Hyderabad

19:45 - November 20, 2018

హైదరాబాద్ : రాష్ట్రంలో 32,796 పోలింగ్ స్టేషన్లు ఉన్నాయని సీఈవో రజత్ కుమార్ అన్నారు. ఓటర్లు ఎక్కువగా ఉన్న చోట పోలింగ్ కేంద్రాలను పెంచామని తెలిపారు. ఈమేరకు ఆయన హైదరాబాద్‌లో మీడియాతో మాట్లాడారు. మేడ్చల్.. మాల్కజ్‌గిరిలో ఎక్కువ పోలింగ్ స్టేషన్‌లు ఉన్నాయన్నారు. ఓటింగ్ శాతం పెంచేందుకు అవగాహనా కార్యక్రమాలు నిర్వహిస్తామన్నారు. ఓటర్ స్లిప్‌ల పంపిణీ కార్యక్రమాన్ని మొదలు పెడతామని చెప్పారు. హైదరాబాద్‌లో ఓటింగ్ శాతం పెరగాలన్నారు.

 

16:54 - November 20, 2018

హైదరాబాద్ : తెలంగాణ ఎన్నికల నేపథ్యంలో ప్రచారంలో బిజీబిజీగా గడుపుతున్న నేతలు జోరుమీదున్నారు. రోడ్ షోలు, బహిరంగ సభలతో వారి వారి నియోజకవర్గాలలో జోష్ గా ప్రచారాలను కొనసాగిస్తున్నారు. ఈ నేపథ్యంలో తన వాగ్ధాటితో టీఆర్ఎస్ నేత కేటీఆర్ నగరంలో పలు రోడ్ షోలతో బిజీ బిజీ కానున్నారు. ఈ క్రమంలో కేటీఆర్ రోడ్ షోల షెడ్యూల్ ఖరారయ్యింది. తెలంగాణ ఎన్నికల ప్రచారంతో టీఆర్ఎస్ దూకుడు పెంచింది. ఓవైపు కేసీఆర్ ప్రచార సభలతో హోరెత్తిస్తుంటే.. ఇటు యువనేత కేటీఆర్ కూడా బరిలోకి దిగుతున్నారు. బుధవారం నుంచి గ్రేటర్ హైదరాబాద్‌ పరిధిలోని నియోజకవర్గాల్లో ప్రచారానికి సిద్ధమయ్యారు. జంటనగరాల్లో రోడ్‌షోలతో హోరెత్తించబోతున్నారు. ఈ మేరకు కేటీఆర్ రోడ్ షో షెడ్యూల్‌ను విడుదల చేశారు. కేటీఆర్ రోడ్‌షోలు సాయంత్రం 4 గంటల నుంచి 7 గంటల వరకు.. రాత్రి 7 గంటల నుంచి 10 గంటల వరకు కొనసాగుతాయి. 

కేటీఆర్ రోడ్ షో షెడ్యూల్.. 
21- ఉప్పల్, మల్కాజ్ గిరి 
22- మహేశ్వరం, ఎల్బీ నగర్ 
23- కంటోన్మెంట్, సికింద్రాబాద్ 
24- సనత్ నగర్, జూబ్లీహిల్స్ 
26- కుత్భుల్లాపూర్, కూకట్ పల్లి 
27- గోషామహల్, ఖైరతాబాద్ 
28- శేరిలింగంపల్లి, పటాన్ చెరు 
29- అంబర్ పేట, ముషీరాబాద్ నియోజకవర్గాల్లో మంత్రి ఎన్నికల ప్రచారం నిర్వహించనున్నారు. 

 

11:42 - November 17, 2018

హైదరాబాద్ : కాంగ్రెస్ అభ్యర్థుల మూడో జాబితా విడుదల అయింది. 13 మందిలో కాంగ్రెస్ జాబితా విడుదల చేశారు. మూడో జాబితాలో పిసీసీ మాజీ చీఫ్ పొన్నాల లక్ష్మయ్యకు చోటు లభించింది. ఒకటి, రెండో జాబితాలో పోన్నాలకు సీటు దక్కలేదు. దీంతో హుటాహుటిన పొన్నాల ఢిల్లీ వెళ్లి కాంగ్రెస్ అదిష్టానంతో మంతనాలు జరిపారు. జనగామ సీటు విషయమై రాహుల్‌ను కలిశారు. అయితే పొత్తుల్లో భాగంగా జనగామ సీటు కూటమిలోని మిత్రులకు కేటాయించామని...కోదండరాంతో మాట్లాడుకోవాలని సూచించారు. దీంతో రంగంలోకి  ఉత్తమ్ కుమార్, కుంతియా, పొన్నాల లక్ష్మయ్య కోదండరాంతో సమావేశం అయ్యారు. జనగామ సీటుపై తీవ్ర చర్చలు జరిపారు. అనంతరం జనగామ సీటును వదిలివేయడానికి కోదండరాం అంగీకరించారు. దీంతో పొన్నాలకు కాంగ్రెస్ లైన్ క్లియర్ చేసింది. జనగామ నుంచి పోటీ చేసేందుకు పొన్నాలకు మార్గం సగమం అయింది.
జనగామ నుంచి పొన్నాల పోటీ 
జనగామ స్థానం నుంచి పొన్నాల బరిలో దిగుతున్నారు. ఢిల్లీలో మకాం వేసి సీట్లు దక్కించుకున్న వారిలో నలుగురు నేతలున్నారు. మూడో జాబితా ప్రకటించడంలో అధిష్టానం పారదర్శకత ప్రదర్శించినట్లు కనిపిస్తోంది. కాంగ్రెస్ 94 స్థానాల్లో పోటీ చేయాలని భావించింది. తొలి జాబితాలో 65 మందిని, రెండో జాబితాలో 10 మందిని, తాజాగా మూడో జాబితాలో 13 మంది అభ్యర్థులను ప్రకటించింది. మొత్తంగా 88 మంది కాంగ్రెస్ అభ్యర్థులను ప్రకటించారు. ఇంకా పెండింగ్‌లో ఆరు స్థానాలు ఉన్నాయి. ఈ స్థానాలపై కాంగ్రెస్ ఏ విధంగా స్పందిస్తుంది.. ఎవరి పేర్లు ప్రకటిస్తారు? అని ఆసక్తి నెలకొంది. 
మూడో జాబితాలోని అభ్యర్థులు వీరే...
జనగాం..పొన్నాల లక్ష్మయ్య
దేవరకొండ.. బాలూనాయక్ 
తుంగతుర్తి.. అద్దంకి దయాకర్ 
ఇల్లందు... బానోతు హరిప్రియ నాయక్ 
కొల్లాపూర్.. బీరం హర్షవర్ధన్ రెడ్డి
బోథ్...శోయం బాబూరావు
నిజామాబాద్ అర్బన్...తెహర్‌బిన్ హందన్ 
నిజామాబాద్ రూరల్...రేకుల భూపతిరెడ్డి
బాల్కొండ...అనిల్ కుమార్
ఎల్బీనగర్...సుధీర్ రెడ్డి 
కార్వాన్..ఉస్మాన్‌బిన్ మొహ్మద్
యాకుత్‌పురా...రాజేందర్ రాజు 
బహుదుర్‌పురా...కాలెం బాబా 

 

10:41 - November 17, 2018

హైదరాబాద్: దేశంలోకి అక్రమంగా చొరబడి అన్ని అర్హత సర్టిఫికెట్లు సంపాయించి హైదారాబాద్‌లొ నివాసముంటున్న పాకిస్థాన్ దేశీయిడు మహ్మద్ ఇక్రమ్ అలియాస్ అబ్బాస్‌ను పోలీసులు చాకచక్యంగా పట్టుకొన్నారు. తీగలాగితే డొంక కదిలినట్టుగా ఇక్రమ్ భాగోతం ఒకటొకటి బయటకు వచ్చింది. ఇక్రమ్‌కు నకిలీ సర్టిఫికెట్లు పొందటంలో సహకరించిన ముంబైకి చెందిన ఓ వ్యక్తిని పోలీసులు అరెస్టు చేశారు.
పోలీసుల సమాచారం మేరకు ఇక్రమ్ హైదరాబాద్‌కు చెందిన ఓ మహిళతో దుబాయ్‌లో పరిచయం పెంచుకొని తాను ఢిల్లీ వాసినని నమ్మించి ఆమెను పెళ్లి చేసుకున్నాడు. ఆ తర్వాత అతను పాకిస్థానీ అని తెలుసుకొని ఆమె భారత్‌కు తిరిగి వచ్చేసింది. విషయం తెలుసుకున్న ఇక్రమ్ నేపాల్ ద్వారా తానుకూడా దేశంలోకి ప్రవేశించి హైదరాబాద్‌లో ఆమె నివసించే ప్రాంతంలోనే గది తీసుకొని నివాసం ఉంటున్నాడు. ఏడేళ్లుగా ఇక్కడే నివాసం ఉంటూ నకిలీ సర్టిఫికెట్లు పొంది పాస్‌పోర్టు కూడా పొందాడు. ఆమె చిత్రాలను సోషల్ మీడియాలో పోస్టు చేస్తానంటూ ఆమెను బ్లాక్‌మెయిల్ చేస్తుండటంతో ఆ మహిళ పోలీసులకు ఫిర్యాదు చేసింది. ఇక్రమ్‌ను అరెస్టు చేసిన పోలీసులు నకిలీ సర్టిఫికెట్లు పొందేందుకు సహకరించిన వారినీ విచారించి అరెస్టు చేస్తున్నారు. హైదరాబాద్‌లో హోటల్ మేనేజిమెంటులో కోర్సు చేసి అదే కోర్సులో కొందరికి శిక్షణ ఇస్తున్నట్టు పోలీసులు వెల్లడించారు. రెండు గదుల ఇల్లు అద్దెకు తీసుకొని అక్కడే హోటల్ మేనేజిమెంట్‌లో ట్రైనింగ్ ఇస్తున్నాడు. ఈ సందర్బంగా నకిలీ సర్టిఫికేట్లు ఇచ్చిన రమేష్ ములే అనే ముంబైకి చెందిన వ్యక్తిని పోలీసులు అరెస్టు చేసి విచారిస్తున్నారు.       
 

 

09:55 - November 17, 2018

హైదరాబాద్ : మహాకూటమిలో సీట్ల సర్దుబాటు కొలిక్కి వచ్చింది. తెలంగాణ జనసమితి నేడు తమ పార్టీ అభ్యర్థులను ప్రకటించనుంది. ఎనిమిది స్థానాల్లో ఆరు స్థానాలపై క్లారిటీ వచ్చింది. అయితే వరంగల్ ఈస్ట్, మిర్యాలగూడ స్థానాలపై సందిగ్థత కొనసాగుతోంది. మధ్యాహ్నంలోగా ఈ రెండు సీట్లపై క్లారిటీ వచ్చే అవకాశం ఉందని ఆ పార్టీ నేతలు చెబుతున్నారు. అభ్యర్థుల ప్రకటన తర్వాత కోదండరాం ప్రచారంపై దృష్టి పెట్టనున్నారు. ఇప్పటికే ప్రచారంలో వెనుకబడ్డామని అనేక సార్లు చెప్పిన కోదండారం... టీఆర్ఎస్‌కు ధీటుగా ఎన్నికల ప్రచారాన్ని హోరెత్తించే విధంగా ప్రణాళికలు రచిస్తున్నట్లుగా తెలుస్తోంది. 

 

09:46 - November 17, 2018

హైదరాబాద్ : మహాకూటమిలో సీట్ల పంచాయతీ తేలాయి. నేడు కాంగ్రెస్ మూడో జాబితా విడుదల చేయనుంది. 19 మంది అభ్యర్థులతో కూడిన జాబితాను ప్రకటించనుంది. ఇప్పటికే రెండు జాబితలో 75 మంది అభ్యర్థులను కాంగ్రెస్ ప్రకటించింది. నామినేషన్ దాఖలుకు సోమవారం ఆఖరి రోజు కావడంతో అభ్యర్థులకు ఇవాళా బీపామ్‌లు అందజేయనుంది. ఇప్పటివరకు 75 మందిని ప్రకటించిన కాంగ్రెస్.. ఇవాళా మరో 19 స్థానాలకు అభ్యర్థులను ప్రకటించనుంది. మధ్యాహ్నానానికి అభ్యర్థులను ప్రకటించనుంది.
కాంగ్రెస్ తరపు నుంచి బీసీలకు 22 సీట్లు 
హుజూర్‌నగర్‌లో టీపీసీసీ చీఫ్ ఉత్తమ్ కుమార్ రెడ్డి నామినేషన్ దాఖలు చేయనున్నారు. మొత్తం 94 స్థానాల్లో పోటీ చేయాలని కాంగ్రెస్ భావిస్తోంది. మహాకూటమి నుంచి బీసీలకు 27 సీట్లు ఇస్తే...వీటిలో కాంగ్రెస్ తరపు నుంచి బీసీలకు 22 సీట్లు ఇవ్వాలని నిర్ణయించింది. అభ్యర్థుల ప్రకటనపై తీవ్ర కసరత్తు చేసిన కాంగ్రెస్ అధిష్టానం.. టీఆర్ఎస్ కంటే రెండు సీట్లైన బీసీలకు అధికంగా ఇవ్వాలని నిర్ణయించింది.
నేడు అభ్యర్థులకు బీఫారాలు అందజేత 
7 బీసీ సీట్లలో జనగామకు పొన్నాల లక్ష్మయ్య, బాల్కొండకు ఇరవత్రి అనిల్, సికింద్రాబాద్‌కు కాసాని జ్నానేశ్వర్, వరంగల్ తూర్పుకు రవిచంద్ర, నారాయణ్ ఖేడ్‌కు సురేష్ షట్కర్, దేవరకద్రకు ప్రదీప్ గౌడ్ పేర్లు ప్రకటించనున్నట్లు సమాచారం. మరోవైపు గాంధీభవన్‌లో పార్టీ అభ్యర్థులకు ఉత్తమ్ బీఫారాలు అందజేయనున్నారు. 

 

09:17 - November 17, 2018

హైదరాబాద్ : నందమూరి హరికృష్ణ కుమార్తె సుహాసిని అనూహ్యంగా కూకట్‌పల్లి టికెట్ దక్కించుకున్నారు. కూకట్‌పల్లి నియోజకవర్గం నుంచి ఆమె పోటీ చేయనున్నారు. నందమూరి సుహాసిని నేడు నామినేషన్ వేయనున్నారు. సినీ నటుడు, టీడీపీ ఎమ్మెల్యే నందమూరి బాలకృష్ణతో కలిసి ఆమె తన నామినేషన్ పత్రాలను దాఖలు చేయనున్నారు. ఉదయం ఎన్టీఆర్ ఘాట్‌లో సుహాసిని ఎన్టీఆర్‌కు నివాళులర్పించారు. బాలకృష్ణ, తెలంగాణ టీడీపీ అధ్యక్షుడు ఎల్.రమణ ఇతర టీడీపీ నేతలతో కలిసి సుహాసిని కూకట్‌పల్లి చేరుకుంటారు. 11:21 గంటలకు నామినేషన్ దాఖలు చేస్తారు. ఎటువంటి హడావుడి లేకుండా చాలా నిరాడంబరంగా ఈ కార్యక్రమాన్ని నిర్వహించాలని నందమూరి కుటుంబం భావిస్తోంది.

కాగా పలు అనూహ్య పరిణామాల తర్వాత కూకట్‌పల్లి నుంచి సుహాసినిని బరిలోకి దింపారు. అప్పటి వరకు ప్రచారంలో ఉన్న పెద్దిరెడ్డిని కాదని, సుహాసినికి టికెట్ ఇచ్చారు. ఆమెను బరిలోకి దింపడం వ్యూహాత్మకమేనని, ఆ ప్రభావం మొత్తం మహాకూటమి నేతలపై పడుతుందని, వారి గెలుపు మరింత సులభం అవుతుందని టీడీపీ భావిస్తోంది. సుహాసిని గెలుపు ఖాయమనే ధీమాతో ఉన్నారు.

08:56 - November 17, 2018

హైదరాబాద్ : తెలంగాణలో బీజేపీ అభ్యర్థుల నాలుగో జాబితా విడుదల చేసింది. ఏడుగురితో కూడిన జాబితా విడుదల నిన్న రాత్రి ప్రకటించింది. బీజేపీ జాతీయ ఎన్నికల కమిటీ కార్యదర్శి, కేంద్ర మంత్రి జేపీ నడ్డా ఏడు స్థానాలకు అభ్యర్థుల పేర్లను ప్రకటించారు. టీఆర్ఎస్ అధినేత కేసీఆర్‌కు పోటీగా గజ్వేల్‌లో బీజేపీ రాష్ట్ర మహిళా విభాగం అధ్యక్షురాలు ఆకుల విజయను బరిలోకి దింపారు. గత ఎన్నికల్లో ఆమె సిరిసిల్లలో కేటీఆర్‌పై పోటీ చేసి ఓడి పోయారు. టీఆర్ఎస్‌లో టికెట్ దక్కకపోవడంతో బీజేపీలో చేరిన తాజా మాజీ ఎమ్మెల్యే బొడిగె శోభకు టికెట్ దక్కలేదు. 
నాలుగో జాబితాలోని అభ్యర్థులు వీరే...
ఎ.శ్రీనివాసులు...(చెన్నూరు)
జంగం గోపి...(జహీరాబాద్) 
ఆకుల విజయ...(గజ్వేల్)
శ్రీధర్ రెడ్డి...(జూబ్లీహిల్స్) 
భవర్‌లాల్ వర్మ...(సనత్ నగర్) 
సోమయ్య గౌడ్...(పాలకుర్తి)
ఎడ్ల అశోక్ రెడ్డి...(నర్సంపేట) 

 

08:04 - November 17, 2018

హైదరాబాద్ : ఎట్టకేలకు జనగామ సీటుపై ఉత్కంఠ వీడింది. పీసీసీ చీఫ్ మాజీ పొన్నాల లక్ష్మయ్యకు కాంగ్రెస్  లైన్ క్లియర్ చేశారు. జనగామ సీటును వదిలేయడానికి టీజేఎస్ అధ్యక్షుడు కోదండరాం అంగీకరించారు. జనగామ నుంచి పోటీ చేసేందుకు పొన్నాల లక్ష్మయ్యకు మార్గం సుగమం అయింది. జనగామ నుంచి పొన్నాల బరిలోకి దిగనున్నారు. టీజేఎస్ కార్యాలయంలో కోదండరామ్‌తో టీపీసీసీ చీఫ్ ఉత్తమ్ కుమార్ రెడ్డి, తెలంగాణ రాష్ట్ర కాంగ్రెస్ వ్యవహార ఇంచార్జ్ కుంతియా, పొన్నాల లక్ష్మయ్య చర్చలు జరిపారు. రాత్రి 11 గంటల నుంచి తెల్లవారు జామున 3 గంటల వరకు చర్చలు జరిపారు. 
జనగామ సీటు వదులుకున్న కోదండరామ్  
జనగామ సీటుపై తెల్లవారు జామున 3 గంటల దాకా ఉత్కంఠ కొనసాగింది. మొదటగా టీజేఎస్ కార్యాలయంలో కోదండరామ్‌తో టీపీసీసీ చీఫ్ ఉత్తమ్ కుమార్ రెడ్డి చర్చలు జరిపారు. ప్రధానంగా జనగామ సీటుపైనే సుదీర్ఘంగా చర్చలు జరిపారు. కొంతసేపటికి కుంతియా కూడా వీరికి జత కలిశారు. ముగ్గురు నేతలు చర్చించారు. రాత్రి 1.30 గంటల తర్వాత చర్చలకు పొన్నాల లక్ష్మయ్య కూడా హాజరయ్యారు. నలుగురు కలిసి జనగామలో కాంగ్రెస్ పార్టీ బలాబలాపై చర్చించారు. జనగామ సీటును కాంగ్రెస్‌కు ఇవ్వాలంటూ కోదండరామ్‌కు ప్రతిపాదించారు. దాదాపు నాలుగు గంటలకు పైగా చర్చించిన తర్వాత జనగామ సీటుపై కుంతియా క్లారిటీ ఇచ్చారు. జనగామ సీటును వదులుకునేందుకు కోదండరామ్ అంగీకరించినట్లు కుంతియా ప్రకటించారు. దీంతో పొన్నాల లక్ల్మయ్యకు లైన్ క్లియర్ అయినట్లుగా కుంతియా తెలిపారు.
కామన్ మినిమమ్ ప్రోగ్రామ్‌ కన్వీనర్‌గా కోదండరామ్.. 
కామన్ మినిమమ్ ఎజెండాను రెడీ చేశామని...దీనికి భాగస్వామ్య పార్టీలు అంగీకారం తెలిపాయని కుంతియా అన్నారు. కూటమిలోని భాగస్వామ్య పార్టీలతో కో..ఆర్డినేషన్ కమిటీ ఏర్పాటు చేస్తామని కుంతియా తెలిపారు. కామన్ మినిమమ్ ప్రోగ్రామ్‌ను కోదండరాం లీడ్ చేస్తారని..కోదండరాం కన్వీనర్‌గా వ్యవహరిస్తారని ప్రకటించారు. కూటమిలోని భాగస్వామ్య పక్షాలు ప్రభుత్వంలోనూ భాగస్వాములు అవుతారని తెలిపారు. కామన్ మినిమమ్ ప్రోగ్రాం కమిటీకి కేబినెట్ హోదా ఉంటుందని తెలిపారు. రాష్ట్ర వ్యాప్తంగా ప్రచారం చేయడానికి కోదండరామ్ అంగీకరించారని కుంతియా వెల్లడించారు. 

 

14:24 - November 16, 2018

ఢిల్లీతెలంగాణలో కాంగ్రెస్ అభ్యర్థుల ఎంపిక చివరి దశకు చేరుకుంది. రేపటి నుంచి కాంగ్రెస్ అభ్యర్థులకు బీఫాంలు అందజేయనున్నారు. ఈరోజు మూడో జాబితా వెలువడే అవకాశం ఉంది. ఇప్పటికే పలువురు అశావహులతో రాహుల్ గాంధీ చర్చించారు. నాలుగు నియోజవర్గాల ఆశావహులతో ఢిల్లీలో రాహుల్ భేటీ అయ్యారు. ఇల్లెందు, హుజురాబాద్, మిర్యాలగూడ, తుంగతుర్తి ఆశావహుల బలాబలాలను రాహుల్ నేరుగా తెలుసుకున్నారు. గెలిచే అభ్యర్థులకే టికెట్ ఇస్తామని రాహుల్ స్పష్టం చేశారు.

నల్లగొండ, ఖమ్మం, ఆదిలాబాద్ జిల్లాలకు సంబంధించిన నేతలు రాహుల్ గాంధీని కలిశారు. తుంగతుర్తిని ఆశిస్తున్న అద్దంకి దయాకర్, వడ్డేపల్లి రవిలతో రాహుల్ సమావేశం అయ్యారు. వీరితో వన్ టూ వన్ నిర్వహించారు. మిర్యాలగూడ సీటు ఆశిస్తున్న రఘువీర్‌తో, ఇల్లందు స్థానాన్ని కోరుతున్న హరిప్రియ, వెంకటేష్‌లతో, అదే విధంగా హుజూరాబాద్ టికెట్ కోరుతున్న కౌశికరెడ్డిలతో రాహల్ గాంధీ భేటీ అయ్యారు. ఆశావహుల గెలుపు సామర్థ్యాలను రాహుల్ అడిగి తెలుసుకున్నారు. ఇవాళా 19 మంది అభ్యర్థులతో జాబితా విడుదల చేయనున్నారు.
ఇప్పటికే రెండు జాబితాల ప్రకటన
ఇప్పటికే రెండు జాబితాలను కాంగ్రెస్ ప్రకటించింది. మొదటి జాబితాలో 65 మందిని, రెండో జాబితాలో 10 మంది అభ్యర్థులను ప్రకటించింది. మొత్తం 75 స్థానాలకు అభ్యర్థులను ప్రకటించింది. కాంగ్రెస్ 94 స్థానాల్లో పోటీ చేయాలని భావిస్తోంది. 

 

Pages

Don't Miss

Subscribe to RSS - Hyderabad