KCR Government Failed

09:21 - March 20, 2017

సీపీఎం నిర్వహించిన మహాజన పాదయాత్ర చరిత్రాత్మక పాదయాత్ర అని, 150 రోజులకు పైబడి సాగిన ఈ యాత్ర చరిత్ర సృష్టించిందని కేరళ సీఎం పినరయి విజయన్ తెలిపారు. పాదయాత్ర ముగింపు సందర్భంగా ఏర్పాటు చేసిన సభలో పాల్గొనేందుకు ఆయన హైదరాబాద్ కు ఆదివారం వచ్చారు. ఈసందర్భంగా టెన్ టివి అసోసియేట్ ఎడిటర్ శ్రీధర్ ఆయనతో ముచ్చటించారు. అన్ని వర్గాల ప్రజలు పాదయాత్ర నినాదాలపై ఆసక్తిని కనబరిచి వారు మద్దతిచ్చారని తెలిపారు. కిలోమీటర్ల కొద్ది పాదయాత్రతో కలిసి సాగారని, ఏది ఏమైనా ఇది ఘనవిజమన్నారు. కేరళ రాష్ట్రంలో పేదలు లబ్దిపొందేలా రాష్ట్రాన్ని అభివృద్ధి చేసేందుకు ప్రభుత్వం కృషి చేస్తోందన్నారు. పేదలు చాలా సమస్యల్లో ఉన్నారని, సామాజిక న్యాయం అన్నది తమ దృష్టిలో ప్రధానాంశమన్నారు. అభివృద్ధి సామాజిక న్యాయంపైనే ఆధారపడిందని, ఈ దిశగా తాము నాలుగు మిషన్లను అమలు చేస్తున్నట్లు పేర్కొన్నారు. వీటి ద్వారా తాము నవ కేరళలను సృష్టించేందుకు ప్రయత్నిస్తున్నట్లు సీఎం పినరయి స్పష్టం చేస్తున్నారు.

07:55 - March 20, 2017

సామాజిక న్యాయం..సమగ్రాభివృద్ధి లక్ష్యంగా చేపట్టిన సీపీఎం మహాజన పాదయాత్ర నిన్నటితో ముగిసింది. పాదయాత్ర ముగింపు సందర్భంగా సరూర్ నగర్ స్టేడియంలో భారీ బహిరంగసభ జరిగింది. ఈ సభకు కేరళ ముఖ్యమంత్రి పినరయి విజయన్, సీపీఎం జాతీయ ప్రధాన కార్యదర్శి ఏచూరితో పాటు పలువురు కీలక నేతలు హాజరయ్యారు. ఈ సందర్భంగా తెలంగాణ, కేంద్ర ప్రభుత్వాలపై వక్తలు విమర్శలు గుప్పించారు. మరోవైపు ఉత్తర్ ప్రదేశ్ సీఎంగా యోగి ఆదిత్యనాథ్ ప్రమాణ స్వీకారం చేశారు. ప్రతిపక్షాలు ఆయనపై పలు విమర్శలు చేస్తున్నారు. ఈ అంశంపై టెన్ టివిలో జరిగిన చర్చా వేదికలో చెరుపల్లి సీతారాములు (సీపీఎం), తాడూరి శ్రీనివాస్ రెడ్డి (టీఆర్ఎస్), శ్రీధర్ (బీజేపీ), బెల్లం నాయక్ (టి.కాంగ్రెస్) పాల్గొని అభిప్రాయాలు వ్యక్తం చేశారు. మరింత సమాచారం కోసం వీడియో క్లిక్ చేయండి.

06:48 - March 20, 2017

హైదరాబాద్ : సబ్బండ వర్గాల సమరసైన్యం హైదరాబాద్‌లో సమరశంఖం పూరించింది. ప్రభుత్వంపై తిరుగుబావుటా ఎగురవేసింది. ఎర్రదళం భాగ్యనగరి వీధుల్లో కవాతు తొక్కింది. ఎక్కడ చూసినా లాల్‌, నీల్‌ జెండాల రెపరెపలే దర్శనమిచ్చాయి. మెడలో కండువాలు, చేతిలో జెండాలు, లాల్‌,నీల్‌ దుస్తులు ధరించి సాగిన ర్యాలీ... హైదరాబాద్‌కే ప్రత్యేక ఆకర్షణగా నిలిచింది. దారులన్నీ సరూర్‌నగర్‌కే అన్నట్టుగా ఎటుచూసినా జనసంద్రమే తలపించింది. పదం పాడుతూ... కదం కదుపుతూ ప్రభుత్వంపై సమరశంఖం పూరించారు. హైదరాబాద్‌లో ఆదివారం ఎక్కడ చూసినా ఎర్రజెండాలు, నీల్‌ జెండాలే రెపరెపలాడాయి. దీంతో హైదరాబాద్‌ లాల్‌నీల్‌ వర్ణశోభితమైంది. కులవివక్షత, సామాజిక అసమానతలపై అవి దండోరా మోగించాయి. సామాజిక న్యాయం - సమగ్రాభివృద్ధి కోసం ప్రభుత్వంపై సమరశంఖం పూరించాయి.

154 రోజులు..
తెలంగాణ వ్యాప్తంగా మహాజన పాదయాత్ర 154 రోజులు కొనసాగింది. 4200 కిలోమీటర్లు పూర్తి చేసుకుంది. ఆదివారం పాదయాత్ర ముగింపు సందర్భంగా సమర సమ్మేళనం సభ జరిగింది. ఈ సభకు సుందరయ్య విజ్ఞాన కేంద్రం నుంచి తమ్మినేని నేతృత్వంలో పాదయాత్ర బృందం సభ్యులు, పార్టీ కార్యకర్తలు సభా ప్రాంగణానికి పాదయాత్రగా చేరుకున్నారు. ఈ పాదయాత్రకు హైదరాబాద్‌ జనం అడుగడుగునా జేజేలు పలికారు. తమ అభిమానాన్నంతా పూలవర్షంలా కురిపించారు. పాదయాత్ర వస్తున్న ప్రధాన కూడళ్లలో కార్యకర్తలు బాణాసంచాలలు కాల్చి ఘన స్వాగతం పలికారు. జై భీం, లాల్‌సలాం నినాదాలతో హోరెత్తించారు. దీంతో పాదయాత్ర సాగిన దారులన్నీ కోలాహలంగా జన జాతరను తలపించింది.

నగరంలో జోరు హోరు..
పాదయాత్ర పొడవునా తమ్మినేని బృందానికి జనం తండోపతండాలుగా తోడయ్యారు. ప్రతి కూడలి దగ్గర పాదయాత్ర బృందానికి ఘన స్వాగతం పలుకుతూ..అక్కడి నుంచి వారితో కలిసి నడిచారు. టీవీ టవర్‌ చౌరస్తాకు రాగానే జనం వేలాదిగా జమఅయ్యారు. ఇక కొత్తపేట చేరుకోగానే జనం రెట్టింపయ్యారు. దీంతో దారులన్నీ సీపీఎం, సామాజిక సంఘాల కార్యకర్తలతో నిండిపోయాయి. మరోవైపు వనస్థలిపురంలోని స్పెన్సర్స్‌ నుంచి మరో ర్యాలీ సభా ప్రాంగణానికి చేరుకుంది. యువత, మహిళలు, వృద్ధులు, విద్యార్ధులు భారీగా సభకు తరలివచ్చారు. లాల్‌,నీల్‌ జెండాలు చేతబట్టి వాహనాల్లో చేరుకున్నారు. దూరప్రాంతాల వారు కొంతమంది శనివారం రాత్రే హైదరాబాద్‌ చేరుకున్నారు. దీంతో మధ్యాహ్నానికే సభ ప్రాంగణం నిండిపోయింది. ఎర్రని ఎండను సైతం లెక్కచేయకుండా జనం సభలో కూర్చొన్నారు. సభికుల సౌకర్యార్ధం సభా ప్రాంగణంలో మూడు స్క్రీన్లు ఏర్పాటు చేశారు. స్టేడియంలో తొక్కిసలా జరుగకుండా పోలీసులు జాగ్రత్తలు తీసుకున్నారు. అందుకు తగ్గట్టుగా జనమూ సహకరించారు. సభా ప్రాంగణానికి దూరంగా వాహనాలను నిలిపివేశారు. అక్కడి నుంచి నడుచుకుంటూ కార్యకర్తలు సభా ప్రాంగణానికి చేరుకున్నారు. దీంతో మొత్తం హైదరాబాద్‌ జన హోరు తలపించింది.

06:46 - March 20, 2017

హైదరాబాద్ : సమర సమ్మేళనం సభలో కళాకారుల ప్రదర్శనలు సభికులను కట్టిపడేశాయి. ప్రజలు ఎదుర్కొంటున్న సమస్యలు, ప్రభుత్వ పోడకలపై గాయకుల పాటలు అందరినీ ఆలోచింపజేశాయి. ప్రజాగాయకులు గద్దర్‌, గోరటి వెంకన్న, విమలక్క పాటలు అందరిలో ఉత్సాహాన్ని నింపాయి. గాయకుల పాటలకు సభికులు ఈలలువేస్తూ, నృత్యాలు చేస్తూ తమ మద్దతు తెలిపారు. సరూర్‌నగర్‌ ఇండోర్‌ స్టేడియం గ్రౌండ్స్‌లో నిర్వహించిన సమర సమ్మేళనం సభలో కళాకారుల ప్రదర్శనలు అందరినీ ఆకట్టుకున్నాయి. సభకు వచ్చిన జనాన్ని అలరించాయి. ప్రజా గాయకుడు గద్దర్‌ సభలో పాటలు పాడుతూ అందరినీ ఉత్సాహపరిచారు. అమర వీరులపై పాడిన పాట ఉర్రూతలూగించింది. ఇక పొడుస్తున్న పొద్దుమీద పాటకు సభికులు నృత్యాలు చేశారు. రచయిత, ప్రజా కవి గోరటి వెంకన్న స్టేజ్‌ను షేక్‌ చేశారు. పాటలు పాడుతూ, స్టెప్పులు వేస్తూ సభకు వచ్చిన వారిని ఉత్సాహపరిచారు. ఇక విమలక్క ప్రజా ఉద్యమాలపై జరుగుతున్న దాడిపై పాడిన పాటకు సభికుల నుంచి విశేష స్పందన లభించింది. ఆడుదాం డప్పుల్లా దరువేయరా అంటూ విమలక్క పాడితే సభికులు కదం కలుపుతూ స్టెప్పులేశారు. గాయకుడు ఏపూరి సోమన్న తన పాటలతో అందరిలో ఉత్తేజం నింపారు. కేసీఆర్‌ హామీలపై ఆయన పాడినపాటలు అందరినీ ఆలోచింపజేశాయి. రోజులు మారాలి, మా రోజులు రావాలంటూ సాగిన పాటకు సభికుల నుంచి విశేష స్పందన లభించింది. ప్రజానాట్య మండలి కళాకారులు నర్సింహ్మా పాడిన పాటలు సభలో ఉత్సాహాన్ని నింపాయి. తమ్మినేని పాదయాత్రపై ఆయన పాడిన పాటకు సభకు వచ్చిన వారు ఈలలువేస్తూ... నృత్యాలు చేస్తూ మద్దతు తెలిపారు. ప్రజానాట్యమండలి కళాకారుల ఆటపాటలు, భద్రాచలానికి చెందిన గోండు నృత్యాలు సమర సమ్మేళనం సభకే హైలెట్‌గా నిలిచాయి.

06:43 - March 20, 2017

హైదరాబాద్ : సీపీఎం తెలంగాణ కార్యదర్శి తమ్మినేని వీరభద్రం మహాజన పాదయాత్ర ముగింపు సందర్భంగా హైదరాబాద్‌ సరూర్‌నగర్‌ స్టేడియంలో నిర్వహించిన సభలో ప్రసంగిచిన వివిధ పార్టీలు, ప్రజా సంఘాల నేతలు..టీఆర్ఎస్ ప్రభుత్వ విధానాలపై విరుచుకుపడ్డారు. ముఖ్యమంత్రి కేసీఆర్ పోకడలు నియంతృత్వాన్ని తలపిస్తున్నాయని మండిపడ్డారు. బడుగు, బలహీనవర్గాల సంక్షేమాన్ని విస్మరించిందని విమర్శించారు. టీఆర్ఎస్ ప్రభుత్వం తన విధానాలను మార్చుకోపోతే ప్రజలే తగిన బుద్ధి చెబుతారని హెచ్చరించారు. సీపీఎం తెలంగాణ కార్యదర్శి తమ్మినేని వీరభద్రం మహాజన పాదయాత్ర ముగింపు సందర్భంగా హైదరాబాద్‌ సరూర్‌నగర్‌ స్టేడియంలో నిర్వహించిన బహిరంగ సభలకు వివిధ పక్షాలు, ప్రజా సంఘాల నేతలు హాజరయ్యారు. ఈ సందర్భంగా ప్రసంగించిన నేతలు టీఆర్‌ఎస్‌ ప్రభుత్వ విధానాల్లోని లోపాలను వేలెత్తిచూపారు. దళితులు, గిరిజనులకు మూడు ఎకరాల భూమి పంపిణీ, రెండు పడక గదుల ఇళ్లు, నిరుద్యోగం, గిరిజనులు, మైనారిటీల రిజర్వేషన్ల పెంపు, ఎస్సీ, ఎస్టీ ఉప ప్రణాళిక స్థానంలో ప్రత్యేక నిధి ఏర్పాటుకు ప్రభుత్వం చేస్తున్న ప్రయత్నాలు వంటి అవిషయాల్లో సర్కారు వైఖరిపై విరుచుకుపడ్డారు. సామాజిక న్యాయం విషయంలో ప్రభుత్వ పోకడలను నేతలు ఎండగట్టారు.

సర్కార్ పై ఆగ్రహం..
హరితహారం పేరుతో ఆదివాసీల పోడు వ్యవసాయంపై ఉక్కుపాదం మోపుతున్న టీఆర్‌ఎస్‌ సర్కారుకు వ్యతిరేకంగా బలమైన ప్రజా ఉద్యమాన్ని నిర్మిస్తామని సీపీఎం ఎమ్మెల్యే సున్నం రాజయ్య హెచ్చరించారు. తమ్మినేని పాదయాత్రను అడ్డుకునేందుకు పాలకులు పన్నిన కుట్రను ప్రజలు తిప్పికొట్టారని సీపీఐ తెలంగాణ కమిటీ కార్యదర్శి చాడ వెంటకరెడ్డి ముఖ్యమంత్రి కేసీఆర్‌పై ఆగ్రహం వ్యక్తం చేశారు. కేసీఆర్‌ పాలనలో తెలంగాణలో అణగారిన వర్గాల అణచివేతకు గురువుతున్నారని బీసీ సంక్షేమ సంఘం అధ్యక్షుడు, టీడీపీ ఎమ్మెల్యే ఆర్‌ కృష్ణయ్య మండిపడ్డారు.
టీఆర్‌ఎస్‌ ప్రభుత్వం ప్రజల ఆశలు, ఆకాంక్షలను నెరవేర్చడంలో విఫమైందని టీ జేఏసీ చైర్మన్‌ ప్రొఫెసర్‌ కోదండరామ్‌ విమర్శించారు. తెలంగాణ ఉద్యమంగా సందర్భంగా ఇచ్చిన లక్ష ఉద్యోగాల భర్తీ హామీ అమలు చేయకపోవడంపై ఆగ్రహం వ్యక్తం చేశారు. తెలంగాణలోని ప్రభుత్వ పాఠశాల్లల్లో నెలకొన్న దుస్థితిని జస్టిస్‌ చంద్రకుమార్‌ ప్రస్తావించారు. వేలాది స్కూళ్లలో మంచినీరు, మరుగుదొడ్ల సౌకర్యంలేని విషయాన్ని గుర్తు చేశారు. తెలంగాణలోని గ్రామాల్లో ప్రజలు పడుతున్న అవస్థలు తమ్మినేని పాదయాత్రతో వెలుగులోకి వచ్చిన సమస్యల పరిష్కారానికి నిరంతరం పోరాడాలని ప్రముఖ విద్యావేత్త చుక్కా రామయ్య పిలుపునిచ్చారు. బలహీనవర్గాల సంక్షేమాన్ని విస్మరించి వ్యవహరిస్తున్న కేంద్ర, రాష్ట్ర ప్రభుత్వ విధానాలపై సామాజికవేత్త కంచె ఐలయ్య మండిపడ్డారు. నీలి, ఎరుపురంగు కలిసి దేశంలో మొదటిసారి సమర సమ్మేళనం నిర్వహించడం మార్పుకు చిహ్నమన్న అంశాన్ని ప్రస్తావించారు.

ఐక్యపోరాటాలు..
తెలంగాణలో సన్నాసులు పాలన నడుస్తున్నదని మాలమహానాడు నాయకుడు అద్దంకి దయాకర్‌ విమర్శించారు. కుల వృత్తులు చేసుకుంటున్నవారికి అదే వృత్తిలో సహాయం అందించాలన్న ముఖ్యమంత్రి కేసీఆర్‌ నిర్ణయాన్ని దయాకర్‌ తప్పుపట్టారు. టీఆర్‌ఎస్‌ పాలనలో సామాజికన్యాయం కొరవడిందని పలువురు నేతలు విమర్శించారు. బలహీనవర్గాల సంక్షేమం కుంటుపడిందని దయ్యబట్టారు. సర్కారు మెడలు వంచి సామాజిక తెలంగాణ సాధించేందుకు ఐక్య పోరాటాలకు ప్రజలు కలిసిరావాలని నేతలు పిలుపు ఇచ్చారు.

06:40 - March 20, 2017

హైదరాబాద్ : సామాజిక న్యాయం ద్వారానే తెలంగాణ సమగ్ర అభివృద్ధి సాధ్యమని సీపీఎం రాష్ట్ర కార్యదర్శి తమ్మినేని వీరభద్రం అన్నారు. సామాజిక న్యాయం దిశగా చర్యలు తీసుకోకుంటే ప్రభుత్వాన్ని గద్దె దించుతామని హెచ్చరించారు. సామాజిక న్యాయం సాధించే వరకు లాల్‌నీల్‌ జెండాల ఐక్య ఉద్యమాలు కొనసాగుతాయని స్పష్టం చేశారు. హైదరాబాద్‌లో జరిగిన సమర సమ్మేళనం సభలో మాట్లాడిన ఆయన..ప్రజా ఉద్యమాలను అణచివేసేందుకు కేసీఆర్‌ ప్రయత్నిస్తున్నారని..ఉద్యమాలపట్ల కేసీఆర్‌ తీరుమారకుంటే ఆయనను ప్రజలే మార్చేస్తారని హెచ్చరించారు. మహాజన పాదయాత్ర ముగింపుగా హైదరాబాద్‌లోని సరూర్‌నగర్‌ ఇండోర్‌ స్టేడియం గ్రౌండ్స్‌లో నిర్వహించిన సమర సమ్మేళనం సభలో సీపీఎం రాష్ట్ర కార్యదర్శి తమ్మినేని వీరభద్రం ఆవేశపూరిత ప్రసంగం చేశారు. మహాజన పాదయాత్ర తనకు ఎన్నో మధుర స్మృతులను ఇచ్చిందన్నారు. ఈ పాదయాత్రను తన జీవితంలో ఎప్పటికీ మరచిపోలేనన్నారు. పల్లెపల్లెనా తమకు ఆత్మీయ స్వాగతం పలికిన ప్రజలకు ఆయన సభా వేదికగా కృతజ్ఞతలు తెలిపారు.

సామాజిక న్యాయమే నినాదం..
సామాజిక న్యాయం ద్వారానే తెలంగాణ అభివృద్ధి సాధ్యమని తమ్మినేని వీరభద్రం ఉద్ఘాటించారు. తెలంగాణలోని ప్రజలంతా అట్టడుగు వర్గాలకు చెందినవారే ఎక్కువగా ఉన్నారని.. వారంతా అభివృద్ధి చెందకుండా తెలంగాణ ఎలా అభివృద్ధి అవుతుందని ప్రశ్నించారు. సామాజిక న్యాయం అంటే ఓట్లు దండుకోవడానికి వాడే పదజాలం కాదన్నారు. అట్టడుగు వర్గాలకు సమన్యాయం జరగాలన్నదే సామాజిక న్యాయ నినాదమని స్పష్టం చేశారు. గడిచిన రెండున్నరేళ్లలో అణగారిన వర్గాలు బాగుపడేలా ప్రభుత్వ చర్యలు లేవన్నది స్పష్టమైందన్నారు. తెలంగాణలో సామాజిక న్యాయ సాధనకు చర్యలు తీసుకోకుంటే ప్రభుత్వం గద్దె దిగక తప్పదని హెచ్చరించారు. సామాజిక న్యాయం సాధించే వరకు లాల్‌నీల్‌ జెండాలు కలిసి పోరాటం కొనసాగిస్తాయని, కచ్చితంగా అధికారంలోకి వస్తాయన్నారు తమ్మినేని.

అప్రజాస్వామిక చర్యలు...
ఎన్నికల్లో ప్రజలకు ఇచ్చిన హామీలను కేసీఆర్‌ విస్మరించారని తమ్మినేని మండిపడ్డారు. దళితులకు 3ఎకరాల భూమి, బీసీ, మైనార్టీలకు సబ్‌ప్లాన్‌ ఏర్పాటు చేయాలన్నారు. తెలంగాణలో 22 లక్షల మందికి ఇళ్లులేవని ప్రభుత్వ సర్వేలో తేలిందని వారందరికీ డబుల్‌ బెడ్‌రూం ఇళ్లు నిర్మించి తీరాలని తమ్మినేని డిమాండ్‌ చేశారు. లేకుంటే కేసీఆర్‌ను ఆయన బెడ్‌రూంలో నిద్రపోనివ్వబోమని హెచ్చరించారు. ప్రజా ఉద్యమాలపట్ల కేసీఆర్‌ కర్కోటకుడిలా వ్యవహరిస్తున్నారని తమ్మినేని ఆగ్రహం వ్యక్తం చేశారు. నిర్బంధాలతో ప్రజా ఉద్యమాలను అణచివేసేందుకు ప్రయత్నిస్తున్నారని ఆరోపించారు. ఉద్యమాలను అణచివేయాలని చూస్తే..గోడకు కొట్టిన బంతిలాగా మరింతగా ఎదుగుతామన్నారు. అప్రజాస్వామిక చర్యలను కేసీఆర్‌ మానుకోవాలని సూచించారు. కేసీఆర్‌ తీరుమార్చుకోకపోతే ప్రజలే కేసీఆర్‌ను మార్చుతారని హెచ్చరించారు.

పోడు భూములు..
సామాజిక న్యాయం సమగ్రాభివృద్ధి సాధనగా భవిష్యత్‌లో భారీ ఉద్యమాలు నిర్మిస్తామని తమ్మినేని వీరభద్రం స్పష్టం చేశారు. అన్ని సామాజిక శక్తులు, ప్రజా సంఘాలు, మేధావులు, కళాకారులతో కలిసి ఉమ్మడి కార్యక్రమాన్ని రూపొందిస్తామన్నారు. స్పష్టమైన విధానంతో ప్రజలకు ముందుకు వస్తామని...తమను ఆశీర్వదించాలని కోరారు. తెలంగాణ ప్రజల భూములను ప్రభుత్వం లాక్కొంటోందని తమ్మినేని విమర్శించారు. గిరిజన భూముల జోలికి వెళితే మరో మన్యం పోరాటం తప్పదన్నారు. ఆదివాసీల పోడుభూముల జోలికి వెళ్లితే ఖబర్దాన్‌ అని హెచ్చరించారు. ప్రాజెక్టుల కోసం భూములు లాక్కొనే రైతులకు న్యాయం చేయాలని ఆయన డిమాండ్‌ చేశారు.

06:37 - March 20, 2017

హైదరాబాద్ : ఎన్నికల్లో ప్రజలకు ఇచ్చిన హామీ మేరకు సామాజిక తెలంగాణ లక్ష్య సాధనలో ముఖ్యమంత్రి కేసీఆర్ ప్రభుత్వం విఫలమైందని కేరళ ముఖ్యమంత్రి పినరయి విజయన్‌ విమర్శించారు. తెలంగాణ సమగ్రాభివృద్ధి, సామాజిక న్యాయం కోసం ఏమి చేయాలన్న విషయంలో సీపీఎం సూచనలను పరిగణలోకి తీసుకోవాలని విజయన్‌ కోరారు. తమ్మినేని పాదయాత్ర ద్వారా వెలుగులోకి వచ్చిన సామాజిక సమస్యలను పరిష్కరించాలని ఆయన డిమాండ్‌ చేశారు. మరోవైపు బంగారు తెలంగాణ సాధన ఏమైందని సీపీఎం జాతీయ ప్రధాన కార్యదర్శి సీతారాం ఏచూరి ముఖ్యమంత్రి కరేసీఆర్ కేసీఆర్ ను ప్రశ్నించారు. సామాజిక తెలంగాణ సాధనం కోసం సీపీఎం తెలంగాణ కార్యదర్శి తమ్మినేని వీరభద్రం చేపట్టిన మహాజన పాదయాత్ర ముగిసింది. ఈ సందర్భంగా హైదరాబాద్‌ సరూర్‌నగర్‌ స్టేడియంలో జరిగిన సభకు కేరళ ముఖ్యమంత్రి పినరయి విజయన్‌ ముఖ్య అతిథిగా హాయరయ్యారు. ఐదు నెలలపాటు అవిశ్రాంతంగా అలుపెరుగని పాదయాత్ర చేసిన తమ్మినేని వీరభద్రం బృందాన్ని నినరయి విజయన్‌ అభినందించారు. పాదయాత్రను అడ్డుకోవాలని ముఖ్యమంత్రి కేసీఆర్‌, టీఆర్‌ఎస్‌ నేతలు పిలుపు ఇవ్వడాన్ని పినరయి విజయన్‌ తప్పుపట్టారు. పాలకులు ఎన్ని కుటియత్నాలు చేసినా..మహాజన పాదయాత్ర విజయవంతం కావడం కమ్యూనిస్టులు, సామాజిక శక్తుల ఘనతని ప్రశంసించారు. ఎస్సీ, ఎస్టీ, బీసీలు, మైనారిటీల అభివృద్ధితోనే సామాజిక తెలంగాణ సాధ్యమన్న విషయాన్ని ముఖ్యమంత్రి గుర్తు పెట్టుకోవాలని పినరయి విజయన్‌ సూచించారు.

హామీల అమలేది..
మరోవైపు ముఖ్యమంత్రి కేసీఆర్‌ బంగారు తెలంగాణ హామీ అమలుకు నోచుకోలేదని, ఇది కేవలం వాగ్దానంగానే మిగిలిపోయిందని కార్యక్రమానికి హాజరైన సీపీఎం జాతీయ ప్రధాన కార్యదర్శి సీతారాం ఏచూరి విమర్శించారు. పాలకులు విస్మరించిన సామాజిక తెలంగాణ సాధన కోసం సీపీఎం పునరంకింతమైందని, ఇందుకోసం భవిష్యత్‌లో మరిన్ని ఉద్యమాలు తప్పవని ఏచూరి చెబుతున్నారు. సామాజిక తెలంగాణ సాధన కోసం సీపీఎం భవిష్యత్‌లో చేపట్టే ఉద్యమాలకు ప్రజలందరూ సహకరించాలని సీతారాం ఏచూరి విజ్ఞప్తి చేశారు.

Don't Miss

Subscribe to RSS - KCR Government Failed