Sasikala

15:35 - November 30, 2017

చెన్నై : రెండాకుల గుర్తుపై అన్నాడీఎంకేలో వర్గపోరు ఇంకా కొనసాగుతూనే ఉంది. పళని-పన్నీర్‌ వర్గానికి రెండాకుల గుర్తు కేటాయించడాన్ని వ్యతిరేకిస్తూ శశికళ వర్గం నేత దినకరన్‌ ఢిల్లీ హైకోర్టును ఆశ్రయించారు. రెండాకుల గుర్తు పళని-పన్నీర్‌ వర్గానికి కేటాయిస్తూ ఈసీ తీసుకున్న నిర్ణయాన్ని రద్దు చేయాలని కోరుతూ ఢిల్లీ హైకోర్టులో పిటిషన్‌ వేశారు. రెండాకుల గుర్తును తమకే కేటాయించాలంటూ పళని-పన్నీర్‌ వర్గం, దినకరన్‌ వర్గం ఎన్నికల కమిషన్‌ను ఆశ్రయించాయి. దీనిపై విచారణ చేపట్టిన ఈసీ... పళని-పన్నీర్‌ వర్గానికి రెండాకుల గుర్తును కేటాయిస్తున్నట్లు ఇటీవల ప్రకటించిన విషయం తెలిసిందే.

15:34 - November 30, 2017

చెన్నై : తమిళనాడులోని ఆర్కేనగర్‌ ఉప ఎన్నికకు అధికార అన్నాడీఎంకే అభ్యర్థిని ఖరారు చేసింది. ఎఐఎడిఎంకె ప్రిసీడియం ఛైర్మన్‌ ఈ.మధుసూదన్‌ను తమ అభ్యర్థిగా ప్రకటించింది. చెన్నైలోని పార్టీ పార్లమెంటరీ బోర్డు సమావేశం మధుసూదనన్ అభ్యర్థిత్వాన్ని ఏకగ్రీవంగా ఎంపిక చేసింది. పార్టీ పార్లమెంటరీ బోర్టు కోఆర్డినేటర్‌గా పన్నీర్‌సెల్వం, కో కోఆర్డినేటర్‌గా పళనిస్వామి వ్యవహరిస్తున్నారు. ఏప్రిల్‌లో జరిగిన ఉప ఎన్నికల్లోనూ మధుసూదన్‌ పోటీ చేశారు. అప్పుడు పన్నీర్‌ సెల్వం వర్గం తరఫున అన్నాడీఎంకే పురట్చి తలైవి అమ్మ పార్టీ నుంచి ఆయన పోటీచేశారు. అయితే కొన్ని పార్టీలు డబ్బులిచ్చి ఓటర్లను ఆకర్షించే ప్రయత్నం చేశాయన్న ఆరోపణలు రావడంతో ఆ ఎన్నికలను రద్దు చేశారు. దీంతో మరోసారి ఉప ఎన్నిక నిర్వహిస్తున్నారు. డిఎంకె అభ్యర్థిగా మరుదు గణేష్, శశికళ వర్గం నుంచి టిటివి దినకరన్‌ పోటీలో ఉంటారు. మాజీ ముఖ్యమంత్రి జయలలిత మరణంతో ఆర్‌కె నగర్‌ ఖాళీ అయింది. ఆర్‌కె నగర్‌కు డిసెంబర్‌ 21న ఉప ఎన్నిక జరగనుంది. డిసెంబర్‌ 24న ఎన్నికల ఫలితం వెలువడనుంది.

21:32 - November 24, 2017

చెన్నై : తమిళనాడు, ఆర్కేనగర్‌ ఉప ఎన్నికకు కేంద్ర ఎన్నికల సంఘం షెడ్యూల్‌ని విడుదల చేసింది. డిసెంబర్‌ 21న ఎన్నికలు జరగనున్నాయి. డిసెంబర్‌ 24న ఎన్నికల ఫలితాలు వస్తాయి. జయలలిత మరణంతో ఆర్కే నగర్ అసెంబ్లీ సీటు ఖాళీ అయ్యింది. 

10:29 - November 9, 2017

చెన్నై: దినకరన్‌, శిశికళ వర్గానికి షాక్ తగిలింది. శశికళ, దినకరన్‌ ఇళ్లల్లో ఐటీ శాఖ దాడులు నిర్వహించింది. జయ టీవీ, నమదు ఎంజీఆర్‌, మక్కల్‌ కురల్‌ కార్యాలయాలయాల్లో ఐటీ తనిఖీలు చేస్తోంది. బెంగళూరులోని శశికళ సన్నిహితుడు,అన్నాడీఎంకే కార్యదర్శి పుగళేంది నివాసంలోనూ అధికారులు తనిఖీలు చేశారు. ఐస్‌ సినిమాస్‌ వివేక్ నివాసంలో దాడులు నిర్వహించారు.  190 చోట్ల దాడులు ఏకకాలంలో దాడులు చేస్తున్నారు.

12:09 - October 12, 2017

 

చెన్నై : ఆదాయానికి మించిన ఆస్తుల కేసులో పెరోల్‌పై విడుదలైన శశికళ తిరిగి బెంగళూరు జైలుకు బయల్దేరారు. అనారోగ్యంతో ఉన్న భర్తను చూసేందుకు శశికళకు జైళ్లశాఖ మంజూరు చేసిన ఐదు రోజుల పెరోల్‌ బుధవారంతో ముగిసింది. దీంతో నేడు ఆమె తిరిగి బెంగళూరు జైలుకు తిరిగి వెళుతున్నారు. ఆదాయానికి మించిన ఆస్తుల కేసులో శిక్షపడిన ఆమె బెంగళూరులోని పరప్పణ ఆగ్రహార జైలులో శిక్ష అనుభవిస్తున్నారు. అయితే ఇటీవల శశికళ భర్త నటరాజన్‌ అనారోగ్యానికి గురయ్యారు. చెన్నైలోని ఓ ప్రయివేటు ఆసుపత్రిలో నటరాజన్‌కు కిడ్నీ, కాలేయ మార్పిడి ఆపరేషన్‌ చేశారు. దీంతో భర్తను చూసేందుకు అనుమతినివ్వాలంటూ శశికళ పెరోల్‌కు దరఖాస్తు చేసుకున్నారు. ఆమె దరఖాస్తును పరిశీలించిన జైళ్ల శాఖ గత శుక్రవారం ఐదు రోజుల పెరోల్‌ మంజూరు చేసింది. అయితే పెరోల్‌కు కొన్ని షరతులు విధించింది. ఆమె తన బంధువుల నివాసంలో మాత్రమే ఉండాలని, ఎలాంటి రాజకీయ కార్యక్రమాల్లో పాల్గొనరాదని, మీడియా ప్రకటనలు చేయరాదని నిబంధనలు విధించింది.

21:52 - September 12, 2017

చెన్నై : అన్నాడిఎంకేలో చిన్నమ్మ శశికళ శకం ముగిసినట్లేనా? తాజాగా పార్టీ ప్రధాన కార్యదర్శి పదవి నుంచి శశికళను తొలగిస్తూ అన్నాడిఎంకె నిర్ణయం తీసుకుంది. మరోవైపు పళనిస్వామి ప్రభుత్వం అసెంబ్లీలో బలాన్ని నిరూపించుకోవాలని ప్రధాన ప్రతిపక్ష పార్టీ డిఎంకే మద్రాస్‌ హైకోర్టులో పిటిషన్ వేసింది.

తమిళనాడు దివంగత ముఖ్యమంత్రి జయలలిత మరణం తర్వాత పార్టీలో ప్రభుత్వంలో చక్రం తిప్పాలని భావించిన చిన్నమ్మ
శశికళ ఆశలన్నీ అడియాసలవుతున్నాయి. ఇప్పటికే అక్రమ ఆస్తుల కేసులో జైలు శిక్ష అనుభవిస్తున్న శశికళను పార్టీ ప్రధాన కార్యదర్శి పదవి నుంచి తొలగించారు. పళనిస్వామి, పన్నీర్‌ సెల్వం నేతృత్వంలో చెన్నైలో జరిగిన పార్టీ సర్వసభ్య సమావేశంలో ఈ మేరకు ఏకగ్రీవంగా నిర్ణయం తీసుకున్నారు.

అన్నాడీఎంకే ప్రధాన కార్యదర్శి పదవి ఎప్పటికీ జయలలితదేనని జనరల్‌ కౌన్సిల్‌ తీర్మానించింది. ఆ బాధ్యతలను తాత్కాలికంగా చేపట్టిన శశికళను పదవి నుంచి తొలగిస్తూ కార్యవర్గం నిర్ణయం తీసుకుంది. పార్టీ చీఫ్‌ కో ఆర్డినేటర్‌గా పన్నీర్‌ సెల్వం, అసిస్టెంట్‌ చీఫ్‌ కో ఆర్డినేటర్‌గా పళనిస్వామి ఉంటారని కార్యవర్గం పేర్కొంది. శశికళ మేనల్లుడు దినకరన్‌ చేపట్టిన నియామకాలు, ప్రకటనలను ఆమోదించమని స్పష్టం చేసింది. పార్టీ రెండాకుల గుర్తును తిరిగి కైవసం చేసుకోవడానికి ప్రయత్నించాలని సమావేశం నిర్ణయించింది.

మరోవైపు త‌మిళ‌నాడు సీఎం ప‌ళ‌నిస్వామి ప‌ళ‌ని ప్రభుత్వం బ‌ల‌నిరూప‌ణ నిర్వహించాల‌ని డీఎంకే నేత స్టాలిన్ మద్రాస్‌ కోర్టుకు వెళ్లారు. స్టాలిన్‌తో పాటు పీఎంకే పార్టీకి చెందిన బాలు కూడా పిటిష‌న్ వేశారు. ఈ పిటిషన్‌పై అక్టోబ‌ర్ 10వ తేదీన  మద్రాస్ హై కోర్టు విచారణ చేపట్టనుంది. 

తమిళనాడు ప్రజలను, పార్టీ కార్యకర్తలను పన్నీర్‌సెల్వం, పళనిస్వామి మోసం చేశారని దినకరన్‌ మండిపడ్డారు. పళనిస్వామి ప్రభుత్వాన్ని ఇంటికి పంపిస్తానని హెచ్చరించారు. అన్నాడిఎంకెకు చెందిన 19 మంది ఎమ్మెల్యేలు దినకరన్‌ వెంట ఉండడంతో పళనిస్వామి ప్రభుత్వం మైనారిటీలో పడింది. 

శశికళకు  కాలం కలిసి రాలేదు. జయలలిత మరణానంతరం శశికళ పార్టీ ప్రధాన కార్యదర్శిగా పగ్గాలు చేపట్టడం....పన్నీర్‌ సెల్వంను సిఎంను పదవి నుంచి తొలగించడం జరిగిపోయాయి. తదనంతరం జరిగిన పరిణామాల్లో పార్టీ రెండుగా చీలిపోయింది. సిఎంగా బాధ్యతలు చేపడతారు అనుకునే సందర్భంలో అక్రమ ఆస్తుల కేసులో శశికళ జైలుపాలయ్యారు. దీంతో ఆమె మేనల్లుడు దినకరన్‌కు ఉప ప్రధాన కార్యదర్శి బాధ్యతలు అప్పగించడం పార్టీలో కొందరికి నచ్చలేదు. ఈ నేపథ్యంలో పళనిస్వామి, పన్నీర్‌ సెల్వం వర్గాలు ఏకమయ్యాయి. శశికళ, దినకరన్‌కు  అన్ని పదవుల నుంచి తొలగిస్తున్నట్లు  తాజాగా తీర్మానం చేశాయి. తాజా పరిణామాల నేపథ్యంలో శశికళ ఎలాంటి వ్యూహం పన్నుతారో  వేచి చూడాల్సిందే.

07:33 - August 29, 2017

చెన్నై : తమిళ రాజకీయాలు రసవత్తరంగా మారాయి. ఒకవైపు ప్రభుత్వంపై అవిశ్వాసానికి ప్రధాన ప్రతిపక్షంతో పాటు శశికళకు చెందిన దినకరన్‌ వర్గం ఎమ్మెల్యేలు తీవ్రంగా ప్రయత్నిస్తుండగా... పళణిస్వామి నేతృత్వంలో అన్నాడీఎంకే పార్టీ నేతలు సమావేశమై మరో ఎత్తుగడ వేశాయి. శశికళ, దినకరన్‌ను పార్టీ నుంచి శాశ్వతంగా తొలగించాలని పార్టీ సమావేశంలో నిర్ణయం తీసుకున్నారు. గతంలో ఈసీకి ఇచ్చిన లేఖ వెనక్కి తీసుకోవాలని తీర్మానం చేశారు. అలాగే జయ టీవీ, నమదు ఎంజీఆర్‌ పత్రికను కూడా తమ స్వాధీనంలోకి తీసుకోవాలని నిర్ణయించారు. ఇక దినకరన్‌ వర్గంలోని ఎమ్మెల్యేలకు విప్‌ జారీ చేసి వారిని అనర్హులుగా ప్రకటించి.... తమపై పెట్టిన అవిశ్వాసాన్ని తప్పించుకోవాలని అన్నాడీఎంకే నేతలు భావిస్తున్నారు. 

19:28 - August 21, 2017

చెన్నై : తమిళనాడులో అధికార పార్టీ అన్నాడీఎంకేలోని పళని, పన్నీర్‌ వర్గాలు విలీనమయ్యాయి. అమ్మ ఆశయాల కోసం పనిచేస్తామని ఇరువర్గాలు ప్రకటించాయి. విలీన ఒప్పందం మేరకు పన్నీర్‌సెల్వం ఉపముఖ్యమంత్రిగా... ఆయన వర్గానికి చెందిన మరో ముగ్గురు మంత్రులుగా ప్రమాణం చేశారు. గత కొన్ని రోజులుగా నడుస్తున్న అన్నాడిఎంకె వర్గాల విలీన వ్యవహారం ఓ కొలిక్కి వచ్చింది. జయలలిత మరణం తర్వాత రెండుగా చీలిన పార్టీలోని పన్నీర్‌సెల్వం- పళనిస్వామి వర్గాలు మళ్లీ ఒక్కటయ్యాయి. చెన్నైలోని అన్నాడీఎంకే పార్టీ ప్రధాన కార్యాలయంలో ఇరువర్గాలు భేటి అయ్యాయి. ముఖ్యమంత్రి పళనిస్వామి, మాజీ సీఎం పన్నీర్‌సెల్వం చేతులు కలిపారు.

విడిపోయిన పార్టీలు తిరిగి కలవడం చారిత్రాత్మకమని ముఖ్యమంత్రి పళనిస్వామి అన్నారు. తమ పార్టీని ఇక ఎవరూ చీల్చలేరని చెప్పారు. పార్టీని ఇకపై మార్గదర్శక కమిటి నిర్వహిస్తుందని... పన్నీర్‌ సెల్వం కన్వీనర్‌గా వ్యవహరిస్తారని సిఎం వెల్లడించారు. సంయుక్త ప్రకటన అనంతరం పళని, పన్నీర్‌లు కలిసి ఎంజీఆర్‌, జయలలిత మెమోరియల్‌ వద్దకు వెళ్లారు. ఎంజీఆర్, జయలలిత స్మారకం వద్ద పుష్పగుచ్ఛాలు ఉంచి ఘనంగా నివాళులర్పించారు.

ఇరువర్గాల మధ్య కుదిరిన ఒప్పందం మేరకు ముఖ్యమంత్రి పళనిస్వామి తన మంత్రివర్గాన్ని విస్తరించారు. మాజీ సిఎం పన్నీర్‌ సెల్వం ఉపముఖ్యమంత్రిగా ప్రమాణం చేశారు. రాజ్‌భవన్‌లో జరిగిన ప్రమాణ స్వీకారం కార్యక్రమంలో గవర్నర్‌ విద్యాసాగర్‌రావు పన్నీర్‌సెల్వం, ఇతర మంత్రులతో ప్రమాణ స్వీకారం చేయించారు. పన్నీర్‌ సెల్వం వర్గానికి చెందిన రాధాకృష్ణన్‌, పాండ్య రాజన్, బి. రెడ్డి మంత్రులుగా ప్రమాణం చేశారు. పన్నీర్‌ సెల్వం ఆర్థిక, గృహ నిర్మాణ శాఖలు చేపట్టనున్నారు.

అన్నాడిఎంకేలోని రెండు వర్గాలు విలీనం కావడంతో శశికళను పార్టీ నుంచి తొలగించనున్నారు. త్వరలో పార్టీ సమావేశం ఏర్పాటు చేసి తాత్కాలిక ప్రధాన కార్యదర్శిగా ఉన్న శశికళను పదవి నుంచి తప్పిస్తారని అన్నాడిఎంకె వర్గాలు చెబుతున్నాయి. మరోవైపు శశికళకు మద్దతు ఇస్తున్న 20 మంది ఎమ్మెల్యేలు ఆమె మేనల్లుడు టిటివి దినకరన్‌తో సమావేశపై తాజా పరిణామాలపై చర్చించారు.

అన్నాడిఎంకె చీలిక వర్గాల విలీనం వెనక బిజెపి డ్రామా నడిపిందన్న విషయం అందరికి తెలిసిందే. అన్నాడిఎంకె త్వరలోనే ఎన్డీయేలో భాగస్వామ్యం కానుంది. విలీన ప్రక్రియ పూర్తి కావడంతో పార్టీ సింబల్‌ రెండాకుల కోసం అన్నాడిఎంకే ఈసీని కలవనుంది.

17:29 - August 21, 2017

చెన్నై : తమిళనాడు కేబినెట్ విస్తరించారు. రాజ్ భవన్ లో గవర్నర్ విద్యా సాగర్ రావు ప్రమాణ స్వీకారం చేయించారు. డిప్యూటి సీఎంగా పన్నీర్ సెల్వం ప్రమాణం చేశారు.  పన్నీర్ కు ఆర్థిక..గృహ నిర్మాణ శాఖలను కేటాయించారు. మంత్రులుగా పాండ్య రాజన్, రాధాకృష్ణన్, జీరెడ్డిలు ప్రమాణం చేశారు. 
జయ మరణానంతరం అన్నాడీఎంకే రెండుగా చీలిపోయిన సంగతి తెలిసిందే. శశికళ వర్గానికి పళనీ స్వామి నేతృత్వం వహించి సీఎం పదవిని అధిష్టించిన సంగతి తెలిసిందే. పన్నీర్ సెల్వం వర్గం తీవ్ర విమర్శలు చేస్తూ రాజకీయాలను వేడెక్కించారు. ఈ నేపథ్యంలో సోమవారం ఈపీఎస్..ఓపీఎస్ గ్రూపులు భేటీ అయ్యాయి. మొదటి నుంచి పన్నీర్‌ వర్గం శశికళను పార్టీ పదవి నుంచి తొలగించాలని కోరుతున్న సంగతి తెలిసిందే. చర్చల అనంతరం చివరకు పార్టీలు ఒక్కటైపోయాయి. దీనితో తమిళనాడులో కొత్త రాజకీయానికి తెరలేచినట్లైంది. సాయంత్రం 5గంటలకు కేబినెట్ విస్తరణ జరిగింది. మరోవైపు ప్రధాన కార్యదర్శి పదవి నుండి తొలగించడం పట్ల దినకరన్ తీవ్ర ఆగ్రహంగా ఉన్నట్లు తెలుస్తోంది. 16 మంది ఎమ్మెల్యేలు, ముగ్గురు ఎంపీలు మద్దతిస్తున్నట్లు తెలుస్తోంది. శశికళను పార్టీ పదవి నుంచి తొలగిస్తే ప్రభుత్వాన్ని అస్థిరపర్చుతామని దినకరన్‌ హెచ్చరిస్తున్నారు. 

16:16 - August 21, 2017

చెన్నై : అందరూ ఊహించిందే జరిగిపోయింది. పళనీ..పన్నీర్ వర్గాలు కలుసుకున్నాయి. గత కొన్ని రోజులుగా తమిళనాట రాజకీయాలు రోజుకో మలుపు తిరుగుతున్న సంగతి తెలిసిందే. జయ మరణానంతరం రెండు వర్గాలుగా చీలిపోయాయి. శశికళ వర్గానికి పళనీ స్వామి నేతృత్వం వహించి సీఎం పదవిని అధిష్టించిన సంగతి తెలిసిందే. పన్నీర్ సెల్వం వర్గం తీవ్ర విమర్శలు చేస్తూ రాజకీయాలను వేడెక్కించాయి.

ఈ నేపథ్యంలో సోమవారం ఈపీఎస్..ఓపీఎస్ గ్రూపులు భేటీ కావడం ప్రాధాన్యత సంతరించుకుంది. మొదటి నుంచి పన్నీర్‌ వర్గం శశికళను పార్టీ పదవి నుంచి తొలగించాలని కోరుతున్న సంగతి తెలిసిందే. ఇందుకు పళనిస్వామి వర్గం కూడా సుముఖత వ్యక్తం చేసింది. కానీ వీరి విలీనానికి శశికళను తొలగింపు ప్రధాన అడ్డంకిగా మారింది.

చివరకు పార్టీలు ఒక్కటైపోయాయి. దీనితో తమిళనాడులో కొత్త రాజకీయానికి తెరలేచినట్లైంది. సాయంత్రం 5గంటలకు కేబినెట్ విస్తరణ జరగనుంది. ఈ విస్తరణలో డిప్యూటి సీఎంగా పన్నీర్ ప్రమాణ స్వీకారం చేయనున్నట్లు మసాచారం. మరోవైపు ప్రధాన కార్యదర్శి పదవి నుండి తొలగించడం పట్ల దినకరన్ తీవ్ర ఆగ్రహంగా ఉన్నట్లు తెలుస్తోంది. 16 మంది ఎమ్మెల్యేలు, ముగ్గురు ఎంపీలు మద్దతిస్తున్నట్లు తెలుస్తోంది. శశికళను పార్టీ పదవి నుంచి తొలగిస్తే ప్రభుత్వాన్ని అస్థిరపర్చుతామని దినకరన్‌ హెచ్చరిస్తున్నారు. 

Pages

Don't Miss

Subscribe to RSS - Sasikala