IIT Chukka Ramaiah Speech

06:32 - December 5, 2017

హైదరాబాద్ : తొమ్మిది నెలల నిరీక్షణ.. మూడు నెలలుగా అనుమతి కోసం ఎదురుచూపులు.. అఖరికి కోర్టు మెట్లెక్కి అనుమతి.. ఇలా ఎన్నో ప్రయాసలు పడి సాధించుకున్న అనుమతితో సరూర్‌నగర్‌ స్టేడియంలో నిర్వహించిన టీ-జేఏసీ 'కొలువుల కొట్లాట సభ' విజయవంతమైంది. భారీ ఎత్తున నిరుద్యోగులు, పలు పార్టీల నేతలు, ప్రజాసంఘాలు నాయకులు తరలివచ్చారు.

విద్యార్థుల బలిదానాలు, ఆత్మహత్యల ఫలితంగా
విద్యార్థుల బలిదానాలు, ఆత్మహత్యల ఫలితంగా ఏర్పడిన తెలంగాణ రాష్ట్రంలో... మూడేళ్లలో కేసీఆర్‌ ప్రజలకు ఒరగబెట్టిందేమీ లేదన్నారు కాంగ్రెస్‌ నేత జీవన్‌రెడ్డి. మూడేళ్లుగా నామమాత్రంగా నోటిఫికేషన్లు విడుదల చేశారన్నారు. తెలంగాణ ఏర్పడిన తర్వాత ఎన్ని ఉద్యోగాలను భర్తీ చేశారో శ్వేతపత్రం విడుదల చేయాలని ఆయన డిమాండ్‌ చేశారు. సభకు హాజరైన యువతలో ధైర్యం నింపే విధంగా పలువురి ప్రసంగం కొనసాగింది. ప్రభుత్వ కొలువులు రాలేదని నిరాశపడాల్సిన అవసరం లేదన్నారు విమలక్క. తెలంగాణలోని ప్రతి విద్యార్తిలో పోరాట పటిమ ఉందని... ఎవరూ ఆత్మహత్యలకు పాల్పడవద్దన్నారు. ఎమ్మెల్యే స్థానం ఖాళీ కాగానే.. మూడు నెలలో ఉప ఎన్నికలు పెట్టి ఆ స్థానాన్ని భర్తీ చేసేందుకు ఎన్నికల కమిషన్‌ ఉన్నట్లుగా... ప్రభుత్వ కొలువు ఖాళీ కాగానే భర్తీ చేసేందుకు ఉద్యోగ నియామక కమిషన్‌ ఉండాలన్నారు మాజీ ఎమ్మెల్సీ ప్రొ.నాగేశ్వర్‌. రాష్ట్రం ఏర్పడిన తర్వాత ప్రభుత్వం ఎన్ని పోస్టులను భర్తీ చేసిందో చెప్పాలని ఆయన డిమాండ్‌ చేశారు. కోదండరాం స్వలాభం కోసం నిరుద్యోగ సమస్యపై పోరాడటం లేదన్నారు ప్రముఖ విద్యావేత్త చుక్కా రామయ్య. ఇది నిరుద్యోగులందరి సమస్య అని.. దీనిపై పోరాటం చేయడమే కోదండరామ్‌ తప్పా అని ప్రశ్నించారు.

పోలీసుల తీరుపై కోదండరామ్‌ మండిపాటు
సభ నిర్వహించేందుకు కోర్టు అనుమతి ఇచ్చినా... పోలీసులు వ్యవహరించిన తీరుపై కోదండరామ్‌ మండిపడ్డారు. సభ సక్సెస్‌ అవుతుందనే అక్కసుతోనే.. విద్యార్థులను రాకుండా అడ్డుకున్నారన్నారు. కొలువులకై కొట్లాట సభతో తమ ఉద్యమం ఆగదని... భవష్యత్‌లోనూ ప్రభుత్వ వ్యతిరేక విధానాలపై పోరాడుతామన్నారు. విద్యార్థుల త్యాగాల బలిదానాలతో సాధించుకున్న తెలంగాణలో నిజాం రాజులా కేసీఆర్‌ పాలన సాగిస్తున్నారన్నారు ప్రజాగాయకుడు గద్దర్‌. రాష్ట్రం ఏర్పడిన తర్వాత... కేసీఆర్‌ అండ్‌ ఫ్యామిలీకే రాజకీయ కొలువులు లభించాయన్నారు. కేసీఆర్‌ ఇప్పటికైనా కళ్లు తెరిచి నిరుద్యోగుల సమస్యలను పరిష్కరించాలన్నారు. ఈ సందర్బంగా గద్దర్‌ పాడిన పాటలు అందరినీ ఆకట్టుకున్నాయి. మొత్తానికి సభ సక్సెస్‌ కావడంతో టీ-జేఏసీ నేతలు సంతృప్తి వ్యక్తం చేస్తున్నారు. ఇదే స్ఫూర్తితో ప్రభుత్వ ప్రజా వ్యతిరేక విధానాలపై పోరాటం చేసేందుకు టీ-జేఏసీ సిద్దమవుతోంది. 

21:25 - December 4, 2017

హైదరాబాద్ : నిరుద్యోగ సమస్యకు కచ్చితమైన పరిష్కారం లభించేంతవరకు ప్రభుత్వంపై తమ పోరాటం కొనసాగుతుందని టీజేఏసీ చైర్మన్‌ కోదండరాం తేల్చిచెప్పారు. ప్రభుత్వం ఎన్ని అడ్డంకులు సృష్టించినా కొలువులకై కొట్లాట సభ సక్సెస్‌ అయ్యిందన్నారు. హైదరాబాద్ ఎల్బీనగర్‌లో జరిగిన సభలో ఆయన ఈ వ్యాఖ్యలు చేశారు. కొలువులన్నీ భర్తీ చేస్తామని అధికారంలోకి వచ్చిన కేసీఆర్‌ ... మూడేళ్లైనా ఆ హామీని నెరవేర్చలేదన్నారు. దీంతో నిరుద్యోగులు ప్రభుత్వంపై తీవ్ర ఆగ్రహంతో ఉన్నారన్నారు. నిరుద్యోగ సమస్యను ఎజెండాపైకి తీసుకురావడం కేసీఆర్‌ సర్కార్‌కు నచ్చడం లేదన్నారు. అందుకే ఉద్యమకారులను, టీజేఏసీ నేతలను వ్యక్తిగతంగా టార్గెట్‌ చేశారని మండిపడ్డారు. తక్షణమే ప్రభుత్వం ఖాళీగా ఉన్న ఉద్యోగాలను భర్తీ చేయాలని ఆయన డిమాండ్‌ చేశారు.

20:26 - December 4, 2017

మన ఉద్యోగాలు..మనవే..నినాదాలు ఇంకా వినిపిస్తూనే ఉన్నాయి..అంకె భారీగా ఊరిస్తూనే ఉంది.. అమలుపైనే అసలు సందేహాలు..ఓ పక్క సమర్ధింపులు.. మరోపక్క కొట్లాటలు..మూడున్నరేళ్లు గడుస్తుంది.. ఇంకెప్పుడని రోడ్డెక్కుతున్నారు.. ఆందోళనకు దిగుతున్నారు.. తెలంగాణలో నిరుద్యోగులకు ఒరిగిందేమిటి? లక్షల ఉద్యోగాలంటూ ప్రభుత్వం చెప్పేది కాకి లెక్కలేనా? నిరుద్యోగుల ఆశలు నెరవేరేదెపుడు? కొలువుల కొట్లాట ఏ దారిలో నడవనుంది? కొలువు దొరుకుతుందన్న నమ్మకం లేదు. సర్టిఫికెట్లు దేనికీ పనికి రానివిగా మారిపోతున్నాయి. కోచింగ్ సెంటర్లలో ఏళ్లు గడిచిపోతున్నాయి.. ఆశలు తీరవు..హామీలు ఆగవు.. బతుకుపోరు నానాటికీ బరువుగా మారుతున్న దృశ్యం..

 

అసలు తెలంగాణలో ఎందరు నిరుద్యోగులున్నారు? ఎన్ని ప్రభుత్వోద్యోగాలు ఖాళీగా ఉన్నాయి? సర్కారు గతంలో ఏం చెప్పింది.. ఇప్పుడేం చెప్తోంది?తెలంగాణ ప్రభుత్వం గత మూడున్నరేళ్లలో ఎన్ని ప్రభుత్వోద్యోగాలు కల్పించింది? ప్రైవేటురంగం ఎన్ని ఉద్యోగాల కల్పనకు అవకాశాలు ఇచ్చింది? అంకెలు స్పష్టంగా కనపడుతున్నాయి.. నిరుద్యోగుల సంఖ్య స్పష్టంగా కనిపిస్తోంది. సర్కారు దాటవేతలూ స్పష్టమౌతున్నాయి.. ఉపాధి కల్పన సర్కారు బాధ్యత కాదా? ఉద్యోగాలు జనరేట్ అయ్యే పరిస్థితులు కల్పించాల్సిన ప్రభుత్వాలు ఒప్పందాల ఆడంబరాలకే పరిమితమౌతున్నాయా? తెలుగు రాష్ట్రాల్లో నిరుద్యోగుల భవిష్యత్తు అంధకారమేనా?దేశంలో ప్రభుత్వోద్యోగాలు తగ్గిపోతున్నాయి. సర్కారు తన బాధ్యతలను వదుల్చుకుంటున్న తరుణంలో, పబ్లిక్ సెక్టార్ నుంచి చాలా బాధ్యతలు ప్రైవేటు పరం అవుతున్నాయి.. కానీ, ఉన్న ఉద్యోగాలను భర్తీ చేయని ప్రభుత్వాలు ప్రైవేటు రంగాన్ని కూడా అంతే నిర్లక్ష్యం చేయటం ఇప్పుడు కనిపిస్తున్న దృశ్యం.. చిన్నా చితకా పని దొరకటానికే నానా కష్టాలు పడాల్సిన పరిస్థితి. ఆ మధ్య పోలీస్ కానిస్టేబుల్ ఉద్యోగానికి ఇంజనీరింగ్, ఎంబీఏ, ఎంసీఏలు చదివిన వారు కూడా రావటం పరిస్థితి తీవ్రత అద్దం పడుతోంది.

 

ఉపాధి కల్పించాల్సిన బాధ్యత కచ్చితంగా ప్రభుత్వానిదే. ఉపాధి అవకాశాలు పెరిగే వాతావరణం కల్పించాల్సిన బాధ్యత కూడా ప్రభుత్వానిదే. ప్రభుత్వ రంగ ఖాళీలను భర్తీ చేయాల్సిన పని సర్కారుదే.. కానీ, సరళీకరణ విధానాల పరుగులో ప్రభుత్వాలు పెట్టుబడులు, లాభాలు అంటూ నేలవిడిచి సాము చేస్తూ ప్రజాసంక్షేమాన్ని గాలికొదులుతున్నాయి. మాటలకే పరిమితమౌతూ కార్పొరేట్ పెద్దలకు అనుకూల నిర్ణయాలతో నిరుద్యోగులను నట్టేట ముంచుతున్నాయి.. ఈ పరిస్థితిలో మార్పు రాకపోతే … తెలుగు రాష్ట్రాల నిరుద్యోగ లోకానికి భవిష్యత్తులో పెద్ద ఎత్తున ఉద్యమించటమే మార్గం అవుతుంది. పూర్తి వివరాలకు వీడియో క్లిక్ చేయండి.



 

 

 

 


 

 

17:23 - December 4, 2017

హైదరాబాద్ : కోదండరాం స్వలాభం కోసం నిరుద్యోగ సమస్యపై పోరాడటం లేదని ప్రముఖ విద్యావేత్త చుక్కా రామయ్య అన్నారు. ఇది నిరుద్యోగులందరి సమస్య అని చెప్పారు. నిరుద్యోగ సమస్యను ఏజెండాపైకి తీసుకురావడమే కోదండరాం చేసిన తప్పా అని ప్రభుత్వాన్ని ఆయన ప్రశ్నించారు. అరెస్ట్‌లు, నిర్బంధాలతో ఉద్యమాలను ప్రభుత్వం ఎప్పుడూ ఆపలేదన్నారు. ఇప్పటికైనా కేసీఆర్‌ నిరుద్యోగుల్లో గూడుకట్టుకున్న అసంతృప్తిని గుర్తించాలని, వెంటనే ఖాళీ పోస్టులను భర్తీ చేయాలని డిమాండ్‌ చేశారు. ప్రత్యేక తెలంగాణ ఉద్యమమంతా విద్యార్థుల త్యాగాల ఉద్యమమేనని ప్రజాగాయకుడు, యుద్ధనౌక గద్దర్‌ అన్నారు. కొట్లాడితేనే తెలంగాణ వచ్చిందని.... కొట్లాడే కొలువులు తెచ్చుకుందామని పిలుపునిచ్చారు. పోరాటంతోనే హక్కులు సాధించుకోవాలన్నారు. ఈ సందర్భంగా పాటలుపాడి నిరుద్యోగులను ఉత్సాహపరిచారు. 

15:35 - December 4, 2017

హైదరాబాద్ : విద్యార్థులో నిరాశ నెలకొందని ప్రముఖ విద్యవేత్ చుక్కా రామయ్య అన్నారు. ప్రభుత్వం దేని కోసమైతే ఏర్పాడిందో అది చేయడం లేదని, కోదండరామ్ పై విమర్శలు చేయడంపై సరికాదని, ఆయన అతని కోసమో, పదవి కోసమో పోరాటం చేయడంలేదని విద్యార్థుల కోసమే పోరాటం చేస్తున్నారని రామయ్య అన్నారు.

Don't Miss

Subscribe to RSS - IIT Chukka Ramaiah Speech