election commission

21:42 - December 6, 2018

హైదరాబాద్: ఎన్నికల వేళ ఎలక్షన్ కమిషన్ కొరడా ఝళిపించింది. ఎన్నికల కోడ్ ఉల్లంఘించిన నాయకులు, అభ్యర్థులపై కేసులు నమోదు చేసింది. కొడంగల్ కాంగ్రెస్ అభ్యర్థి రేవంత్ రెడ్డి, టీడీపీ నేత జూపూడి ప్రభాకర్, శేరిలింగంపల్లి టీడీపీ అభ్యర్థి భవ్య ఆనంద్ ప్రసాద్, సంగారెడ్డి కాంగ్రెస్ అభ్యర్థి జగ్గారెడ్డి, మేడ్చల్ టీఆర్ఎస్ అభ్యర్థి మల్లారెడ్డి, కంటోన్మెంట్ కాంగ్రెస్ అభ్యర్థి సర్వే సత్యనారాయణలపై సెక్షన్ 171(ఈ) కింద కేసులు నమోదు చేశారు. నామినేషన్ల ప్రక్రియ మొదలు ఇప్పటివరకు 7వేల 852 కేసులు నమోదు చేసినట్టు ఈసీ తెలిపింది. ఇక పోలింగ్‌కు అన్ని ఏర్పాట్లు పూర్తి చేసింది. కట్టుదిట్టమైన చర్యలు తీసుకుంది. ప్రతి ఒక్కరు ఓటు హక్కు వినియోగించుకోవాలని ఈసీ పిలుపునిచ్చింది.

 

12:21 - December 5, 2018

హైదరాబాద్ : తెలంగాణ రాష్ట్రంలో ఎన్నికల విషయంలో ఎలక్షన్ కమిషన్ వినూత్నమైన ఏర్పాట్లకు శ్రీకారం చుట్టింది. పోలింగ్ ప్రశాంతంగా జరిపేందుకు..ఓటర్లు సౌకర్యవంతంగా ఓట్లు వేసేందుకు ఈసీ చక్కటి ఏర్పాట్లను చేస్తోంది.  వినూత్నంగా ఆలోచించింది. ఓట్లు వేసేందుకు వచ్చే ఓటర్లు బ్రీతింగ్ ఎనరైజర్  టెస్ట్ (డ్రంక్ అండ్ డ్రై) చేయాల్సి నిర్వహించాలని నిర్ణయించింది. ఏంటి డ్రంక్ అండ్ డ్రైవ్ లలో ఉపయోగించే బ్రీత్ ఎనరైజర్స్ ను పోలింగ్ బూత్ లలో వినియోగించటం ఏంటా అనుకుంటున్నారా? అదే తెలంగాణ ఎన్నికల కమిషన్ సరికొత్త ఐడియా.
తాగుబోతులకు ఈసీ చెక్..
పోలింగ్ జరిగే సమయంలో తాగుబోతుల హల్ చల్ చేయటం సాధారణం. తాగుబోతులకు చెక్ పెట్టేందుకు..వారిని పోలింగ్ బూత్ నుంచి దూరంగా ఉంచేందుకు బ్రీతింగ్ ఎనరైజర్స్ ను అందుబాటులోకి తీసుకొస్తోంది. ఓటర్లు మద్యం తాగి ఓటు వేయకుండా చేసేందుకు ఎన్నికల కమిషన్ తీసుకున్న నిర్ణయం ఇది. ఎన్నికల బూత్ లోను దీనికి సంబంధించిన పోలీసు అధికారులను నియమించనుంది ఈసీ. దీనికి సంబంధించి పూర్తిస్థాయి అధికారాలు లేనందున కేంద్ర ఎన్నికల కమిషన్ కు తెలంగాణ ఎన్కికల కమిషన్ ఈ మేరకు ఓ ప్రతిపాదన పంపించింది. దీనికి సంబంధించిన అధికారిక ఆమోదం వచ్చినట్లుగా ఉన్నతాధికారులు వెల్లడించారు. మద్యం తాగి ఓటు వేయటానికి వచ్చి పట్టుబడినా.. ఓటు వేసేందుకు వచ్చి ఘర్షణలకు పాల్పడినా కేసులు నమోదు చేస్తారు. ఈ ఎన్నికల సీజన్ లో పోలీసులు ఇప్పటికే రూ. 9.62 కోట్లు విలువైన 4 కోట్ల 79వేల 868 లీటర్ల మద్యం, 94.17 కోట్ల రూపాయలు, బంగారం, వెండి, గంజ, గుట్కా, పొగాకు వంటి ఇతర పదార్ధాలను స్వాధీనం చేసుకున్నారు. బాటిల్ తీసుకుని ఓటు వేస్తాం అంటే ఇక కుదరదు. కిక్కులో మీట నొక్కటం కూడా వీలుకాదు. బీ కేర్ ఫుల్ ఓటర్లు...

07:58 - December 5, 2018

హైదరాబాద్ : తెలంగాణ రాష్ట్రంలో ఎన్నికల ప్రచారం డిసెంబర్ 5వ తేదీన ముగియనుంది. నియోజకవర్గాల్లో మైకులు మూగబోతుండగా ప్రచార రథాలు షెడ్లకు పరిమితం కానున్నాయి. కొన్ని నియోజకవర్గాల్లో సాయంత్రం 4గంటలకు ప్రచారం ముగియనుండగా మరికొన్ని నియోజకవర్గాల్లో సాయంత్రం 5గంటలకు ప్రచారానికి ఎండ్ కార్డు పడనుంది. ఈ నేపథ్యంలో ఈసీ పలు నిబంధనలు విధించింది. రాజకీయ పార్టీలు విధించిన సమయంలోగా ప్రచారం ముగించాలని పేర్కొంది. డిసెంబర్ 7 ఎన్నికలు ముగిసేవరకూ ఇది వర్తిస్తుందని..ఈ రోజుల్లో బహిరంగ సభలు..ప్రసంగాలూ చెయ్యకూడదని పేర్కొంది. అంతేగాకుండా ఊరేగింపులు..సినిమాలు..టీవీలు..ఇతర మార్గాల్లో ప్రచారం చేయకూడదని ఆదేశించింది. పోలింగ్ జరిగే చోట రాజకీయాలు పార్టీలు కార్యక్రమాలు..వేదికలు ఏర్పాటు చేయవద్దని ఆదేశించింది. ఓటర్లకు ప్రలోభాలకు గురి చేయవద్దని..డబ్బు, బహుమతులు ఇవ్వడం నేరమని పేర్కొన్న ఈసీ నియోజకవర్గంతో సంబంధం లేనివాళ్లు ఆ నియోజకవర్గంలో ఉండకూడదన్నారు. నిబంధనలను ఉల్లంఘిస్తే వారికి రెండేళ్ల జైలు శిక్షతోపాటూ జరిమానా విధించే అవకాశం ఉందని తెలిపింది. మరి ఈ నిబంధనలు...రాజకీయ పార్టీలు..పాటిస్తాయో లేదో చూడాలి. 

10:25 - December 4, 2018

హైదరాబాద్ : కాంగ్రెస్ ఫైర్ బ్రాండ్ రేవంత్ రెడ్డి మరోసారి అరెస్ట్ అయ్యారు. డిసెంబర్ 3వ తేదీ తెలంగాణ కాంగ్రెస్ వర్కింగ్ ప్రెసిడెంట్ రేవంత్ రెడ్డిని ఈ తెల్లవారుజామున బలవంతంగా అరెస్ట్ చేయడం కొడంగల్ ప్రాంతంలో తీవ్ర కలకలం రేపింది. ఏసీబీ దాడులు సమయంలోను..గతంలో నోటుకు నోటు కేసులోను  రేవంత్ అరెస్ట్ కాగా ఇప్పుడు తాజాగా కేసీఆర్ సభను అడ్డుకుంటామనీ..నేడు కోస్గిలో ఆపద్ధర్మ సీఎం కేసీఆర్ సభను అడ్డుకుంటామని, సభను జరగనివ్వబోమని రేవంత్ రెడ్డి హెచ్చరించిన నేపథ్యంలో, ఎన్నికల కమిషన్ ఆదేశాల మేరకు ఆయన్ను అరెస్ట్ చేయాల్సి వచ్చిందని పోలీసు అధికారులు స్పష్టం చేశారు. కోస్గిలో కేసీఆర్ సభను  పోలీసులు భారీ ఎత్తున బందోబస్తును ఏర్పాటు చేశారు. ఈ నేపథ్యంలో రేవంత్ రెడ్డి చేసిన వ్యాఖ్యల నేపథ్యంలో రేవంత్ తో పాటు ఆయన సోదరుడు కొండల్ రెడ్డిని, ఇతర ప్రధాన అనుచరులను ఎన్నికల కమిషన్ ఆదేశాల మేరకు  అరెస్ట్ చేశామని పోలీసులు తెలిపారు. నియోజకవర్గంలో ఎటువంటి అవాంఛనీయ ఘటనలు జరుగకుండా చూసేందుకే ఆయన్ను అరెస్ట్ చేయాల్సి వచ్చిందని పోలీసులు వివరణ ఇచ్చారు. 
 

11:04 - December 3, 2018

హైదరాబాద్: ఇప్పటి యూత్‌కు సెల్ఫీల పిచ్చి బాగా ఉంది. మూడ్ వస్తే చాలు సెల్ఫీలు దిగేస్తున్నారు. ప్లేస్ ఏదైనా, సందర్భం మరేదైనా అస్సలు పట్టించుకోవడం లేదు. సెల్ఫీలు దిగడం ఫేస్‌బుక్, ట్విట్టర్‌లో పెట్టడం.. వాటికొచ్చే లైకులు, కామెంట్లు చూసుకుని మురిసిపోవడం. ఈ క్రమంలో సెల్ఫీలకు బాగా అడిక్ట్ అయిపోయారు. కొన్ని సందర్భాల్లో ప్రాణాలు సైతం కోల్పోతున్నారు.
ఏం చేసినా అనేవాళ్లు లేరు కదా అని డిసెంబర్ 7న అసెంబ్లీ ఎన్నికల పోలింగ్‌ కేంద్రంలో ఓటేస్తూ సెల్పీ దిగితే మాత్రం కఠిన చర్యలు తప్పవు. ఈ మేరకు ఎన్నికల సంఘం హెచ్చరించింది. పోలింగ్ కేంద్రాల్లో సెల్ఫీ దిగితే.. ఆ ఓటును రద్దు చేస్తారు.
పక్కన పడేస్తారు:
ఇలా పోలింగ్ కేంద్రంలో సెల్ఫీ దిగడం 49ఎం(ఓటు రహస్యం) అనే నియమాన్ని ఉల్లంఘించడమే అని ఎన్నికల అధికారులు తెలిపారు. ఆ ఓటును 17–ఏలో నమోదు చేస్తారు. అంటే లెక్కింపు సమయంలో ఆ ఓటును పరిగణలోకి తీసుకోరు. సో.. సెల్ఫీ పిచ్చోళ్లు పోలింగ్ కేంద్రాల దగ్గర కాస్త జాగ్రత్తగా వ్యవహరిస్తే మంచిది.. ఆ తర్వాత చింతించినా లాభం ఉండదు.
ప్రతి ఓటరు.. తప్పకుండా తెలుసుకోవాల్సిన నిబంధనలు:
* నిబంధనల ప్రకారం పోలింగ్‌ సమయంలో ఓటు వేయడానికి వచ్చిన వారు ఓటు వేస్తూ సెల్ఫీలు దిగడం నిషిద్ధం.
* ఓటును ఇతరులకు చూపిస్తే రూల్‌ 49ఎం (ఓటు రహస్యం) బహిర్గతం నియమం మేరకు అతడిని బయటకు పంపేస్తారు.
* ఫలానా వారికి ఓటు వేస్తాను, వేశాను అని బూత్‌లో చెప్పడం కూడా నేరమే. వారిని ఓటు వేయనీయరు.
* దివ్యాంగులు ఓటు వేయడానికి సహాయకుడిగా ఒకరిని అనుమతిస్తారు.
* అదే వ్యక్తిని మరో వైకల్యం గల ఓటరు వెంట సహాయకుడిగా అనుమతించరు.
* పోలింగ్‌ సిబ్బంది సహాయకులుగా ఓటు వేయడానికి వీలులేదు.
* ఓటు వేయడం ఆలస్యం అయినా, వెళ్లిన ఓటరు యూనిట్‌పై కాగితాలు, టేప్‌లు అతికిస్తున్నట్లు డౌట్ వచ్చినా పోలింగ్‌ ఏజెంట్లు ప్రిసైడింగ్‌ అధికారి దృష్టికి తీసుకెళ్లి ఓటింగ్‌ గది వరకు వెళ్లొచ్చు.
* అధికారి మాత్రమే అక్కడ ఏమీ జరగలేదని ఏజెంట్ల సమక్షంలో నిర్దారిస్తారు.
* ఓటువేయడం తెలియదని నిస్సహాయతను వ్యక్తం చేసిన ఓటరుకు పోలింగ్‌ అధికారి నమూనా ద్వారా ఏజెంట్ల సమక్షంలో ఓటు వేసే విధానంపై డమ్మీ గుర్తులపై వివరిస్తారు.

15:13 - November 30, 2018
తెలంగాణ ఎన్నికలు 2018 ఫలితాలపై మాజీ ఎంపీ లగడపాటి రాజగోపాల్ చేసిన ప్రకటన కలకలం రేపుతోంది. ఇండిపెండెంట్, రెబెల్ అభ్యర్థులు 8-10 నియోజకవర్గాల్లో గెలవబోతున్నట్లు చెప్పి పార్టీల అభ్యర్థుల్లో ముచ్చెమటలు పట్టిస్తున్నారు. ఎన్నికల కోడ్ అమల్లోకి వచ్చిన తర్వాత నుంచి పోలింగ్ ముగిసే డిసెంబర్ 7వ తేదీ సాయంత్రం వరకు ఎలాంటి సర్వే ఫలితాలను ప్రకటించకూడదనే నిబంధన ఉంది. ఈ మేరకు ఈసీ స్పష్టమైన ఆదేశాలు కూడా ఇచ్చింది. మరి లగడపాటి ఎలా చెబుతారు అనేది పాయింట్ అయ్యింది.
లగడపాటి ఎలా చెబుతారు.. రూల్స్ బ్రేక్ చేయటం కాదా?
తెలుగు రాష్ట్రాల్లో లగడపాటి పొలిటికల్ సర్వేలపై కొందరికి గురి ఉంది. కచ్చితమైన రిజల్ట్ వస్తుందనే అభిప్రాయం కూడా ఉంది. ఇందు వల్లనే చాలా పార్టీలు సర్వే ఫలితాల కోసం ఆయన్ను ఆరా తీస్తుంటాయి. ఈసారి ఆయన పేరుతో బోలెడు వార్తలు వచ్చినా.. వాటిని స్వయంగా కొట్టిపారేశారు. నా నోటితో చెప్పిందే నిజం అని స్పష్టం చేశారు. డిసెంబర్ 7వ తేదీ సాయంత్రం మాత్రమే ఏ పార్టీ గెలుస్తుంది అనేది వెల్లడిస్తాను అన్న ఆయన.. ఎవరూ ఊహించని విధంగా ఇద్దరి గెలుపును ప్రకటించేశారు. నారాయణపేట, బోధ్ నియోజకవర్గాల్లో ఇండిపెండెంట్స్ గెలుస్తారని ప్రకటించటమే కాకుండా.. మరో 8 నియోజకవర్గాల్లో గెలవబోతున్న స్వతంత్రుల వివరాలు వెల్లడిస్తాను అని చెప్పటం సంచలనం అయ్యింది. 
లగడపాటి సర్వే ఫలితాలు ఎన్నికల సంఘం పరిధిలోకి వస్తాయా.. రావా అనే అందరిలో చర్చనీయాంశం అయ్యింది. పోలింగ్ కు వారం ముందు సర్వే ఫలితాలను ఎలా వెల్లడిస్తారని ప్రధాన పార్టీల అభ్యర్థులు అభ్యంతరం వ్యక్తం చేస్తున్నారు. లగడపాటి సర్వేలు ఓటర్లపై ప్రభావం చూపిస్తాయని.. ఇది ఎన్నికల సంఘం నిబంధనలకు విరుద్ధం అని ఆయా నియోజకవర్గాల ప్రధాన పార్టీ అభ్యర్థులు అంటున్నారు. మిగతా అభ్యర్థుల వివరాలు వెల్లడించకుండా ఈసీ చర్యలు తీసుకోవాలని డిమాండ్ చేస్తున్నాయి పార్టీలు. ప్రధాన పార్టీల అభ్యర్థులు కాదు అని లగడపాటి ఎలా సమర్ధించుకుంటారని కూడా ప్రశ్నిస్తున్నాయి పార్టీలు. ఆయా నియోజకవర్గాల్లో ఫలానా అభ్యర్థి గెలుస్తున్నాడు అని పేర్లతో సహా ప్రకటించటం అంటే.. ఎన్నికల నిబంధనలకు విరుద్ధం అని ప్రధాన పార్టీలు అంటున్నాయి. లగడపాటి సర్వే ఫలితాల ప్రకటను వెంటనే అడ్డుకోవాలని ఈసీని కోరనున్నట్లు సమాచారం.
15:27 - November 25, 2018

హైదరాబాద్ : తెలంగాణ ఎన్నికల్లో, దివ్యాంగుల కోసం ప్రత్యేక ఏర్పాటు చేస్తోంది ఎన్నికల సంఘం. దేశంలోనే తొలిసారిగా దివ్యాంగుల కోసం ర్యాంప్‌ను అమర్చిన వాహనాలను సిద్ధం చేస్తోంది. దివ్యాంగులతో పాటు, గర్భిణులను కూడా ఈ వాహనాల్లో పోలింగ్ కేంద్రాలకు తరలించేందుకు ఎన్నికల సంఘం కసరత్తు చేస్తోంది. ప్రతి వెయ్యి పోలింగ్ కేంద్రాలకు ఒకటి చొప్పున ర్యాంప్ అమర్చిన వాహనాలను అందుబాటులో ఉంచనున్నారు. ఈ వాహన సేవలను వృద్ధులకూ అందించే ఆలోచనలో ఈసీ ఉంది. ఈ సేవను పొందాలంటే, ఆండ్రాయిడ్ ఆధారిత జీహెచ్ఎంసీ వాడా (GHMC VAADA) యాప్‌ని డౌన్‌లోడ్ చేసుకోవాలని అధికారులు సూచిస్తున్నారు. యాప్ ద్వారా రెక్వెస్ట్ పంపగానే, అధికారులు దగ్గరలోని పోలింగ్ కేంద్రం లొకేషన్‌ని మ్యాప్ చేసి.. వాహనాన్ని పంపుతారు. ఈ సర్వీసుల కోసం జీహెచ్ఎంసీ తన సిబ్బందిని వినియోగించనుంది. ప్రస్తుతం, జంటనగరాల పరిధిలో 18వేల మంది దివ్యాంగులున్నట్లు అంచనా. 

11:26 - November 25, 2018

హైదరాబాద్: డిసెంబర్ 7న జరిగే తెలంగాణ అసెంబ్లీ ఎన్నికలకు నామినేషన్ల ఉపసంహరణ గడువు 23 వతేదీతో ముగియటంతో శనివారం నాటికి 1,821 మంది అభ్యర్ధులు బరిలో తమ అదృష్టాన్ని పరీక్షించుకోనున్నారు.మొత్తం 119 నియోజక వర్గాల్లో టీఆర్ఎస్, ప్రజాకూటమి, బీజేపీ, ఇతర పార్టీలకు చెందిన అభ్యర్ధులు, స్వతంత్ర అభ్యర్ధులు తమతమ నియోజకవర్గాల్లో ఇప్పటికే ప్రచార కార్యక్రమాల్లో నిమగ్నమయ్యారు. మేడ్చల్ మల్కాజ్ గిరి జిల్లాలోని మల్కాజ్ గిరి నియోజకవర్గం నుంచి అత్యధిక సంఖ్యలో 42 మంది అభ్యర్ధులు పోటీలో ఉండగా, బోధ్, జుక్కల్,నర్సాపూర్ నియోజకవర్గాల్లో 7 మంది అభ్యర్ధులు పోటీలో ఉన్నారు. 
ఈవీఎంల విషయానికి వస్తే .........
ప్రస్తుతం ఉపయోగిస్తున్న ఓటింగ్ యంత్రాలలో నోటాతో కలిపి 16 మంది అభ్యర్ధుల పేర్లు మాత్రం ఒక ఈవీఎంలో చోటు కల్పించడానికి అవకాశం ఉంటుంది. 32 కంటే ఎక్కువమంది అభ్యర్ధులు ఉన్న చోట 3 ఈవీఎంలు ఒక బ్యాలెట్ యూనిట్ గాను,16 కంటే ఎక్కువ ఉన్న చోట 2ఈవీఎంలు ఒక బ్యాలెట్ యూనిట్ గా వాడేలా ఎన్నికల సంఘం ఏర్పాట్లు చేస్తోంది. మల్కాజ్ గిరి  42,ఉప్పల్ లో 35, ఎల్బీనగర్ నుంచి 35, ఖైరతాబాద్ నుంచి32 మంది అభ్యర్ధులు  బరిలో ఉండటంతో ఇక్కడ 3 ఈవిఎంలు  ఒక బ్యాలెట్ గా ఏర్పాట్లు చేస్తున్నారు. 


రెండు ఈవీఎంలతో పోలింగ్ నిర్వహించే  నియోజకవర్గాలు
>అంబర్ పేట 31 మంది అభ్యర్ధులు
>శేరిలింగంపల్లి,మిర్యాలగూడ 29 మంది 
>రాజేంద్రనగర్,ముషీరాబాద్ 26 మంది 
>కరీంనగర్,గోషామహల్,సూర్యాపేట 25 మంది 
>యాకుత్ పురా,నిజామాబాద్ అర్బన్,మంచిర్యాల, వరంగల్ వెస్ట్, వరంగల్ ఈస్ట్, 21మంది 
>కుత్బూల్లాపూర్,కూకట్ పల్లి,ఇబ్రహీం పట్నం,మలక్ పేట, నుంచి 20 మంది 
>కంటోన్మెంట్,నాంపల్లి  19మంది
>దుబ్బాక, జూబ్లీహిల్స్,కార్వాన్,పాలకుర్తి 18
>పెద్దపల్లి,మహేశ్వరం,నల్లగొండ,తుంగతుర్తి,కొత్తగూడెం, 17 మంది
>ములుగు, పినపాక,హుజూర్ నగర్,రామగుండం,పటాన్ చెరువు,చార్మినార్,నుంచి 16మంది పోటీ చేస్తున్నారు.

12:02 - November 23, 2018

హైదరాబాద్ : ఎన్నికల్లో ఓటు వేయటం ఎంత ముఖ్యమో..ఓటు వేసిన తరువాత ఓటరు చూపుడు వేలుకి ఎన్నికల అధికారులు ఇంక్ చుక్క గుర్తుగా పెట్టటం సర్వసాధారణం. మరి ఓటరుకు అనివార్య కారణాల వలన చూపుడు వేలు లేకుంటే? మరి అధికారులు ఇంక్ గుర్తను ఏ వేలుకు పెడతారు? అనే ప్రశ్నత తలెత్తకమానదు. ఎన్నికల్లో ఓటు వేసిన తరువాత, గుర్తుగా ఎడమచేతి చూపుడు వేలుకు సిరా గుర్తును అధికారులు పెడతారన్న సంగతి అందరికీ తెలిసిందే. ఈ ఇంక్ అంత త్వరగా చెరిగిపోదు. మరోమారు ఓటు వేయకుండా చూసేందుకే ఇటువంటి జాగ్రత్తలు చూసుకుంటారు అధికారులు. ఇక, ఒకవేళ ఎవరికైనా చూపుడు వేలు లేకుంటే ఏం చేస్తారో తెలుసా? అటువంటి పరిస్థితి వస్తే ఏం చేయాలన్న విషయమై ఈసీ కొన్ని నియమాలతో ఓ మార్గాన్ని నిర్దేశించింది. 

ఎవరికైనా చూపుడు వేలు లేకుంటే మధ్యవేలికి ఇంక్ మార్క్ వేయవచ్చు. మధ్యవేలు కూడా లేకుంటే ఉంగరపు వేలు, అది కూడా లేకపోతే చిటికెన వేలు... ఇలా బొటన వేలి వరకూ రావచ్చు. ఒక వేళ ఎడమ చెయ్యి మొత్తం లేకుంటే, కుడి చేతికి ఇదే నిబంధనలతో కూడిన క్రమాన్ని పాటించాల్సి వుంటుంది. రెండు చేతులకూ వేళ్లు లేకుంటే మధ్యభాగంపై, అసలు చేతులే లేకుంటే భుజాలపై, అవి కూడా లేకుంటే ఎడమ చెంపపై సిరా వేయాలని ఈసీ నిబంధనలు చెబుతున్నాయి.

11:28 - October 11, 2018

ఖమ్మం : తెలంగాణలో ముందస్తు ఎన్నికల నగారా మోగింది. ఈ క్రమంలో ఎన్నికల కమిషన్ పలు నిబంధలను తెలుపుతు ఆదేశాలు జారీ చేసింది. అసెంబ్లీ రద్దు అయినప్పటినుండి ఎన్నికల కోడ్ అమలులో వుందని తెలిపిన ఈసీ రాష్ట్రంలో పలు నిబంధనలను విధించింది. వీటిని ఉల్లంఘిస్తే కఠిన చర్యలు తీసుకుంటామని కూడా హెచ్చరించింది. ఈ నేపథ్యంలో ఉమ్మడి ఖమ్మం జిల్లాలో ఏడుగురిపై అనర్హత వేటు వేస్తున్నట్టు ఎన్నికల కమిషన్ ప్రకటించింది. వీరు ఎన్నికల్లో పోటీ చేసేందుకు వీల్లేదని స్పష్టం చేసింది. వీరిలో గత ఎన్నికల్లో ఖమ్మం నుంచి పోటీ చేసిన అక్కిరాల వెంకటేశ్వర్లు, పాలేరు నుంచి పోటీ చేసిన మోతె మల్లయ్య, వైరా నుంచి బరిలోకి దిగిన బచ్చల లక్ష్మయ్య ఉన్నారు. వీరితో పాటు ఇల్లెందుకు చెందిన గుగులోతు విజయ, మినపాకకు చెందిన కొమరారం సత్యనారాయణ, కొత్తగూడెంకు చెందిన పునుగోటి సంపత్ లు కూడా ఉన్నారు. వీరంతా 2020 వరకూ ఎన్నికల్లో పోటీ పడేందుకు అనర్హులని, ఎన్నికల నిబంధనల్లోని సెక్షన్ 10ఏ, 1951 ప్రకారం వీరు అనర్హులని తెలిపింది. కాగా దీనికి సంబంధి పూర్తి వివరాలు తెలియాల్సివుంది. 
 

Pages

Don't Miss

Subscribe to RSS - election commission