land grabbing

06:46 - February 1, 2018

హైదరాబాద్ : అండగా ఉండాల్సిన వాళ్లే... కుట్రలు పన్నుతున్నారు. వెన్నుదన్నుగా నిలవాల్సిన ప్రజాప్రతినిధులు.. పేదల జీవితాలతో ఆడుకుంటున్నారు. రియల్‌ మాఫియాతో చేతులు కలిపి బడుగు జీవుల భూములను కైంకర్యం చేసేందుకు ప్రణాళికలు రచిస్తున్నారు. ఇదేమిటని ప్రశ్నిస్తే.. మొహం చాటేస్తున్నారు. హయత్‌ నగర్‌లోని పేదల భూముల కబ్జాపై 10టీవీ కథనం..

హయత్‌ నగర్‌లోని హాదీగూడాలో నిరుపేదల భూములపై కబ్జా రాయుళ్ల కన్నుపడింది. అధికారులు, ప్రజా ప్రతినిధుల అండతో.. వారి భూములను, ఇళ్లను సొంతం చేసుకునేందుకు.. కుట్రపన్నుతున్నారు. దీంతో.. ఆ పేద ప్రజలు ఆందోళనకు గురవుతున్నారు..హాదీగూడాలో నాలుగు వందలకుపైగా కుటుంబాలు.. 30 ఏళ్లుగా జీవిస్తున్నారు. వీరంతా రోజువారి కూలి పనులు చేసుకుంటూ.. జీవనం సాగిస్తున్నారు. కొంతకాలం క్రితం వీరంతా హాదీగూడాతో పాటు.. శ్రీనివాస్‌ నగర్‌లో ప్లాట్లను కొనుగోలు చేసుకున్నారు. ఇందులో కొంతమంది ఇళ్లు కట్టించుకున్నారు. అయితే ఈ పేదలు జీవిస్తున్న ఈ ప్రాంతానికి కోట్ల రూపాయల డిమాండ్‌ ఉండడంతో.. కొందరు అక్రమార్కులు.. ఆ ప్రాంతాన్ని కాజేయడానికి ప్రయత్నాలు చేస్తున్నారు. అధికార పార్టీ నేతలతో చేతులు కలిపి ఆ భూములకు అక్రమంగా జీపీఏలు సృష్టించి .. రాత్రికి రాత్రే 130 ప్లాట్లను అమ్మకానికి పెట్టారు.

ఈ విషయం తెలుసుకున్న ఆ ప్రాంత ప్రజలు ఆందోళనకు గురయ్యారు. అధికార పార్టీకి చెందిన గడ్డం బాబయ్య కుటుంబ సభ్యులు తమ భూములను ఆక్రమించుకునేందుకు కుట్ర చేస్తున్నారని వారు ఆరోపిస్తున్నారు. ఈ విషయాన్ని ఎమ్మెల్యేకు, రెవెన్యూ అధికారులకు తెలియజేశామని.. అయితే వారు తమకు సంబంధం లేదని.. అంటున్నారని స్థానికులు వాపోతున్నారు.

ప్రజాప్రతినిధులు , అధికారులే ..పేదలకు అన్యాయం చేస్తున్నారని.. సీపీఎం నేతలు అంటున్నారు. ఎంతో కష్టపడి కొనుగోలు చేసుకున్న భూములను స్వాహా చేసేందుకు యత్నిస్తున్నారని ఆరోపించారు. 440 మందికి న్యాయం జరిగే వరకూ.. వారికి అండగా నిలిచి.. పోరాటం చేస్తామని సీపీఎం నేతలు తేల్చి చెప్పారు.

19:40 - January 20, 2018

సంగారెడ్డి : రైతులు మోసపోయారు.... అవును వారంతా నిండా మోసపోయారు. తెలియని తనంతో నమ్ముకున్న నేలకు దూరమయ్యారు.  ఎవరో వచ్చి తమ భూముల్లో నిర్మాణాలు చేపడుతుంటే ఏమీ చేయలేని నిస్సహాయస్థితిలో ఉన్నారు. పార్లమెంట్‌లో చట్టాలు చేసే వ్యక్తే... ఆ రైతుల భూములను కాజేశాడు.
3వేల ఎకరాలకు ఎసరుపెట్టిన ఎంపీ
మంత్రి కేటీఆర్‌ పక్కన  కూర్చుని హడావుడి చేస్తున్న వ్యక్తి ఎవరో మీకు తెలుసుకదా. అవును మీరనుకున్నది కరెక్టే. జహీరాబాద్‌ ఎంపీ బీబీ పాటిల్‌. అధికారపార్టీ ఎంపీ బీబీ పాటిల్‌ భూదాహానికి వందలాది మంది రైతులు విలవిల్లాడుతున్నారు. ఒకటికాదు... రెండుకాదు... ఏకంగా మూడువేల ఎకరాలకు ఈ ఎంపీ ఎసరు పెట్టారు. 
మళ్లీ కనిపించకుండా పోయిన శర్మ
ఢిల్లీకి చెందిన శర్మ అనే వ్యక్తి 2006లో కంగ్టి మండలంలోని బంరా, బోర్గి, చాప్టా, కంగ్టి, మోర్గీతోపాటు మొత్తం 15 గ్రామాల ప్రజలకు చెందిన  భూములను కొనుగోలు చేశాడు.  ఎకరాకు 40వేలు ఇస్తానని చెప్పి... అడ్వాన్స్‌గా పదివేల  చొప్పున  ముట్టజెప్పి మొత్తం భూములన్నీ రిజిస్ట్రేషన్‌ చేయించుకున్నాడు.  ఆ తర్వాత శర్మ రైతులను కలువలేదు.  అప్పటి నుంచి మళ్లీ శర్మ వచ్చింది లేదు. ఎకరాకు 30వేల చొప్పున ఇవ్వాల్సిన డబ్బులూ ఇవ్వలేదు.  దీంతో రైతులు తమ భూములను మళ్లీ సాగుచేసుకోవడం మొదలుపెట్టారు. 
ఎంపీ అనుచరులు బెదిరింపులు
కొద్ది రోజులుగా రైతులను ఎంపీ బీబీ పాటిల్‌కు చెందిన కొంతమంది అనుయాయులు వారిని భూముల్లోకి వెళ్లనీయడం లేదు. ఈ భూములన్నీ తమవేనంటూ అందులో నిర్మాణాలకు పూనుకున్నారు. శర్మ నుంచి ఈ భూములన్నీ ఎంపీ బీబీ పాటిల్‌ కొనుగోలు చేశారని.. రైతులంతా వెంటనే ఖాళీ చేయాలని హెచ్చరించారు. దీంతో రైతులంతా లబోదిబోమంటున్నారు. 
తమకు శర్మ మొత్తం డబ్బులు ఇవ్వలేదంటున్న రైతులు
రైతులు భూమలు అమ్మాలనుకున్న మాట వాస్తవమే.  కానీ వారి భూములు కొనుగోలు చేసిన శర్మ అనే వ్యక్తి ఇవ్వాల్సిన మొత్తం డబ్బులు ఇవ్వలేదు. పైగా ఇన్ని సంవత్సరాలైనా తిరిగి రాలేదు.  అందుకే తాము తమ భూములను సాగు చేసుకుంటున్నామని చెబుతున్నారు. మీరు వచ్చి భూములు ఇవ్వాలంటే తామెలా ఇస్తామంటూ ప్రశ్నిస్తున్నారు. ప్రస్తుత మార్కెట్‌ రేటు ప్రకారం భూములు కొనుగోలు చేస్తామంటే నిరభ్యంతరంగా ఇస్తామని తేల్చి చెబుతున్నారు. ప్రజల అమాయకత్వం, ఈ ప్రాంతం వెనుకబాటుతనాన్ని ఆసరా చేసుకుని టీఆర్‌ఎస్‌ ఎంపీ బీబీ పాటిల్‌ బరితెగించారని కాంగ్రెస్‌ మాజీ ఎంపీ సురేష్‌ షెట్కార్‌ విమర్శిస్తున్నారు. 
కొత్త మలుపు తిరిగిన ఎంపీ భూదందా
ఈ గొడవ ఇలా కొనసాగుతుండగానే కథ మరో మలుపు తిరిగింది. రైతుల నుంచి 2006లో భూములను కొనుగోలు చేసిన శర్మ చనిపోయి చానాళ్లైంది. ఆయన రైతుల భూములను బ్యాంకుల్లో తనఖాపెట్టి వందలకోట్ల రుణాలు పొందినట్టు తెలుస్తోంది. దీనిపై సీబీసీఐడీ విచారణ కూడా జరుగుతోంది. ఒకవైపు సీబీసీఐడీ విచారణ జరుగుతుండగానే.. మరోవైపు బీబీ పాటిల్‌ రైతుల భూముల్లో ఫుడ్‌ ప్రాసెసింగ్‌ సెంటర్‌ ఏర్పాటు చేసేందుకు సమాయాత్తమవుతున్నారు.  శర్మ నుంచి బీబీ పాటిల్‌ ఎప్పుడు భూములు కొనుగోలు చేశారో చెప్పాలని స్థానికులు డిమాండ్‌ చేస్తున్నారు. బాధ్యతాయుత ఎంపీ పదవిలో ఉన్న వ్యక్తి రైతుల జీవితాలతో ఆటలాడుకోచ్చా అని నిలదీస్తున్నారు.
కన్నెత్తిచూడని రెవెన్యూ అధికారులు 
రైతులు, ఎంపీ మధ్య భూముల కోసం ఇంత తతంగా నడుస్తోంటే... రెవెన్యూ అధికారులు మాత్రం అటువైపు కన్నెత్తికూడా చూడటం లేదు. తమకెందుకులే అనే ధోరణిలో ఉన్నారు. ఎంపీ బీబీపాటిల్‌ ఒకవైపు  ఫుడ్‌ ప్రాసెసింగ్‌ సెంటర్‌కు ఏర్పాట్లు జరుగుతుంటే... దానికి ఎలాంటి అనుమతులు లేవని తహసీల్దార్‌ చెబుతున్నారు. 
గ్రామస్తులకు అండగా సీపీఎం నాయకులు 
15 గ్రామాల రైతులకు బీబీ పాటిల్‌ చేస్తున్న అన్యాయాన్ని తెలుసుకున్న సీపీఎం నాయకులు... గ్రామస్తులకు అండగా నిలుస్తున్నారు.  ఫుడ్‌ ప్రాసెసింగ్‌ సెంటర్‌ పనులను అడ్డుకునే ప్రయత్నం చేశారు.  దీంతో ఎంపీ ఆందోళన చేస్తున్న సీపీఎం నాయకులు, రైతులపైకి పోలీసులను ఉసిగొల్పి అరెస్ట్‌ చేయించారు. తమపై ఎన్ని నిర్బంధాలు ప్రయోగించినా రైతులకు న్యాయం జరిగే వరకు పోరాడుతామని సీపీఎం నాయకులు చెప్తున్నారు. ఎంపీ బీబీ పాటిల్‌ భూదందాపై జిల్లా అధికార యంత్రాంగం ఇప్పటికైనా కళ్లు తెరవాలని బాధితులు కోరుతున్నారు.  అన్యాయానికి గురవుతున్న తమకు న్యాయం చేయాలని కోరుతున్నారు.

 

18:37 - January 20, 2018

సంగారెడ్డి : చెరువులు, కాలువలు, కుంటలు.. ఇలా దేనినీ వదలకుండా మింగేస్తున్నారు భూకబ్జాదారులు.  హైదరాబాద్‌ శివారు ప్రాంతాల్లో భూముల ధరలకు రెక్కలురావడంతో భూమాఫియా దందాకు తెరలేపింది.  అధికారుల అండతో ఖాళీ జాగా కనిపిస్తే కబ్జా చేస్తోంది.  సంగారెడ్డి జిల్లా తెల్లాపూర్‌లో చెరువుల ఆక్రమణలపై 10టీవీ కథనం...
ఖాళీ జాగా కనిపిస్తే పాగా
సంగారెడ్డి జిల్లాలో భూకబ్జాదారులు పెట్రేగిపోతున్నారు. ఖాళీ జాగా కనిపిస్తే చాలు పాగా వేస్తున్నారు. రాత్రికి రాత్రే కబ్జా చేసేస్తున్నారు.  అది ప్రభుత్వ భూమా, ప్రైవేట్‌ వ్యక్తులకు చెందిన భూమా అన్న తేడా లేదు. చివరికి చెరువులు, కుంటలు, కాలువలు, శిఖం భూములు అన్న తేడాలేకుండా కబ్జాలకు పాల్పడుతున్నారు. 
తెల్లాపూర్‌లో కబ్జారాయుళ్ల అక్రమాలు
సంగారెడ్డి జిల్లాలోని పటాన్‌చెరు, రామచంద్రాపురం, అమీన్‌పూర్, కొల్లూరు ప్రాంతాలన్నీ హైదరాబాద్‌కు ఆనుకునే ఉంటాయి.  ఇక్కడి భూములకు మార్కెట్‌లో యమా డిమాండ్‌ ఉంది. భూముల ధరలకు రెక్కలొచ్చాయి.  దీంతో భూబకాసురులు ఇక్కడ రెచ్చిపోతున్నారు. ఎక్కడ భూమి కనిపించినా కబ్జా చేస్తున్నారు. తెల్లాపూర్‌లో కబ్జారాయుళ్ల అక్రమాలకు అడ్డూఅదుపూ లేకుండా పోతోంది. పెద్దపెద్ద సంస్థలు కూడా చెరువు శిఖం భూములు, చెరువులు, కాలువలు ఆక్రమించుకుంటున్నాయి.  అలా ఆక్రమించుకున్న భూముల్లో బహుళ అంతస్థుల భవనాలు నిర్మిస్తున్నాయి.  ఇందుకు ఇరిగేషన్‌ అధికారులు ముడుపులకు ఆశపడి  ఎన్‌వోసీలు ఇచ్చేశారు. దీంతో మూడు కబ్జాలు, ఆరు ప్లాట్లుగా దందా సాగుతోంది.
వనం చెరువునూ వదలని అక్రమార్కులు
తెల్లాపూర్‌లోని వనం చెరువునూ కబ్జారాయుళ్లు వదలలేదు. వనం చెరువును ఆక్రమించి అక్కడ బార్‌ అండ్‌ రెస్టారెంట్‌ను ప్రారంభించారు. గ్రామస్తులు అదేమని ప్రశ్నిస్తే బెదిరింపులకు గురిచేస్తున్నారు. ఎలాంటి అనుమతులు లేకుండా నిర్మాణాలు చేపడుతున్నట్టు గ్రామస్తుల ఆరోపిస్తున్నారు.  ఇరిగేషన్‌, రెవెన్యూ అధికారుల అండదండలతో కబ్జారాయుళ్లు రెచ్చిపోతున్నారని మండిపడుతున్నారు. కొంతమంది భూ ఆక్రమణలపై కోర్టును ఆశ్రయించి న్యాయం చేయాలని కోరారు. 
తెల్లాపూర్‌ ఆక్రమణలపై కోర్టులో పిటిషన్‌
తెల్లాపూర్‌ ఆక్రమణలపై నిజానిజాలు తేల్చేందుకు ట్రిబ్యునల్‌ ఓ బృందాన్ని నియమించింది. ఈ బృందం గ్రామంలోని ఆక్రమణలను పరిశీలించింది. అయితే ఇప్పుడే ఏమీ చెప్పలేమని... నివేదికను ట్రిబ్యునల్‌కు అందిస్తామని బృందం సభ్యులు తెలిపారు. 
నీటి వనరులు ధ్వంసం
కాలువలు, చెరువుల కబ్జాలతో నీటి వనరులు ధ్వంసమైపోతున్నాయి.  వాటిని రక్షించాల్సిన అధికారులు ముడుపులకు ఆశపడి ఎన్‌వోసీలు ఇచ్చేస్తున్నారు.  ఇప్పటికైనా ఉన్నతాధికారులు స్పందించి పరిస్థితిని చక్కదిద్దాలని గ్రామస్తులు కోరుతున్నారు.

 

17:41 - January 20, 2018

సంగారెడ్డి : వారంతా ప్రభుత్వ మాజీ ఉద్యోగులు. పైసాపైసా కూడబెట్టుకున్నారు. పోగేసిన డబ్బులతో భూములు కొనుక్కున్నారు. తీరా ఇప్పుడా భూములను కబ్జాదారులు లాగేసుకున్నారు. సంగారెడ్డి జిల్లా ఆర్‌సీ పురం మండలం ఈదులనాగులపల్లిలో భూకబ్జాపై స్పెషల్‌ స్టోరీ... 
716 ఎకరాల్లో వెంచర్‌
ఇదిగో మీరు చూస్తున్న వీరంతా హైదరాబాద్‌ వాసులు. వివిధ ప్రభుత్వ శాఖల్లో పనిచేసి పదవీ విరమణ పొందినవారు.  వచ్చిన జీతంలోంచి కొద్దికొద్దిగా మిగుల్చుకుని పైసాపైసా కూడబెట్టారు. పోగేసుకున్న డబ్బులతో ఆర్‌సి పురం మండలం ఈదుల నాగుపల్లిలోని సర్వేనంబర్‌ 135లో భూములు కొనుగోలు చేశారు. 716 ఎకరాల్లో వేసిన వెంచర్లలో వీరితోపాటు మరికొంతమంది ప్లాట్లు కొనుగోలు చేశారు.  భూములు కొనుగోలు అయితే చేశారు కానీ... దాన్ని తర్వాత పట్టించుకోలేదు. మధ్యమధ్యలో వచ్చి చూసిపోలేదు. వాస్తవంగా చెప్పాలంటే భూమిని కొనుక్కుని మళ్లీ అటువైపు రాలేదు. 
సర్వేనంబర్‌ 135లోని భూముల కబ్జా
ప్లాట్లను కొనుగోలుచేసిన వారెవ్వరూ అటువైపు కన్నెత్తి చూడకపోవడంతో కబ్జాదారులు ఆ భూములపై కన్నేశారు. వీరి ప్లాట్లు ఉన్న భూములను కబ్జా చేశారు. వీరి ప్లాట్ల వరకే కాదు.. సమీపంలో ఉన్న బందం చెరువు, కుమ్మరికుంటతోసహా వంద ఎకరాలకుపైగా కబ్జా చేశారు. ప్రగతి రిసార్ట్స్‌ వీరి భూములను కబ్జాపెట్టింది. 
అధికారులకు స్థల యజమానుల ఫిర్యాదు
తమ భూములను ప్రగతి రిసార్ట్స్‌ కబ్జా చేసిందని తెలుసుకున్న స్థల యజమానులు  అధికారులకు ఫిర్యాదు చేశారు. అంతేకాదు.. హైకోర్టు మెట్టెక్కారు.  గత ఏడాది జూన్‌లో హైకోర్టు ఈదులనాగులపల్లి భూములపై సమగ్ర విచారణకు ఆదేశించింది.  ఆరు నెలల్లో నివేదిక ఇవ్వాలని సంగారెడ్డి ఆర్‌డీవోనూ ఆదేశించింది. న్యాయస్థానం ఆదేశాలు జారీ చేసి ఆరు నెలలు పూర్తైనా ఇంత వరకు ఆర్‌డీవో హైకోర్టుకు నివేదిక సమర్పించలేదు.  దీంతో ఆర్‌డీవోపై స్థల యజమానులు ఆగ్రహం వ్యక్తం చేస్తున్నారు.
స్థల డాక్యుమెంట్లు ఉన్నాయంటున్న మాజీ ఉద్యోగులు
135 సర్వేనంబర్‌లోని స్థలాలకు  పట్టాదారుని  వారి దగ్గర డాక్యుమెంట్లు ఉన్నాయి. స్థల యజమానులకు న్యాయం చేయాల్సి అధికారులు అక్రమార్కులకు వంతపాడుతున్నారు.  ఇదే విషయాన్ని స్థల యజమానులు ప్రశ్నిస్తున్నారు. న్యాయం చేయమని అడిగితే... అధికారులు తాత్సారం చేస్తున్నారని మండిపడుతున్నారు. అధికారులు ఉద్దేశ్యపూర్వకంగా కాలయాపన చేస్తే మాత్రం సీఎం దృష్టికి తమ సమస్యను తీసుకెళ్తామని హెచ్చరిస్తున్నారు. ఈదులనాగులపల్లిలోని సర్వేనంబర్‌ 135లో ప్రభుత్వం సమగ్ర సర్వే నిర్వహిస్తే అసలు వాస్తవాలు బయటపడతాయి. నిజానిజాలేంటో తేలుతాయి. మరి అధికారులు మాత్రం అందుకు పూనుకోవడం లేదు.  ఇప్పటికైనా ఉన్నతాధికారులు స్పందించి తమ సమస్యను పరిష్కరించాలని స్థల యజమానులు కోరుతున్నారు.

 

12:20 - January 20, 2018

సంగారెడ్డి : మీరు చూస్తున్న ఈ ప్రాంతం అమీన్‌పూర్‌ మండలంలోని శెట్టికుంటలోనిది. మిషన్‌ కాకతీయ కింద శెట్టికుంటలో పనులు చేపట్టారు. పూడికతీత పనులు ఒకవైపు కొనసాగుతుండగానే... మరోవైపు భూబకాసురులు అక్రమాలకు తెరతీశారు. శెట్టికుంటను పూర్తిగా ఆక్రమించుకున్నారు. అనంతరం దాంట్లో రాత్రికి రాత్రే వెంచర్‌ వేశారు. ఆతర్వాత వాటిని ఫ్లాట్లుగా చేసి విక్రయించారు. కోట్లకు కోట్లు గడించారు. ప్లాట్లు కొనుగోలు చేసిన వారు ఇళ్ల నిర్మాణాలు చేపట్టారు. శెట్టికుంట ఆక్రమణకుగురైందన్న సమాచారంతో అధికారులు ఆలస్యంగా మేలుకొన్నారు. వెంచర్‌ ఎఫ్‌టీఎల్‌లో ఉందని నిర్దారించి ఏడాది క్రితం నిర్మించిన ఇళ్లను కూల్చివేశారు. ఆతర్వాత పనైపోయిందని చేతులు దులుపుకున్నారు. కొన్నాళ్లు గడిచింది. అధికారులు ఆ విషయం మరచిపోయారు. ఇదే అదనుగా భావించిన కబ్జారాయుళ్లు మళ్లీ అక్రమదందాకు తెరతీశారు. మరికొన్ని వెంచర్లు వేశారు. అమాయకులైన ప్రజలకు విక్రయించి మళ్లీ సొమ్ము చేసుకున్నారు. ఈ అక్రమ వెంచర్లలో నిర్మాణాలు యధేచ్చగా సాగిపోతున్నాయి. సుమారు 60గృహాలు నిర్మాణ దశలో ఉన్నాయి.

కోర్టును ఆశ్రయించారు....
అక్రమ నిర్మాణాలపై కొంతమంది కోర్టును ఆశ్రయించారు. విచారణ జరిపిన న్యాయస్థానం స్టేటస్‌ కో ఇచ్చింది. అయినా కోర్టు ఆదేశాలను ధిక్కరించి నిర్మాణాలు జరుపుతున్నారు. పటాన్‌చెరు పట్టణాన్ని ఆనుకుని ఉన్న శెట్టికుంటలో భారీ స్థాయిలో అక్రమ నిర్మాణాలు జరుగుతుంటే అధికారులు చూడీచూడనట్టు వ్యవహరిస్తున్నారు. శెట్టికుంట ఆక్రమణపై స్థానిక సీపీఎం నాయకులు మండిపడుతున్నారు. అక్రమ నిర్మాణాలు భారీగా జరుగుతున్నా నీటిపారుదలశాఖ, రెవెన్యూ అధికారులు ఏం చేస్తున్నారని సీపీఎం నాయకుడు నాగేశ్వరరావు ప్రశ్నిస్తున్నారు. గతంలో సంగారెడ్డి జేసీగా పనిచేసిన వెంకట్రామిరెడ్డి శెట్టికుంటలో జరిగే నిర్మాణాలు అన్నీ పూర్తిగా అక్రమమైనవేనని తేల్చారు. నిర్మించిన ఇళ్లను కూల్చివేయాలని ఆదేశాలు జారీ చేశారు. మరి తర్వాత వచ్చిన అధికారులు ఎందుకు నిర్మాణాలపై మౌనంగా ఉన్నారన్నదే అసలు ప్రశ్న. ఇదే విషయంపై మియాపూర్‌ తహసీల్దార్‌ను టెన్‌టీవీ వివరణ కోరగా.. శెట్టికుంట పూర్తిగా వాటర్‌ బాడీనేనని, ఎప్పటికైనా కోర్టు తమకే అనుకూలంగా తీర్పునిస్తుందని చెబుతున్నారు.

అధికారపార్టీ నేతల అండదండలు
కబ్జారాయుళ్లకు అధికారులు, అధికారపార్టీ నేతల అండదండలు పుష్కలంగా ఉన్నాయన్నది బహిరంగ రహస్యమే. వారి అండతోనే కనిపించిన చెరువులు, కుంటలను కబ్జా చేస్తున్నారన్న ఆరోపణలు వినిపిస్తున్నాయి. ప్రభుత్వ భూములు, ప్రజలకు ఉపయోగపడే చెరువులు, కుంటలను కబ్జారాయుళ్లు మాయం చేస్తుంటే అధికారులు మౌనం వహిస్తుండడంపై ప్రజలు ఆగ్రహం వ్యక్తం చేస్తున్నారు. ప్రభుత్వం స్పందించి చెరువులు, కుంటలు కబ్జాకాకుండా చర్యలు చేపట్టాలని కోరుతున్నారు.

15:37 - December 30, 2017
18:18 - November 29, 2017

జనగామ : జిల్లాలోని పాలకుర్తి మండలం గూడూరులో భూ తగాదాలు భగ్గుమన్నాయి. తండ్రి వెంకటయ్య, కొడుకు రాజుపై గొడ్డళ్లతో ఆరుగురు ప్రత్యర్థులు దాడి చేశారు. రాజు అక్కడికక్కడే మృతి చెందారు. వెంకటయ్య పరిస్థితి విషమంగా ఉండటంతో వరంగల్ ఎంజిఎం ఆస్పత్రికి తరలించారు. ప్రధాన నిందితుడు కొమురయ్య సహా ఐదుగురు నిందితులు లొంగిపోయారు. మరిన్ని వివరాలను వీడియోలో చూద్దాం....

 

17:34 - November 24, 2017

మెదక్ : ఇక్కడ కనిపిస్తున్నవి మెదక్‌ జిల్లాలోని రాజ్‌పల్లి తండా వాసుల గిరిజనుల భూములు. యాభై సంవత్సరాల క్రితం ఇక్కడి గిరిజనులకు ప్రభుత్వం ఈ భూమిని పంపిణీ చేసింది. 33/1 సర్వే నంబర్‌లోని ముప్పై ఎకరాల ఈ భూమిలో 15 మంది లబ్దిదారులు సాగు చేస్తూ జీవనం సాగిస్తున్నారు. అయితే వీరికి భూములు ఇచ్చినప్పుడు ఇవి రాళ్లు రప్పలతో సాగుచేసుకునేందుకు పనికి రాకుండా ఉండేది. రేయింబవళ్లు కష్టపడి సాగుకు యోగ్యంగా మలచుకొని గిరిజనులు ఇక్కడ పంటలు సాగు చేసుకుంటున్నారు.

మెదక్‌ జడ్పీటీసీ లావణ్యరెడ్డి కన్ను
కష్టపడి సాగు చేసుకుంటున్న గిరిజనుల భూమిపై మెదక్‌ జడ్పీటీసీ లావణ్యరెడ్డి కన్ను పడింది. ఇంకేముంది గిరిజనుల ముప్పై ఎకరాల భూమి చుట్టూ అధికారుల అండదండలతో ఫెన్సింగ్‌ వేసి భూముల్ని ఆక్రమించేసుకుంది. ఇదేంటని ప్రశ్నించిన తమపై బెదిరింపులకు పాల్పడిందని రైతులంటున్నారు. ఉన్నఈ విషయమై ఉన్నతాధికారులకు ఫిర్యాదు చేసినా ప్రయోజనం లేకుండా పోయిందని రైతులు వాపోతున్నారు.

గిరిజనుల భూముల కోసం
అయితే తాను భూముల్ని కబ్జా చేయలేదని, సీలింగ్‌ భూములపై న్యాయస్థానాన్ని ఆశ్రయిస్తే తమకు కోర్టు అనుకూలంగా తీర్పు ఇచ్చిందని జడ్పీటీసీ లావణ్యరెడ్డి అంటున్నారు. ఇదంతా తరతరాలుగా తమకు సంక్రమించిన ఆస్తి అని చెప్పుకొస్తున్నారు. గిరిజనుల భూముల్ని అన్యాయంగా ఆక్రమించుకున్న వారిపై చర్యలు తీసుకోవాలని సీపీఎం పార్టీ జిల్లా కార్యదర్శి మల్లేష్‌ డిమాండ్‌ చేశారు. లేదంటే గిరిజనుల భూముల కోసం పోరాటాలు చేస్తామని హెచ్చరించారు. జడ్పీటీసీ లావణ్యరెడ్డి భూ కబ్జాపై ఉన్నతాధికారులు స్పందించాల్సిన అవసరం ఎంతైనా ఉందని ప్రజాసంఘాలంటున్నాయి. గిరిజనుల పొట్టకొట్టే ఈ వ్యవహారంపై అధికారులు ఏ మేరకు స్పందిస్తారో వేచిచూడాలి. 

17:30 - November 21, 2017

హైదరాబాద్ : జనగామ జిల్లా కలెక్టర్‌, ఎమ్మెల్యే ముత్తిరెడ్డి మధ్య వివాదం ముదురుతోంది. ధర్మోనికుంట భూకబ్జా వ్యవహారంపై మరోసారి కలెక్టర్‌ దేవసేనపై ముత్తిరెడ్డి ఫిర్యాదు చేశారు. ప్రభుత్వ ప్రధాన కార్యదర్శిని కలిసిన ముత్తిరెడ్డి కలెక్టర్‌ దేవసేన తప్పుడు ఆరోపణలు చేస్తోందని ఫిర్యాదు చేశారు. ధర్మోనికుంట కబ్జాకు గురవుతుంటే తానే ఆపానన్న ముత్తిరెడ్డి టీఆర్‌ఎస్‌ ప్రతిష్ట దెబ్బతీసేలా కలెక్టర్‌ వ్యవహరిస్తోందన్నారు. ఈ సందర్భంగా టెన్ టివి ఆయనతో ముచ్చటించింది. కబ్జా చేసినట్లు తనపై తప్పుడు నివేదిక ఇచ్చారని ఎమ్మెల్యే ముత్తిరెడ్డి పేర్కొన్నారు. కబ్జా చేసినట్లు నిరూపిస్తే ఏ చర్యలకైనా సిద్ధమేనని వెల్లడించారు. మరింత సమాచారం కోసం వీడియో క్లిక్ చేయండి.

22:02 - November 10, 2017

గుంటూరు : జిల్లాలోని కొండూరులో ఎర్రదండు కదం తొక్కింది. ఏపీ సీపీఎం రాష్ట్ర కార్యదర్శి పి.మధు ఆధ్వర్యంలో పోరుబాటు పట్టారు. ఆక్రమణకు గురైన పంటపొలాల్లో ఎర్రజెండాలు పాతి నిరసన తెలిపారు. నీరు చెట్టు పేరుతో భూదోపిడీ చేస్తున్నారని ఆరోపించారు. నేటి నుంచి భూములు స్వాధీనం చేసుకుంటున్నట్లు మధు ప్రకటించారు. ఎన్ని అడ్డంకులు కల్పించినా పొలాలు దున్ని తీరుతామని హెచ్చరించారు.

 

Pages

Don't Miss

Subscribe to RSS - land grabbing