GST

17:33 - December 10, 2018

ఢిల్లీ: కేంద్ర ప్రభుత్వం, రిజర్వ్ బ్యాంక్ ఆఫ్ ఇండియా మధ్య యుద్ధం ముదిరింది. ఆర్బీఐ గవర్నర్‌ ఉర్జిత్ పటేల్ సంచలన నిర్ణయం తీసుకున్నారు. గవర్నర్ పదవికి ఆయన రాజీనామా చేసి షాక్ ఇచ్చారు. వ్యక్తిగత కారణాలతో తాను పదవికి రాజీనామా చేశానని పటేల్ చెప్పారు. ఆర్బీఐ గవర్నర్‌గా పని చేయడం గర్వంగా ఉందన్నారాయన. కొన్ని రోజులుగా కేంద్ర ప్రభుత్వంతో ఢీ అంటే ఢీ అంటున్న ఉర్జిత్ పటేల్ సడెన్‌గా రాజీనామా చేశారు. కొంతకాలంగా కేంద్రం, ఆర్బీఐ మధ్య వివాదం నడుస్తోంది. పలు అంశాల్లో కేంద్రం నిర్ణయాలతో ఉర్జిత్ పటేల్ తీవ్రంగా విభేదిస్తూ వస్తున్నారు. పెద్ద నోట్ల రద్దు, విజయ్ మాల్యా అంశం, బ్యాంకుల దివాళాకు సంబంధించి ఇరు వర్గాల మధ్య వివాదం నడుస్తోంది. రిజర్వ్ బ్యాంకు వద్ద ఉన్న నగదు నిల్వల్లో కొంత భాగం(దాదాపు 2లక్షల కోట్ల రూపాయలు) తమకు ఇవ్వాలని కేంద్ర ప్రభుత్వం ఒత్తిడి తీసుకొచ్చింది. అయితే ఈ ప్రతిపాదనను పటేల్‌తో పాటు కొందరు సీనియర్ ఆర్థికవేత్తలు వ్యతిరేకిస్తున్నారు. ఫండ్స్ ఇచ్చేది లేదని ఉర్జిత్ పటేల్ తేల్చి చెప్పారు. దీనిపై అనేకమార్లు ట్విట్టర్‌లో వివాదాస్పదమైన వ్యాఖ్యలు చేశారు. ఉర్జిత్ పటేల్ వ్యాఖ్యలను ప్రతిపక్షాలు సమర్థించాయి. కేంద్ర ప్రభుత్వం తీరుని ఆక్షేపించాయి.
నోట్ల రద్దు, జీఎస్టీలో కీలక పాత్ర:
కొన్ని నెలలుగా కేంద్రం-ఆర్బీఐ మధ్య కోల్డ్‌వార్ నడుస్తోంది. కేంద్ర ప్రభుత్వంతో ఉర్జిత్ పటేల్‌కు విభేదాలు ఉన్నాయి. నోట్ల రద్దు, జీఎస్టీ అమలులో ఉర్జిత పటేల్ కీలక పాత్ర పోషించారు. 2016 సెప్టెంబర్‌లో ఆర్బీఐ గవర్నర్‌గా ఉర్జిత్ పటేల్ బాధ్యతలు స్వీకరించారు. 2019 సెప్టెంబర్‌లో ఆయన పదవీకాలం ముగియనుంది. సార్వత్రిక ఎన్నికలకు సమయం సమీపిస్తున్న వేళ.. ఉర్జిత్ పటేల్ రాజీనామా చేయడం రాజకీయవర్గాల్లో చర్చనీయాంశంగా మారింది. ఇది బీజేపీకి ఇబ్బంది కలిగించే పరిణామం అని విశ్లేషకులు అంటున్నారు.

14:21 - December 6, 2018

ఢిల్లీ : పెట్రోల్ ధరలకు, దేశంలో జరుగుతున్న ఎన్నికలకు సంబంధమేంటి? దేశంలోని ఏ రాష్ట్రంలోనైనా ఎన్నికలు జరగిన సమయంలో పెట్రోల్, డీజిల్ రేట్లు ఎందుకు తగ్గుతాయి? ఎన్నికలు ముగిసాక మళ్లీ ధరలు ఎందుకు పెరుగుతాయి? అసలు పోల్స్ కు పెట్రల్ ధరలకు సంబంధం ఏమిటి? అనే ప్రశ్న వస్తుంది కదూ?..మరి ఆ కారణాలేమిటో తెలుసుకుందాం..
తెలంగాణ సహా ఐదు రాష్ట్రాల ఎన్నికల ప్రకటనకు ముందు  పెట్రోల్ ధరలు ఆకాశాన్నంటాయి. దీంతో నిరసనలు వెల్లువెత్తాయి. ఎన్నికల కోడ్ అమలులోకి వచ్చినాటి నుండి పెట్రోల్, డీజిల్ ధరలు రోజుకో విధంగా తగ్గుముఖం పడతున్నాయి. గతంతో కర్ణాటక ఎన్నికల సందర్బంలో కూడా పెట్రోల్, డీజిల్ ధరలు తగ్గటం గమనార్హం. అసలు పోల్స్ కు పెట్రోల్ ధరలకు సంబంధం ఏమిటి? 
గత రెండు నెలలుగా అంటే అక్టోబర్, నవంబర్ నెలల నుండి పెట్రోల్, డీజిల్ ధరలు తగ్గుతు వచ్చాయి. అంతర్జాతీయంగా చమురు ధరలు తగ్గుముఖం పట్టాయి. దీంతో క్రూడ్ ఆయిల్ ధరలు 30 శాతం తగ్గాయి. దీంతో చమురు ఉత్పత్తిని తగ్గించే దిశగా ఒపెక్ దేశాలు యోచిస్తున్నాయి. ఇప్పటికే అమెరికా, రష్యా, సౌదీల చమురు ఉత్పత్తి ఆల్ టైం హైకి చేరింది. ఒకవేళ ఒపెక్ దేశాలు ఉత్పత్తిని తగ్గిస్తే దాని ప్రభావం ధరలపై పడనుంది. 
గత కొద్ది రోజులుగా తగ్గుతూ వస్తోన్న పెట్రోల్ ధరలు ఐదు రాష్ట్రాల ఎన్నికల అనంతరం మళ్లీ పెరగనున్నాయా? పెట్రో ఉత్పత్తుల ధరలకు, ఎన్నికలకు అవినాభావ సంబంధం ఉందని భావించొచ్చు. ఇటీవల జరిగిన పరిణామాలను పరిశీలిస్తే.. కర్ణాటక ఎన్నికల ముందు 20 రోజులపాటు పెట్రోల్ ధరలు పెరగలేదు. మే 12న ఎన్నికలు ముగిశాక 17 రోజుల తేడాలోనే పెట్రోల్ ధర సుమారు నాలుగు రూపాయల మేర పెరిగింది. గత ఏడాది జనవరి 16 నుంచి ఏప్రిల్ 1 మధ్య పెట్రోల్ ధరలు పెరగకపోయినా స్థిరంగా ఉన్నాయి. అప్పట్లో పంజాబ్, గోవా, ఉత్తరాఖండ్, యూపీ, మణిపూర్ రాష్ట్రాలకు ఎన్నికలు జరిగాయి. దీన్ని బట్టి ఎన్నికల ముందు పెట్రోల్ ధరలు తగ్గడం, తర్వాత పెరగడం అనేది ఓ ట్రెండ్‌గా మారిందని అర్థం అవుతోంది. 
ఇటీవల క్రూడ్ ఆయిల్ ధరలు 30 శాతం తగ్గాయి. దీంతో చమురు ఉత్పత్తిని తగ్గించే దిశగా ఒపెక్ దేశాలు యోచిస్తున్నాయి. ఇప్పటికే అమెరికా, రష్యా, సౌదీల చమురు ఉత్పత్తి ఆల్ టైం హైకి చేరింది. ఒకవేళ ఒపెక్ దేశాలు ఉత్పత్తిని తగ్గిస్తే దాని ప్రభావం ధరలపై పడనుంది. 
ఇటీవల ప్రభుత్వ ఆర్థిక పరిస్థితి ప్రోత్సాహకరంగా లేనందున నవంబర్‌లో జీఎస్టీ వసూళ్లు అనుకున్నంతగా వసూలు కాక రూ.50 వేల కోట్లు తగ్గుతాయని అంచనా. పెట్టుబడుల ఉపసంహరణ ద్వారా ఖజానాను నింపుకోవాలనుకున్న కేంద్ర సర్కారు..లక్ష్యాన్ని చేరుకోలేకపోయింది. దీంతో కేంద్రానికి పెట్రోల్ ఉత్పత్తులపై పన్నుల ద్వారా వచ్చే ఆదాయం కీలకం కానుంది.
 

11:32 - December 3, 2018

ఢిల్లీ : వస్తు..సేవల పన్ను..(గూడ్స్ అండ్ సర్వీసెస్ టాక్స్) నవంబర్ మాసానికి రూ. 97, 637 కోట్ల రూపాయల రెవెన్యూ వచ్చింది. సెంట్రల్ గూడ్స్ అండ్ సర్వీసెస్ (సీజీఎస్టీ) కింద రూ. 16, 812 కోట్లు వచ్చాయి. స్టేట్ గూడ్స్ అండ్ సర్వీసెస్ ట్యాక్స్ (ఎస్జీఎస్టీ) కింద రూ. 23, 070..ఇంటిగ్రేటెడ్ గూడ్స్ అండ్ సర్వీసెస్ (ఐజీఎస్టీ) కింద రూ. 49, 726...జీఎస్టీఆర్ 3బీ రిటర్న్ (అక్టోబర్ - మొత్తం 30వ నవంబర్) 69.6 లక్షలు అని కేంద్ర ఆర్థిక మంత్రిత్వ శాఖ పేర్కొంది. సీజీఎస్టీ కింద రూ.18,262 కోట్లు...ఎస్‌జీఎస్టీ కింద రూ.15,704 కోట్ల చెల్లింపులు చేసినట్లు కేంద్రం పేర్కొంది. 
అక్టోబర్ మాసంలో కేంద్ర, రాష్ట్ర ప్రభుత్వాలకు సీజీఎస్టీ కింద రూ.35,073 కోట్లు...ఎస్‌జీఎస్టీ కింద రూ.38,774 కోట్ల ఆదాయం వచ్చిందని తెలిపింది. ఆగస్టు-సెప్టెంబర్ నెలకుగాను రాష్ర్టాలకు పరిహారం కింద రూ.11,922 కోట్ల నిధులు విడుదల చేసింది 
> ఏప్రిల్‌లో రూ.1.03 లక్షల కోట్లు...
మేలో రూ.94,016 కోట్లు...
జూన్‌లో రూ.95,610 కోట్లు...
జూలైలో రూ.96,483 కోట్లు...
ఆగస్టులో రూ.93,960 కోట్లు...
సెప్టెంబర్‌లో రూ.94,442 కోట్లు...
అక్టోబర్‌లో రూ.1,00,710 కోట్లు...

2016 సెప్టెంబ‌రు 8నుంచి 101 వ రాజ్యాంగ స‌వ‌ర‌ణ ద్వారా జీఎస్టీ చ‌ట్ట‌రూపం దాల్చిన సంగతి తెలిసిందే. 

20:33 - November 26, 2018

హైదరాబాద్: సుదీర్ఘ కసరత్తు, చర్చోప చర్చల తర్వాత ఎట్టకేలకు ప్రజాకూటమి(పీపుల్స్ ఫ్రంట్) నేతలు ఉమ్మడి పాక్షిక పీపుల్స్ మేనిఫెస్టోను విడుదల చేశారు. మహాకూటమికి ప్రజాకూటమిగా నామకరణం చేసి మేనిఫెస్టోను రిలీజ్ చేశారు. యువత, రైతులు, వృద్ధులు, ఉద్యోగులు, బడుగు, బలహీన వర్గాలను ఆకర్షించే విధంగా మేనిఫెస్టో రూపొందించారు. కేసీఆర్ రైతు బంధు పథకానికి ధీటుగా రైతులకు మరిన్ని రాయితీలు ఇచ్చారు. అంతేకాదు ఏ పార్టీ ప్రకటించని విధంగా పెట్రో ఉత్పత్తులను జీఎస్టీ పరిధిలోకి తెస్తామనడం కూటమి మేనిఫెస్టోలో హైలైట్ వాగ్దానం.

హైదరాబాద్ గోల్కొండ హోటల్‌లో టీజేఎస్ నేత కోదండరామ్ మేనిఫెస్టో విడుదల చేశారు. రైతులకు వడ్డీ లేని రుణాలు, ఏకకాలంలో రెండు లక్షల వరకు రుణ మాఫీ, తొలి ఏడాదిలో లక్ష ఉద్యోగాలు భర్తీ, వికలాంగులకు రూ.3వేల పెన్షన్ ఇస్తామని మేనిఫెస్టోలో పేర్కొన్నారు. కనీస ఉమ్మడి కార్యాచరణ కింద మేనిఫెస్టోను విడుదల చేసిన కూటమి నేతలు.. వీటి అమలు కమిటీకి ఛైర్మన్‌గా కోదండరామ్‌ను నియమించారు. సభ్యులుగా నాలుగు పార్టీల నేతలు ఉంటారు. ఉద్యమ ఆకాంక్షలు నెరవేరే విధంగా...నిరంకుశ పాలన అంతమయ్యే విధంగా పది రంగాలపై మేనిఫెస్టోను రూపొందించామని కోదండరామ్ తెలిపారు.

రైతులకు:
* వడ్డీ లేని రుణాలు
* ఏకకాలంలో రూ.2లక్షల వరకు రుణమాఫీ
* మద్దతు ధర
* రూ.10వేల కోట్లతో నిధి
* పెట్టుబడి సాయంగా ఎకరాకు మూడు వేలు

నిరుద్యోగులు, యువతకు:
* ప్రతి ఏటా ఉద్యోగ క్యాలెండర్
* తొలి ఏడాది లక్ష ఉద్యోగాలు భర్తీ
* గ్రూప్స్, సివిల్స్‌ ఉచిత శిక్షణ కేంద్రాలు
* నిరుద్యోగులకు మూడు వేలు భృతి

విద్య:
* విద్యారంగానికి బడ్జెట్ పెంపు
* విద్య కార్పొరేటీకరణకు స్వస్తి
* ప్రైవేట్ స్కూల్స్‌లో ఫీజుల నియంత్రణ
* సకాలంలో ఫీజు రీయింబర్స్‌మెంటు

మౌలిక సదుపాయాలు:
* వంద యూనిట్లలోపు కరెంట్ వాడే వారికి ఉచితంగా కరెంట్
* టెలిస్కోపింగ్ బిల్ విధానం రద్దు
* పాత పద్ధతిలోనే బిల్లు వసూలు
* నిరుపేదలకు సొంత ఇల్లు

పారిశ్రామికవేత్తలకు:
* జీఎస్టీలోకి పెట్రో ఉత్పత్తులు
* పరిశ్రమల స్థాపనకు సత్వర అనుమతులు

* కర్ణాటక తరహాలో లోకాయక్త ఏర్పాటు
* పంచాయత్ రాజ్ వ్యవస్థ బలోపేతం
* ఉద్యమకారులపై కేసుల ఎత్తివేత
* తొలిదశ ఉద్యమకారులకు పెన్షన్‌
* ఎస్సీ, ఎస్టీ, బీసీ, మహిళలకు పాలనలో భాగస్వామ్యం
* 104, 108 సేవలు సక్రమంగా అందేలా కార్పొరేషన్ ఏర్పాటు

మహాకూటమి అధికారంలోకి వస్తే పెట్రో ఉత్పత్తులను జీఎస్టీ పరిధిలోకి తెస్తామని వాగ్దానం ఇవ్వడం ప్రత్యేకంగా చెప్పుకోవాలి. ఇది మహాకూటమికి ప్లస్ అయ్యే పాయింట్ అనే అభిప్రాయం వ్యక్తమవుతోంది. ఎందుకంటే పెట్రో ధరలను జీఎస్టీ పరిధిలోకి తేడానికి ఇప్పటి వరకూ ఏ రాష్ట్రమూ అంగీకరించలేదు. రాష్ట్ర ప్రభుత్వాలకు అధిక ఆదాయాన్ని సమకూర్చేది పెట్రోల్ ధరలే. అందుకే వాటి రేట్లను తగ్గించడానికి ఏ ప్రభుత్వమూ ఒప్పుకోదు. కానీ మహాకూటమి ఈ హామీ ఇవ్వడం విశేషం. కాగా ఈ మేనిఫెస్టో కేవలం ప్రజాప్రతిపాదికన విడుదల చేశామని.. అవసరాలకు తగ్గట్లు కొత్తగా అంశాలు చేరుతాయని కోదండరామ్ వెల్లడించారు. మొత్తంగా ప్రజాకూటమి మేనిఫెస్టోలో...అభివృద్ధి, సంక్షేమంతో పాటు వ్యవసాయ రంగానికి పెద్ద పీట వేశామని కూటమి నేతలు చెపుకొచ్చారు. మరి ఈ మేనిఫెస్టో ఓటర్లను ఏ మేరకు ఆకట్టుకుంటుందో, ఎంతవరకు ఓట్లు రాలుస్తుందో చూడాలి.

12:23 - November 5, 2018

హైదరాబాద్ : దీపావళి సీజన్ లో కళకళలాడుతుండే టపాకాయల విక్రయ దుకాణాలు వెలవెలబోతున్నాయి. సాధారణ ధరకు, జీఎస్టీ కూడా అధనం కావడంతో, ప్రతియేటా 10 నుంచి 12 శాతం మేరకు పెరిగే ధరలు, ఈ సంవత్సరం 20 శాతానికి పైగా పెరగడమే ఇందుకు కారణం. ఇదే సమయంలో సుప్రీంకోర్టు ఆంక్షలు కూడా ఉండటంతో వ్యాపారం తక్కువగా సాగుతోంది. ఈ సంవత్సరం ఎన్నడూ లేనంత అధిక ధరలకు టపాకాయలను విక్రయించాల్సి వస్తోందని వ్యాపారులే అంటున్నారు. లక్షల రూపాయలు పెట్టి, సరుకు తెచ్చుకున్నామని, వాటిని కొనుగోలు చేసే వారు కనిపించడం లేదని వాపోతున్నారు.
 

15:27 - October 27, 2018

ఢిల్లీ : దేశ రాజధాని వేదికగా ఏపీ సీఎం చంద్రబాబు నాయుడు బీజేపీ ప్రభుత్వంపై పోరు ఉధృతం చేశారు. శనివారం ఆయన ఢిల్లీకి చేరుకున్న అనంతరం మధ్యాహ్నం జాతీయ మీడియాతో మాట్లాడారు.  ఈ సందర్భంగా గత నాలుగున్నర సంవత్సరాల బీజేపీ పాలనలో ఎలాంటి పరిణామాలు సంభవించాయి ? ఆంధ్రప్రదేశ్ రాష్ట్రం పడుతున్న ఇబ్బందులను తెలియచేశారు. 
ప్రతి అకౌంట్‌లో రూ. 15 లక్షల నగదు వేస్తామని చెప్పారని మరి ఆ నగదు ఏమైందని ప్రశ్నించారు. దేశంలో ఏమి జరుగుతోంది ? ప్రదానంగా ఏపీలో ఏం జరుగుతోందనే దానిపై వెల్లడించానికి తాను ఢిల్లీకి రావడం జరిగిందన్నారు. బీజేపీ - ఎన్డీయే ఎన్నికలకు రాకముందు ప్రజాస్వామ్యం రక్షిస్తామని..దేశంలో ఉన్న రాష్ట్రాలను బలోపేతం చేస్తామని..అవినీతిని అంతమొందిస్తామని..దేశాన్ని అభివృద్ధి దిశగా పయనించే విధంగా చర్యలు తీసుకుంటామని...యువతకు ఉద్యోగ అవకాశాలు కల్పిస్తామని..ఇలా అనేక హామీలిచ్చిందని తెలిపారు. 
ఎన్నికలకు ముందు అచ్చే దిన్ అంటూ హామీలిచ్చిందని..ఆ మంచి రోజులు ఎప్పుడొస్తాయని సూటిగా ప్రశ్నిస్తున్నట్లు తెలిపారు. బ్లాక్ మనీ కోసం నోట్ల రద్దు చేస్తున్నామంటు పేర్కొన్నారని, కానీ బ్లాక్ మనీ ఎక్కడా అని ప్రశ్నించారు. అనంతరం రెండు వేల రూపాయల నోటును తీసుకొచ్చారని, తిత్లీ తుపాన్ కారణంగా రాష్ట్రంలో డబ్బు విషయంలో ఏర్పడిన సమస్యపై ఆర్బీఐతో మాట్లాడడం జరిగిందన్నారు. 

11:07 - October 24, 2018

విజయవాడ : నగర మేయర్ నివాసంలో జీఎస్టీ అధికారులు తనిఖీలు చేపట్టారు. జీఎస్టీ శాఖకు పన్ను చెల్లించకపోవటంతో మేయర్ కోనేరు శ్రీధర్ నివాసంలో మూడు గంటలపాటు ఎనిమిదిమంది  జీఎస్టీ అధికారులు దాడులు నిర్వహించారు. ఈ తనిఖీలలో విలువైన పత్రాలు, హార్డ్ డిస్క్ లను అధికారులు స్వాధీనం చేసుకున్నారు. కేఎంకే ఈవెంట్స్ సంస్థకు డైరెక్టర్ గా వున్న మేయర్ భార్య వున్నారు. ఈ క్రమంలో కేఎంకే ఈవెంట్స్ సంస్థ జీఎస్టీ పన్ను చెల్లించకపోవటంతో అధికారులు తనిఖీలు నిర్వహించి విలువైన పత్రాలు, హార్డ్ డిస్క్ లను అధికారులు స్వాధీనం చేసుకున్నారు. కాగా కేఎంకే ఈవెంట్స్ కు సంబంధించి సరైన ఆధారాలు చూపించకపోవటంతో జీఎస్టీ అధికారులు ఈ దాడులు నిర్వహించారు. కాగా ఈ దాడులపై మేయర్ కోనేరు శ్రీధర్ స్పందిస్తు..తమ ఇంటిపై ఐటీ అధికారులు దాడులు చేసారనే వార్తలు వస్తున్నాయనీ..కానీ జీఎస్టీ అధికారులు మాత్రమే తనిఖీలు చేశారని స్పష్టం చేశారు. కాగా తాము ఐటీ పన్నులు కూడా సక్రమంగానే చెల్లిస్తామని ఇటువంటి తనిఖీలు సాధారణమేనని తెలపారు.
 

11:39 - August 10, 2018

వరంగల్‌ : జిల్లాలో ఐటీ శాఖ అధికారులు మెరుపుదాడులు చేశారు. అధికార పార్టీ నేతల రియల్‌ వెంచర్స్‌పై ఐటీ  అధికారులు దాడులు చేశారు. ఆదాయపన్ను ఎగ్గొట్టారన్న ఆరోపణలతో ఐటీ శాఖ దాడులకు దిగింది. హన్మకొండ హంటర్‌రోడ్డులోని విల్లాస్‌ నిర్మాణ లావాదేవీలపై ఐటీ అధికారులు అర్ధరాత్రి నుంచి సోదాలు కొనసాగుతున్నాయి. హెచ్‌డీఎఫ్‌సీ, ఐసీఐసీఐ, యాక్సిస్‌, ఎస్‌బీఐ, ఖాతాలను సీజ్‌ చేసిన ఐటీ అధికారులు.. విల్లా కొనుగోలుదారులకు నోటీసులు జారీ చేశారు.

 

12:06 - August 6, 2018

విజయవాడ : దేశంలో వ్యవసాయం తర్వాత అంతటి ప్రాధాన్యం గల చేనేత రంగంపై ప్రభుత్వం దృష్టిసారించాలని చేనేత కార్మికులు కోరుకుంటున్నారు. అయితే చేనేత రంగాన్ని ఆదుకునేవారే లేక ఈ రంగాన్నే నమ్ముకుని జీవిస్తున్న కార్మికుల పరిస్థితి దయనీయంగా మారింది. చేనేత కార్మికుల సంక్షేమం దిశగా పాలకులు మొగ్గు చూపాల్సి ఉన్నా ఆ దిశగా చర్యలు నామమాత్రంగానే మిగిలిపోతున్నాయి. ఏపీలో చేనేత కళకు, చేనేత తయారీకి కళాకారులు జీవం పోస్తున్నా..నేతన్నల బతుకు భారంగా మారుతున్న వైనంపై..10టీవీ ప్రత్యేక కథనం.

ఆంధ్రప్రదేశ్‌లో చేనేత కార్మికుల సంక్షేమం దిశగా పాలకులు మొగ్గు చూపాల్సి ఉన్నా ఆ దిశగా చర్యలు నామమాత్రంగానే మిగిలిపోతున్నాయి. సీఎం చంద్రబాబు ఎన్నికల ముందు చేనేతలకు రుణమాఫీ చేస్తామని పాదయాత్రలో హామీ ఇచ్చారు. టీడీపీ అధికారంలోకి వచ్చాక 110 కోట్ల రూపాయల రుణమాఫీ చేసి కొంత ఉపశమనం కల్పించినా ... పూర్తిస్థాయిలో రుణమాఫీ కాకపోవడంతో నేతన్నల్లో ఆందోళన వ్యక్తమౌతోంది.

ఆప్కోకు 150 కోట్ల రూపాయల నుంచి 250 కోట్లు కేటాయిస్తే..చేనేత కార్మికుల బతుకుల్లో వెలుగులు నింపవచ్చు. ఇప్పటికే ప్రభుత్వం చేనేత సహకార సంఘాలకు 20 శాతం రిబేటు ఇస్తుండగా, దీన్ని ఆప్కోకు కూడా వర్తింపజేసి 30 శాతానికి పెంచేలా సర్కార్ చొరవ చూపాలని చేనేత కార్మికులు కోరుతున్నారు. మరోవైపు కృష్ణాజిల్లాలో చేనేత రంగం నానాటికీ సంక్షోభంలో కూరుకుపోతోంది. జీఎస్టీతో నూలు ధరలు బాగా పెరిగాయి. దీనికి తోడు ఆప్కోకు విక్రయించిన ఉత్పత్తులు కొనుగోలు కావడం లేదు. దీంతో వాటికి సంబంధించిన బకాయిలు విడుదల చేయకపోవడంతో చేనేతలు ఆర్థికంగా చితికిపోతున్నారు. ఆశించినమేర విక్రయాలు లేకపోవడంతో చేనేతల పరిస్థితి అగమ్యగోచరంగా మారింది.

ప్రస్తుతం చీరల తయారీ ఖర్చు రెట్టింపయ్యింది. ఈ ప్రభావం వినియోగదారులపై కూడా పడి విక్రయాలు తగ్గిపోయాయి. సాధారణంగా ఒక్కో చీర 500 నుంచి 1200ల వరకు ఉంటుంది. తయారీకి ఉపయోగించే నూలుపై 5 శాతం, జరీపై 15 శాతం ఇలా రంగులు, ఇతరత్రా కూడా జీఎస్టీ ఉండటంతో ధర పెంచి విక్రయించాల్సి వస్తోంది. . అయితే ప్రతినెలా జిల్లాలో సుమారు 1.60 కోట్ల రూపాయలు నూలుకే వెచ్చిస్తున్నారు. నూలుపై 5 శాతం పన్ను విధించడంతో ఇబ్బందులు పడుతున్నారు చేనేత కార్మికులు. దేశంలో వ్యవసాయం తర్వాత అంతటి ప్రాధాన్యం గల చేనేత రంగంపై ప్రభుత్వం దృష్టి సారించాలని,..కళాకారులను ఆదుకోవాల్సి బాధ్యత ప్రభుత్వంపై ఉందని వారు కోరుతున్నారు. ఆగస్టు7న తేదీన చేనేత దినోత్సవం రోజు కావడంతో ప్రభుత్వం తమపై కనికరం చూపించి... సీఎం చంద్రబాబు ఓ ప్రకటన చేయాలని చేనేత కార్మికులు కోరుతున్నారు. 

19:36 - June 30, 2018

Pages

Don't Miss

Subscribe to RSS - GST