khammam

08:20 - October 17, 2017

ఖమ్మం : చారిత్రక నేపథ్యం కలిగిన ఖమ్మం జిల్లా కలెక్టర్‌ కార్యాలయానికి  కష్టకాలం వచ్చింది. కలెక్టరేట్ చుట్టూ రాజకీయ బూచి చక్కర్లు కొడుతుంది. భూముల కోసం పావులు కదుపుతున్నారు. నయా భవన నిర్మాణం పేరుతో... రియల్‌ వ్యాపారం దిశగా అడుగులు వేస్తున్నారు. కలెక్టరేట్ తరలింపుపై 10టీవీ ప్రత్యేక కథనం...
కొత్త కలెక్టరేట్‌ను నిర్మించాలని ప్రతిపాదన
అన్ని ప్రభుత్వ కార్యాలయాలు ఒకే సముదాయంలో ప్రజలకు అందుబాటులో ఉండాలన్నది తెలంగాణ సర్కారు ఆలోచన. ఈ క్రమంలోనే జిల్లాలో కలక్టరేట్ మార్పిడి తెరపైకి వచ్చింది. ఇందులో భాగంగా ఖమ్మం నడిబొడ్డున  ఉన్న ఎన్ఎస్‌పీ శిథిల భవనాలను కూల్చిన ప్రాంతంలో కొత్త కలెక్టర్‌ కార్యాలయాన్ని నిర్మించాలని ప్రతిపాదించారు. కానీ తాజాగా నగరానికి శివారున ఉన్న వి.వెంకటయాపాలెం గ్రామ పంచాయతీ పరిధిలో కలెక్టరేట్‌ భవన సముదాయాలను నిర్మించాలనే ఆలోచన పుట్టుకొచ్చింది. అది కూడా చిన్న, సన్న కారు రైతులు సాగు చేసుకుంటున్న భూముల్లో నిర్మించేందుకు ప్రయత్నిస్తున్నారు. ఆ భూములకు చెందిన రైతులతో సంప్రదింపులైనా జరపకుండానే జిల్లా అధికార యంత్రాంగం సర్వే ప్రక్రియను ప్రారంభించింది. 
వ్యవసాయ భూముల్లో ప్రభుత్వ కార్యాలయ భవనం 
420, 422, 423, 424, 425, 427 సర్వే నెంబర్లలోని వ్యవసాయ భూముల్లో 26.24 ఎకరాల భూమిని ప్రభుత్వ కార్యాలయ భవన నిర్మాణాలకు అనువైనవిగా ప్రకటించింది. ఈ మేరకు ప్రభుత్వ నోటిఫికేషన్ కూడా జారీ చేసింది. కాగా ఈ ప్రక్రియ అంతా ముగిసిన తరువాత అధికారులు రైతులతో చర్చలు జరిపారు. ఆ భూములకు  చెందిన 14 మంది రైతులతో ఖమ్మం ఆర్డీవో పూర్ణచంద్ర ఇప్పటికే రెండు దఫాలుగా చర్చలు  జరిపారు. తమ భూములు ఎకరాకు కోటి యాభై లక్షల నుంచి రూ.2 కోట్ల వరకు ధర పలుకుతుందని రైతులు చెబుతున్నారు. అయితే ఆర్డీవో మాత్రం ఎకరాకు రూ.25 లక్షల వరకు పరిహారం ఇప్పిస్తామని ముందు చెప్పగా.. రైతులు నిరాకరించడంతో... ఎకరాకు రూ.50 లక్షల వరకూ ఇప్పించేందుకు ప్రయత్నిస్తామని చెప్పారు. లేనిపక్షంలో భూ సేకరణ చట్టాన్ని ప్రయోగించాల్సి వస్తుందని హెచ్చరిస్తున్నారు.
కొందరి స్వలాభం కోసమే సాగు భూముల్లో కలెక్టరేట్‌ యోచన?
కొందరి స్వలాభం కోసమే సాగు భూముల్లో కలెక్టరేట్‌ ను కట్టేందుకు  అధికారులు ప్రయత్నిస్తున్నారనే ఆరోపణలు వినిపిస్తున్నాయి. కలెక్టరేట్‌ను నిర్మించేందుకు తాజాగా ఎంపిక చేసిన భూమి పరిసర ప్రాంతాల్లో ఓ ఇద్దరు ప్రజా ప్రతినిధులకు చెందిన వందలాది ఎకరాల భూములున్నట్టు ప్రచారం జరుగుతుంది.  కలెక్టరేట్ అక్కడికి తరలివెళ్తే చుట్టూ ఉన్న తమ భూముల ధరలు పెరుగుతాయనే రాజకీయ కోణంలోనే కలెక్టరేట్ తరలింపు పన్నాగం పన్నినట్లు వినికిడి. ఈ దెబ్బతో ఖమ్మంలో స్తబ్ధతకు లోనైన రియల్‌ ఎస్టేట్‌ను వ్యాపారులు ఉరుకులు పెట్టిస్తున్నారు. వి.వెంకటయాపాలెం గ్రామ పంచాయతీ పరిధిలో కలెక్టరేట్‌ను కట్టడం వల్ల ప్రజలకు దూరం అవుతుందని..ఎటువంటి ప్రయోజనం ఉండదని వామపక్షాల నేతలు అంటున్నారు. ఈ మేరకు గతంలో ఎంపిక చేసిన 14 ఎకరాల ఎన్‌ఎస్‌పీ భూమిలోనే కలెక్టరేట్‌ను నిర్మించాలని సీపీఎం దశలవారీ ఆందోళనలు చేస్తోంది.

18:15 - October 15, 2017

ఖమ్మం : పట్టణంలో విషాదమైన ఘటన చోటుచేసుకుంది. ఎన్‌ఎస్‌పి కాలువలో పడి అక్కాతమ్ముడు మృతి చెందారు. మృతులు ఆరేళ్ల మంద మానస, ఐదేళ్ల మంద మనోజ్‌గా గుర్తించారు. చిన్నారుల మృతితో తల్లిదండ్రులు శోకసముద్రంలో మునిగిపోయారు. మరిన్ని వివరాలను వీడియోలో చూద్దాం...

17:58 - October 11, 2017

ఖమ్మం : విద్యాబుద్ధులు నేర్పాల్సిన గురువే.. తప్పతాగి దారి తప్పాడు. వికృతచేష్టలు చేశాడు. విద్యార్థినిపై ఉపాధ్యాయుడు లైంగిక వేధింపులకు పాల్పడ్డాడు. జిల్లాలోని కామేపల్లి హైస్కూల్‌లో వేణుగోపాల్‌ సోషల్‌ టీచర్‌ గా పని చేస్తున్నాడు. తొమ్మిదో విద్యార్థినిని గదిలో తీసుకువెళ్లి.. వేణుగోపాల్ అసభ్యకరంగా మాట్లాడాడు. ఇదే విషయం విద్యార్థిని బంధువులకు తెలియడంతో అడిగేందుకు స్కూల్‌కు వచ్చారు. ఈ సమయంలో స్కూల్‌లో ఉన్న వేణుగోపాల్‌ మద్యం మత్తులో ఉన్నాడు. అయితే.. విషయం అడగగా మద్యం మత్తులో తలాతోక లేని సమాధానాలు చెబుతున్నాడు. మద్యం మత్తులో ఇష్టమొచ్చినట్లు మాట్లాడుతున్నారు. తాను సెలవులో ఉన్నానని బుకాయిస్తున్నారు. ఉపాధ్యాయుడు వేణుగోపాల్‌ తీరును నిరసిస్తూ విద్యార్థులు ధర్నా చేపట్టారు.
 

 

13:09 - October 11, 2017

ఖమ్మం : జిల్లా కామేపల్లి మండలం పండితాపురంలో సంతలో విద్యుత్ షాక్ తో 12 పశువులు మృతి చెందాయి. ఈ ప్రమాదంలో ఇద్దరు వ్యక్తులకు తీవ్ర గాయాలయ్యాయి. విద్యుత్ షార్ట్ సర్క్యూట్ తోనే ప్రమాదం జరిగినట్టు తెలుస్తోంది. పూర్తి వివరాలకు వీడియో క్లిక్ చేయండి.

12:51 - October 6, 2017

జయశంకర్ భూపాలపల్లి : మేడారం అడవులు లవ్వాల కీకారణ్యం జలగలంచ దాష్టీకంపై సర్కార్‌ కదిలింది. గొత్తికోయ మహిళలను చెట్టుకు కట్టేసి కొట్టిన అమానుషంపై సీఎం సీరియస్‌ అయ్యారు. భాష, భావం తెలియని గొత్తికోయల అరణ్య రోధన.. అమానుష ఘటనను టెన్‌ టీవీ వరుస కథనాలతో వెలుగులోకి తెచ్చింది. ప్రజా సంఘాల ఆందోళనలు.. రాజకీయ పార్టీల ర్యాలీలు గిరిజనులకు బాసటగా నిలిచాయి. అభయారణ్యంలో ఆదివాసీలపై దాడులను ముఖ్యమంత్రి తీవ్రంగా పరిగణించారు. స్వయంగా సీఎం నివేదిక కోరడంతో అధికారులు ఉరుకులు, పరుగులు పెడుతున్నారు.  

నాగరికత తెలిసిన మనుషులే అనాగరికంగా ప్రవర్తించారు. మానవత్వం మరచి గొత్తికోయల జీవితాల్లో అల్లకల్లోలం సృష్టించారు. మహిళలు, చిన్నారులని కూడా చూడకుండా వారితో ఇష్టం వచ్చినట్టు ప్రవర్తించారు. గొత్తికోయ మహిళలను లాఠీలతో బాదడం, చిన్న పిల్లల తల్లులను, వృద్ధులను, గర్భిణులను ఈడ్చి పడేసి.. ఫారెస్ట్‌ అధికారులు పైశాచికంగా ప్రవర్తించిన  తీరును 10 టీవీ కళ్లకు కట్టింది. జలగలంచ ఘటన తెలంగాణ రాష్ట్ర వ్యాప్తంగా దుమారాన్ని లేపింది. ఈ విషయంపై రాజకీయ పార్టీలు, ప్రజా సంఘాలు భగ్గుమంటున్నాయి. సర్వత్రా విమర్శలు, వ్యతిరేకత వ్యక్తమవడంతో ప్రభుత్వం ఇంటలిజెన్స్‌ నివేదికలను తెప్పించుకుంది. 

ఇదిలా ఉంటే గొత్తికోయల ఘటనపై సీఎం కేసీఆర్‌ భగ్గుమన్నారు. అటవీ శాఖ అధికారుల తీరుపై సీఎం కేసీఆర్‌ మండిపడ్డారు. గొత్తికోయల పట్ల ఈ చర్యలకు పాల్పడిందెవరు? అసలు గొత్తి కోయలపై దాడి చేయాల్సిన అవసరం ఏమొచ్చింది? దాడి చేయాలని ప్రభుత్వం నుంచి ఆదేశించింది ఎవరు? చర్యలు తీసుకునే ముందు అధికారులు రాష్ట్ర అధికారులు, స్థానిక పోలీసులకు.. ఎవరికైనా సమాచారమిచ్చారా? ఇస్తే ఎవరికిచ్చారు. మొత్తం ఈ విషయాలపై నివేదిక ఇవ్వమని సీఎం ఆదేశించినట్లు సమాచారం. ప్రభుత్వానికి చెడ్డపేరు వస్తుందనే కనీస అవగాహన లేని అధికారులున్నారా? అని సీఎం అసహనం వ్యక్తం చేసినట్లు తెలిసింది. 

అసలేం చేస్తున్నారు? అడవుల సంరక్షణను పక్కన పెట్టి, ప్రభుత్వానికి చెడ్డపేరు తెస్తున్నారని, వెంటనే పని తీరు మార్చుకోవాలని.. ఐఎఫ్‌ఎస్ అధికారులపై సీఎం కేసీఆర్‌ ఆగ్రహం వ్యక్తం చేసినట్లు తెలుస్తోంది. సీఎం ఆగ్రహించడంతో అటవీ అధికారులు, ఉరుకులు, పరుగులు పెట్టారు. హైదరాబాద్‌లోని అరణ్యభవన్‌లో సమీక్ష నిర్వహించడంతో పాటు, సచివాలయంలో సమావేశమై లోటుపాట్లను సమీక్షించుకున్నారు. అటవీ శాఖ ముఖ్య కార్యదర్శి, పీసీసీఎఫ్‌ సహా, సీఎంఓ అధికారులు ప్రత్యేక దృష్టి పెట్టినట్లు తెలుస్తోంది. హైదరాబాద్‌ నడిబొడ్డున కేబీఆర్‌ పార్కు విషయమై అధికారుల తీరును సీఎం తప్పు పట్టినట్లు తెలుస్తోంది. ఇదిలా ఉంటే బాగా అడవి లోపల ఉంటే.. గిరిజనుల సమస్యలను పరిష్కరించి, వారికి సౌకర్యాలు కల్పించలేమని కలెక్టర్‌ చెప్పారు. అందుకే వారు బయటికి వస్తే కావాల్సిన సౌకర్యాలు కల్పించేలా.. అటవీశాఖతో కలిసి నిర్ణయం తీసుకున్నట్లు చెప్పారు. మేడారం అడవుల్లో అవస్థలు పడుతున్న విషయాలపై నిజానిజాలను తెలుసుకోవాలని.. ముఖ్యమంత్రి కె. చంద్రశేఖర్‌రావు సూచించినట్లు తెలుస్తోంది. 

17:39 - October 5, 2017

భూపాలపల్లి : భాష తెలియదు..భావం అర్ధం కాదు...నాగరిక ప్రపంచంలో అనాగరికులు...పొట్టకూటి కోసం తరలివచ్చిన వలసజీవులు.. అధికారుల దాష్టీకంతో కుదేలైన అడవిబిడ్డలు..అలాంటి వారిపై కీచత్వం ప్రదర్శించారు. మహిళలపై ఫారెస్ట్ అధికారులు పైశాచికత్వాన్నిప్రదర్శించారు. తల్లులను లాఠీలతో అటవీ అధికారులు చావ బాదడంతో గొత్తికోయ పిల్లలు భీతిల్లారు. మహిళలు, పిల్లల ఏడుపులతో మేడారం అడవి దద్దరిల్లింది. అయినా ఫారెస్టు అధికారులు శాంతించలేదు. నేలమట్టం చేసిన ఇళ్లలోని సామగ్రిని ట్రాక్టర్లలో తరలించారు. జలగలంచ ఘటన రాష్ట్ర వ్యాప్తంగా దుమారాన్ని రేపింది. గొత్తికోయలపై అమానవీయంగా ప్రవర్తించిన తీరుపై రాజకీయ పార్టీలు, ప్రజా సంఘాలు భగ్గుమంటున్నాయి. పాలకులతో తాడోపేడో తేల్చుకునేందుకు పోరాటబాట పట్టాయి. 

17:38 - October 5, 2017

భూపాలపల్లి : సొంత రాష్ట్రంలో ఆధిపత్య పోరును భరించలేక అటవి బాట పట్టి కాలం గడుపుదామని కొండ కోనల నడుమ గూడెం కట్టుకున్నారు. అడవి ఆదరిస్తే నాగరికులైన అధికారులు ఈ బక్క జీవులను తన్ని తరిమేస్తున్నారు. పదే పదే గొత్తికోయలను టార్గెట్ గా చేస్తూ నిర్దాక్షిణ్యంగా గూడేలపై బడి దాడులకు తెగబడుతున్నారు. చిన్న పిల్లలు,వృద్ధులు, మహిళలు, గర్భిణులనే తేడా లేకుండా నిర్దయతో లాఠీలు ఝళిపిస్తూ బరితెగిస్తున్నారు. అందులో భాగంగానే వారం రోజుల క్రితం అటవీ అధికారులు మేడారం అడవుల్లోని లవ్వాల కీకారణ్యాన్ని టార్గెట్ చేశారు. అమాయకపు గొత్తికోయ గూడెం జలగలంచను రణరంగంగా మార్చేశారు.

ఏటూరునాగారం ఏజెన్సీ బాట పట్టారు....
ఛత్తీస్‌గఢ్‌ నుంచి గొత్తికోయలు సరిహద్దులు దాటి గత ఉమ్మడి వరంగల్ జిల్లాలోని ఏటూరునాగారం ఏజెన్సీ బాట పట్టారు. పదిహేనేళ్లుగా అడవిలో నివాసం ఉంటున్నారు.. పోడు వ్యవసాయం చేసుకుంటూ పొట్టబోసుకుంటున్నారు. ఒక్క వరంగలే కాదు.. ఖమ్మం, కరీంనగర్ ఏజన్సీల్లోకి కూడా వచ్చారు. గోదావరి నది పరివాహక ప్రాంతం పొడవునా వీరి పాకలే దర్శనమిస్తాయి. తెలంగాణకు వచ్చిన గొత్తికోయల పరిస్థితి కరవమంటే కప్పకు కోపం విడవమంటే పాముకు కోపం అన్నట్టుగా తయారైంది. వరంగల్ జిల్లా ఏటూరునాగారం అభయారణ్యంలో 40 గ్రామాల్లో గొత్తికోయలు గుడిసెలు వేసుకొన్నారు. అడవి ఉత్పత్తులపై ఆధారపడి బతుకు బండిని లాగుతున్నారు. ఇదే కోవలో ఏర్పాటైందే జలగలంచ. తాడ్వాయి మండలం మేడారం అడవుల్లోని లవ్వాల సమీపంలో జలగలంచ ఉంది. ఇక్కడ 36 కుటుంబాలు ఉంటున్నాయి. పిల్లా, పాపలతో కలిపి 200 మంది దాకా ఉన్నారు. వీరంతా ఆకులు, అలములు తింటూ జీవనం సాగిస్తున్నారు. పనులు దొరికిన చోటకు కూలీలుగా వెళ్తున్నారు. ప్రభుత్వం వీళ్లకు రేషన్ కార్డులు, ఆధార్ కార్డులు కూడా జారీ చేసింది. 87 మందికి ఓటు హక్కును కూడా కల్పించారు. ప్రభుత్వం నుంచి ఎలాంటి పథకాలు, సహాయం అందక పోవడంతో జీవనోపాథి కోసం ఫారెస్ట్ లో నీటి వసతి ఉన్న ప్రాంతాన్ని ఎంచుకుని ఇప్పుడిప్పుడే వ్యవసాయం చేస్తున్నారు. ఇదంతా అధికారులకు కంటగింపుగా మారింది. తరచూ గూడెంలోకి వెళ్లి బెదిరించడం మొదలుపెట్టారు.

200 మంది అటవీ సిబ్బంది జలగలంచపై విరుచుకుపడ్డారు...
గోదావరి పరీవాహక ప్రాంతంలో గొత్తికోయలు ఏర్పరచుకున్న గూడెంల్లో జలగలంచ పటిష్టంగా ఉంది. దీనిని నేలమట్టం చేసి గొత్తికోయలను నిరాశ్రయులను చేయడమే లక్యంగా మెరుపు దాడులకు పాల్పడ్డారు అటవీశాఖ అధికారులు. ఒక్కసారిగా 200 మంది అటవీ సిబ్బంది జలగలంచపై విరుచుకుపడ్డారు. నానాబీభత్సం సృష్టించారు. కాళ్లా వేళ్లా పడ్డా కనికరించకుండా ఇళ్లు నేలమట్టం చేశారు. ఇళ్లు కూల్చవద్దని ప్రాధేయపడ్డ గొత్తికోయల మహిళలపై దాడి చేశారు. గూడెంలోని పది మంది మహిళలను సమీపంలోని ఇప్ప చెట్టుకు కట్టేసి నిర్భంధించారు. గొత్తికోయ మహిళలను లాఠీలతో బాదారు. చిన్న పిల్లల తల్లులను, వృద్ధులను ,గర్భిణులను ఈడ్చి పడేశారు. మహిళల దుస్తులు చిరిగిపోయాయి. 

17:36 - October 5, 2017

భూపాలపల్లి : మేడారం అడవుల్లో అధికారుల దాష్టీకంతో గొత్తికోయలు దుర్భర జీవితాలను గడుపుతున్నారు. ఆదివాసీలు ఆర్తనాదాలు చేస్తున్నారు.. రెక్కల కష్టాన్ని నేలకూల్చారని కుమిలి కుమిలి ఏడుస్తున్నారు.. గూడు చెదిరిన గిరిజనులు చెట్టుకొకరు పుట్టకొకరయ్యారు... ఆరుబయటే అష్ట కష్టాలతో అవస్థలు పడుతున్నారు.. మేడారం పరిధిలోని లవ్వాల కీకారణ్యంలో జలగలంచ గూడెంపై ఫారెస్ట్ అధికారుల దాష్టీకం తర్వాత ఆగూడెంలో ఎలా ఉంది. మరింత సమాచారం కోసం వీడియో క్లిక్ చేయండి.

11:19 - October 5, 2017
11:15 - October 5, 2017

హైదరాబాద్ : సింగరేణి కార్మిక సంఘం ఎన్నికలు ఉత్కంఠగా కొనసాగుతున్నాయి. సింగరేణి వ్యాప్తంగా 12 డివిజన్‌లలో ఎన్నికలు జరుగుతున్నాయి. పోలింగ్‌ కేంద్రాల వద్ద ఓటర్లు బారులు తీరారు. ఎన్నికల బరిలో 16 కార్మిక సంఘాలు ఉండగా... టీబీజీకేఎస్, ఏఐటీయూసీ సంఘాల మధ్యే ప్రధాన పోటీ నెలకొంది. 52 వేల 534 మంది కార్మికులు ఓటుహక్కు వినియోగించుకోనున్నారు. రాత్రి 7 గంటలకు ఓట్ల లెక్కింపు ప్రారంభం కానుంది. మరోవైపు ఖమ్మం, పెద్దపల్లి జిల్లాల్లో టీబీజీకేఎస్ నాయకుల ప్రలోభాలు కొనసాగుతున్నాయి. ఎన్నికల కోడ్‌ ఉల్లంఘించి జోరుగా ప్రచారం నిర్వహిస్తున్నారు. ఖమ్మం, ఇల్లందు, మంథనిలో ఓటు తమకే వేయాలంటూ నాయకులు అభ్యర్థిస్తున్నారు. మరిన్ని వివరాలను వీడియోలో చూద్దాం...
 

Pages

Don't Miss

Subscribe to RSS - khammam