KTR

10:54 - March 7, 2018

నల్గొండ : సూర్యాపేటలోని చింతపాలెం మండల టీఆర్ఎస్ అధ్యక్షుడు లకావత్ రామారావు ఆయన సతీమణి ఎంపీటీసీ సుభద్రపై నిందితుడు కత్తితో దాడికి పాల్పడ్డాడు. ఆమెకు స్వల్పగాయాలయ్యాయి. స్థానికులు నిందితుడిని పట్టుకుని పోలీసులకు అప్పగించారు. దాడి వెనుక డబ్బుల వ్యవహారమే కారణమని తెలుస్తోంది. డబుల్ బెడ్ రూం ఇప్పిస్తానని డబ్బులు తీసుకున్నట్లు, ఇవ్వకపోవడంతో నిందితుడు దాడికి పాల్పడినట్లు సమాచారం. రూ. 1.60 వేలు తీసుకున్నారని, కొంత డబ్బు వాపస్ ఇచ్చారని నిందితుడు పేర్కొంటున్నట్లు తెలుస్తోంది. ఇతర పథకాల పేరిట పేదల దగ్గరి నుండి డబ్బులు వసూలు చేస్తున్నట్లు ప్రచారం జరుగుతోంది. కాగా... దాడికి పాల్పడ్డ వ్యక్తిని పోలీసులు అదుపులోకి తీసుకుని విచారిస్తున్నారు.

15:28 - March 1, 2018

హైదరాబాద్ : అధికార పార్టీలో అంతర్గత కుమ్ములాటలు ఇప్పుడిప్పుడే బయటపడుతున్నాయి. నేతల మధ్య సయోధ్య లేకపోవడం అటు ఉంచితే.. ఎమ్మెల్యేలు, మంత్రులపైనే గులాబి నేతలు తమ అసంతృప్తిని వెళ్లగక్కుతున్నారు. ఎమ్మెల్యే, మంత్రుల వైఖరికి నిరసనగా పార్టీని వీడుతుండడం హాట్ టాపిక్ గా మారింది.
నేతల మధ్య అంతర్గత పోరు
అధికార టిఆర్ ఎస్ పార్టీ రాజకీయ పునరేకీకరణ పేరుతో వలస నేతలకు ప్రాధాన్యతనిస్తోందని సొంతపార్టీ నేతల నుంచే విమర్శలు వస్తున్నాయి. రాష్ట్రంలోని 31జిల్లాల్లో వలసనేతలతో పాత నేతలకు ఉప్పూనిప్పుల పంచాయతీ నడుస్తోంది. పార్టీ  ఆవిర్భావం నుంచి జెండా మోసిన తమ పరిస్థితి కూరలోకరివేపాకు మాదిరిగా మారిందన్న ఆవేదన వ్యక్తం అవుతోంది. పార్టీ పదవులతో పాటు ప్రభుత్వ పదవుల నియామకంలో కూడా తమకు న్యాయం జరుగడం లేదన్న ఆందోళన ఉద్యమ నేతల్లో వ్యక్తం అవుతోంది. ఈ   పరిస్థితుల్లో ఇటీవల  చోటు చేసుకుంటున్న పరిణామాలు పార్టీలో మరింత అయోమయాన్ని సృష్టిస్తున్నాయి.
ఎమ్మెల్యే గంగులపై పార్టీనేతల గుర్రు 
పార్టీకి పట్టున్న  కరీంనగర్‌లో ఇద్దరు కార్పోరేటర్లు  ఎమ్మెల్యే గంగుల కమలాకర్ కు వ్యతిరేకంగా గళం విప్పారు.  ఎమ్మెల్యే, మేయర్ వర్గాల మధ్య ఉన్న ఆధిపత్య పోరుతో ఇద్దరు కార్పోరేటర్లు  పార్టీని వీడారని ప్రచారం జరుగుతోంది.  ఎమ్మెల్యే వైఖరికి వ్యతిరేకంగానే తాము  పార్టీని వీడుతున్నామని వారుకూడా ప్రకటించడం పార్టీలో పరిస్థితిని బయటపట్టినట్టేంది. అటు ఖమ్మం జిల్లాలో కూడా  జడ్పీటీసికి   మంత్రి  తుమ్మల  నాగేశ్వర్ రావ్ వర్గాలమధ్య చిటపటలు బయటపడుతున్నాయి.  వివాదాలకు దూరంగా ఉండే తమ్ములపై కూడా  ఆరోపణలు  రావడం పార్టీలో హాట్ టాపిక్ గా మారింది.
బయటపడుతున్న అంతర్గత పంచాయతీలు 
ఓవైపు మరోఏడాదిలో సార్వత్రిక ఎన్నికలు తరముకొస్తున్న సందర్భం.. ఇటు ఇంతకాలం లోలోపలే రగులుతున్న నేతల అంతర్గత పంచాయతీలు ఒక్కొక్కటిగా బయటపడుతున్నాయి. ఈ పరిస్థితి గులాబీపార్టీ అధిష్ఠానానికి తలనొప్పిగా మారింది. సాధారణ ఎన్నికలు సమీపిస్తున్న నేపథ్యంలో నేతలు కొత్త దారులు వెతుక్కుంటుండం పార్టీలో చర్చనీయంశంగా మారుతోంది.

 

20:19 - February 19, 2018

ఆంధ్రప్రదేశ్ రాష్ట్రంల రాజకీయాలు జూస్తుంటే ఏమనిపిస్తున్నది..? అబ్బా లీడర్లకు కమిట్మెంట్ అంటె ఇట్లుండాలే.. ప్రజల మీద..? మళ్లొక పారి మనం ఈ లీడర్లనే గెలిపిచ్చుకోని రుణం దీర్చుకోవాలె అనిపిస్తలేదు.. ప్రత్యేక హోదా విషయంల చంద్రబాబు కమిట్మెంట్... జగన్ బాబు.. ఆరాటం.. పవన్ బాబు పాకులాట.. బీజేపీ పనితనం.. కాంగ్రెస్ హెచ్చరికలు... జూస్తుంటే.. ఇట్లనే అనిపిస్తది.. కని అస్సలు కథ గిది..

పోశమ్మ పోగేశి పెడ్తె.. మైసమ్మ మాయం జేశినట్టు పాపం హరీష్ రావు సారేమో.. బైటిపార్టోళ్లను కండువాలు మార్చి కారెక్కిస్తుంటే.. ఇంకోదిక్కుకెళ్లి కార్లకెళ్లి దిగి ఎల్లిపోతున్నరు అసలైన నేతలే.. కరీంనగర్ జిల్లాల టీఆర్ఎస్ పార్టీ పరిస్థితి ఎట్ల తయ్యారైందంటే.. ఇప్పటికి ఇప్పుడు ఓట్లొస్తె.. ప్రతిపక్షాల కంటె వేగంగ సొంతపార్టోళ్లే కారుపని జేశెతట్టున్నరు..

సేమ్ గొర్ల పత్కం ఎట్ల తెర్లు తెర్లైందో.. డబుల్ బెడ్రూం ఇండ్ల కథ గూడ.. గోవింత నామస్మరణల మున్గిపోయినట్టే అనిపిస్తున్నది.. ఈ శాతగాని మాటలు ఎందుకు జెప్పాలే జనానికి ఎందుకు ఆశవెట్టాలే.. ఉన్నదేదో ఇయ్యక.. అల్లుడొస్తె ఏడవండాలే.. కోడిపిల్లను ఏడగమ్మాలే అని జేజమ్మ ముచ్చట్లన్ని జెప్తె.. యాడాదికి అంగుళం చొప్పున శరవేగంగ డబుల్ బెడ్రూం ఇండ్ల నిర్మాణమైతున్నది..

బీసీ,ఎస్సీ,ఎస్టీ మైనార్టీ, పేదలందర్ని ఒక్కతాన గల్పి.. బహుజనుల రాజ్యం తయ్యారు జేశితీర్తమని తెలంగాణ సామాజిక పోరాట సమితోళ్లు అనుకొచ్చిండ్రు.. ఎప్పటికైనా తెలంగాణ రాష్ట్రంల అధికారం చేజిక్కిచ్చుకుంటం.. ఎక్వమందున్న బహుజనులను పరిపాలకులను జేస్తమని ఆ సంఘం రాష్ట్ర అధ్యక్షుడు ఉప్పుసంతోష్ జెప్పిండు.. కోదండరాం, చెర్కు సుధాకర్ గూడ గట్టిగనే మాట్లాడిండు..

అలవాట్ల పొర్పాటున బూతుమాట అన్న.. క్షమించుమంటున్నడు అనంతపురం ఎంపీ జేసీ దివాకర్ రెడ్డి.. మీడియాతోని మాట్లాడుకుంట మాట్లాడుకుంట జగన్ మోహన్ రెడ్డి మీద నాల్కె జారిండు.. ఎంటనే సరిజేస్కోని సారీ అని చెప్పిండు.. అయినా జేసీ దివాకర్ రెడ్డి అసొంటి ఉత్తమ పురుషులు బూతులు మాట్లాడకపోతె ఆశ్చర్యంగని.. మాట్లాడితె ఏం ఆశ్చర్యం అంతేనా..?

గప్పట్ల ఒకపారి ఓఎన్జీసీ గ్యాస్ పైపులు లీకై.. ఊరికి ఊరే మంటలు లేశెగదా..? అగో అసొంటి కథనే అయితుండే జర్రైతె మళ్లొకపారి.. తూర్పుగోదావరి జిల్లా మల్కీపురం మండలం గొల్లెపాలెం మీదికెళ్లి ఓఎన్జీసీ కంపినోడు పైపులు వర్సుకుంట గ్యాస్ దీస్కపోతున్నడు.. పుసుక్కున ఆ పైపు వల్గినట్టున్నది.. మొత్తం గ్యాస్ మీదికి చిత్తుతున్నది.. గింత నిప్పుగూడ తల్గెనాంటే ఒడ్సెర సుమతే..

నల్లగొండ జిల్లా ఎలికట్టె ఊర్లెకెళ్లి ఒక పిలగాడు నాకు వాట్సప్ల వీడియో వంపిండు.. ఆ ఊర్లె జనానికి ఈగెలకు దోస్తీ గల్చింది.. మన్సులను జూడంగనే ఉర్కొచ్చి ఆల్తయట ఈగెలు.. ఇగ తాళ్లళ్ల గూడ గండోళ్ల మీద అభిమానం వెంచుకోని పొమ్మంటె గూడ వోతలేవట.. వాడెవ్వడో పుణ్యాత్ముడు జేశిన ఉద్దార్కానికి ఈగెల మోత మోగుతున్నది..

యాడంగ దాపురమైందో ఏం పాడో.. చిర్తపులి రోజు రాత్రి పూట రాను.. బర్రెనో గొర్రొనో కొర్కి సంప.. ఎన్నొద్దులు సూస్తరు చెప్పుండ్రి రైతులు.. ఉత్తపుణ్యానికే పసులు సచ్చిపోవట్టే.. అడ్వి అధికారులకు చెప్తె వాళ్ల చెవ్వుమీద పేనువారినట్టు గూడ ఉండదాయే.. ఇగ లాభం లేదని.. ఒక రైతు.. ఏకంగ చిర్తపులిని పోస్టు మర్టానికి వంపిండు.. తను దావఖానకు వొయ్యిండు..

అరరరే పాపం గుండు అన్మంతరావు సచ్చిపోయిండటగదా..? మస్తు జోకులు జేస్తుండే సీన్మలళ్ల..ఇయ్యాళ తెల్లారంగనే ఈ ముచ్చట తెల్సింది.. పాపం మంచిమన్షుండే.. అయితే పాణం గూడ బాగలేదట చాలొద్దుల సంది.. వాళ్లు వీళ్లు జర్రంత పైస సాయం జేశిండ్రటగని.. పైస సాయం జేసుడు తప్ప మనం ప్రాణ సాయం జేయలేముగదా..? పాపం...

 

06:40 - February 15, 2018

హైదరాబాద్ : బల్దియా అప్పుల వేట వేగం పెంచింది. ఆర్థిక కష్టాలనుంచి గట్టెక్కడమే లక్ష్యంగా పావులు కదుపుతోంది. ఇప్పటికే మూడు సార్లు ముంబై చుట్టు జీహెచ్‌ఎంసీ అధికారులు చక్కర్లు కొట్టగా... తాజాగా బాంబే స్టాక్‌ ఎక్సేంజ్‌ ఇన్వెస్టర్లతో నగర మేయర్‌, కమిషనర్‌ భేటీ అయ్యారు. ఇంతకీ బల్దియా ఆదాయం పెంచుకుంటుందా.. అప్పుల ఊబిలో కూరుకుపోతుందా అన్నది చర్చనీయాంశంగా మారింది.

జీతాలు, మెయింటెనెన్స్‌ వెళ్లదీయడమే కష్టంగా మారింది బల్దియాకు. ఉద్యోగులకు జీతాలు చెల్లించాలంటే అమ్మో ఒకటో తారీఖు అంటూ బెంబేలు పడే పరిస్థితి నెలకొంది. దీంతో ఉద్యోగుల్లో ఆందోళన నెలకొంది.. ప్రభుత్వం ప్రకటిస్తున్న ప్రాజెక్టులు బల్దియాతో చేయిస్తుండడంతో ఖజానాకు గండిపడిందన్న ఆరోపణలు వినిపిస్తున్నాయి.

హైదరాబాద్‌ను అంతర్జాతీయ నగరం చేస్తామంటూ.. ప్రభుత్వం పలు కార్యక్రమాలు రూపొందించింది. సమగ్ర రోడ్‌ డెవలప్‌ మెంట్‌ ప్లాన్ కింద నగరంలోని ప్రముఖ జంక్షన్లలో స్కైవేలు, మల్టీలెవల్‌ ఫ్లై ఓవర్లు, గ్రేడ్‌ సపరేటర్లు వంటి భారీ రోడ్లు నిర్మించాలని నిర్ణయించింది. దీనికి 23వేల కోట్ల వరకూ ఖర్చు అవుతుందని లెక్కలువేసింది. మరోవైపు ఆర్టీసీ నష్టాలను కూడా భరించాలని ఆదేశించడంతో... 334 కోట్లు చెల్లించింది. ప్రభుత్వం ప్రకటనలు చేస్తూ... ఖర్చులు బల్దియాపై వేయడమే ఈ కష్టాలకు కారణం అంటున్నారు ప్రతిపక్ష పార్టీల నేతలు.
మున్సిపల్‌ బాండ్లను విక్రయించి నష్టాలను అధిగమించాలని నిర్ణయించింది బల్దియా. వెయ్యికోట్లు సేకరించాలని లక్ష్యంగా పెట్టుకున్న జీహెచ్‌ఎంసీ మొదటి విడతలో 200 కోట్లు రాబట్టనుంది. దీంతో త్వరలోనే బల్దియా ఖజానాకు 200కోట్ల నిధులు చేరనున్నాయి. దీనికి 8.9శాతం వడ్డీరేటు చెల్లించనుంది. ఈ విధంగా నిధులు సేకరించిన 2వ స్థానిక సంస్థగా జీహెచ్‌ఎంసీ నిలవనుంది. గతంలో పూణే మున్సిపల్‌ కార్పొరేషన్‌ ఇలాగే నిధులు సేకరించింది.

అంతర్జాతీయ నగరంగా హైదరాబాద్‌ను చేస్తామన్న ప్రభుత్వం అప్పుల నగరంగా తయారు చేస్తోందన్న విమర్శలు వినిపిస్తున్నాయి. ఇప్పటికే వాటర్‌ బోర్డు వేలాది కోట్లు అప్పులు చేయగా... ఇప్పుడు బల్దియా అదే దారిలో నడుస్తోంది.. మూసీ కార్పొరేషన్, హైదరాబాద్‌ రోడ్‌ కార్పొరేషన్లను ప్రత్యేకంగా ఏర్పాటు చేసిన ప్రభుత్వం వాటిద్వారా కూడా అప్పులు చేసేందుకు స్కెచ్‌ వేసిందన్న విమర్శలు వినిపిస్తున్నాయి. ఇప్పటివరకూ నిండు ఖజానాతో ఉన్న బల్దియా... ఇక నుంచి అప్పుల్లోకి వెళ్లనుంది. ప్రభుత్వం తమ రాజకీయ లబ్దికోసం కార్పరేషన్‌ను ఊబిలోకి దించుతుందా అన్నది చర్చనీయాంశంగా మారింది.

07:23 - February 1, 2018
17:53 - January 27, 2018

హైదరాబాద్ : భాగ్యనగరం.. హైదరాబాదులో ప్రయాణం అంటే నరకమే... అన్న విషయం తెలియని వారుండరు. అందునా ఆర్టీసీ బస్సులో ఐతే ప్రత్యక్ష నరకమే. బస్సులోపలే కాదు.. బస్సు ఎక్కడానికి ముందు కూడా సమస్యలే... సరైన షెల్టర్లు లేక ఎండకు ఎండుతూ... వానకు నానుతూ... వచ్చిన బస్సును అందుకోలేక నానా ఇబ్బందులు పడుతున్నారు ప్రజలు. మోడరన్‌ బస్టాపులు... ప్రత్యేక బస్‌బేలంటూ.. బల్దియా చెబుతున్న మాటలు నీటి మూటలను తలపిస్తున్నాయి. అసలు తాము ఎక్కాల్సిన బస్సుకోసమే ప్రయాణీకులు గంటల పాటు ఎదురు చూడాలి. పోనీ... ఓపిక పట్టి ఎదురు చూద్దామనుకున్నా... సరైన షెల్టర్ ఉండదు. ఎండాకాలంలో మండుటెండలో.. వర్షాకాలంలో జోరువానలో ప్రయాణీకులకు తిప్పలు తప్పడంలేదు.. చాలా చోట్ల రోడ్లపైనే పడిగాపులు కాయాల్సిన దుస్థితి నెలకొంది.

నగరంలో బస్‌ బేల కొరత తీవ్రంగా వేధిస్తోంది. ప్రతి రోజు సుమారు 33 లక్షల మంది ప్రయాణీకులను... గమ్యస్థానాలకు చేర్చడానికి 3800 బస్సులు తిరుగుతున్నాయి. కానీ వాటిని నిలపడానికి ఏదో కొన్ని చోట్ల మినహా... మరెక్కడా స్థలం లేదు. అటు డ్రైవర్లతోపాటు ఇటు ప్రయాణీకులకు కూడా ట్రాఫిక్‌ సమస్యలు ఎదురవుతున్నాయి. ఒకే సారి ఎక్కువ బస్సులు వచ్చాయంటే.. పరుగులు తీసే ప్రయాణీకుల అవస్థలు మాటల్లో చెప్పలేం.

ఎన్నేళ్ళు గడుస్తున్నా.. నగరంలో బస్‌షెల్టర్ల నిర్మాణం పూర్తికావడం లేదు. పదేళ్ళక్రితం బస్‌షెల్టర్ల నిర్మాణ బాధ్యతను జీహెచ్‌ఎంసీకి అప్పగించి చేతులు దులుపుకుంది ఆర్టీసీ. 1832 బస్టాపులు అవసరమని బల్దియాకు ఆర్టీసీ అధికారులు ప్రతిపాదనలు పంపారు. బస్టాపుల నిర్మాణాన్ని యాడ్‌ ఏజెన్సీ ద్వారా బిల్ట్‌ ఆపరేట్‌ అండ్‌ ట్రాన్స్‌పర్‌ పద్ధతిలో చేపట్టాలని నిర్ణయించారు గ్రేటర్‌ అధికారులు.. ఐదు సార్లు టెండర్లు నిర్వహిస్తే... కేవలం 840 బస్‌ షెల్టర్ల నిర్మాణమే జరిగింది. పలు ప్రాంతాల్లో షెల్టర్ల నిర్మాణానికి ముందుకొచ్చిన యాడ్‌ ఏజెన్సీలు..యాడ్స్‌పై ఎక్కువ ఆదాయం వచ్చే ప్రాంతాల్లో మాత్రమే నిర్మించారు. బస్‌షెల్టర్ల నిర్మాణాలు అతివృష్టి.. అనావృష్టి తీరులో చేపట్టారు. ఒకటీ లేదా రెండు షెల్టర్లు మాత్రమే అవసరమైన చోట్ల అవసరానికి మించి

నిర్మించాయి యాడ్‌ కంపెనీలు. ప్రస్తుతం 1200 ప్రాంతాల్లో బస్‌ షెల్టర్ల కొరత ఉందంటున్నారు అధికారులు.
బస్‌బేల నిర్మాణంకోసం... దాదాపు రెండేళ్ళ క్రితం నుంచీ అధికారులు కసరత్తు చేస్తున్నారు. మొదటి దశలో 55 ప్రాంతాల్లో బస్‌బేల నిర్మాణానికి అధికారులు ప్రాథమికంగా స్థలాలను గుర్తించారు. వాటిని తమకు అప్పగించాలంటూ సంబంధిత శాఖలకు అర్జీలు కూడా పంపారు. బస్‌బేలు, బస్టాపుల నిర్మాణం, నిర్వహణల అధ్యయనం కోసమంటూ... ప్రజా ప్రతినిధులు, అధికారులు స్టడీ టూర్‌లకు తిరిగి వస్తున్నారు కానీ.... సమస్యకు మాత్రం చెక్‌ పెట్టడం లేదు.. మరికొద్ది నెలల్లో రానున్న వేసవి కాలానికైనా... ఈ సమస్య తీరుతుందో లేదో అధికారులు చెప్పాలి..

17:48 - January 27, 2018

నిజామాబాద్ : జిల్లా మున్సిపల్ కార్పొరేషన్ కు కోట్లాది రూపాయల నిధులు వస్తున్నా.. వివిద శాఖల మధ్య సమన్వయం లేకపోవడంతో పనులు నత్తనడకన కొనసాగుతున్నాయి. నెలల తరబడి ఈ పనులు కొనసాగుతుడంటంతో నిత్యం వాహనదారలు ప్రజలు తీవ్ర ఇబ్బందులు పడుతున్నారు. పనులు కొన్ని ప్రాంతాల్లొ పూర్తి అయినప్పటికి అక్కడ రోడ్లు వేయకపోవడంతో.. దుమ్ము, ధూళీతో జనం సతమతమవుతున్నారు. నిజామాబాద్‌ నగరంలో జరుగుతున్న అండర్‌ గ్రౌండ్‌ డ్రైనేజీ పనుల కోసం ప్రభుత్వం 145 కోట్ల రూపాయలు వెచ్చిస్తోంది. ఈ పనులు వచ్చే జూన్‌ నెల వరకు పూర్తి చేయాలని నిర్ణయం తీసుకున్నారు. కాంట్రాక్టర్లు ప్రజాప్రతినిధుల జేబులు నింపుతూ.. ఇష్టారీతిన రోడ్లను తొవ్వేస్తున్నారని పలువురు ఆరోపిస్తున్నారు.

మొదటగా అండర్‌ గ్రౌండ్‌ డ్రైనేజీ పైపులు వేసి.. ఆ వెంటనే మిషన్‌ భగీరథ పనులు మొదలు పెట్టారు. ప్రధాన మార్గాల గుండా ఈ పైపు లైన్లు వేయటంతో వాహనదారులకు ఇబ్బందులు తప్పటం లేదు. పనులు పూర్తి అయిన ప్రాంతాలలొ రోడ్లు వేయకుండా.. మరమ్మత్తులు చేపట్టకపొవటంతొ వాహనదారులు అవస్థలు పడుతున్నారు. దీంతో బీజేపీ-టీ మాస్‌ ఫోరం నేతలు పనులు త్వరగా పూర్తి చేయాలంటూ.. మున్సిపల్‌, కలెక్టరేట్‌ కార్యాలయ ఎదుట ఆందోళనలు చేపట్టారు.

ఆందోళనలు చేపట్టినా సంబంధిత శాఖాధికారులు మాత్రం పట్టించుకోవడం లేదనే విమర్శలొస్తున్నాయి. నగరంలో పనులు జరిగే సమయంలో సంబంధిత అధికారులు నిర్ణీత సమయాన్ని నిర్ణయించి పనులను పూర్తిచేయించాలి. కానీ అధికారుల నిర్లక్ష్యంతో పనులు జరగడంలేదంటూ పలువురు ఆరోపిస్తున్నారు. సంబంధిత శాఖల అధికారులు సమావేశమై.. పనులు జరిగే ప్రాంతాల్లో ట్రాఫిక్‌ మళ్లించేందుకు చర్యలు తీసుకోవాలి. కానీ కాంట్రాక్టర్లు ఎలాంటి సూచనలు లేకుండానే పనులు మొదలు పెట్టారు. పగటి సమయంలో పనులు చేస్తుండటంతో దుమ్ము, ధూళి ఎగసిపడుతుందని.. దీంతో ప్రజలు శ్వాసకోశ సంబంధిత రోగాల బారిన పడుతున్నారని పలువురు నేతలు ఆరోపిస్తున్నారు.

కేంద్ర ప్రభుత్వం 75కోట్లు మంజూరు చేసినా.. పాలక మండలి, మున్సిపల్‌ అధికారులు పనుల్ని ఎందుకు త్వరగా చేయడంలేదో అర్ధం కావడం లేదని.. నిజామాబాద్‌ మాజీ ఎమ్మెల్యే యెండల లక్ష్మినారాయణ మండిపడ్డారు. అధికారులు ఇప్పటికైనా త్వరగా పనులు పూర్తి చేసి ప్రజల ఇబ్బందులు తొలగించాలని డిమాండ్‌ చేశారు. నగరంలో ఎటు చూసినా దుమ్ము, ధూళి ఎగిసిపడుతుండటంతో.. వాహనదారులు తీవ్ర ఇబ్బందులు ఎదుర్కొంటున్నారు. ఇప్పటికైనా సంబంధిత శాఖాధికారులు స్పందించి.. పనులు వేగంగా జరిగేలా చూడాలని ప్రజలుకోరుకుంటున్నారు.

17:43 - January 27, 2018

మహబూబ్ నగర్ : ఆపరేషన్‌ ఆకర్ష్‌తో ఊపుమీదున్న కాంగ్రెస్‌లో... ఇప్పుడు ఆ చేరికలే సెగ రేపుతున్నాయి... పార్టీబలోపేతానికి పీసీసీ చేస్తున్న ప్రయత్నాలకు.... స్థానిక నేతల ఆదిపత్య పోరు అడ్డంకిగా మారింది. తాజాగా పాలమూరు జిల్లాలో చేరికల గొడవ హస్తినకు చేరడం కాంగ్రెస్‌ పార్టీలో హాట్‌ టాపిక్‌గా మారింది. మొన్న వరంగల్‌.. నిన్న నల్గొండ జిల్లాల్లో రేగిన చేరికల లొల్లి... తాజాగా మహబూబ్‌నగర్‌ జిల్లాకు పాకింది. ఉమ్మడి పాలమూరు జిల్లాలో ఒకప్పుడు తిరుగులేని నేతగా వెలిగిన నాగం జనార్దన్‌ రెడ్డి.... కాంగ్రెస్‌ కండువా కప్పుకునేందుకు సిద్ధంగా ఉన్నారు.. అందుకోసం సీనియర్‌ నేత జైపాల్‌ రెడ్డి ద్వారా ఢిల్లీనుంచి లైన్‌ క్లియర్‌ చేయించుకున్నారు.

మార్చి నెలలో కాంగ్రెస్‌లో చేరేందుకు ముహూర్తం పెట్టుకున్నారు నాగం... కానీ ఆయన చేరికను ఎమ్మెల్సీ దామోదర్‌ రెడ్డి తీవ్రంగా వ్యతిరేకిస్తున్నారు. ఆయన వినిపిస్తున్న వ్యతిరేక గళానికి మాజీ మంత్రి డీకే అరుణ మద్దతు కూడా ఉందన్న ప్రచారం సాగుతోంది. నాగం చేరికను అంతర్గతంగా వ్యతిరేకిస్తున్న డీకే అరుణ... నేతలను కూడగట్టి హస్తినలో మకాం వేసింది. గత రెండు రోజులుగా ఢిల్లీలో ఉంటూ.. ముఖ్య నేతల ముందు అభ్యంతరాలను వ్యక్తం చేస్తున్నారు. ఇతర పార్టీల్లో ఉండి... కాంగ్రెస్‌ పార్టీపైనా, కార్యకర్తలపైనా పోరాటాలు చేసిన వారు... ఇప్పుడు తమ స్వార్థానికి కాంగ్రెస్‌లో చేరుతున్నారని డీకే అరుణ వాదిస్తోంది. తమ కృషి వల్లే పార్టీ బలంగా ఉందంటున్నారు డీకే. మరోవైపు పీసీసీ ముఖ్యనేతలు డీకే అరుణ వాదనను తీవ్రంగా తప్పుబడుతున్నారు. నాగర్‌ కర్నూలులో ఇప్పటివరకూ నాలుగు సార్లు పోటీ చేసి ఓడినా కూడా... దామోదర్‌రెడ్డికి జడ్పీ ఛైర్మన్‌ పదవిని కాంగ్రెస్‌ పార్టీ కట్టబెట్టిందని గుర్తు చేస్తున్నారు. అలాగే ఎమ్మెల్సీ గా గెలిపించిన విషయాన్ని కూడా ప్రస్తావిస్తున్నారు.

దామోదర్‌రెడ్డి తనకోసం కాకుండా తన కుమారునికి టికెట్‌ ఇవ్వాలని డిమాండ్‌ చేస్తుంటే..... అందుకు అరుణ మద్ధతు పలకడం విడ్డూరంగా ఉందంటున్నారు పీసీసీ ముఖ్య నేతలు. నాగం లాంటి సీనియర్‌ నేత చేరికతో పార్టీకి ఉపయోగమే అంటున్నారు. కాబట్టి ఆయన రాకను అడ్డుకోవడం సరికాదన్న వాదన వినిపిస్తున్నారు. నాగం చేరిక అభ్యంతరాలపై స్పందించిన హై కమాండ్‌... పీసీసీ చీఫ్‌ ఉత్తమ్‌ను హస్తినకు పిలిపించి చర్చించినట్లు సమాచారం. మొత్తానికి దీనిపై అధిష్టానం ఎలాంటి నిర్ణయం తీసుకుంటుదన్నది పార్టీలో చర్చనీయాంశంగా మారింది.

17:42 - January 27, 2018
17:40 - January 27, 2018

నిజామాబాద్ : జిల్లాలో వీడీసీలు, గ్రామ అభివృద్ధి కమిటీల పేరుతో ఫ్యూడల్ రాజకీయాలు చేస్తున్నారని టీ-మాస్ జిల్లా కన్వీనర్‌ పెద్ది వెంకటరాములు విమర్శించారు. వీడీసీలకు వ్యతిరేకంగా మాట్లాడుతుంటే గ్రామ బహిష్కరణ చేస్తున్నారని ఆరోపించారు. వెంటనే వీడీసీలను, గ్రామ అభివృద్ధి కమిటీలను ప్రభుత్వం రద్దు చేయాలని డిమాండ్ చేస్తూ నిజామాబాద్ జిల్లా కేంద్రంలోని కలెక్టరేట్‌ ముందు టీ మాస్ ఆధ్వర్యంలో ధర్నా నిర్వహించారు. లేదంటే ఉద్యమిస్తామని పెద్ది వెంకటరాములు హెచ్చరించారు. 

Pages

Don't Miss

Subscribe to RSS - KTR