gujarat

08:30 - June 6, 2018

గుజరాత్‌ : కచ్ జిల్లాలో భారత వాయుసేనకు చెందిన జాగ్వార్‌ ఫైటర్‌ జెట్ విమానం కూలిపోయింది. శిక్షణలో భాగంగా జామ్‌నగర్ నుంచి వెళ్లిన కాసేపటికే ముంద్రా గ్రామం వద్ద పొలాల్లో ఉదయం పదిన్నరకు విమానం కూలిపోయినట్లు డిఫెన్స్‌ అధికార ప్రతినిధి లెఫ్ట్‌నెంట్‌ కల్నల్‌ మనీష్‌ ఓఝా ధృవీకరించారు. ఈ ప్రమాదంలో ఎయిర్‌ కమాండర్‌ సంజయ్ చౌహాన్ ప్రాణాలు కోల్పోయాడు. ఈ ఘటనపై భారత వాయుసేన అధికారులు విచారణకు ఆదేశించారు.

13:43 - May 21, 2018

గుజరాత్‌ : రాష్ట్రం రాజ్‌కోట్‌లో దారుణం జరిగింది. ఫ్యాక్టరీలో దొంగతనం చేశాడన్న ఆరోపణలతో ఓ వ్యక్తిని కొట్టి చంపారు సిబ్బంది. కర్రలతో విచక్షణారహితంగా దాడి చేశారు. దీంతో దెబ్బలకు తాళలేక బాధితుడు ముఖేశ్‌ మృతి చెందాడు. విషయం తెలుసుకున్న పోలీసులు దాడికి పాల్పడ్డ వారిని అరెస్ట్‌ చేశారు. 

17:24 - April 20, 2018

గుజరాత్‌ : నరోదా పటియాలో జరిగిన అల్లర్ల కేసులో గుజరాత్‌ హైకోర్టు తీర్పు వెల్లడించింది. బిజెపి మాజీ మంత్రి మాయా కొద్నానీ నిర్దోషిగా ప్రకటించింది. సంశయ లాభం కింద కొద్నానిని నిర్దోషిగా ప్రకటిస్తున్నాట్లు హైకోర్టు పేర్కొంది. కొద్నాని 2014లో బెయిలుపై విడుదలయ్యారు. కాగా ఈ కేసులో భజరంగ్‌దళ్‌ నేత బాబు భజరంగీని దోషిగా తేల్చింది. 2012లో ప్రత్యేక కోర్టు విధించిన జీవితఖైదు శిక్షను హైకోర్టు ఖరారు చేసింది. మరో 29 మందిని నిర్దోషులుగా విడుదల చేసింది. నరోదా అల్లర్ల బాధితులకు పరిహారం ఇవ్వాలన్న పిటిషన్‌ను కోర్టు తోసిపుచ్చింది. 2002లో నరోదా నరమేథంలో 100 మంది ముస్లింలు సజీవదహనమయ్యారు. వృత్తి రీత్యా వైద్యురాలైన కొద్నానీ అల్లర్లకు పురిగొల్పారని ఆరోపణలతో అరెస్ట్‌ అయ్యారు. ప్రత్యేక కోర్టు ఆమెకు 28 ఏళ్ల జైలుశిక్ష విధించింది.

08:36 - January 30, 2018

ఢిల్లీ : గోరక్షణ పేరుతో జరుగుతున్న దాడులను నియంత్రించడంలో విఫలమయ్యాయని పేర్కొంటూ రాజస్థాన్, హర్యానా, ఉత్తరప్రదేశ్‌ రాష్ర్టాలకు సుప్రీంకోర్టు నోటీసులు జారీ చేసింది. దీనిపై సెప్టెంబర్‌ 3వ తేదీలోగా స్పందించాలని కోర్టు ఆదేశించింది. తుషార్ గాంధీ వేసిన పిటిషన్‌పై విచారణ జరిపిన కోర్టు ఈ ఆదేశాలను జారీ చేసింది. ఈ పిటిషన్‌ ఆధారంగానే గత ఏడాది సెప్టెంబర్ 6వ తేదీన గోరక్షణ పేరిట జరుగుతున్న దాడులను ఆపాలని... ప్రతిజిల్లా నోడల్‌ అధికారిని ఏర్పాటు చేయాలని 26 రాష్ట్రాలను కోర్టు ఆదేశించింది. సుప్రీం ఆదేశించినప్పటికీ దాడులు కొనసాగుతున్నాయంటూ ఇటీవల జరిగిన ఏడు ఘటనలను పిటిషన్‌లో పేర్కొన్నారు. 

22:16 - January 7, 2018

హైదరాబాద్ : వ్యవసాయ ఉత్పత్తులపై రైతులకు ప్రభుత్వాల నుంచి అందుతున్న కనీస మద్ధతు ధరలపై అధ్యయనం చేయాలని మార్కెటింగ్‌శాఖ ఉన్నతాధికారులను మంత్రి హరీశ్‌రావు ఆదేశించారు. మధ్యప్రదేశ్, మహరాష్ట్ర, కర్నాటక, గుజరాత్ హర్యానా తదితర రాష్ట్రాలలో పర్యటించి.. విధివిధానాలు, అక్కడ అవలంబిస్తున్న పద్దతులు పరిశీలించాలన్నారు. ఈ నెల 13వ తేదిలోగా నివేదికలు ఇవ్వాలని ఆదేశించారు.

తెలంగాణ వ్యవసాయ మార్కెటింగ్ శాఖ పనితీరుపై మంత్రి హరీశ్‌రావు సమీక్ష నిర్వహించారు. రాష్ట్ర రైతులకు మెరుగైన సేవలందించేందుకు మార్కెటింగ్‌ శాఖ అధికారుల బృందం.. మధ్యప్రదేశ్, మహరాష్ట్ర, కర్నాటక, గుజరాత్ హర్యానా రాష్ట్రాల్లో అధ్యయనం చేయాలన్నారు. రాష్ట్ర రైతుల ప్రయోజనాలకు అనుగుణంగా కొత్త విధానాలు ప్రవేశ పెట్టేందుకు వీలుగా ఈ నెల 13లోగా  అధికారుల బృందం నివేదికలు ఇవ్వాలని ఆదేశించారు. 

కూరగాయల విక్రయ కేంద్రాలను జీహెచ్ ఎంసీ సమీకృత మార్కెట్లతో పాటు అనువైన మెట్రో రైల్వే స్టేషన్లలోనూ త్వరగా ప్రారంభించాలని ఆదేశించారు. విక్రయ కేంద్రాలలో సేంద్రియ పద్ధతుల్లో పండించిన కూరగాయలు, బియ్యం అమ్మే రైతులను ప్రోత్సహించాలని మంత్రి ఆదేశించారు. మొత్తం 330 నాబార్డు గోదాముల్లో మిగతా 18 గోదాముల నిర్మాణం,  ఈఏడాది మార్చిలోగా ఎట్టి పరిస్తితులలోను పూర్తి చేయాలన్నారు. గోదాముల నిర్మాణాలు పూర్తయిన వెంటనే సంబంధిత మార్కెట్ కమిటీలకు అప్పగించాలని ఆదేశించారు.

కేంద్ర ప్రభుత్వ మోడల్ చట్టం ప్రకారం వ్యవసాయ మార్కెటింగ్ శాఖ ద్వారా వ్యాపారస్థులు, కమిషన్ ఏజెంట్లకు కొత్తగా జారీ చేసే లైసెన్సుల విషయంలో జాగ్రత్తలు పాటించాలన్నారు. బ్యాంక్ పూచికత్తు విషయంలో అవగాహన కల్పించి నూతన లైసెన్సులు జారీ చేయాలన్నారు. గ్రామపంచాయితీల్లో నిర్వహించే పశువుల మార్కెట్లలో ఏడాదికి కోట్ల ఆదాయం వస్తుంటే..మార్కెట్ కమిటీల్లో తక్కువ రావడంపై అసంతృప్తి వ్యక్తం చేశారు. 2018 మార్చిలోగా అన్ని పశువుల మార్కెట్లను ప్రత్యేక బృందాల ద్వారా తనిఖీ చేయించాలని ఆదేశించారు. మార్కెట్ ఫీజ్ వసూలు పెరిగే విధంగా చర్యలు తీసుకోవాలన్నారు. మార్కెటింగ్ శాఖలో చాలా కాలంగా ఖాళీగా ఉన్న పోస్టుల భర్తీకి ప్రతిపాదనలు పంపాలని అధికారులను ఆదేశించారు.

14:42 - December 30, 2017

గుజరాత్ : కొత్తగా ఏర్పాటైన గుజరాత్‌ కాబినెట్‌లో అప్పుడే విభేదాలు పొడసూపాయి. మొన్నటివరకు మంత్రివర్గంలో నెంబర్‌ టూగా వెలుగొందిన డిప్యూటి సిఎం నితిన్‌ పటేల్‌కు కీలక శాఖలు దక్కకపోవడంతో ఆయన తన పదవికి రాజీనామా చేసే ఆలోచనలో ఉన్నారు. ఆర్థిక శాఖ, పట్టాణాభివృద్ధి, పెట్రోలియం శాఖలు దక్కకపోవడంతో నితిన్‌ ఇంతవరకు బాధ్యతలు స్వీకరించలేదు. ఆర్థిక శాఖను సౌరభ్‌ పటేల్‌కు అప్పగించగా, పెట్రోలియం, పట్టణాభివృద్ధి శాఖలను సీఎం రూపానీ తనవద్దే అట్టిపెట్టుకున్నారు. నితిన్‌ పటేల్‌కు రోడ్లు, భవనాలు, ఆరోగ్యం-కుటుంబ సంక్షేమం, నర్మదా-కల్పసర్‌ ప్రాజెక్టు శాఖలను కేటాయించారు. దీన్ని అవమానంగా భావిస్తున్న నితిన్‌ పటేల్ అధిష్టానంతో తాడో పేడో తేల్చుకునేందుకు 48 గంటల అల్టిమేటం ఇచ్చినట్లు సన్నిహిత వర్గాలు పేర్కొన్నాయి. కాబినెట్‌లో కలహాల నేపథ్యంలో నితిన్‌ పటేల్‌ బిజెపిని వదిలి కాంగ్రెస్‌లో చేరాలని హార్దిక్‌ పటేల్‌ సలహా ఇచ్చారు.

12:01 - December 26, 2017

ఆహ్మదాబాద్ : గుజరాత్‌లో బీజేపీ ప్రభుత్వం మరోసారి కొలువుతీరింది. ముఖ్యమంత్రిగా విజయ్‌ రూపానీ ప్రమాణ స్వీకారం చేశారు. గాంధీనగర్‌లోని సచివాలయం మైదానంలో జరిగిన ఈ కార్యక్రమంలో గుజరాత్‌ గవర్నర్‌ ఓపీ కోహ్లీ... విజయ్‌ రూపానీతో ప్రామాణం చేయించారు. ఉపముఖ్యమంత్రిగా నితిన్‌ పటేల్‌ ప్రమాణం చేశారు. ప్రధాని నరేంద్ర మోదీ, బీజేపీ అధ్యక్షుడు అమిత్‌ షా, పార్టీ అగ్రనేత అద్వానీ, మాజీ ముఖ్యమంత్రులు ఆనందీబెన్‌ పటేల్‌, కేశూభాయ్‌ పటేల్‌, పలువురు కేంద్ర మంత్రులు, బీజేపీ పాలిత రాష్ట్రాల ముఖ్యమంత్రులు ఈ కార్యక్రమానికి హాజరయ్యారు. రూపానీ, నితిన్‌ పటేల్‌తోపాటు మరో 18 మంది మంత్రులు ప్రమాణం చేశారు. ఈ నెలలో రెండు విడదలుగా జరిగిన ఎన్నికల్లో 98 సీట్లతో బీజేపీ విజయం సాధించింది. గుజరాత్‌లో బీజేపీ ప్రభుత్వం కొలువుతీరడం వరుసగా ఇది ఆరోసారి. విజయ్‌ రూపానీ ముఖ్యమంత్రిగా ప్రమాణ స్వీకారం చేయడం ఇది రెండోసారి. 

21:51 - December 23, 2017

గుజరాత్ : అసెంబ్లీ ఎన్నికల అనంతరం కాంగ్రెస్‌ అధ్యక్షుడు రాహుల్‌ గాంధీ మరోసారి గుజరాత్‌లో పర్యటిస్తున్నారు. తన పర్యటనలో భాగంగా రాహుల్‌ సోమ్‌నాథ్ ఆలయంలో శివుడికి పూజలు చేశారు. ఉదయం కేశోడ్ విమానాశ్రయం చేరుకున్న తర్వాత ఆయన రోడ్డు మార్గం ద్వారా సోమ్‌నాథ్‌కు వెళ్లారు. రాహుల్ సోమనాథుడికి పట్టువస్ర్తాలను సమర్పించారు. గుజరాత్‌ అసెంబ్లీకి కొత్తగా ఎన్నికైన పార్టీ ఎమ్మెల్యేలతో రాహుల్‌ సమావేశం నిర్వహించనున్నారు. అసెంబ్లీ ఎన్నికల్లో కాంగ్రెస్ పార్టీ 79 స్థానాలు గెలుచుకోవడంతో రాహుల్‌ కార్యకర్తల్లో మానసిక స్థయిర్యాన్ని పెంపొందించేందుకు యత్నిస్తున్నారు. తన పర్యటనకు ముందు రాహుల్‌ బిజెపిని మళ్లీ టార్గెట్‌ చేశారు. బిజెపి అబద్ధాల పార్టీగా ట్వీట్‌ చేశారు.   

 

21:58 - December 19, 2017

ఢిల్లీ : గుజరాత్‌ ఎన్నికల్లో ప్రధాని మోదీ మాజీ ప్రధాని మన్మోహన్‌సింగ్‌పై చేసిన విమర్శలు పార్లమెంట్‌ను కుదిపేశాయి. మన్మోహన్‌కు మోదీ క్షమాపణలు చెప్పాలని డిమాండ్‌ చేసింది. మన్మోహన్‌పై ప్రధాని మోదీ వ్యాఖ్యలను తప్పుబడుతూ కాంగ్రెస్‌ సభ నుంచి వాకౌట్‌ చేసింది. 
వాడి వేడిగా ప్రారంభమైన సమావేశాలు  
పార్లమెంట్ శీతాకాల సమావేశాలు మూడవరోజు కూడా వాడి వేడిగా ప్రారంభమయ్యాయి. గుజరాత్‌ ఎన్నికల్లో మాజీ ప్రధాని మన్మోహన్‌సింగ్‌పై ప్రధాని నరేంద్ర మోది చేసిన వ్యాఖ్యలపై లోక్‌సభ అట్టుడుకింది. లోక్‌సభ ప్రారంభమైన వెంటనే ఈ అంశాన్ని లేవనెత్తిన కాంగ్రెస్... దీనిపై చర్చ చేపట్టాలని డిమాండ్‌ చేస్తూ ఆందోళనకు దిగింది. కాంగ్రెస్‌ డిమాండ్‌ను స్పీకర్‌ సుమిత్రా మహాజన్ తోసిపుచ్చారు. ఎన్నికల ప్రచారంలో చేసిన వ్యాఖ్యలపై సభలో చర్చించడం కుదరదని ఆమె స్పష్టం చేశారు. విపక్షాల గందరగోళం మధ్యే లోక్‌సభ స్పీకర్‌ సుమిత్రా మహాజన్‌ ప్రశ్నోత్తరాలను కొనసాగించారు.
కాంగ్రెస్‌ వాకౌట్‌ 
ఎన్నికలు ముగిసి ఫలితాలు కూడా వచ్చేసిన నేపథ్యంలో దీనిపై చర్చ అనవసరమని, సభను సజావుగా సాగేందుకు సహకరించాలని కేంద్ర మంత్రి అనంతకుమార్‌ కాంగ్రెస్‌ సభ్యులకు విజ్ఞప్తి చేశారు. ఇదే అంశంపై జీరో అవర్‌లో చర్చకు అనుమతించాలని కాంగ్రెస్‌ పట్టుబట్టింది. ఆ పార్టీ నేత మల్లికార్జున్‌ ఖర్గే మాట్లాడేందుకు ప్రయత్నించగా స్పీకర్‌ అనుమతించక పోవడంతో సభ నుంచి కాంగ్రెస్‌ వాకౌట్‌ చేసింది. మరోవైపు లోక్‌సభలో ఆర్జేడి చీఫ్‌ లాలూప్రసాద్‌ యాదవ్‌కు జడ్‌ ప్లస్‌ భద్రతను తగ్గించడంపై ఆ పార్టీ సభ్యులు తీవ్ర నిరసన వ్యక్తం చేశారు. లాలుకు ఏదైనా జరిగితే ప్రధాని మోది బాధ్యత వహించాల్సి ఉంటుందని ఆర్జేడి హెచ్చరించింది. ఎఫ్‌ఆర్‌డీఐ బిల్లుపై చర్చించాలని టిఎంసి సభలో పట్టుబట్టింది.

 

20:54 - December 19, 2017

గెలవటమైతే గెలిచారు.. కానీ, గెలిచిన ఆనందం లేకుండా పోతున్న తరుణం.. మసకబారుతున్న ప్రభ.. వరుసగా తగ్గుతున్న సీట్లు..ఓట్ల శాతం.. క్రమంగా లైట్ తీసుకుంటున్న గుజరాత్ ప్రజలు.. గుజరాత్ మోడల్ అంటూ ఊదరగొడుతున్న మాటల్లో డొల్లతనం.. ఆఖరికి మతం, జాతీయత లాంటి ఎమోషనల్ ఎలిమెంట్స్ వాడితే తప్ప ప్రయోజనం సాధించలేనితనం.. ముగ్గురు యువకులను చూసి వణికిపోయిన పరిస్థితి. ఇవన్నీ చూస్తే గుజరాత్ ఎన్నికల్లో బీజేపీ .. గెలిచిందా? ఓడిందా అనే సందేహం రాకమానదు. ఇదే అంశంపై ఈ రోజు వైడాంగిల్ స్టోరీ చూద్దాం.. 
బీజేపీది ప్రగల్భాలే.. 
బీజెపీది ప్రగల్భాలే తప్ప.. వాస్తవంలో అంత లేదని గణాంకాలు చెప్తున్నాయి. మరోపక్క యువరక్తం గుజరాత్ లో చూపిన దూకుడు చర్చనీయాంశంగా మారింది. అక్కడ మారుతున్న పరిణామాలను, రాజకీయాలను స్పష్టం చేస్తోంది.  గుజరాత్ ప్రజలు మత సామరస్యాన్ని, లౌకిక రాజకీయాలను కోరుతున్నారని ఇదే పాఠాన్ని అసెంబ్లీ ఎన్నికల ద్వారా నేర్పారని అర్ధమవుతోంది. మరిన్ని వివరాలను వీడియోలో చూద్దాం...

 

Pages

Don't Miss

Subscribe to RSS - gujarat