telugu states

06:52 - September 12, 2018

హైదరాబాద్ : సచివాలయంలో సాయంత్రం 5.30గంటలకు సీఈసీ బృందం ప్రెస్ మీట్ నిర్వహించనుంది. 
హైదరాబాద్ : నేడు పైలెట్ రోహిత్ రెడ్డి కాంగ్రెస్ లో చేరనున్నారు. 
విశాఖపట్టణం : జగన్ చేపట్టిన పాదయాత్ర కొనసాగుతోంది. 261వ రోజు ఎంవీపీ కాలనీ, వెంకోజీపాలెంలో జగన్ పాదయాత్ర జరుగనుంది. సాయంత్రం మైనార్టీ ఆత్మీయ సమావేశంలో పాల్గొననున్నారు. 
హైదరాబాద్ : నేడు కొండగట్టు బస్సు ప్రమాద ఘటనలో మృతి చెందిన వారి కుటుంబాలను టిడిపి నేతలు పరామర్శించనున్నారు. 
హైదరాబాద్ : నేడు జనసేన అధినేత పవన్ కళ్యాణ్ తో సీపీఎం నేత తమ్మినేని భేటీ కానున్నారు. పొత్తుల అంశంపై పవన్ తో చర్చించనున్నారు. 
హైదరాబాద్ : జలమండలిలో ఉదయం 10.గంటలకు 31 జిల్లాల అధికారులతో సీఈసీ బృందం భేటీ కానుంది. ఎస్పీలు, ఐజీ, డీఈఓలు పాల్గొననున్నారు. 

09:05 - September 10, 2018

హైదరాబాద్ : నేడు జీహెచ్ఎంసీలో రాజకీయ పార్టీ ప్రతినిధుల సమావేశం జరుగనుంది. ఓటర్ల జాబితా సవరణపై చర్చ జరుగనుంది.

హైదరాబాద్ : గోకుల్ ఛాట్, లుంబినీ పార్కు పేలుళ్ల కేసులో దోషులకు కోర్టు శిక్ష ఖరారు చేయనుంది. అక్బర్ ఇస్మాయిల్ చౌదరి, అనీఖ్ షపీఖ్ సయ్యద్ కు నాంపల్లి అదనపు మెట్రో పాలిటిన్ జడ్జీ శిక్ష ఖరారు చేయనున్నారు. 

19:12 - August 13, 2018

హైదరాబాద్ : జిల్లా బైంసా మండలంలోని కుంభి గ్రామం గత రెండు రోజులుగా కురుస్తున్న వర్షం నీటితో బురదమయమయ్యింది. దాదాపు పది సంవత్సరాలు అయినా వసతులు మాత్రం కల్పించలేదు. స్వాతంత్ర్యం వచ్చి ఇన్ని ఏళ్లు అయిన గ్రామంలో అభివృద్ధి మాత్రం జరగడం లేదని గ్రామంలో యువకులు వాపోతున్నారు.

పశ్చిమగోదావరి జిల్లాలో మూడు రోజులుగా ఎడతెరపి లేకుండా వర్షాలు కురువడంతో.. ఏజెన్సీలో వాగులు పొంగుతున్నాయి. జంగారెడ్డిగూడెం, వేలేరుపాడు, కుక్కునూరు, టీ. నరసాపురం ప్రాంతాల్లో కొండవాగులు పొంగిప్రవహిస్తున్నాయి. దీంతో ప్రజలు తీవ్ర ఇబ్బందులు ఎదుర్కొంటున్నారు. గోదావరి వరద నీరు కొత్తూరు కాజ్‌వే పైకి చేరటంతో 19 గ్రామాలకు రాకపోకలు నిలిచిపోయాయి.

పశ్చిమగోదావరిలో....
నాలుగు రోజులుగా కురుస్తున్న భారీ వర్షాలకు పశ్చిమగోదావరి జిల్లా చింతలపూడిలో ఎర్రకాలువ పొంగిపొర్లుతుంది. దీంతో జంగారెడ్డిగూడెం చుట్టుపక్కల గ్రామాలకు వాహనాల రాకపోకలు నిలిచిపోయాయి. దీంతో గ్రామస్తులు ఆందోళన వ్యక్తం చేస్తున్నారు. గత ప్రభుత్వం వంతెన నిర్మాణానికి నిధులు కేటాయించింది. కానీ ఈ ప్రభుత్వం పట్టించుకోకపోవడంతో శిలాఫలకానికే పరిమితమైంది. దీంతో రోజువారి కూలీలు పనులకు వెళ్లడం లేదు. ప్రభుత్వం వెంటనే స్పందించి వంతెన నిర్మాణం చేపట్టాలని గ్రామస్తులు డిమాండ్ చేస్తున్నారు.

గోదావరిలో...
రెండు రోజులుగా కురుస్తున్న వర్షాలతో గోదావరిలో వరద ఉధృతి పెరిగింది. దీంతో ఎల్లంపల్లి ప్రాజెక్టుకు భారీగా నీరు చేరుకుంది. వరద తాకిడి పెరగడంతో 28 గేట్ల ద్వారా దిగువకు రెండు లక్షల క్యూసెక్కుల నీటిని విడుదల చేస్తున్నారు. ప్రజలను అప్రమత్తంగా ఉంచాలని పెద్దపల్లి, మంచిర్యాల జిల్లాల కలెక్టర్లు అధికారులను ఆదేశించారు. దీనికి సంబంధించిన మరింత సమాచారం కోసం వీడియో క్లిక్ చేయండి.

18:06 - August 13, 2018

ఢిల్లీ : కర్నాటక, కేరళలో ప్రమాదస్థాయిలో పెరుగుతున్న వరదలతో తమిళనాడు ఉక్కిరిబిక్కిరి అవుతోంది. కన్యాకుమారి, తిరునెల్వేలి, తూత్తుకుడి, ధర్మపురి, తంజావూరు, తిరుచ్చి, నామక్కల్‌, ఈరోడ్‌ జిల్లాలకు వరద ప్రమాదం ఏర్పడటంతో ప్రభుత్వం అప్రమత్తమై ప్రజలను సురక్షిత ప్రాంతాలకు తరలించేందుకు రంగం సిద్దం చేసింది. రానున్న 24 గంటల్లో రాష్ట్రంలో భారీ వర్షాలు కురిసే అవకాశం ఉందని వాతావరణ కేంద్రం హెచ్చరించిన నేపథ్యంలో రాష్ట్ర ప్రజలు అప్రమత్తంగా ఉండాలని ప్రభుత్వం హెచ్చరించింది.

21:21 - August 12, 2018

హైదరాబాద్ : తెలుగు రాష్ట్రాల్లో భారీ వర్షపాతం నమోదవుతోంది. రెండు రోజులుగా కురుస్తున్న వర్షాలతో నదులు, చెరువుల్లోకి భారీగా వరద నీరు వచ్చి చేరుతోంది. బంగాళాఖాతంలో ఏర్పడిన ఉపరితల ఆవర్తనం ప్రభావంతో మరో 24 గంటల పాటు వర్షాలు కురుస్తాయని వాతావరణ శాఖ తెలిపింది. ఎడతెరపిలేకుండా కురుస్తున్న వర్షాలతో హైదరాబాద్‌ తడిసి ముద్దైంది. వర్షం నీరు రోడ్డుపై నిలిచిపోవడంతో పలు ప్రాంతాల్లో రాకపోకలకు అంతరాయం ఏర్పడింది. భారీ వర్షాల కారణంగా ఆదిలాబాద్‌ జిల్లాలోని లోతట్టు ప్రాంతాలు జలమయమయ్యాయి. ప్రజలను సురక్షిత ప్రాంతాలకు తరలించాలని జిల్లా కలెక్టర్‌ దివ్య సంబంధిత అధికారులను ఆదేశించారు. జిల్లా కేంద్రంలోని ఖానాపూర్‌‌ చెరువు సమీప నివాస ప్రాంతాలను కలెక్టర్ సందర్శించారు.

ఉమ్మడి ఆదిలాబాద్ జిల్లాలో రెండు రోజులుగా కురుస్తున్న భారీ వర్షాలకు జన జీవనం స్తంభించింది. పలు గ్రామాల్లో ఇళ్లలోకి నీరు వచ్చి చేరింది. వాగులు, వంకలు ఉప్పొంగి ప్రవహిస్తుండటంతో.. రాకపోకలు నిలిచిపోయాయి. మంచిర్యాల జిల్లా జన్నారం మండలం ఇందనపల్లి, జన్నారం సమీపంలో నిర్మిస్తున్న నూతన వంతెనల వద్ద రాకపోకల కొరకు నిర్మించిన అప్రోచ్ రోడ్లు వరద ఉధృతికి తెగిపోయి రవాణా వ్యవస్థ స్తంభించింది. వర్షం ధాటికి నిర్మల్ జిల్లా కడెం ప్రాజెక్ట్‌లోకి భారీగా వరదనీరు చేరుతోంది. ఇప్పటికే 13 గేట్లు ఎత్తి వరద నీటిని గోదావరిలోకి వదిలారు అధికారులు.

మంచిర్యాల జిల్లా చెన్నూరు మండలంలోని లింగంపల్లి గ్రామంలో వర్షం ధాటికి 104 గొర్రెలు మృతి చెందాయి. ఇవి తెలంగాణ ప్రభుత్వం సబ్సీడీ కింద అంజేసిన గొర్రెలు కావడంతో గొర్రెల కాపరులు ఆందోళన చెందుతున్నారు. సుమారు 5 లక్షల నష్టం వాటిళ్లిందని ఆవేదన చెందుతున్నారు.

కొత్తగూడెం జిల్లాలో కురుస్తున్న వర్షాలకు సింగరేణి ఓపెన్‌ కాస్ట్‌లో బొగ్గు ఉత్పత్తి పనులకు ఆటంకం ఏర్పడింది. గనుల్లో భారీగా వర్షం నీరు వచ్చి చేరడంతో మోటార్ల సాయంతో నీటిని తోడేస్తున్నారు. భారీ వర్షాల కారణంగా భద్రాద్రిలో క్రమంగా గోదావరి నీటిమట్టం పెరుగుతోంది. చత్తీస్‌గఢ్‌లో కురుస్తున్న భారీ వర్షాలకు తాలిపెరు ప్రాజెక్టుకు భారీగా వరద ఉధృతి పెరిగింది. దీంతో 15 గేట్లు ఎత్తి 51వేల క్యూసెక్కుల నీటిని దిగువకు విడుదల చేశారు.

కరీంనగర్ జిల్లాలో కురుస్తున్న భారీ వర్షాలకు లోతట్టు ప్రాంతాలు జలమయం అయ్యాయి. రామగుండంలో అత్యధికంగా 13.8 సెంటీమీటర్ల వర్షాపాతం నమోదైంది. రామగుండంలోని సింగరేణి ఓపెన్‌ కాస్ట్‌ గనులపై వర్షం ప్రభావం పడింది. దీంతో నాలుగు ఓపెన్‌ కాస్ట్‌లలో లక్ష టన్నుల బొగ్గు ఉత్పత్తికి విఘాతం ఏర్పడింది. ఎల్లంపల్లి ప్రాజెక్టుకు భారీగా వరద నీరు వచ్చి చేరుతుండడంతో 10 గేట్లను ఎత్తి 519 క్యూసెక్కుల నీటిని దిగువకు విడుదల చేశారు.
ఉమ్మడి వరంగల్‌ జిల్లా వ్యాప్తంగా భారీ వర్షాలు కురుస్తున్నాయి. రహదారులు, లోతట్టు ప్రాంతాలు జలమయమయ్యయి. వాగులు పొంగి పొర్లుతున్నాయి. కొన్ని ప్రాంతాల్లో ఇళ్లల్లోకి వర్షం నీరు వచ్చి చేరడంతో ప్రజలు తీవ్ర ఇబ్బందులు పడుతున్నారు. భూపాలపల్లిలో నిన్నటి నుండి కురుస్తున్న వర్షం కారణంగా కాకతీయ ఓపెన్ కాస్ట్ బొగ్గు గనుల్లోకి భారీగా వరద నీరు వచ్చి చేరింది. దీంతో బొగ్గు ఉత్పత్తికి ఆటంకం ఏర్పడింది. జయశంకర్‌ భూపాలపల్లి జిల్లా మహదేవపూర్‌ మండలం చండ్రుపల్లి వాగు టూరిస్టుల బస్సు చిక్కుకుంది. అన్నారం బ్యారేజీ చూసేందుకు వెళ్తున్న టూరిస్టుల బస్సు వరద నీటిలో చిక్కుకుపోయింది. స్థానికులు స్పందించి బస్సును వరద నీటి నుండి బయటకు తీసుకువచ్చారు. భారీ వర్షాలకు నిజామాబాద్‌ జిల్లా ఆర్మూర్‌ నియోజకవర్గంలోని వాగులు, కుంటలు, చెరువులు వర్షపు నీటితో నిండిపోయాయి. దీంతో ఆయకట్టు రైతులు హర్షం వ్యక్తం చేస్తున్నారు.

భారీ వర్షాలతో విజయవాడలోని ప్రకాశం బ్యారేజ్ జలకళ సంతరించుకుంది. ఎగువ నుంచి వస్తున్న వరద నీటితోపాటు మూడు రోజులుగా కురుస్తున్న వర్షం ధాటికి కృష్ణానది నిండుకుండలా మారింది. వరద నీరు ప్రవాహంతో బ్యారేజీ పోటెత్తడంతో అధికారులు 40 గేట్లు ఎత్తి దిగువకు నీటిని విడుదల చేశారు. తూర్పుగోదావరి జిల్లా విలీన మండలాల్లో భారీ వర్షం కురుస్తుంది. దీంతో విలీన మండలాల్లోని వాగులు, వంకలు పొంగి రహదారులపై ఉధృతంగా ప్రవహిస్తున్నాయి. గిరిజన ప్రాంతాల్లో రాకపోకలకు తీవ్ర అంతరాయం ఏర్పడింది. దక్షిణ ఒరిస్సా ఉత్తర కోస్తాను ఆనుకొని కొనసాగుతోన్న ఉపరితలం ఆవర్తనం ప్రభావంతో కోస్తాంధ్రలో మోస్తరు నుండి భారీ వర్షాలు కురిసే అవకాశం ఉన్నట్లు వాతావరణ అధికారులు తెలిపారు. రానున్న 24 గంటల్లో వాయువ్య బంగాళాఖాతంలో అల్పపీడనం ఏర్పడే అవకాశం ఉంది. 

19:55 - August 11, 2018
08:13 - July 6, 2018
06:33 - July 6, 2018

హైదరాబాద్ : ధాన్యానికి మద్దతు ధర కల్పించడంలో కేంద్ర ప్రభుత్వం విఫలమైందని విపక్షాలు ఆరోపించాయి. స్వామినాథన్‌ కమిషన్ సిఫార్సులను అమలు చేయలేదని మండిపడ్డాయి. వరిధ్యానానికి మద్దతు ధర ప్రకటించి రాష్ట్రాల్లోని రైతాంగాని ఆదుకోవాలని వామపక్షాలు డిమాండ్ చేశాయి. తెలంగాణలో వరి ధాన్యానికి మద్దతు ధర కల్పించడంలో కేంద్రం ప్రభుత్వం నిర్లక్ష్యవైఖరి ప్రదర్శిస్తోందని రైతు సమన్వయ సమితి చైర్మన్ గుత్తా సుఖేందర్ రెడ్డి ఆరోపించారు. ప్రభుత్వానికి భారమైనా మార్క్‌ఫెడ్ ద్వారా ఇతర పంటలను కొనుగోలు చేసి రైతులను ఆదుకుంటుందన్నారు. వరి ధాన్యానికి మద్దుతు ధర ప్రకటించి రైతాంగాన్ని ఆదుకోవాలని ఆయన డిమాండ్ చేశారు.

కేంద్రం ప్రకటించిన కనీస మద్ధతు ధరలు రాష్ట్ర ప్రభుత్వం ప్రతిపాదించిన ధరల కంటే చాలా తక్కువని ఏపీ మంత్రి సోమిరెడ్డి చంద్రమోహన్‌రెడ్డి అన్నారు. స్వామినాథన్‌ కమిషన్ సిఫార్సులను కూడా కేంద్రం తుంగలో తొక్కిందని...ధాన్యం గ్రేడ్‌-ఏ కి 3 వేల 472 రూపాయలు ఇవ్వాలని కోరితే 1770 రూపాయలు, కామన్ వెరైటీకి 2 వేల 823 ప్రతిపాదిస్తే 1750 రూపాయలు మాత్రమే ప్రకటించారన్నారు. అన్ని పంటల మద్ధతు విషయంలో కేంద్రం దారుణంగా వ్యవహరించిందని సోమిరెడ్డి అన్నారు. మద్దతు ధర పేరుతో కేంద్రం మోసపూరిత ప్రకటన చేసిందని సీపీఎం ఆరోపించింది. స్వామినాథన్ ‌కమిషన్ సిఫారసులకు అనుగుణంగా ‌ఉత్పత్తి ఖర్చుపై 50 శాతం లాభంతో మద్దతు ధర పెంచలేదన్నారు. మోదీ ప్రభుత్వం రైతులకు చేస్తున్న మోసాన్ని సీపీఎం ఎండగడుతూ...రైతులకు వాస్తవాలు వివరిస్తామన్నారు.  

17:27 - June 13, 2018

ఢిల్లీ : తెలుగు రాష్ట్రాల ఆశలపై నీళ్లు చల్లిన కేంద్రం మరోసారి నీళ్లు చల్లింది. ఆంధ్రప్రదేశ్‌లోని కడప జిల్లాతో పాటు తెలంగాణలోని బయ్యారంలో స్టీల్‌ ప్లాంట్ల ఏర్పాటు ఆశలపై కేంద్ర ప్రభుత్వం నీళ్లు చల్లింది. రాష్ట్ర విభజన చట్టం ప్రకారం ఆయా ప్రాంతాల్లో ఉక్కు కర్మాగారాల ఏర్పాటుకు సంబంధించి సాధ్యాసాధ్యాలను పరిశీలించి నిర్ణయం తీసుకోవాలని మాత్రమే సూచనలు ఉన్నాయని సుప్రీంకోర్టుకు చెబుతూ అఫిడవిట్‌ దాఖలు చేసింది. తాము అన్ని అంశాలు పరిగణనలోకి తీసుకున్న తర్వాతే స్పష్టమైన నివేదిక ఇచ్చామని, ఆ ప్రాంతాల్లో ఉక్కు కర్మాగారాలు సాధ్యం కావని చెప్పామని కేంద్రం స్పష్టం చేసింది. ఇప్పటికే ఉన్న ఉక్కు పరిశ్రమలు నష్టాల్లో ఉన్నాయని చెప్పుకొచ్చింది. గతంలోనే ఈ విషయంపై తాము స్పష్టమైన ప్రకటన చేశామని కేంద్ర ప్రమభుత్వం పేర్కొంది. సాధ్యాసాధ్యాలపై టాస్క్ ఫోర్స్ ను ఏర్పాటు చేస్తామని..మెకాన్ సంస్థ కడప స్టీల్ ఫ్యాక్టరీ సాధ్యాసాధ్యాలపై పరిశీలన జరుపుతున్నామనీ కేంద్రం దాటవేత ధోరణిని అవలంభించింది. 

21:50 - May 8, 2018

విజయవాడ : పెట్రోలు, డీజిల్‌ ధరలు ఇబ్బడిముబ్బడిగా పెరిగిపోతున్నా... కేంద్రం పట్టించుకోక పోవడాన్ని నిరసిస్తూ.. సీపీఎం శ్రేణులు దేశవ్యాప్తంగా ఆందోళనలు నిర్వహించాయి. తెలుగు రాష్ట్రాల్లోనూ పార్టీ నాయకులు ర్యాలీలు, బైఠాయింపులతో నిరసనను వ్యక్తం చేశారు. కొన్ని చోట్ల ద్విచక్ర వాహనాలు, ఆటోలను తాళ్లతో లాగుతూ నిరసనను తెలిపారు. 
విజయవాడలో 
పెట్రోల్‌, డీజిల్‌ ధరల పెంపును నిరసిస్తూ విజయవాడలో సీపీఎం ఆధ్వర్యంలో ఆందోళనలు నిర్వహించారు. ఈ ఆందోళనలో సీపీఎం రాష్ట్ర కార్యదర్శి మధుతో పాటు సీపీఎం, ఐద్వా, సీఐటీయూ కార్యకర్తలు పాల్గొన్నారు.  అయితే.. ఆందోళన చేస్తున్న నేతలను పోలీసులు అడ్డుకున్నారు. దీంతో సీపీఎం నేతలు, పోలీసుల మధ్య తోపులాట జరిగింది. సీపీఎం నేతలను పోలీసులు బలవంతంగా అరెస్ట్‌ చేశారు.
కర్నూలులో 
పెట్రోలు, డీజిల్‌ ధరల పెరుగుదలను నిరసిస్తూ.. కర్నూలు జిల్లాలో సీసీఎం శ్రేణులు ఆందోళన చేపట్టాయి. పెట్రోలు, డీజిల్‌పై కేంద్ర, రాష్ట్ర ప్రభుత్వాలు విధిస్తోన్న పన్నును వెంటనే ఉపసంహరించాలని డిమాండ్‌ చేశారు. కొత్తబస్టాండ్‌ దగ్గర ప్రధాని నరేంద్ర మోదీ దిష్టిబొమ్మను నాయకులు దహనం చేశారు. కేంద్ర, రాష్ట్ర ప్రభుత్వాల వైఖరిని ప్రజల్లోకి తీసుకు వెళ్లి.. తగిన బుద్ధి చెబుతామని నాయకులు హెచ్చరించారు. 
అనంతపురంలో
అనంతపురం జిల్లాలోనూ పెట్రోల్‌, డీజిల్‌ ధరల పెరుగుదలను నిరసిస్తూ సీపీఎం కార్యకర్తలు ఆందోళనలు జరిపారు. పెట్రోలు, డీజిల్‌ ధరల పెరుగుదల వల్ల.. నిత్యావసర సరకుల ధరలు పెరిగిపోయాయని నాయకులు ఆరోపించారు. అనంతపురం టవర్‌క్లాక్‌ దగ్గర అటువేపుగా వచ్చే ద్విచక్ర వాహనాల్లో.. స్వల్ప పరిమాణంలో పెట్రోల్‌ పట్టిస్తూ వినూత్న రీతిలో నిరసన తెలిపారు. 
తిరుపతిలో
తిరుపతిలోనూ సీపీఎం శ్రేణులు పెట్రోల్‌ ధరల పెంపును నిరసిస్తూ ఆందోళన చేపట్టాయి. కలెక్టరేట్‌ వద్ద.. బైఠాయించి నిరసన తెలిపారు. ప్రభుత్వం ధరలను తగ్గించక పోతే.. ఆందోళన ఉధృతం చేస్తామని హెచ్చరించారు.  విశాఖ జిల్లాలోనూ సీపీఎం శ్రేణులు ఆందోళనలు, రాస్తారోకో నిర్వహించాయి. ఏజెన్సీలోని పదకొండు మండలాలతో పాటు.. జిల్లా వ్యాప్తంగా ధర్నాలు సాగాయి. సీపీఎం రాష్ట్ర కార్యదర్శివర్గ సభ్యుడు సీహెచ్‌ నరసింగరావు ప్రభుత్వంపై నిప్పులు చెరిగారు.  
కాకినాడలో 
పెంచిన పెట్రోలు, డీజిల్‌ ధరలను వెంటనే తగ్గించాలని డిమాండ్‌ చేస్తూ కాకినాడ నగర శాఖ కూడా ఆందోళన నిర్వహించింది. మానవహారంగా తమ నిరసనను వెలిబుచ్చింది. పెట్రోలు, డీజిల్‌ ధరలను పెంపును నిరసిస్తూ.. రాజమండ్రిలోనూ సీపీఎం శ్రేణులు ఆందోళన నిర్వహించాయి. సీపీఎం కార్యాలయం నుంచి నందం గనిరాజు జంక్షన్‌ మీదుగా కంబాలు చెర్వు వరకూ ర్యాలీ నిర్వహించారు. మోటార్‌ సైకిళ్లకు తాళ్లు కట్టి లాగుతూ నిరసన తెలిపారు.
నెల్లూరులో
నెల్లూరులోనూ సీపీఎం శ్రేణులు ఆందోళన చేపట్టాయి. నెల్లూరులోని అయ్యప్పగుడి సెంటర్‌ నుంచి వేదాయపాళెం వరకూ ర్యాలీ నిర్వహంచారు. తోపుడు బండిపై మోటార్‌ బైకును ఎక్కించి నిరసన తెలిపారు. మరోవైపు, ఆటో కార్మికులు తాడు సాయంతో ఆటోలు లాగుతూ.. తమ నిరసనను తెలిపారు. క్రూడాయిల్‌ రేట్లు తగ్గినా.. భారత్‌లో పెట్రోల్‌ డీజిల్‌ ధరలు పెరగడం దారుణమని పార్టీ నాయకులు విమర్శించారు. 
ఒంగోలులో
పెట్రోలు, డీజిల్‌ ధరల పెరుగుదలకు నిరసనగా.. ఒంగోలులో సీపీఎం శ్రేణులు ర్యాలీ నిర్వహించాయి. ఆర్టీసీ డిపో నుంచి కలెక్టరేట్‌ వరకూ ర్యాలీ సాగింది. ర్యాలీలో మినీ ఆటోను తాడుతో లాగుతూ.. కార్యకర్తలు నిరసన తెలిపారు. మోదీ ప్రభుత్వం ధరలను అదుపు చేయకపోతే.. తగిన మూల్యం చెల్లించుకోవాల్సి ఉంటుందని సీపీఎం నాయకులు హెచ్చరించారు. 
నల్లగొండలో 
నల్లగొండ జిల్లా మిర్యాలగూడలో.. సీపీఎం సైకిల్‌ యాత్ర ద్వారా తమ నిరసనను వ్యక్తం చేసింది. సీపీఎం రాష్ట్ర కమిటీ సభ్యుడు జూలకంటి రంగారెడ్డి నేతృత్వంలో ఈ కార్యక్రమం చేపట్టారు. మోదీ, తన నాలుగేళ్ల పాలన కాలంలోనే పెట్రోల్‌, డీజిల్‌ ధరలను 35 శాతం మేర పెంచేసి.. ప్రజల నడ్డి విరిచారని ఆయన ఆరోపించారు. సూర్యాపేటలోనూ నిరసన కార్యక్రమం నిర్వహించారు. కేంద్రప్రభుత్వ దిష్టిబొమ్మను దగ్ధం చేశారు. 
కుత్బుల్లాపూర్‌ లో  
కుత్బుల్లాపూర్‌ నియోజకవర్గంలోని జీడిమెట్ల హమాలీ అడ్డా నుంచి షాపూర్‌ వరకూ.. సీపీఎం కుత్బుల్లాపూర్‌ నియోజకవర్గ కార్యదర్శి లక్ష్మణ్‌ ఆధ్వర్యంలో రాస్తారోకో నిర్వహించారు. పేదలపై పన్నుల రూపంలో వేస్తున్న భారాన్ని తగ్గించుకోవాలని డిమాండ్‌ చేశారు. తెలుగు రాష్ట్రాల్లోని మిగిలిన జిల్లాల్లోనూ సీపీఎం నాయకులు పెట్రోల్‌ ధరల తగ్గింపు కోరుతూ ఆందోళనలు నిర్వహించారు. 

 

Pages

Don't Miss

Subscribe to RSS - telugu states