janasena

20:50 - December 9, 2018

జనసేన అధినేత పవన్ కల్యాణ్ సోదరుడు, నటుడు నాగబాబు సంచలన వ్యాఖ్యలు చేశారు. నందమూరి నటసింహం బాలకృష్ణ ఎవరో తనకు తెలిదయని అన్నారు. నాగబాబు ఇలా అనడం చర్చనీయాంశంగా మారింది. తెలుగు సినిమా ఇండ‌స్ట్రీలో బాల‌కృష్ణ తెలియ‌ని వారు ఉండరు. మరి నాగబాబు ఎందుకలా అన్నారు? అన్నది ఆసక్తికరంగా మారింది. మొన్న‌టికి మొన్న కేఏ పాల్ త‌న‌కు బాల‌య్య అంటే ఎవ‌రో తెలియ‌ద‌ని కామెడీ చేసిన సంగతి తెలిసిందే. ఇప్పుడు నాగ‌బాబు సైతం అదే కామెడీ చేశారు.
బాలయ్య ఎవరో నాకు తెలీదండీ బాబూ:
ఓ ఇంటర్వ్యూలో బాలయ్య గురించి చెప్పమని నాగబాబుని యాంకర్ అడిగారు. అందుకు నాగబాబు.. ఆయనెవరో నాకు తెలియదు, ఐయామ్ వెరీ సారీ అని వెంటనే సమాధానం ఇచ్చారు. తర్వాత ఆయనే కల్పించుకుని ‘బాలయ్య గురించి తెలియదు అని అన్నానేంటి? బాలయ్యగా.. చాలా పెద్ద ఆర్టిస్ట్. సీనియర్ మోస్ట్.. ‘నేరము శిక్ష’ సినిమాలో కృష్ణగారితో కలిసి నటించారు’ అని చెప్పారు. అయితే నేను అడిగింది పాత యాక్టర్, అమృతా ఫిలింస్ అధినేత, ప్రముఖ దర్శక నిర్మాత బాలయ్య గురించి కాదని.. నందమూరి బాలయ్య గురించి అని యాంకర్ వివరించారు. దీనికి సమాధానంగా నేనెప్పుడు ఆయన పేరు వినలేదు అని నాగబాబు మళ్లీ చాలా సింపుల్‌గా సమాధానం చెప్పారు. ఆర్టిస్టులు అయిన మీ అందరిది ఒకే కుటుంబం. రాజకీయంగా విభేదాలు వుండి ఇలా మాట్లాడుతున్నారా అని మళ్లీ యాంకర్ అడిగారు. అందుకు నాగబాబు ఆయనెవరో నాకు తెలీదండీ బాబూ.. నేనెప్పుడూ ఆ పేరు వినలేదని మళ్లీ అదే సమాధానం ఇచ్చారు. దీంతో యాంకర్ బిగ్గరగా నవ్వుకుని ఊరుకున్నారు. మీ అభిప్రాయం అదే అయినప్పుడు దాన్ని కంటిన్యూ చెయ్యటం ఎందుకని ఆ టాపిక్‌ని అక్కడితో వదిలేశారు. కొన్ని రోజులుగా తెలుగుదేశం పార్టీకి.. జ‌న‌సేన‌కు మ‌ధ్య మాటల యుద్ధం జరుగుతోంది. దాంతో నాగబాబు కావాలనే ఇలాంటి స‌మాధానం ఇచ్చి ఉంటారని అంతా అనుకుంటున్నారు.

11:25 - December 8, 2018

విజయవాడ : జనసేనానీ అమెరికాకు వెళ్లనున్నారు. గత కొన్ని రోజులుగా ప్రజా పోరాట యాత్ర పేరిట ఏపీలోని పలు జిల్లాల్లో పర్యటించిన పవన్..డిసెంబర్ 14వ తేదీన అమెరికాకు వెళ్లనున్నారు. మూడు రోజుల పాటు అక్కడే ఉండి వివిధ కార్యక్రమాల్లో పాల్గొననున్నారు. గతంలో కూడా పవన్..అమెరికాకు వెళ్లిన సంగతి తెలిసిందే. 
డిసెంబర్ 13వ తేదీన ఎన్ఆర్ఐ జనసేన నేతలతో సమావేశం కానున్న జనసేనానీ...డిసెంబర్ 15వ తేదీన డల్లాస్‌లో ప్రవాస గర్జన్ పేరిట నిర్వహించే కవాతులో పాల్గొననున్నారు. అదే రోజు నిర్వహించే బహిరంగసభలో పవన్ ప్రసగించనున్నారు. పార్టీ ఆశయాలు..సిద్ధాంతాలు..పార్టీ ఇచ్చిన మేనిఫెస్టోలపై సుదీర్ఘంగా పవన్ ప్రసంగించనున్నారని తెలుస్తోంది. 

21:32 - December 3, 2018

హైదరాబాద్:  తెలంగాణ లో జరుగుతున్నముందస్తు ఎన్నికల్లో  జనసేన పార్టీ అధినేత పవన్ కళ్యాణ్ తన మద్దతు ఎవరికివ్వనున్నారనే దానిపై  బుధవారం డిసెంబరు 5న ఒక  క్లారిటీ వచ్చే అవకాశం ఉంది. ప్రస్తుత ఎన్నికల్లో జనసేన తెలంగాణ లో  పోటీలోలేదు. పార్లమెంట్ ఎన్నికల్లో పోటీచేస్తామని గతంలోనే పవన్ కళ్యాణ్ చెప్పారు.
" తెలంగాణా ముందస్తు ఎన్నికల నేపధ్యంలో మిత్రులు, జనసైనికులు,ప్రజలతోపాటు పోటీ చేస్తున్న అభ్యర్ధులు కూడా  పార్టీఅభిప్రాయాన్ని తెలియ చెయ్యమని కోరుతున్నారు. జనసేన పార్టీ అభిప్రాయాన్ని 5 వ తారీఖున తెలియ పరుస్తాము" అని పవన్ కళ్యాణ్ ట్వీట్ చేశారు. 

08:50 - December 3, 2018

అనంతపురం : జనసేన అధ్యక్షుడు పవన్ కళ్యాణ్ నిర్వహించిన నిరసన కవాతులో తీవ్ర విషాదం నెలకొంది. అీనంతపురం జిల్లాలో డిసెంబర్ 2వ తేదీ ఆదివారం పవన్ నిరసన కవాతు నిర్వహించిన సంగతి తెలిసిందే. ఈ కవాతులో పాల్గొని వెళుతున్న నలుగురు జనసేన కార్యకర్తలు రోడ్డు ప్రమాదంలో దుర్మరణం చెందారు. దీనితో వారి కుటంబాల్లో తీవ్ర విషాదం నెలకొంది. 
జనసేన కార్యకర్తలు ప్రయాణిస్తున్న కారును కర్నూలు జిల్లా డోన్ వద్ద ఓ ప్రైవేటు బస్సు ఢీకొంది. నలుగురు కార్యకర్తలు అక్కడికక్కడనే మృతి చెందగా కారు డ్రైవర్‌కు తీవ్రగాయాలయ్యాయి. మృతుల్లో మధు, గో్వింద్‌లు డోన్ మండలంలోని ధర్మవరానికి చెందిన వారు కాగా...హనుమంతు వెల్దుర్థి మండలం గోవర్ధనగిరికి చెందిన వాడు. మరొకరిని గుర్తించాల్సి ఉంది. ప్రమాద వార్తను తెలుసుకున్న జిల్లా ఎస్పీ ఘటనాస్థలికి చేరుకుని పరిశీలించారు. రోడ్డు ప్రమాదంలో కార్యకర్తలు మృతి చెందడంపై పవన్ తీవ్ర దిగ్ర్బాంతి వ్యక్తం చేశారు. జనసేన నేతలతో మాట్లాడి ప్రమాదంపై ఆయన ఆరా తీశారు. 

11:11 - December 2, 2018

అనంతపురం : జిల్లాలో జనసేనానీ కవాతుకు సర్వం సిద్ధమౌతోంది. మధ్యాహ్నం 3గంటలకు గుత్తి రోడ్డులోని మార్కెట్ యార్డు నుండి క్లాక్ టవర్ వరకు కవాతు నిర్వహించనున్నట్లు జనసేనానీ వెల్లడించింది. ఈ కార్యక్రమానికి సంబంధించిన పోస్టర్లను పార్టీ నేతలు విడుదల చేశారు. 
గత కొన్ని రోజులుగా ఏపీ రాష్ట్రంలో పోరాట యాత్ర పేరిట విస్తృతంగా ప్రచారం నిర్వహిస్తున్న జనసేనానీ ఏపీ ప్రభుత్వం..నేతలను తూర్పారబడుతున్నారు. ప్రతిపక్ష నేత జగన్‌పై విమర్శలు గుప్పిస్తున్నారు. ఆయా జిల్లాల్లో పర్యటిస్తున్న పవన్...బహిరంగసభలు నిర్వహిస్తున్నారు. జిల్లాల వారీగా సమావేశాలు నిర్వహిస్తూ ప్రజా సమస్యలను తెలుసుకుంటున్నారు. జనసేన లక్ష్యాల్ని ప్రజలకు వివరించే ప్రయత్నం చేస్తున్నారు. మరోవైపు కవాతు నిర్వహిస్తూ ఉత్సాహం నింపే ప్రయత్నం చేస్తున్నారు. ఇప్పటికే విజయవాడ..విశాఖపట్టణం..రాజమండ్రిలలో కవాతు నిర్వహించిన సంగతి తెలిసిందే. తాజాగా అనంతలో నిర్వహిస్తున్న కవాతుకు వామపక్షాలు మద్దు ప్రకటించాయి. 

14:08 - November 28, 2018

అమలాపురం : తాను మహిళలకు అండగా ఉంటానని..మహిళలకు 33 శాతం రిజర్వేషన్‌కు జనసేన మద్దతు తెలియచేస్తుందని జనసేన అధ్యక్షుడు పవన్ కళ్యాణ్ వెల్లడించారు. మహిళ రక్షణ..భద్రత కోసం జనసేన కృషి చేస్తుందని పేర్కొన్నారు. నవంబర్ 28వ తేదీ అమలాపురంలో డ్వాక్రా మహిళలతో ఆయన సమావేశమయ్యారు. ఈ సందర్భంగా పవన్ మాట్లాడుతూ...
కోరికలు లేవు...
తనకు ఎలాంటి కోరికలు లేవని..వేదంతోని రాజకీయాల్లోకి రావడం జరిగిందని..ఏపీలో పలు జిల్లాలో తిరిగిన తనకు ప్రజలు ఎదుర్కొంటున్న సమస్యలు తెలిశాయన్నారు. మహిళలు బయటకు వెళితే..క్షేమంగా ఇంటికి రావాలని అనుకొనేవాడినని..కానీ తన సోదరి బయటకు వెళితే..ఏడుస్తూ ఇంటికి రావడం ఇంకా గుర్తు ఉందన్నారు. ప్రభుత్వాలు ఎందుకు పట్టించుకోవని నిలదీశారు. కట్టుదిట్టమైన చర్యలు లేకపోతే మరింత ప్రమాదం ఉంటుందని..మహిళల రక్షణకు..భద్రతకు జనసేన కట్టుబడి ఉంటుందన్నారు. ఆడపిల్లలను ఏడిపిస్తుంటే తాను చాలా మందిని కొట్టే వాడినన్నారు.
మహిళల పాత్ర కీలకం...
సమాజంలో మహిళల పాత్ర చాలా కీలకమని..తన పర్యటనలో మహిళలు ఎదుర్కొంటున్న సమస్యలు తెలుసుకున్నట్లు చెప్పారు. బూతు తిట్టే మహిళా నాయకులు కాదని..తెలివిగా ఆలోచించే నాయకులని..అలాంటి మహిళా నాయకుల కోసం జనసేన వేచి ఉంటుందన్నారు.
మహిళలకు 33 శాతం రిజర్వేషన్...
మహిళకు 33 శాతం రిజర్వేషన్‌కు జనసేన మద్దతు తెలియచేస్తామని వెల్లడించారు. కుటుంబ భారాన్ని మోస్తున్న మహిళలకు సహాయం చేసేందుకు ఉచిత గ్యాస్ సిలిండర్ పథకం ప్రవేశపెడుతామన్నారు. స్కూల్‌కి వెళ్లే ఆడపిల్లలకు ఆరోగ్యకరమైన వాతావరణం ఉండే విధంగా చూస్తామని..జనసేన ప్రభుత్వం వస్తే ఆడపిల్లలపై వేధింపులు జరిగితే మాత్రం కఠినమైన చర్యలు తీసుకుంటామని ప్రకటించారు. ప్రతి మండలానికి సంబంధించి మహిళా కాలేజీ ఉండాలన్న జనసేనానీ ప్రతి మండలానికి మహిళా గైనాకాలజిస్టులు ఉండేలా చర్యలు తీసుకుంటామన్నారు. కోనసీమ చాలా శక్తివంతమైన నేల అని..అవినీతిని దహించే ఉన్న ఈ నేల..తన కంఠలో శ్వాస ఉండేంతవరకు మహిళలకు అండగా ఉంటానని పవన్ కళ్యాణ్ వెల్లడించారు. 

18:20 - November 26, 2018

విజయవాడ: జగన్ ఎందుకు అసెంబ్లీకి వెళ్లడం లేదని జనసేన అధినేత పవన్ కళ్యాణ్ చేసిన విమర్శలకు వైఎస్ఆర్ కాంగ్రెస్ పార్టీ నాయకులు బదులిచ్చారు. చంద్రబాబుని రక్షించేందుకు జనసేన పార్టీ పెట్టిన పవన్ కళ్యాణ్‌కు జగన్‌ను విమర్శించే స్థాయి లేదని వైఎస్ఆర్ కాంగ్రెస్ పార్టీ అధికార ప్రతినిధి అంబటి రాంబాబు అన్నారు. ముఖ్యమంత్రి చంద్రబాబుని రక్షించేందుకు పుట్టిన పార్టీలే జనసేన, లోక్‌సత్తా అని అంబటి విమర్శించారు. చంద్రబాబును అధికారంలోకి తెచ్చేందుకు పవన్, జేపీ, లక్ష్మీనారాయణ యత్నిస్తున్నారని అంబటి ఆరోపించారు. బండికి కొత్త డ్రైవర్‌ వచ్చినట్లుగా.. లోక్‌సత్తా పార్టీకి కొత్త అధ్యక్షుడిగా సీబీఐ మాజీ జేడీ లక్ష్మీనారాయణ వచ్చారని అంబటి రాంబాబు ఎద్దేవా చేశారు.
నీతి, నియమాల గురించి మాట్లాడే లోక్‌సత్తా నాయకులు.. ఈ నాలున్నరేళ్ల చంద్రబాబు అవినీతి, కాల్‌మనీ, సెక్స్‌రాకెట్‌పై ఎందుకు స్పందించలేదని ప్రశ్నించారు. చంద్రబాబు కోసం పుట్టిన కవలల్లో ఒకటి లోక్‌సత్తా పార్టీ కాగా, మరొకటి జనసేత పార్టీ అని ఆయన ఎద్దేవా చేశారు. ప్రభుత్వ వ్యతిరేక ఓట్లను చీల్చేందుకే చంద్రబాబు ఇలాంటి ప్రయత్నాలు చేస్తున్నారని మండిపడ్డారు. ఎన్నికల సమయం దగ్గరపడుతుండటంతో గోదావరి-పెన్నా నదుల అనుసంధానం పేరుతో చంద్రబాబు ఎన్నికల ప్రచారం చేస్తున్నారని విమర్శించారు. పట్టిసీమ నుంచి రాయలసీమ వరకు చంద్రబాబు అంతా దోచేశారని అంబటి అన్నారు.

19:13 - November 25, 2018

రాజమండ్రి: జనసేన అధినేత పవన్ కళ్యాణ్ ఏపీ ముఖ్యమంత్రి చంద్రబాబు నాయుడుపై ఫైర్ అయ్యారు. ప్రజల కన్నీళ్లు తుడవలేని 40ఏళ్ల అనుభవం ఎందుకు? అని ప్రశ్నించారు. రాష్ట్రంలో ఏ మూలకెళ్లినా అవినీతి జరుగుతోందని పవన్ ఆరోపించారు. ఆఖరికి స్మశానాలు కూడా కబ్జా చేస్తున్నారని మండిపడ్డారు. తూర్పుగోదావరి జిల్లా రావులపాలెంలో పవన్ కళ్యాన్ బహిరంగ సభలో ప్రసంగించారు. అధికార, ప్రతిపక్షాలపై పవన్ విరుచుకుపడ్డారు.
వైసీపీ, టీడీపీ నాయకులు ఇసుక దందా చేస్తున్నారని పవన్ ఆరోపించారు. వైఎస్ఆర్ కాంగ్రెస్ అధినేత జగన్ అసెంబ్లీకి ఎందుకు వెళ్లడం లేదని పవన్ ప్రశ్నించారు. అసెంబ్లీకి వెళ్లాలంటే జగన్‌కు గుండె ధైర్యం లేదన్నారు. మోడీ, కేసీఆర్, చంద్రబాబు అంటే జగన్‌కు భయపట్టుకుందన్నారు.
ప్రజల కష్టాలను తీర్చేందుకు జనసేన పార్టీ పుట్టిందని పవన్ పేర్కొన్నారు. జనం మీద బతికే నాయకులు కాదు జనంపై బతికే నాయకులు కావాలని పవన్ అన్నారు.

09:24 - November 24, 2018

హైదరాబాద్ : జేడీ...ఈ పేరు చెబితేనే అక్రమార్కుల గుండెల్లో రైళ్లు పరుగుతుండెవి. సీబీఐ మాజీ జాయింట్ డైరక్టర్‌గా ఉన్న జేడీ లక్ష్మీనారాయణ పేరు తెలియని వారుండరంటే నమ్మశక్యం కాదు. ఉమ్మడి ఏపీ రాష్ట్రంలో పలు కీలకమైన కేసుల్లో ఆయన దర్యాప్తు చేశారు. జగన్ అక్రమాస్తుల కేసు..సత్యం కంప్యూటర్స్‌..గాలి జనార్దన్‌రెడ్డి అక్రమాలపై కేసులను దర్యాప్తు చేసి సంచలన సృష్టించారు. తాజాగా ఆయన రాజకీయ రంగ ప్రవేశం చేయనున్నారు. రాజకీయాలపై స్పష్టమైన ప్రకటన త్వరలోనే రాబోతుందని ప్రచారం జరుగుతో్ంది. 
ఏపీ రాష్ట్రంలో ప్రజా సమస్యలపై దృష్టి సారించిన ఈయన పలు ప్రాంతాల్లో పర్యటించి ప్రజల జీవనస్థితిగతులు..పాలన ఎలా జరుగుతుందనే దానిపై ఆరా తీశారు. దీనితో ఆయన ఏ పార్టీలో చేరుతారనే చర్చ జరిగింది. టీడీపీ..వైసీపీ...జనసేన..బీజేపీ..ఇలా ఏ పార్టీ కండువా కప్పుకుంటారనే దానిపై సోషల్ మాధ్యమాల్లో కుప్పలు తెప్పలుగా వార్తలు వెలువడ్డాయి. ఆయన ఏ పార్టీలో చేరరని..ఆయనే సొంతంగా పార్టీని ప్రకటించనున్నట్లు టాక్. 
జేడీగా గుర్తింపు పొందిన ఆయన తన పార్టీ పేరు కూడా..అలాలే వచ్చేలా నామకరణం చేయనున్నట్లు తెలుస్తోంది. ‘జన ధ్వని’ (జేడీ) అని పెట్టవచ్చని ప్రచారం జరుగుతోంది. తొలుత 'వందేమాతరం' పేరు పెట్టనున్నట్లు టాక్. నవంబరు 26న పార్టీ పేరు..అజెండా..సిద్ధాంతాలను..జేడీ లక్ష్మీనారాయణ అధికారికంగా ప్రకటిస్తారని తెలుస్తోంది. హైదరాబాద్‌లోని పబ్లిక్ గార్డెన్స్ వేదిక కానున్నట్లు సమాచారం. మరి జేడీ లక్ష్మీనారాయణ రాజకీయాల్లోకి వచ్చి పార్టీని స్థాపిస్తే ఏపీకి మాత్రమే పరిమితమౌతారా ? లేక తెలంగాణలో కూడా పార్టీని విస్తరిస్తారా ? అనేది చూడాలి. 

09:35 - November 21, 2018

నెల్లూరు: టీడీపీ ధర్మ పోరాట దీక్షలో ముఖ్యమంత్రి చంద్రబాబు నాయుడు ప్రతిపక్షాలపై ఫైర్ అయ్యారు. వైసీపీ, జనసేనలపై విరుచుకుపడ్డారు. తెలంగాణలో జరగనున్న అసెంబ్లీ ఎన్నికల్లో ఆ రెండు పార్టీలు పోటీ చేయకపోవడం వెనక చాలా కథ ఉందని చంద్రబాబు అన్నారు. టీఆర్ఎస్‌తో ఒప్పందం కారణంగానే వారు బరిలోకి దిగలేదని, లాలూచీ రాజకీయాలకు ఇంతకంటే వేరే నిదర్శనం అవసరం లేదని చంద్రబాబు వ్యాఖ్యానించారు.
ప్రధాని మోడీపైనా చంద్రబాబు నిప్పులు చెరిగారు. బీజేపీ అవినీతిని పెంచి పోషిస్తోందన్నారు. సీబీఐని గుజరాత్‌కు చెందిన ఆస్తానా భ్రష్టుపట్టించారని, దోవల్ కూడా ఈ వ్యవహారంలో ఉన్నారంటే నమ్మబుద్ధి కావడం లేదన్నారు. పెద్ద నోట్ల రద్దుతో దేశంలో పరిస్థితి దారుణంగా తయారైందని, రూపాయి విలువ పడిపోయిందని వాపోయారు. మోడీ వల్ల దేశానికి ఎటువంటి ఉపయోగం లేకుండా పోయిందని చంద్రబాబు విమర్శించారు.
దేశం కోసమే తాను 40 ఏళ్ల రాజకీయ విభేదాలను సైతం పక్కనపెట్టి కాంగ్రెస్‌కు దగ్గరైనట్టు చంద్రబాబు చెప్పుకొచ్చారు. 40ఏళ్లుగా తనను ఆదరిస్తున్న తెలుగు ప్రజల కోసం, రాష్ట్రాభివృద్ధి కోసం నిరంతరం శ్రమిస్తున్నట్టు చంద్రబాబు పేర్కొన్నారు. ప్రజలకు అన్యాయం జరగకుండా చూడాలని ఎంత ప్రయత్నం చేసినా ప్రధాని మోడీ నమ్మించి నట్టేట ముంచారని… అందుకే కేంద్రం నుంచి బయటకొచ్చేశామని చంద్రబాబు వివరించారు. కేంద్రంపై యుద్ధం ప్రకటించామని, ఆ దిశగానే నేరుగా పోరాటం చేస్తున్నానని వెల్లడించారు.
అయితే రాష్ట్రంలోని ప్రతిపక్ష పార్టీలైన వైసీపీ, జనసేనలు లాలూచీ రాజకీయాలు చేస్తూ తెలుగుదేశం పార్టీని ఇబ్బంది పెట్టాలని చూస్తున్నాయని చంద్రబాబు ఆరోపించారు. అందుకు ఢిల్లి వేదికగా మోడీ దత్త పుత్రులు జగన్‌, పవన్‌లు రాష్ట్రంలో రాజకీయ డ్రామాలు ఆడుతున్నారని ధ్వజమెత్తారు. అసలు నిజంగా రాష్ట్ర ప్రయోజనాలు ఆశిస్తుంటే మోడీ చేసిన అన్యాయంపై జగన్, పవన్ ఎందుకు మాట్లాడడం లేదని చంద్రబాబు ప్రశ్నించారు. తెలంగాణలో కూడా తెలుగు ప్రజలే ఉన్నారని, వారి శ్రేయస్సు కోసం, ఆ ప్రాంత అభివృద్ధి కోసం తెలంగాణ పార్టీ వ్యతిరేక కూటమిని ఏర్పాటుచేసి కేసీఆర్‌ను గద్దె దించేందుకు తాను అడుగులు వేస్తున్నానని చంద్రబాబు పేర్కొన్నారు. అయితే జగన్‌, పవన్‌లు అసలు తెలంగాణలో పోటీ చేయకపోవడం లాలూచీ రాజకీయాలకు నిదర్శనం అన్నారు.

Pages

Don't Miss

Subscribe to RSS - janasena