PM narendra modi

18:00 - May 30, 2018

ఇండోనేషియా : భారత్‌-ఇండోనేషియా దేశాల మధ్య 15 అంశాలపై ఒప్పందం కుదిరింది. రక్షణ, సైన్స్‌, టెక్నాలజీ రంగాల్లో పరస్పర సహకారం, తదితర అంశాలపై ఇరు దేశాలు సంతకాలు చేశాయి. ఇండోనేషియా అధ్యక్షుడు జోకో విదోదోను కలుసుకున్న మోది- సముద్రమార్గం, టూరిజం, పెట్టుబడులు తదితర ద్వైపాక్షిక అంశాలపై చర్చలు జరిపారి. అనంతరం ఇరుదేశాల నేతలు సంయుక్త మీడియా సమావేశంలో పాల్గొన్నారు. ఇండోనేషియాలో ఉగ్రదాడిని ఖండించిన మోది- ఉగ్రవాదంపై పోరుకు ప్రపంచ వ్యాప్తంగా జరుగుతున్న ప్రయత్నాలను మరింత వేగవంతం చేయాల్సిన అవసరం ఉందన్నారు. ఇరు దేశాల మధ్య ద్వైపాక్షిక వ్యాపారాన్ని 2025 నాటికి ద్విగుణీకృతం చేయనున్నట్లు మోది పేర్కొన్నారు అంతకుముందు ఐదు రోజుల విదేశీ పర్యటనలో భాగంగా ఇండోనేషియా చేరుకున్న ప్రధాని నరేంద్ర మోదికి మరడెకా ప్యాలెస్‌లో ఘనస్వాగతం లభించింది. ఇండోనేషియాలో స్వతంత్ర పోరాటంలో ప్రాణాలు కోల్పోయిన అమరవీరులకు మోది శ్రద్ధాంజలి ఘటించారు. 

20:49 - May 25, 2018

రేపటికి మోడీ అధికారంలోకి వచ్చి నాలుగేళ్లవుతుంది. ఈ నాలుగేళ్ల పాలనలో మోడీ సాధించిందేంటీ ?  ఇదే అంశంపై నిర్వహించిన చర్చా కార్యక్రమంలో సీపీఎం తెలంగాణ రాష్ట్రకార్యదర్శివర్గ సభ్యులు వెంకట్, బీజేపీ నేత రాకేష్ రెడ్డి, ఏపీ కాంగ్రెస్ నేత సుందర్ రామశర్మ పాల్గొని, మాట్లాడారు. మరిన్ని వివరాలను వీడియోలో చూద్దాం... 

19:32 - May 25, 2018

కోల్ కతా : పశ్చిమ బెంగాల్‌ శాంతినికేతన్‌ లోని విశ్వభారతి విశ్వవిద్యాలయం స్నాతకోత్సవానికి ప్రధానమంత్రి నరేంద్రమోది, బంగ్లాదేశ్‌ ప్రధానమంత్రి షేకర్‌ హసీనా హాజరయ్యారు. ఈ సందర్భంగా ప్రధాని తన ప్రసంగం ప్రారంభానికి ముందు విశ్వభారతి విశ్వవిద్యాలయం ఛాన్సలర్ హోదాలో విద్యార్థులకు  క్షమాపణ చెప్పారు.  తమకు తాగునీటి ఏర్పాట్లు చేయలేదని...కొందరు విద్యార్థులు సైగ చేయడంతో... మీకు జరిగిన అసౌకర్యానికి క్షమాపణలు చెప్తున్నానని మోది అన్నారు. పట్టా పొందిన విద్యార్థులకు శుభాకాంక్షలు తెలిపారు. ఓ విశ్వవిద్యాలయం స్నాతకోత్సవంలో ఇరు దేశాల ప్రధానులు పాల్గొనడం బహుషా ఇదే మొదటిసారని మోది తెలిపారు. ఇరుదేశాల ప్రధానులు బంగ్లాదేశ్‌ భవన్‌ను ప్రారంభించారు. భారత్‌, బంగ్లాదేశ్‌ల మధ్య సాంస్కృతిక సంబంధాలకు ప్రతీకగా ఈ భవన్‌ నిలవనుంది. అంతకుముందు కోల్‌కతాకు చేరుకున్న ప్రధాని మోదికి పశ్చిమ బెంగాల్‌ గవర్నర్‌ కేసరీనాథ్‌ త్రిపాఠి, సిఎం మమతా బెనర్జీ స్వాగతం పలికారు. 

19:29 - May 25, 2018

ఢిల్లీ : దేశవ్యాప్తంగా మోదీ వ్యతిరేకత పెరుగుతోందా..? 2019 ఎన్నికల్లో బీజేపీకి ఆశాభంగం తప్పదా? తాజాగా ఓ సంస్థ చేసిన సర్వే.. అవుననే అంటోంది. మోదీ గ్రాఫ్‌ గణనీయంగా పడిపోతోందని.. నెల నెలా.. ఆయన కరిష్మా తగ్గుతూ వస్తోందని సర్వే తేల్చింది. ఇది విపక్షాల్లో ఆనందాన్ని నింపుతుంటే.. బీజేపీ శిబిరాన్ని అంతర్మథనానికి గురి చేస్తోంది. 
ప్రధాని మోదీపై వ్యతిరేకత.. 
ప్రధాని మోదీపై వ్యతిరేకత.. ఇంతలింతలుగా పెరిగిపోతోంది. ఆయన్ను మళ్లీ ప్రధాని చేయరాదన్న భావన ప్రజల్లో బలంగా వ్యక్తమవుతోంది. నాలుగేళ్ల పాలన పూర్తయిన సందర్భంగా.. ఏబీపీ న్యూస్‌-సీఎస్‌డిఎస్‌ సంస్థలు నిర్వహించిన సర్వేలో ఈ వాస్తవాలు బహిర్గతమయ్యాయి. ఈ ఏడాది మొదట్లో మోదీకి ఓటేస్తామని 34శాతం మంది చెబితే.. నాలుగంటే నాలుగు నెలల్లో అది 32 శాతానికి పడిపోయింది. ఈ తీరు మోదీకి తగ్గుతోన్న జనాదరణను సూచిస్తోంది.
మోదీ మళ్లీ ప్రధాని కారాదన్న 47శాతం మంది
సర్వేలో భాగంగా.. మొత్తం 19 రాష్ట్రాల్లో 15,859 మంది నుంచి  అభిప్రాయాలను సేకరించారు. అందులో 47 శాతం మంది మోదీ సర్కారుకు రెండో సారి గద్దెనెక్కే అర్హత లేదని తేల్చి చెప్పారు. 39శాతం మంది మాత్రమే ఫరవాలేదు మరో చాన్స్‌ ఇవ్వొచ్చు అన్నారు. 2013లో కూడా యూపీఏ సర్కారుపై ఇలాంటి సర్వేనే నిర్వహించినప్పుడు కూడా 39శాతం మంది మాత్రమే మరో చాన్స్‌ ఇవ్వొచ్చన్నారు. మెజారిటీ ప్రజలు యూపీఏ సర్కారుకు నో చాన్స్‌ అన్నారు. దీనికి తగ్గట్లే 2014 ఎన్నికల్లో యూపీఏ సర్కారు ఓటమిపాలైంది.
దేశవ్యాప్తంగా మోదీ వ్యతిరేక గాలి
ప్రభుత్వ వ్యతిరేకతే ఏకైక అస్త్రంగా పీఠాన్నెక్కిన మోదీ.. తన హయాంలో తీసుకున్న నిర్ణయాలన్నీ వివాదాస్పదం అయ్యాయి.  ప్రస్తుతం దేశంలో మోదీ వ్యతిరేక గాలి బలంగా వీస్తోందని, ఇది మైనారిటీల్లో మరింత ఎక్కువగా ఉందని ఏబీపీ సర్వే వెల్లడించింది. నిజానికి మధ్యతరగతి ఓట్లే బీజేపీకి పెద్ద ఓటు బ్యాంకు. అయితే..  పెద్ద నోట్ల రద్దు, జిఎస్‌టీ, పెట్రో ధరలు, నిత్యావసరాల పెరుగుదల, సామాజిక అశాంతి లాంటివి సామాన్య, మధ్యతరగతి ప్రజల్లో అసహనాన్ని నింపాయన్న భావన వ్యక్తమవుతోంది.
మోదీకి వ్యతిరేకంగా 42శాతం హిందువులు
మతాల వారీగా చూస్తే.. మోదీకి అనుకూల వాతావరణమేమీ కనిపించడం లేదు. హిందూ ఓటర్లలో 44శాతం మంది అనుకూలంగా ఉంటే 42 శాతం మంది మోదీని తీవ్రంగా వ్యతిరేకిస్తున్నారు. ఎస్సీ ఎస్టీ వేధింపుల నిరోధక చట్టంపై సుప్రీంకోర్టు తీర్పు మీద మోదీ సర్కారు సరిగా స్పందించలేదని భావిస్తోన్న దళితుల్లో 55శాతం మంది మోదీని తీవ్రంగా వ్యతిరేకిస్తున్నారు. ఇక, గిరిజనుల్లో 43శాతం, ఓబీసీల్లో 42శాతం మంది మోదీ పాలనను వ్యతిరేకిస్తున్నట్లు సర్వే వెల్లడించింది. ఇక గోరక్షకుల అరాచకాలు, ఉత్తర భారతావనిలో విద్వేషాలు, హత్యలు, తక్షణ తలాఖ్‌ వ్యవహారాన్ని రాజకీయాలకు వాడుకోవడం, కశ్మీర్‌లో హింస ఇవన్నీ దేశ ప్రజల్లో.. ముఖ్యంగా ముస్లింలలో అభద్రతను పెంచుతూ.. మోదీ పాలనపై అసంతృప్తిని ఎగదోశాయని సర్వే నిర్వహించిన సంస్థ విశ్లేషించింది. మొత్తానికి, కర్నాటకలో అధికారాన్ని కోల్పోవడమే కాకుండా, అక్కడ ఎమ్మెల్యేల కొనుగోలు ప్రయత్నాల ద్వారా మచ్చ తెచ్చుకున్న బీజేపీ నాయకులను.. తాజాగా ఏబీపీ-సీఎస్‌డిఎస్‌ సంస్థల సర్వే అంతర్మథనానికి గురి చేస్తోంది. 

 

18:08 - May 12, 2018

ఉత్తరప్రదేశ్ : నేపాల్‌ జనకపురిలో ప్రధాని నరేంద్రమోది నిన్న ప్రారంభించిన బస్సు అయోధ్యకు చేరుకుంది. అయోధ్యలో ఉత్తరప్రదేశ్‌ ముఖ్యమంత్రి యోగి ఆదిత్యనాథ్‌ బస్సుకు స్వాగతం పలికారు. భారత్‌ నేపాల్‌ దేశాల మధ్య సాంస్కృతిక సంబంధాల్లో కొత్త అధ్యయనం మొదలైందని ఈ సందర్భంగా యోగి అన్నారు. ప్రధాని మోది, నేపాల్‌ ప్రధాని కేపీ శర్మ జనక్‌పురి-అయోధ్య నడుమ బస్సు సేవలను శుక్రవారం పచ్చ జెండా ఊపి ప్రారంభించిన విషయం తెలిసిందే. రామాయణ్‌ సర్కిట్ భారత్‌-నేపాల్‌ దేశాల మధ్య టూరిజం అభివృద్ధికి ఎంతో దోహద పడుతుందని ప్రధాని మోది అన్నారు. యాత్రీకులు జనక్‌పురిలో సీతాదేవి మందిరం, అయోధ్యలోని రామ మందిరాన్ని దర్శించుకునేందుకు ఈ బస్సును ప్రారంభించారు.

18:06 - May 12, 2018

ఢిల్లీ : ప్రధానమంత్రి నరేంద్రమోది నేపాల్‌ పర్యటనపై కాంగ్రెస్‌ తీవ్ర అభ్యంతరం వ్యక్తం చేసింది. ఓటర్లను ప్రభావితం చేసేందుకే మోది నేపాల్‌లోని ఆలయాలను దర్శనం చేసుకుంటున్నారని కాంగ్రెస్‌ ప్రధాన కార్యదర్శి అశోక్‌ గెహ్లాట్‌ ఆరోపించారు. ఎన్నికల కోడ్ అమలులో ఉన్నపుడు ప్రధాని స్థాయిలో ఉన్న వ్యక్తి విదేశీ పర్యటనలకు వెళ్లడమేంటని ప్రశ్నించారు. ఇది ఎన్నికల కోడ్‌ను ఉల్లంఘించడమేనని...మోది నిర్ణయం ప్రజాస్వామ్యంపై ప్రభావం చూపుతుందని అన్నారు. నేపాల్‌ రెండోరోజు పర్యటనలో ప్రధాని మోది ముక్తినాథ్‌, పశుపతి నాథ్‌ ఆలయాలను సందర్శించారు. ఈ రెండు ఆలయాలు శివుడివి కావడంతో లింగాయత్‌లను ప్రభావితం చేయవచ్చనే ఉద్దేశంతోనే మోది నేపాల్‌ వెళ్లినట్లు కాంగ్రెస్‌ ఆరోపించింది.

15:57 - May 11, 2018

నేపాల్ : ప్రధానమంత్రి నరేంద్రమోది, నేపాల్‌ ప్రధాని కేపీ శర్మ జనక్‌పురి-అయోధ్య నడుమ బస్సు సేవలను పచ్చ జెండా ఊపి ప్రారంభించారు. రామాయణ్‌ సర్కిట్ భారత్‌-నేపాల్‌ దేశాలకు ఎంతో ప్రశస్తమైనదని ఈ సందర్భంగా మోది అన్నారు. ఈ బస్సు సేవ టూరిజం అభివృద్ధికి ఎంతో దోహద పడుతుందని ప్రధాని పేర్కొన్నారు. నేపాల్‌ జనక్‌పురిలోని సీతాదేవి మందిరంలో ప్రధాని ప్రత్యేక పూజలు జరిపారు. అనంతరం అక్కడ జరిగిన సభలో మోది మాట్లాడారు. జనక్‌పురిలో జానకిని దర్శించుకోవడం తన అదృష్టమని తెలిపారు. నేపాల్‌తో సంబంధాలను మరింత బలోపేతం చేసుకునేందుకు కట్టుబడి ఉన్నట్లు మోది చెప్పారు.

16:39 - May 8, 2018

బెంగళూరు : కాంగ్రెస్‌ అధ్యక్షుడు రాహుల్‌ గాంధీ తొలిసారిగా తన మనసులోని మాటను బయటపెట్టారు. 2019లో కాంగ్రెస్‌ విజయం సాధిస్తే తానే ప్రధాని అవుతానని చెప్పారు. కర్ణాటక ఎన్నికల ప్రచారంలో భాగంగా బెంగళూరులో మీడియాతో మాట్లాడుతూ ఆయన ఈ వ్యాఖ్యలు చేశారు. నరేంద్ర మోదీ ప్రభుత్వాన్ని ప్రజలు  తీవ్రంగా వ్యతిరేకిస్తున్నారని రాహుల్‌ గాంధీ అన్నారు. అవినీతి ఆరోపణలు ఎదుర్కొంటున్న యడ్యూరప్పను సిఎం అభ్యర్థిగా ఎందుకు ప్రకటించారని రాహుల్‌ బీజేపీని ప్రశ్నించారు. 35 వేల కోట్ల రూపాయలు దోచుకున్న గాలి జనార్దన్‌రెడ్డి వర్గానికి 8 సీట్లు ఎందుకు ఇచ్చారని నిలదీశారు. ఉద్యోగ కల్పన ఎందుకు జరగడం లేదో యువతకు ప్రధాని మోదీ సమాధానం చెప్పాలని రాహుల్‌ డిమాండ్‌ చేశారు.

20:33 - May 2, 2018

బెంగళూరు : కర్నాటక ఎన్నికల ఫలితాలతో దేశ రాజకీయాల్లో మార్పులు వస్తాయని టెన్ టివితో మధుయాష్కీ పేర్కొన్నారు. సౌత్ లో పాగా వేసేందుకు బీజేపీ కుట్రలు..కుతంత్రాలు చేస్తోందని విమర్శించారు. కర్నాటకలో హాంగ్ కు అవకాశం లేదని, 130 స్థానాల్లో కాంగ్రెస్ గెలుస్తోందని జోస్యం చెప్పారు. దేవేగౌడ, కేసీఆర్ లు బీజేపీ నాణానికి రెండు ముఖాలని, బీజేపీ ఆదేశాల మేరకే కేసీఆర్ జేడీఎస్ కు మద్దతంటున్నారని విమర్శించారు. మోడీ కుట్రలో భాగమే కేసీఆర్ చెబుతున్న థర్డ్ ఫ్రంట్ అని అభివర్ణించారు. పూర్తి వివరాలకు వీడియో క్లిక్ చేయండి. 

16:42 - May 1, 2018

కర్ణాటక : కర్ణాటక ఎన్నికల ప్రచారంలో భాగంగా ప్రధాని నరేంద్ర మోది కాంగ్రెస్‌ అధ్యక్షుడు రాహుల్‌గాంధీని టార్గెట్‌ చేశారు. చామ్‌రాజ్‌నగర్‌ జిల్లాలో జరిగిన బహిరంగసభలో మోది ప్రసంగిస్తూ...బిజెపిని విమర్శించడానికే రాహుల్‌ ప్రాధాన్యతనిస్తున్నారని మండిపడ్డారు. ప్రతి గ్రామానికి విద్యుత్‌ సౌకర్యం కల్పిస్తామని ప్రధాని మన్మోహన్‌ సింగ్‌ చెబితే...మీ తల్లి సోనియా...ఓ అడుగు ముందుకేసి ఇంటింటికి కరెంట్‌ ఇస్తామని హామీ ఇచ్చారన్నారు. 2009 వరకు కూడా ఆ హామీ నెరవేర్చలేదని ధ్వజమెత్తారు. 18 వేల గ్రామాలకు విద్యుత్‌ సౌకర్యం కల్పించిన ఘనత తమ ప్రభుత్వానిదేనని మోది అన్నారు. దేశంలో ప్రతి ఇంటికి కరెంట్‌ కనెక్షన్‌ ఇవ్వడం తమ ప్రభుత్వ లక్ష్యమని స్పష్టం చేశారు.

Pages

Don't Miss

Subscribe to RSS - PM narendra modi