trs plenary

06:44 - April 11, 2018

హైదరాబాద్ : ఈనెల 27న నిర్వహించనున్న ప్లీనరీని గులాబీ పార్టీ ప్రతిష్టాత్మకంగా తీసుకుంది. ఓవైపు ప్రస్తుత అధికారంలో ఇదే చివరి ప్లీనరీ కావడం.. మరోవైపు జాతీయ రాజకీయాలవైపు కేసీఆర్‌ దృష్టి సారించడంతో.. ప్లీనరీలో ఎలాంటి రాజకీయ తీర్మానం చేస్తారోనన్న ఉత్కంఠ అంతటా నెలకొంది. ఇక ఎన్నికలకు ముందు జరుగుతున్న ప్లీనరీ కావడంతో... నాలుగేళ్లుగా ప్రభుత్వం సాధించిన ప్రగతిని ఈ సభ ద్వారా ప్రజలకు వివరించనున్నారు.

టీఆర్‌ఎస్‌ అధికారం చేపట్టిన తర్వాత నిర్వహిస్తున్న ఐదో ప్లీనరీపై సీరియస్‌గా దృష్టి సారించింది. ఈనెల 27న జరగనున్న ప్లీనరీకి అన్ని నియోజకవర్గాల నుంచి క్రియాశీల కార్యకర్తలు హాజరుకానున్న నేపథ్యంలో... ఎలాంటి ఇబ్బందులు లేకుండా నిర్వహించేందుకు ప్రణాళికలు రచిస్తోంది. ప్రతినిధుల సభను విజయవంతం చేసేందుకు పార్టీ పరంగా పలు కమిటీలను సీఎం కేసీఆర్‌ నియమించారు. ఉమ్మడి రంగారెడ్డి జిల్లాలో సభ జరుగుతుండడంతో... ఆ జిల్లాకు చెందిన ప్రజాప్రతినిధులకు కమిటీల్లో పెద్ద పీట వేశారు.

ప్రభుత్వపరంగా ఇప్పటివరకు చేపట్టిన అభివృద్ధి, సక్షేమంపై పలు తీర్మానాలను ఈ సభ ద్వారా ఆమోదించడంతో పాటు.. రాజకీయ తీర్మానాలను కూడా ఆమోదించేందుకు పార్టీ సిద్దమవుతోంది. పార్టీ జనరల్‌ సెక్రటరీ కేకే ఆధ్వర్యంలో కమిటీ తీర్మానాలను సిద్దం చేస్తోంది. జాతీయస్థాయి రాజకీయాలపై కూడా కేసీఆర్‌ దృష్టి సారించడంతో... ఈ ప్లీనరీ వేదికగా మరింత స్పష్టత ఇచ్చే అవకాశం కనిపిస్తోంది. తెలంగాణ ఉద్యమంలో దేశంలోని వివిధ ప్రాంతీయ పార్టీల మద్దతు కూడగట్టిన కేసీఆర్‌... ప్రతినిధుల సభకు కూడా ఇతర రాష్ట్రాల నేతలను ఆహ్వానించనున్నట్లు తెలుస్తోంది. ఇక అక్టోబర్‌లో నిర్వహించే భారీ బహిరంగ సభను దృష్టిలో ఉంచుకుని... ఈ ప్లీనరీ ద్వారానే కేసీఆర్‌ జాతీయ రాజకీయాలపై టీఆర్‌ఎస్‌ వైఖరిని స్పష్టం చేయనున్నారు.

మొత్తానికి ఈ ప్లీనరీ టీఆర్‌ఎస్‌కు చాలా కీలకంగా మారింది. ప్రస్తుత అధికారంలో ఇదే చివరి ప్లీనరీ కావడం.. మరోవైపు జాతీయ రాజకీయాల వైపు కేసీఆర్‌ దృష్టి సారించిన నేపథ్యంలో... ప్లీనరీలో ఏయే నిర్ణయాలు ప్రకటిస్తారోనన్న ఉత్కంఠ సర్వత్రా నెలకొంది. 

08:54 - April 9, 2018

హైదరాబాద్ : గ్రాండ్‌ ప్లీనరీకి టీఆర్‌ఎస్‌ సిద్ధమైంది. ఈనెల 27న కొంపల్లిలో ప్లీనరీని నిర్వహించనుంది. ఈ సభకు ఒక్కో నియోజకవర్గం నుంచి 150 మంది చొప్పున మొత్తం 15 వేల మంది ప్రతినిధులను ఆహ్వానించనున్నారు. అయితే గతానికి భిన్నంగా ఈసారి బహిరంగ సభను అక్టోబర్‌ లేదా నవంబర్‌లో నిర్వహించేందుకు సన్నాహాలు చేస్తోంది గులాబీ పార్టీ. 

ఈనెల 27న పార్టీ ప్లీనరీ నిర్వహించబోతుంది టీఆర్‌ఎస్‌. మేడ్చల్‌ మల్కాజిగిరి జిల్లాలోని కొంపల్లిలో ఈ సభను నిర్వహించనున్నారు. ప్రభుత్వ పగ్గాలు చేపట్టి నాలుగేళ్లు పూర్తి కావడంతో గ్రామస్థాయి నుంచి క్రియాశీల కార్యకర్తలను ప్లీనరీకి ఆహ్వానించనుంది. ఒక్కో నియోజకవర్గం నుంచి కనీసం 150 మంది కార్యకర్తలు, ప్రజాప్రతినిధులు సభకు హాజరయ్యే విధంగా చర్యలు చేపడుతున్నది. మొత్తం 15 వేల మంది ప్రతినిధులు సభకు హాజరవుతారని పార్టీ యోచిస్తోంది.   

ప్రభుత్వం గత నాలుగేళ్లుగా చేపడుతున్న అభివృద్ధి, సంక్షేమ పథకాలతో పాటు రాజకీయంగా పలు తీర్మానాలను ఈ ప్లీనరీలో ఆమోదించనున్నారు. అయితే.. ఈ తీర్మానాలను సిద్దం చేసే బాధ్యతను సీనియర్‌ నేత కేకేకు అప్పగించారు. ప్లీనరీని విజయవంతం చేసేందుకు పార్టీ నేతలతో మరికొన్ని కమిటీలు వేశారు. ఇక పార్టీ ప్లీనరీతో పాటు బహిరంగసభ నిర్వహించడం ఆనవాయితీ. కానీ.. ఈసారి జాతీయ రాజకీయాలను దృష్టిలో ఉంచుకుని అక్టోబర్‌ లేదా నవంబర్‌లో బహిరంగ సభ నిర్వహించాలని టీఆర్‌ఎస్‌ భావిస్తోంది. దేశ చరిత్రలో మైలురాయిగా నిలిచిపోయేలా బహిరంగ సభను నిర్వహిస్తామని పార్టీ నేతలు చెబుతున్నారు. ఈ సభకు ప్రభుత్వం నుంచి లబ్ధిపొందినవారందరిని రప్పించేందుకు టీఆర్‌ఎస్‌ యోచిస్తోంది. ఉద్యమ సమయంలో నిర్వహించిన బహిరంగ సభల కంటే ఎక్కువగా ఈ బహిరంగసభకు జనాన్ని సమీకరించాలని పార్టీ భావిస్తోంది. మొత్తానికి పార్టీ ప్లీనరీలో కార్యకర్తలకు కేసీఆర్‌ దిశానిర్దేశం చేయడంతో పాటు... ఎన్నికలకు సమాయత్తం చేయనున్నారు. అలాగే బహిరంగ సభతో జాతీయ రాజకీయాలపై టీఆర్‌ఎస్‌  తన వైఖరిని స్పష్టం చేసే అవకాశం కనిపిస్తోంది. 

17:40 - March 9, 2018

హైదరాబాద్ : తాను క్రమశిక్షణ కలిగిన కార్యకర్తనని, సీఎం కేసీఆర్ బాటే తన బాటని మంత్రి హరీశ్ రావు స్పష్టం చేశారు. తాను పార్టీ మారుతున్నట్లు సోషల్ మీడియాలో వస్తున్న వార్తలు అవాస్తవమని అన్నారు. నా పుట్టుక టీఆర్ఎస్ లోనే..చావు కూడా టీఆర్ఎస్ లోనేనని హరీశ్ రావు పునరుద్ఘాటించారు. ఇప్పటికీ ఈ విషయాన్ని తాను పలుసార్లు చెప్పానని..దీనిని దృష్టిలో పెట్టుకుని ఇలాంటి వార్తలు రాయొద్దని హరీశ్ రావు విజ్ఞప్తి చేశారు. సోషల్ మీడియాలో వస్తున్న తప్పుడు వార్తలపై చర్యలు తీసుకోవాలని డీజీపీని కోరినట్లు హరీశ్ రావు తెలిపారు.

14:54 - March 9, 2018

ఢిల్లీ : రిజర్వేషన్లు పెంచుకొనే అధికారాన్ని రాష్ట్రాలకు ఇవ్వాలంటూ పార్లమెంట్ లోపలా బయటా తెలంగాణ రాష్ట్ర సమితి తన ఆందోళనలను కొనసాగిస్తూనే ఉన్నది. వరుసగా ఐదోరోజు ఎంపీలు.. కేంద్ర ప్రభుత్వ వైఖరిని నిరసిస్తూ తమ గళం వినిపించారు. సభలో నినాదాలతో పాటు.. పార్లమెంటు ద్వారం ముందు ప్లకార్డులతో నిరసన తెలిపారు. రాష్ట్ర అధికారాలపై కేంద్రం పెత్తనాన్ని సహించేది లేదని ఆ పార్టీ ఎంపీ వినోద్ కుమార్ హెచ్చరించారు. 

07:18 - March 7, 2018

హైదరాబాద్ : ఈసారి, టీఆర్ఎస్‌ ప్లీనరీ.. యువ నాయకత్వానికి జేజేలు పలుకబోతోంది. కేటీఆర్‌ సహా.. కీలక నేతలకు... ఈ ప్లీనరీ.. విశేష బాధ్యతలు అందించబోతోంది. ముఖ్యమంత్రి కేసీఆర్‌ జాతీయ రాజకీయాలవైపు దృష్టి సారించడంతో.. ఆయన వారసుడిగా.. పార్టీ వర్కింగ్‌ ప్రెసిడెంట్‌గా కేటీఆర్‌ ఎన్నిక కావడం లాంఛనమే అన్న ప్రచారం జరుగుతోంది. ఆయనతో పాటే.. కవితకూ కీలక భూమిక అప్పజెబుతారని అంటున్నారు.
తెలంగాణ రాష్ట్ర సమితి అధినేత కేసిఆర్ జాతీయ రాజ‌కీయాల్లో క్రియాశీలక పాత్ర పోషించాలని నిర్ణయించారు. దీంతో రాష్ట్రంలో కేసీఆర్‌ వారసత్వాన్ని ఎవరు అందిపుచ్చుకుంటారు..? పార్టీ బాధ్యతలు ఎవరు చేపడతారు అన్న ప్రశ్నలు తలెత్తాయి. మంత్రులు కేటీఆర్‌, హరీశ్‌రావు, ఎంపీ కవితల్లో ఎవరు చక్రం తిప్పబోతున్నారు..? అన్న ఆసక్తి పార్టీ శ్రేణుల్లో వ్యక్తమవుతోంది. అయితే.. వీటన్నింటికీ, వచ్చే నెలలో జరిగే ప్లీనరీ సమాధానమిస్తుందని టీఆర్ఎస్‌ కీలక నేతలు పరోక్ష సంకేతాలిస్తున్నారు.

ఏప్రిల్‌ నెలలో టీఆర్ఎస్‌ ప్లీనరీ నిర్వహించబోతోంది. సీఎం కేసీఆర్‌ తనయుడు కల్వకుంట్ల తారకరామారావు, ఇదే వేదికపై తండ్రి వారసత్వాన్ని అందిపుచ్చుకుంటారని పార్టీ శ్రేణులు చెబుతున్నాయి. ఈ చర్య ద్వారా.. కేటీఆర్‌ పార్టీపైన మరింత గట్టి పట్టు సాధిస్తారని కేసీఆర్‌ భావిస్తున్నట్లు సమాచారం. 2019 ఎన్నికల నాటికి, పార్టీ వర్కింగ్‌ ప్రెసిడెంట్‌ హోదాలో.. ముఖ్యమంత్రి కేసీఆర్‌ సూచనలతో.. కేటీఆర్‌ తన విన్నింగ్‌ టీమ్‌ను ఎంచుకునే వీలుంటుందని చెబుతున్నారు.

రాజకీయంగా పట్టు సాధించే దిశగా.. కేటీఆర్‌ కొంతకాలంగా జిల్లాల పర్యటనల్లో బాగా బిజీగా ఉన్నారు. ఇటీవల గద్వాల, తుంగతుర్తి, వరంగల్‌, కోదాడ పట్టణాల్లో విస్తృతంగా పర్యటించారు. ఎక్కడికక్కడ విపక్ష కాంగ్రెస్‌పై విరుచుకుపడుతున్నారు. పార్టీ శ్రేణుల్లో స్థైర్యాన్ని పెంచడం.. భావి యువ నాయకత్వాన్ని గుర్తించడం.. లక్ష్యాలుగానే కేటీఆర్‌ ఈ పర్యటనలు చేస్తున్నారని పార్టీ శ్రేణులు విశ్వసిస్తున్నాయి. ముఖ్యమంత్రి కేసీఆర్‌.. తనయుడు కేటీఆర్‌కు పార్టీ పగ్గాలు అప్పగించడంతో పాటు.. తనయ కవితకూ రాష్ట్ర రాజకీయాల్లో కీలక భూమిక అప్పగించనున్నారని ప్రచారం జరుగుతోంది. కవిత కూడా కొంతకాలంగా రాష్ట్ర రాజకీయాలపైనే మక్కువ చూపుతున్నట్లు చెబుతున్నారు. పైగా కేసీఆర్‌ జాతీయ రాజకీయాల్లోకి వెళుతున్న నేపథ్యం వల్ల కూడా కవితకు రాష్ట్ర రాజకీయాల్లో కీలకమైన బాధ్యతలు అప్పగించ వచ్చని తెలుస్తోంది. అయితే.. కేటీఆర్‌, హరీశ్‌రావుల తర్వాతే.. కవితకు బాధ్యతలు అప్పగిస్తారని పార్టీ శ్రేణులు అభిప్రాయపడుతున్నాయి. 

16:28 - April 25, 2017

హైదరాబాద్‌ :నగంలోని కాంటినెంటల్‌ ఆస్పత్రిలో చికిత్స పొందుతున్న ప్రభుత్వ సలహాదారు ఆర్‌. విద్యాసాగర్‌ రావును ముఖ్యమంత్రి కేసీఆర్‌ పరామర్శించారు. ఆయన ఆరోగ్య పరిస్థితిని డాక్టర్లను అడిగి తెలుసుకున్నారు. కుటుంబసభ్యులతో మాట్లాడారు. వైద్య చికిత్సకు విద్యాసాగర్‌ రావు బాగా స్పందిస్తున్నారని వైద్యులు తెలిపారు. త్వరలోనే కోలుకుంటారని ఆశాభావం వ్యక్తం చేశారు. మంగళవారం వెంటిలేషన్‌ లేకుండా శ్వాస తీసుకోగలిగారని వైద్యులు సీఎంకు తెలిపారు. 

16:16 - April 25, 2017

సూర్యపేట : జిల్లాలోని హూజుర్ నగర్ లో టీఆర్ఎస్ పార్టీలో మరోసారి వర్గ పోరు మొదలైయింది. వరంగల్ బహిరంగ సభ సన్నాహక కార్యకర్తల సమావేశం రసాభాసగా మారింది.శంకరమ్మ మండల స్థాయి నాయకులకు సమాచారం లేకుండా ఏకపక్ష నిర్ణయం తీసుకుంటున్నారని ఓ వర్గం ఆరోపిస్తోంది. పరిశీలకునిగా వచ్చిన ఎమ్మెల్సీ పల్లా రాజేశ్వర్ రెడ్డి ముందే ఇరువర్గాలు గొడవకు దిగారు.దీంతో ఆయన ఇరువర్గాలను సముదాయించే ప్రయత్న చేశారు. అయితే శంకరమ్మ స్థానిక నేత కాకపోవడంతో మొదటి నుంచి అక్కడి నేతలు ఆమెను వ్యతిరేకిస్తున్నారు. 

17:48 - April 21, 2017

హైదరాబాద్: ఆరునూరైనా ఈ ఏడాది చివరి నాటికి తెలంగాణలోని ప్రతిపల్లెకు కృష్ణా, గోదావరి నీటిని సరఫరా చేసి తెలంగాణ దాహర్తిని తీరుస్తామన్నారు సీఎం కేసీఆర్‌. తెలంగాణ వస్తే రాష్ట్రం చీకట్లోకి మగ్గిపోతుందని ఆనాడు సీఎంగా ఉన్న కిరణ్‌కుమార్‌రెడ్డి అసత్య ప్రచారం చేశారని..కానీ రాష్ట్ర ఆవిర్భావం తర్వాత విద్యుత్‌ కష్టాలను తీర్చి కరెంటు కోతల్లేకుండా చేశామన్నారు. మిషన్‌భగీరత, మిషన్‌కాకతీయ పథకాలకు ప్రపంచవ్యాప్తంగా మంచి గుర్తింపు వచ్చిందని సీఎం కేసీఆర్‌ అన్నారు.  నకిలీ విత్తనాల విక్రేతలపై ఉక్కుపాదం మోపుతామన్నారు కేసీఆర్. ప్లీనరీ ముగింపు ప్రసంగంలో కీలక ఉపన్యాసం చేసిన కేసీఆర్... నకిలీ విత్తనాలు విక్రయించే ఊరుకునేది లేదన్నారు. వరంగల్ సభ తరువాత అసెంబ్లీ సమావేశాలు నిర్వహించి.. ప్రత్యేక చట్టం చేస్తామన్నారు.

 

 

13:59 - April 21, 2017

హైదరాబాద్ : మరికొద్ది రోజుల్లో హైదరాబాద్‌ వాసులకు తాగునీటి కష్టాలు తీరనున్నాయని మున్సిపల్‌ శాఖ మంత్రి కేటీఆర్‌ అన్నారు. ప్రభుత్వం ఆ దిశగా చర్యలు తీసుకుంటుందని అన్నారు. ఈ ఏడాది వర్షాలు సమృద్ధిగా పడితే నగరంలో ప్రతిరోజు నీటిని సరఫరా చేస్తామని కేటీఆర్‌ ప్రకటించారు.  
నాలుగు రిజర్వాయర్లు ప్రారంభం 
హైదరాబాద్‌ మెట్రో వాటర్‌ సప్లై అండ్‌ సివరేజ్‌ బోర్డు నిర్మించిన నాలుగు రిజర్వాయర్లను మున్సిపల్‌ శాఖ మంత్రి కేటీఆర్‌ ప్రారంభించారు. ఈ రిజర్వాయర్లను మెగా ఇంజనీరింగ్‌ సంస్థ కేవలం 11 నెలల వ్యవధిలో నిర్మించింది. ప్రజలకు నీటి కొరతను తీర్చాలనే లక్ష్యంతో కూకట్‌పల్లి...మియాపూర్‌, నల్లగండ్ల, గోపాన్‌పల్లి ప్రాంతాల్లో నాలుగు రిజర్వాయర్లను నిర్మించారు. నగర శివారు ప్రాంతాల్లో తాగునీటి ఇబ్బందులు తొలగించేందుకు రూ.1900 కోట్లతో 56 రిజర్వాయర్లు నిర్మించేందుకు వాటర్‌ బోర్డు నిర్ణయం తీసుకుంది.
నగరవాసులకు మిషన్ భగీరథ ఫలితాలు : కేటీఆర్ 
మిషన్‌ భగీరథ తొలి ఫలితాలు నగరవాసులకు అందుతున్నాయని మంత్రి కేటీఆర్‌  అన్నారు. నగరంలో తాగునీటి సమస్యను తొలగించేందుకు మరో 42 రిజర్వాయర్లను అందుబాటులోకి తెస్తామని..అన్నారు. ఆగస్టు నాటికి 10 రిజర్వాయర్లు ఉపయోగంలోకి తీసుకువస్తామన్నారు. జనాభా ఐదు రెట్లు పెరిగినా నీటికి ఇబ్బందులు ఉండకుండా తమ ప్రభుత్వం ప్లాన్‌ చేస్తుందన్నారు. ఈ మేరకు శామీర్‌ పేట్‌ ప్రాంతంలో 20 టీఎంసీల సామర్థ్యం గల భారీ రిజర్వాయర్‌ను 7వేల 700 కోట్లతో నిర్మించేందుకు ప్లాన్‌ చేస్తున్నామన్నారు. అలాగే ఔటర్‌ రింగ్‌ రోడ్డు లోపల ఉన్న 168 గ్రామాలకు కూడా నీటిని సరఫరా చేస్తామని అందుకోసం రూ.628 కోట్లు ఖర్చుచేస్తున్నామన్నారు. 
అన్ని కుటుంబాలకు నల్లా కనెక్షన్లు : కేటీఆర్ 
అన్ని కుటుంబాలకు నల్లా కనెక్షన్లు ఉండాల్సిన అవసరం ఉందని.. ప్రత్యేక డ్రైవ్‌ నిర్వహించి మరీ  ప్రభుత్వం నల్లా కనెక్షన్లు ఇస్తుందని మంత్రి కేటీఆర్‌ అన్నారు. అలాగే నాలాలు.. చెరువుల కబ్జాలపై కఠినంగా ఉంటామన్నారు. నాలాలపై నిర్మాణాలను తొలగించేందుకు చర్యలు తీసుకుంటామని కేటీఆర్‌ అన్నారు.   

 

09:43 - April 21, 2017

హైదరాబాద్ : తెలంగాణ రాష్ట్ర ముఖ్యమంత్రి శుక్రవారం ఢిల్లీకి పయనం కానున్నారు. ఈ రోజు జరిగే టీఆర్ఎస్ ప్లీనరీ సమావేశంలో పాల్గొన్న అనంతరం రాత్రికి ఆయన బయలుదేరనున్నారు. ప్రధాని నరేంద్రమోడీ అధ్యక్షతన శనివారం రాష్ట్రపతి భవన్‌లో జరిగే నీతి అయోగ్‌ గవర్నింగ్ కౌన్సిల్‌ మూడో సమావేశంలో కేసీఆర్‌ పాల్గొంటారు. ఈ సమావేశంలో ప్రధానంగా 2030 విజన్‌ డాక్యుమెంట్‌పై చర్చ జరగనుంది. కాగా మీటింగ్‌ అనంతరం ప్రధానితో సీఎం కేసీఆర్‌ కొద్దిసేపు ఏకాంతంగా భేటి అవ్వనున్నట్టు సమాచారం. ముస్లీం మైనార్టీలకు ప్రత్యేక రిజర్వేషన్లు కల్పించాలని తీసుకున్న నిర్ణయంపై చర్చించనున్నట్టు తెలుస్తోంది. 

Pages

Don't Miss

Subscribe to RSS - trs plenary