karnataka

07:17 - January 23, 2018

ఢిల్లీ : మైనింగ్‌ కేసులో గాలి జనార్దన్‌రెడ్డికి గట్టి ఎదురుదెబ్బ తగిలింది. బ్రహ్మణి ఇండస్ట్రీస్‌లో డీఆర్‌ఐ అధికారులు సోదాలు నిర్వహించారు. ఓబుళాపురం మైనింగ్‌ కంపెనీకి చెందిన 189 కోట్ల రూపాయల యంత్రపరికరాలను స్వాధీనం చేసుకున్నారు. 2009లో విదేశాల నుంచి దిగుమతి చేసుకున్న యంత్రపరికరాలకు కస్టమ్స్‌ డ్యూటీ చెల్లించలేదని డీఆర్‌ఐ అధికారులు ఇచ్చిన నోటీసులను గాలి జనార్దన్‌రెడ్డి బేఖాతర్‌ చేశారు. కడపలోని బ్రహ్మణి స్టీల్‌ ఇండస్ట్రీస్‌తోపాటు ఓబుళాపురం మైనింగ్‌ యంత్రపరికరాలను సీజ్‌ చేశారు.  గాలి జనార్దన్‌రెడ్డితోపాటు పలువురిపై కేసులు నమోదు చేశారు. మరోవైపు బెయిల్‌ నిబంధనలను సడలించాలన్న గాలి జనార్దన్‌రెడ్డికి సుప్రీంకోర్టులో చుక్కెదురైంది. బెయిల్‌ నిబంధనల్లో మార్పులు ఉండవని సుప్రీంకోర్టు తేల్చి చెప్పింది. 
 

14:50 - January 8, 2018

కర్నాటక : బెంగళూరులో కుంబారా సంఘా భవనంలోని కైలాశ్ బార్ అండ్ రెస్టారెంట్‌లో ఆదివారం రాత్రి ఘోర అగ్నిప్రమాదం సంభవించింది. ఈ ప్రమాదంలో బార్‌లో నిద్రిస్తున్న ఐదుగురు సిబ్బంది సజీవ దహనమయ్యారు. ఆదివారం రాత్రి 2.30 గంటల సమయంలో హఠాత్తుగా మంటలు చెలరేగాయి. అగ్నిమాపక సిబ్బంది మంటలు పక్కనున్న భవనాల్లోకి వ్యాపించకుండా అదుపులోకి తెచ్చారు. ఈ ఘటనపై బార్ యజమాని దయాశంకర్‌ను  పోలీసులు ఆరా తీస్తున్నారు. మృతుల్లో స్వామి 23, ప్రసాద్ 20, మహేశ్ 35 అనే ముగ్గురు వ్యక్తులు కర్నాటకలోని తుముకూర్ ప్రాంతంవారు కాగా..మంజునాథ్ 45, హాసన్ అండ్ కీర్తి 24 మాండ్యకు చెందినవారిగా గుర్తించారు. 

 

11:25 - December 28, 2017

బెంగుళూరు : మరో ఐదు నెలల్లో ఎన్నికలకు సిద్ధమవుతోన్న కర్నాటకలో.. జలరాజకీయాలు కాకపుట్టిస్తున్నాయి. దశాబ్దాలుగా గోవాతో ఉన్న మహాదాయి నదీజలాల పంపిణీ వ్యవహారం ఇప్పుడు.. రాజకీయాలను వేడెక్కిస్తోంది. కొన్నాళ్లుగా.. ఈ అంశంపై బీజేపీ-కాంగ్రెస్‌ శ్రేణుల మధ్య తీవ్ర వాగ్వాదం సాగుతోంది. తాజాగా, ఈరోజు.. ఉత్తర కర్నాటక అంతటా.. రైతులు బంద్‌ పాటించారు. 
రాజకీయ పార్టీల మధ్య రగడ
కర్నాటకలో జల రాజకీయం.. రాష్ట్రాన్ని అట్టుడికిస్తోంది. ఉత్తర కర్నాటకలోని నాలుగు జిల్లాలు, 13 తాలూకాల పరిధిలో.. రైతులు.. రాజకీయ నాయకులపై తీవ్ర స్థాయిలో భగ్గుమంటున్నారు. జయకర్నాటక సంఘటన నేతృత్వంలో రైతులు, బుధవారం ఉత్తరకర్నాటక వ్యాప్తంగా బంద్‌ పాటించారు. దశాబ్దాలుగా ఎడతెగని ఈ సమస్య.. వారం క్రితం ఒక్కసారిగా వెలుగులోకి వచ్చింది. వెన్వెంటనే.. రాజకీయ పార్టీల మధ్య రగడకు హేతువైంది. 
ఇరు రాష్ట్రాల మధ్య రెండు దశాబ్దాలకు పైగా వివాదం 
గోవా, కర్నాటక రాష్ట్రాల మీదుగా ప్రవహించే మహాదాయి నది జలాల పంపిణీ వ్యవహారంపై ఇరు రాష్ట్రాల మధ్య రెండు దశాబ్దాలకు పైగా వివాదం కొనసాగుతోంది. దీని పరిష్కారం కోసం.. బీజేపీ జాతీయ అధ్యక్షుడు అమిత్‌షా వేసిన ఓ ఎత్తుగడ.. కర్నాటక రాజకీయాలను వేడెక్కించింది. వచ్చే ఎన్నికల్లో కర్నాటకలో జెండా ఎగరేయాలని భావిస్తోన్న అమిత్‌షా.. మహాదాయి నదీజలాల వివాదంపై..  గోవా ముఖ్యమంత్రి మనోహర్‌ పారికర్‌, కర్నాటక బీజేపీ అధ్యక్షుడు యడ్యూరప్పలతో ఓ సమావేశం ఏర్పాటు చేశారు. ఇదే.. కన్నడనాట తాజా వివాదానికి కారణమైంది.  
రాజకీయ ప్రాధాన్యతను సంతరించుకున్న మహాదాయి అంశం  
ఎన్నికల ముంగిట్లో ఉన్న కర్నాటకలో.. మహాదాయి అంశం రాజకీయ ప్రాధాన్యతను సంతరించుకుంది. ఉత్తర కర్నాటకలోని హుబ్లి, బాగల్‌కోట, ధారవాడ, బెళగావి, గదగ్‌, హావేరి జిల్లాల్లోని 56 అసెంబ్లీ సెగ్మెంట్లలో బలాన్ని గణనీయంగా పెంచుకోవాలన్న భావనతో.. బీజేపీ ఇప్పుటి నుంచే పావులు కదుపుతోంది. ఈ క్రమంలోనే.. అమిత్‌షా, ముఖ్యమంత్రుల స్థాయిలో జరగాల్సిన సమావేశాన్ని.. ఓ రాష్ట్రముఖ్యమంత్రికి, మరో రాష్ట్రంలోని పార్టీ అధ్యక్షుడికి మధ్య నిర్వహించి.. వివాదానికి తెరలేపారు. 
కమలనాథులు పన్నిన ఎత్తుగడని విమర్శలు
యడ్యూరప్పతో భేటీ అనంతరం.. మనోహర్‌ పారికర్‌ ఆయనకు ఓ లేఖను రాస్తూ.. సమస్య పరిష్కారానికి ప్రయత్నిస్తామని పేర్కొనడం.. కర్నాటకలో అధికారంలోని కాంగ్రెస్‌ నేతలకు మింగుడ పడడం లేదు. ఇదంతా ఎన్నికల స్టంట్‌ అని.. ఓట్లు దండుకునేందుకు కమలనాథులు పన్నిన ఎత్తుగడ అని విమర్శలకు దిగారు. సమస్య పరిష్కారం అవుతుంటే.. కాంగ్రెస్‌ నాయకులకు ఉలుకెందుకంటూ బీజేపీ నాయకులూ ఎదురుదాడికి దిగుతున్నారు. మొత్తానికి, మహాదాయి నదీజల వివాదం.. ఈసారి ఉత్తర కర్నాటకలో కాంగ్రెస్‌, బీజేపీ అభ్యర్థుల భవితవ్యాన్ని తేల్చబోతోందనడంలో ఎలాంటి సందేహం లేదు. 

 

22:13 - December 15, 2017

బెంగళూరు : ప్రముఖ జర్నలిస్ట్‌ గౌరీ లంకేశ్‌ హత్య కేసులో ఆసక్తికర అంశాలు వెలుగు చూస్తున్నాయి. ప్రముఖ రచయిత కల్బుర్గి, కమ్యునిస్ట్‌ లీడర్‌ గోవింద్ పన్సారేలను హత్య చేసిన గన్‌తోనే గౌరీ లంకేశ్‌ను కూడా హత్య చేశారని ప్రత్యేక దర్యాప్తు బృందం ప్రాథమికంగా నిర్దారించింది. గౌరీ లంకేశ్‌ను చంపిన బుల్లెట్‌ ఆధారంగా ఫోరెన్సిక్‌ నిపుణులు ఈ నిర్ధారణకు వచ్చారు. పక్కా ప్రణాళిక తోనే ఈ ముగ్గురిని హత్య చేసుంటారని పోలీసులు అనుమానిస్తున్నారు. 

21:28 - October 31, 2017

బెంగళూరు : కర్ణాటక తొలి మహిళా పోలీస్‌ చీఫ్‌గా ఐపీఎస్‌ అధికారి నీలమణి ఎన్‌ రాజు నియమితులయ్యారు. డీజీ,ఐజీపీ ఆర్‌కే దత్తా పదవీవిరమణ చేయడంతో ఆయన స్థానంలో నూతన డీజీపీగా నీలమణిరాజును సిద్ధరామయ్య ప్రభుత్వం నియమించింది. సీఐడీ చీఫ్‌ కిషోర్‌ చంద్ర, ఏసీబీ హెడ్‌ ఎంఎన్‌ రెడ్డిలు ఈ పదవికి పోటీపడ్డప్పటికీ సీనియర్‌ అధికారి కావడంతో నీలమణి వైపు సర్కార్‌ మొగ్గుచూపింది. నీలమణి1983 బ్యాచ్‌ కర్నాటక కేడర్‌కు చెందినవారు. కర్ణాటకలో తొలిసారిగా మహిళా పోలీస్‌ చీఫ్‌ నియమితులయ్యారని ఐపిఎస్‌ అసోసియేషన్‌ పేర్కొంది.

21:49 - October 27, 2017

కర్నాటక : డీఎస్పీ గణపతి ఆత్మహత్య ఘటనలో కర్ణాటక మంత్రి కేజే జార్జ్‌పై కేసు నమోదైంది. గణపతి ఆత్మహత్య చేసుకునేలా ప్రేరేపించారన్న ఆరోపణలతో జార్జ్‌తో పాటు మరో ఇద్దరు సీనియర్‌ పోలీసులపై సీబీఐ కేసు నమోదు చేసింది. కొడగు జిల్లా డిఎస్పీగా విధులు నిర్వహిస్తున్న గణపతి గత ఏడాది జూలైలో ఆత్మహత్య చేసుకున్నారు. తనను మంత్రి, ఇద్దరు సీనియర్‌ అధికారులు వేధిస్తున్నారని గణపతి చెప్పారు. ఈ ఘటనపై మంత్రితో పాటు ఇద్దరు పోలీసు అధికారులపై కేసు నమోదు చేశారు. గణపతి హత్యతో వీరికి సంబంధం లేదని పోలీసులు కేసు మూసివేశారు. దీంతో గణపతి కుటుంబం సుప్రీంకోర్టును ఆశ్రయించింది. ఈ కేసును సిబిఐకి అప్పగించిన సుప్రీంకోర్టు 3 నెలల్లోగా నివేదిక అందించాలని ఆదేశించింది. దీనిపై విచారణ జరిపిన సిబిఐ అధికారులు జార్జిపై చార్జిషీటు దాఖలు చేశారు.

 

13:54 - October 6, 2017

చెన్నై : పెరోల్‌పై శశికళ పరప్పన్‌ జైలు నుంచి బయటకు వచ్చింది. అనారోగ్యంతో ఉన్న భర్తను చూసేందుకు శశికళకు కర్నాటక జైళ్ల శాఖ అనుమతివ్వడంతో ఆమె  జైలు నుంచి విడుదలైంది. ఆమెకు స్వాగతం పలికేందుకు పలువురు కార్యకర్తలు జైలు వద్దకు చేరుకున్నారు. అయితే ఈ ఐదు రోజులు వ్యక్తిగత కార్యక్రమాలకే పరిమితం కావాలని, రాజకీయ కార్యక్రమాలకు  హాజరైతే పెరోల్‌ రద్దు చేస్తామని జైళ్ల శాఖ హెచ్చరించింది.

 

13:23 - October 6, 2017

చెన్నై : శశికళకు పెరోల్ లభించింది. అనార్యోంతో ఉన్న తను భర్తను పరామర్శించేందుకు పెరోల్ కు అనుమతిచ్చింది. ఐదు రోజుల పెరోల్ కు కర్నాటక జైళ్ల శాఖ అంగీకరించింది. వ్యక్తిగత కార్యక్రమాలకే పరిమితం కావాలని జైళ్ల శాఖ అదేశించారు. మరికాసేపట్లో పెరోల్ పై శశికళ జైలు నుంచి బయటకు రానుంది. మరిన్ని వివరాలను వీడియోలో చూద్దాం...

 

13:12 - October 6, 2017

హైదరాబాద్ : గౌరీ లంకేష్ హత్య కేసులో పోలీసులు పురోగతి సాధించారు. సనాతన సంస్థతో సంబంధం ఉన్న ఐదుగురు వ్యక్తుల హస్తమున్నట్లు అనుమానిస్తున్నారు. గౌరీ లంకేష్ హత్య తర్వాత ఐదుగురు అదృశ్యమయ్యారు. ప్రవీణ్ లిమ్కర్, జయప్రకాశ్, సరంగ్ అకోల్కర్, రుద్ర పాటిల్, వినాయ్ పవార్ అదృమయ్యారు. మాడగావ్ బాంబు పేలుళ్ల కేసులో ఐదుగురిపైనా ఇంటర్ పోల్ రెడ్ కార్నర్ నోటీస్ జారీ చేసింది. మరిన్ని వివరాలను వీడియోలో చూద్దాం..

 

20:06 - October 5, 2017

బెంగళూరు : బెంగళూరులో ఇవాళ మధ్యాహ్నం భారీ వర్షం కురియడంతో జనజీవనం స్తంభించింది. వరద నీటితో రోడ్లు నదులను తలపించాయి. వందలాది వాహనాలు రోడ్లపై నిలిచిపోవడంతో ట్రాఫిక్‌ జామ్‌ అయింది. నాళాలు పొంగి పొర్లడంతో లోతట్టు ప్రాంతాలు జలమయమయ్యాయి. మధ్యాహ్నం ఒంటిగంట నుంచి 2 గంటల మధ్య 42 మిల్లీమీటర్ల వర్షపాతం నమోదైంది. భారీవర్షాలకు 4 భారీ వృక్షాలు కూలిపోయినట్లు 'బృహత్ బెంగళూరు మహానగర పాలికె' తెలిపింది. ప్రజలు అప్రమత్తంగా ఉండాలని, సురక్షిత ప్రాంతాలకు తరలివెళ్లాలని పలు సూచనలు చేసింది. మరోవైపు కర్ణాటకలో మాండ్య జిల్లాలో బుధవారం కురిసిన భారీ వర్షానికి చెరకు తదితర పంటలు నీటిలో కొట్టుకుపోయాయి.

 

Pages

Don't Miss

Subscribe to RSS - karnataka