rtc

08:33 - December 12, 2017

ఆర్టీసీ కార్మికుల సమస్యలు పరిష్కరించాలని స్టాఫ్‌ ఆండ్‌ వర్కర్స్‌ ఫెడరేషన్‌ (ఎస్‌డబ్య్లూఎఫ్‌) నాయకులు వీఎస్‌ రావ్‌ డిమాండ్ చేశారు. ఇదే అంశంపై నిర్వహించిన జనపథం కార్యక్రమంలో ఆర్టీసీ కార్మికులు ఆందోళన బాట పట్టారు. పని భారం పెంచుతున్నారు. కార్మిక చట్టాలు అమలు లేదు. పే స్కేల్‌ లేదు. ఇది ఆర్టీసీ కార్మిక సంఘాలు చెప్తున్న మాట. వారి ఆందోళనకి దారి తీసిన పరిస్థితులు, ఆర్టీసీ కార్మికుల పట్ల ప్రభుత్వ విధానం తదితర అంశాలపై వీఎస్‌ రావ్‌ మాట్లాడారు. మరిన్ని వివరాలను వీడియోలో చూద్దాం... 

 

20:03 - October 13, 2017

కృష్ణా : విజయవాడ బందరు రోడ్‌లోని స్వరాజ్య మైదానాన్ని ప్రైవేట్‌ పరం చేయడానికి టీడీపీ ప్రభుత్వం చేసే ప్రయత్నాలను సవాల్‌ చేస్తూ హైకోర్టులో పిల్ దాఖలైంది. మాజీ మంత్రి వడ్డే శోభనాద్రీశ్వరరావు ఈ పిల్‌ దాఖలు చేశారు. పీడబ్లూడీ గ్రౌండ్‌ను విదేశీ కంపెనీలకు కట్టబెట్టేందుకు ప్రభుత్వం పీపీపీ పద్ధతిలో ఇచ్చేందుకు చేస్తున్న ప్రయత్నాలకు సర్వత్రా ప్రజావ్యతిరేకత వ్యక్తమవుతోంది. వారసత్వ సంపదగా ఉన్న స్వరాజ్య మైదానాన్ని అభివృద్ధి ముసుగులో కొట్లాది రూపాయల విలువైన స్థలాన్ని విదేశీ కంపెనీలకు కట్టబట్టే ప్రయత్నాలను విపక్షాలు గతంలోనే ఖండించాయి. ఇప్పుడు ప్రభుత్వ తీరుపై హైకోర్ట్‌లో పిల్‌ దాఖలైంది. 

 

09:36 - September 8, 2017

తెలంగాణలో ఆర్టీసీ గడ్డు పరిస్థితి ఎదుర్కొంటుందని ఎస్ డబ్ల్యుఎఫ్ తెలంగాణ కార్యదర్శి విఎస్ రావు అన్నారు. ఇదే అంశంపై నిర్వహించిన జనపథంలో ఆయన పాల్గొని, మాట్లాడారు. 'తెలంగాణలో ఆర్టీసీ గడ్డు పరిస్థితిని ఎదుర్కొంటోంది. తెలంగాణ ప్రజల అవసరాలకు అనుగుణంగా బస్సుల సంఖ్యను పెంచకపోగా, వున్న సర్వీసులనే రద్దు చేస్తున్న దుస్థితి. తెలంగాణకు 15వేలకు పైగా బస్సులు అవసరం కాగా, 10,400 మాత్రమే నడుపుతున్నారు. ఇందులో 2230 అద్దె బస్సులే వున్నాయి. తెలంగాణ రాష్ట్ర ప్రభుత్వం ఏర్పడ్డ తర్వాత అద్దె బస్సుల సంఖ్య విపరీతంగా పెరగడం, వందలాది రూట్లలో బస్సు సర్వీసులు రద్దు చేయడం ఆందోళన కలిగిస్తోంది. మరోవైపు మోటారు వాహన చట్ట సవరణ బిల్లు వాహనదారుల పాలిట శాపంగా మారుతోంది. ఈ నేపథ్యంలో ఆర్టీసీ పరిరక్షణ పేరుతో ఎస్ డబ్ల్యుఎఫ్ సంతకాల సేకరణ ఉద్యమానికి శ్రీకారం చుట్టింది'. మరిన్ని వివరాలను వీడియోలో చూద్దాం...

 

07:22 - June 24, 2017

హైదరాబాద్ : తెలంగాణ ఆర్టీసీలో మరో కొత్త యూనియన్‌ ఏర్పాయింది. కార్మికుల సమస్యలను పరిష్కరించడంలో ఇపుడున్న తెలంగాణ మజ్దార్‌ యూనియన్‌ విఫలం అవుతోందని.. కొత్త యూనియన్‌ నాయకులు అంటున్నారు. మరిన్ని వివరాలకు వీడియో చూడండి. 

08:39 - June 16, 2017

హైదరాబాద్ : తక్కువ పెట్టుబడితో ఎక్కువ సంపాదించడంపై దృష్టి పెట్టారు ప్రైవేటు ట్రావెల్స్‌ యజమానులు. అందులో భాగంగా రిజిస్ట్రేషన్ పన్ను తక్కువగా ఉండే అరుణాచల్ ప్రదేశ్ రాష్ట్రంపై కన్నేశారు. టూరిజంను ఎంకరేజ్ చేయాలనే ఉద్దేశంతో అరుణాచల్‌ ప్రదేశ్ ప్రభుత్వం ఇస్తున్న అవకాశాన్ని కొంతమంది ప్రైవేటు ట్రావెల్స్ నిర్వాహకులు తమకు అనుకూలంగా మార్చుకుంటున్నారు. అరుణాచల్ ప్రదేశ్ లో రిజిస్ట్రేషన్ చేయించుకుని వచ్చి ఆంధ్రప్రదేశ్, తెలంగాణ రాష్ట్రాల్లో బస్సులను తిప్పుతున్నారు. అక్కడ స్లీపర్‌ సీట్ల విధానం అమలులో ఉండటం.. బస్ బాడీ నిర్మాణానికి కూడా తక్కువ ఖర్చు అవుతుండటంతో ట్రావెల్స్‌ యజమానులు అరుణాచల్‌ వైపు క్యూ కడుతున్నారు.

నెలలో ఒక్కసారైనా బస్సులు
నిబంధనల ప్రకారం ఎక్కడ రిజిస్ట్రేషన్ చేయిస్తే అక్కడకు నెలలో ఒక్కసారైనా బస్సులు వచ్చి వెళ్తుండాలి. అలా చేయక పోవడంతో అనుమానం వచ్చిన అరుణాచల్ ప్రదేశ్ రాష్ట్రం తమ రాష్ట్రంలో రిజిస్ట్రేషన్ అయిన ఇతర రాష్ట్రాల బస్సుల రిజిస్ట్రేషన్లను రద్దు చేస్తున్నట్లు స్పష్టం చేసింది. దీంతో మేల్కొన్న తెలంగాణ రవాణా శాఖ అధికారులు అరుణాచల్‌ ప్రదేశ్‌ నుంచి వస్తున్న బస్సులను సీజ్‌ చేసే పనిలో పడ్డారు. అరుణాచల్ ప్రదేశ్‌లో రిజిస్టర్ అయ్యి పలు రాష్ట్రాల్లో తిరుగుతున్న బస్సులు 935 వరకు ఉన్నట్లు తెలుస్తోంది. వాటిలో తెలంగాణకు చెందినవి సగంపైనే ఉన్నట్లు సమాచారం. రాష్ట్ర ఖజానాకు రావాల్సిన ఆదాయానికి గండికొట్టి ఇతర రాష్ట్రాల బస్సులను ఇక్కడ తిప్పి ఆర్టీసి నష్టాలకు కారణం అవుతున్నారని కార్మిక నేతలు చెబుతున్నారు.

ఆలస్యంగా మేల్కొన్న రవాణా శాఖ
టోల్‌గేట్ల వద్ద చెక్ పోస్టుల వద్ద సర్వే చేపట్టి అక్రమంగా తిరుగుతున్న ప్రైవేటు వాహనాల వివరాలను రవాణా శాఖ అధికారులకు ఇచ్చినా స్పందన లేదని కార్మిక సంఘాల నేతలు అంటున్నారు. మరోవైపు ఆలస్యంగా మేల్కొన్న రవాణా శాఖా అధికారులు ప్రయివేటు బస్సుల వివరాలు తమ వద్ద లేవనే విచిత్ర సమాధానం ఇస్తున్నారు. ఇప్పటికైనా అరుణాచల్ ప్రదేశ్ రాష్ట్ర పేరుతో రిజిస్ట్రేషన్ అయిన బస్సులను రవాణాశాఖ అధికారులు నిలిపివేయాలనిఆర్టీసీ కార్మిక సంఘం నేతలు డిమాండ్ చేస్తున్నారు . 

12:59 - June 8, 2017

హైదరాబాద్ : ఉమ్మడి ఆంధ్రప్రదేశ్‌లో కో-ఆపరేటివ్‌ క్రెడిట్‌ సొసైటీకీ మంచి గుర్తింపు ఉండేది. ఆర్టీసీ కార్మికుల ఆర్ధిక అవసరాల కోసం 1952లో ఈ సొసైటీ ఏర్పడింది. ఈ సొసైటీ ద్వారా ఆర్టీసీ కార్మికులు రుణాలు తీసుకుని తమ అవసరాలు తీర్చుకుంటున్నారు. కో ఆపరేటివ్‌ క్రెడిట్‌ సొసైటీ పూర్తిగా స్వతంత్ర సంస్థ. దీనికి ఆర్టీసీ నుంచి కానీ... రాష్ట్ర ప్రభుత్వం నుంచి కానీ ఏవిధమైన ఆర్ధికసాయం అందడంలేదు. ఈ సంస్థను నడిపించేందుకు ఆర్టీసీ కార్మికులు ఒక కమిటీని ప్రత్యక్ష ఎన్నికల ద్వారా ఎన్నుకుంటారు. ప్రతిడిపో, ఇతర యూనిట్ల నుంచి ప్రాతినిధ్యం ఉండేలా సభ్యుల ఎన్నికల జరుగుతుంది. ఎన్నికైన ప్రతినిధితులు మేనేజ్‌మెంట్‌ బాడీని ఎన్నుకుంటారు. దీనికి ఆర్టీసీ ఎండీ... చైర్మన్‌గా వ్యవహరిస్తారు. ఈడీ స్థాయి అధికారి వైస్‌ చైర్మన్‌గా ఉంటారు. సంస్థ కార్యకలాపాలు యావత్తు సెక్రటరీ నిర్వహిస్తారు. ఒకరకంగా చెప్పాలంటే కో ఆపరేటివ్‌ క్రెడిట్‌ సొసైటీకి సెక్రటరీ గుండెకాయలాంటి వారన్నమాట.

పదవీ విరమణ తర్వాత కూడా పొస్టింగ్
ఆర్టీసీ కార్మికుల కో ఆపరేటివ్‌ క్రెడిట్‌ సొసైటీ కార్యదర్శి ఎంవీ నాగరాజుపై అవినీతి ఆరోపణలు రావడం సంచలనం రేపుతోంది. ఆర్టీసీ పాలనాపరంగా విడిపోయినప్పుడు నాగరాజు ఆర్టీసీ కోఆపరేటివ్‌ క్రెడిట్‌ సొసైటీకి కార్యదర్శి అయ్యారు. గతేడాది ఆయన పదవీ విరమణ చేశారు. అంతర్గతంగా ఏం జరిగిందో తెలియదుకానీ..పదవీ విరమణ చేసిన నాగరాజును మళ్లీ కార్యదర్శిగా నియమించారు. అప్పటి నుంచి ఆయనపై అవినీతి ఆరోపణలు వెల్లువెత్తాయి. నిబంధనలకు విరుద్దంగా రాష్ట్ర ప్రభుత్వ ప్రధాన కార్యదర్శి స్థాయిలో నాగరాజుకు వేతనం ఇస్తున్నారని కార్మిక సంఘాలు మండిపడ్డాయి. అంతేకాదు.. రుణపరిమితికి మించి నాగరాజు రుణంపొందారని...ఆయన నియామకే చెల్లదంటూ కొన్ని సంఘాలు కోర్టుకెక్కాయి. రిటైర్డ్‌ అయిన వ్యక్తిని సహకారశాఖా నిబంధనల ప్రకారం తిరిగి నియమించే అవకాశం లేదని వాదించాయి.

విచారణ కమిటీ నివేదిక...
ఇరువర్గాల వాదనలు విన్న న్యాయస్థానం నిజాలను నిగ్గుతేల్చేందుకు ఓ విచారణ కమిటీని నియమించాలని సహకారశాఖను ఆదేశించింది. దీంతో విచారణ కమిటీ విచారణ జరిపి ఓ నివేదికను సమర్పించింది. సెక్రటరీ నాగరాజు ప్రతిరోజు ఉదయం డబ్బులు తీసుకుని మధ్యాహ్నం తిరిగి జమచేసేవారని.. అలా 45 లక్షల మేర లావాదేవీలు జరిగాయని విచారణ కమిటీ తేల్చింది. ఇక నాగరాజు తీసుకుంటున్న వేతనం నిబంధనలకు విరుద్దమని స్పష్టం చేసింది. అతనికి ఇచ్చిన వేతనాన్ని రికవరీ చేయాలని నివేదికలో విచారణ కమిటీ పేర్కొంది. ఈ నేపథ్యంలో ఆర్టీసీ యాజమాన్యం నాగరాజుకు క్లీన్‌చిట్‌ ఇవ్వడం దుమారం రేపింది. విచారణ కమిటీ నివేదికతో తాము చేసిన ఆరోపణలన్నీ నిజమయ్యాయని ... అన్నిరకాలుగా నాగరాజు అక్రమాలకు పాల్పడ్డారని కార్మిక నేతలు ఆరోపిస్తున్నారు. మరోవైపు ఇటీవల జరిగిన ఆర్టీసీ కో ఆపరేటివ్‌ క్రెడిట్‌ సొసైటీ జనరల్‌ బాడీ సమావేశం రసాభాసగా మారింది. నాగరాజు అవినీతిపై కొంతమంది నిలదీశారు. నాయకులతో వాగ్వాదానికి దిగారు. నాగరాజును వెంటనే విధుల నుంచి తొలగించాలని డిమాండ్‌ చేశారు.

సెక్రటరీకి వెనుకేసుకొస్తున్న టీఎంయూ
ఇంతజరిగినా గుర్తింపు సంఘం మాత్రం నాగరాజును వెనుకేసుకొస్తోంది. కొంతమంది నాయకులు కావాలనే ఇదంతా చేస్తున్నారని... కో ఆపరేటివ్‌ క్రెడిట్‌ సొసైటీ ప్రతిష్టకు భంగం కలిగించేందుకు కంకణం కట్టుకున్నారని గుర్తింపు సంఘం నేతలు అంటున్నారు.వందలాది కోట్ల రూపాయల కార్మికుల సొమ్ముకు జవాబుదారిగా ఉండాల్సిన అధికారులకే అవినీతి మరక అంటడంతో కార్మికుల్లో ఆందోళన మొదలయింది. ఇలాంటి విషయాల్లో నిష్పక్షపాతంగా వ్యవహరించాల్సిన యాజమాన్యం... అవినీతికి పాల్పడిన నాగరాజుకు క్లీన్‌చిట్‌ ఇవ్వడం విమర్శలకు దారితీసింది.

07:58 - April 21, 2017

హైదరాబాద్ : ఆర్టీసీలో పొదుపు చర్యలు కార్మికుల భవిష్యత్‌ను ప్రశ్నార్థకంగా మారుస్తున్నాయి. కార్యకలాపాల పరంగా వేర్వేరుగా ఉన్నా తెలుగు రాష్ట్రాల ఆర్టీసీ పీఎఫ్‌ ట్రస్టు అధికారికంగా ఇంకా విడిపోలేదు. కార్మికులు, ఉద్యోగులకు ఇవ్వాల్సిన పీఎఫ్ డబ్బులకు మంగళం పాడే ప్రణాళికలు తయారు చేస్తున్నారు ఏపిఎస్‌ఆర్టీసి అధికారులు. తాజాగా అధికారులు తయారు చేసిన ప్రతిపాదనల్లో పదిహేను వేల వరకు పెన్షనబుల్‌ వేతనం ఉన్న కార్మికులు, ఉద్యోగులకు మాత్రమే సంస్థ పీఎఫ్ జమచేస్తుంది. బేసిక్ పే, డీఏ కలిపి 15 వేలు దాటితే తన వాటా పీఎఫ్‌ని చెల్లించే బాధ్యత నుంచి వైదొలగాలని ఆర్టీసీ యాజమాన్యం నిర్ణయించింది. గతంలో ఇలాంటి ప్రతిపాదన వచ్చినప్పుడు కార్మిక సంఘాల నుండి తీవ్ర నిరసన వ్యక్తం కావడంతో వెనక్కి తగ్గింది. తాజాగా విజయవాడలో జరిగిన ఆర్టీసి పీఎఫ్‌ బోర్డు సమావేశానికి తెలంగాణ ఆర్టీసి యాజమాన్యం ఓ లేఖ రాసిందనే వార్తలు గుప్పుమంటున్నాయి.
పూర్తికాని ఆర్టీసీ విభజన...
ఆర్టీసీలో సొంతంగా పీఎఫ్ ఖాతా నిర్వహించుకుంటున్నారు. లక్ష మంది, అంతకు మించి కార్మికులు ఏదైనా సంస్థలో పనిచేస్తుంటే, సొంతంగా ఆ సంస్థ పీఎఫ్ ఖాతా నిర్వహించుకునేందుకు గతంలో కేంద్రం అనుమతినిచ్చింది. దీంతో ఏపీఎస్‌ఆర్టీసీ పీఎఫ్ ట్రస్ట్ పేరిట కార్యకలాపాలు సాగిస్తున్నారు. ఆర్టీసీ విభజన పూర్తికాకపోవడంతో రెండు రాష్ట్రాల ఆర్టీసీ కార్మికులకు ఇదే ట్రస్టు సేవలందిస్తోంది. ఇందులో యాజమాన్యం, కార్మిక సంఘాల నుండి ప్రతినిధులు సభ్యులుగా ఉంటారు. పిఎఫ్ కోత విధించడం వల్ల రెండు రాష్ట్రాల్లోని ఆర్టీసిలకు ఆరువందల కోట్లకు పైగా ఆదా అవుతుందని అధికారులు అంచనా వేస్తున్నారు. అయితే కార్మిక సంఘాలు మాత్రం ఈ నిర్ణయం పట్ల తీవ్ర అగ్రహాన్ని వ్యక్తం చేస్తున్నాయి. పీఎఫ్ బాధ్యత నుంచి వైదొలగాలన్న నిర్ణయాన్ని ఆర్టీసీ యాజమాన్యం ఉపసంహరించుకోవాలని కార్మిక సంఘాలు డిమాండ్ చేస్తున్నాయి

17:21 - March 29, 2017

హైదరాబాద్ : నగరాలు మహానగరాలుగా మారుతున్నాయి. బస్సులు పెరిగిపోతున్నాయి. ఆర్టీసీలో ప్రయాణించే వారి సంఖ్య పెరుగుతోంది. కానీ.. ప్రయాణికులకు మాత్రం సౌకర్యాలు పెరగడం లేదు. నగరాభివృద్దిలో భాగంలో మోడ్రన్‌ బస్టాపులు నిర్మిస్తామన్నారు. బస్‌బేలు ఏర్పాటు చేస్తామన్నారు. కానీ అవన్నీ ఉట్టి ప్రకటనలకే పరిమితమని తేలిపోయింది. ఓవైపు ఎండలు మండుతుండగా.. మరోవైపు బస్టాపులలో బస్సు షెల్టర్లు లేక ప్రయాణికులు అవస్థలు ఎదుర్కొంటున్నారు. హైదరాబాద్‌ నగరంలో ప్రయాణం అంటేనే భయమేస్తోంది. ఓవైపు పాడైన రోడ్లు.. మరోవైపు ట్రాఫిక్‌ జామ్‌లతో నగరవాసులు ఇక్కట్లు ఎదుర్కొంటున్నారు. ఇక ఆర్టీసీ బస్సుల్లో ప్రయాణం అంటే అదో పెద్ద సాహసంతో కూడుకున్న పని. సాధారణంగా బస్టాప్‌లలో గంటల తరబడి వేచి చూస్తే తప్ప ఆర్టీసీ బస్సులు దొరకని పరిస్థితి. అయితే.. ప్రస్తుతం ఎండలు మండిపోతుండడంతో బస్టాప్‌లలో బస్సు షెల్టర్లు లేక ప్రయాణికులు నానా ఇబ్బందులు ఎదుర్కోవాల్సి వస్తోంది.

యాడ్‌ ఏజెన్సీల ద్వారా నిర్మాణాలు
హైదరాబాద్‌లో ఏళ్లు గడుస్తున్నా బస్సు షెల్టర్ల నిర్మాణం మాత్రం పూర్తి కావడంలో లేదు. 2008లో ఆర్టీసీ బస్సు షెల్టర్ల నిర్మాణ బాధ్యతను జీహెచ్‌ఎంసీకి అప్పగించి చేతులు దులుపుకుంది. నగరంలో మొత్తం 1832 బస్టాప్‌లు అవసరమని గుర్తించిన ఆర్టీసీ అధికారులు... ప్రతిపాదనలను బల్దియాకు పంపారు. యాడ్‌ ఏజెన్సీల ద్వారా నిర్మాణాలు చేపట్టాలని నిర్ణయించారు గ్రేటర్‌ అధికారులు. అయితే.. బస్సు షెల్టర్ల నిర్మాణానికి ఐదు సార్లు టెండర్లు పిలిచినా కేవలం... 840 బస్సు షెల్టర్ల నిర్మాణం మాత్రమే పూర్తయింది. వివిధ ప్రాంతాల్లో బస్సు షెల్టర్ల నిర్మాణానికి యాడ్‌ ఏజెన్సీలు ముందుకు వచ్చినా.. ఎక్కడ ఎక్కువ ఆదాయం వస్తుందో అక్కడ మాత్రమే బస్సు షెల్టర్లు నిర్మించి మిగతావాటిని వదిలేశారు.

35 డిగ్రీలకు పైగా ఉష్ణోగ్రతలు
ఉష్ణోగ్రత 35 డిగ్రీలకు పైగా ఉండడంతో ప్రయాణికులు బస్టాప్‌లలో నిలబడాలంటే ఇబ్బందులు ఎదుర్కొంటున్నారు. ఎండ నుండి రక్షణ కోసం చెట్లు, భవనాల నీడలను ఆశ్రయిస్తున్నారు. మరోవైపు బస్టాప్‌లలో క్షణం పాటు బస్సులు నిలపకపోవడంతో.. ప్రయాణికులు అవస్థలు పడుతున్నారు. 100 రోజుల్లో నగరంలో 50 ప్రాంతాల్లో బస్‌బేలు ఏర్పాటు చేస్తామని మంత్రి కేటీఆర్‌ హామీ ఇచ్చినా అవి కార్యరూపం దాల్చలేదు. మరోవైపు మెట్రో రైలు పనుల కారణంగా రోడ్డు వైడనింగ్‌లో ఉన్న బస్సు షెల్టర్లను తొలగించారు. వాటి స్థానంలో కొత్తవి ఏర్పాటు చేయకపోవడంతో నగరవాసులు ఇబ్బందులు పడుతున్నారు. ఇప్పటికైనా అధికారులు గుర్తించి బస్సు షెల్టర్లు ఏర్పాటు చేయాలని ప్రయాణికులు కోరుతున్నారు.

16:48 - January 20, 2017

హైదరాబాద్ : ర్యాష్ డ్రైవింగ్‌.. మద్యంతాగి వాహనం నడపడం వంటి కారణాలో విలువైన ప్రాణాలు గాల్లో కలిసి పోతున్నాయి. మందుబాబులకు ఎన్ని విధాల చెప్పినా పరిస్థితిలో మార్పు రావడం లేదు. రోడ్డు భద్రతా వారోత్సవాల్లో భాగంగా హైదరాబాద్‌ మరోసారి మందుబాబులకు, మైనర్ల తల్లిదండ్రులకు కౌన్సిలింగ్ ఇచ్చారు. గోషామహల్‌ ట్రాఫిక్ ట్రైనింగ్‌ ఇన్‌స్టిట్యూట్‌లో ట్రాఫిక్స్‌ ఏసీపీ భద్రేశ్వర్‌ తో టెన్ టివి ఫేస్‌ టూ ఫేస్‌ నిర్వహించింది. ఆయన తెలిపిన విషయాలను వీడియోలో చూద్దాం...   

09:42 - January 7, 2017

హైదరాబాద్: సంక్రాంతి పండుగ పది రోజుల ముందు నుంచే మహత్మాగాంధీ బస్టాండ్‌ ప్రయాణీకులతో రద్దీగా ఉండేది. కానీ, ఇప్పుడు పరిస్థితి పూర్తిగా మారిపోయింది. సంక్రాంతి పండగ వాతావరణం ఏ మాత్రం కనిపించడం లేదు. ఎటూ చూసినా ప్రయాణీకులు లేక ప్లాట్‌ ఫామ్స్‌ వెలవెలబోతున్నాయి. దీనికి కారణాలు అనేకం ఉన్నాయి.

మహత్మాగాంధీ బస్టాండ్‌లో కనిపించని సంక్రాంతి వాతావరణం
సంక్రాంతి పండగంటే ఆ సందడే వేరు.. దూర ప్రాంతాల్లో ఉన్నవారు పండక్కి తమ సొంతుళ్లకు పయనమవుతారు. ప్రతి ఏడాది సంక్రాంతి పది రోజుల ముందుగానే బస్టాండ్లన్నీ ప్రయాణీకులతో రద్దీగా ఉంటాయి. ఈ ఏడాది పరిస్థితి పూర్తిగా తారుమారైంది. ఓవైపు పెద్దనోట్ల రద్దు, మరోవైపు ప్రైవేటు బస్సుల పోటీ, ఇవన్నీ చాలవన్నట్లు అవసరానికి మించిన సర్వీసులు... వెరసి ఆర్టీసీ బస్సులలో ప్రయాణీకులు వెళ్లకుండా చేస్తున్నాయి. పెద్ద నోట్ల రద్దు తర్వాత కూడా చిల్లర సమస్య అందర్నీతీవ్రంగా వేధిస్తోంది. దూర ప్రయాణాలు చేయాలంటేనే ఒకటికి రెండుసార్లు ఆలోచిస్తున్నారు. ఈ ఎఫెక్ట్‌ ఆర్టీసీపై చూపుతోంది.

ప్రైవేటు ట్రావెల్స్‌ పోటీని తట్టుకోలేకపోతున్న ఆర్టీసీ సంస్థ
ప్రైవేటు ట్రావెల్స్ పోటీని కూడా ఆర్టీసీ తట్టుకోలేకపోతుందననేది మరో వాదన. ప్రైవేట్‌ ట్రావెల్స్‌లో ఆర్టీసీ కంటే టికెట్‌ రేటు ఎక్కువే ఉన్నా... ప్రయాణీకులు మాత్రం ప్రైవేటు బస్సులకే మొగ్గుచూపుతున్నారు. దీంతో ఆర్టీసీ ఆదాయానికి భారీగా గండి పడుతోంది. ఇబ్బడి ముబ్బడిగా ఉన్న ప్రైవేటు బస్సు ట్రావెల్స్‌ ఆఫర్ల మీదా ఆఫర్లు ఇచ్చి ప్రయాణీకులను ఆకర్షించడంలో ముందుంటున్నాయి.

గతంతో పోల్చితే ఏడాది తగ్గిన ప్రయాణీకుల రద్దీ
సంక్రాంతి పండగ రోజున సొంత ఊర్లో పిల్లాపాపలతో గడపాలని చాలామంది కోరుకుంటారు. ఎన్ని ఇబ్బందులున్నా పండగను మాత్రం ఊర్లోనే జరుపుకోవడానికే ఇష్టపడుతారు. వారం రోజుల ముందైనా ఆర్టీసీ బస్సులన్నీ ప్రయాణీకులతో కళకళలాడుతాయన్న ఆశాభావంతో ఆర్టీసీ అధికారులున్నారు.

Pages

Don't Miss

Subscribe to RSS - rtc