Hyderabad Citizens

11:49 - November 30, 2017

హైదరాబాద్ : ప్రారంభమై రెండు రోజులు కాకముందే అప్పుడే నగరవాసులకు మెట్రో రైలు కష్టాలు మొదలయ్యాయి. ఉప్పల్ మెట్రో స్టేషన్ లో ప్రయాణికుల రద్దీ తగ్గింది. ఉప్పల్ మెట్రో స్టేషన్ లో ప్రయాణికుల రద్దీ అంతంతమాత్రంగానే ఉంది. రెండో రోజు ప్రయాణికుల రద్దీ తగ్గింది. పార్కింగ్ సమస్య తలెత్తింది. మంగళవారం ప్రధాని నరేంద్రమోడీ మెట్రో రైలును ప్రారంభించారు. మెట్రో స్టేషన్ ప్రారంభోత్సవాన్ని అట్టహాసంగా నిర్వహించారు. మరిన్ని వివరాలను వీడియోలో చూద్దాం..

 

21:37 - November 29, 2017

హైదరాబాద్‌ : నగరంలో మెట్రో పరుగులు ప్రారంభమయ్యాయి. ఉదయం 6 గంటలకు నాగోల్‌ నుంచి మియాపూర్‌కు మెట్రో తొలి కూత మొదలైంది. మెట్రోలో ప్రయాణించాలని ఎప్పటి నుంచో ఎదురు చూస్తున్న నగరవాసులు రైలు ఎక్కేందుకు ఉత్సాహం ప్రదర్శించారు. మెట్రోతో సమయం ఆదా అవుతుందని.. కాలుష్యం తగ్గుతుందని ఆనందం వ్యక్తం చేస్తున్నారు. మరికొందరు మాత్రం ఛార్జీలు అధికంగా ఉన్నాయని పెదవి విరుస్తున్నారు. 

నగర ప్రజలు ఎప్పుడెప్పుడా అని ఎదురు చూస్తున్న మెట్రో కల సాకారమైంది. హైదరాబాద్‌లో మెట్రో పరుగులు ప్రయాణికులకు కొత్త అనుభూతిని మిగులుస్తున్నాయి. ఉదయం ఆరు గంటలకు ఒక రైలు నాగోలు స్టేషన్‌లో, మరో రైలు మియాపూర్‌ స్టేషన్‌లో బయల్దేరాయి. మెట్రోలో తొలిరోజు ప్రయాణించేందుకు ప్రజలు ఉత్సాహం చూపించారు. ఉద్యోగులు, వ్యాపారులు, విద్యార్థులు మెట్రో జర్నీకి ఎక్కువ ప్రాధాన్యం ఇస్తున్నారు. సెల్‌ ఫోన్‌లో ఫోటోలు తీసుకుంటూ.. సోషల్‌ మీడియాలో పోస్టులు పెడుతున్నారు. వేగంగా గమ్యాన్ని చేరుస్తున్న మెట్రో రైలు ప్రయాణాన్ని ఎంజాయ్‌ చేస్తున్నారు. 

మొదటి రోజు సుమారు లక్షమంది ప్రయాణించే అవకాశం ఉందని మెట్రో అధికారులు అంచనా వేశారు. ప్రతి పావుగంటకో రైలు చొప్పున మొత్తం 18 రైళ్లు తిరుగుతాయి. మెట్రో కార్డుల విక్రయం మొదలుపెట్టిన తర్వాత మూడు రోజుల్లోనే 12 వేలకుపైగా అమ్మడయ్యాయి. రద్దీకి అనుగుణంగా రైళ్ల సంఖ్యను పెంచాల్సి వస్తుందని అధికారులు తెలిపారు. 
మియాపూర్‌-నాగోలు రూట్‌లో 27.6 కిలోమీటర్ల మార్గంలో మొత్తం 24 మెట్రో స్టేషన్లున్నాయి. వీటి మధ్య ఆర్టీసీ బస్సులో ప్రయాణించాలంటే దాదాపు రెండు గంటల సమయం పడుతోంది. అదే మెట్రోలోనైతే గంటలో ఆ చివరి నుంచి ఈ చివరికి చేరుకోవచ్చు. సాంకేతిక సర్దుబాట్ల తర్వాత ఈ సమయం మరింత తగ్గుతుందని మెట్రో వర్గాలు చెబుతున్నాయి. 

మెట్రో ప్రయాణానికి ఎల్‌అండ్‌టీ అధికారులు కొన్ని స్టేషన్లలో స్మార్ట్‌ కార్డులను విక్రయిస్తున్నారు. వీటిని కొనేందుకు 200 రూపాయలు చెల్లించాలి. ఇందులో రూ.100తో రీఛార్జి చేస్తారు. కార్డుకు 100 రూపాయలు తీసుకుంటారు. ఒకవేళ ఈ కార్డును మెట్రోస్టేషన్‌ కౌంటర్‌లో తిరిగి ఇచ్చేస్తే, 80 రూపాయలు వెనక్కు ఇస్తారు. ఉదయం ఆరింటికి రైళ్లు తిరగడం ప్రారంభమవుతున్నందున... ఐదు గంటల నుంచే కార్డుల్లో డబ్బులను రీఛార్జి చేసుకునే అవకాశం కల్పించారు. మరికొందరు మాత్రం మెట్రో ఛార్జీలు అధికంగా ఉన్నాయని పెదవి విరుస్తున్నారు. మెట్రో రైలులో ప్రయాణించాలని తెలంగాణలోని జిల్లాల నుంచి కూడా జనం తరలివస్తున్నారు.

17:44 - November 29, 2017

హైదరాబాద్ : మెట్రోరైలు నగర వాసులకు కొత్త అనుభూతినిస్తోంది. ఈ రోజు ఉదయం 6 గంటల నుండే నగరవాసులతో మెట్రో స్టేషన్లు కిటకిటలాడుతున్నాయి. తార్నాక, హబ్సీగూడ మెట్రో రైల్వేస్టేషన్ల వద్ద మెట్రో రైళ్లో ప్రయాణం చేస్తు సంతోషపడుతున్నారు. మెట్రో ట్రైన్‌ చాలా బాగుందని ప్రయాణికులు ఆనందంగా చెబుతున్నారు. మెట్రో ప్రారంభం కావడం వల్ల ట్రాఫిక్‌ సమస్యలు, ప్రమాదాలు తగ్గుతాయని ఆశిస్తున్నారు. నాగోల్‌ నుండి మియాపూర్‌ వరకు మెట్రో రైళ్లో ప్రయాణిస్తున్న ప్రయాణికులు టెన్ టివితో మాట్లాడారు. మరింత సమాచారాన్ని వీడియోలో చూద్దాం...

 

21:46 - October 15, 2017

హైదరాబాద్ : తెలుగు రాష్ట్రాల్లో విస్తారంగా వర్షాలు పడుతున్నాయి. రెండు రాష్ట్రాల్లోని చిన్నా, పెద్ద ప్రాజెక్టుల్లో జలకళ వచ్చింది. పలు జిల్లాల్లో  కుండపోత వానలతో పంటలు నీటిపాలయ్యాయి. ఇటు హైదరాబాద్‌ను మరోసారి భారీవర్షం ముంచెత్తింది. దీంతో రోడ్లన్నీ జలమయం అయ్యాయి. ట్రాఫిక్‌ జామ్‌లతో సిటీజనం నానా అవస్థలు పడుతున్నారు. మరోవైపు బంగాళాఖాతంతో అల్పపీడనం ఏర్పడటంతో మరో 3 రోజులు ఏపీ, తెలంగాణలకు భారీవర్షాలు తప్పవని విశాఖ వాతావరణశాఖ తెలిపింది.
హైదరాబాద్‌ను వదలని వరుణుడు  
హైదరాబాద్‌ను వరుణుడు వదలడంలేదు. భారీవర్షాలు ముంచెత్తడంతో సిటీ జనం అవస్థలు పడుతున్నారు. ఎల్బీనగర్, వనస్థలిపురం, బీఎన్‌రెడ్డి నగర్‌, హయత్‌నగర్‌లో కుండపోతగా వర్షం కురిసింది. గత పది రోజులుగా వర్షాలు కురుస్తుండడంతో జనజీవనం అతలాకుతలమైంది. ప్రతిరోజూ ఏదో ఒక సమయంలో నగరంలోని ఆయా ప్రాంతాల్లో వర్షం కురుస్తూనే ఉంది. అటు శివారు ప్రాంతాల్లో కూడా భారీగానే వర్షాలు కురుస్తున్నాయి. ఇప్పటికే డ్రైనేజీలన్నీ వర్షపు నీటితో నిండిపోయాయి. నాలాలు పొంగిపొర్లుతున్నాయి. భారీవర్షాలతో  అటు  నిజమాబాద్‌, కామారెడ్డి జిల్లాల్లో వేల ఎకరాల్లో పంటలు నాశనం అయ్యాయి. నిజామాబాద్‌జిల్లాలో వరిపంటను వర్షాలు దారుణంగా దెబ్బతీయగా.. కామారెడ్డి జిల్లాలో చేతికవచ్చిన పత్తిపంట నేలపాలయిందని అన్నదాతలు ఆవేదన చెందుతున్నారు.  
ఏపీలోనూ 
ఏపీలోనూ భారీవర్షాలకు పంటలు నేలరాలాయి. అనంతపురం, కర్నూలు జిల్లాల్లో  ఇటీవల కురిసిన  వర్షాలకు  మొత్తం 31.161 హెక్టార్లలో వివిధ పంటలకు తీవ్ర నష్టం వాటిల్లిందని జిల్లా అధికారులు తెలిపారు. కర్నూలు జిల్లావ్యాప్తంగా దాదాపు 834  కిలోమీటర్ల మేర రహదారులు దెబ్బతిన్నాయని, అలాగే 365  కిలోమీటర్ల మేర పంచాయతీ రాజ్ రోడ్లు దెబ్బతిన్నాయని జిల్లా అధికారులు లెక్కలు వేశారు.  
నిండుకుండలా ఆల్మట్టీ, శ్రీరాం సాగర్, శ్రీశైలం
మరోవైపు తెలుగు రాష్ట్రాల్లోని ముఖ్యమైన ప్రాజెక్టులన్నీ జలకళతో తొణికిసలాడుతున్నాయి. ఎగువన కురుస్తున్న వర్షాలతో పాటు రెండు రాష్ట్రాల్లో విస్తారంగా వర్షాలు కురుస్తుండడంతో ప్రాజెక్టుల్లోకి భారీగా వరదనీరు వచ్చి చేరుతోంది. దీంతో ఆల్మట్టీ, శ్రీరాం సాగర్, శ్రీశైలం, సింగూరు , నిజాంసాగర్, తదితర ముఖ్యమైన ప్రాజెక్టులన్నీ నీటితో నిండుకుండలా మారాయి. శ్రీశైలం ప్రాజెక్టులోకి ఇన్‌ఫ్లో ఎక్కువగా ఉండడంతో అధికారులు గేట్లు ఎత్తి నీటిని దిగువకు వదులుతున్నారు. దీంతో నాగార్జున సాగర్‌ నీటి మట్టం అమాంతం పెరిగుతోంది.  అయితే నాగార్జున సాగర్ నిండడానికి మరికొన్ని రోజులు పట్టే అవకాశం ఉందని అధికారులు అంటున్నారు. అటు  నిజామాబాద్ జిల్లాలోని  శ్రీరాంసాగర్ ప్రాజెక్టుకు కూడా భారీగా వరద నీరు వచ్చి చేరడంతో ప్రాజెక్టు నిండుకుండలా మారింది. దీంతో అధికారులు ప్రాజెక్టు గేట్లు ఎత్తి నీటిని కిందికి వదిలారు. 
బంగాళాఖాతంలో అల్పపీడనం
ఇదిలావుంటే బంగాళాఖాతంలో అల్పపీడనం ఏర్పడింది.. దీని ప్రభావంతో ఏపీలో పలుచోట్ల  భారీవర్షాలు పడే అవకాశం ఉందని విశాఖ వాతావరణ కేంద్రం తెలిపింది. మరోవైపు తెలంగాణలో  ఉపరితల ఆవర్తనం కొనసాగుతూనే ఉంది. భారీగా క్యూములోనింబస్‌ మేఘాలు ఏర్పడి.. హైదరాబాద్‌తోపాటు, పలు జిల్లాల్లో మరో 3రోజులు భారీ వర్షాలు పడతాయని వాతావరణ శాఖ అధికారులు తెలిపారు. 

 

12:40 - October 12, 2017

 

హైదరాబాద్ : ప్రతీ ఏడాది చలికాలంలో వచ్చే సీతాఫలాల కోసం నగరవాసులు ఎంతో ఆతృతగా ఎదురుచూస్తుంటారు. పిల్లలైతే ఎంతో ఇష్టంగా తింటారు. ఈ అమృతఫలానికున్న ప్రత్యేకతలు అనేకం. వీటి మధురమైన రుచి, కమ్మదనం మరే పండులోనూ దొరకదు కాబట్టి.. సీజనల్ ఫ్రూట్స్‌లో ది బెస్ట్‌ ఫ్రూట్ కస్టడ్‌ ఆపిల్. సీతాఫలం పండ్లల్లో రారాజు. దీనికున్న ఔషధ గుణాలు మరే పండుకు ఉండవంటే అతిశయోక్తి కాదు. ఇందులో ఉండే పొటాషియం కండర బలహీనతను పోగొడుతుంది. రక్తపోటును నియంత్రిస్తుంది. సీతాఫలాలలోని విటమిన్‌ ఎ చర్మ ఆరోగ్యానికి ఉపయోగపడుతుంది. ఈ పళ్లు తినడం వల్ల కళ్లకూ ఎంతో మేలని డాక్టర్లు సూచిస్తున్నారు. అజీర్ణ సమస్య తొలగించడంతో పాటు, మలబద్ధకాన్ని నివారిస్తుంది. ఇలా చెప్పుకుంటూ పోతే దీంతో ఉన్న ఉపయోగాలు అన్నీ ఇన్నీ కావు.

అన్ని బజార్లలో సీతాఫలాల అమ్మకాలు
ప్రస్తుతం సీతాఫలాలు హైదరాబాద్‌లో విరివిగా కనిపిస్తున్నాయి. ప్రకృతి వర ప్రసాదిత సీతాఫలాలు ఊళ్లు, పల్లెలు దాటి పట్నానికి చేరుకున్నాయి. రాజధాని నగరంలోని అన్ని బజార్లలో సీతాఫలాల అమ్మకాలు జరుగుతున్నాయి. ఈ ఏడాది సీతాఫలాలు త్వరగా వచ్చాయి. సాధారణమైన పళ్లు డజన్‌ 50 రూపాయలకు అమ్ముతున్నారు. ఇక ఫస్ట్‌ క్లాస్ పండ్లు డజన్‌కు 100 నుంచి 350 చొప్పున అమ్మకాలు సాగిస్తున్నారు. ఈ సారి వర్షాలు భారీగా కురవడంతో గతేడాది కంటే.. ఫలాలు కాస్త తక్కువ సంఖ్యలో నగరానికి చేరుకుంటున్నాయి. వర్షాలు పడుతుండటంతో పండ్లల్లో నాణ్యత తక్కువగా ఉంది. దీంతో కొనుగోలుదారులు వీటిని కొనుగోలు చేసేందుకు ముందుకు రావడం లేదు. గతేడాదితో పోలిస్తే ఈ సారి అమ్మకాలు తక్కువగానే ఉన్నాయని అమ్మకందారులు అంటున్నారు.

దీపావళికి ముందే నగరానికి
పల్లెవాసులు, గిరిజనులు సీతాఫలాలను దీపావళికి ముందే నగరానికి తరలించి అమ్ముతుంటారు. కొందరికి ఇది జీవనోసాధిగా కూడా మారింది. ముఖ్యంగా కరీంనగర్‌, మెదక్‌, శామీర్‌పేట్‌, గజ్వేల్, శంషాబాద్‌, కర్తాల్‌, సిద్ధిపేట జిల్లాలకు చెందిన..100 గ్రామాల నుంచి నగరానికి సీతాఫలాలు దిగుమతవుతుంటాయి. నగరంలోని పికెట్, ఎంజీబీఎస్, కొత్తపేట్‌, కూకట్‌పల్లి, బాలానగర్‌, దిల్‌సుఖ్‌నగర్‌ తదితర ప్రధాన మార్కెట్లలో ఏడు దశాబ్దాలకు పైగా నగరవాసులు ఈ పండ్లను కొంటున్నారు. ప్రకృతిలో పుట్టి ఏ రసాయనం ఉపయోగించకుండా పండే ఫ్రూట్‌ సీతాఫలం ఒక్కటే మరి.

 

07:45 - September 12, 2017

హైదరాబాద్ : గ్రేటర్‌ వాసులకు మెట్రో ట్రాఫిక్‌ కష్టాలు తీరనున్నాయి. గత కొంత కాలంగా మెట్రో రైల్‌ నిర్మాణ పనులతో ట్రాఫిక్‌ను మళ్లించడంతో నగర వాసులు తీవ్ర ఇబ్బందులు ఎదుర్కొన్నారు. ఇందులో భాగంగా అమీర్‌పేట, సికింద్రాబాద్‌, చిలకలగూడ చౌరస్తా ఏరియాలో ట్రాఫిక్‌ను మళ్లించారు. దీంతో ఇతర ప్రాంతాలకు వెళ్లాలంటే వాహనదారులు 5 కిలో మీటర్లు అదనంగా ప్రయాణం చేయాల్సి వచ్చేది. ఒలిఫెంటా వద్ద రైల్వే ట్రాక్‌పై మెట్రో సిబ్బంది స్టీల్‌ బ్రిడ్జ్‌ నిర్మాణ పనులు పూర్తి చేశారు. ఈ బ్రిడ్జ్‌ నిర్మాణం కోసం అధికారులు సుమారు 90 లక్షల రూపాయలు వెచ్చించారు. స్టీల్‌ బ్రిడ్జ్‌ నిర్మాణమే కాకుండా బ్రిడ్జ్‌కి ఇరువైపులా సిసి రోడ్డు నిర్మాణం చేపట్టారు. గతంలో ఈ బ్రిడ్జి కింద నుండి ప్రయాణం చేయాలంటే బురద నీటిలోనే వెళ్లాల్సి వచ్చేది. ప్రస్తుతం స్టీల్‌ బ్రిడ్జ్‌ నిర్మాణంతో ఆ బ్రిడ్జ్‌ కింద రోడ్డు రూపురేఖలు పూర్తిగా మారిపోయాయి. అధికారులు శరవేగంగా పనులు పూర్తి చేయడంతో వాహనదారులు సంతోషం వ్యక్తం చేస్తున్నారు. మొత్తానికి మెట్రో పనులు కూడా శరవేగంగా పూర్తి కావస్తుండడంతో నగర వాసులకు ప్రయాణం మరింత సులభతరం కానుంది.

 

06:46 - June 3, 2017

హైదరాబాద్ : వర్షాకాలం వచ్చేస్తోంది. వర్షాలు ఎప్పుడైనా కురువొచ్చు. అయితే... హైదరాబాద్‌లోని నాలాల్లో పూడికతీత పనులు పూర్తి కాకపోవడంతో నగరవాసులు బెంబేలెత్తుతున్నారు. చిన్నపాటి వర్షానికే రోడ్లపై నీళ్లు నిలుస్తున్న పరిస్థితి ఉన్న నేపథ్యంలో.. భారీ వర్షాలు కురిస్తే పరిస్థితి ఏంటని ఆందోళన చెందుతున్నారు. ఇప్పటికే నాలాల పూడికతీత పనులు పూర్తి కావాల్సి ఉన్నప్పటికీ.. అధికారుల నిర్లక్ష్యంతో పనులు నత్తనడకన కొనసాగడంపై ఆగ్రహం వ్యక్తం చేస్తున్నారు. ప్రతి ఏడాది మాదిరిగానే ఈ ఏడాది కూడా ఇబ్బందులు తప్పవా అని ఆందోళన చెందుతున్నారు. వర్షాకాలంలో ప్రజలకు ఎలాంటి ఇబ్బందులు కలగకుండా ఉండేందుకు.. వర్షపు నీరు సాఫీగా వెళ్లేందుకు ప్రతి ఏడాది జీహెచ్‌ఎంసీ.. ప్రధాన నాలాలు, కాలువల్లో పూడిక తీస్తుంది. ఇందుకోసం 25 నుంచి 30 కోట్ల రూపాయలు ఖర్చు చేస్తుంది. అయితే ఈ ఏడాది నాలాల శుద్ధి కోసం 317 పనులుగా విభజించి టెండర్లు పిలిచారు. ఇందుకుగాను 28 కోట్ల 49 లక్షలు ఖర్చు అవుతుందని అంచనా వేశారు. వీటిలో 114 పనులు మనుషుల ద్వారా.. 58 పనులు మిషన్ల ద్వారా చేయించడంతో పాటు.. మిగిలిన వాటిని ఇతర మార్గాల ద్వారా చేయించాలని నిర్ణయించారు. ఈ పనులన్నీ మే 31 వరకు పూర్తి చేయాల్సి ఉంది. కానీ.. ఇప్పటివరకు కేవలం 56 శాతం పనులు మాత్రమే పూర్తి అయ్యాయని అధికారిక లెక్కలు చెబుతున్నాయి. వీటిలో సౌత్‌జోన్‌లో 90 శాతం పనులు కాగా.. ఈస్ట్‌జోన్‌లో 76 శాతం, నార్త్‌జోన్‌లో 63 శాతం, వెస్ట్‌జోన్‌లో 39 శాతం పనులు పూర్తయ్యాయి. సెంట్రల్‌ జోన్‌లో పరిస్థితి మరీ దారుణంగా ఉంది. కేవలం 32 శాతం పనులు మాత్రమే పూర్తయ్యాయి.

పలువురు అధికారుల సస్పెన్షన్..
గతేడాది వర్షాకాలం ఇబ్బందుల సమయంలో ఏడాది పొడవునా నాలాల్లో పూడికతీత పనులు చేస్తామని మంత్రితో పాటు.. జీహెచ్‌ఎంసీ కమిషనర్‌ చెప్పారు. కానీ.. పరిస్థితి మాత్రం అందుకు భిన్నంగా కనిపిస్తోంది. పైగా నాలాల్లో పూడికతీత వ్యవహారంలో భారీ కుంభకోణం బయటపడింది. 18 మంది కాంట్రాక్టర్లపై క్రిమినల్‌ కేసులు నమోదు కాగా... 12 మంది అసిస్టెంట్‌ ఇంజనీర్లు సస్పెన్షన్‌కు గురయ్యారు. అయినా కూడా పరిస్థితుల్లో ఎలాంటి మార్పు కనిపించడం లేదు. వర్షాకాలం సమీపిస్తున్న నేపథ్యంలో పనులు నత్తనడకన కొనసాగుతుండడంపై నగరవాసులు ఆందోళన వ్యక్తం చేస్తున్నారు. ఇప్పటికైనా అధికారులు మాటలు చెప్పడం మానేసి చేతల్లో చూపించాలంటున్నారు. మరీ.. జీహెచ్‌ఎంసీ నాలాల పూడికతీత పనుల్లో వేగం పెంచుతుందా.. లేక ప్రతి ఏడాది మాదిరిగానే నగరవాసులను ఇబ్బందికి గురి చేస్తుందా.. చూడాలి !

06:55 - April 24, 2017

హైదరాబాద్: గ్రేటర్‌ హైదరాబాద్‌లో 9 లక్షల 12 వేల నల్లా కనెక్షన్లు ఉన్నాయి. నగరంలో చాలా చోట్ల రోజు విడిచి రోజు నీటి సరఫరా జరుగుతుంది. ఇది వేసవి కాలంలో అయితే ఎప్పుడు నీళ్లు వస్తాయో అర్ధం కాని పరిస్థితి. కానీ ప్రస్తుతం జలమండలి తీరు ప్రజలను విస్మయానికి గురి చేస్తోంది. నీళ్లు సక్రమంగా రాకపోయినా.. నీటి బిల్లులు మాత్రం భారీగా పంపిస్తున్నారు.

జలమండలి అధికారులపై నగరవాసులు ఆగ్రహం.....

జలమండలి అధికారులపై నగరవాసులు ఆగ్రహం వ్యక్తం చేస్తున్నారు. ఒక్కో కనెక్షన్‌పై 500 నుంచి 800 రూపాయల వరకు అధికంగా బిల్లులు బాదుతున్నారని ప్రజలంటున్నారు. మరోవైపు పని చేయని నీటి కనెక్షన్లకు సైతం బిల్లులు వసూలు చేస్తున్నారంటున్నారు. వినియోగించిన నీటి పరిమాణం ఆధారంగానే నీటి బిల్లులు వేయాల్సి ఉన్నప్పటికీ.. నీళ్లు విడిచిన సమయం ప్రకారం.. వాటర్‌ రాకపోయినా బిల్లులు వసూలు చేయడంపై ప్రజలు ఆందోళన వ్యక్తం చేస్తున్నారు.

పాలనా సౌలభ్యం కోసం గ్రేటర్‌ను జలమండలి ని...

మరోవైపు పాలనా సౌలభ్యం కోసం గ్రేటర్‌ను జలమండలి 5,545 డాకెట్లుగా విభజించింది. ఎక్కువ లేదా తక్కువ నీళ్లు వాడుకున్నా సరే బిల్లు మాత్రం ఒకే విధంగా అధికారులు వసూలు చేస్తున్నారు. ప్రతినెలా నీటి చార్జీల కింద జలమండలి కోట్ల రూపాయలు వసూలు చేస్తోంది. ప్రజలపై 10 కోట్ల మేర అదనపు భారం పడుతుందంటున్నారు. ఇప్పటికైనా ప్రభుత్వం దీనిపై స్పందించి.. ప్రతిరోజు నీళ్లు సరఫరా చేయడంతో పాటు.. బిల్లులు పారదర్శకంగా ఉండేలా చర్యలు తీసుకోవాలని ప్రజలు కోరుతున్నారు.

06:52 - March 5, 2017

హైదరాబాద్ : మీరు ఎక్కాల్సిన రైలు జీవితకాలం లేటు..అన్న చందంగా ఉంది హైదరాబాద్‌ మెట్రో రైలు ప్రాజెక్టు నిర్మాణం వ్యవహారం. మెట్రో రైలు ఎప్పుడు పట్టాలు ఎక్కుతుందా.. అంటూ ఎదురు చూస్తున్న జంటనగరాల ప్రజల ఆశలు ఇప్పట్లో నెరవేరే అవకాశాలు కనిపించడంలేదు. నత్తనగడకన సాగుతున్న పనులు ఊపందుకుంటే మరో పది నెలల తర్వాతే మెట్రో పరుగులు తీసే చాన్స్‌ ఉంది. లేకపోతే మరింత జ్యాపం తప్పదని భావిస్తున్నారు. మెట్రో రైలు ప్రయాణంపై జంటనగరాల ప్రజలు పెట్టుకున్న ఆశలు ఇప్పట్లో నెరవేరే అవకాశం కనిపించడలేందు. ప్రాజెక్టు పనులు నత్తనడన సాగుతున్నాయి. జాప్యంతో మెట్రో రైలు ఇప్పట్లో కూతపెట్టే అవకాశాలు లేవు. మెట్రో రైలు వస్తే ట్రాఫిక్‌ కష్టాలు గెట్టెక్కుతాయనుకుంటున్న వాహనచోదకుల ఎదురు చూపులు మరింతకాలం తప్పదని భావిస్తున్నారు.

గత ఏడాది జూన్‌ 2న ప్రారంభింస్తామన్న ప్రభుత్వం..
దేశంలో ప్రభుత్వ, ప్రైవేటు భాగస్వామ్యం.. పీపీపీ.. పద్ధతిలో సాగుతున్న మొదటి ప్రాజెక్టు హైదరాబాద్‌ మెట్రో రైలు. మెట్రో రైలు నిర్మాణం చేస్తున్న ఎల్‌ అండ్‌ టీ సంస్థ ప్రభుత్వంతో కుదుర్చుకున్న ఒప్పందం ప్రకారం ఈ ఏడాది జులై నాటికి మూడు కారిడార్లలో 72 కిలో మీటర్లు మెట్రో రైలు పరుగులు తీయాల్సి ఉంది. కానీ జరుగుతున్న పనులను పరిశీలిస్తే ఒక్కమార్గంలో మెట్రో ప్రయాణించే అవకాశాలు కనిపించడంలేదు. ప్రారంభంలో వేగంగా జరిగిన మెట్రో పనులు..వివిధ కారణాలతో ఆ తర్వాత మందగించాయి. సుల్తాన్‌ బజార్‌, పాతబస్తీ, మొజాంజాహీ మార్కెట్‌, అసెంబ్లీ వంటి ప్రాంతాల్లో అలైన్‌మెంట్‌ మార్పులు, నిర్మాణానికి అవసవమైన భూసేకరణ జరగకపోవడం వంటి కారణాలతో నడకనసాగుతోంది. ప్రభుత్వంతో ముందు కుదుర్చుకున్న ఒప్పందం ప్రకారమే పనులు చేపట్టాని టీఆర్‌ఎస్‌ ప్రభుత్వ నిర్ణయించినా...పనులు వేగం పుంజుకోలేదు. పనులు పూర్తైన మియాపూర్‌-ఎస్‌ఆర్‌ నగర్‌, నాగోలు-మెటుగూడ మార్గాల్లో గత ఏడాది జూన్‌ 2 నాటికే మెట్రో రైళ్లను నడపాలనుకున్నా అదీ నెరవేరలేదు.

పాతబస్తీలో..
పూర్తైన మార్గాల్లో మెట్రో రైళ్లను నడిపే విషయంలో అధికారులు ఇప్పుడు మరో ప్రజలకు ఆశలు కల్పిస్తున్నారు. ముందుగా మియాపూర్‌-ఎస్‌ఆర్‌ నగర్‌ మధ్య 11 కి.మీ. మార్గాలన్ని ప్రారంభిస్తామంటున్నారు. నాగోలు-శిల్పారామం మార్గం బేగంపేట వరకు పూర్తి చేసిన 16 కి మీ.మార్గాన్ని రెండో దశలో మెట్రో రైళ్లను నడపాలని ప్రతిపాదిస్తున్నారు. సికింద్రాబాద్‌ రైల్‌ నిలయం సమీపంలోని ఆలుగడ్డబావి వద్ద ఆర్వోబీ, సికింద్రాబాద్‌ రైల్వే స్టేషన్‌ సమీపంలోని ఓలిఫెంటా బ్రిడ్జి దగ్గర స్టీలు బ్రిడ్జి నిర్మాణ పనులు జాగుతున్నాయి. అయితే నాగోలు-బేగంపేట మార్గంలో జరుగుతున్న పనులను పరిశీలిస్తే అధికారులు చెబుతున్న విధంగాఈ ఏడాదిలోగా మెట్రో రైలు కూతపెట్టే అవకాశంలేదని జనం భావిస్తున్నారు. ఇక మూడో కారిడార్‌ ఫలక్‌నుమా-జేబీఎస్‌ మార్గంలో మెట్రో రైళ్లు ఎప్పుడు నడిచేది ఎవరూ స్పష్టంగా చెప్పలేని పరిస్థితి నెలకొనివుంది. పదిహేను కిలో మీటర్ల ఈ మార్గాన్ని ఈ ఏదాడి జనవరి నాటికే పూర్తి చేయాల్సి ఉన్నా, మరో రెండేళ్లలో కూడా కంప్లీటయ్యే అవకాశాలు లేవు. పాతబస్తీలో మెట్రో మార్గం నిర్మాణానికి అవసరమైన భూసేకరణ ఇంకా పూర్తికాలేదు. రైట్‌ ఆఫ్‌ వే ఇవ్వకుండా పనులు చేపట్టలేమని ఎల్‌ అండ్‌ టీ నిర్మాణ సంస్థ అధికారులు చెబుతున్నారు. జాప్యానికి ప్రభుత్వమే కారణమంటూ ఇందుకు పరిహారం కూడా చెల్లించాలన్న వాదాన్ని నిర్మాణ సంస్థ లేవనెత్తుతోంది. ఈ కారణంగా ఒప్పందం గడువును కూడా వచ్చే ఏడాది డిసెంబర్‌ వరకు ప్రభుత్వం పొడిగించింది. హైదరాబాద్‌ మెట్రో రైలు అధికారులు చెబుతున్నట్టు ఈ ఏడాదిలో మెట్రో కూతపెడితే మంచిదేనని ప్రజలు అంటున్నారు. ఈ విషయంలో ప్రభుత్వం, ఎల్‌ అండ్‌ టీ అధికారులు ఏ నిర్ణయం తీసుకుంటారో చూడాలి.

06:35 - February 27, 2017

హైదరాబాద్‌ : అజంపురాలోని నాలా ఒడ్డున మొసలి పిల్ల ప్రత్యక్షమైంది. మొసలి పిల్లను చూసి స్థానికులు భయాందోళనకు లోనయ్యారు. వెంటనే చాదర్‌ఘాట్‌ పోలీసులకు సమాచారమిచ్చారు. దీంతో రంగంలోకి దిగిన జూ అధికారులు... మొసలిపిల్లను పట్టుకుని "జూ''కు తరలించారు. అయితే.. నాలాలో మొసలి పిల్ల బయటపడడంతో ఇంకా మొసళ్లు ఉండొచ్చుననే అనుమానం స్థానికులను వెంటాడుతోంది.

Pages

Don't Miss

Subscribe to RSS - Hyderabad Citizens