telangana news updates

18:24 - August 18, 2018

ఆదిలాబాద్ : జిల్లాలోని రిమ్స్ ఆస్పత్రి వద్ద మెడికోలు ధర్నాకు దిగారు. రిమ్స్ కళాశాలలో రెగ్యులర్ సిబ్బంది నియమించాలని డిమాండ్ చేశారు. సిబ్బంది లేక చాలా ఇబ్బందులకు గురువుతన్నామని..ప్రభుత్వం వెంటనే ఆదిలాబాద్ రిమ్స్ పై దృష్టి పెట్టాలని మెడికోలు కోరుతున్నారు. 

 

21:45 - July 31, 2018

హైదరాబాద్ : కాళేశ్వరం ప్రాజెక్ట్‌పై అధికార, విపక్షాలు విమర్శలకు దిగాయి. కాళేశ్వరం ప్రాజెక్ట్‌పై కాంగ్రెస్‌ కుట్రలు చేస్తుందని మంత్రి హరీష్‌రావు ఆరోపించారు. హరీష్‌రావు వ్యాఖ్యలను కాంగ్రెస్‌ నేత రేవంత్‌రెడ్డి తిప్పికొట్టారు. ప్రాజెక్ట్‌ల రీడిజైనింగ్‌ పేరుతో 50 వేల కోట్ల రూపాయలను కేసీఆర్‌ కుటుంబం దోచుకుందని ఆరోపించారు. టీడీపీ నేత రావుల చంద్రశేఖర్‌ రెడ్డి కూడా కాళేశ్వరం ప్రాజెక్ట్‌ విషయంపై విమర్శలు గుప్పించారు. కాళేశ్వరం ప్రాజెక్ట్‌పై అధికార, విపక్షాలు విమర్శలకు దిగాయి. మంత్రి హరీష్‌ రావు వ్యాఖ్యలపై.. ప్రతిపక్ష కాంగ్రెస్‌ నేత రేవంత్‌రెడ్డి.. టీడీపీ నేత రావుల చంద్రశేఖర్‌ రెడ్డి ప్రభుత్వంపై విమర్శలు గుప్పించారు. 

కాళేశ్వరం ప్రాజెక్టు మీద కాంగ్రెస్ కుట్రలకు పాల్పడుతుందన్నారు మంత్రి హరీష్‌రావు. ప్రాజెక్ట్‌ ప్రతిష్ట దెబ్బతీయాలనే ఉద్దేశంతో కాంగ్రెస్ నాయకులు కుట్రలు చేస్తున్నారని ఆరోపించారు. సాగునీటి ప్రాజెక్టుల విషయంలో ప్రజలను రెచ్చగొట్టి భూసేకరణ జరగకుండా కాంగ్రెస్ నాయకులు అడ్డుకున్నారని అన్నారు. భూసేకరణ పేరు మీద కోర్టుల్లో తప్పుడు కేసులు వేశారని మండిపడ్డారు. శాశ్వతంగా తెలంగాణలో అధికారానికి దూరమవుతామేమోననే భయంతో కాంగ్రెస్ పార్టీ అభివృద్ధిని అడ్డుకుంటుదని హరీష్‌ ఆరోపించారు. 

కాళేశ్వరం ప్రాజెక్టును పూర్తి చేసి తెలంగాణను సస్యశ్యామలం చేయాలనే సంకల్పంతో సీఎం కేసీఆర్ ముందుకెళ్తున్నారని హరీష్‌రావు అన్నారు. కాంగ్రెస్ నేతలకు తెలంగాణ రైతులు బాగుపడటం ఇష్టం లేదన్నారు. ప్రాణహిత - చేవెళ్ల ప్రాజెక్టుపై టీఆర్‌ఎస్ పార్టీ ఏనాడైనా కేసులు వేసిందా?.. భూసేకరణను అడ్డుకున్నామా అని కాంగ్రెస్‌ను హరీష్‌ ప్రశ్నించారు. ప్రాణహిత - చేవెళ్ల ప్రాజెక్టును పూర్తి చేయాలని డిమాండ్ చేశామని తెలిపారు. ఏ పార్టీ నాయకులు ఏం చేస్తున్నారో ప్రజలకు అర్థమైతుందని హరీష్‌రావు చెప్పారు. కాంగ్రెస్‌ హాయాంలో ప్రారంభించిన ప్రాజెక్ట్‌ల ద్వారా రైతులకు ఎలాంటి లబ్ది చేకూరలేదని ఆరోపించారు.

మంత్రి హరీష్‌రావు చేసిన వ్యాఖ్యలపై కాంగ్రెస్‌నేత రేవంత్‌రెడ్డి తిప్పికొట్టారు. ప్రస్తుతం ఉన్న మెజారిటీ ప్రాజెక్ట్‌లను కాంగ్రెస్సే నిర్మించిందని రేవంత్ అన్నారు. ప్రాజెక్ట్‌ల రీడిజైనింగ్‌ పేరుతో మామ, అల్లుళ్లు రాష్ట్రాన్ని దోచుకుంటున్నారని ఆరోపించారు. ప్రాజెక్ట్‌ల రీడిజైనింగ్‌, వాటర్‌గ్రిడ్‌ మ్యానిఫెస్టోలో లేకున్నా ఉన్నపళంగా తెచ్చారని.. వీటి ద్వారా 50 వేల కోట్ల రూపాయలను దోచుకున్నారని ఆరోపించారు. దోపిడీని ప్రశ్నిస్తున్నందుకే కాంగ్రెస్‌ నేతలను రాక్షసులని, దొంగలని అంటున్నారని అన్నారు. ప్రాజెక్ట్‌లకు తాము వ్యతిరేకం కాదని.. దోపిడికే వ్యతిరేకమని రేవంత్‌ అన్నారు. తెలంగాణ ఆర్థిక వ్యవస్థ అస్తవ్యస్థంగా తయారైందని.. ఆర్థిక వ్యవస్థను దివాల తీయిస్తున్నారని రేవంత్‌ మండిపడ్డారు. ప్రాజెక్ట్‌ల్లో అవినీతి జరుగుతుందని నిరూపిస్తానని.. అమరవీరుల స్థూపం వద్ద బహిరంగ చర్చకు రావాలని సీఎం కేసీఆర్‌కు రేవంత్‌రెడ్డి సవాల్‌ విసిరారు. 

ఇక టీడీపీ నేత రావుల చంద్రశేఖర్‌రెడ్డి కూడా ప్రాజెక్ట్‌ల విషయంపై ప్రభుత్వాన్ని విమర్శించారు. ప్రాజెక్ట్‌ల పేరుతో కోట్ల రూపాయల ప్రజా ధనాన్ని ప్రభుత్వం వృథా చేస్తుందని మండిపడ్డారు. కాళేశ్వరం ప్రాజెక్టు కోసం కేంద్రం నుంచి సాయం చేయాలని ఎలాంటి ప్రతిపాదనలూ రాలేదని కేంద్ర మంత్రి ప్రకటన చేశారని రావుల చెప్పారు. కాళేశ్వరానికి కేంద్రం నుంచి తీసుకురావాల్సిన హామీలను తేవడంలో ప్రభుత్వం విఫలమైందని అన్నారు. టీఆర్ఎస్‌ ప్రభుత్వం కాళేశ్వరం మినహా వేరే ప్రాజెక్టులను పక్కన పెట్టిందని ఆరోపించారు. టీఆర్ఎస్‌ వైఫల్యాలను కప్పిపుచ్చుకోవడానికే చంద్రబాబుపై హరీష్‌రావు అరోపణలు చేస్తున్నారని అన్నారు. చంద్రబాబును తిడితే ఓట్లు పడుతాయనే భ్రమలో టీఆర్‌ఎస్‌ ఉందని రావుల చంద్రశేఖర్‌రెడ్డి మండిపడ్డారు. కాళేశ్వరం ప్రాజెక్ట్‌ పేరుతో నేతలు చేస్తున్న విమర్శలు పొలిటికల్‌ హీట్‌ను మరింతగా పెంచుతున్నాయి. ఎన్నికలు సమీపిస్తుడటంతో నేతలు ఇలాంటి విమర్శలకు దిగుతున్నారని రాజకీయ విశ్లేషకులు అంటున్నారు. 

18:47 - July 31, 2018

హైదరాబాద్ : కాళేశ్వరం ప్రాజెక్టుకు జాతీయ హోదా సాధించడంలో టీఆర్‌ఎస్‌ ప్రభుత్వం విఫలమైందని తెలంగాణ టీడీపీ విమర్శించింది. టీఆర్‌ఎస్‌ సర్కారు ఒక్క కాళేశ్వరం ప్రాజెక్టుపైనే దృష్టి పెడుతూ..  మిగిలిని సాగునీటి పథకాలను విస్మరిస్తోందని టీ టీడీపీ నేత రావుల చంద్రశేఖర్‌రెడ్డి మండిపడ్డారు. 

 

08:59 - July 25, 2018

నిజామాబాద్ : ఒకప్పుడు హస్తం పార్టీకి కంచుకోటగా ఉన్న ఆ జిల్లాలో.. ప్రస్తుతం పార్లమెంట్‌ అభ్యర్థి ఎవరన్న దానిపై సందిగ్దత నెలకొంది. కాంగ్రెస్‌ పార్టీ నుంచి రెండుసార్లు ఎంపీగా ఎన్నికైన ఆయన.... గత ఎన్నికల్లో టీఆర్‌ఎస్‌ చేతిలో ఓటమిపాలయ్యారు. అప్పటి నుంచి ఆ నియోజకవర్గానికి చుట్టపు చూపులా వచ్చి వెళ్తున్నారు. ఏడాదిగా నియోజకవర్గానికి ముఖం చాటేయడంతో... కాంగ్రెస్‌ శ్రేణుల్లో అయోమయం నెలకొంది. ఆ నేత తన లోకల్‌ నియోజకవర్గంపై కన్నేయడంపై అనుమానాలు వ్యక్తమవుతున్నాయి. ఇంతకీ ఆయన రాబోయే ఎన్నికల్లో పాత నియోజకవర్గం నుంచి పోటీచేస్తారా? లేక కొత్త నియోజకవర్గంపై గురి పెడతారా ? ఇంతకీ ఎవరా నాయకుడు? నిజామాబాద్‌ రాజకీయాల్లో తనకంటూ ప్రత్యేకముద్ర వేసుకున్నారు కాంగ్రెస్‌ సీనియర్‌ నేత మధుయాష్కి. అంతేకాదు.. రాహుల్‌ సేనలో కీలక నేతగా ఎదిగారు. ఏఐసీసీ కార్యదర్శిగా కర్ణాటక రాష్ట్ర వ్యవహారాల ఇంచార్జీగా జాతీయ రాజకీయాల్లో సైతం ప్రత్యేక గుర్తింపు సాధించుకున్నారు. ఆయన ఇప్పుడు ప్రస్తుతం రెండు పార్లమెంట్‌ స్థానాలపై కన్నేశారు. అయితే ఏ పార్లమెంట్‌ స్థానం నుంచి పోటీ చేయబోతున్నారన్నది ప్రస్తుతానికి సస్పెన్స్‌గా ఉంది.

2004లో నిజామాబాద్‌ పార్లమెంట్‌ స్థానం నుంచి ఆయన బరిలోకి దిగారు. తొలి ప్రయత్నంలోనే టీడీపీ అభ్యర్థి యూసుఫ్‌ అలీపై 1,37,871 ఓట్ల భారీ మెజార్టీతో తిరుగులేని విజయాన్ని దక్కించుకున్నారు. 2009 ఎన్నికల్లోనూ టీఆర్‌ఎస్‌ అభ్యర్థి గణేష్‌గుప్తాపై 60,390 ఓట్ల మెజార్టీతో విజయకేతనం ఎగురవేశారు. పదేళ్లపాటు నిజమాబాద్‌ ఎంపీగా జిల్లా ప్రజలకు సేవ చేశారు. తెలంగాణ తరపున పార్లమెంట్‌లో తన గళం వినిపించారు. అయితే 2014 ఎన్నికల్లో కల్వకుంట్ల కవిత చేతిలో... 1,67,184 కోట్ల తేడాతో ఓటమి చవిచూశారు. అప్పటి నుంచి ఆయన నిజామాబాద్‌ నియోజకవర్గానికి చుట్టంలా మారిపోయారు. మూడేళ్లపాటు అడపాదడపా వచ్చిపోయిన ఆయన... ఏడాదిగా మొహం చాటేశారు. కర్నాటక ఎన్నికల ఇంచార్జీగా బాధ్యతలు తీసుకోవడంతో రాలేకపోతున్నారని ఆయన అనుచరులు చెప్పుకొస్తున్నారు. ఐతే నెలల తరబడి నియోజకవర్గానికి ముఖం చాటేయడానికి అసలు కారణం ఏమిటన్న దానిపై పార్టీలో జోరుగా చర్చ సాగుతోంది.

నిజామాబాద్‌ ఎంపీ అభ్యర్థిగా టీఆర్‌ఎస్‌ తరపున కవిత మరోసారి తన అదృష్టం పరీక్షించుకోనుంది. బీజేపీ నుంచి ధర్మపురం అరవింద్‌ అభ్యర్థిత్వం దాదాపుగా ఖరారైందనే ప్రచారం జరుగుతోంది. టీఆర్‌ఎస్‌ - బీజేపీ నేతలు పోటాపోటీగా నియోజకవర్గాన్ని చుట్టొస్తున్నారు. బూత్‌ కమిటీ సమావేశాలతో కవిత పార్టీ శ్రేణుల్లో జోష్‌ నింపుతుండగా... పాదయాత్రలు, పార్టీ కార్యక్రమాలతో బీజేపీనేత అరవింద్‌ వరుస కార్యక్రమాలు చేస్తూ ప్రజల్లో ఉంటున్నారు. కానీ కాంగ్రెస్‌ నుంచి మాత్రం చడీ చప్పుడు లేదు. అభ్యర్థి ఎవరన్న దానిపై స్పష్టత లేక హస్తంపారటీ నుంచి నేతలు నిజామాబాద్‌ పార్లమెంట్‌రేసులో కాస్త వెనుకబడ్డారు. కాంగ్రెస్‌ అభ్యర్థిగా మధుయాష్కీ ఎంపీగా పోటీ చేస్తారా.. లేక తన సొంత నియోజకవర్గంగా ఉన్న భువనగిరి నుంచి బరిలో నిలుస్తారా అన్నది అంతుచిక్కక కార్యకర్తల్లో అయోమయం నెలకొంది. భువనగిరి పార్లమెంట్‌ స్థానానికి మధుయాష్కీ స్థానిక అభ్యర్థి కావడం.. బీసీ, గౌడ సామాజిక వర్గం ఓట్లు ఎక్కువగా ఉండడంతో.. మధుయాష్కీ రాబోయే ఎన్నికల్లో భువనగిరి పార్లమెంట్‌ అభ్యర్థిగా పోటా చేస్తారనే ప్రచారం పార్టీలో జోరుగా సాగుతోంది. అయితే ఆయన అనుచరులు మాత్రం నిజామాబాద్‌ నుంచే పోటీ చేస్తారని చెబుతున్నారు.

ఏఐసీసీ కార్యదర్శిగా.. కర్నాటక రాజకీయ వ్యవహారాల ఇంచార్జీగా... రాహుల్‌ సేనలో కీలకపాత్ర పోషిస్తున్న మధుయాష్కీ.... పార్టీ కార్యక్రమాల్లోబిజీగా ఉన్నా... నియోజకవర్గానికి ముఖం చాటేయడంపట్ల ప్రజల్లో, పార్టీ శ్రేణుల్లో గందరగోళం నెలకొంది. ఆయన వచ్చే ఎన్నికల్లో భువనగిరిపై గురిపెడతారా? ఇందూరు గడ్డపై కాంగ్రెస్‌ జెండా రెపరెపలాడిస్తారా అన్నది తెలియడం లేదు. ఇంతకీ మధుయాష్కి మదిలో ఏమున్నదో అంతుచిక్కడం లేదు. ఆయన ఎక్కడి నుంచి పోటీ చేస్తారన్నది మరికొన్ని రోజుల్లో తేలనుంది.

17:33 - July 23, 2018

కరీంనగర్ : ఎంపీ వినోద్ కుమార్ పై కాంగ్రెస్ సీనియర్ నేత పొన్నం ప్రభాకర్ మండిపడ్డారు. పార్లమెంట్ లో బీజేపీతో టీఆర్ఎస్ కుమ్మక్కై...ప్రజా సమస్యలపై నోరు మెదపలేదని, ఏపీకి ప్రత్యేక హోదా ఇచ్చే విషయంలో కాంగ్రెస్ కట్టుబడి ఉందని మరోసారి స్పష్టం చేశారు. రాష్ట్ర విభజన సమయంలో కేసీఆర్ తో సహా తెలంగాణ నేతలందరూ ఏపీకి ఏమి ఇచ్చిన ఫర్వాలేదని చెప్పి ఇప్పుడెందుకు పట్టించుకోవడం లేదని ప్రశ్నించారు. 

10:29 - July 21, 2018

మహబూబ్ నగర్ : జూరాల ప్రాజెక్టు నిండుకుండను తలపిస్తోంది. ప్రియదర్శిని జూరాల ప్రాజెక్టు జలకళతో ఉట్టిపడుతోంది. ఎగువ ప్రాంతం నుండి భారీగా వరద నీరు ప్రవహిస్తోంది. 17 గేట్లను తెరిచిన అధికారులు 1 లక్షా 80 వేల క్యూసెక్కుల నీటిని దిగువకు విడుదల చేశారు. జూరాల కుడి..ఎడమ కాల్వలు..నెట్టెంపాడు..కోయిల్ సాగర్, భీమా సమాంతర కాల్వలకు నీరు విడుదల చేశారు. 

19:40 - July 19, 2018

మహబూబ్ నగర్ : కృష్ణానది ఎగువన ఉన్న ఆల్మట్టి, నారాయణపూర్ డ్యామ్‌లు జలకళను సంతరించుకున్నాయి. ఆల్మట్టి పూర్తి సామర్థ్యం 129.72 టీఎంసీలు కాగా ప్రస్తుతం 113.40 టీఎంసీల నీరు నిల్వ ఉంది. నారాయణపూర్ ప్రాజెక్టు కూడా దాదాపు పూర్తిస్థాయి నీటిమట్టానికి చేరుకున్నది. ఎగువ రాష్ట్రాల్లో కురుస్తున్న భారీ వర్షాలతో జూరాల రిజర్వాయర్‌కు వరద నీరు పోటెత్తుతోంది. జూరాల ఇన్‌ఫ్లో 65 వేల క్యూసెక్కులు కాగా ఔట్‌ఫ్లో 29 వేల 495 క్యూసెక్కులుగా ఉంది. 

 

07:51 - July 14, 2018

హైదరాబాద్ : తెలంగాణ ఎంసెట్ లీకేజ్ కేసులో తీగ లాగితే డొంక కదులుతోంది. ఇప్పటికే వంద మందిని విచారించిన సీఐడీ.. కార్పొరేట్ కళాశాలకు చెందిన డీన్‌తోపాటు.. ఓ ఏజెంట్‌ను అదుపులోకి తీసుకుని కీలక విషయాలను రాబట్టారు. ఇందులో అసలు సూత్రదారులను కనిపెట్టేందుకు సీఐడీ ఆరా తీస్తోంది.
ఎంసెట్-2 లీకేజ్ స్కామ్‌ దర్యాప్తులో వేగం 
దేశ వ్యాప్తంగా సంచలనం సృష్టించిన 2016 తెలంగాణ ఎంసెట్-2 లీకేజ్ స్కామ్‌ దర్యాప్తులో సీఐడీ మళ్ళీ వేగం పెంచింది... మొదట్లో వేగంగా అరెస్టులు చేసినా.. తర్వాత కేసు దర్యాప్తులో స్పీడ్‌ తగ్గించింది. కానీ తాజాగా ఓ కార్పొరేట్ కాలేజ్ డీన్ వాసుబాబు, ఏజెంట్ వెంకటశివనారాయణ అరెస్ట్‌తో సీఐడీ మళ్ళీ దూకుడు పెంచింది. ఈ కేసులోఇప్పటికే  అధికారులు వంద మందిని పైగా విచారించారు.
కార్పొరేట్ కాలేజీల గుట్టు విప్పే దిశగా సీఐడీ అడుగులు
కార్పొరేట్ కాలేజీల గుట్టు విప్పే దిశగా సీఐడీ అడుగులేస్తోంది. డీన్ వాసుబాబును, మధ్యవర్తి శివనారాయణరావును కష్టడీకి తీసుకున్న అధికారులు మొదటి దఫా విచారించారు. ఆరు క్యాంపుల్లో శిక్షణ పొందిన దాదాపు 136 మంది విద్యార్థుల వాంగ్ములాలను రికార్డ్ చేశారు. ఒక్కో విద్యార్థి నుంచి 35 లక్షలు వసూలు చేసినట్లు వాసుబాబు, శివనారాయణ వెల్లడించారు. కానీ మొత్తం డబ్బులు తాము తీసుకోలేదని వారు అధికారులకు వివరించారు.
మెడికో గణేష్ ప్రసాద్ స్టేట్ మెంట్ తో బట్టబయలైన భాగోతం
మెడికో గణేష్ ప్రసాద్ ఇచ్చిన స్టేట్ మెంట్ తో వాసుబాబు, వెంకటశివనారాయణ భాగోతం బట్టబయలైంది. ఆరుగురు మెడికోలు.. తాము మాఫియాతో చేతులు కలిపామని విచారణలో వెల్లడించారు. బెంగుళూర్, భువనేశ్వర్, చెన్నై , డిల్లీలో క్యాంపులు ఏర్పాటు చేసి లీకైన ప్రశ్న పత్రాన్ని ప్రిపేర్‌ చేయించినట్లు వెల్లడైంది. ప్రతి ఏటా ఎంసెట్ సమయంలో వాసు బాబు, శివ నారాయణ, గణేష్‌లు  ఇదే కేసులో నిందితులైన ఇద్దరు డాక్టర్లతో కలిసి తతంగం నడిపినట్లు తేలింది. మరి కొందరు విద్యార్థులతో 30 నుంచి 45 లక్షల వరకు డబ్బులు తీసుకుని క్యాంపు లు నిర్వహించినట్లు సీఐడీ భావిస్తుంది ..ఈ కేసును పూర్తిగా చేధించేందుకు మరో ఐదు రోజులు పాటు ఇద్దరు నిందితులను విచారించనున్నారు అధికారులు.  ఇందులో అసలు సూత్రదారి ఎవరు అన్న కోణంలో విచారిస్తున్నారు. 

 

16:23 - July 12, 2018

ఢిల్లీ : కాంగ్రెస్ నేత శశి థరూర్ సంచలన వ్యాఖ్యలు చేశారు. 2019 లోక్ సభ ఎన్నికల్లో బీజేపీ అధికారంలోకి వస్తే భారత్ కాస్తా 'హిందూ - పాక్' గా మారిపోతుందని వివాదాస్పద వ్యాఖ్యలు చేశారు. తిరువనంతపురంలో జరిగిన ఓ కార్యక్రమంలో పాల్గొన్న ఆయన పాకిస్తాన్ లా భారత్ ను మార్చేందుకు బీజేపీ కొత్త రాజ్యాంగం తయారు చేస్తోందని..దీనితో మైనార్టీల హక్కులు అణిచివేయబడుతాయన్నారు. గాంధీ, నెహ్రూ, సర్దార్ వల్లభాయ్ పటేల్, ఆజాద్ వంటి స్వాతంత్ర సమరయోధుల ఆంక్షలకు అది విరుద్ధమన్నారు. థరూర్ వ్యాఖ్యలపై బీజేపీ మండిపడింది. రాహుల్ క్షమాపణలు చెప్పాలని, హిందూవులకు చెడ్డ పేరు తెచ్చే విధంగా ప్రయత్నిస్తున్నారని విమర్శించింది. 

21:08 - July 11, 2018

హైదరాబాద్ : పంచాయితీల్లో బీసీ రిజర్వేషన్ల విషయంలో సుప్రీం కోర్టుకు వెళ్లేందుకు తెలంగాణ ప్రభుత్వం కసరత్తు చేస్తోంది. స్థానిక సంస్థల ఎన్నిక‌ల్లో రిజర్వేషన్లు 50 శాతం క‌న్నా మించ‌వ‌ద్దని ఇటీవ‌ల హైకోర్టు ఇచ్చిన తీర్పుపై మంత్రి జూపల్లి కృష్ణారావు అధ్యక్షతన భేటీ అయిన మంత్రివ‌ర్గ ఉప సంఘం కూలంకుశంగా చ‌ర్చించింది. ఎట్టి ప‌రిస్థితుల్లోనూ బీసీ రిజ‌ర్వేష‌న్లను 34 శాతం క‌న్నా త‌గ్గకుండా చూడాల‌ని మంత్రుల సబ్ కమిటీ తీర్మానించింది. గతంలో సుప్రీం కోర్టు ఇచ్చిన తీర్పును యాథాతథంగా అమలు చేయాలని కోరేందుకు సిద్ధమవుతున్నారు. ఇక అగస్టు ఒకటితో పంచాయితీల కాలపరిమితి ముగుస్తుండటంతో స్పెషల్ అఫీసర్లను వేసే అంశంపై ముఖ్యమంత్రి కేసీఆర్ నిర్ణయం తీసుకుంటారని మంత్రి వర్గఉప సంఘం అభిప్రాయపడింది.

ఎట్టి ప‌రిస్థితుల్లోనూ బీసీ రిజ‌ర్వేష‌న్లను 34 శాతం క‌న్నా త‌గ్గకుండా చూడాల‌ని మంత్రుల సబ్‌ కమిటీ తీర్మానించింది. స్థానిక సంస్థల ఎన్నిక‌ల్లో రిజర్వేషన్లు 50 శాతం క‌న్నా మించ‌వ‌ద్దని ఇటీవ‌ల హైకోర్టు ఇచ్చిన తీర్పుపై పంచాయతీ రాజ్‌, గ్రామీణాభివృద్ధి శాఖ మంత్రి జూపల్లి కృష్ణారావు అధ్యక్షతన సెక్రటేరియట్‌లో భేటీ అయిన మంత్రివ‌ర్గ ఉప సంఘం కూలంకుశంగా చ‌ర్చించింది.

ఈ నెలాఖ‌రుతో పాల‌క‌వ‌ర్గాల ప‌ద‌వీకాలం ముగియ‌నున్న నేప‌థ్యంలో ఈలోపు ఎన్నిక‌లు నిర్వహించ‌లేని ప‌రిస్థితుల్లో తీసుకోవాల్సిన చ‌ర్యల‌పై కూడా సబ్‌కమిటీ చ‌ర్చించింది. గ‌త‌ పంచాయ‌తీ ఎన్నిక‌ల సంద‌ర్భంగా 61 శాతం రిజ‌ర్వేష‌న్లను క‌ల్పించుకునే వెసులుబాటు సుప్రీంకోర్టు ఇచ్చింద‌ని...ఈ సారి కూడా 50 శాతం రిజ‌ర్వేష‌న్లను మించ‌కూడదంటూ హైకోర్టు ఇచ్చిన తీర్పుపై సుప్రీంకోర్టుకు వెళ్లాల‌ని నిర్ణయించిన‌ట్లు మంత్రి ఈటల రాజేంద‌ర్ తెలిపారు. బీసీలకు ఉన్న 34 శాతం రిజర్వేషన్లను రానున్న పంచాయ‌తీ ఎన్నిక‌ల్లో ఎట్టి పరిస్థితుల్లోనూ తగ్గకుండా చూడ‌టానికి సుప్రీం కోర్టును ఆశ్రయించాల‌ని నిర్ణయించిన‌ట్లు ఈటల తెలిపారు.

జూలై 31 తో సర్పంచ్‌ల పదవీకాలం ముగుస్తుంద‌ని...ఆ తర్వాత స్పెషల్ ఆఫీసర్లకు బాధ్యత‌లు అప్పగించాలా లేక పాల‌క‌వ‌ర్గం పదవీకాలం పొడిగించాలా అన్నదానిపై కేబినెట్లో చర్చించి నిర్ణయం తీసుకుంటామ‌న్నారు. దీనితో పాటు బీసీ గ‌ణ‌న విష‌యంలో హైకోర్టు ఇచ్చిన తీర్పుపై ఎలా ముందుకు వెళ్లాల‌న్నది కూడా కేబినెట్లో చ‌ర్చించి నిర్ణయం తీసుకుంటామ‌ని తెలిపారు. రిజర్వేషన్ అంశంపై రాష్ట్రాలకు అధికారం ఇవ్వాలని ఇప్పటికే కేంద్రాన్ని కోరామ‌ని, దీనిపై మరోసారి కేంద్రానికి విజ్ఞప్తి చేయాల‌ని స‌బ్ క‌మిటీ నిర్ణయించిన‌ట్లు మంత్రి జూప‌ల్లి కృష్ణారావు తెలిపారు.

ఇక బీసీలకు 34 శాతం రిజర్వేషన్లు అమలు చేసేలా ప్రభుత్వం సుప్రీం కోర్టులో తమ వాదనలు గట్టిగా వినిపించాలని బీసీ సంక్షేమ సంఘం నేత ఆర్.కృష్టయ్య ప్రభుత్వాన్ని డిమాండ్ చేశారు. 50 శాతం రిజర్వేషన్లనేవి విద్యా, ఉద్యోగాలపై మాత్రమేనని.. రాజకీయాలకు సంబంధం లేదని ప్రభుత్వం అంటోంది. ఇక తమిళనాడు 69 శాతం ఉన్నపుడు ఒక్కో రాష్ట్రంలో ఒక్కక్క విధంగా ఎందుకు ఉండాలనే వాదనను సుప్రీం కోర్టులో వినిపిస్తామని చేప్తోంది.

Pages

Don't Miss

Subscribe to RSS - telangana news updates