Hardik Patel

14:55 - November 22, 2017

ఆహ్మదాబాద్ : గత కొన్నాళ్లుగా పటీదార్‌ అనామత్‌ ఆందోళన్‌ సమితి కాంగ్రెస్‌ మధ్య నెలకొన్న ప్రతిష్టంభనకు తెరపడింది. గుజరాత్‌ అసెంబ్లీ ఎన్నికల్లో పాటీదార్‌ అనామత్‌ ఆందోళన్‌ సమితి కాంగ్రెస్‌కు మద్దతు ప్రకటించింది. తమ సమస్యల పరిష్కారానికి...పాటీదార్లకు రిజర్వేషన్లు ఇవ్వడానికి కాంగ్రెస్‌ అంగీకరించిందని పాటీదార్‌ ఉద్యమ నేత హార్దిక్‌ పటేల్‌ స్పష్టం చేశారు. సెక్షన్‌ 31, సెక్షన్‌ 46 కింద పాటీదార్లను బీసీల్లో చేర్చడానికి కాంగ్రెస్‌ ఒప్పకుందన్నారు. కాంగ్రెస్‌ ఫార్ములాను తాము అంగీకరిస్తున్నట్లు... 50 శాతానికి పైగా రిజర్వేషన్లు ఇచ్చేందుకు అవకాశం ఉందని హార్దిక్‌ పటేల్‌ వెల్లడించారు. రాజకీయంగా తమకు ఏ పార్టీతో సంబంధం లేదని...కాంగ్రెస్ పార్టీకి మద్దతుగా విస్తృతంగా ప్రచారం చేయనున్నట్లు హార్దిక్‌ పటేల్‌ తెలిపారు. పాటీదార్ల ఓట్లను చీల్చేందుకు బిజెపి 2 వందల కోట్ల నిధులు ఏర్పాటు చేసినట్లు ఆయన ఆరోపించారు.

 

22:02 - November 18, 2017

ఢిల్లీ : పటేళ్ల రిజర్వేషన్లపై స్పష్టమైన ప్రకటన చేయాలని పటీదార్‌ అనామత్‌ ఆందోళన్‌ సమితి కాంగ్రెస్‌కు డెడ్‌లైన్‌ పెట్టింది. 24 గంటల్లో కాంగ్రెస్‌ వైఖరేంటో స్పష్టం చేయాలని హెచ్చరించింది. గుజరాత్‌ అసెంబ్లీ ఎన్నికల్లో పోటీ చేసేందుకు పటీదార్లకు ఎన్ని స్థానాలు కేటాయిస్తున్నారో తేల్చాలని హార్దిక్‌ పటేల్‌ వర్గం డిమాండ్‌ చేసింది. కాంగ్రెస్‌ అధిష్టానంతో చర్చలు జరిపేందుకు పటీదార్‌ అనామత్‌ నేతలు శుక్రవారం ఢిల్లీకి వెళ్లారు. చర్చలకు రమ్మని పిలిచిన కాంగ్రెస్‌...తమతో సమావేశం కాకుండా అవమానించిందని పటేల్‌ వర్గీయులు అసంతృప్తి వ్యక్తం చేస్తున్నారు. గుజరాత్‌ ఎన్నికల్లో పటేళ్లకు 30 స్థానాలు కేటాయించాల్సిందిగా పీఏఏఎస్‌ డిమాండ్‌ చేస్తోంది. ఈ విషయంలో అంతా సవ్యంగా జరుగుతుందని, విజయం తమను వరిస్తుందన్న ఆశాభావాన్ని హార్దిక్‌ పటేల్‌ వ్యక్తం చేశారు. కాంగ్రెస్‌-పటీదార్‌ నేతల మధ్య వడోదరాలో సాయంత్రం మళ్లీ సమావేశం జరగనుంది.

 

21:28 - November 14, 2017

గుజరాత్ : రాష్ట్ర ఎన్నికల ముందు పాటీదార్‌ ఉద్యమనేత హర్దిక్‌ పటేల్‌ సెక్స్‌ సీడీ క్లిప్పింగ్‌లు హల్‌చల్‌ చేస్తున్నాయి. సీడీలో ఉన్నది హార్దిక్‌ పటేలేనని మాజీ అనుచరుడు అశ్విన్‌ అన్నారు. సీడీలో ఉన్నది తాను కానని హార్దిక్‌ పటేల్‌ చెబుతున్నారు. తనపై బురద చల్లేందుకు బిజెపి నీచ రాజకీయాలకు ఒడిగట్టిందని ఆరోపిస్తున్నారు. ఈ సీడీ వ్యవహారంలో దళిత యువనేత జిగ్నేష్‌ మేవాని హార్దిక్‌ పటేల్‌కు అండగా నిలిచారు. శృంగారం అనేది ప్రాథమిక హక్కని...దానికి భంగం కలిగించే హక్కు ఎవరికి లేదని పేర్కొన్నారు. తాజాగా మే 22కు చెందిన ఓ వీడియోలో హార్దిక్‌ పటేల్‌ తన సహచరులతో పాటు ఓ మహిళ కూడా కనిపిస్తోంది.

సోమవారం కూడా మే 18కి చెందిన ఓ వీడియో వెలుగు చూసింది. ఇందులో ఓ మహిళతో హార్దిక్‌ పటేల్‌ ఉన్నట్లుగా ఉంది. ఈ వీడియో వ్యవహారంపై దళిత యువ నేత జిగ్నేశ్‌ మెవానీ స్పందించారు. ఇందులో సిగ్గుపడాల్సిన అవసరం లేదని హర్దిక్‌ పటేల్‌కు మద్దతుగా నిలిచారు. ''హర్దిక్ నీ వెంట నేనున్నా. శృంగారం అనేది ప్రాథమిక హక్కు. ఏకాంతానికి భంగం కలిగించే హక్కు ఎవరికీ లేదు'' అని జిగ్నేష్‌ ట్విట్టర్‌లో ట్వీట్‌ చేశారు. వీడియోలో ఉన్నది అతనే అయినా తప్పేం కాదని.. ఆ వీడియోను ఎవరైతే బయటపెట్టారో వారిని హర్దిక్‌ కోర్టుకు ఇడ్చాల్సిందే అని జిగ్నేశ్‌ సలహా ఇస్తున్నారు.

ఈ వీడియో క్లిప్‌ను ఒకప్పుడు హార్దిక్‌కు సహచరుడిగా ఉన్న అశ్విన్‌ బయటపెట్టాడని ఆరోపణలు వచ్చాయి. ఈ వీడియో విషయంలో తనకు, బిజెపికి ఎలాంటి సంబంధం లేదని అశ్విన్ సంకడ్‌ సరియా పేర్కొన్నారు. అసెంబ్లీ ఎన్నికల్లో కాంగ్రెస్‌ టికెట్‌ దక్కనివారే ఈ పనికి పాల్పడి ఉంటారని అనుమానం వ్యక్తం చేశాడు. ఈ వీడియోలో ఉన్నది హార్దిక్‌ పటేలా...కాదా...అన్నది తేల్చాలన్నారు. ఈ సిడిని ఫోరెన్సిక్‌ పరీక్షలకు పంపాలని డిమాండ్‌ చేశారు.

ఈ వీడియోలు ఫేక్‌వనీ...అందులో ఉన్నది తాను కానని....గుజరాత్ ఎన్నికల నేపథ్యంలోనే బీజేపీ తనపై బురదజల్లేందుకు నీచ రాజకీయాలకు ఒడిగడుతోందని హార్దిక్‌ పటేల్‌ విమర్శించారు. ఆ వీడియోలో ఉన్నది తానే అయితే ధైర్యంగా ఒప్పుకుంటానని తెలిపాడు. ఎవరు ఏం చేసినా చేసుకోండి.... ఇలాంటి వాటికి తాను భయపడి వెనకడుగు వేసేది లేదని స్పష్టం చేశాడు. నన్ను అవమానించేందుకు కోట్ల రూపాయలు ఖర్చు పెడుతున్నారని హార్దిక్‌ చెప్పాడు.

ప్రభుత్వ ఉద్యోగాలు, విద్యాసంస్థల్లో రిజర్వేషన్లు కావాలని కోరుతూ హార్దిక్‌ పటేల్‌ నేతృత్వంలో గుజరాత్‌లో భారీ ఆందోళన నిర్వహించిన విషయం తెలిసిందే. పాటీదార్‌ సామాజికవర్గం రిజర్వేషన్లపై అధికార బిజెపి వెనకడుగు వేయడంతో ఈ ఎన్నికల్లో ఆ వర్గం కమలానికి దూరమైంది. హార్దిక్‌ పటేల్‌ కాంగ్రెస్‌కు మద్దతు ప్రకటించడంతో బిజెపి పటేల్‌ను టార్గెట్‌ చేసిందని విశ్లేషకులు భావిస్తున్నారు.

20:00 - October 31, 2017

ఆహ్మదబాద్ : గుజరాత్‌ అసెంబ్లీ ఎన్నికలు సమీపిస్తుండడంతో యువనేతలు హల్‌చల్ చేస్తున్నారు. పటేల్‌ సామాజిక నేత హార్దిక్‌ పటేల్‌ బాటనే దళిత సామాజిక వర్గానికి చెందిన యువనేత జిగ్నేష్‌ మేవాని కూడా ఎంచుకున్నారు. కాంగ్రెస్‌ ఉపాధ్యక్షుడు రాహుల్‌గాంధీతో సమావేశానికి ముందు ఆయన కొన్ని షరతులు విధించారు. రాహుల్‌గాంధీతో దొంగచాటుగా సమావేశం జరిపే ప్రసక్తే లేదని జిగ్నేష్‌ ఫేస్‌బుక్‌లో పేర్కొన్నారు. దళితుల అంశంపై కాంగ్రెస్‌ తమ వైఖరిని తెలియజేయాలని ఆయన డిమాండ్‌ చేశారు. గుజరాత్‌లో దళిత సామాజిక వర్గానికి చెందిన ఓట్లు 7 శాతం ఉండడంతో రాహుల్‌-జిగ్నేష్‌ల మధ్య భేటి రాజకీయ ప్రాధాన్యతను సంతరించుకుంది. హార్దిక్‌ పటేల్, జిగ్నేష్‌ మేవానీల షరతులతో కాంగ్రెస్‌ గడ్డు పరిస్థితిని ఎదుర్కొంటోంది. 

19:59 - October 31, 2017

ఆహ్మదబాద్ : పాటీదార్‌ సామాజికవర్గ ఉద్యమ నేత హార్దిక్‌ పటేల్‌ కాంగ్రెస్‌ పార్టీకి తామిచ్చిన గడువును మరోసారి గుర్తు చేశారు. పటేల్ రిజర్వేషన్లపై రోడ్‌ మ్యాప్‌ వేసేందుకు ఎంతో సమయం లేదు...ఈలోగా నిర్ణయం తీసుకోకుంటే కాంగ్రెస్‌ సభలను అడ్డుకుంటామని స్పష్టం చేశారు. శుక్రవారం రాహుల్‌ గాంధీ సూరత్‌లో జరిపే సభను అడ్డుకుంటామని హార్దిక్‌ పటేల్‌ హెచ్చరించారు. పటేల్‌ రిజర్వేషన్లపై నవంబర్ 3వ తేదీలోగా స్పష్టమైన హామీ ఇవ్వాలని కాంగ్రెస్‌కు ఆయన గడువు విధించిన విషయం తెలిసిందే. ఎన్నికల్లో కాంగ్రెస్‌కు మద్దతిచ్చేందుకు తాము వ్యతిరేకం కాదని చెప్పిన హార్దిక్‌ పటేల్‌ ఇపుడు రిజర్వేషన్లపై మెలిక పెట్టారు. హార్దిక్‌ పటేల్‌ డెడ్‌లైన్‌పై కాంగ్రెస్‌ ఇంతవరకు స్పందించలేదు.

21:58 - February 7, 2017

ఢిల్లీ : పటేళ్ల రిజర్వేషన్ల కోసం పోరాడిన ఉద్యమనేత హార్దిక్‌ పటేల్‌ శివసేనలో చేరారు. ఆయనను గుజరాత్‌ పార్టీ నేతగా శివసేన ఎంపిక చేసింది. గుజరాత్‌ ఎన్నికల్లో పటేల్‌ సారథ్యంలో పార్టీ ఎన్నికల్లో పోటీచేస్తుందని శివసేన చీఫ్‌ ఉద్ధవ్‌ థాక్రే ప్రకటించారు. బీజేపీకి వ్యతిరేకంగా వచ్చే ఏడాది గుజరాత్‌లో 182 స్థానాలకు జరిగే అసెంబ్లీ ఎన్నికల్లో పాల్గొనాలని నిర్ణయించినట్లు తెలిపారు. ఇప్పటికే మహారాష్ట్ర స్థానిక సంస్థల ఎన్నికల్లో బీజేపీతో కాకుండా విడిగా పోటీచేయాలని ఆ పార్టీ నిర్ణయించింది. 

19:31 - January 17, 2017

గుజరాత్ : పాటీదార్ ఆందోళన్‌ ఉద్యమ నేత హార్దిక్ పటేల్‌ 6 నెలల తర్వాత ఇవాళ స్వరాష్ట్రం గుజరాత్‌కు చేరుకోనున్నారు. కోర్టు ఆదేశం మేరకు ఆయన ఆరు నెలల పాటు రాజస్థాన్‌లో గడిపారు. ప్రభుత్వ ఉద్యోగాలు, విద్యాసంస్థల్లో పాటీదార్‌ సామాజిక వర్గానికి రిజర్వేషన్లు కల్పించాలని హార్దిక్‌ పటేల్‌ గుజరాత్‌లో పెద్ద ఆందోళన చేసిన విషయం తెలిసిందే. దేశద్రోహం కింద పోలీసులు ఆయనను అరెస్ట్‌ చేయగా..6 నెలల ముందు బెయిలుపై విడుదలయ్యారు. 6 నెలల పాటు గుజరాత్‌ వెలుపల నివసించాలన్న కోర్టు ఆదేశం నేటితో ముగిసింది. పటేల్‌కు ఘనస్వాగతం పలికేందుకు పాటీదార్‌ ఉద్యమకర్తలు గుజరాత్‌ సరిహద్దులో హార్దిక్‌ ఏర్పాట్లు చేశారు. ఈ ర్యాలీలో 5 వందల కార్లు, లక్షమంది కార్యకర్తలు పాల్గొనున్నారు.

12:18 - April 29, 2016

గుజరాత్ : పటేళ్ల ఉద్యమానికి సర్కార్ దిగొచ్చింది. గత కొంతకాలంగా పటేళ్లకు రిజర్వేషన్లు కల్పించాలని కోరుతూ ఆందోళన జరుగుతున్న సంగతి తెలిసిందే. ఈ ఉద్యమానికి హార్థిక్ పటేల్ నాయకత్వం వహిస్తున్నాడు. ప్రభుత్వంపై తీవ్రమైన ఆరోపణలు..తనదైన శైలిలో ఆందోళనలు చేస్తుండడంతో ప్రభుత్వం ఇరకాటలో పడిపోయింది. గుజరాత్ రాష్ట్రం ప్రతిష్టాత్మకం కావడంతో కేంద్రం ఏదైనా నిర్ణయం తీసుకోవాల్సిన పరిస్థితి ఏర్పడింది. వ్యూహాత్మకంగా శుక్రవారం కీలకమైన నిర్ణయం తీసుకుంది. మే 1 నుండి 10 శాతం రిజర్వేషన్ కు నిర్ణయం తీసుకుంది. ఆరు లక్షల లోపు ఆదాయం ఉన్న వారికి మాత్రమే ఇది వర్తించనుంది.
పటేళ్ల ఉద్యమం కొన్ని సందర్భాల్లో తీవ్రమైన హింసాత్మక ఘటనలు చోటు చేసుకున్నాయి. ఉద్యమ నాయకుడు హార్థిక్ పటేల్ ను అరెస్టు చేసి జైలుకు తరలించిన సంగతి తెలిసిందే. ఇతడిని విడుదల చేయాలంటూ తీవ్రమైన ఆందోళనలు జరిగాయి. ఈ నేపథ్యంలో రాష్ట్ర ప్రభుత్వం తీసుకున్న నిర్ణయంపై పటేళ్లు ఏ విధంగా స్పందిస్తారో చూడాలి. 

09:26 - April 18, 2016

గుజరాత్ : తమకు రిజర్వేషేన్లు కల్పించాలని గత కొంత కాలంగా పటేళ్లు ఆందోళన చేపడుతున్న సంగతి తెలిసిందే. ఆదివారం ఈ ఆందోళన హింసాయుత్మకంగా మారింది. తమకు రిజర్వేషన్లు కల్పించాలని, గత ఏడాది నుండి జైలులో ఉన్న ఉద్యమసారధి హార్ధిక్ పటేల్ ను విడుదల చేయాలని పటేల్ వర్గీయులు డిమాండ్ చేశారు. అందులో భాగంగా పటేల్ వర్గీయులు జైల్ భరో కార్యక్రమాన్ని నిర్వహించారు. పోలీసులు వీరిని అడ్డుకోవడంతో ఇరువర్గాల మధ్య ఘర్షణ చోటు చేసుకుంది. పోలీసుల వైఖరికి నిరసనగా పాటీదార్ అనామత్ ఆందోళన్ సమితి సోమవారం బంద్ కు పిలుపునిచ్చింది. మెహసానా, అహ్మదాబాద్ లలో 144 సెక్షన్ అమలు జరిపారు. రాష్ట్ర వ్యాప్తంగా భారీ బందోబస్తు ఏర్పాటు చేశారు.
గత రెండు దశాబ్ధాలుగా పటేళ్లు ఉన్నత వర్గాలకు చెందిన వారని, ఇలాంటి వారికి రిజర్వేషన్లు అవసరం లేదని ప్రభుత్వం భావిస్తూ వస్తోంది. కానీ హార్ధిక్ పటేల్ ఉద్యమం చేపట్టడంతో ప్రభుత్వం ఆలోచనలో పడింది. చర్చల ద్వారా సమస్యను పరిష్కరించాలని సర్కార్ యోచిస్తోంది. కానీ చర్చల ద్వారా సమస్యను పరిష్కరించలేరని, రిజర్వేషన్లు కల్పించాలని డిమాండ్ చేస్తున్నారు. ప్రస్తుతం జరుగుతున్న బంద్ ఎలాంటి పరిణామాలకు దారి తీస్తుందో చూడాలి.

08:31 - April 18, 2016

అహ్మదాబాద్‌: గుజరాత్‌ మెహసానా జిల్లాలో ఆదివారం పటేల్‌ సామాజికవర్గ నిరసనకారులు చేపట్టిన జైల్‌ భరో కార్యక్రమం ఉద్రిక్తతకు దారి తీసింది. అరెస్టయిన తమ నాయకుడు హార్ధిక్‌ పటేల్‌ విడుదల చేయలంటూ సర్ధార్‌ పటేల్‌ గ్రూపు ఆధ్వర్యంలో మొదెరా క్రాస్‌ రోడ్డు నుంచి నిరసనకారులు భారీ సంఖ్యలో ర్యాలీగా బయలుదేరగా పోలీసులకు వారికి మధ్య వాగ్వాదం చోటు చేసుకున్నది. నిరసనకారులపై పోలీసులు లాఠీచార్జి చేశారు. లాఠీచార్జిలో 12మంది గాయపడ్డారు. దీంతో నిరసనకారులు పలు వాహనాలను ధ్వంసం చేశారు. లాఠీచార్జిని వ్యతిరేకిస్తూ రాష్ట్ర హోంమంత్రి ఇంటివద్ద వారు నిరసనకు దిగారు. దీంతో పోలీసులు వారిపై టియర్‌ గ్యాస్‌ ప్రయోగించారు. పరిస్థితిని ఆదుపులోకి తెచ్చేందుకు అధికారులు మొబైల్‌ ఫోన్‌ ఇంటర్నెట్‌ సేవలను నిలిపివేయడంతోపాటు జిల్లాలో కర్ఫ్యూ విధించారు. తాము శాంతియుతంగా నిరసన తెలుపుతుంటే తమపై కావాలనే పోలీసులు దాడి చేశారని సర్ధార్‌ పటేల్‌ గ్రూపు వారు తెలుపగా తమపై రాళ్లు విసిరినందుకే లాఠీచార్జి చేశామని పోలీసులు చెబుతున్నారు. సోమవారం సర్ధార్‌ పటేల్‌ గ్రూపు గుజరాత్‌ బంద్‌కు పిలుపునిచ్చింది.

Pages

Don't Miss

Subscribe to RSS - Hardik Patel