TS politics

21:20 - December 3, 2017

హైదరాబాద్ : బీసీలు అన్ని రంగాల్లో అభివృద్ధి చెందాలన్నదే ప్రభుత్వ లక్ష్యమని సీఎం కేసీఆర్‌ అన్నారు. బీసీల సంక్షేమం-అభివృద్ధి కోసం తీసుకోవాల్సిన చర్యలపై బీసీ వర్గాలకు చెందిన ఎంపీలు, ఎమ్మెల్యేలు, ఎమ్మెల్సీలతో సీఎం కేసీఆర్‌ అసెంబ్లీలోని కమిటీ హాలులో సమావేశం నిర్వహించారు. రాష్ట్రంలో సగానికి పైగా ఉన్న బీసీల కోసం ప్రజాప్రతినిధులు సమయం వెచ్చించి, లోతుగా అధ్యయనం చేసి విధానాలు రూపకల్పన చేయాలని సీఎం కేసీఆర్‌ అన్నారు. బీసీల అభ్యున్నతి కోసం ఇప్పటికే ప్రభుత్వం అనేక కార్యక్రమాలు అమలు చేసిందని చెప్పారు. బీసీల జీవన ప్రమాణాలు మరింతగా పెరగాలంటే మరిన్ని చర్యలు తీసుకోవాల్సిన అవసరముందన్నారు. రాజకీయాలకతీతంగా బీసీ వర్గాలకు చెందిన ప్రజాప్రతినిధులు అన్ని కులాల అభిప్రాయాలు తీసుకుని ఏం చేయాలో ప్రభుత్వానికి దిశా నిర్ధేశం చేయాలని సీఎం కోరారు.

సీఎం చెప్పిన విధంగా తమ వంతు కృషిగా బీసీల డిమాండ్‌ లను విశ్లేషించి నివేధిక ఇస్తామని బీసీ సంఘం నేత ఆర్‌.కృష్ణయ్య అన్నారు. బీసీ కుల దృవీకరణ పత్రాల్లో ఉన్న అవకతవకలను సీఎం దృష్టికి తీసుకెళ్తామని..పూర్తి స్థాయిలో విశ్లేషించి బీసీలకు న్యాయం చేకూరేలా మా వంతు కృషిగా నివేధిక అందిస్తామని బీజేపీ రాష్ట్ర అధ్యక్షులు లక్ష్మణ్‌ అన్నారు.

బీసీల అభివృద్ధి, సంక్షేమం కోసం ప్రభుత్వం ఇప్పటికే అనేక చర్యలు తీసుకుందని సీఎం కేసీఆర్‌ అన్నారు. ఉమ్మడి రాష్ట్రంలో బీసీల కోసం కేవలం 19 రెసిడెన్షియల్ స్కూళ్లు మాత్రమే ఉండేవని.. తెలంగాణ వచ్చిన తర్వాత కొత్తగా 123 రెసిడెన్షియల్ స్కూళ్లు ఏర్పాటు చేశామన్నారు. వీటి ద్వారా 91,520 మంది బీసీ పిల్లలకు అత్యున్నత ప్రమాణాలతో కూడిన విద్య అందుతుందన్నారు. బీసీల కోసం కళ్యాణలక్ష్మి కార్యక్రమం అమలు చేస్తుండటంతో పేదింటి ఆడపిల్లలకి పెండ్లి బాధలు తప్పాయని సీఎం అన్నారు. మార్కెట్ కమిటీల్లో రిజర్వేషన్లు పెట్టడం వల్ల రాష్ట్రంలో 50 మంది బిసిలకు మార్కెట్ చైర్మన్లు అయ్యే అవకాశం కలిగిందన్నారు. బీడీ కార్మికులకు భృతి ఇవ్వాలనే నిర్ణయం వల్ల ఎక్కువ మంది బీసీలు, అందులోనూ పద్మశాలిలకు ఎక్కువ మేలు కలిగిందన్నారు.

రాష్ట్రంలో కుల వృత్తుల వారిని, చేతి వృత్తులను నమ్ముకునే వారిని ప్రోత్సహిస్తున్నట్లు సీఎం కేసీఆర్‌ తెలిపారు. సమైక్య రాష్ట్రంలో హైదరాబాద్‌లో కల్లు దుకాణాలు మూసివేశారని.. దీనివల్ల గీతకార్మికులు ఉపాధి కోల్పోయారన్నారు. తెలంగాణ వచ్చిన వెంటనే కల్లు దుకాణాలు పునరుద్ధరించడంతో.. రాష్ట్రంలోని గీత కార్మికులకు ఎంతో మేలు కలిగిందన్నారు. గీత కార్మికుల కోసం రూ.1200 కోట్ల వ్యయంతో కార్యక్రమాలు అమలు చేస్తున్నామన్నారు.

పవర్ లూమ్‌లను వందశాతం ప్రభుత్వ ఖర్చుతో ఆధునికీకరిస్తున్నామని కేసీఆర్‌ అన్నారు. 50 శాతం సబ్సిడీతో నూలు, రసాయనాలు నేతకార్మికులకు అందిస్తున్నామని.. వారు తయారు చేసిన దుస్తులు, ఇతర ఉత్పత్తులను ప్రభుత్వమే కొనుగోలు చేస్తుందన్నారు. వరంగల్ లో టెక్స్ టైల్ పార్కు పెట్టడం వల్ల ఇతర ప్రాంతాలకు వలసలు పోయిన వారు తిరిగి సొంత గడ్డకు వస్తున్నారని చెప్పారు. సిరిసిల్లలో కాటన్ టు గార్మెంట్ పద్ధతిలో వస్త్ర పరిశ్రమను విస్తరిస్తున్నామని సీఎం అన్నారు. గొల్ల కురుమలకు 75 శాతం సబ్సిడీపై గొర్రెల పంపిణీ కార్యక్రమం చేపట్టామని సీఎం కేసీఆర్‌ గుర్తుచేశారు. పథకం ప్రారంభించిన నాలుగు నెలల సమయంలోనే 29.50లక్షల గొర్రెల పంపిణీ చేశామన్నారు. ఇప్పటికి లక్షా 41వేల కుటుంబాలకు గొర్రెల పంపిణీ జరిగిందని.. మొత్తం 7.30 లక్షల కుటుంబాలకు గొర్రెల పంపిణీ చేస్తామన్నారు. ఈ పథకం ద్వారా గొల్ల, కురమల జీవితంలో గొప్ప మార్పు వస్తున్నదన్నారు.

మత్సకారులకు 100 శాతం సబ్సిడీపై చేపల పంపిణీ చేశామని.. 5వేల కోట్ల రూపాయాలతో మత్స్య పరిశ్రమను అభివృద్ధి చేస్తున్నట్లు సీఎం తెలిపారు. రజకులకు, నాయీ బ్రాహ్మణులకు కూడా అవసరమైన ఆర్థిక సహాయన్ని అందిస్తామన్నారు. విశ్వ బ్రాహ్మణుల కుల వృత్తులను ప్రోత్సహించడానికి రూ.250 కోట్లతో కార్యక్రమాలు అమలు చేస్తామని సీఎం ప్రకటించారు. బీసీ ప్రజాప్రతినిధులంతా రెండు మూడు రోజులు సమావేశాలు నిర్వహించుకుని తమకు ఏం కావాలో నిర్ణయించుకున్న తర్వాత అసెంబ్లీలో చర్చించి అవసరమైన తీర్మానాలు, చట్టాలు, జీవోలు తేవాలని సీఎం నిర్ణయించారు.

11:17 - November 14, 2017
10:17 - November 14, 2017

నాగర్‌కర్నూలు : జిల్లాలోని నారాయణపూర్‌తండాలో పురుగుల మందుతాగి రాజు అనే యువకుడు ఆత్మహత్య చేసుకున్నాడు. రంగారెడ్డి జిల్లా తలకొండపల్లి ఎస్సై సైదాబాద్‌ వేధింపులే కారణమని ఆరోపిస్తూ రాజు సెల్ఫీ వీడియో తీసి సూసైడ్‌ చేసుకున్నాడు. రాజు మృతికి కారణమైన ఎస్సై సైదాబాద్‌పై చర్యలు తీసుకోవాలని కుటుంబ సభ్యులు డిమాండ్ చేస్తున్నారు.  

 

10:47 - November 1, 2017

గుంటూరు : కాసేపట్లో టీడీపీ సమన్వయ కమిటీ భేటీ జరుగనుంది. చంద్రబాబు అధ్యక్షతన అమరావతిలో సమావేశం నిర్వహించనున్నారు. ఈ సమావేశానికి ఏపీ, తెలంగాణ టీడీపీ నేతలు హాజరుకానున్నారు. ఇంటింటికీ తెలుగుదేశం కార్యక్రమం అమలుపై సమీక్ష చేయనున్నారు. నామినేటెడ్ పోస్టుల భర్తీ, జగన్ పాదయాత్రపై చర్చించే అవకాశం ఉంది. 

11:55 - October 23, 2017

అనంతపురం : జిల్లా కరవుకు శాశ్వత చిరునామా. ఈ జిల్లాలో ఎప్పుడూ కరువు విలయతాండవం చేస్తూనే ఉంటుంది. వర్షాలు పడక, సాగునీరు అందక పంటలు పండవు. తాగడానికి నీరు దొరకక అనేక పల్లెలు అలమటిస్తుంటాయి. కానీ వీటన్నిటికి మొన్న కురిసిన కుండపోత వర్షం చెక్‌పెట్టింది. సాగు,తాగునీటి కష్టాలకు పరిష్కారం చూపింది. ఎడతెరపిలేకుండా కురిసిన వర్షాలతో జిల్లాలో ఎక్కడ చూసినా నీరే కనిపిస్తోంది. కొండలు, గుట్టలు, వ్యవసాయ పొలాలు, బీడు భూముల్లో పచ్చదనం పరుచుకుంది. జలాశయాలు, కుంటలు, వాగులు, కాలువలు, చెరువులు వర్షపునీటితో నిండుకుండలా కళకళలాడుతున్నాయి.

ఒక్కసారిగా పరిస్థితి మారిపోయింది
పది రోజులపాటు జిల్లాలో ఎడతెరపిలేకుండా వర్షాలు కురవడంతో పరిస్థితి ఒక్కసారిగా మారిపోయింది. గుక్కెడు నీటికోసం కిలోమీటర్లు నడిచిపోయే బాధ తప్పింది. ఆరుతడి పంటలసాగుకు సైతం నీరివ్వలేమని క్రాఫ్‌ హాలిడే ప్రకటించిన అధికారుల ప్రకటనలకు కాలం చెల్లిపోయింది. గత కొన్నేళ్లుగా తమ ప్రాంతానికి తాగునీటి కేటాయింపుల్లో తీరని అన్యాయం జరుగుతోందని, ఈసారి తమ ప్రాంతానికి తొలిదశలోనే నీటిని విడుదల చేయకపోతే తన పదవికి రాజీనామా చేస్తానంటూ అనంతపురం ఎంపీ జేసీ దివాకర్‌రెడ్డి సంచలన ప్రకటన చేశారు. ఆ వెనువెంటనే తమ ప్రాంతం నుంచే నీటిని విడుదల చేస్తూ తమకు నీరివ్వకపోతే తీవ్రంగా నష్టపోతామంటూ ప్రభుత్వవిఫ్‌ యామినిబాల ప్రత్యక్ష ఆందోళనకుదిగారు. తమ నియోజకవర్గానికి నీటిని తేలేని పరిస్థితుల్లో రైతుల నుంచి తీవ్ర వ్యతిరేకత తప్పదని గ్రహించిన సింగనమల ఎమ్మెల్యే యామినిబాల అధికారుపై యుద్ధమే ప్రకటించారు. మరోవైపు వారం రోజుల్లో నీరు విడుదల చేయకపోతే మూడు నియోజకవర్గాలకు తాగునీరు లేకుండాపోతుందని వెంటనే నీటిని విడుదల చేయాలని ధర్మవరం, కదిరి ఎమ్మెల్యేలు గోనుగుంట్ల సూర్యనారాయణ, అత్తార్‌ చాంద్‌ బాషా ప్రభుత్వంపై ఒత్తిడి పెంచారు.

నేతల రాజకీయాలు
తామేమి తక్కువకాదన్నట్టు సమాచారాశాఖ మంత్రి కాల్వ శ్రీనివాసులు సైతం రాయదుర్గం నియోజకవర్గానికి నీటిని విడుదల చేయాలంటూ అధికారులపై ఒత్తిడి తీసుకువచ్చారు. నీటికోసం పరిస్థితి పూర్తిగా అదుపుతప్పేలా కనిపించింది. ఈ సమయంలోనే వరుణుడు కరుణించాడు. కుండపోతగా వర్షం కురిపించాడు. తాగునీటి కష్టాలకు , వాటిపై నేతలు చేస్తున్న రాజకీయాలకు చెక్‌ పెట్టాడు. కుండపోతగా కురిసిన వర్షాలతో నీరు పుష్కలంగా ఉండడంతో రైతులు సంతోషం వ్యక్తం చేస్తున్నారు. ఉత్సాహంగా పంటలను సాగు చేసుకుంటున్నారు. మరోవైపు నీటికోసం పాట్లు పడనవసరం లేదని తెలుసుకున్న నేతలు.. నీటి విడుదల అంశాన్ని పూర్తిగా అధికారులకే అప్పగించారు. ప్రాజెక్టుల్లో పెద్ద ఎత్తున నీరు వచ్చి చేరడంతో సమతుల్యత పాటించి నీటిని విడుదల చేయాలని నేతలు కోరుతున్నారు.

18:50 - September 27, 2017

భూపాలపల్లి జయశంకర్ : ప్రభుత్వ పథకాలు అమలు చేసేందుకు అన్ని చర్యలు తీసుకుంటున్నామని జిల్లా కలెక్టర్ ఆకునూరి మురళి అన్నారు. ఈమేరకు ఆయనతో టెన్ టివి ఫేస్ టూ ఫేస్ నిర్వహించింది. ఏజెన్సీలో వైద్యాన్ని మెరుగుపరిచే దిశగా ముందుకు వెళ్తున్నామన్నారు. కొత్త జిల్లాలు ఏర్పాటే దసరాకు ఏడాది పూర్తవుతున్న సందర్భంలో జిల్లాను అభివృద్ధిపథంలో తీసుకెళ్తున్నామని చెప్పారు. మార్చికల్లా ఇంటింటికి నల్లా నీరు ఇవ్వడానికి కృషి చేస్తున్నామని తెలిపారు. మార్చి కల్లా 6వేల డబుల్ బెడ్‌రూం ఇళ్లు పూర్తి చేస్తామని తెలిపారు.

 

21:44 - September 12, 2017

హైదరాబాద్ : తెలుగు భాషకు సంబంధించి తెలంగాణ ప్రభుత్వం కీలక నిర్ణయం తీసుకుంది. వచ్చే విద్యా సంవత్సరం నుంచి అన్ని పాఠశాలలు, జూనియర్‌ కళాశాలల్లో తెలుగును తప్పనిసరి చేసింది. తెలుగును తప్పనిసరిగా బోధించాలని ముఖ్యమంత్రి కేసీఆర్‌ స్పష్టంచేశారు. తెలుగు మహాసభల నిర్వహణపై సమీక్ష సందర్భంగా ఈ నిర్ణయం తీసుకున్నారు. 12వ తరగతి వరకు పాఠ్యాంశంగా తెలుగు కచ్చితంగా బోధించే పాఠశాలలు, కళాశాలలకు మాత్రమే అనుమతి ఇస్తామని పేర్కొన్నారు. దీంతో పాటు అన్ని పాఠశాలల నామ ఫలకాలు కూడా తెలుగులోనే ఉండాలన్నారు. దీంతో పాటు తెలుగు మహాసభలు హైదరాబాద్‌లో డిసెంబర్‌ 15 నుంచి 19 వరకు ఐదు రోజుల పాటు ప్రపంచ తెలుగు మహాసభలు నిర్వహించనున్నారు. ఈ నేపథ్యంలో మహాసభల సన్నాహక కార్యక్రమాలు ప్రారంభించాలని సీఎం అధికారులను ఆదేశించారు. కార్యక్రమ నిర్వహణకు రూ.50కోట్లు మంజూరు చేస్తున్నట్లు ప్రకటించారు. 

 

21:36 - September 12, 2017

హైదరాబాద్ : గుత్తా సుఖేందర్‌రెడ్డిపై హైకోర్టు ఆగ్రహం వ్యక్తం చేసింది. గతంలో సలహాదారుల నియామకాన్ని సవాల్‌ చేస్తూ వేసిన పిటిషన్‌ను... ఉపసంహరించుకున్నట్లు చెప్పడంతో సీరియస్‌ అయ్యింది. మీ రాజకీయాలకు కోర్టును వేదికగా మార్చుకుంటున్నారా ? అని ప్రశ్నించింది. కేసు ఉపసంహరణకు హైకోర్టు నిరాకరించింది. విచారణను కొనసాగిస్తామని హైకోర్టు వెల్లడించింది. 

 

19:04 - September 11, 2017

నల్లగొండ : రాజకీయ దురుద్దేశంతోనే టీఆర్‌ఎస్‌ రైతు సమన్వయ కమిటీలను ఏర్పాటు చేస్తోందని టీపీసీసీ అధ్యక్షుడు ఉత్తమ్‌కుమార్‌రెడ్డి ఆరోపించారు. సమన్వయ కమిటీల్లో అన్ని పార్టీల రైతులు ఉండేలా చూడాలని ఆయన డిమాండ్‌ చేశారు. పంటవేసిన ప్రతి రైతుకు ఎకరానికి 4 వేల రూపాయలు ఇవ్వాలన్నారు. సూర్యాపేట జిల్లా హుజూర్‌నగర్‌లో జీవో 39ను రద్దు చేయాలంటూ కాంగ్రెస్‌ ఆందోళన నిర్వహించింది. అనంతరం తహశీల్దార్‌కు వినతిపత్రం అందించారు.

 

20:16 - September 8, 2017

హైదరాబాద్ : ఉన్న సచివాలయాన్ని సక్రమంగా ఉపయోగించుకుంటే.. కొత్తగా ఎలాంటి బిల్డింగ్‌లు అవసరం లేదన్నారు బీజేపీ తెలంగాణ అధ్యక్షుడు కె.లక్ష్మణ్‌. ఇప్పటికే ఏపీ ప్రభుత్వం ఖాళీచేసిన సచివాలయం గదులు పిచ్చుక గూళ్లుగా మారుతున్నాయని.. వాటికి కొద్దిపాటి మరమ్మతులు చేస్తే సరిపోతుందని తెలిపారు. ఉన్న బిల్డింగ్‌లను వాడుకోకుండా..కొత్తవాటిని నిర్మించి ప్రజాధనాన్ని వృధా చేయొద్దని టీఆర్‌ఎస్‌ ప్రభుత్వానికి హితవు పలికారు లక్ష్మణ్. 

Pages

Don't Miss

Subscribe to RSS - TS politics