telangana politics

16:32 - October 11, 2018

హైదరాబాద్: తెలంగాణ అసెంబ్లీ ఎన్నికలకు డేట్ ఫిక్స్ అయింది. అన్ని పార్టీలు గెలుపు కోసం వ్యూహలు రచిస్తున్నాయి. టీఆర్ఎస్‌ను ఢీ కొట్టేందుకు ప్రతిపక్షాలు సిద్ధమవుతున్నాయి. అయితే ఎన్నడూ లేని విధంగా తెలంగాణలో తెలుగుదేశం పార్టీ ఇబ్బందులు ఎదుర్కొంటోంది. ఉమ్మడి ఆంధ్రప్రదేశ్ రాష్ట్రంలో అటు ఏపీలోనూ ఇటు తెలంగాణలోనూ టీడీపీ తన సత్తా చాటుకుంది. ఏ పార్టీకి లేని విధంగా తెలంగాణలో టీడీపీకి బలమైన క్యాడర్ ఉంది. అదే టీడీపీకి ప్లస్. కాగా రాష్ట్ర విభజన తర్వాత చంద్రబాబు నాయుడు ఏపీకే పరిమితం కావడం తెలంగాణలో టీడీపీకి మైనస్ అయింది. అదే సమయంలో తెలంగాణ సెంటిమెంట్ టీఆర్ఎస్‌కు కలిసొచ్చింది. ఆ కారణంగా టీఆర్ఎస్‌కు అత్యధిక స్థానాలు రావడం అధికారం దక్కడం జరిగిపోయాయి. ఆ తర్వాత చోటు చేసుకున్న రాజకీయ పరిణామాల నేపథ్యంలో తెలుగుదేశం పార్టీ మరింత బలహీనపడింది. ఓవైపు ఎన్నికల్లో వరుస ఓటములు.. దీనికి తోడు వలసలు. ఒక్కొక్కరుగా ఎమ్మెల్యేలు చేజారిపోయారు. తెలంగాణ రాష్ట్రంలో తెలుగుదేశం పార్టీ ప్రస్తుతం గడ్డు పరిస్థితిని ఎదుర్కొంటోంది. Image result for l ramana

2014 సార్వత్రిక ఎన్నికల్లో తెలంగాణలో తెలుగుదేశం పార్టీ 72స్థానాల్లో పోటీ చేస్తే 15 అసెంబ్లీ స్థానాలు దక్కాయి. ఒక ఎంపీ స్థానాన్ని కైవసం చేసుకుంది. గత ఎన్నికల్లో టీడీపీ ఓటింగ్ శాతం 14.66గా ఉంది. కాగా గులాబీ ఆకర్ష్ కారణంగా తెలుగుదేశం టికెట్ మీద గెల్చిన ఎమ్మెల్యేలంతా సైకిల్ దిగి కారెక్కారు. చివరకు టీడీపీకి ఇద్దరు ఎమ్మెల్యేలు మాత్రమే మిగిలారు. సండ్ర వెంటక వీరయ్య(సత్తుపల్లి), ఆర్ క్రిష్ణయ్య(ఎల్బీనగర్). టీడీపీలో ఫైర్ బ్రాండ్‌గా గుర్తింపు పొందిన రేవంత్ రెడ్డి సైతం పార్టీని వీడి కాంగ్రెస్‌లో చేరారు. దీంతో తెలంగాణలో టీడీపీ పరిస్థితి అగమ్యగోచరంగా మారింది.

ఈ పరిస్థితుల్లో తెలంగాణ ముందస్తు ఎన్నికలకు తెలుగుదేశం పార్టీ సిద్ధమవుతోంది. అయితే ఈసారి ఒంటరిగా కాకుండా మహాకూటమి పేరుతో బరిలోకి దిగుతోంది. కాంగ్రెస్‌, తెలంగాణ జనసమితి, సీపీఐలతో కలిసి ఎన్నికల బరిలోకి దిగబోతోంది. అయితే మహాకూటమిలో ఇంకా సీట్ల సర్దుబాటు అంశం ఓ కొలిక్కి రాలేదు. సీట్ల సర్దుబాటుపై మిత్రుల మధ్య ఏకాభిప్రాయం కుదరడం లేదు. దీంతో ఎవరికి ఎన్ని సీట్లు దక్కుతాయన్నది క్లారిటీ లేదు. మరో రెండు రోజుల్లో ఈ అంశంపై స్పష్టత వచ్చే అవకాశం ఉందని తెలుస్తోంది. సీట్ల సర్దుబాటు తర్వాతే తమ అభ్యర్థులను ప్రకటిస్తామని పార్టీలు చెబుతున్నాయి.

జిల్లాలు గెలిచిన స్థానాలు
రంగారెడ్డి 7
హైదరాబాద్ 3
మహబూబ్‌నగర్ 2
వరంగల్ 2
ఖమ్మం 1

          

2014లో టీడీపీ గెలిచిన అసెంబ్లీ స్థానాలు 15
ఎంపీ స్థానాలు 1
ఓటింగ్ శాతం 14.66

 

 

 

 

మరోవైపు టీఆర్ఎస్ మాత్రం దూకుడు మీదుంది. ఇప్పటికే 105 అసెంబ్లీ స్థానాలకు అభ్యర్థులను ప్రకటించిన కేసీఆర్.. ఎన్నికల ప్రచారాన్ని కూడా ముమ్మరం చేశారు. ప్రతిపక్షాల కన్నా చాలా ముందు ఉన్నారు. తెలంగాణలో తెలుగుదేశం పార్టీకి బలమైన క్యాడర్ ఉంది. కానీ సరైన నాయకత్వమే లేదు. ఈ లోపం కారణంగానే టీడీపీ చతికలపడుతోందని రాజకీయ విశ్లేషకులు అంటున్నారు. మరి తెలుగుదేశం పార్టీ ఆ లోపాన్ని ఎలా అధిగమిస్తుందో చూడాలి. 

2014 టీడీపీ ఎమ్మెల్యేలు
సండ్ర వెంకట వీరయ్య -సత్తుపల్లి
ఆర్.కృష్ణయ్య -ఎల్బీనగర్
రేవంత్ రెడ్డి -కొడంగల్
రాజేందర్ రెడ్డి -నారాయణ్ పేట్
వివేకానంద గౌడ్ కుత్బుల్లాపూర్
కృష్ణా రావు కూకట్ పల్లి
కిషన్ రెడ్డి ఇబ్రహీంపట్నం
క్రిష్ణా రెడ్డి మహేశ్వరం
ప్రకాశ్ గౌడ్, రాజేంద్రనగర్
ఎ.గాంధీ శేరిలింగం పల్లి
ఎర్రబెల్లి దయాకర్ రావు పాలకుర్తి
చల్లా ధర్మారెడ్డి పరకాల
శ్రీనివాస్ యాదవ్, సనత్ నగర్
సాయన్న, కంటోన్‌మెంట్
మాగంటి గోపీనాథ్ జూబ్లీహిల్స్

     


 

 

14:21 - August 27, 2018

కరీంనగర్ : కొంగర కలాన్‌లో జరగబోయే ప్రగతినివేదన సభ సందర్భంగా ఉమ్మడి కరీంనగర్‌ జిల్లాలో ఎన్నికల వాతావరణం నెలకొంది. సభకు భారీగా జనసమీకరణ చేయడమే లక్ష్యంగా పార్టీ నేతలు ముందుకు సాగుతున్నారు. వచ్చే ఎన్నికల్లో అధిష్టానానికి తమ సత్తాను చూయించేందుకు సిట్టింగ్‌ ఎమ్మెల్యేలు సిద్ధమవుతున్నారు. ప్రగతి నివేదన సభకు జనసమీకరణ చేస్తూ మరో వైపు అభివృద్ధి మంత్రం జపిస్తూ అధికార పార్టీ నేతలు ఎన్నికలకు సమాయత్తం అవుతున్నారు. సభను విజయవంతం చేయడానికి ఉమ్మడి కరీంనగర్‌ జిల్లా నేతలు ప్రణాళికలు సిద్ధం చేసుకోవడంతో ఆయా నియోజకవర్గాల్లో ఎన్నికల వాతావరణం కనిపిస్తోంది.

జిల్లాలోని 13 నియోజకవర్గాలు 12 టీఆర్‌ఎస్‌వే కావడంతో కాంగ్రెస్‌ ప్రాతినిథ్యం వహిస్తోన్న జగిత్యాల జిల్లా నుండి పెద్ద ఎత్తున జనాలను సభకు తరలించేందుకు గులాబీ శ్రేణులు సిద్ధమవుతున్నాయి. మొత్తం రెండున్నర లక్షల మందిని సభకు తీసుకెళ్లేందుకు మంత్రులు ఈటెల రాజేందర్‌, కేటీఆర్‌ ప్రణాళికలు సిద్ధం చేశారు. ఇందుకోసం పార్టీ క్యాడర్‌ ను అలర్ట్‌ చేసి నేతలంతా విబేధాలు వీడి పని చేయాల్సిందిగా మంత్రులు ఉపదేశం చేస్తున్నారు.

మరోవైపు ముఖ్యమంత్రి కేసీఆర్‌ అసెంబ్లీ సమావేశాలని రద్దు చేసే అవకాశం ఉందని గులాబీ శ్రేణులు భావిస్తున్నాయి. దీంతో ప్రగతి నివేదన సభకు జనసమీకరణ కోసం జరిగే సమావేశాలు, కార్యక్రమాలను ఎన్నికల సమాయత్తానికి కూడా వినియోగించుకోవాలని వ్యూహం రచించారు. గ్రామ, మండల స్థాయిలో సమావేశాలు నిర్వహించి....నాలుగేళ్లలో తెలంగాణ ప్రభుత్వం చేసిన అభివృద్ధి, సంక్షేమ కార్యక్రమాలను వివరించాలని నిర్ణయించారు. అలాగే తాగు, సాగు నీటి ప్రాజెక్టుల ప్రగతిని వివరిస్తూ ప్రజలను ఓటర్లుగా మార్చుకోవడమే లక్ష్యంగా పెట్టుకున్నారు.

అయితే ఈ సారి నలుగురు శాసనభ్యులకు టికెట్లు లభించకపోవచ్చని ప్రచారం జరుగుతున్న నేపథ్యంలో సీఎం కేసీఆర్‌ రాష్ట్ర వ్యాప్తంగా నాలుగైదు సీట్లు మార్చే అవకాశం ఉందని స్పష్టం చేశారు. దీంతో ఆశావహులు పార్టీ అభివృద్ధి కోసం పని చేయాల్సిందిగా జిల్లా మంత్రులు గులాబీ శ్రేణులకు సూచనలు చేస్తున్నారు. తమకు బలమైన పోటీనిచ్చే కాంగ్రెస్‌ నేతలను ప్రగతినివేదన సభల ప్రచారంలో తిప్పికొట్టాలని గులాబీ నేతలు భావిస్తున్నారు. వచ్చే ఎన్నికల్లో 13 నియోజకవర్గాల్లో టీఆర్‌ఎస్‌ విజయదుందుభి మోగిస్తుందని ఆశాభావం వ్యక్తం చేశారు మంత్రి ఈటల రాజేందర్‌...

కేసీఆర్‌ సెంటిమెంట్‌ జిల్లాల్లో అధిక సీట్లు సాధించేందుకు పట్టు వదలకుండా టీఆర్‌ఎస్‌ ముందుగానే ప్రచారం మొదలు పెట్టింది. ప్రగతి నివేదన సభకు రెండున్నర లక్షల మందిని తరలించేందుకు అవసరమైన ఏర్పాట్లు చేస్తున్నారు. టీఆర్ఎస్‌ నేతలు చేస్తున్న సభ ఏర్పాట్లు ఎన్నికల వాతావరణాన్ని తలపిస్తోంది. ముందస్తు లేదంటూనే ప్రతిపక్షాలను మభ్య పెడుతూ విజయాన్ని సొంతం చేసుకోవాలనుకుంటున్న టీఆర్‌ఎస్‌ ఎత్తులు ఏ మేరకు ఫలిస్తాయో వేచి చూడాలి. 

14:45 - August 26, 2018

వరంగల్ : సెప్టెంబర్ 2వ తేదీన టీఆర్ఎస్ నిర్వహించే 'ప్రగతి నివేదన' సభను విజయవంతం చేసేందుకు వరంగల్ జిల్లాలో గ్రామ స్థాయి నాయకుల నుండి రాష్ట్ర స్థాయి నాయకుల వరకు పనుల్లో నిమగ్నమైనారు. జిల్లా నుండి 2.5 లక్షల మందిని సభకు తరలించేందుకు ఏర్పాట్లు చేస్తున్నట్లు, టీఆర్ఎస్ చేపట్టిన అభివృద్ధి పథకాలను సభలో వివరిస్తామని ఎంపీ సీతారాం నాయక్ పేర్కొన్నారు. ఆయనతో టెన్ టివి ముచ్చటించింది. హరితప్లాజ్ లో మంత్రి కడియం శ్రీహరి నేతృత్వంలో నేతలు సమావేశమవుతామని, సభకు వచ్చేందుకు ప్రజలు ఆసక్తి చూపుతున్నారని తెలిపారు. మరింత సమాచారం కోసం వీడియో క్లిక్ చేయండి. 

13:21 - August 26, 2018

ఉమ్మడి నిజామాబాద్‌ : జిల్లాలో తామూ ఎమ్మెల్యేలుగా పోటీకి సిద్ధమంటున్నారు ఎమ్మెల్సీలు. అధికార, ప్రతిపక్ష పార్టీలకు చెందిన ఎమ్మెల్సీలు పెద్ద ఎత్తున నిధులు ఖర్చు చేస్తూ.. క్యాడర్‌ను పెంచుకునే పనిలో పడ్డారు. ఒక్క ఛాన్స్‌ అంటూ తమ గాఢ్ ఫాదర్ల చుట్టు ప్రదక్షిణలు కూడా చేస్తున్నారు. ఇక నియోజకవర్గాలపై ఎమ్మెల్సీల కన్ను పడటంతో సిట్టింగ్‌లు అలర్ట్‌ అయ్యారు. హీట్‌ పుట్టిస్తున్న నిజామాబాద్ పాలిటిక్స్‌ స్పెషల్‌ స్టోరీ. 
ఎన్నికలకు రెడీ అవుతున్న ఎమ్మెల్సీలు
ముందస్తు ఎన్నికలకు ఎమ్మెల్యేలతో పాటు ఎమ్మెల్సీలు రెడీ అవుతున్నారు. తాము ఎమ్మెల్యేలుగా పోటీ చేస్తామంటూ నిజామాబాద్‌ జిల్లాలోని ఎమ్మెల్సీలు సిద్ధమయ్యారు. అందుకు తగ్గట్లు ఏర్పాట్లు కూడా చేసుకుంటున్నారు. ఉమ్మడి నిజామాబాద్ జిల్లాలో ఐదుగురు శాసన మండలి సభ్యులు ఉండగా.. అధికార పార్టీకి ముగ్గురు ఎమ్మెల్సీలు, కాంగ్రెస్ పార్టీ నుంచి మరో ఇద్దరు ఎమ్మెల్సీలు ఉన్నారు. ఓ మాజీ ఎమ్మెల్సీతో పాటు నలుగురు ఎమ్మెల్సీలు ప్రత్యక్ష ఎన్నికల్లో పోటీ చేయటం కోసం ఉవ్విళ్లూరుతున్నారు. ప్రోటోకాల్ పరంగా ముందు వరుసలో ఉన్నా.. తెలంగాణ ఏర్పడ్డాక నియోజకవర్గానికి ఎమ్మెల్యే పవర్ ఫుల్ అయ్యారు. అభివృద్ది కార్యక్రమాలు ఎమ్మెల్యేల కనుసన్నల్లోనే జరుగుతున్నాయి. ఇది గమనించిన ఎమ్మెల్సీలు ఎమ్మెల్యేగా పోటీ చేసేందుకు సర్వశక్తులు ఒడ్డుతున్నారు. ఎమ్మెల్సీగా ఉన్నా నియోజకవర్గం లేకపోవడంతో ఎమ్మెల్యేగా పోటీ చేసేందుకు ఆసక్తి చూపుతున్నారు. 
నిజామాబాద్‌పై కన్నేసిన భూపతిరెడ్డి
ఉమ్మడి జిల్లాలో స్థానిక సంస్ధల కోటాలో ఎమ్మెల్సీగా ఎన్నికైనా టీఆర్ఎస్ అభ్యర్థి డాక్టర్ భూపతిరెడ్డి నిజామాబాద్‌ నియోజకవర్గంపై కన్నేశారు. సిట్టింగ్ ఎమ్మెల్యే బాజిరెడ్డితో ఢీ అంటే ఢీ అంటున్నారు. ఎమ్మెల్యేకు ధీటుగా కార్యక్రమాల్లో పాల్గొంటూ.. అభివృద్ధి నిధులను ఖర్చు చేసి క్యాడర్ పెంచుకుంటున్నారు. ఇక భూపతి రెడ్డికి చెక్ పెట్టేందుకు సిట్టింగ్‌ ఎమ్మెల్యే బాజిరెడ్డి ప్రయత్నాలు ముమ్మరం చేశారు. భూపతి రెడ్డి పార్టీ వ్యతిరేఖ కార్యక్రమాలకు పాల్పడుతున్నారంటూ.. ఆయన్ని పార్టీ నుంచి సస్పెండ్ చేయాలని సీఎం కేసీఆర్‌ను కోరారు. అయితే భూపతిరెడ్డిపై ఎలాంటి చర్యలు తీసుకోకపోవటంతో ఆయన మరింత ఉత్సాహంతో పోటీకి సిద్ధమవుతున్నారు. ఒకవేళ పార్టీ చర్యలు తీసుకుంటే కాంగ్రెస్ నుంచి కానీ, స్వతంత్ర అభ్యర్థిగానైనా పోటీకి చేయాలని ఎమ్మెల్సీ భూపతిరెడ్డి చూస్తున్నారు.
జుక్కల్‌పై కన్నేసిన ఎమ్మెల్సీ రాజేశ్వర్‌ 
ఇక అధికార పార్టీ మరో సీనియర్‌ ఎమ్మెల్సీ రాజేశ్వర్.. జుక్కల్ నియోజకవర్గంపై కన్నేశారు. నియోజకవర్గంలో జరిగే కార్యక్రమాల్లో చురుకుగా పాల్గొంటూ.. ఎమ్మెల్యేగా పోటీ చేస్తానని కార్యకర్తలకు చెబుతున్నారు. మరో ఎమ్మెల్సీ వీజీ గౌడ్ పార్టీ కార్యక్రమాల్లో పాల్గొంటున్నా.. అవకాశం వస్తే పోటీ చేస్తానని.. లేదంటే తటస్థంగా ఉంటానని చెబుతున్నారు. 
కాంగ్రెస్‌కు జిల్లాలో ఇద్దరు ఎమ్మెల్సీలు 
ఇక ప్రధాన ప్రతిపక్షం కాంగ్రెస్‌కు జిల్లాలో ఇద్దరు ఎమ్మెల్సీలు ఉన్నారు. వీరిద్దరికి ఎమ్మెల్యేగా పనిచేసిన అపార అనుభవం  ఉంది. వీరిలో ఒకరు శాసన మండలి ప్రతిపక్ష నేత షబ్బీర్ అలీ కాగా... మరొకరు ఆకుల లలిత. షబ్బీర్ అలీ కామారెడ్డి నుంచి పలు దఫాలుగా ఎమ్మెల్యేగా ఎన్నికై.. ఉమ్మడి రాష్ట్రంలో మంత్రిగా కీలక పదవులు నిర్వహించారు. గత ఎన్నికల్లో ఓటమి పాలైన షబ్బీర్.. కామారెడ్డి నుంచి మరోసారి అదృష్టం పరీక్షించుకుంనేందుకు సిద్ధమయ్యారు. ఎన్నికలను దృష్టిలో పెట్టుకుని గత కొన్ని రోజులుగా నియోజకవర్గంలో విస్తృతంగా పర్యటిస్తున్నారు. దాదాపు ఆయనకు టిక్కెటు ఖాయం అయినట్లు తెలుస్తోంది. మరో ఎమ్మెల్సీ ఆకుల లలిత..  ఎమ్మెల్యేగా పోటీ చేసేందుకు ఉవ్విళ్లూరుతున్నారు. నిజామాబాద్ అర్బన్, రూరల్, ఆర్మూర్ నియోజకవర్గాలపై లలిత కన్నేశారు. మూడు నియోజకర్గాల్లో విస్తృతంగా పర్యటిస్తూ.. నిధులను ఖర్చు చేస్తున్నారు. బలమైన సామాజిక వర్గానికి చెందిన నాయకురాలు కావడంతో.. పార్టీ కూడా ఆమెవైపే ఉన్నట్లు తెలుస్తోంది. రెండు నియోజకవర్గాల ప్రజలు ఆమెకు అనుకూలంగా ఉండటంతో.. ఏదైనా ఒక నియోజకవర్గంలో లలిత పోటీ చేసే అవకాశం ఉంది. ఇక మాజీ ఎమ్మెల్సీ అరికెల నర్సారెడ్డి  సైతం నిజామాబాద్ రూరల్ నియోజవర్గం పై కన్నేశారు. రూరల్ నుంచి పోటీ చేసేందుకు ఏర్పాట్లు చేసుకుంటున్నారు. మరి టికెట్టు రేసులో ఎమ్మెల్యేలు పై చేయి సాధిస్తారా లేక ఎమ్మెల్సీలు టికెట్టు దక్కించుకుంటారా అన్నది ఉత్కంఠగా మారింది. అసలు ఎవరూ పై చేయి సాధిస్తారని తెలియాలంటే మరి కొంత కాలం వెయిట్‌ చేయాల్సి ఉంది. 

 

06:49 - August 20, 2018

సూర్యాపేట : తెలంగాణ ప్రభుత్వ అధికారుల నిర్వాకంతో ఓ కుటుంబం అభాసుపాలైంది. లోన్లు ఇస్తామని మాయమాటలు చెప్పి ఫోటోలు తీసుకున్న అధికారులు... తమను నవ్వులపాలు చేశారని ఆ కుటుంబం బాధపడుతోంది. రైతు బీమా, కంటి వెలుగు వాణిజ్య ప్రకటనల్లో భార్య ఫోటో పక్కన భర్త కాకుండా వేరే వ్యక్తి ఫోటో పెట్టి తమను అవమానించారని ఆవేదన వ్యక్తం చేస్తున్నారు. గుంట భూమి లేకపోయినా.. రైతు బీమా పథకం ఇస్తామని అధికారులు చెప్పడంపై ఆ కుటుంబం మండిపడుతోంది. బిడ్డకు స్నానం చేయిస్తుండగా.. ఫోటోలు తీసుకుని... వాటి స్థానంలో వేరే ఫోటో పెట్టడంపై కాపురంలో చిచ్చురేగుతోంది. ఫోటోలో కనిపిస్తున్న వీరి పేర్ల పద్మ, నాగరాజు. వీరిది సూర్యాపేట జిల్లా కోదాడ మండలం తొగర్రాయి గ్రామం. మూడేళ్ల క్రితం యాదాద్రి సమీపంలోని వంగపల్లిలో పాత బొంతలు కుట్టుకుని బతుకుతుండగా.. లోన్లు ఇప్పిస్తామని ఫోటోలు తీసుకున్నారని వీరు చెబుతున్నారు.

తెలంగాణ ప్రభుత్వం రైతు బీమా, కంటి వెలుగు పథకాల కోసం ఇచ్చిన వాణిజ్య ప్రకటనల్లో పద్మ ఫోటో పక్కన వేరే వ్యక్తి ఫోటో పెట్టి ప్రచురించారు. ఇప్పుడు ఈ వ్యవహారం వివాదాస్పదంగా మారుతోంది. తెలుగు పత్రికలకు ఇచ్చిన వాణిజ్య ప్రకటనల్లో పద్మ, నాగరాజు ఫోటోలే ఉన్నాయి. ఆంగ్ల ప్రతికలు ఇచ్చిన వాణిజ్య ప్రకటనల్లో పద్మ ఫోటో పక్కన వేరే వ్యక్తి ఫోటో పెట్టారు. రెండు వాణిజ్య ప్రకటనల్లో పద్మఎత్తుకున్న బిడ్డ ఒక్కరే. కానీ ఆంగ్ల వాణిజ్య ప్రకటనల్లో భర్త ఫోటో పక్కన వేరే వ్యక్తి ఫోటో పెట్టడం ఇప్పుడు సోషల్‌ మీడియాలో ఇది వైరల్‌గా మారింది. అయితే టీఆర్‌ఎస్‌ కార్యకర్తలు దీన్ని సమర్థించుకుంటున్నారు. వివాదంపై ఎదురుదాడికి దిగుతున్నారు. వాణిజ్య ప్రకటనల్లో నటించే నటించేవారు ఎవరైనా కావొచ్చన్న వాదాన్ని లేవనెత్తున్నారు. సోషల్‌ మీడియా దీన్ని వివాదం చేయడం తగదని వారిస్తున్నారు.

ఫోటో మార్పిడిపై పద్మ స్పందించడంతో వివాదం మరింత ముదిరే అవకాశం కనిపిస్తోంది. వాణిజ్య ప్రకటనల్లో తన భర్త ఫోటో పక్కన వేరే వ్యక్తి ఫోటో పెట్టడాన్ని పద్మ తప్పు పడుతున్నారు. ప్రభుత్వ అధికారుల నిర్వాకంతో తమ కుటుంబ పరువు బజారుపాలైందని ఆవేదన వ్యక్తం చేస్తున్నారు. పాపకు స్నానం చేయిస్తుండగా తీసుకున్న ఫోటోలను ఇలా మారుస్తారా.. అని పద్మ ప్రశ్నించడంతో ప్రభుత్వ అధికారుల గొంతులో పచ్చి వెలక్కాయపడినట్టు అయింది. లోన్లు ఇస్తామంటే ఫోటోలు దిగామని, భర్త ఫోటో మార్చి కుటుంబ పరువును వీధిపాలు చేశారని పద్మ మండిపడుతోన్నారు. ఫోటోలు మార్చి తమ సంసారంలో నిప్పులు పోస్తారా అని ఆగ్రహం వ్యక్తం చేస్తున్నారు. ఆంగ్ల పత్రికల్లో ఫోటో మార్చి వాణిజ్య ప్రకటన ప్రచురించిననాటి నుంచి తమ ఇంట్లో గొడవలు అవుతున్నాయని పద్మ ఆవేదన వ్యక్తం చేస్తున్నారు. ఈ వివాదానికి రాజకీయ రంగు పులుముకుంటే.. దీని నుంచి ఎలా బయటపడాలా.. అన్న అంశంపై ఇటు పాలకులు, అటు అధికారులు తర్జనభర్జన పడుతున్నారు. 

19:58 - August 19, 2018

హైదరాబాద్ : రాజకీయ పార్టీలు రానున్న ఎన్నికల్లో  తెలంగాణలోని సెటిలర్లను ప్రసన్నం చేసుకునే పనిలో పడ్డాయి. సెటిలర్లకు పోటీ చేసే అవకాశం కల్పిస్తామని కాంగ్రెస్‌ ప్రకటించడంతో... అధికారపార్టీ కూడా ఆవైపు దృష్టి సారించింది. గ్రేటర్‌ ఎన్నికల్లోనే సెటిలర్లకు తాము పెద్దపీట వేశామని... వచ్చే ఎన్నికల్లోనూ వారికి అవకాశం కలిపిస్తామని చెబుతోంది. సెటిలర్ల ఓట్లను తమవైపు తిప్పుకునేందుకు అధికార టీఆర్‌ఎస్‌ ఇప్పటి నుంచే పావులు కదుపుతోంది.
గ్రేటర్‌లో సెటిలర్ల ఓట్లు కీలకం
గ్రేటర్‌ హైదరాబాద్‌లో ఎవరు గెలవాలన్న సెటిలర్ల ఓట్లు కీలకం కానున్నాయి.  మెజార్టీ నియోజకవర్గాల్లో వారి మద్దతు ఉంటేనే ఎవరికైనా విజయం సులువు.  నగర శివారు నియోజకవర్గాల్లో గత ఎన్నికల్లో ఆ ప్రభావం స్పష్టంగా కనిపించింది కూడా.  సాధారణ ఎన్నికల్లో సెటిలర్లు టీడీపీవైపు మొగ్గుచూపడంతో.. శేరిలింగంపల్లి, కూకట్‌పల్లి, జూబ్లీహిల్స్‌, కుత్బుల్లాపూర్‌, ఎల్‌బీ నగర్‌, రాజేంద్రనగర్‌, మహేశ్వరంలాంటి నియోజకవర్గాల్లో ఆ పార్టీ అభ్యర్థులు విజయం సాధించారు. అంతేకాదు.. టీడీపీ మద్దతిచ్చిన బీజేపీ అభ్యర్థులు కూడా గ్రేటర్‌ పరిధిలో 5చోట్ల విజయం సాధించారు. టీడీపీ తరపున గెలిచిన వారిలో ఆర్‌. కృష్ణయ్య తప్ప మిగిలిన నేతలంతా టీఆర్‌ఎస్‌లో చేరిపోయారు.
మరికొన్ని నెలల్లో సార్వత్రిక సమరం
సార్వత్రిక సమరం మరికొన్ని నెలల్లోనే జరుగనుంది. ఈ నేపథ్యంలో గ్రేటర్‌ పరిధిలోని నియోజకవర్గాల్లో గెలవాలంటే సెటిలర్ల ఓట్లు కీలకంగా మారాయి. ఇది గుర్తించిన కాంగ్రెస్‌.... రానున్న ఎన్నికల్లో సీమాంధ్ర నేతలకూ పోటీచేసే అవకాశం కల్పిస్తామని ప్రకటించింది. దీంతో గ్రేటర్‌ రాజకీయాలు మరోసారి సెటిలర్ల చుట్టూ తిరగడం మొదలయ్యాయి. అయితే అధికారపార్టీ కూడా సెటిలర్ల ఓట్లను రాబట్టుకునేందుకు పావులు కదుపుతోంది. జీహెచ్‌ఎంసీ ఎన్నికల్లోనే తాము సెటిలర్లకు 10చోట్ల అవకాశం కల్పించామని.. రానున్న ఎన్నికల్లోనూ వారికి తగిన ప్రాధాన్యత ఇస్తామని టీఆర్‌ఎస్‌ నేతలు చెబుతున్నారు. దీనికితోడు ఇప్పుడు హైదరాబాద్‌లో ఉన్నవారంతా తెలంగాణ వారేనని... వారిని తామెప్పుడూ చిన్నచూపు చూడలేదన్న సంకేతాలను సీఎం కేసీఆర్‌ ఇస్తున్నారు.
సెటిలర్లు మద్దతు కూడగట్టే బాధ్యత కీలక నేతలకు అప్పగింత 
మొత్తానికి రానున్న సార్వత్రిక సమరంలో గ్రేటర్‌ పరిధిలో సెటిలర్ల ఓట్లు కీలకం కానున్నాయి. వారిని ప్రసన్నం చేసుకునేందుకు అటు అధికారపక్షం, ఇటు విపక్షం ఇప్పటి నుంచే వ్యూహాలు రచిస్తున్నాయి. సెటిలర్లు మద్దతు కూడగట్టే బాధ్యత కీలక నేతలకు కేసీఆర్‌ అప్పగించారు. మరి సెటిలర్లు ఎవరివైపు ఉంటారో తెలియాలంటే మరికొన్ని నెలలు ఆగాల్సిందే. 

 

16:30 - August 15, 2018

హైదరాబాద్ : తెలంగాణలో సార్వత్రిక ఎన్నికల వేడి రాజుకుంది. ముఖ్యమంత్రి కేసీఆర్‌ ఎన్నికల హీట్‌ పెంచుతున్నారు. నేతలను ఎన్నికలకు సిద్ధం చేసేందుకు పావులు కదుపుతున్నారు. వచ్చే నెల నిర్వహించే బహిరంగ సభ, ఎన్నికలపై గులాబీబాస్‌ నేతలకు ఈనెల 17న దిశానిర్దేశం చేయనున్నారు.
బహిరంగ సభతో బలప్రదర్శన చేసేందుకు టీఆర్‌ఎస్‌ సిద్ధం
బహిరంగ సభ, జన సమీకరణ, ఏర్పాట్లపై సమీక్ష
తెలంగాణలో ఎన్నికల వేడి రాజుకుంది. తెలంగాణ ముఖ్యమంత్రి కేసీఆర్‌ ఈ వేడిని మరింత పెంచుతున్నారు. ఎన్నికలు ఎంతోదూరం లేవన్న సంకేతాలు ఇస్తున్నారు. భారీ బహిరంగ సభ ద్వారా బలప్రదర్శన చేసేందుకు టీఆర్‌ఎస్‌ సిద్ధమవుతోంది. సెప్టెంబర్‌లో జరిగే సభపై ఇప్పటి నుంచే దృష్టి సారించింది.  ఔటర్‌ రింగ్‌రోడ్‌ సమీపంలో దాదాపు 1500 ఎకరాల స్థలంలో బహిరంగ సభను నిర్వహించాలని నిర్ణయించింది. ఈ సభకు కనీసం 20 లక్షల జనసమీకరణ చేయాలని టార్గెట్‌గా పెట్టుకుంది.  అందుకు పార్టీ నేతలను కూడా సిద్ధం చేసేందుకు కేసీఆర్‌ ఈనెల 17న పార్టీ కార్యవర్గ సమావేశంతోపాటు శాసనసభాపక్షం, పార్లమెంటరీ పార్టీ సమావేశాన్ని కూడా ఏర్పాటు చేస్తున్నారు.
బహిరంగ సభ కోసం స్థలాల పరిశీలన
బహిరంగ సభ కోసం పార్టీ నేతలు ఇప్పటికే రెండుమూడు స్థలాలను పరిశీలించారు. సీనియర్‌నేత కేకే ఆధ్వర్యంలో మరోసారి గులాబీనేతలు బహిరంగ సభ నిర్వహించేందుకు అనుకూలంగా ఉన్న ప్రదేశాలను పరిశీలించనుంది. కుత్బుల్లాపూర్ నియోజకవర్గ పరిధిలోని బౌరంపేట, ఇబ్రహీంపట్నం సమీపంలోని కొంగరకాల్‌ పరిసరాల్లో సభ నిర్వహించే అవకాశాన్ని పార్టీ పరిశీలిస్తోంది. రాష్ట్రంలోని అన్ని నియోజకవర్గాల నుంచి ప్రజలను ఈ సభకు తీసుకొచ్చేందుకు అధికారపార్టీ సమాయాత్తం అవుతోంది.
కేసీఆర్‌ ప్రకటనతో నేతల్లో ఉత్కంఠ 
ఈనెల 17న నిర్వహించే పార్టీ నేతల సమావేశంలోనే ఎన్నికలపై పార్టీ ముందస్తు వ్యూహంపై అధినేత కేసీఆర్‌ నేతలకు సూచనలు చేసే అవకాశముంది. సెప్టెంబర్‌ నెలలోనే అభ్యర్థులను కూడా ప్రకటిస్తానని కేసీఆర్‌ చేసిన ప్రకటన నేతల్లో ఉత్కంఠ రేపుతోంది.

 

14:52 - August 15, 2018

హైదరాబాద్ : తెలంగాణ రాష్ట్రంలో ఎన్నికల సందడి మొదలైంది. సీఎం కేసీఆర్ వ్యాఖ్యలను టీకాంగ్రెస్ నేతలు సవాలుగా తీసుకున్నారు. ముందస్తు ఎన్నికలకు సిద్ధమని టీ.కాంగ్రెస్ నేతలు ప్రకటించారు. సెప్టెంబర్ లో తాము కూడా అభ్యర్థులను ప్రకటిస్తామని టీపీసీసీ చీఫ్ ఉత్తమ్ కుమార్ రెడ్డి అన్నారు. అభ్యర్థుల ప్రకటన కోసం ప్రత్యేకంగా కమిటీ ఏర్పాటు చేస్తున్నామని తెలిపారు.

22:00 - August 14, 2018

రాహుల్ రాకతోని కాంగ్రెస్ రాత మారిందా..?..కేసీఆర్ ముందస్తు ఉత్తముచ్చటనేనా..?, బీసీల మీద టీఎంసీల కొద్ది గావురం గార్చిండు..ఓట్ల కోసం బదునాం బదలాయించిన సీఎం, ఆంధ్ర రాష్ట్రంల మంత్రులు ఆడోళ్ల మొగోళ్ల...అనుమానం వ్యక్తం జేస్తున్న ఆర్కే రోజా, జనసేనా పార్టీ గుర్తు పిడికిలన్న పవన్...మెనిఫెస్టోల ఒక్కొక్కటి ఇడిశిపెడ్తున్నడు, ఎన్నికలు దగ్గరికొస్తుంటే కులసంఘాలు...ఎన్నికలు అయిపోయినంక ఏ కులంలేదు, పామును వెంచుకుంటున్న పనిమంతుడు...విషం దీశిండ్రా లేదా అనేది తెలుస్తలేదు.. ఈ అంశాలపై మల్లన్నముచ్చట్లను వీడియోలో చూద్దాం... 

 

16:29 - August 1, 2018

హైదరాబాద్ : కాళేశ్వరం ప్రాజెక్టు రైతుల కంటే కాంట్రాక్టర్లకు ఎక్కువ మేలు చేస్తుందని టీజేఎస్‌ అధినేత కోదండరాం అన్నారు. కాళేశ్వరం రీడిజైన్ పేరుతో అధికారులు దోపిడి చేసి, అసత్యాలు ప్రచారం చేస్తున్నారని ఆరోపించారు. కాళేశ్వరం ప్రాజెక్టు పై చర్చకు సిద్ధంగా ఉన్నామని కోదండరాం తెలిపారు.  మేము గతంలో లేవనేత్తిన ప్రశ్నలకు  మంత్రి హరీష్‌రావు  సమాధానం చెప్పలేదని మండిపడ్డారు. కేసీఆర్‌ పాపాల పుట్ట పగిలే రోజులు దగ్గరపడ్డాయని కోదండరాం అన్నారు.

 

Pages

Don't Miss

Subscribe to RSS - telangana politics