india vs australia

21:38 - October 13, 2017

హైదరాబాద్ : ఉప్పల్ టీ-20 మ్యాచ్‌ వర్షార్పణమైంది. వరుసగా కురుస్తున్న వర్షాలతో ఔట్‌ ఫీల్డ్‌ తడిసిపోవడంతో... అనేకసార్లు గ్రౌండ్‌ను పరిశీలించిన అంపైర్లు... ఆడేందుకు అనుకూలంగా లేకపోవడంతో మ్యాచ్‌ను రద్దు చేశారు. మూడు మ్యాచ్‌ల సిరీస్‌లో భారత్‌-ఆసీస్‌ చెరొక టీ-20 మ్యాచ్‌ గెలిచి సమానంగా నిలిచాయి. అయితే... హైదరాబాద్‌లో టీ-20 మ్యాచ్‌ చూసేందుకు వచ్చిన అభిమానులకు వర్షం దెబ్బతో నిరాశే మిగిలింది. 

 

19:18 - October 13, 2017

హైదరాబాద్ : ఉప్పల్ లో భారత్, ఆస్ట్రేలియా మధ్య జరుగనున్న టీ20 మ్యాచ్ కు వర్షం అడ్డంకిగా మారింది. మ్యాచ్ ఆలస్యంగా ప్రారంభం కానుంది. కాసేపట్లో అంపైర్లు ఔట్ ఫీల్డ్ ను పరిశీలించనున్నారు. ఉప్పల్ స్టేడియం సిరీస్ విజేతను తేల్చనుంది.

07:19 - October 13, 2017

హైదరాబాద్ : ఇండియా-ఆస్ట్రేలియా మధ్య జరుగుతోన్న 3 మ్యాచ్‌ల ట్వంటీ ట్వంటీ సిరీస్‌లోని క్లైమాక్స్‌ ఫైట్‌కు కౌంట్‌డౌన్‌ ప్రారంభమైంది. సిరీస్‌ నిర్ణయాత్మక సమరంలో ఇండియా-ఆస్ట్రేలియా అమీతుమీకి సిద్ధమయ్యాయి. హైదరాబాద్‌ ఉప్పల్‌ స్టేడియం వేదికగా జరుగనున్న ఆఖరి మ్యాచ్‌కు 20-20 ఫార్మాట్‌లో తొలి వరల్డ్‌ చాంపియన్‌ టీమిండియాకు ...డేవిడ్‌ వార్నర్‌ సారధ్యంలోని ఆస్ట్రేలియా సవాల్‌ విసురుతోంది.3 మ్యాచ్‌ల సిరీస్‌లో 1-1తో ఇరు జట్లు సమాన ఆధిక్యంలో నిలిచాయి.

సెకండ్‌ టీ20లో తేలిపోయిన టీం ఇండియా
తొలి టీ20లో తిరుగులేని టీమిండియా ...సెకండ్‌ టీ20లో మాత్రం తేలిపోయింది. అంచనాలకు మించి రాణించిన ఆస్ట్రేలియా జట్టు సెకండ్‌ టీ20లో టీమిండియాకు షాకిచ్చి పెద్ద సంచలనమే సృష్టించింది. అత్యంత పటిష్టమైన బ్యాటింగ్‌ లైనప్‌ కలిగిన భారత్‌....అసలే మాత్రం అంతర్జాతీయ అనుభవం లేని బౌలర్‌ ముందు తేలిపోయింది. కంగారూ స్పీడ్‌ గన్‌ జేసన్‌ బెహ్రెన్‌డార్ఫ్‌ ధాటికి ధావన్‌, రోహిత్‌ , విరాట్‌ , మనీష్‌ పాండే క్యూ కట్టడంతో భారత జట్టు భారీ స్కోర్‌ చేయలేకపోయింది. టాప్‌ ఆర్డర్‌ బ్యాట్స్‌మెన్ విఫలమైతే టీమిండియా ఓటమి ఖాయమని రెండో టీ20తో మరోసారి రుజువైంది.

రెట్టించిన ఆత్మవిశ్వాసంతో ఆస్ట్రేలియా
బ్యాటింగ్‌లో తేలిపోవడంతో బౌలింగ్‌లోనూ భారత్‌ ప్రభావం చూపలేకపోయింది. ఒక్క మ్యాచ్‌లో విఫలమైతేనే విరాట్ ఆర్మీ పనైపోయిందనుకుంటే పొరపాటే. ఆఖరి టీ20లో బెహ్రెన్‌డార్ఫ్‌తో పాటు ఆడమ్‌ జంపాకు చెక్‌ పెట్టగలిగితే భారత జట్టుకు విజయ అవకాశాలుంటాయనడంలో సందేహమే లేదు. మరోవైపు ఆస్ట్రేలియా టీమ్ రెట్టించిన ఆత్మవిశ్వాసంతో ఉరకలేస్తోంది. రెండో టీ20 విజయంతో సిరీస్‌ను సమం చేసిన ఆస్ట్రేలియా ఆఖరి మ్యాచ్‌లోనూ అంచనాలకు మించి రాణించాలని ప్లాన్‌లో ఉంది.గువహటీ టీ20లో టాస్‌ నెగ్గి, పక్కా గేమ్‌ ప్లాన్‌తోనే ..కొహ్లీ సేనకు చెక్‌ పెట్టిన డేవిడ్‌ వార్నర్‌ నాయకత్వంలోని ఆస్ట్రేలియా 3వ టీ20లోనూ సంచలనం సృష్టించాలని భావిస్తోంది. ఆస్ట్రేలియాపై టీ20ల్లో తిరుగులేని ట్రాక్ రికార్డ్‌తో పాటు...పవర్‌ఫుల్‌ టీమ్‌ కాంబినేషన్‌తో పటిష్టంగా ఉన్న ఇండియా ఆఖరి మ్యాచ్‌లో అంచనాలకు తగ్గట్టుగా రాణించగలదో లేదో చూడాలి. మరి ఈ క్లైమ్యాక్స్‌ ఫైట్‌లో నెగ్గి టీ20 సిరీస్‌ సొంతం చేసుకునే జట్టేదో తెలియాలంటే మరికొద్దిగంటలు వెయిట్‌ చేయాల్సిందే.

21:54 - October 12, 2017

హైదరాబాద్ : ఉప్పల్‌లో జరిగే భారత్‌, ఆస్ట్రేలియా టీ ట్వంటీ మ్యాచ్‌కు కట్టుదిట్టమైన భద్రతా ఏర్పాట్లు చేశామని రాచకొండ పోలీస్‌ కమిషనర్‌ మహేష్‌ భగవత్‌ తెలిపారు. 18 వందల మంది పోలీసులతో భద్రత కల్పిస్తున్నామన్నారు. 56 అధునాతన సిసి కెమెరాలను ఏర్పాటు చేశామని విజిలెన్స్, అక్టోపస్‌, షీ టీమ్స్‌, మఫ్టీ పోలీసులతో భద్రత ఏర్పాటు చేశామన్నారు. స్టేడియంలో ప్రేక్షకులకు అన్ని ఏర్పాట్లు చేసినట్లు హెచ్‌సీఎ కార్యదర్శి శంకర్‌ నారాయణ తెలిపారు. 

 

07:49 - October 8, 2017

జార్ఖండ్ : తొలి టీ ట్వంటీలో టీం ఇండియా ఘన విజయం సాధించింది. వర్షం అడ్డంకిగా మారినా విరాట్‌ ఆర్మీ ఆసిస్‌ను కంగారెత్తించింది. రాంచీ మ్యాచ్‌ విజయంలో బౌలర్లు అదరగొట్టారు. ఏకంగా ఐదుగురు ఆసిస్‌ బ్యాట్స్‌మెన్‌ క్లీన్‌బౌల్డ్‌ చేసి సత్తా చాటారు. దీంతో మూడు టీ20ల సిరీస్‌లో భారత్‌ 1...0 ఆధిక్యంలో దూసుకెళ్లింది.
అదరగొట్టిన కోహ్లీ బ్యాచ్‌ 
రాంచీ టీ ట్వంటీ మ్యాచ్‌లో కోహ్లీ బ్యాచ్‌ అదరగొట్టింది. పొట్టిఫార్మాట్‌లో బాయ్స్‌  మరోసారి సత్తా చాటారు. 9వికెట్ల తేడాతో కంగారులను చిత్తుచేశారు. మొదట బ్యాటింగ్‌ చేసిన ఆస్ట్రేలియా 18.4 ఓవర్లలో 8వికెట్ల నష్టానికి 118 పరుగులు చేసింది. వర్షం కారణంగా గంటన్నరపాటు మ్యాచ్‌కు అంతరాయం కలిగింది. దీంతో డక్‌వర్త్‌లూయిస్‌  పద్దతి అనుసరించి భారత్‌కు 6 ఓవర్లలో 48 పరుగుల లక్ష్యం నిర్దేశించారు. అనంతరం లక్ష్యఛేదన ప్రారంభించిన భారత్‌ 5.2 ఓవర్లలో కేవలం ఒక వికెట్‌ మాత్రమే కోల్పోయి టార్గెట్‌ను  ఛేదించింది.భారత్‌ బ్యాట్స్‌మెన్లలో రోహిత్‌ శర్మ11, శిఖర్‌ ధావన్‌ 15, విరాట్‌ కోహ్లీ 22 పరుగులు చేశారు.  
భారత్‌ 1-0 ఆధిక్యం
అంతకు ముందు టాస్‌ గెలిచిన కెప్టెన్‌కోహ్లీ బౌలింగ్‌ను ఎంచుకున్నాడు. కెప్టెన్‌ నమ్మకాన్ని భారత బౌలర్లు వమ్ము కానివ్వలేదు. వరుసగా రెండు ఫోర్లు బాది వూపు మీదున్న కెప్టెన్‌ వార్నర్‌ ను భువనేశ్వర్‌ క్లీన్‌బౌల్డ్‌ చేసి వికెట్ల కూల్చేపని మొదలు పెట్టాడు. మరోవైపు ఓపెనర్‌ ఫించ్‌ 42 పరుగులు చేసినా.. మాక్స్‌వెల్‌ 17, హెడ్‌ 9, హెన్రిక్స్‌8 , క్రిస్టియన్‌ 9లకే పెవిలియన్‌ చేరారు. తర్వాత బ్యాటింగ్‌కు వచ్చిన పెయిన్‌17, నైల్‌ 1 స్వల్ప స్కోర్లకే పరిమితమయ్యారు. ఆసీస్‌ బ్యాట్స్‌మెన్లలో ఐదుగురు క్లీన్‌బౌల్డ్‌ అయ్యారు. భారత్‌ బౌలర్లలో కుల్‌దీప్‌ 2, బుమ్రా 2, భువనేశ్వర్‌, పాండ్య, చాహల్‌ తలో వికెట్‌ తీశారు. దీంతో మూడు టీ20ల సిరీస్‌లో భారత్‌ 1-0 ఆధిక్యంలో నిలిచింది.

12:24 - October 6, 2017

ట్వంటీ ట్వంటీ ఫార్మాట్‌లో తొలి వరల్డ్‌ చాంపియన్‌ టీమిండియా....పవర్‌ ప్యాకెడ్‌ ఆస్ట్రేలియాతో మరో కీలక సమరానికి సన్నద్ధమైంది. ఇండియా-ఆస్ట్రేలియా మధ్య 3 మ్యాచ్‌ల సిరీస్‌లోని తొలి టీ20కి రాంచీలోని జార్ఖండ్‌ క్రికెట్‌ అసోసియేషన్‌ స్టేడియంలో రంగం సిద్ధమైంది. వన్డే సిరీస్‌ విజయంతో జోరు మీదున్న  కొహ్లీ అండ్ కో...20-20 సిరీస్‌లోనూ స్టీవ్‌స్మిత్‌ సారధ్యంలోని కంగారూ టీమ్‌కు చెక్‌ పెట్టాలని పట్టుదలతో ఉంది. తొలి మ్యాచ్‌తోనే శుభారంభం చేసి సిరీస్ విజయం సాధించడమే లక్ష్యంగా విరాట్‌ ఆర్మీ బరిలోకి దిగబోతోంది. 

ఇండియా-ఆస్ట్రేలియా మధ్య 3 మ్యాచ్‌ల  ట్వంటీ ట్వంటీ సిరీస్‌కు  రంగం సిద్దమైంది.  రాంచీలోని జార్ఖండ్‌ క్రికెట్‌ అసోసియేషన్‌ స్టేడియం వేదికగా జరుగనున్న తొలి టీ20లో శుభారంభం చేయాలని ఇరు జట్లు పట్టుదలతో ఉన్నాయి. ఫటా ఫట్‌ 20-20 ఫార్మాట్‌లో తొలి వరల్డ్‌ చాంపియన్‌ టీమిండియాకు ...స్టీవ్‌ స్మిత్‌ సారధ్యంలోని ఆస్ట్రేలియా అమీతుమీ తేల్చుకోనుంది. ఐసీసీ టీ20 ర్యాంకింగ్స్‌లో ఇండియా 5వ స్థానంలో ఉండగా...ఆస్ట్రేలియా 7వ స్థానానికి పడిపోయింది. 

ధావన్‌, రోహిత్‌ శర్మ, విరాట్‌ కొహ్లీ,రాహుల్‌, ధోనీ, మనీష్‌ పాండే,కేదార్‌ జాదవ్‌లతో భారత బ్యాటింగ్‌ లైనప్‌ ఎప్పటిలానే పటిష్టంగా ఉంది.హార్దిక్‌ పాండ్య,అక్షర్‌ పటేల్‌ వంటి హార్డ్‌ హిట్టింగ్‌ ఆల్‌రౌండర్లతో లోయర్‌ ఆర్డర్‌లోనూ బలంగా ఉంది. రోహిత్‌ శర్మ ,హార్దిక్‌ పాండ్య సూపర్‌ ఫామ్‌లో ఉండటం భారత జట్టుకు పెద్ద ప్లస్‌ పాయింట్‌ అనడంలో అనుమానేమే లేదు. కుల్దీప్‌ యాదవ్‌,యజ్వేంద్రచహాల్‌ వంటి మ్యాజిక్‌  స్పిన్నర్లతో పాటు  అనుభవజ్ఞుడైన అశిష్‌ నెహ్రా,భువనేశ్వర్‌ కుమార్‌, జస్ప్రీత్‌ బుమ్రా  వంటి  పేస్‌ బౌలర్లతో బౌలింగ్‌ ఎటాక్‌ మునునెన్నడూ లేనంతలా  పదునుగా ఉంది. 

సిరీస్‌ విజయం సాధించడమే లక్ష్యంగా బరిలోకి దిగబోతోన్న విరాట్‌ ఆర్మీ...టీ20 ర్యాంకింగ్స్‌లోనూ టాప్ ర్యాంక్‌ సాధించాలని తహతహలాడుతోంది.5 వన్డేల సిరీస్‌ను 4-1తో నెగ్గిన భారత్‌ టీ 20 సిరీస్‌ను క్లీన్ స్వీప్‌ చేస్తే టీ20 ర్యాంకింగ్స్‌లోనూ టాప్‌ ప్లేస్‌కు చేరుకుంటుంది.

మరోవైపు స్టీవ్‌ స్మిత్‌ సారధ్యంలోని ఆస్ట్రేలియా జట్టు టీ20 సిరీస్‌లో అయినా స్థాయికి తగ్గట్టుగా రాణించాలని పట్టుదలతో ఉంది. బ్యాటింగ్‌లో డేవిడ్‌ వార్నర్‌ ,ఆరోన్‌ ఫించ్‌,  స్టీవ్‌ స్మిత్‌, మ్యాక్స్‌వెల్‌...బౌలింగ్‌లో జేమ్స్‌ ఫాక్నర్‌, కౌల్టర్‌నైల్‌ వంటి అనుభవజ్ఞులు రాణిస్తేనే భారత్‌కు గట్టి పోటీనివ్వగలుగుతుంది.  

ఇక 20-20 ఫేస్‌ టు ఫేస్‌ రికార్డ్‌లోనూ ఆస్ట్రేలియాపై ఇండియాకు తిరుగులేని ట్రాక్‌ రికార్డ్‌ ఉంది. ఇప్పటివరకూ ఇరు జట్లు 13 మ్యాచ్‌ల్లో పోటీపడగా భారత్‌ 9 మ్యాచ్‌ల్లో విజయం సాధించగా...ఆస్ట్రేలియా 4 మ్యాచ్‌ల్లో మాత్రమే నెగ్గింది. టీ20ల్లో  తిరుగులేని ట్రాక్ రికార్డ్‌తో పాటు...పవర్‌ఫుల్‌ టీమ్‌ కాంబినేషన్‌తో పటిష్టంగా ఉన్న భారత జట్టుకే సిరీస్‌ విజయావకాశాలు ఎక్కువగా ఉన్నాయనడంలో సందేహమే లేదు. కానీ వన్డే సిరీస్‌లో దారుణంగా విఫలమై విమర్శలు ఎదుర్కొంటున్న ఆస్ట్రేలియా జట్టును మాత్రం అసలే మాత్రం తక్కువ అంచనా వేయలేం.మరి తొలి టీ20లో నెగ్గి  మ్యాచ్‌ల సిరీస్‌లో శుభారంభం చేసే జట్టేదో తెలియాలంటే మరికొద్ది గంటలు వెయిట్‌ చేయాల్సిందే.

14:45 - October 2, 2017
20:22 - September 23, 2017

ఇండోర్ : 5 వన్డేల సిరీస్‌లో వరల్డ్‌ చాంపియన్‌ ఆస్ట్రేలియాపై విరాట్‌ ఆర్మీ తిరుగులేని ఆధిపత్యం ప్రదర్శిస్తోంది. టీమిండియా డామినేషన్‌తో హోరాహోరీగా జరుగుతుందనుకున్న వన్డే సిరీస్‌ కాస్తా... ఏకపక్షంగా సాగుతోంది. ఇండియన్‌ టీమ్‌ ఇప్పటివరకూ పూర్తి స్థాయిలో చెలరేగలేకపోయినా....బలహీనమైన జట్టుతో ఆస్ట్రేలియా జట్టు ఢీలా పడింది. బ్యాట్స్‌మెన్‌ భారీ స్కోర్లు సాధించలేకపోతున్నా....బౌలింగ్‌లో మాత్రం భారత్‌ అంచనాలకు మించి రాణిస్తోంది. స్వింగ్‌ సెన్సేషన్‌ భువనేశ్వర్‌ కుమార్‌ ఆరంభ ఓవర్లలోనే కంగారూ బ్యాట్స్‌మెన్‌ను బోల్తా కొట్టిస్తూ భారత్‌కు శుభారంభాన్నిస్తున్నాడు. ఇక లెగ్‌ స్పిన్‌ గన్స్‌ యజ్వేంద్ర చహాల్‌, కుల్దీప్‌ యాదవ్‌లను ఎదుర్కోవడానికి ఆస్ట్రేలియా బ్యాట్స్‌మెన్‌ పడుతోన్న కష్టాలు అన్నీ ఇన్నీ కావు.రెండు వన్డేల్లో చహాల్‌, కుల్దీప్‌ కలిసి 10 వికెట్లు పడగొట్టి భారత జట్టు విజయాల్లో కీలక పాత్ర పోషిస్తున్నారు.చెన్నై వన్డేలో 2 వికెట్లు తీసిన కుల్దీప్‌ యాదవ్‌ ....కోల్‌కతా వన్డేలో పెద్ద సంచలనమే సృష్టించాడు.వన్డేల్లో హ్యాట్రిక్ వికెట్స్‌ తీసిన భారత బౌలర్‌గా కుల్దీప్‌ యాదవ్‌ చరిత్ర సృష్టించాడు. మణికట్టుతో మ్యాజిక్‌ చేసి ఏకంగా హ్యాట్రిక్‌ వికెట్స్ తీసి అందరినీ ఆశ్చర్యపరచాడు. రెండు వన్డేల్లో వరల్డ్‌ చాంపియన్‌ ఆస్ట్రేలియాను ఓడించడంతో టీమిండియా ఐసీసీ ర్యాంకింగ్స్‌లో తిరిగి టాప్‌ ప్లేస్‌కు చేరుకుంది. స్పిన్‌ మ్యాజిక్‌తోనే 2 మ్యాచ్‌లు నెగ్గిన భారత్‌....బ్యాటింగ్‌లోనూ చెలరేగితే 5 వన్డేల సిరీస్‌ క్లీన్‌ స్వీప్‌ చేయడం ఖాయం.

రేపే మూడో వన్డే
ఇండోర్‌లో ఇండియా-ఆస్ట్రేలియా మధ్య మూడో వన్డేకు కౌంట్‌ డౌన్‌ ప్రారంభమైంది. ఇన్‌స్టంట్‌ వన్డే ఫార్మాట్‌లో 2 సార్లు చాంపియన్‌ ఇండియా....5 సార్లు వన్డే చాంపియన్‌ ఆస్ట్రేలియా మధ్య కీలక వన్డేకు హోల్కర్ స్టేడియంలో రంగం సిద్ధమైంది. తొలి రెండు వన్డేల్లో తిరుగులేని టీమిండియా....మూడో వన్డే సైతం నెగ్గి సిరీస్‌ దక్కించుకోవాలని తహతహలాడుతోంది. మూడో వన్డేలో అయినా భారత జట్టు స్పీడ్‌కు బ్రేక్‌ వేయాలని ఆస్ట్రేలియా జట్టు పట్టుదలతో ఉంది. రహానే, రోహిత్‌ శర్మ, విరాట్‌ కొహ్లీ,మనీష్‌ పాండే, ధోనీ, హార్దిక్‌ పాండ్య,కేదార్‌ జాదవ్‌ వంటి బ్యాట్స్‌మెన్‌తో పటిష్టమైన బ్యాటింగ్‌ లైనప్‌ కలిగిన భారత జట్టు రెండు వన్డేల్లోనూ స్థాయికి తగ్గట్టుగా రాణించలేదు. రోహిత్‌ శర్మ, మనీష్‌ పాండే వరుసగా విఫలమవ్వుతుండటంతో భారత భారీ స్కోర్లు నమోదు చేయలేకపోతోంది. కోల్‌కతా వన్డేతో విరాట్‌ కొహ్లీ,రహానే ఫామ్‌లోకి రావడం భారత జట్టుకు పెద్ద ప్లస్‌ పాయింట్‌ అనడంలో అనుమానమే లేదు. జస్ప్రీత్‌ బుమ్రా, భువనేశ్వర్‌ కుమార్‌లతో భారత్‌ పేస్‌ బౌలింగ్‌ ఎటాక్‌ పదునుగా ఉంది. ఇక యంగ్‌ స్పిన్‌ గన్స్‌ కుల్దీప్‌ యాదవ్‌,యజ్వేంద్రచహాల్‌ ఎంతలా మ్యాజిక్‌ చేస్తున్నారో ప్రత్యేకంగా చెప్పనక్కర్లేదు.

డైలమాలో ఆస్ట్రేలియా జట్టు
మరోవైపు స్టీవ్‌ స్మిత్‌ సారధ్యంలోని ఆస్ట్రేలియా జట్టు డైలమాలో ఉంది.బౌలర్లు సమిష్టిగా రాణిస్తున్నా...బ్యాట్స్‌మెన్‌ దారుణంగా విఫలమవ్వడంతో కంగారూ టీమ్‌ తేలిపోతోంది. ఇండోర్‌ వన్డేలో అయినా కంగారూ బ్యాట్స్‌మెన్‌...భారత స్పిన్నర్లకు చెక్ పెట్టలేకపోతే ఆస్ట్రేలియా జట్టు సిరీస్‌పై ఆశలు వదులుకోవాల్సిందే. రెండు వన్డేల్లోనూ స్పిన్‌ మ్యాజిక్‌తోనే నెగ్గిన భారత్‌ .... బ్యాటింగ్‌లోనూ రాణిస్తే మూడో వన్డేతోనే 5 మ్యాచ్‌ల సిరీస్‌ నెగ్గడం ఖాయం. వరుస విజయాలతో జోరు మీదున్న విరాట్‌ ఆర్మీకే ఇండోర్‌వన్డేలో హాట్‌ ఫేవరెట్‌గా బరిలోకి దిగనుంది. మరి మూడో వన్డేలో అయినా ఆస్ట్రేలియా జట్టు ఇండియాకు కనీస పోటీ అయినా ఇస్తుందో లేదో చూడాలి. 

21:10 - September 21, 2017

కోల్ కత్తా : రెండవ వన్డేలో ఆస్ట్రేలియా ఎదురీతుంది. భారత్ బౌలర్ కుల్దీప్ యాదవ్ హ్యాట్రిక్ వికెట్లు సాధించాడు. వరుస బంతుల్లో వేడ్, ఎగర్, కమిన్స్ అవుట్ చేసిన కల్దీప్ భారత్ తరపున హ్యాట్రిక్ సాధించిన మూడవ అటగాడిగా రికార్డ్ సృష్టించారు. 

08:23 - September 18, 2017

చెన్నై : టీమిండియా విజయపరంపర కొనసాగుతోంది. ఆస్ట్రేలియాతో జరుగుతున్న ఐదు వన్డేల సిరీస్‌లో భారత్‌ తొలి వన్డేలో ఘన విజయం సాధించి ఆధిక్యంలో నిలిచింది. చెన్నైలో జరిగిన వన్డేలో తొలుత బ్యాటింగ్‌ చేసిన భారత్‌.. హార్దిక్‌ పాండ్యా, ధోనీ హాఫ్‌ సెంచరీలు చేయడంతో 7 వికెట్ల నష్టానికి 281 పరుగులు చేసింది. అనంతరం జోరుగా వర్షం కురవడంతో ఆట రెండు గంటల పాటు నిలిచింది. దీంతో ఆసీస్‌ టార్గెట్‌ను 21 ఓవర్లకు 164 పరుగులకు కుదించారు. అయితే విజయలక్ష్యం కోసం బ్యాటింగ్‌కు దిగిన ఆసీస్‌కు గుడ్‌ ఓపెనింగ్‌ లభించలేదు. చాహల్‌, కుల్దీప్‌, పాండ్యా దెబ్బకు 35 పరుగులకే నాలుకు కీలక వికెట్లు చేజార్చుకుంది. గ్లెన్‌ మాక్స్‌వెల్‌, జేమ్స్‌ ఫాల్క్‌నర్‌, డేవిడ్‌ వార్నర్‌ మినహా మరేవరూ రాణించకపోవడంతో 21 ఓవర్లలో 9 వికెట్లు కోల్పోయి 137 పరుగులు మాత్రమే చేసి ఓటమి పాలైంది.

రాణించిన పాండ్యా, ధోని
తొలుత టాస్‌ గెలిచి బ్యాటింగ్‌ ఎంచుకున్న భారత్‌ 11 పరుగులకే మూడు వికెట్లు కోల్పోయి కష్టాల్లో పడింది. రహానె, కోహ్లీ, మనీశ్‌పాండేలు వెంటవెంటనే ఔటయ్యారు. అనంతరం వచ్చిన బ్యాటింగ్‌కు వచ్చిన రోహిత్‌ శర్మ, కేదార్‌ జాదవ్‌లు గట్టిక్కెంచే ప్రయత్నం చేశారు. అయితే.. స్టొయినిస్‌ వారిద్దరిని పెవిలియన్‌కు పంపించడంతో భారత్‌.. 22 ఓవర్లలో 87 పరుగులకు ఐదు వికెట్లు కోల్పోయి పీకల్లోతు కష్టాల్లో పడింది. ఈ సమయంలో బ్యాటింగ్‌కు వచ్చిన హార్దిక్‌పాండ్యా, ధోనీలు నిలకడగా ఆడారు. సింగిల్స్‌ తీయడమే కష్టమైన మైదానంలో బౌండరీల మోత మోగించారు. మంచి ఫామ్‌లో ఉన్న పాండ్యా.... హ్యాట్రిక్‌ సిక్సర్లు బాది హాఫ్‌ సెంచరీ చేశాడు. 66 బంతుల్లో 83 పరుగులు చేసి పాండ్యా కెరీర్‌లో అత్యుత్తమ వ్యక్తిగత స్కోర్‌ నమోదు చేశారు. ఇక ధోనీ కూడా సింగిల్స్‌ తీస్తూ హాఫ్‌ సెంచరీ చేశారు. సచిన్‌, ద్రవిడ్‌, గంగూలీ తర్వాత.. అత్యధిక హాఫ్‌ సెంచరీలు చేసిన ఆటగాడిగా ధోనీ నిలిచాడు. పాండ్యా, ధోనీ మెరుపుదాడితో పాటు.. చివర్లో భువనేశ్వర్‌ కూడా చెలరేగి ఆడడంతో భారత్‌ మంచి స్కోర్‌ సాధించింది.

చివరి ఐదు ఓవర్లలో 53 పరుగులు
ఇక భారత్‌ చివరి ఐదు ఓవర్లలో 53 పరుగులు చేయడంతో... స్కోర్‌ 281 పరుగులకు చేరింది. మొత్తానికి ఐదు వన్డే సిరీస్‌లో భారత్‌కు శుభారంభం దక్కింది. తొలి వన్డే గెలిచి ఆధిక్యంలో నిలిచింది. ఇక 83 పరుగులు చేసి భారత విజయంలో కీలకపాత్ర పోషించిన హార్దిక్‌ పాండ్యాకు మ్యాన్‌ ఆఫ్‌ ది మ్యాచ్‌ అవార్డు దక్కింది.

Pages

Don't Miss

Subscribe to RSS - india vs australia