ts assembly

06:57 - September 5, 2018

హైదరాబాద్ : తెలంగాణలో ముందస్తు ఎన్నికల ప్రచారం జోరుగా సాగుతోంది. ఇదే అంశం రాష్ట్రంలో చర్చనీయాంశంగా మారింది. ముందస్తు ఎన్నికల అంశం రాజకీయ సెగను రేపింది. ఆయా పార్టీలు ముందస్తు ఎన్నికలకు సిద్ధమవుతున్నట్లు తెలుస్తోంది. ముందస్తు ఎన్నికల ఊహాగానాలు జోరందుకున్న తరుణంలో అసెంబ్లీ రద్దుకు ముహూర్తం ఖరారైనట్టు తెలుస్తోంది. ముందస్తు ఎన్నికలకు ముహూర్తం ఖరారైంది. ప్రగతి నివేదన సభ తర్వాత సీఎం కేసీఆర్‌ ముందస్తు దూకుడును పెంచారు. ఈనెల 6వ తేదీ ఉదయం 6.45 నిముషాలకు ఆయన మంత్రివర్గ సమావేశాన్ని ఏర్పాటు చేశారు. ఈమేరకు మంత్రులందరికీ వర్తమానాన్ని పంపారు. అదేరోజు ఆయన అసెంబ్లీ ని రద్దు చేస్తూ, గవర్నర్‌ను కలుస్తారని ప్రచారం జరుగుతోంది. దీన్ని దృవీకరిస్తూ మంగళవారం ప్రభు త్వ సలహాదారు రాజీవ్‌శర్మ, ప్రభుత్వ ప్రధాన కార్యదర్శి ఎస్‌కె జోషీ, రాష్ట్ర ఎన్నికల ముఖ్య అధికారి రజత్‌కుమార్‌, జీహెచ్‌ఎంసీ కమిషనర్‌ దానకిషోర్‌ తదితరులు గవర్నర్‌ను కలిశారు. గవర్నర్‌తో అధికారుల భేటీ రాజకీయ ప్రాధాన్యతను సంతరించుకుంది. నియోజకవర్గాల వారీగా గడచిన నాలుగేండ్లలో ప్రభుత్వం చేపట్టిన అభివృద్ధి కార్యక్రమాల వివరాలన్నింటినీ ప్రభుత్వ ప్రధాన కార్యదర్శి ఎస్‌కె జోషీ మంగళవారం సాయంత్రం జిల్లా కలెక్టర్‌ కార్యాలయాల నుంచి తెప్పించి, సీఎం కేసీఆర్‌కు అందచేసినట్టు సమాచారం. ప్రస్తుతం సీఎం కేసీఆర్‌ తన ఫామ్‌హౌజ్‌ నుంచే మంత్రాంగాన్ని నడిపిస్తున్నారు. 6వ తేదీ అసెంబ్లీ రద్దు చేసి, 7వ తేదీ హుస్నాబాద్‌లో టీఆర్‌ఎస్‌ బహిరంగ సభను ఏర్పా టు చేశారు. ఇక్కడ 65వేల మంది జనాభాను సమీకరించే బాధ్యతను మంత్రులు హరీశ్‌రావు, ఈటల రాజేందర్‌, ఎంపీ వినోద్‌కుమార్‌, ఎమ్మెల్యే సతీష్‌కుమార్‌లకు అప్పగించారు. గతంలో నిర్ణయించినట్టు 50 రోజుల్లో వంద బహిరంగసభల్ని నిర్వహిస్తామని, వీటన్నింటిలో సీఎం కేసీఆర్‌ పాల్గొంటారని మంత్రి హరీశ్‌రావు తెలిపారు. ఈ సభలకు 'ప్రజా ఆశీర్వాద సభ' అని నాయకరణం చేశారు. 
2014 ఎన్నికల ప్రచారాన్ని హుస్నాబాద్‌ నుంచి ప్రారంభించిన సీఎం కేసీఆర్‌ 
2014 ఎన్నికల ప్రచారాన్ని సీఎం కేసీఆర్‌ హుస్నాబాద్‌ నుంచే ప్రారంభించారు. ఇప్పుడు కూడా అదే సెంటిమెంట్‌ను కొనసాగిస్తున్నారని ప్రచారం జరుగుతోంది. గడచిన నాలుగేండ్లలో ఎన్నడూ సీఎం కేసీఆర్‌ ఉదయం పూట మంత్రివర్గ సమావేశాన్ని నిర్వహించిన దాఖలాలు లేవు. మూఢాలు, ముహూర్తాలను విశ్వసించే ఆయన వేదపండితులు, జ్యోతిష్యుల సలహా మేరకే 6వ తేదీ ఉదయం 6.45 నిముషాల కు మంత్రివర్గ సమావేశాన్ని ఏర్పాటు చేసినట్టు తెలుస్తోంది. ఈ సమావేశం కాగానే గవర్నర్‌కు రాజీనామా ఇస్తారా లేక రాత్రికి ఇస్తారా అనే దానిపై స్పష్టత రావల్సి ఉంది. బుధవారం మధ్యాహ్నం 2 గంటలకు సీఎం కేసీఆర్‌ మత్స్యకారుల కోసం మరో కొత్త పథకాన్ని ప్రారంభించాల్సి ఉంది. ఆ కార్యక్రమాన్ని సీఎం హౌదాలో చేస్తారా లేక ఆపద్ధర్మ ముఖ్యమంత్రి హౌదాలో వెళ్తారా అనే అంశం ఇప్పుడు చర్చనీయాంశంగా మారింది. మరోవైపు ప్రభుత్వ సలహాదారు రాజీవ్‌శర్మ ఇటీవల సీఎం కేసీఆర్‌ ఢిల్లీ పర్యటన సందర్భంగా కేంద్ర ఎన్నికల సంఘం ప్రధాన కమిషనర్‌తో భేటీ అయిన విషయం తెలిసిందే. ఓటర్ల జాబితా అంశాలను ప్రస్తావించడానికే తాను ఎన్నికలసంఘం ప్రధాన కమిషనర్‌ను కలిసినట్టు అప్పట్లో రాజీవ్‌శర్మ తెలిపారు. ఇప్పుడు కూడా కేంద్ర ఎన్నికల సంఘం రాష్ట్ర ప్రధానాధికారి, ప్రభుత్వ ప్రధాన కార్యదర్శితో కలిసి ఆయన గవర్నర్‌ను కలవడం 'ముందస్తు' వేగంలో భాగమేనని చర్చ జరుగుతోంది.

 

12:09 - August 16, 2018

హైదరాబాద్ : తెలంగాణ ముఖ్యమంత్రి కేసీఆర్‌ అసెంబ్లీ ఎన్నికలకు వెళ్లేందుకు ఎందుకు సిద్ధమవుతున్నారన్న చర్చలు రాజకీయ వర్గాల్లో జోరుగా సాగుతున్నాయి. ఎన్నికలకు దాదాపు ఇంకా 8 నెలలు గడువున్నా... నాలుగు నెలల్లోనే ఎన్నికలను ఎదుర్కొనేందుకు సిద్ధమవుతుండడం భిన్నవాదనలకు తెరతీస్తోంది. దీంతో అధికార పార్టీ ముందస్తుకు వెళ్లడానికి కారణాలేమిటన్న ఉత్కంఠ అందరిలోనూ రేపుతోంది. కేసీఆర్‌ ముందస్తు వ్యూహంపై ప్రత్యేక కథనం..

జమిలీ ఎన్నికలకు సై అన్న తెలంగాణ ముఖ్యమంత్రి కల్వకుంట్ల చంద్రశేఖరరావు ఒక్కసారిగా గేర్‌ మార్చారు. దేశంలో జమిలీ ఎన్నికలు రావన్న స్పష్టత ఇస్తూనే తాము అసెంబ్లీ ఎన్నికలకు సిద్ధమవుతున్నట్టు సంకేతాలు ఇస్తున్నారు. రాజకీయంగా తెలంగాణలో ప్రస్తుతం ఉన్న పరిస్థితులను బేరీజు వేసుకున్న గులాబీ దళపతి.. ఎన్నికలకు వెళ్లడానికే ఆసక్తిగా ఉన్నట్టు తెలుస్తోంది. ప్రస్తుతం తెలంగాణలో రాజకీయ పార్టీల బలాబలాలను కూడా అంచనా వేసుకుంటున్న గులాబీబాస్‌... ఎన్నికలకు ఇదే అసలైన సమయం అన్న భావనలో ఉన్నట్టు పార్టీ వర్గాలు చెబుతున్నాయి. తెలంగాణలో ప్రస్తుతం ప్రధాన ప్రతిపక్షమైన కాంగ్రెస్‌ పార్టీ నేతల్లో ఐక్యత లోపించడం తమకు కలిసి వస్తుందన్న యోచనలో కేసీఆర్‌ ఉన్నారు. ఎన్నికల గడువు నాటికి అన్ని రాజకీయ పార్టీలు కూడా పూర్తిస్థాయిలో సన్నద్ధం అయ్యేలోపే ఎన్నికలను పూర్తి చేస్తే సంపూర్ణ మెజార్టీతో మరోసారి అధికార పగ్గాలు దక్కించుకోవచ్చన్న ధీమా గులాబీ దళపతిలో కనిపిస్తోంది.

అసెంబ్లీ, పార్లమెంట్‌కు ఒకేసారి ఎన్నికలు జరిగితే ప్రాంతీయ పార్టీగా కొంత ఇబ్బందులు ఎదురయ్యే అవకాశం ఉంటుందన్న అనుమానాలు టీఆర్‌ఎస్‌ నేతల్లో వ్యక్తమవుతోంది. జాతీయ అంశాలు, జాతీయ పార్టీలైన కాంగ్రెస్‌, బీజేపీ ప్రభావం ఓటర్లను ప్రభావితం చేసే చాన్స్‌ కూడా ఉంటుందనే ఆందోళన గులాబీ నేతల్లో ఉంది. అసెంబ్లీకి మాత్రమే ఎన్నికలు ఎదుర్కొంటే ఆ తర్వాత వచ్చే పార్లమెంట్‌ ఎన్నికల్లోనూ మెజార్టీ స్థానాలు దక్కించుకునే అవకాశం ఉంటుందని అంచనా వేస్తున్నారు. తెలంగాణ ప్రభుత్వం అమలు చేస్తోన్న సంక్షేమ కార్యక్రమాలతో పాటు రైతుబంధు, రైతు బీమాలాంటి పథకాలు పార్టీకి లబ్ది చేకూర్చే అవకాశం ఉందన్న ధీమా టీఆర్‌ఎస్‌ నేతల్లో కనిపిస్తోంది. ఎన్నికల నాటికి కాళేశ్వరం ప్రాజెక్టు పనులను ప్రారంభిస్తూ... మిషన్‌ భగీరథను అమలు చేసేందుకు గులాబీబాస్‌ రెడీ అవుతున్నట్టు తెలుస్తోంది. మొత్తానికి తెలంగాణలో అసెంబ్లీ ఎన్నికలకు గడువుకంటే ముందే వెళితే తమదే అధికారమని కేసీఆర్‌ భావిస్తున్నారు.

10:28 - August 15, 2018

హైదరాబాద్ : గోల్కొండలో ఏర్పాటు చేసిన 72వ స్వాతంత్ర వేడుకల్లో సీఎం కేసీఆర్ పాల్గొని జాతీయ జెండాను ఆవిష్కరించారు. కోటలోని రాణీమహల్‌ వద్ద సీఎం కేసీఆర్‌ జెండా ఎగరవేశారు. అనంతరం పోలీసులు గౌరవ వందనాన్ని స్వీకరించారు. అనంతరం తెలంగాణ ప్రజలకు స్వాతంత్ర్య దినోత్సవ దినోతవ్స శుభాకాంక్షలను తెలిపారు. ఈ సందర్భంగా ఆయన ప్రసంగిస్తు.. రాష్ట్ర ఆవిర్భావం అనంతరం ఐదవసారి జాతీయ జెండాను ఎగురవేయటం సంతోషంగాను..గర్వంగాను వుందన్నారు. రాష్ట్ర ఆవిర్భావం తరువాత ప్రజల ఆకాంక్షలకు అనుగుణంగా పాలన సాగిస్తున్నామన్నారు. టీఆర్ఎస్ ప్రభుత్వం చేపట్టిన సంక్షేమ పథకాలతో ప్రజలు సంతోషంగా వున్నారని..అణగారిన ప్రజలకు సంక్షేమ పథకాలు అండగా నిలిచాయన్నారు. రాష్ట్రం ఆవిర్భవించిన అతి తక్కువ కాలంలోనే దేశానికి ఆదర్శవంతమైన అభివృద్ది నమూనాను తెలంగాణ అందించిందనీ..సమైక్య రాష్ట్రంలో కుదేలైన రంగాలన్నింటినీ పునరుత్తేజం కల్పించామని..అనూహ్యమైన ప్రగతి సాధించామని తెలిపారు.

దేశానికి ఆదర్శంగా రైతుబంధు : కేసీఆర్
రైతుబంధు పథకం ద్వారా రైతన్నలకు పంటలపై బీమాను కల్పించి రైతులకు ధీమాను కల్పించామని..ఇది దేశ చరిత్రలోనే తొలిసారి అని..ఇది దేశవ్యాప్తంగా ఆదర్శంగా నిలిచిందని సీఎం కేసీఆర్ తెలిపారు. కోటి ఎకరాలకు సాగునీరు అందించటమే లక్ష్యంగా కృషి చేస్తున్నామని కేసీఆర్ తెలిపారు. ప్రాజెక్టుల నిర్మాణం కోసం భారీ బడ్జెట్ ను ప్రభుత్వం కేటాయించిందన్నారు. వివిధ ప్రాజెక్టులు నిర్మాణాలు కొనసాగుతున్నాయనీ..వాటిని త్వరలోనే పూర్తి చేసి సాగునీటికి కొరతలేకుండా చేసేందుకు అన్ని చర్యలు తీసుకుంటున్నామన్నారు. వ్యవసాయంతోపాటు వివిధ రంగాలకు విద్యుత్ సరఫరా చేస్తున్నామని..త్వరలోనే మిగులు విద్యుత్ రాష్ట్రంగా తెలంగాణ ఏర్పడుతుందని సీఎం కేసీఆర్ తెలిపారు. 

17:43 - May 24, 2018

హైదరాబాద్ : హైకోర్టు తీర్పు ప్రకారం తమ శాసనసభ్యత్వాలను పునరుద్ధరించడంతోపాటు భద్రత కల్పించాలని కోరుతూ తెలంగాణ కాంగ్రెస్‌ నేతలు కోమటిరెడ్డి వెంకటరెడ్డి, సంపత్‌ డిమాండ్‌ చేశారు. ఈ మేరకు డీజీపీ మహేందర్‌రెడ్డిని కలిసి వినతిపత్రం అందజేశారు. లేనిపక్షంలో పరిణామాలు తీవ్రంగా ఉంటాయంటున్న సంపత్ కుమార్‌, కోమటిరెడ్డి వెంకటరెడ్డితో టెన్ టివి ఫేస్‌ టూ ఫేస్‌ నిర్వహించింది. ఈ సందర్భంగా వారు మాట్లాడుతూ లేకపోతే డీజీపీ ఆఫీసును ముట్టడిస్తామని హెచ్చరించారు. రాహుల్‌ అనుమతిలో టీఆర్‌ఎస్‌ అరాచకాలపై ఢిల్లీలో ధర్నా చేస్తామని చెప్పారు.

 

08:54 - May 3, 2018

హైదరాబాద్ : కాంగ్రెస్‌ నాయకులు కోమటిరెడ్డి వెంకటరెడ్డి, సంపత్‌కుమార్‌ శాసనసభ్యత్వం రద్దుపై హైకోర్టు డివిజన్‌ బెంచ్‌లో వాదనలు ముగిశాయి.ఈ కేసులో సింగిల్‌ జడ్జి బెంచ్‌ ఇచ్చిన తీర్పును సవాల్‌ చేస్తూ 12 మంది టీఆర్‌ఎస్‌ ఎమ్మెల్యేలు డివిజన్‌ బెంచ్‌కి అప్పీల్‌ చేశారు. పిటిషనర్ల తరుపున వైద్యనాథన్‌  వాదనలు వినిపించారు.  కోమటిరెడ్డి, సంపత్‌కుమార్‌ తరుపున అభిషేక్‌ మను సింఘ్వి వాదించారు. పిటిషన్‌ వేసిన 12 మంది టీఆర్‌ఎస్‌ ఎమ్మెల్యేల్లో ఎక్కువ మంది పార్టీ ఫిరాయించిన వారేనని, ఇలాంటి వారు కేసు వేసే అర్హతలేదని సింఘ్వి వాదించారు. అయితే  సభలో సభ్యులకు కేసు వేసే అర్హత ఉందని వైద్యనాథన్‌ వాదనలు వినిపించారు. ఇరుపక్షాల వాదనలు విన్న హైకోర్టు డివిజన్‌ బెంచ్‌ తీర్పును రిజర్వు చేసింది. 
 

 

17:28 - April 26, 2018

హైదరాబాద్ : కాంగ్రెస్ ఎమ్మెల్యేలు కోమటిరెడ్డి, సంపత్ ల శాసన సభ సభ్యత్వ రద్దు కేసులో కోర్టు తీర్పును టీఆర్ఎస్ ఎమ్మెల్యేలు సవాల్ చేశారు. కోమటిరెడ్డి, సంపత్ ల సభ్యత్వ రద్దు కేసులో వారి సభ్వత్వం కొనసాగుతుందని కోర్టు సింగిల్ బెంచ్ ఇచ్చిన తీర్పును టీఆర్ఎస్ ఎమ్మెల్యేలు సవాలు చేస్తు పిటీషన్ వేశారు. 12మంది టీఆర్ఎస్ ఎమ్మెల్యేల తరపున వేసిన పిటీషన్ ను కోర్టు విచారించింది. టీఆర్ఎస్ తరపున న్యాయవాది వైద్యనాథన్ తన వాదనలకు వినిపించారు.కోమటిరెడ్డి, సంపత్ ల తరపున న్యాయవాది రవిశంకర్ తన వాదనలు వినిపించగా కేసు విచారణను కోర్టు రేపటికి వాయిదా వేసింది. ఈ నేపథ్యంలో కారణం లేకుండా సభ్యుడి అసెంబ్లీ సభ్యత్వాన్ని ఎలా రద్దు చేస్తారని ధర్మాసనం ప్రశ్నించింది. అనంతరం కేసును రేపటికి వాయిదా వేసింది. కాగా అసెంబ్లీ సమావేశాలలో కాంగ్రెస్ ఎమ్మెల్యేలు కోమటిరెడ్డి, సంపత్ లు శాసన మండలి చైర్మన్ స్వామిగౌడ్ పై ఇయర్ ఫోన్ విసిరిన నేపథ్యంలో వారిద్దరి సభ్యత్వాన్ని రద్దు చేసిన విషయం తెలిసిందే. ఈ విషయంపై కోర్టును ఆశ్రయించిన ఎమ్మెల్యేలకు అనుగుణంగా తీర్పుకూడా వెలువడింది. ఈ తీర్పును ఇప్పుడు టీఆర్ఎస్ ఎమ్మెల్యేలు సవాలు చేస్తు పిటీషన్ దాఖలు చేసారు. 

06:35 - April 2, 2018

హైదరాబాద్ : కేసీఆర్‌ది మాటల ప్రభుత్వమే కానీ.. చేతల ప్రభుత్వం కాదని విమర్శించారు సీఎల్పీనేత జానారెడ్డి. రాష్ట్ర బడ్జెట్‌లో లోటును కూడా మిగులుగా చూపిస్తూ.. కేసీఆర్‌ ప్రభుత్వం తప్పుదోవ పట్టిస్తోందన్నారు. రాష్ర్టం అప్పుల బాటలో నడుస్తోందని కాగ్ నివేదిక తేట తెల్లం చేసిందన్నారు. విపక్షాలు, ప్రజాసంఘాలపై ప్రభుత్వం అణచి వేత ధోరణిని అవలంబించడం మానుకోవాలని జానా సూచించారు. 

08:14 - March 31, 2018

రాష్ట్ర ప్రభుత్వ పథకాల్లోని లోపాలను ఎత్తిచూపుతూ కాగ్‌ ఇచ్చిన నివేదికపై పలు విమర్శలు వెల్లువెత్తుతున్నాయి. మిషన్‌ భగీరథ, మిషన్‌ కాకతీయ పథకాలతోపాటు సాగునీటి ప్రాజెక్టుల నిర్మాణం, అభివృద్ధి, సంక్షేమ కార్యక్రమాల అమల్లో చోటు చేసుకుంటున్న లోపాలను కాగ్‌ నివేదిక ఎత్తి చూపింది. జీహెచ్‌ఎంసీ, వైద్యారోగ్య శాఖలో రాజ్యమేలుతున్న అవినీతిని కాగ్‌ బట్టబయలు చేసింది. ఈ అంశంపై టెన్ టివిలో జరిగిన చర్చా వేదికలో శివకుమార్ (టీఆర్ఎస్), వీరయ్య (విశ్లేషకులు), శ్రీకాంత్ (కాంగ్రెస్) పాల్గొని అభిప్రాయాలు వ్యక్తం చేశారు. 

21:56 - March 30, 2018

హైదరాబాద్ : రాష్ట్ర ప్రభుత్వ పథకాల్లోని లోపాలను ఎత్తిచూపుతూ కాగ్‌ ఇచ్చిన నివేధిక విపక్షాలకు ఆయుధంగా మారింది. కాగ్‌ రిపోర్టును పట్టుకుని ప్రతిపక్షాలు టీఆర్‌ఎస్‌ ప్రభుత్వంపై ముప్పేట దాడి మొదలు పెట్టాయి. కాగ్‌ ప్రస్తావించిన పాలకపక్షం తప్పిదాలను ప్రజల్లోకి తీసుకెళ్లేందుకు సిద్ధమవుతున్నాయి. అప్పులను కూడా ఆస్తులుగా బడ్జెట్‌లోచూపిన ముఖ్యమంత్రి కేసీఆర్‌ ప్రభుత్వ వైఖరిని ప్రజాక్షేత్రంలో ఎండగట్టేందుకు ముందుకు సాగుతున్నాయి.

టీఆర్‌ఎస్‌ ప్రభుత్వం ప్రతిష్ఠాత్మకంగా అమలు చేస్తున్న మిషన్‌ భగీరథ, మిషన్‌ కాకతీయ పథకాలతోపాటు సాగునీటి ప్రాజెక్టుల నిర్మాణం, అభివృద్ధి, సంక్షేమ కార్యక్రమాల అమల్లో చోటు చేసుకుంటున్న లోపాలను కాగ్‌ నివేదిక ఎత్తి చూపింది. ఇప్పుడు ఈ నివేదకను ఆయుధంగా చేసుకుని విపక్షాలు ప్రభుత్వాన్ని టార్గెట్‌ చేస్తున్నాయి. 

రాష్ట్ర ప్రభుత్వంలో ఆర్థిక క్రమశిక్షణ లోపించిన విషయాన్ని కాగ్‌ ప్రస్తావించింది. నత్తనడకన సాగుతున్న పథకాలు, కాంట్రాక్టర్లకు అధిక చెల్లింపులు, జీహెచ్‌ఎంసీ, వైద్యారోగ్య శాఖలో రాజ్యమేలుతున్న అవినీతిని కాగ్‌ బట్టబయలు చేసిన విషయాన్ని కాంగ్రెస్‌ ఎమ్మెల్సీ పొంగులేటి సుధాకర్‌రెడ్డి గుర్తు చేస్తున్నారు.  

టీఆర్‌ఎస్‌ ప్రభుత్వం రాష్ట్రాన్ని అప్పుల కుప్పగా మార్చిందని కాగ్‌ వేలెత్తి చూపిన విషయాన్ని తెలంగాణ కాంగ్రెస్‌ నేతలు గుర్తు చేస్తున్నారు. ప్రాజెక్టుల పేరుతో తెస్తున్న అప్పుల నుంచి కమీషన్లు దండుకుంటున్నారని ఆరోపించారు. దీనిపై ఎలాంటి బహిరంగ చర్చకైనా సిద్ధమని టీపీసీసీ అధికార ప్రతినిధి దాసోజు శ్రవణ్‌ సవాల్‌ విసిరారు. కాగ్‌ రిపోర్టుపై చర్చించేందుకు వెంటనే అసెంబ్లీ, మండలిని సమావేశపరచాలని డిమాండ్‌ చేశారు. రాష్ట్ర ప్రభుత్వం తీసుకొస్తున్న అప్పులను కూడా ఆదాయంగా చూపిన టీఆర్‌ఎస్‌ సర్కారు వైఖరిని బీజేపీ తప్పు పట్టింది. ఆర్థిక క్రమశిక్షణ గాడితప్పిందని కాగ్‌  ప్రస్తావించిన విషయాన్ని ఆ పార్టీ రాష్ట్ర అధ్యక్షుడు లక్ష్మణ్‌ గుర్తు చేశారు. 


మిషన్‌ భగీరథ పనుల్లో నాణ్యత లోపించిందని కాగ్‌ ప్రస్తావించిన విషయాన్ని తెలంగాణ టీడీపీ నాయకులు గుర్తు చేస్తున్నారు. కాగ్‌ నివేదిక రాష్ట్రానికి చెంపపెట్టని  ఆ పార్టీ ఎమ్మెల్యే ఆర్‌ కృష్ణయ్య వ్యాఖ్యానించారు. టీఆర్‌ఎస్‌ ప్రభుత్వంపై తాము చేస్తున్న అవినీతి ఆరోపణలు వాస్తవమని నివేదిక ద్వారా రుజువైందని విపక్ష నేతలు చెబుతున్నారు. కాగ్‌ రిపోర్టుపై రేగుతున్న రాజకీయ దుమారాన్ని టీఆర్‌ఎస్‌ పాలకులు, నాయకులు ఎలా చల్లపరుస్తారో చూడాలి. 

21:50 - March 30, 2018

హైదరాబాద్ : గిరిజన తండాల్లో ఇక నుంచి మీరే నాయకులని లంబాడా ప్రతినిధులనుద్దేశించి అన్నారు సీఎం కేసీఆర్‌. తండాలను గ్రామపంచాయతీలుగా గుర్తించినందుకు ప్రగతిభవన్‌లో కేసీఆర్‌ను కలిసి గిరిజనులు కృతజ్ఞతలు తెలిపారు. నూతన పంచాయతీరాజ్‌చట్టం ప్రకారం రాష్ట్రంలో 3 వేల మంది గిరిజనులు సర్పంచులుగా ఉండే అవకాశం ఉందని... అందరూ కలిసి నూతన గిరిజన గ్రామపంచాయతీలను అభివృద్ధి చేసుకుంటే... పేదరికం తొలగిపోతుందన్నారు సీఎం. తెలంగాణలో గిరిజనులు గొప్పగా ఉన్నారనే పేరు తెచ్చుకోవాలన్నారు.

Pages

Don't Miss

Subscribe to RSS - ts assembly