CWG 2018

07:06 - April 16, 2018

ఢిల్లీ : అస్ట్రేలియాలోని గోల్డ్‌కోస్ట్‌ వేదికగా జరిగిన 21వ కామన్‌వెల్త్‌ గేమ్స్‌ ముగిశాయి. ఈ క్రీడల్లో మొత్తం 66 మెడల్స్‌తో మూడో స్థానంలో నిలిచింది భారత్‌. చివరి రోజు గోల్డ్‌తో పాటు 3రజతాలు, 2 క్యాంసాలు లభించాయి. కామన్వెల్త్‌లో పతకాలు సాధించిన విజేతలకు రాష్ట్రపతి, ప్రధాని శుభాకాంక్షలు తెలిపారు. అస్ట్రేలియాలోని గోల్డ్‌కోస్ట్‌లో జరుగుతున్న 21 వ కామన్‌వెల్త్‌ గేమ్స్‌ ముగిశాయి. చివరి రోజు భారత్‌కు తన ఖాతాలో మరో 6 పతకాలు జమచేసుకుంది. మొత్తం 66 మెడల్స్‌ సాధించిన భారత్‌ ఓవరాల్‌ లిస్ట్‌లో మూడో స్థానంలో నిలిచింది. పోటీల్లో 26స్వర్ణాలు, 20రజతాలు, 20 కాంస్య పతకాలను భారత్‌ గెలుచుకుంది. 198పతకాలతో ఆస్ట్రేలియా మొదటి స్థానంలో, 136 పతకాలతో ఇంగ్లాండ్‌ రెండో స్థానంలో నిలిచాయి.

గేమ్స్‌ చివరి రోజు బ్యాడ్మింటన్ ఉమెన్స్‌ సింగిల్స్‌లో... స్వర్ణమే లక్ష్యంగా బరిలోకి దిగిన భారత అగ్రశ్రేణి క్రీడాకారిణిలు పీవీ సింధు, సైనా నెహ్వాల్‌ మధ్య ఫైనల్‌ పోరు హోరాహోరీగా ముగిసింది. 56 నిమిషాల పాటు సాగిన ఈ పోరులో చివరకు సైనాదే పైచేయిగా నిలిచింది. రెండు వరుస గేమ్స్‌లో ఉత్సాహంగా ఆడిన సైనా 21-18, 23-21తేడాతో సింధుపై విజయం సాధించి స్వర్ణ పతకాన్ని కైవసం చేసుకుంది. ఒలింపిక్ స్టార్ పీవీ సింధు రజతంతో సరిపెట్టుకోవాల్సి వచ్చింది. కామన్వెల్త్‌ క్రీడల్లో సైనాకిది రెండో స్వర్ణం. 2010లో దిల్లీలో జరిగిన కామన్వెల్త్‌ క్రీడల్లోనూ సైనా గోల్డ్‌ మెడల్ గెలుచుకుంది.

బ్యాడ్మింటన్‌ పురుషుల సింగిల్స్‌లో కిదాంబి శ్రీకాంత్‌కు నిరాశే ఎదురైంది. ఫైనల్‌ పోరులో మలేషియా ఆటగాడు లీ చాంగ్‌ వీతో తలపడిన శ్రీకాంత్‌ 21-19, 14-21, 14-21 తేడాతో ఓడి రజతంతో సరిపెట్టుకున్నాడు. అయితే బ్యాడ్మింటన్‌ మిక్స్‌డ్‌ టీం విభాగంలో శ్రీకాంత్‌ 21-17, 21-14 తేడాతో లీ చాంగ్‌ వీని ఓడించడం విశేషం. కామన్వెల్త్ గేమ్స్‌లో శ్రీకాంత్‌కు ఇదే తొలి పతకం. మహిళల డబుల్స్ స్క్వాష్ ఫైనల్స్‌లో దీపిక పల్లికల్, జోష్నా చిన్నప్పలు రజతంతో రెండో స్థానానికి పరిమితమయ్యారు. న్యూజిలాండ్‌కు చెందిన జోయెల్లె కింగ్, అమంద లాండెర్స్-మర్ఫీ జంటతో తలపడి ఓడారు. పురుషుల బ్యాడ్మింటన్‌ డబుల్స్‌లోనూ భారత్‌కు రజతమే దక్కింది. రంకిరెడ్డి సాత్విక్- షెట్టి చిరాగ్‌ జోడి ఇంగ్లండ్‌ జట్టుపై... 13-21 16-21 తేడాతో ఓటమి పాలయ్యారు. మహిళల మిక్‌డ్‌ డబుల్స్‌ టేబుల్‌ టెన్నిస్‌లో మనికాబాత్రా-జ్ఞానశేఖరన్‌ జోడి కాంస్యం దక్కించుకుంది. అలాగే పురుషుల సింగిల్స్‌ టేబుల్‌ టెన్నిస్‌లో ఆచంట శరత్‌ కాంస్యంతో సరిపెట్టుకున్నాడు. కామన్‌వెల్త్‌ గేమ్స్‌లో పతకాలు సాధించిన క్రీడాకారులందరికీ రాష్ట్రపతి, ప్రధాని శుభాకాంక్షలు తెలిపారు. క్రీడాకారులు మరింత మెరుగ్గా రాణించాలని ట్వీట్‌ చేశారు వీరేంద్ర సెహ్వాగ్‌. 

08:05 - April 15, 2018

ఢిల్లీ : : కామన్వెల్త్‌ గేమ్స్‌లో ఆసక్తికర పోరు...భారత స్టార్ క్రీడాకారిణిల మధ్య పోటీ..ఎవరు గెలుస్తారు ? ఎవరు ఓడుతారు ? అనే ఉత్కంఠ కామన్ వెల్త్ గేమ్ లో చోటు చేసుకుంది. మహిళల బ్యాడ్మింటన్‌ సింగిల్స్‌లో భారత స్టార్‌ క్రీడాకారిణులు సైనా నెహ్వాల్‌, పీవీ సింధు ఫైనల్స్‌లో తలపడ్డారు. నువ్వా..నేనా అన్నట్లుగా ఈ పోరు సాగింది. ఎవరికి స్వర్ణం దక్కుతుందా ? అనే ఉత్కంఠ అభిమానుల్లో నెలకొంది. చివరికి సైనానే పై చేయి సాధించింది. సింధుపై 21-18, 23-21 తేడాతో సైనా విజయం సాధించింది. సైనాకు స్వర్ణం..సింధుకు రజత పతకం లభించింది. మొత్తంగా 62 పతకాలు సాధించిన భారత్ మూడో స్థానంలో నిలిచింది. 

08:31 - April 11, 2018

ఢిల్లీ : 21వ కామన్వెల్త్‌ గేమ్స్‌ 6వ రోజు పోటీల్లోనూ భారత్‌ రెండు పతకాలు సాధించింది. ఉమెన్స్‌ 25 మీటర్ల పిస్టల్‌ షూటింగ్‌ విభాగంలో భారత్‌ స్టార్‌ షూటర్‌ హీనా సిద్దు అంచనాలకు తగ్గట్టుగానే రాణించింది. ఫైనల్‌రౌండ్‌లో ఆస్ట్రేలియన్ షూటర్‌ ఎలీనా గలియాబోవిచ్‌ను ఓడించిన హీనా సిద్దు స్వర్ణం సాధించింది. పారా పవర్‌ లిఫ్టర్‌ సచిన్‌ చౌదరి మెన్స్‌ హెవీ వెయిట్‌ పవర్‌లిఫ్టింగ్‌ ఈవెంట్‌లో కాంస్య పతకం సాధించాడు. కామన్వెల్త్‌ గేమ్స్‌లో మెడల్‌ సాధించిన అతి కొద్దిమంది పారా అథ్లెట్ల లిస్ట్‌లో సచిన్‌ చౌదరి చేరి...అరుదైన ఘనతను సొంతంచేసుకున్నాడు.

09:38 - April 9, 2018

ఢిల్లీ : ఆస్ట్రేలియాలో జరుగుతోన్న 21వ కామన్వెల్త్‌ గేమ్స్‌లో భారత్‌ సత్తా చాటుతోంది.ఆదివారం మూడు స్వర్ణాలను గెలుచుకుంది. సింగపూర్‌తో జరిగిన టేబుల్‌ టెన్నిస్‌లో భారత్‌ మహిళా జట్టు 3-1 తేడాతో విజయం సాధించి స్వర్ణపతకాన్ని సొంతం చేసుకుంది. తొలిసారిగా టేబుల్‌ టెన్నిస్‌ విభాగంలో మహిళల జట్టు విజయం సాధించి చరిత్ర సృష్టించింది. వెయిట్‌ లిఫ్టింగ్‌ 69 కేజీల విభాగంలో పూనమ్‌ యాదవ్‌ స్వర్ణ పతకం గెలవగా.. 10 మీటర్ల మహిళల ఎయిర్‌ పిస్టల్‌ విభాగంలో మనూ భాకర్‌ స్వర్ణం సాధించింది. ఇదే విభాగంలో హీనా సిద్ధు రజత పతకం గెలిచారు. దీంతో 7 స్వర్ణాలు, 2 రజతం, 3 కాంస్య పతకాలతో భారత్‌ పతకాల పట్టికలో నాలుగో స్థానానికి చేరుకుంది. భారత్‌ సాధించిన 6 స్వర్ణాల్లో ఐదు వెయిట్‌ లిఫ్టర్లవే కావడం విశేషం. ఇక సీడబ్ల్యూజీ బ్యాడ్మింటన్‌ మిక్సిడ్‌లో భారత్‌ తొలిసారిగా ఫైనల్స్‌కు చేరుకుంది. సోమవారం టేబుల్‌ టెన్నిస్‌ పురుషుల జట్టు మ్యాచ్‌ జరగనుంది.

 

13:14 - April 7, 2018

ఈశాన్య రాష్ట్రాల నుంచి మెరిసిన మణిపూర్ మణిపూస ఎత్తిన బరువుల వెనుక ఎంతో కష్టం ఉంది. పుల్లలు ఏరుకునే స్థాయి నుండి భారతదేశపు ఉత్తమ పురస్కారమైన 'పద్మశ్రీ' స్థాయికి చేరుకుంది మణిపూర్ మణిపూస మీరాబాయి చాను..ఆరు నిమిషాలు... ఆరు లిఫ్ట్‌లు... ఆరు రికార్డులు... ఆస్ట్రేలియాలోని గోల్డ్‌కోస్ట్‌లో జరుగుతున్న కామన్వెల్త్‌ గేమ్స్‌లో భారత వెయిట్‌లిఫ్టర్‌ మీరాబాయి చాను తొలి బంగారు పతకాన్ని గెలుచుకుని దేశం యావత్తు గర్వపడేలా చేసింది ఈ పసిడి కొండ. 

పచ్చని కొండల మధ్య పుట్టిన పసిడి పతకం..

ఈశాన్య రాష్ట్రమైన మణిపూర్‌లో మారుమూల గ్రామంలో ఈ బరువుల కొండ పుట్టింది. ఇంఫాల్‌ జిల్లాకు చెందిన నాంగ్‌పోక్‌ కక్చింగ్‌ పచ్చని కొండల మధ్య పుట్టింది చాను బంగారుకొండ. ఆ కొండ ప్రాంతాల్లో పెద్ద కుటుంబం..వ్యవసాయమే ఆధారం..వంట చేసుకోవాంటే చుట్టుపక్కల నుండి పుల్లలు ఏరుకుని తెచ్చుకోవాల్సిందే.. ఆరుగురు సంతానంలో చివరిగా పుట్టింది చాను. అన్నయ్య సాయిఖోమ్‌ సనటోంబా మీతీ కూడా చాను కూడా వంటచెరకు కోసం చెట్లమ్మట పుట్లమ్మటా తిరిగి పుల్లలను సేకరించేంది. అలా పుల్లలను ఏరుకుని నెత్తిన పెట్టుకుని వచ్చే చాను బరువులెత్తి బంగారు పతకాన్ని సాధించేస్థాయికి చేరుకుంది. బహుశా అప్పుడు ఆ అన్న తన చెల్లెలు పెద్దయ్యాక దేశం గర్వించే వెయిట్‌ లిఫ్టర్‌ అవుతుందని ఊహించలేదు. కానీ ఎవ్వరూ ఊహించని స్థాయికి చేరుకుంది మీరాబాయి చాను.
వెయిట్‌లిఫ్టర్‌ కుంజరాణి దేవి స్ఫూర్తితో..
మీరాకు చిన్నప్పటి నుంచి వెయిట్‌లిఫ్టర్‌ కుంజరాణి దేవి అంటే ఎంతో అభిమానం, వల్లమాలిన ప్రేమ. వెయిట్‌లిఫ్టింగ్‌లో 50కి పైగా అంతర్జాతీయ పతకాలు సాధించి, 2006 కామన్వెల్త్‌ గేమ్స్‌లో బంగారు పతకాన్ని సాధించడంతో ఆమెను స్ఫూర్తిగా తీసుకుంది. మీరాబాయి తండ్రి పీడబ్ల్యూడి డిపార్ట్‌మెంట్‌లో టెంపరరీ ఉద్యోగిగా విధులు నిర్వహించేవారు. పెద్ద కుటుంబ కావటంతో వ్యవసాయం కూడా చేయాల్సిన పరిస్థితి. తండ్రికి పొలం పనుల్లో తనకు సాయం చేస్తున్న కూతురు మీరాబాయిలో ఒక వెయిట్‌లిఫ్టర్‌ ఉందని గుర్తించింది ఆయనే. తమ ఊరికి 25 కిలోమీటర్ల దూరంలో ఉన్న అంతర్జాతీయ వెయిట్‌లిఫ్టర్‌, ధ్యాన్‌చంద్‌ అవార్డు గ్రహీత అనితా చానును తన కూతురుకు శిక్షణ ఇవ్వాల్సిందిగా కోరాడు ఆ తండ్రి.

పది సంవత్సరాలు కఠోర శిక్షణ..
ఇంట్లోవాళ్లకు ఇష్టం లేకపోయినా మీరాబాయిని అనితా చాను ట్రైనింగ్‌ సెంటర్‌కు పంపారు. ఒకవైపు పొలంలో పనిచేస్తూనే 25 కిలోమీటర్లు వెళ్లి శిక్షణ పొందడం మొదలెట్టింది మీరాబాయి. కొన్ని రోజులకే మీరాలోని ప్రతిభను గుర్తించిన అనితా చాను ఆమెకు తన సెంటర్‌లోనే ఆశ్రయమిచ్చి, సుమారు పది సంవత్సరాలు కఠిన శిక్షణ ఇచ్చారు. ఆ శిక్షణ మీరాను వరల్డ్‌క్లాస్‌ వెయిట్‌లిఫ్టర్‌గా తీర్చిదిద్దింది.

అభిమాన క్రీడాకారిణి రికార్డును దాటేసిన చాను ..
నాలుగేళ్ల క్రితం అంటే 2014 గ్లాస్గోలో జరిగిన కామన్వెల్త్‌ గేమ్స్‌లో 48 కిలోల విభాగంలో కాంస్య పతకం సాధించి మీరాబాయి చాను తొలిసారిగా వెలుగులోకి వచ్చింది. ఆ తర్వాత పాటియాలాలో జరిగిన ‘రియో ఒలింపిక్స్‌ 2016’ ట్రయల్స్‌లో అప్పటిదాకా మహిళల జాతీయకోచ్‌ కుంజరాణి దేవి పేరిట ఉన్న రికార్డును తుడిపేసి సత్తాచాటింది.

అపజయం నుండి విజయం వైపు..
చానుపై పెరిగిన అంచనాలతో ఒలింపిక్స్‌లో ఒక పతకం గ్యారెంటీ అనుకున్నారంతా. అయితే రియో వేదికపై మీరాబాయి అడుగులు తడబడ్డాయి. ఒత్తిడికి గురైన చాను బరువులు ఎత్తడంలో విఫలమైంది. దీంతో విమర్శలు వెల్లువెత్తాయి. అనంతరం నిరాశ, నిస్పృహలకు లోనయ్యాను. నాపై, నా కోచ్‌పై సోషల్‌ మీడియాలో వచ్చిన కామెంట్స్‌ తీవ్రంగా వేధించటంతో ఒకస్థాయిలో ట్రైనింగ్ ఆపివేద్దామనే నిర్ణయానికి వచ్చేసింది. కానీ తనను తాను మానసకంగా బలపరుచుకుంది. ఆటలో గెలుపోటములు సహజమేనని ఇనుమడించిన ఉత్సాహంతో విపరీతంగా కష్టపడింది.

గోల్డ్‌కో్‌స్ట కామన్వెల్త్‌ లో తొలి గోల్డ్ మెడల్..
గత ఏడాది ‘వరల్డ్‌ వెయిట్‌లిఫ్టింగ్‌ ఛాంపియన్‌షిప్‌’లో బంగారు పతకాన్ని చేజిక్కించుకుని భవిష్యత్తుపై ఆశలు రేపిన మీరాబాయి చాను రాత్రింబవళ్లు కఠోర శ్రమతో గోల్డ్‌కో్‌స్టలో జరుగుతున్న కామన్వెల్త్‌ గేమ్స్‌లో మన దేశానికి తొలి బంగారు పతకాన్ని సాధించింది. అంతేకాదు... వెయిట్‌లిఫ్టింగ్‌లో మూడు రికార్డులను కూడా బ్రేక్‌ చేసింది.

చాను గ్రామంలో పండుగవాతావరణం..
కామన్వెల్త్‌ గేమ్స్‌లో మీరాబాయి చాను బంగారుపతకం సాధించిందని తెలియగానే ఆమె గ్రామస్థులు పండగ చేసుకున్నారు. ‘థాబల్‌ ఛోంగ్బా’ అనే సాంప్రదాయ నృత్యం చేస్తూ తమ ఆనందాన్ని వ్యక్తం చేశారు. ఈశాన్య కొండ ప్రాంతాల నుంచి భవిష్యత్తులో చాలామంది క్రీడాకారులు మెరుస్తారని వారు ధీమా వ్యక్తం చేస్తున్నారు. వెయిట్‌లిఫ్టింగ్‌లో శుక్రవారం (6న) నదేశానికి మరో బంగారు పతకాన్ని అందించిన సంజితా చాను కూడా మీరాబాయి చానుకు స్నేహితురాలు కావడం మరో విశేషం. 

16:26 - April 5, 2018

ఢిల్లీ : 21వ కామన్వెల్త్‌ గేమ్స్‌లో మీరాబాయ్‌ చాను సత్తా చాటింది. మహిళల 48 కేజీల విభాగంలో గోల్డ్‌ మెడల్‌ సాధించింది చాను. గతేడాది ప్రపంచ ఛాంపియన్‌షిప్‌లో స్వర్ణ పతాకాన్ని కైవసం చేసుకున్న తొలి భారతీయురాలిగా నిలిచిన చాను ప్రస్తుత కామన్వెల్త్‌ గేమ్స్‌లో భారత్‌కు తొలి పసిడి తీసుకువచ్చింది.  మొత్తం 196 కేజీలు ఎత్తిన చాను కామన్వెల్త్‌ గేమ్స్‌లో సరికొత్త రికార్డు సృష్టించింది. 

 

Don't Miss

Subscribe to RSS - CWG 2018