్రులు సభలో ప్రవేశపెట్టారు. తెలంగాణ శాసనసభలో ప్రజాసమస్యలపై ప్రతిపక్షాలు ప్రభుత్వాన్ని నిలదీశాయి. మిషన్‌భగీరథ, పంచాయతీరాజ్‌, విద్యుత్‌ శాఖల పనితీరుపై విపక్షసభ్యులు సూటిగా ప్రశ్నలు సంధించారు. మిషన్‌ భగీరథలో వేలకోట్ల రూపాయల అవినీతి జరుగుతోందని కాంగ్రెస్‌ సభ్యులు జానారెడ్డి , జీవన్‌రెడ్డి, కోమటిరెడ్డి వెంకరెడ్డి తదితరులు ఆరోపించారు. నిజాలు బయటికి రావాలంటే హౌస్‌కమిటీ వేయాలని కాంగ్రెస్‌ సభ్యులు డిమాండ్‌ చేశారు. హౌస్‌కమిటీ వేయడానికి ప్రభుత్వం నిరాకరించడంతో .. కాంగ్రెస్‌ సభ్యులు వాకౌట్‌ చేశారు. కాంగ్రెస్‌ సభ్యుల ఆరోపణలను మంత్రి హరీశ్‌రావు తోసిపుచ్చారు. అభివృద్ధి పథకాలతో రాష్ట్ర ప్రభుత్వం దేశంలోనే మంచి పేరు తెచ్చుకుంటుంటే.. కాంగ్రెస్‌ నాయకులు జీర్ణించుకోలేక పోతున్నారని హరీశ్‌రావు ఆగ్రహం వ్యక్తం చేశారు.
అటు పంచాయతీరాజ్‌ శాఖ పనితీరుపై కూడా సభలో చర్చ జరిగింది. గ్రామపంచాయితీల్లో అవినీతికి అవకావశం లేని విధంగా అన్ని డాక్యుమెంట్స్‌ డిజిటలైజ్‌ చేస్తామని మంత్రి జూపల్లి కృష్ణారావు చెప్పారు. రాష్ట్రంలోని అన్ని గ్రామాల్లో ఎల్‌ఈడీ వీధిలైట్లు ఏర్పాటు చేస్తామన్నారు. మంత్రి సమాధానంపై సీఎల్పీ నేత జానారెడ్డి తీవ్ర అభ్యంతరం వ్యక్తం చేశారు. పంచాయతీరాజ్‌ శాఖ అనాలోచిత చర్యల వల్ల..ఎన్ఆర్ ఈజీఎస్ నిధులు సుమారు 300 కోట్ల రూపాయలు మురిగిపోయే పరిస్థితి వచ్చిందన్నారు.

ఘాటుగా స్పందించిన జగదీశ్ రెడ్డి..
మున్సిపల్ కార్మికుల సమస్యలను సీపీఎం శాసనసభ్యుడు సున్నంరాజయ్య సభలో ప్రస్తావించారు. భద్రాచలం ఏజెన్సీలో మిషన్‌ భగీరథ పనులు నత్తనడకన సాగుతున్నాయని ఆరోపించారు. సభలో విద్యుత్‌శాఖ పనితీరుపై బీజేపీ సభ్యులు ఎన్‌వీఎస్‌ఎస్‌ ప్రభాకర్ విమర్శలు చేశారు. కేంద్ర ప్రభుత్వం తీసుకొచ్చిన ఉదయ్‌ పథకం నుంచి రాష్ట్రం లబ్దిపొందలేక పోతోందని ఆరోపించారు. దీనికి మంత్రి జగదీశ్వరరెడ్డి ఘాటుగా స్పందించారు. మంత్రి జగదీశ్‌రెడ్డి స్పందనపై సీరియస్‌ అయిన బీజేపీ సభ్యులు స్పీకర్‌ పోడియంలోకి దూసుకొచ్చారు. ప్రధాని మోదీపై మంత్రి అనుచిత వ్యాఖ్యలకు క్షమాపణ చెప్పాలని డిమాండ్‌ చేశారు. ఈ సమయంలో కల్పించుకున్న మంత్రి హరీశ్‌రావు మంత్రి జగదీశ్‌రెడ్డి వ్యాఖ్యల్లో తప్పేం లేదన్నారు. బీజేపీ సభ్యులు అనవసర రాద్దాంతం చేస్తున్నారని సభ సజావుగా జరగడానికి సహకరించాలన్నారు. ఈ వాగ్వాదాల నడుమే.. ప్రభుత్వం మూడు బిల్లులను ప్రవేశపెట్టింది. ఆతర్వాత గురువారం ఉదయం 10గంటలకు సభను వాయిదా పడింది.

17:45 - March 22, 2017

హైదరాబాద్ : పంచాయతీరాజ్‌ శాఖ అనాలోచిత చర్యల వల్ల కేంద్రం నుంచి వచ్చే నిధులు ఉపయోగం లేకుండా పోతాయని సీఎల్‌పీ నాయకుడు జానారెడ్డి అన్నారు. nrgs act ప్రకారం ఏ సంవత్సరం కేటాయింపులు అదే సంవత్సరంలో పూర్తిగా ఖర్చుపెట్టాలి..లేదంటే ఆ సంవత్సరం కేటాయింపులన్నీ మురిగిపోతాయన్నారు. గ్రామపంచాయతీల్లో పలు అభివృద్ధి పనులకు నెలరోజుల క్రితం చేపట్టిన పనులు మార్చి 31నాటి ఎలా పూర్తవుతాయని ఆయన ప్రశ్నించారు. దీంతో ఏకంగా 300కోట్లు పనికిరానివిగా మారే ప్రమాదం ఉందని.. దీన్నిబట్టే పంచాయతీరాజ్‌శాఖ ఎంత సమర్థంగా పనిచేస్తుంతో స్పష్టం అవుతోందని జానారెడ్డి ప్రభుత్వాన్ని ప్రశ్నించారు.

Pages

Don't Miss

Subscribe to RSS - CPM MLA Sunnam Rajaiah